༢. ཚ་ལ༹་བྷི་ཛཱ་ཏི་སུ་ཏྟ་ཝ་ཎྞ་ནཱ
༥༧. ཏ་ཏི་ཡེ ཨ་བྷི་ཛཱ་ཏི་ཡོཏི ཨེ་ཏྠ ཨ་བྷི-ས་དྡོ ཨུ་པ་ས་གྒ་མ་ཏྟཾ, ན ཨ་ཏྠ་ཝི་སེ་ས་ཛོ་ཏ་ཀོ་ཏི ཨཱ་ཧ ‘‘ཚ ཛཱ་ཏི་ཡོ’’ཏི. ཨ་བྷི་ཛཱ་ཡ་ཏཱིཏི ཨེ་ཏྠཱ་པི ཨེ་སེ་ཝ ན་ཡོ.
ཨུ་ར་བྦྷེ ཧ་ན་ནྟཱི་ཏི ཨོ་ར་བྦྷི་ཀཱ. ཨེ་ཝཾ སཱུ་ཀ་རི་ཀཱད་ཡོ ཝེ་དི་ཏ་བྦཱ. རོ་དེནྟི ཀུ་རུ་ར་ཀ་མྨ་ནྟ་ཏཱ་ཡ ས་པྤ་ཊི་བ་དྡྷེ ས་ཏྟེ ཨ་སྶཱུ་ནི མོ་ཙེ་ནྟཱི་ཏི རུ་དྡཱ, ཏེ ཨེ་ཝ ལུ་དྡཱ ར-ཀཱ་ར་སྶ ལ-ཀཱ་རཾ ཀ་ཏྭཱ. ཨི་མི་ནཱ ཨ་ཉྙེ་པི ཡེ ཀེ་ཙི མཱ་ག་ཝི་ཀཱ ནེ་སཱ་དཱ ཝུ་ཏྟཱ, ཏེ པཱ་པ་ཀ་མྨ་པྤ་སུ་ཏ་ཏཱ་ཡ ‘‘ཀ་ཎྷཱ་བྷི་ཛཱ་ཏཱི’’ཏི ཝ་ད་ཏི.
བྷི་ཀྑཱུཏི ཙ བུ་དྡྷ་སཱ་ས་ནེ བྷི་ཀྑཱུ. ཏེ ཀི་ར ས་ཙྪ་ནྡ་རཱ་གེ་ན པ་རི་བྷུ་ཉྫ་ནྟཱི་ཏི ཨ་དྷི་པྤཱ་ཡེ་ན ཙ་ཏཱུ་སུ པ་ཙྩ་ཡེ་སུ ཀ་ཎྚ་ཀེ པ་ཀྑི་པི་ཏྭཱ ཁཱ་ད་ནྟཱི་ཏི ‘‘ཀ་ཎྚ་ཀ་ཝུ་ཏྟི་ཀཱ’’ཏི ཝ་ད་ཏི. ཀ་སྨཱ་ཏི ཙེ? ཡ་སྨཱ ཏེ པ་ཎཱི་ཏེ པ་ཙྩ་ཡེ པ་ཊི་སེ་ཝ་ནྟཱི་ཏི ཏ་སྶ མི་ཙྪཱ་གཱ་ཧོ. ཉཱ་ཡ་ལ་དྡྷེ་པི པ་ཙྩ་ཡེ བྷུ་ཉྫ་མཱ་ནཱ ཨཱ་ཛཱི་ཝ་ཀ་ས་མ་ཡ་སྶ ཝི་ལོ་མ་གྒཱ་ཧི་ཏཱ་ཡ པ་ཙྩ་ཡེ་སུ ཀ་ཎྚ་ཀེ པ་ཀྑི་པི་ཏྭཱ ཁཱ་ད་ནྟི ནཱ་མཱ་ཏི ཝ་ད་ཏཱི་ཏི. ཨ་ཐ ཝཱ ཀ་ཎྚ་ཀ་ཝུ་ཏྟི་ཀཱ ཨེ་ཝཾ་ནཱ་མ་ཀཱ ཨེ་ཀེ པ་བྦ་ཛི་ཏཱ, ཡེ ས་ཝི་སེ་སཾ ཨ་ཏྟ་ཀི་ལ་མ་ཐཱ་ནུ་ཡོ་གཾ ཨ་ནུ་ཡུ་ཏྟཱ. ཏ་ཐཱ ཧི ཏེ ཀ་ཎྚ་ཀེ ཝ་ཏྟ་ནྟཱ ཝི་ཡ ཧོ་ནྟཱི་ཏི ‘‘ཀ་ཎྚ་ཀ་ཝུ་ཏྟི་ཀཱ’’ཏི ཝུ་ཏྟཱ. ཨི་མ་མེ་ཝ ཙ ཨ་ཏྠ་ཝི་ཀ་པྤཾ ས་ནྡྷཱ་ཡཱ་ཧ ‘‘ཀ་ཎྚ་ཀ་ཝུ་ཏྟི་ཀཱ་ཏི ས་མ་ཎཱ ནཱ་མེ་ཏེ’’ཏི.
