༢. ཝེ་ད་ནཱ་ཏྟི་ཀ་ཝ་ཎྞ་ནཱ
༡. ཝེ་ད་ནཱ་རཱུ་པ་ནི་བྦཱ་ནཱ་ནི པ་ན ཏི་ཀ་མུ་ཏྟ་ཀཱ་ནི པ་ཊི་ཙྩཱ་དི་ནི་ཡ་མཾ པ་ཙྩ་ཡུ་པྤ་ནྣ་ཝ་ཙ་ན་ཉྩ ན ལ་བྷ་ནྟི. པ་ཊི་ཙྩ་ཝཱ་རཱ་དཱི་སུ པ་ན ཚ་སུ ཡ་ཏོ ཧེ་ཏུ་པ་ཙྩ་ཡཱ་དི་ཏོ ཏི་ཀ་དྷ་མྨཱ་ནཾ ཨུ་པྤ་ཏྟི ཝུ་ཏྟཱ, ཏ་ཏྠ ཡ་ཐཱ་ནུ་རཱུ་པ་ཏོ ཨཱ་ར་མྨ་ཎཱ་དི་པ་ཙྩ་ཡ་བྷཱ་ཝེ་ན ལ་བྦྷ་ནྟཱི་ཏི ཝེ་དི་ཏ་བྦཱ་ནཱི་ཏི.
༡༠. ས་བྦ་ཨ་རཱུ་པ་དྷ་མྨ་པ་རི་གྒཱ་ཧ་ཀཱ པ་ན ས་ཧ་ཛཱ་ཏཱ་ད་ཡོ པ་ཙྩ་ཡཱཏི ཨི་མི་ནཱ ཀུ་ས་ལ་ཏྟི་ཀེ་པི པ་རི་ཧཱི་ནཾ ས་ཧ་ཛཱ་ཏཾ རཱུ་པཱ་རཱུ་པ་དྷ་མྨ་པ་རི་གྒཱ་ཧ་ཀ་ཏྟཱ ཨཱ་དི་མྷི ཋ་པེ་ཏྭཱ ཨཱ་དི་ས་དྡེ་ན ས་བྦཱ་རཱུ་པ་དྷ་མྨ་པ་རི་གྒཱ་ཧ་ཀ་ཝ་ཙ་ནེ་ན ཙ པ་ཙྩ་ཡུ་པྤ་ནྣ་ཝ་སེ་ན ས་བྦ་ཨ་རཱུ་པ་དྷ་མྨ་པ་རི་གྒཱ་ཧ་ཀཱ་ནཾ ཨཱ་ར་མྨ་ཎཱ་དཱི་ནཾ པ་རི་ཧཱ་ནིཾ ད་སྶེ་ཏཱི་ཏི ད་ཊྛ་བྦཾ. ཏེ་ན ཀུ་ས་ལ་ཏྟི་ཀ་པ་རི་ཧཱི་ནཱ་ནཾ ས་བྦ་ཊྛཱ་ནི་ཀཱ་ནཾ ཙ་ཏུ་ནྣཾ ས་བྦ་ཏི་ཀཱ་དཱི་སུ པ་རི་ཧཱ་ནི ད་སྶི་ཏཱ ཧོ་ཏི. པ་ཙྪཱ་ཛཱ་ཏ་པ་ཙྩ་ཡ་ཉྩ ཝི་ནཱ་ཝ ཨུ་པྤ་ཏྟི་ཏོཏི ཨེ་ཏེ་ན པ་ན པ་ཙྪཱ་ཛཱ་ཏ་པ་ཙྩ་ཡ་སྶ ཨ་ནུ་ལོ་མེ པ་རི་ཧཱ་ནིཾ, པ་ཙྩ་ནཱི་ཡེ ཙ ལཱ་བྷཾ ད་སྶེ་ཏི. ས་ཧ་ཛཱ་ཏཱ་ད་ཡོཏི ཝཱ ས་ཧ་ཛཱ་ཏ་མཱུ་ལ་ཀཱ ས་ཧ་ཛཱ་ཏ་ནི་བ་ནྡྷ་ནཱ པ་ཊི་ཙྩཱ་དིཾ ཕ་ར་ནྟེ་ཧི ས་ཧ་ཛཱ་ཏ་དྷ་མྨེ་ཧི ཝི་ནཱ པ་ཙྩ་ཡཱ ཨ་ཧོ་ནྟཱ་ཏི ཝུ་ཏྟཾ ཧོ་ཏི. ཀ་སྨཱ པ་ན ས་ཧ་ཛཱ་ཏ་ནི་བ་ནྡྷ་ནཱ ས་བྦཱ་རཱུ་པ་དྷ་མྨ་པ་རི་གྒཱ་ཧ་ཀཱ ཙ ཡེ, ཏེ་ཝ པ་རི་ཧཱ་ཡ་ནྟི, ན པ་ན ཡོ ས་ཧ་ཛཱ་ཏཱ་ནི་བ་ནྡྷ་ནོ ས་བྦཱ་རཱུ་པ་དྷ་མྨ་པ་རི་གྒཱ་ཧ་ཀོ ཙ ན ཧོ་ཏི, སོ པ་ཙྪཱ་ཛཱ་ཏོ་ཏི ཏ་ཏྠ ཀཱ་ར་ཎཾ ཝ་ད་ནྟོ ‘‘ས་ཧ་ཛཱ་ཏཱ་དཱི་ཧི ཝི་ནཱ ཨ་ནུ་པྤ་ཏྟི་ཏོ པ་ཙྪཱ་ཛཱ་ཏ་པ་ཙྩ་ཡ་ཉྩ ཝི་ནཱ་ཝ ཨུ་པྤ་ཏྟི་ཏོ’’ཏི ཨཱ་ཧ. ཏ་ཏྠ ས་ཧ་ཛཱ་ཏཱ་དཱི་ཧི ཝི་ནཱཏི ས་ཧ་ཛཱ་ཏ་ནི་བ་ནྡྷ་ནེ་ཧི ས་བྦཱ་རཱུ་པ་དྷ་མྨ་པ་རི་གྒཱ་ཧ་ཀེ་ཧི ཙ ཝི་ནཱ་ཏི ཨ་ཏྠོ. ཨ་ཐ ཝཱ ས་ཧ་ཛཱ་ཏ་ནི་བ་ནྡྷ་ནཱ་ན་མེ་ཝ པ་རི་ཧཱ་ནི, ན པ་ཙྪཱ་ཛཱ་ཏ་སྶ ས་ཧ་ཛཱ་ཏཱ་ནི་བ་ནྡྷ་ན་སྶཱ་ཏི ཨེ་ཏྠེ་ཝ ཀཱ་ར་ཎཾ ཝ་ད་ནྟོ ‘‘ས་ཧ་ཛཱ་ཏཱ་དཱི་ཧི ཝི་ནཱ ཨ་ནུ་པྤ་ཏྟི་ཏོ པ་ཙྪཱ་ཛཱ་ཏ་པ་ཙྩ་ཡ་ཉྩ ཝི་ནཱ་ཝ ཨུ་པྤ་ཏྟི་ཏོ’’ཏི ཨཱ་ཧ. ས་ཧ་ཛཱ་ཏ་ནི་བ་ནྡྷ་ནཱ་པི པ་ན ས་བྦ་ཨ་རཱུ་པ་དྷ་མྨ་པ་རི་གྒཱ་ཧ་ཀཱ་ཡེ་ཝ པ་རི་ཧཱ་ཡ་ནྟཱི་ཏི ད་སྶི་ཏ་མེ་ཏ་ནྟི.
