༩. ཨུ་པ་ནི་སྶ་ཡ་པ་ཙྩ་ཡ་ནི་དྡེ་ས་ཝ་ཎྞ་ནཱ
༩. ཏེ ཏ་ཡོ་པི རཱ་ས་ཡོཏི ཨུ་པ་ནི་སྶ་ཡེ ཏ་ཡོ ཨ་ནེ་ཀ་ས་ངྒཱ་ཧ་ཀ་ཏཱ་ཡ རཱ་ས་ཡོ་ཏི ཝ་ད་ཏི. ཨེ་ཏ་སྨིཾ པ་ན ཨུ་པ་ནི་སྶ་ཡ་ནི་དྡེ་སེ ཡེ པུ་རི་མཱ ཡེ་སཾ པ་ཙྪི་མཱ་ནཾ ཨ་ན་ནྟ་རཱུ་པ་ནི་སྶ་ཡཱ ཧོ་ནྟི, ཏེ ཏེ་སཾ ས་བྦེ་སཾ ཨེ་ཀ་ནྟེ་ནེ་ཝ ཧོ་ནྟི, ན ཀེ་ས་ཉྩི ཀ་དཱ་ཙི, ཏ་སྨཱ ཡེ་སུ པ་དེ་སུ ཨ་ན་ནྟ་རཱུ་པ་ནི་སྶ་ཡོ ས་ངྒ་ཧི་ཏོ, ཏེ་སུ ‘‘ཀེ་ས་ཉྩཱི’’ཏི ན ས་ཀྐཱ ཝ་ཏྟུ་ནྟི ན ཝུ་ཏྟཾ. ཡེ པ་ན པུ་རི་མཱ ཡེ་སཾ པ་ཙྪི་མཱ་ནཾ ཨཱ་ར་མྨ་ཎ་པ་ཀ་ཏཱུ་པ་ནི་སྶ་ཡཱ ཧོ་ནྟི, ཏེ ཏེ་སཾ ན ས་བྦེ་སཾ ཨེ་ཀ་ནྟེ་ན ཧོ་ནྟི, ཡེ་སཾ ཨུ་པྤ་ཏྟི་པ་ཊི་བཱ་ཧི་ཀཱ པ་ཙྩ་ཡཱ བ་ལ་ཝ་ནྟོ ཧོ་ནྟི, ཏེ་སཾ ན ཧོ་ནྟི, ཨི་ཏ་རེ་སཾ ཧོ་ནྟི. ཏ་སྨཱ ཡེ་སུ པ་དེ་སུ ཨ་ན་ནྟ་རཱུ་པ་ནི་སྶ་ཡོ ན ལ་བྦྷ་ཏི, ཏེ་སུ ‘‘ཀེ་ས་ཉྩཱི’’ཏི ཝུ་ཏྟཾ. སི་དྡྷཱ་ནཾ པ་ཙྩ་ཡ་དྷ་མྨཱ་ནཾ ཡེ་ཧི པ་ཙྩ་ཡུ་པྤ་ནྣེ་ཧི ཨ་ཀུ་ས་ལཱ་དཱི་ཧི བྷ་ཝི་ཏ་བྦཾ, ཏེ་སཾ ཀེ་ས་ཉྩཱི་ཏི ཨ་ཡ་ཉྩེ་ཏྠ ཨ་ཏྠོ, ན པ་ན ཨ་ཝི་སེ་སེ་ན ཨ་ཀུ་ས་ལཱ་དཱི་སུ ཀེ་ས་ཉྩཱི་ཏི.
པུ་རི་མཱ པུ་རི་མཱ ཀུ་ས་ལཱ…པེ… ཨ་བྱཱ་ཀ་ཏཱ་ནཾ དྷ་མྨཱ་ནནྟི ཡེ་སཾ ཨུ་པ་ནི་སྶ་ཡ་པ་ཙྩ་ཡེ་ན བྷ་ཝི་ཏ་བྦཾ, ཏེ་སཾ ཨ་བྱཱ་ཀ་ཏཱ་ནཾ པ་ཙྪི་མཱ་ན་ནྟི ད་ཊྛ་བྦཾ. ན ཧི རཱུ་པཱ་བྱཱ་ཀ་ཏཾ ཨུ་པ་ནི་སྶ་ཡཾ ལ་བྷ་ཏཱི་ཏི. ཀ་ཐཾ? ཨཱ་ར་མྨ་ཎཱ་ན་ནྟ་རཱུ་པ་ནི་སྶ་ཡེ ཏཱ་ཝ ན ལ་བྷ་ཏི ཨ་ནཱ་ར་མྨ་ཎ་ཏྟཱ པུ་བྦཱ་པ་ར་ནི་ཡ་མེ་ན ཨ་པྤ་ཝ་ཏྟི་ཏོ ཙ, པ་ཀ་ཏཱུ་པ་ནི་སྶ་ཡ་ཉྩ ན ལ་བྷ་ཏི ཨ་ཙེ་ཏ་ནེ་ན རཱུ་པ་ས་ནྟཱ་ནེ་ན པ་ཀ་ཏ་སྶ ཨ་བྷཱ་ཝ་ཏོ. ཡ་ཐཱ ཧི ཨ་རཱུ་པ་ས་ནྟཱ་ནེ་ན ས་དྡྷཱ་ད་ཡོ ནི་པྥཱ་དི་ཏཱ ཨུ་ཏུ་བྷོ་ཛ་ནཱ་ད་ཡོ ཙ ཨུ་པ་སེ་ཝི་ཏཱ, ན ཨེ་ཝཾ རཱུ་པ་ས་ནྟཱ་ནེ་ན. ཡ་སྨི་ཉྩ ཨུ་ཏུ་བཱི་ཛཱ་དི་ཀེ ཀ་མྨཱ་དི་ཀེ ཙ ས་ཏི རཱུ་པཾ པ་ཝ་ཏྟ་ཏི, ན ཏཾ ཏེ་ན པ་ཀ་ཏཾ ཧོ་ཏི. ས་ཙེ་ཏ་ན་སྶེ་ཝ ཧི ཨུ་པྤཱ་ད་ནུ་པ་ཏྠ་མྦྷ་ནུ་པ་ཡོ་གཱ་དི་ཝ་སེ་ན ཙེ་ཏ་ནཾ པ་ཀ་པྤ་ནཾ པ་ཀ་ར་ཎཾ, རཱུ་པ་ཉྩ ཨ་ཙེ་ཏ་ན་ནྟི. ཡ་ཐཱ ཙ ནི་རཱི་ཧ་ཀེ་སུ པ་ཙྩ་ཡཱ་ཡ་ཏྟེ་སུ དྷ་མྨེ་སུ ཀེ་ས་ཉྩི སཱ་ར་མྨ་ཎ་ས་བྷཱ་ཝ་ཏཱ ཧོ་ཏི, ཀེ་ས་ཉྩི ན, ཨེ་ཝཾ ས་པྤ་ཀ་ར་ཎ་ས་བྷཱ་ཝ་ཏཱ ནི་པྤ་ཀ་ར་ཎ་ས་བྷཱ་ཝ་ཏཱ ཙ ད་ཊྛ་བྦཱ. ཨུ་ཏུ་བཱི་ཛཱ་ད་ཡོ པ་ན ཨ་ངྐུ་རཱ་དཱི་ནཾ ཏེ་སུ ཨ་ས་ནྟེ་སུ ཨ་བྷཱ་ཝ་ཏོ ཨེ་ཝ པ་ཙྩ་ཡཱ, ན པ་ན ཨུ་པ་ནི་སྶ་ཡཱ་དི་བྷཱ་ཝ་ཏོ་ཏི. པུ་རི་མ་པུ་རི་མཱ་ནཾ་ཡེ་ཝ པ་ནེ་ཏྠ ཨུ་པ་ནི་སྶ་ཡ་པ་ཙྩ་ཡ་བྷཱ་ཝོ བཱ་ཧུ་ལླ་ཝ་སེ་ན པཱ་ཀ་ཊ་ཝ་སེ་ན ཙ ཝུ་ཏྟོ. ‘‘ཨ་ནཱ་ག་ཏེ ཁ་ནྡྷེ པ་ཏྠ་ཡ་མཱ་ནོ དཱ་ནཾ དེ་ཏཱི’’ཏི་ཨཱ་དི་ཝ་ཙ་ན་ཏོ (པ་ཊྛཱ. ༢.༡༨.༨) པ་ན ཨ་ནཱ་ག་ཏཱ་པི ཨུ་པ་ནི་སྶ་ཡ་པ་ཙྩ་ཡཱ ཧོ་ནྟི, ཏེ པུ་རི་མེ་ཧི ཨཱ་ར་མྨ་ཎ་པ་ཀ་ཏཱུ་པ་ནི་སྶ་ཡེ་ཧི ཏཾ་ས་མཱ་ན་ལ་ཀྑ་ཎ་ཏཱ་ཡ ཨི་དྷ ས་ངྒ་ཡ྄ཧ་ནྟཱི་ཏི ད་ཊྛ་བྦཱ.
