༣. པ་ཙྩ་ཡ་ཝཱ་ར་ཝ་ཎྞ་ནཱ

༢༤༣. པ་ཙྩ་ཡཱཏི ཨེ་ཏྠ པ་ཏི ཨ་ཡོ པ་ཙྩ་ཡོ. པ་ཏི-ས་དྡོ པ་ཏི་ཊྛ་ཏྠཾ དཱི་པེ་ཏི, ཨ་ཡ-ས་དྡོ ག་ཏིཾ, པ་ཏི་ཊྛཱ་བྷཱུ་ཏཱ ག་ཏི ནི་སྶ་ཡོ པ་ཙྩ་ཡོ་ཏི ཝུ་ཏྟཾ ཧོ་ཏི, ཏ་ཏོ པ་ཙྩ་ཡཱ, པ་ཙྩ་ཡ་ཀ་ར་ཎ་ཏོ ཏ་དཱ་ཡ་ཏྟ་བྷཱ་ཝ་ག་མ་ན་ཏོ ཝཱ་ཏི ཨ་ཏྠོ.

‘‘མ་ཧཱ་བྷཱུ་ཏེ པ་ཙྩ་ཡཱ ཙི་ཏྟ་ས་མུ་ཊྛཱ་ནཾ རཱུ་པ’’ནྟི (པ་ཊྛཱ. ༡.༡.༢༤༥) བྷཱུ་ཏུ་པཱ་དཱ་རཱུ་པཱ་ནི ས་ཧ ས་ངྒ་ཎྷི་ཏྭཱ ཝུ་ཏྟཾ. ཨ་ཊྛ་ཀ་ཐཱ་ཡཾ པ་ན ཙི་ཏྟ་ས་མུ་ཊྛཱ་ནེ ཙ མ་ཧཱ་བྷཱུ་ཏེ ནི་སྶཱ་ཡ ཙི་ཏྟ་ས་མུ་ཊྛཱ་ནཾ ཨུ་པཱ་དཱ་རཱུ་པནྟི ས་ཡཾ ནི་སྶ་ཡོ ཨ་ཧུ་ཏྭཱ ནི་སྶ་ཡེ ཨུ་པྤ་ཛྫ་མཱ་ནེ་ན ཨུ་པཱ་དཱ་རཱུ་པེ་ན ནི་ད་སྶ་ནཾ ཀ་ཏ་ནྟི ད་ཊྛ་བྦཾ.

༢༥༥. ཨ་ས་ཉྙ…པེ… ཀ་ཊ་ཏྟཱ་རཱུ་པཾ ཨུ་པཱ་དཱ་རཱུ་པནྟི ཨེ་ཏྠ ཡོ པ་ཊི་ཙྩ་ཝཱ་རེ ས་ཧ་ཛཱ་ཏེ ཀ་མྨ་ཨུ་ཏུ་ཛཱ་ནཾ, ཀ་མྨེ ཙ ཨེ་ཀ་ནྟཱ་ནེ་ཀ་ནྟ་ཀ་མྨ་ཛཱ་ནཾ ཝ་སེ་ན ཨ་ཏྠོ ཝུ་ཏྟོ, སོ ནཱ་དྷི་པྤེ་ཏོ ཨེ་ཝ ‘‘ཀ་ཊ་ཏྟཱ་རཱུ་པ’’ནྟི ཀ་མྨ་ས་མུ་ཊྛཱ་ན་རཱུ་པ་སྶེ་ཝ ས་བྦ་སྶ ཙ ག་ཧི་ཏ་ཏྟཱ་ཏི ཏཾ པ་ཧཱ་ཡ ཡ་ཐཱ་ག་ཧི་ཏ་སྶ ཀ་ཊ་ཏྟཱ་རཱུ་པ་སྶ ཝི་སེ་ས་ན་ཝ་སེ་ན ‘‘ཨུ་པཱ་དཱ་རཱུ་པ་ས་ངྑཱ་ཏཾ ཀ་ཊ་ཏྟཱ་རཱུ་པ’’ནྟི ཨ་ཏྠ་མཱ་ཧ. མ་ཧཱ་བྷཱུ་ཏེ པ་ན པ་ཊི་ཙྩ པ་ཙྩ་ཡཱ ཙ མ་ཧཱ་བྷཱུ་ཏཱ་ནཾ ཨུ་པྤ་ཏྟི ན ནི་ཝཱ་རེ་ཏ་བྦཱ་ཏི ཨུ་པཱ་དཱ་རཱུ་པ་གྒ་ཧ་ཎེ་ན ཀ་ཊ་ཏྟཱ་རཱུ་པ་གྒ་ཧ་ཎཾ ཨ་ཝི་སེ་སེ་ཏྭཱ ཨུ་པཱ་དཱ་རཱུ་པཱ་ནཾ ནི་ཝ་ཏྟེ་ཏ་བྦཱ་ནཾ ཨ་ཏྠི་ཏཱ་ཡ ཀ་ཊ་ཏྟཱ་རཱུ་པ་གྒ་ཧ་ཎེ་ནེ་ཝ ཨུ་པཱ་དཱ་རཱུ་པ་གྒ་ཧ་ཎ་སྶ ཝི་སེ་ས་ནཾ ད་ཊྛ་བྦཾ.