༡༧. ན་ཝི་པཱ་ཀེ་པི ཨེ་སེ་ཝ ན་ཡོཏི ན་ཡ་ད་སྶ་ན་མེ་ཝ ཀ་རོ་ཏི, ན ཙ པ་ཙྩ་ཡ་པ་ཙྩ་ཡུ་པྤ་ནྣ་སཱ་མ་ཉྙ་ད་སྶ་ནཾ. སུ་ཁཱ་ཡ ཧི ཨ་དུ་ཀྑ་མ་སུ་ཁཱ་ཡ ཙ ཝེ་ད་ནཱ་ཡ ས་མྤ་ཡུ་ཏྟེ དྷ་མྨེ པ་ཊི་ཙྩ ཏཱ་ཧི ཝེ་ད་ནཱ་ཧི ས་མྤ་ཡུ་ཏྟཱ ཨ་ཧེ་ཏུ་ཀ་ཀི་རི་ཡ་དྷ་མྨཱ ཝི་ཙི་ཀི་ཙྪུ་དྡྷ་ཙྩ་ས་ཧ་ཛཱ་ཏ་མོ་ཧོ ཙཱ་ཏི ཨ་ཡ་ཉྷེ་ཏྠ ན་ཡོ་ཏི. ན་ཝི་པྤ་ཡུ་ཏྟེ ཨེ་ཀ་ནྟི ཨཱ་རུ་པྤེ ཨཱ་ཝ་ཛྫ་ན་ཝ་སེ་ན ཝུ་ཏྟནྟི ཨི་དཾ ཨཱ་ཝ་ཛྫ་ནཱ་ཧེ་ཏུ་ཀ་མོ་ཧཱ་ནཾ ཝ་སེ་ན ཝུ་ཏྟ་ནྟི ད་ཊྛ་བྦཾ.
༢༥-༣༧. ཨ་ནུ་ལོ་མ་པ་ཙྩ་ནཱི་ཡེ ཡ་ཐཱ ཀུ་ས་ལ་ཏྟི་ཀཾ, ཨེ་ཝཾ ག་ཎེ་ཏ་བྦནྟི ཧེ་ཏུ་མཱུ་ལ་ཀཱ་དཱི་ནཾ ན་ཡཱ་ནཾ ཨེ་ཀ་མཱུ་ལ་ཀ་དྭི་མཱུ་ལ་ཀཱ་དི་ཝ་སེ་ན ཙ ཡོ་ཛེ་ཏྭཱ ག་ཧེ་ཏ་བྦ་ཏཱ་སཱ་མ་ཉྙཾ ས་ནྡྷཱ་ཡ ཝུ་ཏྟཾ, ན ག་ཎ་ན་སཱ་མ་ཉྙཾ. ཨི་ཏོ པ་རེ་སུ་པི ཨེ་ཝ་རཱུ་པེ་སུ ཨེ་སེ་ཝ ན་ཡོ. ཨ་ཧེ་ཏུ་ཀ་སྶ པ་ན ཙི་ཏྟུ་པྤཱ་ད་སྶཱཏི་ཨཱ་དི ན་ཧེ་ཏུ་མཱུ་ལ་ཀཾ ས་ནྡྷཱ་ཡ ཝུ་ཏྟཾ, ‘‘ཨ་ཧེ་ཏུ་ཀ་སྶ པ་ན ཙི་ཏྟུ་པྤཱ་ད་སྶ མོ་ཧ་སྶ ཙཱ’’ཏི པ་ནེ་ཏྠ ཝ་ཏྟ་བྦཾ. མོ་ཧ་སྶ ཙཱ་པི ཧི ཨ་ཧེ་ཏུ་ཀ་སྶ ཨ་དྷི་པ་ཏི་ཨ་བྷཱ་ཝ་ཏོ ཨ་དྷི་པ་ཏི་ནོ ན་ཧེ་ཏུ་མཱུ་ལ་ཀེ ཨ་ནུ་ལོ་མ་ཏོ ཨ་ཊྛཱ་ན་ནྟི. པ་རི་ཝ་ཏྟེ་ཏྭཱ་པཱིཏི ན་ཧེ་ཏུ་པ་ཙྩ་ཡཱ ན་ཨ་དྷི་པ་ཏི་པ་ཙྩ་ཡཱ ཨཱ་ར་མྨ་ཎེ ཏཱི་ཎཱི་ཏི ཨེ་ཝཾ པུ་ར་ཏོ ཋི་ཏ་མྤི ཨཱ་ར་མྨ་ཎཱ་དིཾ པ་ཙྪ་ཏོ ཡོ་ཛེ་ཏྭཱ་ཏི ཨ་ཏྠོ.