པུ་གྒ་ལོ་པི སེ་ནཱ་ས་ན་མྤཱིཏི པུ་གྒ་ལ་སེ་ནཱ་ས་ནགྒ་ཧ་ཎ་ཝ་སེ་ན ཨུ་པ་ནི་སྶ་ཡ་བྷཱ་ཝཾ བྷ་ཛ་ནྟེ དྷ་མྨེ ད་སྶེ་ཏི, པི-ས་དྡེ་ན ཙཱི་ཝ་རཱ་ར་ཉྙ་རུ་ཀྑ་པ་བྦ་ཏཱ་དི་གྒ་ཧ་ཎ་ཝ་སེ་ན ཨུ་པ་ནི་སྶ་ཡ་བྷཱ་ཝཾ བྷ་ཛ་ནྟེ ས་བྦེ ས་ངྒ་ཎྷཱ་ཏི. ‘‘ཨ་བྱཱ་ཀ་ཏོ དྷ་མྨོ ཨ་བྱཱ་ཀ་ཏ་སྶ དྷ་མྨ་སྶ ཨུ་པ་ནི་སྶ་ཡ་པ་ཙྩ་ཡེ་ན པ་ཙྩ་ཡོ’’ཏི་ཨཱ་དཱི་སུ ཧི ‘‘སེ་ནཱ་ས་ནཾ ཀཱ་ཡི་ཀ་སྶ སུ་ཁ་སྶཱ’’ཏི་ཨཱ་དི་ཝ་ཙ་ནེ་ན སེ་ནཱ་ས་ན་གྒ་ཧ་ཎེ་ན ཨུ་པ་ནི་སྶ་ཡ་བྷཱ་ཝཾ བྷ་ཛ་ནྟཱ་ཝ དྷ་མྨཱ ཨུ་པ་ནི་སྶ་ཡ་པ་ཙྩ་ཡེ་ན པ་ཙྩ་ཡོ་ཏི ཨི་མ་མ་ཏྠཾ ད་སྶེ་ནྟེ་ན པུ་གྒ་ལཱ་དཱི་སུ་པི ཨ་ཡཾ ན་ཡོ ད་སྶི་ཏོ ཧོ་ཏཱི་ཏི. པ་ཙྩུ་པྤ་ནྣཱ་པི ཨཱ་ར་མྨ་ཎ་པ་ཀ་ཏཱུ་པ་ནི་སྶ་ཡཱ པ་ཙྩུ་པྤ་ནྣ་ཏཱ་ཡ སེ་ནཱ་ས་ན་ས་མཱ་ན་ལ་ཀྑ་ཎ་ཏྟཱ ཨེ་ཏྠེ་ཝ ས་ངྒ་ཧི་ཏཱ་ཏི ད་ཊྛ་བྦཱ. ཝ་ཀྑ་ཏི ཧི ‘‘པ་ཙྩུ་པྤ་ནྣཾ ཨུ་ཏུཾ བྷོ་ཛ་ནཾ སེ་ནཱ་ས་ནཾ ཨུ་པ་ནི་སྶཱ་ཡ ཛྷཱ་ནཾ ཨུ་པྤཱ་དེ་ཏཱི’’ཏི་ཨཱ་དི་ནཱ སེ་ནཱ་ས་ན་སྶ པ་ཙྩུ་པྤ་ནྣ་བྷཱ་ཝཾ ཝི་ཡ པ་ཙྩུ་པྤ་ནྣཱ་ནཾ ཨུ་ཏུ་ཨཱ་དཱི་ནཾ པ་ཀ་ཏཱུ་པ་ནི་སྶ་ཡ་བྷཱ་ཝཾ, ‘‘པ་ཙྩུ་པྤ་ནྣཾ ཙ་ཀྑུཾ…པེ… ཝ་ཏྠུཾ པ་ཙྩུ་པྤ་ནྣེ ཁ་ནྡྷེ ག་རུཾ ཀ་ཏྭཱ ཨ་སྶཱ་དེ་ཏཱི’’ཏི་ཨཱ་དི་ནཱ (པ་ཊྛཱ. ༢.༡༨.༤) ཙ་ཀྑཱ་དཱི་ནཾ ཨཱ་ར་མྨ་ཎཱུ་པ་ནི་སྶ་ཡ་བྷཱ་ཝ་ཉྩཱ་ཏི. པ་ཙྩུ་པྤ་ནྣཱ་ན་མྤི ཙ ཏཱ་དི་སཱ་ནཾ པུ་བྦེ པ་ཀ་ཏ་ཏྟཱ པ་ཀ་ཏཱུ་པ་ནི་སྶ་ཡ་ཏཱ ད་ཊྛ་བྦཱ.
ཀ་སི་ཎཱ་ར་མྨ་ཎཱ་དཱི་ནི ཨཱ་ར་མྨ་ཎ་མེ་ཝ ཧོ་ནྟི, ན ཨུ་པ་ནི་སྶ་ཡོ་ཏི ཨི་མི་ནཱ ཨ་དྷི་པྤཱ་ཡེ་ན ‘‘ཨེ་ཀ་ཙྩཱ་ཡཱ’’ཏི ཨཱ་ཧ.
ཨ་རཱུ་པཱ་ཝ་ཙ་ར་ཀུ་ས་ལ་མྤི ཡ་སྨིཾ ཀ་སི་ཎཱ་དི་མྷི ཛྷཱ་ནཾ ཨ་ནུ་པྤཱ་དི་ཏཾ, ཏ་སྨིཾ ཨ་ནུ་པྤ་ནྣ་ཛྷཱ་ནུ་པྤཱ་ད་ནེ ས་བྦ་སྶ ཙ ཨུ་པྤ་ནྣ་ཛྷཱ་ན་སྶ ས་མཱ་པ་ཛྫ་ནེ ཨི་དྡྷི་ཝི་དྷཱ་དཱི་ནཾ ཨ་བྷི་ཉྙཱ་ན་ཉྩ ཨུ་པ་ནི་སྶ་ཡོ་ཏི ཨི་མ་མ་ཏྠཾ ས་ནྡྷཱ་ཡཱ་ཧ ‘‘ཏེ་བྷཱུ་མ་ཀ་ཀུ་ས་ལོ ཙ་ཏུ་བྷཱུ་མ་ཀ་སྶ་པི ཀུ་ས་ལ་སྶཱ’’ཏི. ཝུ་ཏྟ་མྤི ཙེ་ཏཾ ‘‘ཨ་རཱུ་པཱ་ཝ་ཙ་རཾ ས་དྡྷཾ ཨུ་པ་ནི་སྶཱ་ཡ རཱུ་པཱ་ཝ་ཙ་རཾ ཛྷཱ་ནཾ ཝི་པ་སྶ་ནཾ མ་གྒཾ ཨ་བྷི་ཉྙཾ ས་མཱ་པ་ཏྟིཾ ཨུ་པྤཱ་དེ་ཏཱི’’ཏི (པ་ཊྛཱ. ༤.