༤. ཨཱ་ས་ཝ་སུ་ཏྟ་ཝ་ཎྞ་ནཱ
༥༨. ཙ་ཏུ་ཏྠེ སཾ་ཝ་རེ་ནཱཏི སཾ་ཝ་རེ་ན ཧེ་ཏུ་བྷཱུ་ཏེ་ན ཝཱ. ཨི་དྷཱཏི ཨ་ཡཾ ཨི་དྷ-ས་དྡོ ས་བྦཱ་ཀཱ་ར་ཏོ ཨི་ནྡི་ཡ་སཾ་ཝ་ར་སཾ་ཝུ་ཏ་སྶ པུ་གྒ་ལ་སྶ ས་ནྣི་སྶ་ཡ་བྷཱུ་ཏ་སཱ་ས་ན་པ་རི་དཱི་པ་ནོ, ཨ་ཉྙ་སྶ ཏ་ཐཱ་བྷཱ་ཝ་པྤ་ཊི་སེ་དྷ་ནོ ཝཱ་ཏི ཝུ་ཏྟཾ ‘‘ཨི་དྷཱ་ཏི ཨི་དྷ་སྨིཾ སཱ་ས་ནེ’’ཏི. པ་ཊི་ས་ངྑཱཏི པ་ཊི་ས་ངྑཱ་ཡ. ས་ངྑཱ-ས་དྡོ ཉཱ་ཎ་ཀོ་ཊྛཱ་ས་པ་ཉྙ་ཏྟི་ག་ཎ་ནཱ་དཱི་སུ དི་སྶ་ཏི ‘‘ས་ངྑཱ་ཡེ་ཀཾ པ་ཊི་སེ་ཝ་ཏཱི’’ཏི་ཨཱ་དཱི་སུ (མ. ནི. ༢.༡༦༨) ཧི ཉཱ་ཎེ དི་སྶ་ཏི. ‘‘པ་པ་ཉྩ་ས་ཉྙཱ་ས་ངྑཱ ས་མུ་དཱ་ཙ་ར་ནྟཱི’’ཏི་ཨཱ་དཱི་སུ (མ. ནི. ༡.༢༠༢, ༢༠༤) ཀོ་ཊྛཱ་སེ. ‘‘ཏེ་སཾ ཏེ་སཾ དྷ་མྨཱ་ནཾ ས་ངྑཱ ས་མ་ཉྙཱ’’ཏི་ཨཱ་དཱི་སུ (དྷ. ས. ༡༣༡༣-༡༣༡༥) པ་ཉྙ་ཏྟི་ཡཾ. ‘‘ན སུ་ཀ་རཾ ས་ངྑཱ་ཏུ’’ནྟི་ཨཱ་དཱི་སུ (སཾ. ནི. ༢.༡༢༨) ག་ཎ་ནཱ་ཡ. ཨི་དྷ པ་ན ཉཱ་ཎེ ད་ཊྛ་བྦོ. ཏེ་ནེ་ཝཱ་ཧ ‘‘པ་ཊི་ས་ཉྫཱ་ནི་ཏྭཱ པ་ཙྩ་ཝེ་ཀྑི་ཏྭཱ་ཏི ཨ་ཏྠོ’’ཏི. ཨཱ་དཱི་ན་ཝ་པ་ཙྩ་ཝེ་ཀྑ་ཎཱ ཨཱ་དཱི་ན་ཝ་པ་ཊི་ས་ངྑཱ་ཏི ཡོ་ཛ་ནཱ. ས་མྤ་ལི་མ་ཊྛནྟི གྷཾ་སི་ཏཾ. ཨ་ནུ་བྱ་ཉྫ་ན་སོཏི ཧ་ཏྠ་པཱ་ད་སི་ཏ་ཨཱ་ལོ་ཀི་ཏ་ཝི་ལོ་ཀི་ཏཱ་དི་པྤ་ཀཱ་ར་བྷཱ་ག་སོ. ཏ་ཉྷི ཨ་ཡོ་ནི་སོ་མ་ན་སི་ཀ་རོ་ཏོ ཀི་ལེ་སཱ་ནཾ ཨ་ནུ་བྱ་ཉྫ་ན་ཏོ ‘‘ཨ་ནུ་བྱ་ཉྫ་ན’’ནྟི ཝུ་ཙྩ་ཏི. ནི་མི་ཏྟ་གྒཱ་ཧོཏི ཨི་ཏྠི་པུ་རི་ས་ནི་མི་ཏྟ་སྶ སུ་བྷ་ནི་མི་ཏྟཱ་དི་ཀ་སྶ ཝཱ ཀི་ལེ་ས་ཝ་ཏྠུ་བྷཱུ་ཏ་སྶ ནི་མི་ཏྟ་སྶ གཱ་ཧོ. ཨཱ་དི་ཏྟ་པ་རི་ཡཱ་ཡེ་ནཱཏི ཨཱ་དི་ཏྟ་པ་རི་ཡཱ་ཡེ (སཾ. ནི. ༤.༢༨; མ་ཧཱ་ཝ. ༥༤) ཨཱ་ག་ཏ་ན་ཡེ་ན ཝེ་དི་ཏ་བྦོ.
ཡ་ཐཱ ཨི་ཏྠི་ཡཱ ཨི་ནྡྲི་ཡཾ ཨི་ཏྠི་ནྡྲི་ཡཾ, ན ཨེ་ཝ་མི་དཾ, ཨི་དཾ པ་ན ཙ་ཀྑུ་མེ་ཝ ཨི་ནྡྲི་ཡ་ནྟི ཙ་ཀྑུ་ནྡྲི་ཡཾ. ཏེ་ནཱ་ཧ ‘‘ཙ་ཀྑུ་མེ་ཝ ཨི་ནྡྲི་ཡ’’ནྟི. ཡ་ཐཱ ཨཱ་ཝཱ་ཊེ ནི་ཡ་ཏ་ཊྛི་ཏི་ཀོ ཀ་ཙྪ་པོ ‘‘ཨཱ་ཝཱ་ཊ་ཀ་ཙྪ་པོ’’ཏི ཝུ་ཙྩ་ཏི, ཨེ་ཝཾ ཏ་པྤ་ཊི་བ་དྡྷ་ཝུ་ཏྟི་ཏཱ་ཡ ཏཾ ཋཱ་ནོ སཾ་ཝ་རོ ཙ་ཀྑུ་ནྡྲི་ཡ་སཾ་ཝ་རོ. ཏེ་ནཱ་ཧ ‘‘ཙ་ཀྑུ་ནྡྲི་ཡེ སཾ་ཝ་རོ ཙ་ཀྑུ་ནྡྲི་ཡ་སཾ་ཝ་རོ’’ཏི. ན་ནུ ཙ ཙ་ཀྑུ་ནྡྲི་ཡེ སཾ་ཝ་རོ ཝཱ ཨ་སཾ་ཝ་རོ ཝཱ ན་ཏྠི. ན ཧི ཙ་ཀྑུ་པ་སཱ་དཾ ནི་སྶཱ་ཡ ས་ཏི ཝཱ མུ་ཊྛ་སྶ་ཙྩཾ ཝཱ ཨུ་པྤ་ཛྫ་ཏི. ཨ་པི་ཙ ཡ་དཱ རཱུ་པཱ་ར་མྨ་ཎཾ ཙ་ཀྑུ་སྶ ཨཱ་པཱ་ཐཾ ཨཱ་ག་ཙྪ་ཏི, ཏ་དཱ བྷ་ཝ་ངྒེ དྭི་ཀྑ་ཏྟུཾ ཨུ་པྤ་ཛྫི་ཏྭཱ ནི་རུ་དྡྷེ ཀི་རི་ཡ་མ་ནོ་དྷཱ་ཏུ ཨཱ་ཝ་ཛྫ་ན་ཀི་ཙྩཾ སཱ་དྷ་ཡ་མཱ་ནཱ ཨུ་པྤ་ཛྫི་ཏྭཱ ནི་རུ་ཛ྄ཛྷ་ཏི. ཏ་ཏོ ཙ་ཀྑུ་ཝི་ཉྙཱ་ཎཾ ད་སྶ་ན་ཀི་ཙྩཾ, ཏ་ཏོ ཝི་པཱ་ཀ་མ་ནོ་དྷཱ་ཏུ ས་མྤ་ཊི་ཙྪ་ན་ཀི་ཙྩཾ, ཏ་ཏོ ཝི་པཱ་ཀ་མ་ནོ་ཝི་ཉྙཱ་ཎ་དྷཱ་ཏུ ས་ནྟཱི་ར་ཎ་ཀི་ཙྩཾ, ཏ་ཏོ ཀི་རི་ཡཱ་ཧེ་ཏུ་ཀ་མ་ནོ་ཝི་ཉྙཱ་ཎ་དྷཱ་ཏུ ཝོ་ཊྛ་བྦ་ན་ཀི་ཙྩཾ སཱ་དྷ་ཡ་མཱ་ནཱ ཨུ་པྤ་ཛྫི་ཏྭཱ ནི་རུ་ཛ྄ཛྷ་ཏི, ཏ་ད་ན་ནྟ་རཾ ཛ་ཝ་ནཾ ཛ་ཝ་ཏི. ཏ་ཏྠཱ་པི ནེ་ཝ བྷ་ཝ་ངྒ་ས་མ་ཡེ, ན ཨཱ་ཝ་ཛྫ་ནཱ་དཱི་ནཾ ཨ་ཉྙ་ཏ་ར་ས་མ་ཡེ ཙ སཾ་ཝ་རོ ཝཱ ཨ་སཾ་ཝ་རོ ཝཱ ཨ་ཏྠི. ཛ་ཝ་ན་ཀྑ་ཎེ པ་ན ས་ཙེ དུ་སྶཱི་ལྱཾ ཝཱ མུ་ཊྛ་སྶ་ཙྩཾ ཝཱ ཨ་ཉྙཱ་ཎཾ ཝཱ ཨ་ཀྑ་ནྟི ཝཱ ཀོ་ས་ཛྫཾ ཝཱ ཨུ་པྤ་ཛྫ་ཏི, ཨ་སཾ་ཝ་རོ ཧོ་ཏི. ཏ་སྨིཾ པ་ན སཱི་ལཱ་དཱི་སུ ཨུ་པྤ་ནྣེ་སུ སཾ་ཝ་རོ ཧོ་ཏི, ཏ་སྨཱ ‘‘ཙ་ཀྑུ་ནྡྲི་ཡེ སཾ་ཝ་རོ’’ཏི ཀ་སྨཱ ཝུ་ཏྟ་ནྟི ཨཱ་ཧ ‘‘ཛ་ཝ་ནེ ཨུ་པྤ་ཛྫ་མཱ་ནོ་པི ཧེ་ས…པེ… ཙ་ཀྑུ་ནྡྲི་ཡ་སཾ་ཝ་རོ་ཏི ཝུ་ཙྩ་ཏཱི’’ཏི.
ཨི་དཾ ཝུ་ཏྟཾ ཧོ་ཏི – ཡ་ཐཱ ན་ག་རེ ཙ་ཏཱུ་སུ དྭཱ་རེ་སུ ཨ་སཾ་ཝུ་ཏེ་སུ ཀི་ཉྩཱ་པི ཨ་ནྟོ་གྷ་ར་དྭཱ་ར་ཀོ་ཊྛ་ཀ་ག་བྦྷཱ་ད་ཡོ སུ་སཾ་ཝུ་ཏཱ, ཏ་ཐཱ་པི ཨ་ནྟོ་ན་ག་རེ ས་བྦཾ བྷ་ཎྜཾ ཨ་ར་ཀྑི་ཏཾ ཨ་གོ་པི་ཏ་མེ་ཝ ཧོ་ཏི. ན་ག་ར་དྭཱ་རེ་ན ཧི པ་ཝི་སི་ཏྭཱ ཙོ་རཱ ཡ་དི་ཙྪ་ཀཾ ཀ་རེ་ཡྻུཾ, ཨེ་ཝ་མེ་ཝཾ ཛ་ཝ་ནེ དུ་སྶཱི་ལྱཱ་དཱི་སུ ཨུ་པྤ་ནྣེ་སུ ཏ་སྨིཾ ཨ་སཾ་ཝ་རེ ས་ཏི དྭཱ་ར་མྤི ཨ་གུ་ཏྟཾ ཧོ་ཏི བྷ་ཝ་ངྒ་མྤི ཨཱ་ཝ་ཛྫ་ནཱ་དཱི་ནི ཝཱི་ཐི་ཙི་ཏྟཱ་ནི་པི. ཡ་ཐཱ པ་ན ན་ག་ར་དྭཱ་རེ་སུ སཾ་ཝུ་ཏེ་སུ ཀི་ཉྩཱ་པི ཨ་ནྟོ་གྷ་རཱ་ད་ཡོ ཨ་སཾ་ཝུ་ཏཱ, ཏ་ཐཱ་པི ཨ་ནྟོ་ན་ག་རེ ས་བྦཾ བྷ་ཎྜཾ སུ་ར་ཀྑི་ཏཾ སུ་གོ་པི་ཏ་མེ་ཝ ཧོ་ཏི. ན་ག་ར་དྭཱ་རེ་སུ ཧི པི་ཧི་ཏེ་སུ ཙོ་རཱ་ནཾ པ་ཝེ་སོ ན་ཏྠི, ཨེ་ཝ་མེ་ཝཾ ཛ་ཝ་ནེ སཱི་ལཱ་དཱི་སུ ཨུ་པྤ་ནྣེ་སུ དྭཱ་ར་མྤི སུ་གུ་ཏྟཾ ཧོ་ཏི བྷ་ཝ་ངྒ་མྤི ཨཱ་ཝ་ཛྫ་ནཱ་དཱི་ནི ཝཱི་ཐི་ཙི་ཏྟཱ་ནི་པི, ཏ་སྨཱ ཛ་ཝ་ན་ཀྑ་ཎེ ཨུ་པྤ་ཛྫ་མཱ་ནོ་པི ཙ་ཀྑུ་ནྡྲི་ཡ་སཾ་ཝ་རོ་ཏི ཝུ་ཏྟོ་ཏི.
སཾ་ཝ་རེ་ན ས་མ་ནྣཱ་ག་ཏོ པུ་གྒ་ལོ སཾ་ཝུ་ཏོ་ཏི ཨཱ་ཧ ‘‘ཨུ་པེ་ཏོ’’ཏི. ཨ་ཡ་མེ་ཝེ་ཏྠ ཨ་ཏྠོ སུ་ནྡ་ར་ཏ་རོཏི ཨུ་པ་རི པཱ་ལི༹་ཡཾ ས་ནྡི་སྶ་ན་ཏོ ཝུ་ཏྟཾ. ཏེ་ནཱ་ཧ ‘‘ཏ་ཐཱ ཧཱི’’ཏི་ཨཱ་དི.
ཡ་ནྟི ཨཱ་དེ་སོཏི ཨི་མི་ནཱ ལི་ངྒ་ཝི་པ་ལླཱ་སེ་ན ས་དྡྷིཾ ཝ་ཙ་ན་ཝི་པ་ལླཱ་སོ ཀ་ཏོ་ཏི ད་སྶེ་ཏི, ནི་པཱ་ཏ་པ་དཾ ཝཱ ཨེ་ཏཾ པུ་ཐུ་ཝ་ཙ་ན་ཏྠཾ. ཝི་གྷཱ་ཏ་ཀ་རཱཏི ཙི་ཏྟ་ཝི་གྷཱ་ཏ་ཀ་རཱ, ཀཱ་ཡ་ཙི་ཏྟ་དུ་ཀྑ་ནི་བྦ་ཏྟ་ཀཱ ཝཱ. ཡ་ཐཱ་ཝུ་ཏྟ་ཀི་ལེ་ས་ཧེ་ཏུ་ཀཱ དཱ་ཧཱ་ནུ་བ་ནྡྷཱ ཝི་པཱ་ཀཱ ཨེ་ཝ ཝི་པཱ་ཀ་པ་རི་ལཱ༹་ཧཱ. ཡ་ཐཱ པ་ནེ་ཏྠ ཨཱ་ས་ཝཱ ཨ་ཉྙེ ཙ ཝི་གྷཱ་ཏ་ཀ་རཱ ཀི་ལེ་ས་པ་རི་ལཱ༹་ཧཱ ས་མྦྷ་ཝ་ནྟི, ཏཾ ད་སྶེ་ཏུཾ ‘‘ཙ་ཀྑུ་དྭཱ་ར་སྨི་ཉྷཱི’’ཏི་ཨཱ་དི ཝུ་ཏྟཾ. ཏཾ སུ་ཝི་ཉྙེ་ཡྻ་མེ་ཝ. ཨེ་ཏྠ ཙ སཾ་ཝ་ར་ཎཱུ་པཱ་ཡོ, སཾ་ཝ་རི་ཏ་བྦཾ, སཾ་ཝ་རོ, ཡ་ཏོ སོ སཾ་ཝ་རོ, ཡ་ཏྠ སཾ་ཝ་རོ, ཡ་ཐཱ སཾ་ཝ་རོ, ཡ་ཉྩ སཾ་ཝ་ར་ཕ་ལ་ནྟི ཨ་ཡཾ ཝི་བྷཱ་གོ ཝེ་དི་ཏ་བྦོ. ཀ་ཐཾ? ‘‘པ་ཊི་ས་ངྑཱ ཡོ་ནི་སོ’’ཏི ཧི སཾ་ཝ་ར་ཎཱུ་པཱ་ཡོ. ཙ་ཀྑུ་ནྡྲི་ཡཾ སཾ་ཝ་རི་ཏ་བྦཾ. སཾ་ཝ་ར་གྒ་ཧ་ཎེ་ན ག་ཧི་ཏཱ ས་ཏི སཾ་ཝ་རོ. ‘‘ཨ་སཾ་ཝུ་ཏ་སྶཱ’’ཏི སཾ་ཝ་ར་ཎཱ་ཝ་དྷི. ཨ་སཾ་ཝ་ར་ཏོ ཧི སཾ་ཝ་ར་ཎཾ. སཾ་ཝ་རི་ཏ་བྦ་གྒ་ཧ་ཎ་སི་དྡྷོ ཨི་དྷ སཾ་ཝ་ར་ཝི་ས་ཡོ. ཙ་ཀྑུ་ནྡྲི་ཡ་ཉྷི སཾ་ཝ་ར་ཎཾ ཉཱ་ཎཾ རཱུ་པཱ་ར་མྨ་ཎེ སཾ་ཝ་ར་ཡ་ཏཱི་ཏི ཨ་ཝུ་ཏྟ་སི་དྡྷོ་ཡ་མ་ཏྠོ. ཨཱ་ས་ཝ་ཏ་ནྣི་མི་ཏྟ་ཀི་ལེ་ས་པ་རི་ལཱ༹་ཧཱ་བྷཱ་ཝོ ཕ་ལཾ. ཨེ་ཝཾ སོ་ཏ་དྭཱ་རཱ་དཱི་སུ ཡོ་ཛེ་ཏ་བྦཾ. ས་བྦ་ཏྠེ་ཝཱཏི མ་ནོ་དྭཱ་རེ པ་ཉྩ་དྭཱ་རེ ཙཱ་ཏི ས་བྦ་སྨིཾ དྭཱ་རེ.