༣༩. པ་ཉྷཱ་ཝཱ་རེ དོ་མ་ན་སྶཾ ཨུ་པྤ་ཛྫ་ཏཱིཏི ཨེ་ཏེ་ན ཏཾ་ས་མྤ་ཡུ་ཏྟེ ད་སྶེ་ཏི. ཨུ་པ་ནི་སྶ་ཡ་ཝི་བྷ་ངྒེ ‘‘ས་དྡྷཱ་པ་ཉྩ་ཀེ་སུ མཱ་ནཾ ཛ་པྤེ་ཏི དི་ཊྛིཾ ག་ཎྷཱ་ཏཱི་ཏི ཀ་ཏྟ་བྦཾ, ཨ་ཝ་སེ་སེ་སུ ན ཀ་ཏྟ་བྦ’’ནྟི ཨི་དཾ པཱ་ཋ་ག་ཏི་ད་སྶ་ན་ཏྠཾ ཝུ་ཏྟཾ, ན པ་ན རཱ་གཱ་དཱི་ཧི མཱ་ན་དི་ཊྛཱི་ནཾ ཨ་ནུ་པྤ་ཏྟི་ཏོ. ཀུ་ས་ལ་ཏྟི་ཀེ་པི ཧི རཱ་གཱ་དཱི་སུ ‘‘མཱ་ནཾ ཛ་པྤེ་ཏི དི་ཊྛིཾ ག་ཎྷཱ་ཏཱི’’ཏི པཱ་ལི༹ ན ཝུ་ཏྟཱ, ‘‘རཱ་གོ དོ་སོ མོ་ཧོ མཱ་ནོ དི་ཊྛི པ་ཏྠ་ནཱ རཱ་ག་སྶ དོ་ས་སྶ མོ་ཧ་སྶ མཱ་ན་སྶ དི་ཊྛི་ཡཱ པ་ཏྠ་ནཱ་ཡ ཨུ་པ་ནི་སྶ་ཡ་པ་ཙྩ་ཡེ་ན པ་ཙྩ་ཡོ’’ཏི (པ་ཊྛཱ. ༡.༢.༥༣) པ་ན རཱ་གཱ་དཱི་ནཾ མཱ་ན་དི་ཊྛི་ཨུ་པ་ནི་སྶ་ཡ་བྷཱ་ཝོ ཝུ་ཏྟོ. ཏ་ཐཱ ཨི་དྷཱ་པི ད་ཊྛ་བྦ་ནྟི. ‘‘སུ་ཁཱ་ཡ ཝེ་ད་ནཱ་ཡ ས་མྤ་ཡུ་ཏྟེ་ན པ་ན ཙི་ཏྟེ་ན གཱ་མ་གྷཱ་ཏཾ ནི་ག་མ་གྷཱ་ཏཾ ཀ་རོ་ཏཱི’’ཏི སོ་མ་ན་སྶ་ས་མྤ་ཡུ་ཏྟ་ལོ་བྷ་ས་ཧ་ག་ཏ་ཙི་ཏྟེ་ན གཱ་མ་ནི་ག་མ་ཝི་ལུ་པྤ་ནཾ ས་ནྡྷཱ་ཡ ཝུ་ཏྟཾ.