༡༣.༢༨༥). ཀཱ་མཱ་ཝ་ཙ་ར་ཀུ་ས་ལཾ རཱུ་པཱ་ཝ་ཙ་རཱ་རཱུ་པཱ་ཝ་ཙ་ར་ཝི་པཱ་ཀཱ་ན་མྤི ཏ་དུ་པྤཱ་ད་ཀ་ཀུ་ས་ལཱ་ནཾ ཨུ་པ་ནི་སྶ་ཡ་བྷཱ་ཝ་ཝ་སེ་ན, པ་ཊི་ས་ནྡྷི་ནི་ཡཱ་མ་ཀ་སྶ ཙུ་ཏི་ཏོ པུ་རི་མ་ཛ་ཝ་ན་སྶ ཙ ཝ་སེ་ན ཨུ་པ་ནི་སྶ་ཡོ, རཱུ་པཱ་ཝ་ཙ་ར་ཀུ་ས་ལཾ ཨ་རཱུ་པཱ་ཝ་ཙ་ར་ཝི་པཱ་ཀ་སྶ, ཨ་རཱུ་པཱ་ཝ་ཙ་ར་ཀུ་ས་ལ་ཉྩ རཱུ་པཱ་ཝ་ཙ་ར་ཝི་པཱ་ཀ་སྶ ཏ་དུ་པྤཱ་ད་ཀ་ཀུ་ས་ལཱུ་པ་ནི་སྶ་ཡ་བྷཱ་ཝེ་ནཱ་ཏི ཨེ་ཝཾ པ་ཙྩེ་ཀཾ ཏེ་བྷཱུ་མ་ཀ་ཀུ་ས་ལཱ་ནཾ ཙ་ཏུ་བྷཱུ་མ་ཀ་ཝི་པཱ་ཀ་སྶ ཏེ་བྷཱུ་མ་ཀ་ཀི་རི་ཡ་སྶ ཙ ཡ་ཐཱ་ཡོ་གཾ པ་ཙྩ་ཡ་བྷཱ་ཝོ ཝེ་དི་ཏ་བྦོ. པཱ་ལི༹་ཡ་མྤི ཧི པ་ཀ་ཏཱུ་པ་ནི་སྶ་ཡོ ན་ཡ་ད་སྶ་ན་མ་ཏྟེ་ནེ་ཝ པ་ཉྷཱ་ཝཱ་རེ་སུ ཝི་སྶ་ཛྫི་ཏོ་ཏི.
ཨི་མི་ནཱ པ་ན ན་ཡེ་ནཱཏི ལོ་ཀུ་ཏྟ་ར་ནི་བྦ་ཏྟ་ནཾ ཨུ་པ་ནི་སྶཱ་ཡ སི་ནེ་ཧུ་པྤཱ་ད་ན་ལེ་སེ་ནཱ་ཏི ཨ་ཏྠོ. ལོ་ཀུ་ཏྟ་རཱ པ་ན དྷ་མྨཱ ཨ་ཀུ་ས་ལཱ་ནཾ ན ཀེ་ན་ཙི པ་ཙྩ་ཡེ་ན པ་ཙྩ་ཡོ ཧོ་ནྟཱི་ཏི ན ཨི་དཾ སཱ་ར་ཏོ ད་ཊྛ་བྦ་ནྟི ཨ་དྷི་པྤཱ་ཡོ. ཀཱ་མཱ་ཝ་ཙ་རཱ་དི་ཏི་ཧེ་ཏུ་ཀ་བྷ་ཝ་ངྒཾ ཀཱ་ཡི་ཀ་སུ་ཁཱ་དི ཙ རཱུ་པཱ་ཝ་ཙ་རཱ་དི་ཀུ་ས་ལཱ་ནཾ ཨུ་པ་ནི་སྶ་ཡོ, ཨ་རཱུ་པཱ་ཝ་ཙ་ར་ཝི་པཱ་ཀོ རཱུ་པཱ་ཝ་ཙ་ར་ཀུ་ས་ལ་སྶ ཏཾ པ་ཏྠེ་ཏྭཱ ཏ་ནྣི་བྦ་ཏྟ་ཀ་ཀུ་ས་ལུ་པྤཱ་ད་ན་ཏྠཾ ཨུ་པྤཱ་དི་ཡ་མཱ་ན་སྶ, རཱུ་པཱ་ཝ་ཙ་ར་ཀི་རི་ཡ་སྶ ཙ པུ་བྦེ ནི་ཝུ་ཊྛཱ་དཱི་སུ ཨ་རཱུ་པཱ་ཝ་ཙ་ར་ཝི་པཱ་ཀ་ཛཱ་ན་ན་ཏྠཾ ཛྷཱ་ནཱ་བྷི་ཉྙཱ་ཡོ ཨུ་པྤཱ་དེ་ནྟ་སྶ ཨ་ར་ཧ་ཏོ, ཙ་ཏུ་བྷཱུ་མ་ཀ་ཝི་པཱ་ཀཱ་ནཾ པ་ན ཏ་དུ་པྤཱ་ད་ཀ་ཀུ་ས་ལཱུ་པ་ནི་སྶ་ཡ་བྷཱ་ཝ་ཝ་སེ་ན སོ སོ ཝི་པཱ་ཀོ ཨུ་པ་ནི་སྶ་ཡོ. ཏེ་ནཱ་ཧ ‘‘ཏ་ཐཱ ཏེ་བྷཱུ་མ་ཀ་ཝི་པཱ་ཀོ’’ཏི. ཡ་དི་པི ཨ་ར་ཧ་ཏྟ་ཕ་ལ་ཏྟཾ ཛྷཱ་ན་ཝི་པ་སྶ་ནཱ ཨུ་པྤཱ་དེ་ཏི ཨ་ནཱ་གཱ་མཱི, ན པ་ན ཏེ་ན ཏཾ ཀ་དཱ་ཙི དི་ཊྛ་པུ་བྦཾ པུ་ཐུ་ཛྫ་ནཱ་དཱི་ཧི སོ་ཏཱ་པ་ཏྟི་ཕ་ལཱ་དཱི་ནི ཝི་ཡ, ཏ་སྨཱ ཏཱ་ནི ཝི་ཡ ཏེ་སཾ ཛྷཱ་ནཱ་དཱི་ནཾ ཨི་མ་སྶ ཙ ཨ་གྒ་ཕ་ལཾ ན ཛྷཱ་ནཱ་དཱི་ནཾ ཨུ་པ་ནི་སྶ་ཡོ. ཨུ་པ་ལ་དྡྷ་པུ་བྦ་ས་དི་ས་མེ་ཝ ཧི ཨ་ནཱ་ག་ཏ་མྤི ཨུ་པ་ནི་སྶ་ཡོ་ཏི. ཏེ་ནཱ་ཧ ‘‘ཨུ་པ་རི་ཊྛི་མཾ ཀུ་ས་ལ་སྶ་པཱི’’ཏི.