པ་ཊི་ས་ངྑཱ ཡོ་ནི་སོ ཙཱི་ཝ་རནྟི་ཨཱ་དཱི་སུ ‘‘སཱི་ཏ་སྶ པ་ཊི་གྷཱ་ཏཱ་ཡཱ’’ཏི་ཨཱ་དི་ནཱ པ་ཙྩ་ཝེ་ཀྑ་ཎ་མེ་ཝ ཡོ་ནི་སོ པ་ཊི་ས་ངྑཱ. ཨཱི་དི་སནྟི ཨེ་ཝ་རཱུ་པཾ ཨི་ཊྛཱ་ར་མྨ་ཎཾ. བྷ་ཝ་པ་ཏྠ་ནཱ་ཡ ཨ་སྶཱ་ད་ཡ་ཏོཏི བྷ་ཝ་པ་ཏྠ་ནཱ་མུ་ཁེ་ན བྷཱ་ཝི་ཏཾ ཨཱ་ར་མྨ་ཎཾ ཨ་སྶཱ་དེ་ནྟ་སྶ. ཙཱི་ཝ་རནྟི ནི་ཝཱ་ས་ནཱ་དི ཡཾ ཀི་ཉྩི་ཙཱི་ཝ་རཾ. པ་ཊི་སེ་ཝ་ཏཱིཏི ནི་ཝཱ་ས་ནཱ་དི་ཝ་སེ་ན པ་རི་བྷུ་ཉྫ་ཏི. ཡཱ་ཝ་དེ་ཝཱཏི པ་ཡོ་ཛ་ན་པ་རི་མཱ་ཎ་ནི་ཡ་མ་ནཾ. སཱི་ཏ་པྤ་ཊི་གྷཱ་ཏཱ་དི་ཡེ་ཝ ཧི ཡོ་གི་ནོ ཙཱི་ཝ་ར་པྤ་ཊི་སེ་ཝ་ན་པྤ་ཡོ་ཛ་ནཾ. སཱི་ཏ་སྶཱཏི སཱི་ཏ་དྷཱ་ཏུ་ཀྑོ་བྷ་ཏོ ཝཱ ཨུ་ཏུ་པ་རི་ཎཱ་མ་ཏོ ཝཱ ཨུ་པྤ་ནྣ་སྶ སཱི་ཏ་སྶ. པ་ཊི་གྷཱ་ཏཱ་ཡཱཏི པ་ཊི་གྷཱ་ཏ་ན་ཏྠཾ ཏ་པྤ་ཙྩ་ཡ་སྶ ཝི་ཀཱ་ར་སྶ ཝི་ནོ་ད་ན་ཏྠཾ. ཨུ་ཎྷ་སྶཱཏི ཨ་གྒི་ས་ནྟཱ་པ་ཏོ ཨུ་པྤ་ནྣ་སྶ ཨུ་ཎྷ་སྶ. ཌཾ་སཱད་ཡོ པཱ་ཀ་ཊཱ་ཡེ་ཝ. པུ་ན ཡཱ་ཝ་དེ་ཝཱཏི ནི་ཡ་ཏ་པྤ་ཡོ་ཛ་ན་པ་རི་མཱ་ཎ་ནི་ཡ་མ་ནཾ. ནི་ཡ་ཏ་ཉྷི པ་ཡོ་ཛ་ནཾ ཙཱི་ཝ་རཾ པ་ཊི་སེ་ཝ་ནྟ་སྶ ཧི་རི་ཀོ་པཱི་ན་པྤ་ཊི་ཙྪཱ་ད་ནཾ, ཨི་ཏ་རཾ ཀ་དཱ་ཙི. ཧི་རི་ཀོ་པཱི་ནནྟི ས་མྦཱ་དྷ་ཊྛཱ་ནཾ. ཡ་སྨི་ཉྷི ཨ་ངྒེ ཝི་ཝ་ཊེ ཧི་རཱི ཀུ་པྤ་ཏི ཝི་ན་སྶ་ཏི, ཏཾ ཧི་རི་ཡཱ ཀོ་པ་ན་ཏོ ཧི་རི་ཀོ་པཱི་ནཾ, ཏཾ་པ་ཊི་ཙྪཱ་ད་ན་ཏྠཾ ཙཱི་ཝ་རཾ པ་ཊི་སེ་ཝ་ཏི.
པི་ཎྜ་པཱ་ཏནྟི ཡཾ ཀི་ཉྩི ཨཱ་ཧཱ་རཾ. སོ ཧི པི་ཎྜོ་ལྱེ་ན བྷི་ཀྑུ་ནོ པ་ཏྟེ པ་ཏ་ན་ཏོ, ཏ་ཏྠ ཏ་ཏྠ ལ་དྡྷ་བྷི་ཀྑཱ་པི་ཎྜཱ་ནཾ པཱ་ཏོ ས་ནྣི་པཱ་ཏོ་ཏི ཝཱ ‘‘པི་ཎྜ་པཱ་ཏོ’’ཏི ཝུ་ཙྩ་ཏི. ནེ་ཝ ད་ཝཱ་ཡཱཏི ན ཀཱི་ལ༹་ནཱ་ཡ. ན མ་དཱ་ཡཱཏི ན བ་ལ་མ་ད་མཱ་ན་མ་ད་པུ་རི་ས་མ་ད་ཏྠཾ. ན མ་ཎྜ་ནཱ་ཡཱཏི ན ཨ་ངྒ་པ་ཙྩ་ངྒཱ་ནཾ པཱི་ཎ་ན་བྷཱ་ཝ་ཏྠཾ. ན ཝི་བྷཱུ་ས་ནཱ་ཡཱཏི ན ཏེ་སཾ་ཡེ་ཝ སོ་བྷ་ཏྠཾ, ཚ་ཝི་ས་མྤ་ཏྟི་ཨ་ཏྠ་ནྟི ཨ་ཏྠོ. ཨི་མཱ་ནི ཡ་ཐཱ་ཀྐ་མཾ མོ་ཧ་དོ་ས་ས་ཎྛཱ་ན་ཝ་ཎྞ་རཱ་གཱུ་པ་ནི་སྶ་ཡ་པྤ་ཧཱ་ན་ཏྠཱ་ནི ཝེ་དི་ཏ་བྦཱ་ནི. པུ་རི་མཾ ཝཱ དྭ་ཡཾ ཨ་ཏྟ་ནོ སཾ་ཀི་ལེ་སུ་པྤ་ཏྟི་ནི་སེ་དྷ་ན་ཏྠཾ, ཨི་ཏ་རཾ པ་ར་སྶ་པི. ཙ་ཏྟཱ་རི་པི ཀཱ་མ་སུ་ཁ་ལླི་ཀཱ་ནུ་ཡོ་ག་སྶ པ་ཧཱ་ན་ཏྠཾ ཝུ་ཏྟཱ་ནཱི་ཏི ཝེ་དི་ཏ་བྦཱ་ནི. ཀཱ་ཡ་སྶཱཏི རཱུ་པ་ཀཱ་ཡ་སྶ. ཋི་ཏི་ཡཱ ཡཱ་པ་ནཱ་ཡཱཏི པ་བ་ནྡྷ་ཊྛི་ཏ་ཏྠ་ཉྩེ་ཝ པ་ཝ་ཏྟི་ཡཱ ཨ་ཝི་ཙྪེ་ད་ན་ཏྠ་ཉྩ, ཙི་ར་ཀཱ་ལ་ཊྛི་ཏ་ཏྠཾ ཛཱི་ཝི་ཏི་ནྡྲི་ཡ་སྶ པ་ཝ་ཏྟཱ་པ་ན་ཏྠཾ. ཝི་ཧིཾ་སཱུ་པ་ར་ཏི་ཡཱཏི ཛི་གྷ་ཙྪཱ་དུ་ཀྑ་སྶ ཨུ་པ་ར་མ་ཏྠཾ. བྲ་ཧྨ་ཙ་རི་ཡཱ་ནུ་གྒ་ཧཱ་ཡཱཏི