༡. པ་རི་མ་ཎྜ་ལ་སི་ཀྑཱ་པ་ད་ཝ་ཎྞ་ནཱ
‘‘ཨ་ནྟ་ར་གྷ་རེ’’ཏི ཝི་སེ་སེ་ཏྭཱ ན ཝུ་ཏྟ་ཏྟཱ ‘‘ཨཱ་རཱ་མེ་པི ཨ་ནྟ་ར་གྷ་རེ་པི ས་བྦ་ཏྠཱ’’ཏི ཝུ་ཏྟཾ. ཨཱ་རཱ་མེ་པཱིཏི བུ་དྡྷཱུ་པ་ཊྛཱ་ནཱ་དི་ཀཱ་ལཾ ས་ནྡྷཱ་ཡ ཝུ་ཏྟཾ. ཡ་ཐཱ ‘‘ཏ་ཏྲི་མེ ཙ་ཏྟཱ་རོ པཱ་རཱ་ཛི་ཀཱ དྷ་མྨཱ ཨུ་དྡེ་སཾ ཨཱ་ག་ཙྪ་ནྟཱི’’ཏི་ཨཱ་དི་ནཱ ཏ་ཏྠ ཏ་ཏྠ པ་རི་ཙྪེ་དོ ཀ་ཏོ, ཨེ་ཝ་མེ་ཏྠཱ་པི ‘‘ཏ་ཏྲི་མེ པ་ཉྩ་ས་ཏྟ་ཏི སེ་ཁི་ཡཱ དྷ་མྨཱ ཨུ་དྡེ་སཾ ཨཱ་ག་ཙྪ་ནྟཱི’’ཏི ཀ་སྨཱ པ་རི་ཙྪེ་དོ ན ཀ་ཏོ་ཏི ཨཱ་ཧ ‘‘ཨེ་ཏྠ ཙཱ’’ཏི་ཨཱ་དི. ཝ་ཏྟ་ཀྑ་ནྡྷ་ཀེ ཝུ་ཏྟ་ཝ་ཏྟཱ་ནི་པཱིཏི ཨཱ་ག་ནྟུ་ཀཱ་ཝཱ་སི་ཀ་ག་མི་ཀཱ་ནུ་མོ་ད་ན་བྷ་ཏྟ་གྒ་པི་ཎྜ་ཙཱ་རི་ཀཱ་ར་ཉྙ་སེ་ནཱ་ས་ན་ཛ་ནྟཱ་གྷ་ར་ཝ་ཙྩ་ཀུ་ཊི་ཨུ་པ་ཛ྄ཛྷཱ་ཙ་རི་ཡ་ས་དྡྷི་ཝི་ཧཱ་རི་ཀ་ཨ་ནྟེ་ཝཱ་སི་ཀ་ཝ་ཏྟཱ་ནི. ཨི་ད་ཉྩ ནི་ད་སྶ་ན་མ་ཏྟཾ ཨ་ཉྙེ་ས་མྤི ཁ་ནྡྷ་ཀ་ཝ་ཏྟཱ་ནཾ ཨེ་ཏྠེ་ཝ ས་ངྒ་ཧ་སྶ ཨི་ཙྪི་ཏ་བྦ་ཏྟཱ. ཨ་ཡ་ཉྷེ་ཏྠ ཨ་དྷི་པྤཱ་ཡོ – སེ་ཁི་ཡ་གྒ་ཧ་ཎེ་ན ཙེ་ཏྠ ཝ་ཏྟ་ཀྑ་ནྡྷ་ཀཱདཱི་སུ (ཙཱུ་ལ༹་ཝ. ༣༥༦ ཨཱ་ད་ཡོ) ཨཱ་ག་ཏ་ཝ་ཏྟཱ་དཱི་ན་མྤི ག་ཧ་ཎཾ. ཏེ་པི ཧི སི་ཀྑི་ཏ་བྦ་ཊྛེ་ན ‘‘སེ་ཁི་ཡཱ’’ཏི ཨི་ཙྪི་ཏཱ. ཏ་སྨཱ མཱ་ཏི་ཀཱ་ཡཾ པཱ་རཱ་ཛི་ཀཱ་དཱི་ནཾ ཝི་ཡ སེ་ཁི་ཡཱ་ནཾ པ་རི་ཙྪེ་དོ ན ཀ་ཏོ་ཏི. ན ཀེ་ཝ་ལཾ ཝ་ཏྟ་ཀྑ་ནྡྷ་ཀཱདཱི་སུ (ཙཱུ་ལ༹་ཝ. ༣༥༦ ཨཱ་ད་ཡོ) ཨཱ་ག་ཏ་ཝ་ཏྟཱ་དཱི་ནཾ ག་ཧ་ཎ་ཏྠ་མེ་ཝཱ་ཏི ཨཱ་ཧ ‘‘ཙཱ་རི་ཏྟ་ཝི་ན་ཡ་ད་སྶ་ན་ཏྠ་ཉྩཱ’’ཏི. ཨེ་ཏྠཱ་པི པ་རི་ཙྪེ་དོ ན ཀ་ཏོཏི ཨཱ་ནེ་ཏྭཱ ཡོ་ཛེ་ཏ་བྦཾ. མཱ་ཏི་ཀཱ་ཡ ‘‘དུ་ཀྐ་ཊ’’ནྟི ཨ་ཝུ་ཏྟེ ཀ་ཐཾ པ་ནེ་ཏྠ དུ་ཀྐ་ཊ་ནྟི ཝེ་དི་ཏ་བྦ་ནྟི ཨཱ་ཧ ‘‘ཡོ པ་ནཱ’’ཏི་ཨཱ་དི.
ཨ་ཊྛ་ངྒུ་ལ་མ་ཏྟནྟི པ་ཀ་ཏ་ངྒུ་ལེ་ན ཨ་ཊྛ་ངྒུ་ལ་མ་ཏྟཾ. ཡོ པ་ན སུ་ཀྑ་ཛ་ངྒྷོ ཝཱ མ་ཧཱ་པི་ཎྜི་ཀ་མཾ་སོ ཝཱ ཧོ་ཏི, ཏ་སྶ སཱ་རུ་པྤ་ཏྠཱ་ཡ ཨ་ཊྛ་ངྒུ་ལཱ་དྷི་ཀ་མྤི ཨོ་ཏཱ་རེ་ཏྭཱ ནི་ཝཱ་སེ་ཏུཾ ཝ་ཊྚ་ཏི.
པཱ་ས་ནྟནྟི པཱ་ས་སྶ ཨ་ནྟཾ, ད་སཱ་མཱུ་ལ་ནྟི ཨ་ཏྠོ.
ཨ་པ་རི་མ་ཎྜ་ལཾ ནི་ཝཱ་སེ་སྶཱ་མཱིཏི ‘‘པུ་ར་ཏོ ཝཱ པ་ཙྪ་ཏོ ཝཱ ཨོ་ལ་མྦེ་ཏྭཱ ནི་ཝཱ་སེ་སྶཱ་མཱི’’ཏི ཨེ་ཝཾ ཨ་ས་ཉྩི་ཙྩ. ཀི་ཉྩཱ་པི པ་རི་མ་ཎྜ་ལཾ ནི་ཝཱ་སེ་ཏུཾ ཨ་ཛཱ་ན་ནྟ་སྶ ཨ་ནཱ་པ་ཏྟི, ཏ་ཐཱ་པི ནི་ཝཱ་ས་ན་ཝ་ཏྟཾ སཱ་དྷུ་ཀཾ ཨུ་གྒ་ཧེ་ཏ་བྦ་མེ་ཝ. ས་ཉྩི་ཙྩ ཨ་ནུ་གྒ་ཧ་ཎ་ཉྷི ཨ་ནཱ་ད་རི་ཡཾ སི་ཡཱ་ཏི ཨཱ་ཧ ‘‘ཨ་པི་ཙ ནི་ཝཱ་ས་ན་ཝ་ཏྟཾ ཨུ་གྒ་ཧེ་ཏ་བྦ’’ནྟི.
པ་རི་མ་ཎྜ་ལ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.