༦. ཐེ་ཡྻ་ས་ཏྠ་སི་ཀྑཱ་པ་ད་ཝ་ཎྞ་ནཱ

ཚ་ཊྛེ ཡེ རཱ་ཛཱ་ནཾ ཝཱ ཝ་ཉྩེ་ཏྭཱ སུ་ངྐཾ ཝཱ པ་རི་ཧ་རི་ཏུ་ཀཱ་མཱ ཙོ་རཱ ཀ་ཏ་ཀ་མྨཱ ཙེ་ཝ ཨ་ཀ་ཏ་ཀ་མྨཱ ཙ མ་གྒ་པྤ་ཊི་པ་ནྣཱ, ཏེ་སུ ཨི་དྷ ཐེ་ཡྻ་ས་ཏྠས་ཉྙི་ནོ ཏ་སྶ ཐེ་ཡྻ་ས་ཏྠ་བྷཱ་ཝཾ ཉ་ཏྭཱ ཏེ་ན ས་དྡྷིཾ སཾ་ཝི་དྷཱ་ཡ ག་ཙྪ་ནྟ་སྶ སཾ་ཝི་དྷཱ་ནེ ཙ ག་མ་ནེ ཙ ཨོ་ཝཱ་ད་ཝ་གྒེ ཝུ་ཏྟ་ན་ཡེ་ན ཨཱ་པ་ཏྟི་ཝི་ནི་ཙྪ་ཡོ ཝེ་དི་ཏ་བྦོ.

སཱ་ཝ་ཏྠི་ཡཾ ཨ་ཉྙ་ཏ་རཾ བྷི་ཀྑུཾ ཨཱ་ར་བྦྷ ཐེ་ཡྻ་ས་ཏྠེ་ན ས་དྡྷིཾ སཾ་ཝི་དྷཱ་ཡ ཨེ་ཀ་དྡྷཱ་ན་མ་གྒཾ པ་ཊི་པ་ཛྫ་ན་ཝ་ཏྠུ་སྨིཾ པ་ཉྙ་ཏྟཾ, སཱ་དྷཱ་ར་ཎ་པ་ཉྙ་ཏྟི, ཨ་ནཱ་ཎ་ཏྟི་ཀཾ, མ་ནུ་སྶེ་སུ ཨ་སཾ་ཝི་ད་ཧ་ནྟེ་སུ ས་ཡ་མེ་ཝ སཾ་ཝི་ད་ཧི་ཏྭཱ ག་ཙྪ་ནྟ་སྶ, ཐེ་ཡྻ་ས་ཏྠེ ཝེ་མ་ཏི་ཀ་སྶ, ཨ་ཐེ་ཡྻ་ས་ཏྠེ ཐེ་ཡྻ་ས་ཏྠ་ས་ཉྙི་ནོ, ཝེ་མ་ཏི་ཀ་སྶ ཙ དུ་ཀྐ་ཊཾ. ཨ་ཐེ་ཡྻ་ས་ཏྠ་ས་ཉྙི་སྶ, ཨ་སཾ་ཝི་ད་ཧི་ཏྭཱ ཝཱ ཀཱ་ལ་ཝི་ས་ངྐེ་ཏེ་ན ཝཱ, ཨཱ་པ་དཱ་སུ ཝཱ, ག་ཙྪ་ནྟ་སྶ, ཨུ་མྨ་ཏྟ་ཀཱ་དཱི་ན་ཉྩ ཨ་ནཱ་པ་ཏྟི. ཐེ་ཡྻ་ས་ཏྠ་བྷཱ་ཝོ, ཛཱ་ན་ནཾ, སཾ་ཝི་དྷཱ་ནཾ, ཨ་ཝི་ས་ངྐེ་ཏེ་ན ག་མ་ན་ནྟི ཨི་མཱ་ནེ་ཏྠ ཙ་ཏྟཱ་རི ཨ་ངྒཱ་ནི. ཐེ་ཡྻ་ས་ཏྠ་ས་མུ་ཊྛཱ་ནཾ, ཀི་རི་ཡཾ, ས་ཉྙཱ་ཝི་མོ་ཀྑཾ, ས་ཙི་ཏྟ་ཀཾ, པ་ཎྞ་ཏྟི་ཝ་ཛྫཾ, ཀཱ་ཡ་ཀ་མྨཾ, ཝ་ཙཱི་ཀ་མྨཾ, ཏི་ཙི་ཏྟཾ, ཏི་ཝེ་ད་ན་ནྟི.

ཐེ་ཡྻ་ས་ཏྠ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.