༦༢. སུ་དྡྷཱ་ནནྟི པ་ཙྩ་ཡ་པ་ཙྩ་ཡུ་པྤ་ནྣ་པ་དཱ་ནཾ ཨ་ན་ཉྙ་ཏྟཾ ད་སྶེ་ཏི. པུ་རེ་ཛཱ་ཏ་པ་ཙྪཱ་ཛཱ་ཏཱ པ་ནེ་ཏྠ ན ཝི་ཛྫ་ནྟི.ན ཧི པུ་རེ་ཛཱ་ཏཱ པ་ཙྪཱ་ཛཱ་ཏཱ ཝཱ ཨ་རཱུ་པ་དྷ་མྨཱ ཨ་རཱུ་པ་དྷ་མྨཱ་ནཾ པ་ཙྩ་ཡཱ ཧོ་ནྟཱིཏི ཨེ་ཏྠ པུ་རེ་ཛཱ་ཏཱཏི ཨི་མ་སྨིཾ ཏི་ཀེ ཝུ་ཙྩ་མཱ་ནཱ ཨ་དྷི་ཀཱ་ར་པྤ་ཏྟཱ སུ་ཁཱ་ཡ ཝེ་ད་ནཱ་ཡ ས་མྤ་ཡུ་ཏྟཱ་ད་ཡོ་ཝ ཨ་རཱུ་པ་དྷ་མྨཱ་ནཾ པུ་རེ་ཛཱ་ཏཱ ཧུ་ཏྭཱ པ་ཙྩ་ཡཱ ན ཧོ་ནྟི པུ་རེ་ཛཱ་ཏ་ཏྟཱ་བྷཱ་ཝ་ཏོ་ཏི ཨ་དྷི་པྤཱ་ཡོ, ཏ་ཐཱ པ་ཙྪཱ་ཛཱ་ཏ་ཏྟཱ་བྷཱ་ཝ་ཏོ པ་ཙྪཱ་ཛཱ་ཏཱ ཝཱ ཧུ་ཏྭཱ ན ཧོ་ནྟཱི་ཏི.
༦༣-༦༤. སཱ་དྷི་པ་ཏི་ཨ་མོ་ཧ་ཝ་སེ་ནཱཏི ཨ་དྷི་པ་ཏི་བྷཱ་ཝ་ས་ཧི་ཏཱ་མོ་ཧ་ཝ་སེ་ནཱ་ཏི ཨ་ཏྠོ.
༨༣-༨༧. ན་ཧེ་ཏུ་པ་ཙྩ་ཡཱ…པེ… ན་ཨུ་པ་ནི་སྶ་ཡེ ཨ་ཊྛཱཏི ན་ཧེ་ཏུ་པ་ཙྩ་ཡཱ ནཱ་ར་མྨ་ཎ་པ་ཙྩ་ཡཱ ན་ཨུ་པ་ནི་སྶ་ཡེ ཨ་ཊྛཱ་ཏི ཨེ་ཝཾ ས་ངྑི་པི་ཏྭཱ ཨུ་དྡྷ་ར་ཏི. ནཱ་ནཱ་ཀྑ་ཎི་ཀ་ཀ་མྨ་པ་ཙྩ་ཡ་ཝ་སེ་ན ཝེ་དི་ཏ་བྦཱཏི ཨི་དཾ ‘‘དུ་ཀྑཱ་ཡ ཝེ་ད་ནཱ་ཡ ས་མྤ་ཡུ་ཏྟོ སུ་ཁཱ་ཡ ཝེ་ད་ནཱ་ཡ ས་མྤ་ཡུ་ཏྟ་སྶཱ’’ཏི ཨེ་ཏཾ ཝ་ཛྫེ་ཏྭཱ ཨ་ཝ་སེ་སེ་སུ ཨ་ཊྛ་སུ་པི ནཱ་ནཱ་ཀྑ་ཎི་ཀ་ཀ་མྨ་པ་ཙྩ་ཡ་ས་མྦྷ་ཝཾ ས་ནྡྷཱ་ཡ ཝུ་ཏྟཾ. ན ཧི ས་ཧ་ཛཱ་ཏ་པ་ཙྩ་ཡོ ཨ་ཊྛ་སུ་པི ལ་བྦྷ་ཏི, ཨ་ཐ ཁོ ཏཱི་སྭེ་ཝཱ་ཏི.
ཝེ་ད་ནཱ་ཏྟི་ཀ་ཝ་ཎྞ་ནཱ ནི་ཊྛི་ཏཱ.