སཱ་ས་ན་མ་གྒ་བྲ་ཧྨ་ཙ་རི་ཡཱ་ནཾ ཨ་ནུ་གྒ་ཎྷ་ན་ཏྠཾ. ཨི་ཏཱིཏི ཨེ་ཝཾ ཨི་མི་ནཱ ཨུ་པཱ་ཡེ་ན. པུ་རཱ་ཎ་ཉྩ ཝེ་ད་ནཾ པ་ཊི་ཧ་ངྑཱ་མཱིཏི པུ་རཱ་ཎཾ ཨ་བྷུ་ཏྟ་པ་ཙྩ་ཡཱ ཨུ་པྤ་ཛྫ་ན་ཀ་ཝེ་ད་ནཾ པ་ཊི་ཧ་ནི་སྶཱ་མི. ན་ཝ་ཉྩ ཝེ་ད་ནཾ ན ཨུ་པྤཱ་དེ་སྶཱ་མཱིཏི ན་ཝཾ བྷུ་ཏྟ་པ་ཙྩ་ཡཱ ཨུ་པྤ་ཛྫ་ན་ཀ་ཝེ་ད་ནཾ ན ཨུ་པྤཱ་དེ་སྶཱ་མི. ཏ་སྶཱ ཧི ཨ་ནུ་པྤ་ཛྫ་ན་ཏྠ་མེ་ཝ ཨཱ་ཧཱ་རཾ པ་རི་བྷུ་ཉྫ་ཏི. ཨེ་ཏྠ ཨ་བྷུ་ཏྟ་པ་ཙྩ་ཡཱ ཨུ་པྤ་ཛྫ་ན་ཀ་ཝེ་ད་ནཱ ནཱ་མ ཡ་ཐཱ་ཝུ་ཏྟ་ཛི་གྷ་ཙྪཱ་ནི་མི་ཏྟཱ ཝེ་ད་ནཱ. སཱ ཧི ཨ་བྷུ་ཉྫ་ནྟ་སྶ བྷི་ཡྻོ བྷི་ཡྻོ་པ་ཝ་ཌྜྷ་ན་ཝ་སེ་ན ཨུ་པྤ་ཛྫ་ཏི, བྷུ་ཏྟ་པ་ཙྩ་ཡཱ ཨ་ནུ་པྤ་ཛྫ་ན་ཀ་ཝེ་ད་ནཱ་པི ཁུ་དཱ་ནི་མི་ཏྟཱ་ཝ ཨ་ངྒ་དཱ་ཧ་སཱུ་ལཱ་དི་ཝེ་ད་ནཱ ཨ་པྤ་ཝ་ཏྟཱ. སཱ ཧི བྷུ་ཏྟ་པ་ཙྩ་ཡཱ ཨ་ནུ་པྤ་ནྣཱ་ཝ ན ཨུ་པྤ་ཛྫི་སྶ་ཏི. ཝི་ཧིཾ་སཱ་ནི་མི་ཏྟ་ཏཱ ཙེ་ཏཱ་སཾ ཝི་ཧིཾ་སཱ་ཡ ཝི་སེ་སོ.
ཡཱ་ཏྲཱ ཙ མེ བྷ་ཝི་སྶ་ཏཱིཏི ཡཱ་པ་ནཱ ཙ མེ ཙ་ཏུ་ནྣཾ ཨི་རི་ཡཱ་པ་ཐཱ་ནཾ བྷ་ཝི་སྶ་ཏི. ‘‘ཡཱ་པ་ནཱ་ཡཱ’’ཏི ཨི་མི་ནཱ ཛཱི་ཝི་ཏི་ནྡྲི་ཡ་ཡཱ་པ་ནཱ ཝུ་ཏྟཱ, ཨི་དྷ ཙ་ཏུ་ནྣཾ ཨི་རི་ཡཱ་པ་ཐཱ་ནཾ ཨ་ཝི་ཙྪེ་ད་ས་ངྑཱ་ཏཱ ཡཱ་པ་ནཱ་ཏི ཨ་ཡ་མེ་ཏཱ་སཾ ཝི་སེ་སོ. ཨ་ན་ཝ་ཛྫ་ཏཱ ཙ ཕཱ་སུ་ཝི་ཧཱ་རོ ཙཱཏི ཨ་ཡུ་ཏྟ་པ་རི་ཡེ་ས་ན་པྤ་ཊི་གྒ་ཧ་ཎ་པ་རི་བྷོ་ག་པ་རི་ཝ་ཛྫ་ནེ་ན ཨ་ན་ཝ་ཛྫ་ཏཱ, པ་རི་མི་ཏ་པ་རི་བྷོ་གེ་ན ཕཱ་སུ་ཝི་ཧཱ་རོ. ཨ་ས་པྤཱ་ཡཱ་པ་རི་མི་ཏ་བྷོ་ཛ་ན་པ་ཙྩ་ཡཱ ཨ་ར་ཏི་ཏ་ནྡཱི་ཝི་ཛ་མྦྷི་ཏཱ་ཝི་ཉྙུ་ག་ར་ཧཱ་དི་དོ་སཱ་བྷཱ་ཝེ་ན ཝཱ ཨ་ན་ཝ་ཛྫ་ཏཱ. ས་པྤཱ་ཡ་པ་རི་མི་ཏ་བྷོ་ཛ་ན་པ་ཙྩ་ཡཱ ཀཱ་ཡ་བ་ལ་ས་མྦྷ་ཝེ་ན ཕཱ་སུ་ཝི་ཧཱ་རོ. ཡཱ་ཝ་ད་ཏྠཾ ཨུ་ད་རཱ་ཝ་དེ་ཧ་ཀ་བྷོ་ཛ་ན་པ་རི་ཝ་ཛྫ་ནེ་ན ཝཱ སེ་ཡྻ་སུ་ཁ་པ་སྶ་སུ་ཁ་མི་དྡྷ་སུ་ཁཱ་དཱི་ནཾ ཨ་བྷཱ་ཝ་ཏོ ཨ་ན་ཝ་ཛྫ་ཏཱ. ཙ་ཏུ་པ་ཉྩཱ་ལོ་པ་མ་ཏྟ་ཨཱུ་ན་བྷོ་ཛ་ནེ་ན ཙ་ཏུ་ཨི་རི་ཡཱ་པ་ཐ་ཡོ་གྱ་ཏཱ་པཱ་ད་ན་ཏོ ཕཱ་སུ་ཝི་ཧཱ་རོ. ཝུ་ཏྟ་ཉྷེ་ཏཾ –
‘‘ཙ་ཏྟཱ་རོ པ་ཉྩ ཨཱ་ལོ་པེ, ཨ་བྷུ་ཏྭཱ ཨུ་ད་ཀཾ པི་ཝེ;
ཨ་ལཾ ཕཱ་སུ་ཝི་ཧཱ་རཱ་ཡ, པ་ཧི་ཏ་ཏྟ་སྶ བྷི་ཀྑུ་ནོ’’ཏི. (ཐེ་ར་གཱ. ༩༨༣; མི. པ. ༦.༥.༡༠);
ཨེ་ཏྟཱ་ཝ་ཏཱ ཙ པ་ཡོ་ཛ་ན་པ་རི་གྒ་ཧོ, མ་ཛ྄ཛྷི་མཱ ཙ པ་ཊི་པ་དཱ དཱི་པི་ཏཱ ཧོ་ཏི. ཡཱ་ཏྲཱ ཙ མེ བྷ་ཝི་སྶ་ཏཱིཏི པ་ཡོ་ཛ་ན་པ་རི་གྒ་ཧ་དཱི་པ་ནཱ. ཡཱ་ཏྲཱ ཧི ནཾ ཨཱ་ཧཱ་རཱུ་པ་ཡོ་གཾ པ་ཡོ་ཛེ་ཏི. དྷ་མྨི་ཀ་སུ་ཁཱ་པ་རི་ཙྩཱ་ག་ཧེ་ཏུ་ཀོ ཕཱ་སུ་ཝི་ཧཱ་རོ མ་ཛ྄ཛྷི་མཱ པ་ཊི་པ་དཱ ཨ་ནྟ་དྭ་ཡ་པ་རི་ཝ་ཛྫ་ན་ཏོ.
སེ་ནཱ་ས་ནནྟི སེ་ན་ཉྩ ཨཱ་ས་ན་ཉྩ. ཡ་ཏྠ ཝི་ཧཱ་རཱ་དི་ཀེ སེ་ཏི ནི་པ་ཛྫ་ཏི ཨཱ་ས་ཏི ནི་སཱི་ད་ཏི, ཏཾ སེ་ནཱ་ས་ནཾ. ཨུ་ཏུ་པ་རི་སྶ་ཡ་ཝི་ནོ་ད་ན་པྤ་ཊི་ས་ལླཱ་ནཱ་རཱ་མ་ཏྠནྟི ཨུ་ཏུ་ཡེ་ཝ པ་རི་ས་ཧ་ན་ཊྛེ་ན པ་རི་སྶ་ཡོ ས་རཱི་རཱ་བཱ་དྷ་ཙི་ཏྟ་ཝི་ཀྑེ་པ་ཀ་རོ, ཏ་སྶ ཝི་ནོ་ད་ན་ཏྠཾ, ཨ་ནུ་པྤ་ནྣ་སྶ ཨ་ནུ་པྤཱ་ད་ན་ཏྠཾ, ཨུ་པྤ་ནྣ་སྶ ཝཱུ་པ་ས་མ་ན་ཏྠ་ཉྩཱ་ཏི ཨ་ཏྠོ. ཨ་ཐ ཝཱ ཡ་ཐཱ་ཝུ་ཏྟོ ཨུ་ཏུ ཙ སཱི་ཧ་བྱ་གྒྷཱ་དི་པཱ་ཀ་ཊ་པ་རི་སྶ་ཡོ ཙ རཱ་ག་དོ་སཱ་དི་པ་ཊི་ཙྪ་ནྣ་པ་རི་སྶ་ཡོ ཙ ཨུ་ཏུ་པ་རི་སྶ་ཡོ, ཏ་སྶ ཝི་ནོ་ད་ན་ཏྠ་ཉྩེ་ཝ ཨེ་ཀཱི་བྷཱ་ཝ་ཕཱ་སུ་ཀ་ཏྠ་ཉྩ. ཙཱི་ཝ་ར་པྤ་ཊི་སེ་ཝ་ནེ ཧི་རཱི་ཀོ་པཱི་ན་པྤ་ཊི་ཙྪཱ་ད་ནཾ ཝི་ཡ ཏཾ ནི་ཡ་ཏ་པ་ཡོ་ཛ་ན་ནྟི པུ་ན ‘‘ཡཱ་ཝ་དེ་ཝཱ’’ཏི ཝུ་ཏྟཾ.
གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རནྟི རོ་ག་སྶ པ་ཙྩ་ནཱི་ཀ་པྤ་ཝ་ཏྟི་ཡཱ གི་ལཱ་ན་པ་ཙྩ་ཡོ, ཏ་ཏོ ཨེ་ཝ བྷི་ས་ཀྐ་སྶ ཨ་ནུ་ཉྙཱ་ཏ་ཝ་ཏྠུ་ཏཱ་ཡ བྷེ་ས་ཛྫཾ, ཛཱི་ཝི་ཏ་སྶ པ་རི་ཝཱ་ར་ས་མྦྷཱ་ར་བྷཱ་ཝེ་ཧི པ་རི་ཀྑཱ་རོ ཙཱ་ཏི གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རོ, ཏཾ. ཝེ་ཡྻཱ་བཱ་དྷི་ཀཱ་ནནྟི ཝེ་ཡྻཱ་བཱ་དྷ་ཏོ དྷཱ་ཏུ་ཀྑོ་བྷ་ཏོ ཙ ཏཾ་ནི་བྦ་ཏྟ་ཀུ་ཊྛ་ག་ཎྜ་པཱི་ལ༹་ཀཱ་དི་རོ་ག་ཏོ ཨུ་པྤ་ནྣཱ་ནཾ. ཝེ་ད་ནཱ་ནནྟི དུ་ཀྑ་ཝེ་ད་ནཱ་ནཾ. ཨ་བྱཱ་བ་ཛ྄ཛྷ་པ་ར་མ་ཏཱ་ཡཱཏི ནི་དྡུ་ཀྑ་པ་ར་མ་བྷཱ་ཝཱ་ཡ. ཡཱ་ཝ ཏཾ དུ་ཀྑཾ ས་བྦཾ པ་ཧཱི་ནཾ ཧོ་ཏི, ཏཱ་ཝ པ་ཊི་སེ་ཝཱ་མཱི་ཏི ཡོ་ཛ་ནཱ. ཨེ་ཝ་མེ་ཏྠ ས་ངྑེ་པེ་ནེ་ཝ པཱ་ལི༹་ཝ་ཎྞ་ནཱ ཝེ་དི་ཏ་བྦཱ. ན་ཝ་ཝེ་ད་ནུ་པྤཱ་ད་ཏོ་པཱིཏི ན ཀེ་ཝ་ལཾ ཨཱ་ཡ་ཏིཾ ཨེ་ཝ ཝི་པཱ་ཀ་པ་རི་ལཱ༹་ཧཱ, ཨ་ཐ ཁོ ཨ་ཏི་བྷོ་ཛ་ན་པ་ཙྩ་ཡཱ ཨ་ལཾ་སཱ་ཊ་ཀཱ་དཱི་ནཾ ཝི་ཡ ན་ཝ་ཝེ་ད་ནུ་པྤཱ་ད་ཏོ་པི ཝེ་དི་ཏ་བྦཱ.
ཀ་མྨ་ཊྛཱ་ནི་ཀ་སྶ ཙ་ལ་ནཾ ནཱ་མ ཀ་མྨ་ཊྛཱ་ན་པ་རི་ཙྩཱ་གོ་ཏི ཨཱ་ཧ ‘‘ཙ་ལ་ཏི ཀ་མྤ་ཏི ཀ་མྨ་ཊྛཱ་ནཾ ཝི་ཛ་ཧ་ཏཱི’’ཏི. ‘‘ཁ་མོ ཧོ་ཏི སཱི་ཏ་སྶ ཨུ་ཎྷ་སྶཱ’’ཏི ཨེ་ཏྠ ཙ ལོ་མ་ས་ནཱ་ག་ཏྠེ་ར་སྶ ཝ་ཏྠུ ཀ་ཐེ་ཏ་བྦཾ. ཐེ་རོ ཀི་ར ཙེ་ཏི་ཡ་པ་བྦ་ཏེ པི་ཡ་ངྒུ་གུ་ཧཱ་ཡ པ་དྷཱ་ན་གྷ་རེ ཝི་ཧ་ར་ནྟོ ཨ་ནྟ་ར་ཊྛ་ཀེ ཧི་མ་པཱ་ཏ་ས་མ་ཡེ ལོ་ཀ་ནྟ་རི་ཀ་ནི་ར་ཡཾ པ་ཙྩ་ཝེ་ཀྑི་ཏྭཱ ཀ་མྨ་ཊྛཱ་ནཾ ཨ་ཝི་ཛ་ཧ་ནྟོ་ཝ ཨ་བྦྷོ་ཀཱ་སེ ཝཱི་ཏི་ནཱ་མེ་སི. གི་མྷ་ས་མ་ཡེ ཙ པ་ཙྪཱ་བྷ་ཏྟཾ བ་ཧི་ཙ་ངྐ་མེ ཀ་མྨ་ཊྛཱ་ནཾ མ་ན་སི་ཀ་རོ་ཏོ སེ་དཱ་པི་སྶ ཀ་ཙྪེ་ཧི མུ་ཙྩ་ནྟི. ཨ་ཐ ནཾ ཨ་ནྟེ་ཝཱ་སི་ཀོ ཨཱ་ཧ – ‘‘ཨི་དྷ, བྷ་ནྟེ, ནི་སཱི་ད་ཐ, སཱི་ཏ་ལོ ཨོ་ཀཱ་སོ’’ཏི. ཐེ་རོ ‘‘ཨུ་ཎྷ་བྷ་ཡེ་ནེ་ཝ་མྷི, ཨཱ་ཝུ་སོ, ཨི་དྷ ནི་སི་ནྣོ’’ཏི ཨ་ཝཱི་ཙི་མ་ཧཱ་ནི་ར་ཡཾ པ་ཙྩ་ཝེ་ཀྑི་ཏྭཱ ནི་སཱི་དི་ཡེ་ཝ. ཨུ་ཎྷནྟི ཙེ་ཏྠ ཨ་གྒི་ས་ནྟཱ་པོ་ཝ ཝེ་དི་ཏ་བྦོ སཱུ་རི་ཡ་ས་ནྟཱ་པ་སྶ པ་ར་ཏོ ཝུ་ཙྩ་མཱ་ན་ཏྟཱ. སཱུ་རི་ཡ་ས་ནྟཱ་པ་ཝ་སེ་ན པ་ནེ་ཏཾ ཝ་ཏྠུ ཝུ་ཏྟཾ.
