༢. པ་ཝ་ཏྟི་ཝཱ་ར་ཝ་ཎྞ་ནཱ
༡༩. པ་ཝ་ཏྟི་ཝཱ་རེ ས་ངྑཱ་རཱ་ནཾ པུ་གྒ་ལཱ་ན་ཉྩ ཨོ་ཀཱ་ས་ཏྟཱ ཛྷཱ་ནཾ བྷཱུ་མི ཙ ཝི་སུཾ ཨོ་ཀཱ་ས་བྷཱ་ཝེ་ན ག་ཧི་ཏཱ་ཏི པུ་གྒ་ལ་ཝཱ་རེ ཙ ཨོ་ཀཱ་ས་ཝ་སེ་ན པུ་གྒ་ལ་གྒ་ཧ་ཎེ་ན ཏེ་སཾ དྭི་ནྣཾ ཨོ་ཀཱ་སཱ་ནཾ ཝ་སེ་ན ག་ཧ་ཎཾ ཧོ་ཏི, ཏ་སྨཱ ‘‘ཝི་ནཱ ཝི་ཏ་ཀྐ་ཝི་ཙཱ་རེ་ཧི ཨ་སྶཱ་ས་པ་སྶཱ་སཱ་ནཾ ཨུ་པྤཱ་ད་ཀྑ་ཎེ’’ཏི དུ་ཏི་ཡ་ཏ་ཏི་ཡ་ཛ྄ཛྷཱ་ནོ་ཀཱ་ས་ཝ་སེ་ན ག་ཧི་ཏཱ པུ་གྒ་ལཱ ཝི་སེ་སེ་ཏྭཱ ད་སྶི་ཏཱ་ཏི ད་ཊྛ་བྦཱ. པུ་ན པ་ཋ་མ་ཛ྄ཛྷཱ་ནཾ ས་མཱ་པ་ནྣཱ་ནནྟི ཛྷཱ་ནོ་ཀཱ་ས་ཝ་སེ་ན པུ་གྒ་ལཾ ད་སྶེ་ཏི, ཀཱ་མཱ་ཝ་ཙ་རཱ་ནནྟི བྷཱུ་མོ་ཀཱ་ས་ཝ་སེ་ན. དྭི་པྤ་ཀཱ་རཱ་ན་མྤི པ་ན ཏེ་སཾ ཝི་སེ་ས་ན་ཏྠ་མཱ་ཧ ‘‘ཨ་སྶཱ་ས་པ་སྶཱ་སཱ་ནཾ ཨུ་པྤཱ་ད་ཀྑ་ཎེ’’ཏི. ཏེ་ན རཱུ་པཱ་རཱུ་པཱ་ཝ་ཙ་རེ་སུ པ་ཋ་མ་ཛ྄ཛྷཱ་ན་ས་མཱ་པ་ནྣ་ཀེ ཀཱ་མཱ་ཝ་ཙ་རེ ག་བྦྷ་ག་ཏཱ་དི་ཀེ ཙ ནི་ཝ་ཏྟེ་ཏི. ཀཱ་མཱ་ཝ་ཙ་རཱ་ན་མྤི ཧི ག་བྦྷ་ག་ཏཱ་དཱི་ནཾ ཝི་ནཱ ཨ་སྶཱ་ས་པ་སྶཱ་སེ་ཧི ཝི་ཏ་ཀྐ་ཝི་ཙཱ་རཱ་ནཾ ཨུ་པྤ་ཏྟི ཨ་ཏྠི. ཨ་ཊྛ་ཀ་ཐཱ་ཡཾ པ་ན ཨེ་ཀ་ནྟི་ཀ་ཏྟཱ རཱུ་པཱ་རཱུ་པཱ་ཝ་ཙ་རཱ ནི་ད་སྶི་ཏཱ. ཝི་ནཱ ཨ་སྶཱ་ས་པ་སྶཱ་སེ་ཧི ཝི་ཏ་ཀྐ་ཝི་ཙཱ་རཱ་ནཾ ཨུ་པྤཱ་ད་ཀྑ་ཎེཏི ཨེ་ཏེ་ན པ་ན ད་སྶི་ཏཱ པུ་གྒ་ལཱ པ་ཋ་མ་ཛ྄ཛྷཱ་ནོ་ཀཱ་སཱ ཀཱ་མཱ་ཝ་ཙ་རཱ་དི་ཨོ་ཀཱ་སཱ ཙ ཨ་སྶཱ་ས་པ་སྶཱ་ས་ཝི་ར་ཧ་ཝི་སི་ཊྛཱ ད་ཊྛ་བྦཱ. ཨི་མི་ནཱ ན་ཡེ་ན ས་བྦ་ཏྠ པུ་གྒ་ལ་ཝི་བྷཱ་གོ ཝེ་དི་ཏ་བྦོ.
