༤. དུ་ཊྛུ་ལླ་སི་ཀྑཱ་པ་ད་ཝ་ཎྞ་ནཱ

ཙ་ཏུ་ཏྠེ དུ་ཊྛུ་ལླནྟི ས་ངྒྷཱ་དི་སེ་སཾ ཨ་དྷི་པྤེ་ཏཾ, ཏཾ ཡེ་ན ཀེ་ན་ཙི ཨུ་པཱ་ཡེ་ན ཉ་ཏྭཱ པ་ཊི་ཙྪཱ་དེ་ནྟ་སྶ པཱ་ཙི་ཏྟི་ཡཾ. ས་ཙེ་པི ‘‘ན དཱ་ནི ནཾ ཀ་སྶ་ཙི བྷི་ཀྑུ་ནོ ཨཱ་རོ་ཙེ་སྶཱ་མཱི’’ཏི དྷུ་རཾ ནི་ཀྑི་པི་ཏྭཱ པ་ཙྪཱ ཨཱ་རོ་ཙེ་ཏི, པཱ་ཙི་ཏྟི་ཡཾ, ཨཱ་པ་ཛྫི་ཏྭཱ་ཝ ཨཱ་རོ་ཙེ་སྶ་ཏི. ས་ཙེ པ་ན ཨེ་ཝཾ དྷུ་རཾ ནི་ཀྑི་པི་ཏྭཱ པ་ཊི་ཙྪཱ་ད་ན་ཏྠ་མེ་ཝ ཨ་ཉྙ་སྶ ཨཱ་རོ་ཙེ་ཏི, སོ་པི ཨ་ཉྙ་སྶཱ་ཏི ཨེ་ཏེ་ནུ་པཱ་ཡེ་ན ས་མ་ཎ་ས་ཏ་མྤི ཨཱ་པ་ཛྫ་ཏི་ཡེ་ཝ ཏཱ་ཝ, ཡཱ་ཝ ཀོ་ཊི ན ཚི་ཛྫ་ཏི. ཀ་ཐཾ པ་ན ཀོ་ཊི ཚི་ཛྫ་ཏི? ས་ཙེ ཧི ཨཱ་པ་ནྣོ ཨེ་ཀ་སྶ ཨཱ་རོ་ཙེ་ཏི, སོ་པི ཨ་ཉྙ་སྶ ཨཱ་རོ་ཙེ་ཏི, སོ ནི་ཝ་ཏྟི་ཏྭཱ ཡེ་ན་སྶ ཨཱ་རོ་ཙི་ཏཾ, ཏ་སྶེ་ཝ ཨཱ་རོ་ཙེ་ཏི, ཨེ་ཝཾ ཏ་ཏི་ཡེ་ན པུ་གྒ་ལེ་ན དུ་ཏི་ཡ་སྶ ཨཱ་རོ་ཙི་ཏེ ཀོ་ཊི ཚི་ནྣཱ ཧོ་ཏི.

སཱ་ཝ་ཏྠི་ཡཾ ཨ་ཉྙ་ཏ་རཾ བྷི་ཀྑུཾ ཨཱ་ར་བྦྷ དུ་ཊྛུ་ལླཱ་པ་ཏྟི་པ་ཊི་ཙྪཱ་ད་ན་ཝ་ཏྠུ་སྨིཾ པ་ཉྙ་ཏྟཾ, ཨ་སཱ་དྷཱ་ར་ཎ་པ་ཉྙ་ཏྟི, ཨ་ནཱ་ཎ་ཏྟི་ཀཾ, དུ་ཊྛུ་ལླཱ་ཡ ཨཱ་པ་ཏྟི་ཡཱ ཨཱ་དི་པ་དེ པཱ་ཙི་ཏྟི་ཡཾ, ཨི་ཏ་རེ་སུ དྭཱི་སུ དུ་ཀྐ་ཊཾ, ཨ་དུ་ཊྛུ་ལླཱ་ཡ ཏི་ཀ་དུ་ཀྐ་ཊཾ, ཨ་ནུ་པ་ས་མྤ་ནྣ་སྶ དུ་ཊྛུ་ལླེ ཝཱ ཨ་དུ་ཊྛུ་ལླེ ཝཱ ཨ་ཛ྄ཛྷཱ་ཙཱ་རེ དུ་ཀྐ་ཊ་མེ་ཝ. ‘‘ས་ངྒྷ་སྶ བྷ་ཎྜ་ནཱ་དཱི་ནི བྷ་ཝི་སྶ་ནྟཱི’’ཏི (པཱ་ཙི. ༤༠༡) ཝཱ ‘‘ཨ་ཡཾ ཀ་ཀྑ་ལོ༹ ཕ་རུ་སོ ཛཱི་ཝི་ཏ་ནྟ་རཱ་ཡཾ ཝཱ བྲ་ཧྨ་ཙ་རི་ཡ་ནྟ་རཱ་ཡཾ ཝཱ ཀ་རི་སྶ་ཏཱི’’ཏི ཝཱ ཨ་ནཱ་རོ་ཙེ་ནྟ་སྶ, པ་ཏི་རཱུ་པཾ བྷི་ཀྑུཾ ཨ་པ་སྶ་ཏོ, ན ཚཱ་དེ་ཏུ་ཀཱ་མ་སྶ, ‘‘པ་ཉྙཱ་ཡི་སྶ་ཏི ས་ཀེ་ན ཀ་མྨེ་ནཱ’’ཏི ཨ་ནཱ་རོ་ཙེ་ནྟ་སྶ, ཨུ་མྨ་ཏྟ་ཀཱ་དཱི་ན་ཉྩ ཨ་ནཱ་པ་ཏྟི. ཨུ་པ་ས་མྤ་ནྣ་སྶ དུ་ཊྛུ་ལླཱ་པ་ཏྟི་ཛཱ་ན་ནཾ, ‘‘པ་ཊི་ཙྪཱ་དེ་ཏུ་ཀཱ་མ་ཏཱ་ཡ ནཱ་རོ་ཙེ་སྶཱ་མཱི’’ཏི དྷུ་ར་ནི་ཀྑེ་པོ་ཏི ཨི་མཱ་ནེ་ཏྠ དྭེ ཨ་ངྒཱ་ནི. ས་མུ་ཊྛཱ་ནཱ་དཱི་ནི ས་མ་ནུ་བྷཱ་ས་ན་ས་ཨ་སཱ་ནེ་ཝཱ་ཏི.

དུ་ཊྛུ་ལླ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.