ཡོ ཙ དྭེ ཏ་ཡོ ཝཱ་རེ བྷ་ཏྟཾ ཝཱ པཱ་ནཱི་ཡཾ ཝཱ ཨ་ལ་བྷ་མཱ་ནོ་པི ཨ་ན་མ་ཏ་གྒེ སཾ་སཱ་རེ ཨ་ཏྟ་ནོ པེ་ཏྟི་ཝི་ས་ཡཱུ་པ་པ་ཏྟིཾ པ་ཙྩ་ཝེ་ཀྑི་ཏྭཱ ཨ་ཝེ་དྷ་ནྟོ ཀ་མྨ་ཊྛཱ་ནཾ ན ཝི་ཛ་ཧ་ཏི་ཡེ་ཝ. ཌཾ་ས་མ་ཀ་ས་ཝཱ་ཏཱ་ཏ་པ་ས་མྥ་སྶེ་ཧི ཕུ་ཊྛོ ཙེ་པི ཏི་ར་ཙྪཱ་ནཱུ་པ་པ་ཏྟིཾ པ་ཙྩ་ཝེ་ཀྑི་ཏྭཱ ཨ་ཝེ་དྷ་ནྟོ ཀ་མྨ་ཊྛཱ་ནཾ ན ཝི་ཛ་ཧ་ཏི་ཡེ་ཝ. ས་རཱི་ས་པ་ས་མྥ་སྶེ་ན ཕུ་ཊྛོ ཙཱ་པི ཨ་ན་མ་ཏ་གྒེ སཾ་སཱ་རེ སཱི་ཧ་བྱ་གྒྷཱ་དི་མུ་ཁེ་སུ ཨ་ནེ་ཀ་ཝཱ་རཾ པ་རི་ཝ་ཏྟི་ཏ་པུ་བྦ་བྷཱ་ཝཾ པ་ཙྩ་ཝེ་ཀྑི་ཏྭཱ ཨ་ཝེ་དྷ་ནྟོ ཀ་མྨ་ཊྛཱ་ནཾ ན ཝི་ཛ་ཧ་ཏི་ཡེ་ཝ པ་དྷཱ་ནི་ཡ་ཏྠེ་རོ ཝི་ཡ, ཨ་ཡཾ ‘‘ཁ་མོ ཛི་གྷ་ཙྪཱ་ཡ…པེ… ས་རཱི་ས་པ་ས་མྥ་སྶཱ་ན’’ནྟི ཝེ་དི་ཏ་བྦོ. ཐེ་རཾ ཀི་ར ཁ་ཎྜ་ཙེ་ལ་ཝི་ཧཱ་རེ ཀ་ཎི་ཀཱ་ར་པ་དྷཱ་ནི་ཡ་གྷ་རེ ཨ་རི་ཡ་ཝཾ་ས་དྷ་མྨཾ སུ་ཎ་ནྟ་ཉྙེ་ཝ གྷོ་ར་ཝི་སོ ས་པྤོ ཌཾ་སི. ཐེ་རོ ཛཱ་ནི་ཏྭཱ་པི པ་ས་ནྣ་ཙི་ཏྟོ ནི་སི་ནྣོ དྷ་མྨཾ་ཡེ་ཝ སུ་ཎཱ་ཏི, ཝི་ས་ཝེ་གོ ཐ་དྡྷོ ཨ་ཧོ་སི. ཐེ་རོ ཨུ་པ་ས་མྤ་ད་མཱ་ལ༹ཾ ཨཱ་དིཾ ཀ་ཏྭཱ སཱི་ལཾ པ་ཙྩ་ཝེ་ཀྑི་ཏྭཱ ‘‘ཝི་སུ་དྡྷ་སཱི་ལོ་མྷཱི’’ཏི པཱི་ཏིཾ ཨུ་པྤཱ་དེ་སི, ས་ཧ པཱི་ཏུ་པྤཱ་དཱ ཝི་སཾ ནི་ཝ་ཏྟི་ཏྭཱ པ་ཐ་ཝིཾ པཱ་ཝི་སི. ཐེ་རོ ཏ་ཏྠེ་ཝ ཙི་ཏྟེ་ཀ་གྒ་ཏཾ ལ་བྷི་ཏྭཱ ཝི་པ་སྶ་ནཾ ཝ་ཌྜྷེ་ཏྭཱ ཨ་ར་ཧ་ཏྟཾ པཱ་པུ་ཎི.
ཡོ པ་ན ཨ་ཀྐོ་ས་ཝ་སེ་ན དུ་རུ་ཏྟེ དུ་རུ་ཏྟ་ཏྟཱ་ཡེ་ཝ ཙ དུ་རཱ་ག་ཏེ ཨ་པི ཨ་ནྟི་མ་ཝ་ཏྠུ་ས་ཉྙི་ཏེ ཝ་ཙ་ན་པ་ཐེ སུ་ཏྭཱ ཁ་ནྟི་གུ་ཎཾ་ཡེ་ཝ པ་ཙྩ་ཝེ་ཀྑི་ཏྭཱ ན ཝེ་དྷ་ཏི དཱི་གྷ་བྷཱ་ཎ་ཀ་ཨ་བྷ་ཡ་ཏྠེ་རོ ཝི་ཡ, ཨ་ཡཾ ‘‘ཁ་མོ དུ་རུ་ཏྟཱ་ནཾ དུ་རཱ་ག་ཏཱ་ནཾ ཝ་ཙ་ན་པ་ཐཱ་ན’’ནྟི ཝེ་དི་ཏ་བྦོ. ཐེ་རོ ཀི་ར པ་ཙྩ་ཡ་ས་ནྟོ་ས་བྷཱ་ཝ་ནཱ་རཱ་མ་ཏཱ་ཡ མ་ཧཱ་ཨ་རི་ཡ་ཝཾ་ས་པྤ་ཊི་པ་དཾ ཀ་ཐེ་སི, ས་བྦོ མ་ཧཱ་གཱ་མོ ཨཱ་ག་ཙྪ་ཏི, ཐེ་ར་སྶ མ་ཧཱ་ས་ཀྐཱ་རོ ཨུ་པྤ་ཛྫི. ཏཾ ཨ་ཉྙ་ཏ་རོ མ་ཧཱ་ཐེ་རོ ཨ་དྷི་ཝཱ་སེ་ཏུཾ ཨ་ས་ཀྐོ་ནྟོ ‘‘དཱི་གྷ་བྷཱ་ཎ་ཀོ ‘ཨ་རི་ཡ་ཝཾ་སཾ ཀ་ཐེ་མཱི’ཏི ས་བྦ་ར་ཏྟིཾ ཀོ་ལཱ་ཧ་ལཾ ཀ་རོ་ཏཱི’’ཏི་ཨཱ་དཱི་ཧི ཨ་ཀྐོ་སི. ཨུ་བྷོ་པི ཙ ཨ་ཏྟ་ནོ ཨ་ཏྟ་ནོ ཝི་ཧཱ་རཾ ག་ཙྪ་ནྟཱ གཱ་ཝུ་ཏ་མ་ཏྟཾ ཨེ་ཀ་པ་ཐེ་ན ཨ་ག་མཾ་སུ. ས་ཀ་ལ་གཱ་ཝུ་ཏ་མྤི སོ ཏཾ ཨ་ཀྐོ་སི་ཡེ་ཝ. ཏ་ཏོ ཡ་ཏྠ དྭི་ནྣཾ ཝི་ཧཱ་རཱ་ནཾ མ་གྒོ བྷི་ཛྫ་ཏི, ཏ་ཏྠ ཋ་ཏྭཱ དཱི་གྷ་བྷཱ་ཎ་ཀ་ཏྠེ་རོ ཏཾ ཝ་ནྡི་ཏྭཱ ‘‘ཨེ་སོ, བྷ་ནྟེ, ཏུ་མྷཱ་ཀཾ མ་གྒོ’’ཏི ཨཱ་ཧ. སོ ཨ་སྶུ་ཎ་ནྟོ ཝི་ཡ ཨ་ག་མཱ་སི. ཐེ་རོ་པི ཝི་ཧཱ་རཾ ག་ནྟྭཱ པཱ་དེ པ་ཀྑཱ་ལེ་ཏྭཱ ནི་སཱི་དི. ཏ་མེ་ནཾ ཨ་ནྟེ་ཝཱ་སི་ཀོ ‘‘ཀིཾ, བྷ་ནྟེ, ས་ཀ་ལ་གཱ་ཝུ་ཏཾ པ་རི་བྷཱ་ས་ནྟཾ ན ཀི་ཉྩི ཨ་ཝོ་ཙུ་ཏྠཱ’’ཏི ཨཱ་ཧ. ཐེ་རོ ‘‘ཁ་ནྟི་ཡེ་ཝཱ་ཝུ་སོ, མ་ཡ྄ཧཾ བྷཱ་རོ, ན ཨ་ཀྑ་ནྟི, ཨེ་ཀ་པ་དུ་དྡྷཱ་རེ་པི ཀ་མྨ་ཊྛཱ་ན་ཝི་ཡོ་གཾ ན པ་སྶཱ་མཱི’’ཏི ཨཱ་ཧ.