ལོ་ཧི་ཏཱ་བྷི་ཛཱ་ཏི ནཱ་མ ནི་ག་ཎྛཱ ཨེ་ཀ་སཱ་ཊ་ཀཱ་ཏི ཝུ་ཏྟཱ. ཏེ ཀི་ར ཋ་ཏྭཱ བྷུ་ཉྫ་ན་ན་ཧཱ་ན་པྤ་ཊི་ཀྑེ་པཱ་དི་ཝ་ཏ་ས་མཱ་ཡོ་གེ་ན པུ་རི་མེ་ཧི དྭཱི་ཧི པ་ཎྜ་ར་ཏ་རཱ.
ཨ་ཙེ་ལ་ཀ་སཱ་ཝ་ཀཱཏི ཨཱ་ཛཱི་ཝ་ཀ་སཱ་ཝ་ཀེ ཝ་ད་ཏི. ཏེ ཀི་ར ཨཱ་ཛཱི་ཝ་ཀ་ལ་དྡྷི་ཡཱ སུ་ཝི་སུ་དྡྷ་ཙི་ཏྟ་ཏཱ་ཡ ནི་ག་ཎྛེ་ཧི་པི པ་ཎྜ་ར་ཏ་རཱ. ཨེ་ཝ་ཉྩ ཀ་ཏྭཱ ཨ་ཏྟ་ནོ པ་ཙྩ་ཡ་དཱ་ཡ་ཀེ ནི་ག་ཎྛེ་ཧི་པི ཛེ་ཊྛ་ཀ་ཏ་རེ ཀ་རོ་ཏི.
ཨཱ་ཛཱི་ཝ་ཀཱ ཨཱ་ཛཱི་ཝ་ཀི་ནི་ཡོ ‘‘སུ་ཀྐཱ་བྷི་ཛཱ་ཏཱི’’ཏི ཝུ་ཏྟཱ. ཏེ ཀི་ར པུ་རི་མེ་ཧི ཙ་ཏཱུ་ཧི པ་ཎྜ་ར་ཏ་རཱ. ན་ནྡཱ་ད་ཡོ ཧི ཏ་ཐཱ་རཱུ་པཾ ཨཱ་ཛཱི་ཝ་ཀ་པྤ་ཊི་པ་ཏྟིཾ ཨུ་ཀྐཾ་སཾ པཱ་པེ་ཏྭཱ ཋི་ཏཱ, ཏ་སྨཱ ནི་ག་ཎྛེ་ཧི ཨཱ་ཛཱི་ཝ་ཀ་སཱ་ཝ་ཀེ་ཧི ཙ པ་ཎྜ་ར་ཏ་རཱ་ཏི ‘‘པ་ར་མ་སུ་ཀྐཱ་བྷི་ཛཱ་ཏཱི’’ཏི ཝུ་ཏྟཱ.