ཀི་རི་ཡ་ཨ་ཏྠ་པ་ཊི་ས་མྦྷི་དཱ་དི་མྤི པ་ཏྠེ་ཏྭཱ དཱ་ནཱ་དི་ཀུ་ས་ལཾ ཀ་རོ་ནྟ་སྶ ཏེ་བྷཱུ་མ་ཀ་ཀི་རི་ཡཱ་པི ཙ་ཏུ་བྷཱུ་མ་ཀ་སྶ་པི ཀུ་ས་ལ་སྶ ཨུ་པ་ནི་སྶ་ཡ་པ་ཙྩ་ཡེ་ན པ་ཙྩ་ཡོ. ཡོ་ནི་སོ་མ་ན་སི་ཀཱ་རེ ཝ་ཏྟ་བྦ་མེ་ཝ ན་ཏྠི, ཏཾ ཨུ་པ་ནི་སྶཱ་ཡ རཱ་གཱ་དི་ཨུ་པྤཱ་ད་ནེ ཨ་ཀུ་ས་ལ་སྶ, ཀུ་ས་ལཱ་ཀུ་ས་ལཱུ་པ་ནི་སྶ་ཡ་བྷཱ་ཝ་མུ་ཁེ་ན ཙ་ཏུ་བྷཱུ་མ་ཀ་ཝི་པཱ་ཀ་སྶ. ཨེ་ཝཾ ཀི་རི་ཡ་སྶ་པི ཡོ་ཛེ་ཏ་བྦཾ. ཏེ་ནཱ་ཧ ‘‘ཀི་རི་ཡ་ས་ངྑཱ་ཏོ་པི པ་ཀ་ཏཱུ་པ་ནི་སྶ་ཡོ ཙ་ཏུ་བྷཱུ་མ་ཀཱ་ནཾ ཀུ་ས་ལཱ་དི་ཁ་ནྡྷཱ་ནཾ ཧོ་ཏི་ཡེ་ཝཱ’’ཏི. ནེ་ཝ་ཝི་པཱ་ཀ་ན་ཝི་པཱ་ཀ་དྷ་མྨ་དྷ་མྨེ་སུ པ་ན ཨུ་ཏུ་བྷོ་ཛ་ན་སེ་ནཱ་ས་ནཱ་ན་མེ་ཝ ཏི་ཎྞཾ རཱ་སཱི་ནཾ པ་ཀ་ཏཱུ་པ་ནི་སྶ་ཡ་བྷཱ་ཝ་ད་སྶ་ནཾ ན་ཡ་ད་སྶ་ན་མེ་ཝཱ་ཏི. ཨི་མ་སྨིཾ པ་ཊྛཱ་ན་མ་ཧཱ་པ་ཀ་ར་ཎེ ཨཱ་ག་ཏ་ན་ཡེ་ནཱཏི ཨི་དཾ ‘‘ཀུ་ས་ལཾ དྷ་མྨཾ པ་ཊི་ཙྩ ཨ་བྱཱ་ཀ་ཏོ དྷ་མྨོ ཨུ་པྤ་ཛྫ་ཏི ན ཨུ་པ་ནི་སྶ་ཡ་པ་ཙྩ་ཡཱ, ཀུ་ས་ལེ ཁ་ནྡྷེ པ་ཊི་ཙྩ ཙི་ཏྟ་ས་མུ་ཊྛཱ་ནཾ རཱུ་པ’’ནྟི (པ་ཊྛཱ. ༡.༡.༩༡) ཨེ་ཝ་མཱ་དི་ཀཾ ཨུ་པ་ནི་སྶ་ཡ་པ་ཊི་ཀྑེ་པཾ, ཨ་ནུ་ལོ་མེ ཙ ཨ་ནཱ་ག་མ་ནཾ ས་ནྡྷཱ་ཡ ཝུ་ཏྟཾ. སུ་ཏྟ་ནྟི་ཀ་པ་རི་ཡཱ་ཡེ་ནཱཏི ‘‘ཝི་ཉྙཱ་ཎཱུ་པ་ནི་སཾ ནཱ་མ་རཱུ་པཾ, ནཱ་མ་རཱུ་པ་ནི་སཾ ས་ལཱ༹་ཡ་ཏ་ན’’ནྟི་ཨཱ་དི་ཀེ་ན (སཾ. ནི. ༢.༢༣),
‘‘ཡ་ཐཱ་པི པ་བྦ་ཏོ སེ་ལོ, ཨ་ར་ཉྙ་སྨིཾ བྲ་ཧཱ་ཝ་ནེ;
ཏཾ རུ་ཀྑཱ ཨུ་པ་ནི་སྶཱ་ཡ, ཝ་ཌྜྷ་ནྟེ ཏེ ཝ་ན་པྤ་ཏཱི’’ཏི (ཨ. ནི. ༣.༤༩). –
ཨཱ་དི་ཀེ་ན ཙ.
ཨུ་པ་ནི་སྶ་ཡ་པ་ཙྩ་ཡ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.