༢༡. ‘‘པ་ཋ་མ་ཛ྄ཛྷཱ་ནེ ཀཱ་མཱ་ཝ་ཙ་རེ་ཏི ཀཱ་མཱ་ཝ་ཙ་ར་བྷཱུ་མི་ཡཾ ཨུ་པྤ་ནྣེ པ་ཋ་མ་ཛ྄ཛྷཱ་ནེ’’ཏི ཨ་ཊྛ་ཀ་ཐཱ་ཡཾ ཝུ་ཏྟཾ, ཨེ་ཏ་སྨིཾ པ་ན ཨ་ཏྠེ ས་ཏི ‘‘ཙ་ཏུ་ཏྠ་ཛ྄ཛྷཱ་ནེ རཱུ་པཱ་ཝ་ཙ་རེ ཨ་རཱུ་པཱ་ཝ་ཙ་རེ ཏ་ཏྠ ཙི་ཏྟ་ས་ངྑཱ་རོ ཨུ་པྤ་ཛྫ་ཏི, ནོ ཙ ཏ་ཏྠ ཀཱ་ཡ་ས་ངྑཱ་རོ ཨུ་པྤ་ཛྫ་ཏཱི’’ཏི ཨེ་ཏྠཱ་པི རཱུ་པཱ་རཱུ་པཱ་ཝ་ཙ་ར་བྷཱུ་མཱི་སུ ཨུ་པྤ་ནྣེ ཙ་ཏུ་ཏྠ་ཛ྄ཛྷཱ་ནེ་ཏི ཨ་ཏྠོ བྷ་ཝེ་ཡྻ, སོ ཙ ཨ་ནི་ཊྛོ བྷཱུ་མཱི་ནཾ ཨོ་ཀཱ་ས་བྷཱ་ཝ་སྶེ་ཝ ཨ་གྒ་ཧི་ཏ་ཏཱ་པ་ཏྟི་ཏོ, ས་བྦ་ཙ་ཏུ་ཏྠ་ཛ྄ཛྷཱ་ན་སྶ ཨོ་ཀཱ་ས་ཝ་སེ་ན ཨ་གྒ་ཧི་ཏ་ཏཱ་པ་ཏྟི་ཏོ ཙ, ཏ་སྨཱ ཛྷཱ་ན་བྷཱུ་མོ་ཀཱ་སཱ་ནཾ ས་ངྐ་རཾ ཨ་ཀ་ཏྭཱ ཝི་སུཾ ཨེ་ཝ ཨོ་ཀཱ་ས་བྷཱ་ཝོ ཡོ་ཛེ་ཏ་བྦོ. པ་ཋ་མ་ཛ྄ཛྷཱ་ནོ་ཀཱ་སེ་པི ཧི ཀཱ་ཡ་ས་ངྑཱ་རོ ཙ ཨུ་པྤ་ཛྫ་ཏི ཝ་ཙཱི་ས་ངྑཱ་རོ ཙ ཨུ་པྤ་ཛྫ་ཏི ཀཱ་མཱ་ཝ་ཙ་རོ་ཀཱ་སེ ཙ. ཡ་དི་པི ན ས་བྦ་མྷི པ་ཋ་མ་ཛ྄ཛྷཱ་ནེ ས་བྦ་མྷི ཙ ཀཱ་མཱ་ཝ་ཙ་རེ དྭ་ཡཾ ཨུ་པྤ་ཛྫ་ཏི, ཏ་ཏྠ པ་ན ཏཾ་དྭ་ཡུ་པྤ་ཏྟི ཨ་ཏྠཱི་ཏི ཀ་ཏྭཱ ཨེ་ཝཾ ཝུ་ཏྟ་ནྟི ད་ཊྛ་བྦཾ. ཝི་སུཾ ཨོ་ཀཱ་ས་ཏྟཱ ཙ ‘‘ཨ་ངྒ་མ་ཏྟ་ཝ་སེ་ན