ཝ་ཙ་ན་མེ་ཝ ཏ་ད་ཏྠཾ ཉཱ་པེ་ཏུ་ཀཱ་མཱ་ན་ཉྩ པ་ཐོ ཨུ་པཱ་ཡོ་ཏི ཨཱ་ཧ ‘‘ཝ་ཙ་ན་མེ་ཝ ཝ་ཙ་ན་པ་ཐོ’’ཏི. ཨ་སུ་ཁ་ཊྛེ་ན ཝཱ ཏི་བྦཱ. ཡ་ཉྷི ན སུ་ཁཾ, ཏཾ ཨ་ནི་ཊྛཾ ཏི་བྦ་ནྟི ཝུ་ཙྩ་ཏི. ཨ་དྷི་ཝཱ་ས་ཀ་ཛཱ་ཏི་ཀོ ཧོ་ཏཱིཏི ཡ་ཐཱ་ཝུ་ཏྟ་ཝེ་ད་ནཱ་ནཾ ཨ་དྷི་ཝཱ་ས་ཀ་ས་བྷཱ་ཝོ ཧོ་ཏི. ཙི་ཏྟ་ལ་པ་བྦ་ཏེ པ་དྷཱ་ནི་ཡ་ཏྠེ་ར་སྶ ཀི་ར ར་ཏྟིཾ པ་དྷཱ་ནེ་ན ཝཱི་ཏི་ནཱ་མེ་ཏྭཱ ཋི་ཏ་སྶ ཨུ་ད་ར་ཝཱ་ཏོ ཨུ་པྤ་ཛྫ་ཏི. སོ ཏཾ ཨ་དྷི་ཝཱ་སེ་ཏུཾ ཨ་ས་ཀྐོ་ནྟོ ཨཱ་ཝ་ཏྟ་ཏི པ་རི་ཝ་ཏྟ་ཏི. ཏ་མེ་ནཾ ཙ་ངྐ་མ་ན་པ་སྶེ ཋི་ཏོ པི་ཎྜ་པཱ་ཏི་ཡ་ཏྠེ་རོ ཨཱ་ཧ – ‘‘ཨཱ་ཝུ་སོ, པ་བྦ་ཛི་ཏོ ནཱ་མ ཨ་དྷི་ཝཱ་ས་ན་སཱི་ལོ ཧོ་ཏཱི’’ཏི. སོ ‘‘སཱ་དྷུ, བྷ་ནྟེ’’ཏི ཨ་དྷི་ཝཱ་སེ་ཏྭཱ ནི་ཙྩ་ལོ ས་ཡི. ཝཱ་ཏོ ནཱ་བྷི་ཏོ ཡཱ་ཝ ཧ་ད་ཡཾ ཕཱ་ལེ་སི. ཐེ་རོ ཝེ་ད་ནཾ ཝི་ཀྑ་མྦྷེ་ཏྭཱ ཝི་པ་སྶ་ནྟོ མུ་ཧུ་ཏྟེ་ན ཨ་ནཱ་གཱ་མཱི ཧུ་ཏྭཱ པ་རི་ནི་བྦཱ་ཡི. ཨེ་ཝཾ ས་བྦ་ཏྠཱཏི ‘‘ཨུ་ཎྷེ་ན ཕུ་ཊྛ་སྶ སཱི་ཏཾ པ་ཏྠ་ཡ་ཏོ’’ཏི་ཨཱ་དི་ནཱ ས་བྦ་ཏྠ ཨུ་ཎྷཱ་དི་ནི་མི་ཏྟཾ ཀཱ་མཱ་ས་ཝུ་པྤ་ཏྟི ཝེ་དི་ཏ་བྦཱ. ན་ཏྠི སུ་ག་ཏི་བྷ་ཝེ སཱི་ཏཾ ཝཱ ཨུ་ཎྷཾ ཝཱཏི ཨ་ནི་ཊྛཾ སཱི་ཏཾ ཝཱ ཨུ་ཎྷཾ ཝཱ ན་ཏྠཱི་ཏི ཨ་དྷི་པྤཱ་ཡོ. ཨ་ཏྟ་གྒཱ་ཧེ ས་ཏི ཨ་ཏྟ་ནི་ཡ་གྒཱ་ཧོ་ཏི ཨཱ་ཧ ‘‘མ་ཡ྄ཧཾ སཱི་ཏཾ ཨུ་ཎྷ་ནྟི གཱ་ཧོ དི་ཊྛཱ་ས་ཝོ’’ཏི.
ཨ་ཧཾ ས་མ་ཎོཏི ‘‘ཨ་ཧཾ ས་མ་ཎོ, ཀིཾ མ་མ ཛཱི་ཝི་ཏེ་ན ཝཱ མ་ར་ཎེ་ན ཝཱ’’ཏི ཨེ་ཝཾ ཙི་ནྟེ་ཏྭཱ་ཏི ཨ་དྷི་པྤཱ་ཡོ. པ་ཙྩ་ཝེ་ཀྑི་ཏྭཱཏི གཱ་མ་པྤ་ཝེ་ས་པྤ་ཡོ་ཛ་ནཱ་དི་ཉྩ པ་ཙྩ་ཝེ་ཀྑི་ཏྭཱ. པ་ཊི་ཀྐ་མ་ཏཱིཏི ཧ་ཏྠི་ཨཱ་དཱི་ནཾ ས་མཱི་པ་ག་མ་ན་ཏོ ཨ་པ་ཀྐ་མ་ཏི. ཋཱ་ཡ་ནྟི ཨེ་ཏྠཱ་ཏི ཋཱ་ནཾ, ཀ་ཎྚ་ཀཱ་ནཾ ཋཱ་ནཾ ཀ་ཎྚ་ཀ་ཊྛཱ་ནཾ, ཡ་ཏྠ ཀ་ཎྚ་ཀཱ་ནི ས་ནྟི, ཏཾ ཨོ་ཀཱ་ས་ནྟི ཝུ་ཏྟཾ ཧོ་ཏི. ཨ་མ་ནུ་སྶ་དུ་ཊྛཱ་ནཱིཏི ཨ་མ་ནུ་སྶ་ས་ཉྩཱ་རེ་ན དཱུ་སི་ཏཱ་ནི, ས་པ་རི་སྶ་ཡཱ་ནཱི་ཏི ཨ་ཏྠོ. ཨ་ནི་ཡ་ཏ་ཝ་ཏྠུ་བྷཱུ་ཏནྟི ཨ་ནི་ཡ་ཏ་སི་ཀྑཱ་པ་ད་སྶ ཀཱ་ར་ཎ་བྷཱུ་ཏཾ. ཝེ་སི་ཡཱ་དི་བྷེ་ད་ཏོཏི ཝེ་སི་ཡཱ་ཝི་དྷ་ཝཱ་ཐུ་ལླ་ཀུ་མཱ་རི་ཀཱ་པ་ཎྜ་ཀ་པཱ་ནཱ་གཱ་ར་བྷི་ཀྑུ་ནི་བྷེ་ད་ཏོ. ས་མཱ་ནནྟི ས་མཾ, ཨ་ཝི་ས་མ་ནྟི ཨ་ཏྠོ. ཨ་ཀཱ་སི ཝཱཏི ཏཱ་དི་སཾ ཨ་ནཱ་ཙཱ་རཾ ཨ་ཀཱ་སི ཝཱ. སཱི་ལ་སཾ་ཝ་ར་ས་ངྑཱ་ཏེ་ནཱཏི ཀ་ཐཾ པ་རི་ཝ་ཛྫ་ནཾ སཱི་ལཾ? ཨ་ནཱ་ས་ན་པ་རི་ཝ་ཛྫ་ནེ་ན ཧི ཨ་ནཱ་ཙཱ་ར་པ་རི་ཝ་ཛྫ་ནཾ ཝུ་ཏྟཾ. ཨ་ནཱ་ཙཱ་རཱ་གོ་ཙ་ར་པ་རི་ཝ་ཛྫ་ནཾ ཙཱ་རི་ཏྟ་སཱི་ལ་ཏཱ་ཡ སཱི་ལ་སཾ་ཝ་རོ. ཏ་ཐཱ ཧི བྷ་ག་ཝ་ཏཱ ‘‘པཱ་ཏི་མོ་ཀྑ་སཾ་ཝ་ར་སཾ་ཝུ་ཏོ ཝི་ཧ་ར་ཏཱི’’ཏི (ཝི་བྷ. ༥༠༨) སཱི་ལ་སཾ་ཝ་ར་ཝི་བྷ་ཛ་ནེ ཨཱ་ཙཱ་ར་གོ་ཙ་ར་ས་མྤ་ཏྟིཾ ད་སྶེ་ནྟེ་ན ‘‘ཨ་ཏྠི ཨ་ནཱ་ཙཱ་རོ, ཨ་ཏྠི ཨ་གོ་ཙ་རོ’’ཏི་ཨཱ་དི་ནཱ (ཝི་བྷ. ༥༡༣-༥༡༤) ཨཱ་ཙཱ་ར་གོ་ཙ་རཱ ཝི་བྷ་ཛི་ཏྭཱ ད་སྶི་ཏཱ. ‘‘ཙ་ཎྜཾ ཧ་ཏྠིཾ པ་རི་ཝ་ཛྫེ་ཏཱི’’ཏི ཝ་ཙ་ན་ཏོ ཧ་ཏྠི་ཨཱ་དི་པ་རི་ཝ་ཛྫ་ན་མྤི བྷ་ག་ཝ་ཏོ ཝ་ཙ་ནཱ་ནུ་ཊྛཱ་ན་ནྟི ཀ་ཏྭཱ ཨཱ་ཙཱ་ར་སཱི་ལ་མེ་ཝཱ་ཏི ཝེ་དི་ཏ་བྦཾ.