བི་ལཾ ཨོ་ལ་གྒེ་ཡྻུནྟི མཾ་ས་བྷཱ་གཾ ནྷཱ་རུ་ནཱ ཝཱ ཀེ་ན་ཙི ཝཱ ག་ནྠི་ཏྭཱ པུ་རི་ས་སྶ ཧ་ཏྠེ ཝཱ ཀེ་སེ ཝཱ ཨོ་ལ་མྦ་ན་ཝ་སེ་ན བ་ནྡྷེ་ཡྻུཾ. ཨི་མི་ནཱ ས་ཏྠ་དྷ་མྨཾ ནཱ་མ ད་སྶེ་ཏི. ས་ཏྠ་ཝཱ་ཧོ ཀི་ར མ་ཧཱ་ཀ་ནྟཱ་རཾ པ་ཊི་པ་ནྣོ ཨ་ནྟ་རཱ་མ་གྒེ གོ་ཎེ མ་ཏེ མཾ་སཾ ག་ཧེ་ཏྭཱ ས་བྦེ་སཾ ས་ཏྠི་ཀཱ་ནཾ ‘‘ཨི་དཾ ཁཱ་དི་ཏྭཱ ཨེ་ཏྟ་ཀཾ མཱུ་ལཾ དཱ་ཏ་བྦ’’ནྟི ཀོ་ཊྛཱ་སཾ ཨོ་ལ་མྦ་ཏི. གོ་ཎ་མཾ་སཾ ནཱ་མ ཁཱ་ད་ནྟཱ་པི ཨ་ཏྠི, ཨ་ཁཱ་ད་ནྟཱ་པི ཨ་ཏྠི, ཁཱ་ད་ནྟཱ་པི མཱུ་ལཾ དཱ་ཏུཾ ས་ཀྐོ་ནྟཱ་པི ཨ་ས་ཀྐོ་ནྟཱ་པི. ས་ཏྠ་ཝཱ་ཧོ ཡེ་ན མཱུ་ལེ་ན གོ་ཎོ ག་ཧི་ཏོ, ཏཾ མཱུ་ལཾ ས་ཏྠི་ཀེ་ཧི དྷཱ་ར་ཎ་ཏྠཾ ས་བྦེ་སཾ བ་ལ་ཀྐཱ་རེ་ན ཀོ་ཊྛཱ་སཾ ད་ཏྭཱ མཱུ་ལཾ ག་ཎྷཱ་ཏི. ཨ་ཡཾ ས་ཏྠ་དྷ་མྨོ.
ཀ་ཎྷཱ་བྷི་ཛཱ་ཏི་ཡོ ས་མཱ་ནོཏི ཀ་ཎྷེ ནཱི་ཙ་ཀུ་ལེ ཛཱ་ཏོ ཧུ་ཏྭཱ. ཀ་ཎྷ་དྷ་མྨནྟི པ་ཙྩ་ཏྟེ ཨུ་པ་ཡོ་ག་ཝ་ཙ་ན་ནྟི ཨཱ་ཧ ‘‘ཀ་ཎྷ་ས་བྷཱ་ཝོ ཧུ་ཏྭཱ ཨ་བྷི་ཛཱ་ཡ་ཏཱི’’ཏི, ཏཾ ཨ་ནྟོ་ག་དྷ་ཧེ་ཏུ་ཨ་ཏྠཾ པ་དཾ, ཨུ་པྤཱ་དེ་ཏཱི་ཏི ཨ་ཏྠོ. ཏ་སྨཱ ཀ་ཎྷཾ དྷ་མྨཾ ཨ་བྷི་ཛཱ་ཡ་ཏཱིཏི ཀཱ་ལ༹་ཀཾ ད་ས་དུ་སྶཱི་ལྱ་དྷ་མྨཾ ཨུ་པྤཱ་དེ་ཏི. སུ་ཀྐཾ དྷ་མྨཾ ཨ་བྷི་ཛཱ་ཡ་ཏཱིཏི ཨེ་ཏྠཱ་པི ཨི་མི་ནཱ ན་ཡེ་ན ཨ་ཏྠོ ཝེ་དི་ཏ་བྦོ. སོ ཧི ‘‘ཨ་ཧཾ པུ་བྦེ་པི པུ་ཉྙཱ་ནཾ ཨ་ཀ་ཏ་ཏྟཱ ནཱི་ཙ་ཀུ་ལེ ནི་བྦ་ཏྟོ, ཨི་དཱ་ནི པུ་ཉྙཾ ཀ་རི་སྶཱ་མཱི’’ཏི པུ་ཉྙ་ས་ངྑཱ་ཏཾ པ་ཎྜ་ར་དྷ་མྨཾ ཀ་རོ་ཏི.
