ན་ཝ་ཀ་ཝ་ཎྞ་ནཱ
༣༤༠. ཝ་ས་ཏི ཏ་ཏྠ ཕ་ལཾ ཏ་ནྣི་མི་ཏྟ་ཀ་ཏཱ་ཡ པ་ཝ་ཏྟ་ཏཱི་ཏི ཝ་ཏྠུ, ཀཱ་ར་ཎ་ནྟི ཝུ་ཏྟོ་ཝཱ་ཡ་མ་ཏྠོ. ཏེ་ནཱ་ཧ ‘‘ཨཱ་གྷཱ་ཏ་ཝ་ཏྠཱུ་ནཱི་ཏི ཨཱ་གྷཱ་ཏ་ཀཱ་ར་ཎཱ་ནཱི’’ཏི. ཀོ་པོ ནཱ་མཱ་ཡཾ ཡ་སྨིཾ ཝ་ཏྠུ་སྨིཾ ཨུ་པྤ་ཛྫ་ཏི, ན ཏ་ཏྠ ཨེ་ཀ་ཝཱ་ར་མེ་ཝ ཨུ་པྤ་ཛྫ་ཏི, ཨ་ཐ ཁོ པུ་ན་པི ཨུ་པྤ་ཛྫ་ཏེ་ཝཱ་ཏི ཝུ་ཏྟཾ ‘‘བ་ནྡྷ་ཏཱི’’ཏི. ཨ་ཐ ཝཱ ཡོ པ་ཙྩ་ཡ་ཝི་སེ་སེ་ན ཨུ་པྤ་ཛྫ་མཱ་ནོ ཨཱ་གྷཱ་ཏོ ས་ཝི་ས་ཡེ བ་དྡྷོ ཝི་ཡ ན ཝི་ག་ཙྪ་ཏི, པུ་ན་པི ཨུ་པྤ་ཛྫེ་ཡྻེ་ཝ, ཏཾ ས་ནྡྷཱ་ཡཱ་ཧ ‘‘ཨཱ་གྷཱ་ཏཾ བ་ནྡྷ་ཏཱི’’ཏི. ཏཾ པ་ན་སྶ པ་ཙྩ་ཡ་ཝ་སེ་ན ནི་བྦ་ཏྟ་ནཾ ཨུ་པྤཱ་ད་ན་མེ་ཝཱ་ཏི ཝུ་ཏྟཾ ‘‘ཀ་རོ་ཏི ཨུ་པྤཱ་དེ་ཏཱི’’ཏི.
ཏཾ ཀུ་ཏེ་ཏྠ ལ་བྦྷཱཏི ཨེ་ཏྠ ཏནྟི ཀི་རི་ཡཱ་པ་རཱ་མ་ས་ནཾ, པ་ད་ཛ྄ཛྷཱ་ཧཱ་རེ་ན ཙ ཨ་ཏྠོ ཝེ་དི་ཏ་བྦོ་ཏི ད་སྶེ་ནྟོ ‘‘ཏཾ ཨ་ན་ཏྠ་ཙ་ར་ཎཾ མཱ ཨ་ཧོ་སཱི’’ཏི་ཨཱ་དི་མཱ་ཧ. ཀེ་ན ཀཱ་ར་ཎེ་ན ལ་དྡྷ་བྦཾ ནི་ར་ཏྠ་ཀ་བྷཱ་ཝ་ཏོ. ཀ་མྨ་སྶ་ཀཱ ཧི ས་ཏྟཱ, ཏེ ཀ་སྶ རུ་ཙི་ཡཱ དུ་ཀྑི་ཏཱ, སུ་ཁི་ཏཱ ཝཱ བྷ་ཝ་ནྟི, ཏ་སྨཱ ཀེ་ཝ་ལཾ ཏ་སྨིཾ མ་ཡ྄ཧཾ ཀུ་ཛ྄ཛྷ་ན་མ་ཏྟཾ ཨེ་ཝཱ་ཏི ཨ་དྷི་པྤཱ་ཡོ. ཨ་ཐ ཝཱ ཏཾ ཀོ་པ་ཀ་ར་ཎ་མེ་ཏྠ པུ་གྒ་ལེ ཀུ་ཏོ ལ་བྦྷཱ པ་ར་མ་ཏྠ་ཏོ ཀུ་ཛ྄ཛྷི་ཏ་བྦ་སྶ, ཀུ་ཛ྄ཛྷ་ན་ཀ་སྶ ཙ ཨ་བྷཱ་ཝ་ཏོ. ས་ངྑཱ་ར་མ་ཏྟ་ཉྷེ་ཏཾ, ཡ་དི་དཾ ཁ་ནྡྷ་པ་ཉྩ་ཀཾ. ཡཾ ‘‘ས་ཏྟོ’’ཏི ཝུ་ཙྩ་ཏི, ཏེ ས་ངྑཱ་རཱ ཨི་ཏྟ་ར་ཀཱ་ལཱ ཁ་ཎི་ཀཱ, ཀ་སྶ ཀོ ཀུ་ཛ྄ཛྷ་ཏཱི་ཏི ཨ་ཏྠོ. ལཱ་བྷཱ ནཱ་མ ཀེ སི་ཡུཾ ཨ་ཉྙ་ཏྲ ཨ་ནུ་པྤ་ཏྟི་ཏོ.
༣༤༡. ས་ཏྟཱ ཨཱ་ཝ་ས་ནྟི ཨེ་ཏེ་སཱུ་ཏི ས་ཏྟཱ་ཝཱ་སཱ. ནཱ་ན་ཏྟ་ཀཱ་ཡཱ ནཱ་ན་ཏྟ་ས་ཉྙཱི ཨཱ་དི་བྷེ་དཱ ས་ཏྟ་ནི་ཀཱ་ཡཱ. ཡ་སྨཱ ཏེ ཏེ ས་ཏྟ་ནི་ཀཱ་ཡཱ ཏ་པྤ་རི་ཡཱ་པ་ནྣཱ་ནཾ ས་ཏྟཱ་ནཾ ཏཱ་ཡ ཨེ་ཝ ཏ་པྤ་རི་ཡཱ་པ་ནྣ་ཏཱ་ཡ ཨཱ་དྷཱ་རོ ཝི་ཡ ཝ་ཏྟ་བྦ་ཏཾ ཨ་ར་ཧ་ནྟི ས་མུ་དཱ་ཡཱ་དྷཱ་ར་ཏཱ་ཡ ཨ་ཝ་ཡ་ཝ་སྶ ཡ་ཐཱ ‘‘རུ་ཀྑེ སཱ་ཁཱ’’ཏི, ཏ་སྨཱ ‘‘ས་ཏྟཱ་ནཾ ཨཱ་ཝཱ་སཱ, ཝ་ས་ན་ཊྛཱ་ནཱ་ནཱི་ཏི ཨ་ཏྠོ’’ཏི ཝུ་ཏྟཾ. སུ་དྡྷཱ་ཝཱ་སཱ་པི ས་ཏྟཱ་ཝཱ་སོ་ཝ ‘‘ན སོ, བྷི་ཀྑ་ཝེ, ས་ཏྟཱ་ཝཱ་སོ སུ་ལ་བྷ་རཱུ་པོ, ཡོ མ་ཡཱ ཨ་ནཱ་ཝུ་ཏྠ་པུ་བྦོ ཨི་མི་ནཱ དཱི་གྷེ་ན ཨ་དྡྷུ་ནཱ ཨ་ཉྙ་ཏྲ སུ་དྡྷཱ་ཝཱ་སེ་ཧི དེ་ཝེ་ཧཱི’’ཏི ཝ་ཙ་ན་ཏོ. ཡ་དི ཨེ་ཝཾ ཀ་སྨཱ ཨི་དྷ ན ག་ཧི་ཏཱ་ཏི ཏ་ཏྠ ཀཱ་ར་ཎ་མཱ་ཧ ‘‘ཨ་ས་བྦ་ཀཱ་ལི་ཀ་ཏྟཱ’’ཏི་ཨཱ་དི. ཝེ་ཧ་པྥ་ལོ པ་ན ཙ་ཏུ་ཏྠཾ་ཡེ་ཝ ས་ཏྟཱ་ཝཱ་སཾ བྷ་ཛ་ཏཱི་ཏི ད་ཊྛ་བྦཾ.
༣༤༢. ཨོ་པ་ས་མི་ཀོཏི ཝ་ཊྚ་དུ་ཀྑ་སྶ ཨུ་པ་ས་མཱ་ཝ་ཧོ, ཏཾ པ་ན ཝ་ཊྚ་དུ་ཀྑཾ ཀི་ལེ་སེ་སུ ཨུ་པ་ས་ནྟེ་སུ ཨུ་པ་ས་མ་ཏི, ན ཨ་ཉྙ་ཐཱ, ཏ་སྨཱ ‘‘ཀི་ལེ་སཱུ་པ་ས་མ་ཀ་རོ’’ཏི ཝུ་ཏྟཾ. ཏ་ཀྐ་རཾ ས་མྦོ་དྷཾ ག་མེ་ཏཱི་ཏི ས་མྦོ་དྷ་གཱ་མཱི.
ཡ་སྨིཾ དེ་ཝ་ནི་ཀཱ་ཡེ དྷ་མྨ་དེ་ས་ནཱ ན ཝི་ཡུ་ཛྫ་ཏི ས་ཝ་ན་སྶེ་ཝ ཨ་བྷཱ་ཝ་ཏོ, སོ པཱ་ལི༹་ཡཾ ‘‘དཱི་གྷཱ་ཡུ་ཀོ དེ་ཝ་ནི་ཀཱ་ཡོ’’ཏི ཨ་དྷི་པྤེ་ཏོ་ཏི ཨཱ་ཧ ‘‘ཨ་ས་ཉྙ་བྷ་ཝཾ ཝཱ ཨ་རཱུ་པ་བྷ་ཝཾ ཝཱ’’ཏི.
༣༤༣. ཨ་ནུ་པུ་བྦ་ཏོ ཝི་ཧ་རི་ཏ་བྦཱ་ཏི ཨ་ནུ་པུ་བྦ་ཝི་ཧཱ་རཱ. ཨ་ནུ་པ་ཊི་པཱ་ཊི་ཡཱཏི ཨ་ནུ་ཀྐ་མེ་ན. ས་མཱ་པ་ཛྫི་ཏ་བྦ་ཝི་ཧཱ་རཱཏི ས་མཱ་པ་ཛྫི་ཏྭཱ ས་མ་ངྒི་ནོ ཧུ་ཏྭཱ ཝི་ཧ་རི་ཏ་བྦ་ཝི་ཧཱ་རཱ.
༣༤༤. ཨ་ནུ་པུ་བྦ་ནི་རོ་དྷཱཏི ཨ་ནུ་པུ་བྦེ་ན ཨ་ནུ་ཀྐ་མེ་ན པ་ཝ་ཏྟེ་ཏ་བྦ་ནི་རོ་དྷཱ. ཏེ་ནཱ་ཧ ‘‘ཨ་ནུ་པ་ཊི་པཱ་ཊི་ཡཱ ནི་རོ་དྷཱ’’ཏི.
ན་ཝ་ཀ་ཝ་ཎྞ་ནཱ ནི་ཊྛི་ཏཱ.