༥. ཨཱུ་ན་ཝཱི་ས་ཏི་ཝ་སྶ་སི་ཀྑཱ་པ་ད་ཝ་ཎྞ་ནཱ

པ་ཉྩ་མེ ཨཱུ་ན་ཝཱི་ས་ཏི་ཝ་སྶནྟི པ་ཊི་ས་ནྡྷི་གྒ་ཧ་ཎ་ཏོ པ་ཊྛཱ་ཡ ཨ་པ་རི་པུ་ཎྞ་ཝཱི་ས་ཏི་ཝ་སྶཾ. ཨུ་པ་ས་མྤཱ་དེ་ཡྻཱཏི ཨུ་པ་ཛ྄ཛྷཱ་ཡོ ཧུ་ཏྭཱ ཨུ་པ་ས་མྤཱ་དེ་ཡྻ. སོ ཙ པུ་གྒ་ལོ ཨ་ནུ་པ་ས་མྤ་ནྣོཏི ཛཱ་ན་ནྟེ་ནཱ་པི ཨ་ཛཱ་ན་ནྟེ་ནཱ་པི ཨུ་པ་ས་མྤཱ་དི་ཏོ ཨ་ནུ་པ་ས་མྤ་ནྣོ་ཝ. ས་ཙེ པ་ན སོ ད་ས་ཝ་སྶ་ཙྩ་ཡེ་ན ཨ་ཉྙཾ ཨུ་པ་ས་མྤཱ་དེ་ཏི, ཏ་ཉྩེ མུ་ཉྩི་ཏྭཱ ག་ཎོ པཱུ་ར་ཏི, སཱུ་པ་ས་མྤ་ནྣོ. སོ་པི ཡཱ་ཝ ན ཛཱ་ནཱ་ཏི, ཏཱ་ཝ ཏ་སྶ ནེ་ཝ ས་གྒ་ནྟ་རཱ་ཡོ ན མོ་ཀྑ་ནྟ་རཱ་ཡོ, ཉ་ཏྭཱ པ་ན པུ་ན ཨུ་པ་ས་མྤ་ཛྫི་ཏ་བྦཾ. ཏེ ཙ བྷི་ཀྑཱུ གཱ་ར་ཡ྄ཧཱཏི ཋ་པེ་ཏྭཱ ཨུ་པ་ཛ྄ཛྷཱ་ཡཾ ཨ་ཝ་སེ་སཱ གཱ་ར་ཡ྄ཧཱ ཧོ་ནྟི, ས་བྦེ དུ་ཀྐ་ཊཾ ཨཱ་པ་ཛྫ་ནྟི. ཨི་དཾ ཏ་སྨིཾ པཱ་ཙི་ཏྟི་ཡནྟི ཡོ པ་ན ཨུ་པ་ཛ྄ཛྷཱ་ཡོ ཧུ་ཏྭཱ ཨུ་པ་ས་མྤཱ་དེ་ཏི, ཏ་སྨིཾ་ཡེ་ཝ པུ་གྒ་ལེ ཨི་དཾ པཱ་ཙི་ཏྟི་ཡཾ ཝེ་དི་ཏ་བྦཾ. ཏ་སྨཱ ཡོ ‘‘ཨེ་ཝཾ ཨུ་པ་ས་མྤཱ་དེ་སྶཱ་མཱི’’ཏི ག་ཎཾ ཝཱ ཨཱ་ཙ་རི་ཡཾ ཝཱ པ་ཏྟཾ ཝཱ ཙཱི་ཝ་རཾ ཝཱ པ་རི་ཡེ་ས་ཏི, སཱི་མཾ ཝཱ ས་མྨ་ནྣ་ཏི (པཱ་ཙི. ༤༠༤), ཨུ་ད་ཀུ་ཀྑེ་པཾ ཝཱ པ་རི་ཙྪི་ནྡ་ཏི, སོ ཨེ་ཏེ་སུ ས་བྦ་ཀི་ཙྩེ་སུ ཉ་ཏྟི་ཡཱ, དྭཱི་སུ ཙ ཀ་མྨ་ཝཱ་ཙཱ་སུ དུ་ཀྐ་ཊཱ་ནི ཨཱ་པ་ཛྫི་ཏྭཱ ཀ་མྨ་ཝཱ་ཙཱ་པ་རི་ཡོ་སཱ་ནེ པཱ་ཙི་ཏྟི་ཡཾ ཨཱ་པ་ཛྫ་ཏི.

རཱ་ཛ་ག་ཧེ ས་མྦ་ཧུ་ལེ བྷི་ཀྑཱུ ཨཱ་ར་བྦྷ ཨཱུ་ན་ཝཱི་ས་ཏི་ཝ་སྶཾ ཨུ་པ་ས་མྤཱ་ད་ན་ཝ་ཏྠུ་སྨིཾ པ་ཉྙ་ཏྟཾ, ཨ་སཱ་དྷཱ་ར་ཎ་པ་ཉྙ་ཏྟི, ཨ་ནཱ་ཎ་ཏྟི་ཀཾ, ཨཱུ་ན་ཝཱི་ས་ཏི་ཝ་སྶེ ཝེ་མ་ཏི་ཀ་སྶ, པ་རི་པུ་ཎྞ་ཝཱི་ས་ཏི་ཝ་སྶེ ཨཱུ་ན་ཀ་ས་ཉྙི་ནོ, ཝེ་མ་ཏི་ཀ་སྶ ཙ དུ་ཀྐ་ཊཾ. ཨུ་བྷ་ཡ་ཏྠ པ་རི་པུ་ཎྞ་ས་ཉྙི་སྶ, ཨུ་མྨ་ཏྟ་ཀཱ་དཱི་ན་ཉྩ ཨ་ནཱ་པ་ཏྟི. ཨཱུ་ན་ཝཱི་ས་ཏི་ཝ་སྶ་ཏཱ, ཨཱུ་ན་ཀ་ས་ཉྙི་ཏཱ, ཨུ་པ་ས་མྤཱ་ད་ན་ནྟི ཨི་མཱ་ནེ་ཏྠ ཏཱི་ཎི ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨ་དི་ནྣཱ་དཱ་ན་ས་དི་སཱ་ནི, ཨི་དཾ པ་ན པ་ཎྞ་ཏྟི་ཝ་ཛྫཾ, ཏི་ཙི་ཏྟཾ, ཏི་ཝེ་ད་ན་ནྟི.

ཨཱུ་ན་ཝཱི་ས་ཏི་ཝ་སྶ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.