༢༦༩-༢༧༦. ‘‘ཨ་བྱཱ་ཀ་ཏེ་ན ཨ་བྱཱ་ཀ་ཏཾ, ཀུ་ས་ལཾ, ཨ་ཀུ་ས་ལ’’ནྟི ཝ་ཏྟ་བྦེ ‘‘ཨ་བྱཱ་ཀ་ཏེ་ན ཀུ་ས་ལཾ, ཨ་ཀུ་ས་ལཾ, ཨ་བྱཱ་ཀ་ཏ’’ནྟི, ‘‘ཀུ་ས་ལཾ དྷ་མྨཾ པ་ཊི་ཙྩ ཀུ་ས་ལོ ཙ ཨ་ཀུ་ས་ལོ ཙ དྷ་མྨཱ ཀུ་ས་ལ་སྶཱ་ཏི ཨ་ནཱ་མ་སི་ཏྭཱ’’ཏི ཙ པུ་རི་མ་པཱ་ཋེ པ་མཱ་ད་ལེ་ཁཱ ད་ཊྛ་བྦཱ.

༢༨༦-༢༨༧. ན་ཧེ་ཏུ་པ་ཙྩ་ཡཱ ན་པུ་རེ་ཛཱ་ཏེ དྭེཏི ཨེ་ཏྠ ཨ་ཊྛ་ཀ་ཐཱ་ཡཾ ‘‘ཨཱ་རུ་པྤེ པ་ན ཨ་ཧེ་ཏུ་ཀ་མོ་ཧ་སྶ ཨ་ཧེ་ཏུ་ཀ་ཀི་རི་ཡ་སྶ ཙ ཝ་སེ་ན དྭེ་ཏི ཝུ་ཏྟཱ, ན་ཝི་པྤ་ཡུ་ཏྟེ དྭེ་ཏི ཨཱ་རུ་པྤེ ཨ་ཧེ་ཏུ་ཀཱ་ཀུ་ས་ལ་ཀི་རི་ཡ་ཝ་སེ་ནཱ’’ཏི ཝུ་ཏྟཾ, ཏཾ ལ་བྦྷ་མཱ་ནེ་སུ ཨེ་ཀ་དེ་སེ་ན ནི་ད་སྶ་ན་ཝ་སེ་ན ཝུ་ཏྟ་ནྟི ད་ཊྛ་བྦཾ. ཨཱ་རུ་པྤེ པ་ན ཨ་ཧེ་ཏུ་ཀ་མོ་ཧ་སྶ ཨ་ཧེ་ཏུ་ཀ་ཀི་རི་ཡཱ་ཡ ཨ་ཧེ་ཏུ་ཀ་པ་ཊི་ས་ནྡྷི་ཡཱ ཨེ་ཀ་ཙྩ་སྶ ཙ རཱུ་པ་སྶ ཝ་སེ་ན དྭེ ཝུ་ཏྟཱ་ཏི, ན་ཝི་པྤ་ཡུ་ཏྟེ དྭེ་ཏི ཨཱ་རུ་པྤེ ཨ་ཧེ་ཏུ་ཀཱ་ཀུ་ས་ལ་ཀི་རི་ཡཱ་ཨེ་ཀ་ཙྩ་རཱུ་པཱ་ནཾ ཝ་སེ་ནཱ་ཏི ཝུ་ཏྟ་ནྟི. ‘‘ནོ་ན་ཏྠི་ནོ་ཝི་ག་ཏེ་སུ ཨེ་ཀ་ནྟི ས་བྦ་རཱུ་པ་སྶ ཝ་སེ་ནཱ’’ཏི ཝུ་ཏྟཾ, ན་ཧེ་ཏུ་མཱུ་ལ་ཀ་ཏྟཱ ཨི་མ་སྶ ན་ཡ་སྶ ཧེ་ཏུ་པ་ཙྩ་ཡཾ ལ་བྷ་ནྟཾ ན ལ་བྦྷ་ཏཱི་ཏི ‘‘ཨེ་ཀ་ཙྩ་སྶ རཱུ་པ་སྶ ཝ་སེ་ནཱ’’ཏི བྷ་ཝི་ཏ་བྦཾ. ཙ་ཀྑཱ་དི་དྷ་མྨ་ཝ་སེ་ན པ་ན ཙི་ཏྟ་ས་མུ་ཊྛཱ་ནཱ་དི་ཀོ་ཊྛཱ་ས་ཝ་སེ་ན ཝཱ ས་བྦཾ ལ་བྦྷ་ཏཱི་ཏི ‘‘ས་བྦ་རཱུ་པ་སྶཱ’’ཏི ཝུ་ཏྟཾ སི་ཡཱ.

༢༨༩-༢༩༦. ཨཱ་ག་ཏཱ་ནཱ་ག་ཏནྟི པ་ཉྷ་ཝ་སེ་ན ཝུ་ཏྟཾ, ལ་བྦྷ་མཱ་ནཱ་ལ་བྦྷ་མཱ་ནནྟི ཨཱ་ག་ཏེ ཙ པ་ཉྷེ ལ་བྦྷ་མཱ་ནཱ་ལ་བྦྷ་མཱ་ན་དྷ་མྨ་ཝ་སེ་ན.

པ་ཙྩ་ཡ་ཝཱ་ར་ཝ་ཎྞ་ནཱ ནི་ཊྛི་ཏཱ.