ཙེ་ཏྠཱ’’ཏི་ཨཱ་དི་ཝ་ཙ་ནཾ ན ཝ་ཏྟ་བྦཾ ཧོ་ཏཱི་ཏི. ཨི་མ་མྷི ཙ ཡ་མ་ཀེ ཨ་ཝི་ཏ་ཀྐ་ཝི་ཙཱ་ར་མ་ཏྟཾ དུ་ཏི་ཡ་ཛ྄ཛྷཱ་ནཾ ཝི་ཙཱ་ར་ཝ་སེ་ན པ་ཋ་མ་ཛ྄ཛྷཱ་ནེ ས་ངྒ་ཧཾ ག་ཙྪ་ཏཱི་ཏི ད་ཊྛ་བྦཾ. མུ་དྡྷ་བྷཱུ་ཏཾ དུ་ཏི་ཡ་ཛ྄ཛྷཱ་ནཾ ག་ཧེ་ཏྭཱ ཨི་ཏ་རཾ ཨ་ས་ངྒ་ཧི་ཏ་ནྟི ཝཱ. ཡ་སྶ་ཡ་ཏྠ་ཀེ ‘‘ནི་རོ་དྷ་ས་མཱ་པ་ནྣཱ་ན’’ནྟི ན ལ་བྦྷ་ཏི. ན ཧི ཏེ ཨ་ས་ཉྙ་ས་ཏྟཱ ཝི་ཡ ཨོ་ཀཱ་སེ ཧོ་ནྟཱི་ཏི.
༣༧. སུ་དྡྷཱ་ཝཱ་སཱ་ནཾ དུ་ཏི་ཡེ ཙི་ཏྟེ ཝ་ཏྟ་མཱ་ནེཏི ཏེ་སཾ པ་ཋ་མ་ཏོ ཨ་ཝི་ཏ་ཀྐ་ཨ་ཝི་ཙཱ་ར་ཏོ དུ་ཏི་ཡེ ས་ཝི་ཏ་ཀྐ་ས་ཝི་ཙཱ་རེ་པི བྷ་ཝ་ནི་ཀ་ནྟི་ཨཱ་ཝ་ཛྫ་ནེ ཝ་ཏྟ་མཱ་ནེ ཨུ་བྷ་ཡཾ ནུ་པྤ་ཛྫི་ཏྠཱ་ཏི ད་སྶེ་ནྟེ་ན ཏ་ཏོ པུ་རི་མ་ཙི་ཏྟ་ཀྑ་ཎེ་སུ་པི ནུ་པྤ་ཛྫི་ཏྠཱ་ཏི ད་སྶི་ཏ་མེ་ཝ ཧོ་ཏི. ཡ་ཐཱ པ་ན ཙི་ཏྟ་ས་ངྑཱ་ར་སྶ ཨཱ་དི་ད་སྶ་ན་ཏྠཾ ‘‘སུ་དྡྷཱ་ཝཱ་སཾ ཨུ་པ་པ་ཛྫ་ནྟཱ་ན’’ནྟི ཝུ་ཏྟཾ, ཨེ་ཝཾ ཝ་ཙཱི་ས་ངྑཱ་ར་སྶ ཨཱ་དི་ད་སྶ་ན་ཏྠཾ ‘‘དུ་ཏི་ཡེ ཙི་ཏྟེ ཝ་ཏྟ་མཱ་ནེ’’ཏི ཝུ་ཏྟ་ནྟི ད་ཊྛ་བྦཾ.
པ་ཝ་ཏྟི་ཝཱ་ར་ཝ་ཎྞ་ནཱ ནི་ཊྛི་ཏཱ.
ས་ངྑཱ་ར་ཡ་མ་ཀ་ཝ་ཎྞ་ནཱ ནི་ཊྛི་ཏཱ.