ཨ་ཀ་ཎྷཾ ཨ་སུ་ཀྐཾ ནི་བྦཱ་ནནྟི ས་ཙེ ཀ་ཎྷཾ བྷ་ཝེ་ཡྻ, ཀ་ཎྷ་ཝི་པཱ་ཀཾ ད་དེ་ཡྻ ཡ་ཐཱ ད་ས་ཝི་དྷཾ དུ་སྶཱི་ལྱ་དྷ་མྨཾ. ས་ཙེ སུ་ཀྐཾ, སུ་ཀྐ་ཝི་པཱ་ཀཾ ད་དེ་ཡྻ ཡ་ཐཱ དཱ་ན་སཱི་ལཱ་དི་ཀུ་ས་ལ་ཀ་མྨཾ. དྭི་ནྣ་མྤི ཨ་པྤ་དཱ་ན་ཏོ ‘‘ཨ་ཀ་ཎྷཾ ཨ་སུ་ཀྐ’’ནྟི ཝུ་ཏྟཾ. ནི་བྦཱ་ན་ཉྩ ནཱ་མ ཨི་མ་སྨིཾ ཨ་ཏྠེ ཨ་ར་ཧ་ཏྟཾ ཨ་དྷི་པྤེ་ཏཾ ‘‘ཨ་བྷི་ཛཱ་ཡ་ཏཱི’’ཏི ཝ་ཙ་ན་ཏོ. ཏ་ཉྷི ཀི་ལེ་ས་ནི་བྦཱ་ན་ནྟེ ཛཱ་ཏ་ཏྟཱ ནི་བྦཱ་ནཾ ནཱ་མ ཡ་ཐཱ ‘‘རཱ་གཱ་དཱི་ནཾ ཁ་ཡ་ནྟེ ཛཱ་ཏ་ཏྟཱ རཱ་ག་ཀྑ་ཡོ, དོ་ས་ཀྑ་ཡོ, མོ་ཧ་ཀྑ་ཡོ’’ཏི. པ་ཊི་པྤ་སྶ་མྦྷ་ན་ཝ་སེ་ན ཝཱ ཀི་ལེ་སཱ་ནཾ ནི་བྦཱ་པ་ན་ཏོ ནི་བྦཱ་ནཾ. ཏཾ ཨེ་ས ཨ་བྷི་ཛཱ་ཡ་ཏི པ་ས་ཝ་ཏི. ཨི་དྷཱ་པི ཧི ཨ་ནྟོ་ག་དྷ་ཧེ་ཏུ ཨ་ཏྠཾ ‘‘ཛཱ་ཡ་ཏཱི’’ཏི པ་དཾ. ཨ་ཊྛ་ཀ་ཐཱ་ཡཾ པ་ན ‘‘ཛཱ་ཡ་ཏཱི’’ཏི ཨི་མ་སྶ པཱ་པུ་ཎཱ་ཏཱི་ཧི ཨ་ཏྠཾ ག་ཧེ་ཏྭཱ་ཝ ‘‘ནི་བྦཱ་ནཾ པཱ་པུ་ཎཱ་ཏཱི’’ཏི ཝུ་ཏྟཾ. སུ་ཀྐཱ་བྷི་ཛཱ་ཏི་ཡོ ས་མཱ་ནོཏི སུ་ཀྐེ ཨུ་ཙྩ་ཀུ་ལེ ཛཱ་ཏོ ཧུ་ཏྭཱ. སེ་ས་མེ་ཏྠ སུ་ཝི་ཉྙེ་ཡྻ་མེ་ཝ.
ཚ་ལ༹་བྷི་ཛཱ་ཏི་སུ་ཏྟ་ཝ་ཎྞ་ནཱ ནི་ཊྛི་ཏཱ.