ཨི་ཏི་པཱིཏི ཨི་མི་ནཱ་པི ཀཱ་ར་ཎེ་ན ཨ་ཡོ་ནི་སོ་མ་ན་སི་ཀཱ་ར་ས་མུ་ཊྛི་ཏ་ཏྟཱ་པི, ལོ་བྷཱ་དི་ས་ཧ་ག་ཏ་ཏྟཱ་པི, ཀུ་ས་ལ་པྤ་ཊི་པ་ཀྑ་ཏོ་པཱི་ཏི་ཨཱ་དཱི་ཧི ཀཱ་ར་ཎེ་ཧི ཨ་ཡཾ ཝི་ཏ་ཀྐོ ཨ་ཀུ་ས་ལོ་ཏི ཨ་ཏྠོ. ཨི་མི་ནཱ ན་ཡེ་ན སཱ་ཝ་ཛྫོཏི་ཨཱ་དཱི་སུ་པི ཨ་ཏྠོ ཝེ་དི་ཏ་བྦོ. ཨེ་ཏྠ ཙ ཨ་ཀུ་ས་ལོཏི་ཨཱ་དི་ནཱ དི་ཊྛ་དྷ་མྨི་ཀཾ ཀཱ་མ་ཝི་ཏ་ཀྐ་སྶ ཨཱ་དཱི་ན་ཝཾ ད་སྶེ་ཏི, དུ་ཀྑ་ཝི་པཱ་ཀོཏི ཨི་མི་ནཱ ས་མྤ་རཱ་ཡི་ཀཾ. ཨ་ཏྟ་བྱཱ་བཱ་དྷཱ་ཡ སཾ་ཝ་ཏྟ་ཏཱིཏི་ཨཱ་དཱི་སུ་པི ཨི་མི་ནཱ་ཝ ན་ཡེ་ན ཨཱ་དཱི་ན་ཝ་ཝི་བྷཱ་ཝ་ནཱ ཝེ་དི་ཏ་བྦཱ. ཨུ་པྤ་ནྣ་སྶ ཀཱ་མ་ཝི་ཏ་ཀྐ་སྶ ཨ་ན་དྷི་ཝཱ་ས་ནཾ ནཱ་མ པུ་ན ཏཱ་དི་ས་སྶ ཨ་ནུ་པྤཱ་ད་ནཾ. ཏཾ པ་ན་སྶ པ་ཧཱ་ནཾ ཝི་ནོ་ད་ནཾ བྱ་ནྟི་ཀ་ར་ཎཾ ཨ་ན་བྷཱ་ཝ་ག་མ་ན་ནྟི ཙ ཝ་ཏྟུཾ ཝ་ཊྚ་ཏཱི་ཏི པཱ་ལི༹་ཡཾ – ‘‘ཨུ་པྤ་ནྣཾ ཀཱ་མ་ཝི་ཏ་ཀྐཾ ནཱ་དྷི་ཝཱ་སེ་ཏཱི’’ཏི ཝ་ཏྭཱ ‘‘པ་ཛ་ཧ་ཏཱི’’ཏི་ཨཱ་དི ཝུ་ཏྟ་ནྟི ཏ་མ་ཏྠཾ ད་སྶེ་ནྟོ ‘‘ཨ་ན་དྷི་ཝཱ་སེ་ནྟོ ཀིཾ ཀ་རོ་ཏཱི’’ཏི་ཨཱ་དི་མཱ་ཧ. པ་ཧཱ་ན་ཉྩེ་ཏྠ ཝི་ཀྑ་མྦྷ་ན་མེ་ཝ, ན ས་མུ་ཙྪེ་དོ་ཏི ད་སྶེ་ཏུཾ ‘‘ཝི་ནོ་དེ་ཏཱི’’ཏི་ཨཱ་དི ཝུ་ཏྟ་ནྟི ཝི་ཀྑ་མྦྷ་ན་ཝ་སེ་ནེ་ཝ ཨ་ཏྠོ ད་སྶི་ཏོ. ཨུ་པྤ་ནྣུ་པྤ་ནྣེཏི ཏེ་སཾ པཱ་པ་ཝི་ཏ་ཀྐཱ་ནཾ ཨུ་པྤཱ་དཱ་ཝ་ཏྠཱ་ག་ཧ་ཎཾ ཝཱ ཀ་ཏཾ སི་ཡཱ ཨ་ན་ཝ་སེ་ས་གྒ་ཧ་ཎཾ ཝཱ. ཏེ་སུ པ་ཋ་མཾ ས་ནྡྷཱ་ཡཱ་ཧ ‘‘ཨུ་པྤ་ནྣ་མ་ཏྟེ’’ཏི, ས་མྤ་ཏི་ཛཱ་ཏེ་ཏི ཨ་ཏྠོ. ཨ་ན་ཝ་སེ་ས་གྒ་ཧ་ཎཾ བྱཱ་པ་ནི་ཙྪཱ་ཡཾ ཧོ་ཏཱི་ཏི ད་སྶེ་ཏུཾ ‘‘ས་ཏ་ཀྑ་ཏྟུ་མྤི ཨུ་པྤ་ནྣུ་པྤ་ནྣེ’’ཏི ཝུ་ཏྟཾ.
ཉཱ་ཏི་ཝི་ཏ་ཀྐོཏི ‘‘ཨ་མྷཱ་ཀཾ ཉཱ་ཏ་ཡོ སུ་ཁ་ཛཱི་ཝི་ནོ ས་མྤ་ཏྟི་ཡུ་ཏྟཱ’’ཏི་ཨཱ་དི་ནཱ གེ་ཧ་སྶི་ཏ་པེ་མ་ཝ་སེ་ན ཉཱ་ཏ་ཀེ ཨཱ་ར་བྦྷ ཨུ་པྤ་ནྣ་ཝི་ཏ་ཀྐོ. ཛ་ན་པ་ད་ཝི་ཏ་ཀྐོཏི ‘‘ཨ་མྷཱ་ཀཾ ཛ་ན་པ་དོ སུ་བྷི་ཀྑོ ས་མྤ་ནྣ་ས་སྶོ ར་མ་ཎཱི་ཡོ’’ཏི་ཨཱ་དི་ནཱ གེ་ཧ་སྶི་ཏ་པེ་མ་ཝ་སེ་ན ཛ་ན་པ་དཾ ཨཱ་ར་བྦྷ ཨུ་པྤ་ནྣ་ཝི་ཏ་ཀྐོ. ཨུ་ཀྐུ་ཊི་ཀ་པྤ་དྷཱ་ནཱ་དཱི་ཧི དུ་ཀྑེ ནི་ཛྫི་ཎྞེ ས་མྤ་རཱ་ཡེ ས་ཏྟཱ སུ་ཁཱི ཧོ་ནྟི ཨ་མ་རཱ་ཏི དུ་ཀྐ་ར་ཀཱ་རི་ཀཱ་ཡ པ་ཊི་སཾ་ཡུ་ཏྟོ ཨ་མ་ར་ཏྠཱ་ཡ ཝི་ཏ་ཀྐོ. ཏཾ ཝཱ ཨཱ་ར་བྦྷ ཨ་མ་རཱ་ཝི་ཀྑེ་པ་དི་ཊྛི་ས་ཧ་ག་ཏོ ཨ་མ་རོ ཙ སོ ཝི་ཏ་ཀྐོ ཙཱ་ཏི ཨ་མ་རཱ་ཝི་ཏ་ཀྐོ. པ་རཱ་ནུ་དྡ་ཡ་ཏཱ་པ་ཊི་སཾ་ཡུ་ཏྟོཏི པ་རེ་སུ ཨུ་པ་ཊྛཱ་ཀཱ་དཱི་སུ ས་ཧ་ན་ནྡི་ཏཱ་དི་ཝ་སེ་ན པ་ཝ་ཏྟོ ཨ་ནུ་དྡ་ཡ་ཏཱ་པ་ཏི་རཱུ་པ་ཀོ གེ་ཧ་སྶི་ཏ་པེ་མ་པྤ་ཊི་སཾ་ཡུ་ཏྟོ ཝི་ཏ་ཀྐོ. ལཱ་བྷ་ས་ཀྐཱ་ར་སི་ལོ་ཀ་པྤ་ཊི་སཾ་ཡུ་ཏྟོཏི ཙཱི་ཝ་རཱ་དི་ལཱ་བྷེ་ན ཙ ས་ཀྐཱ་རེ་ན ཙ ཀི་ཏྟི་ས་དྡེ་ན ཙ ཨཱ་ར་མྨ་ཎ་ཀ་ར་ཎ་ཝ་སེ་ན པ་ཊི་སཾ་ཡུ་ཏྟོ. ཨ་ན་ཝ་ཉྙ་ཏྟི་པྤ་ཊི་སཾ་ཡུ་ཏྟོཏི ‘‘ཨ་ཧོ ཝ་ཏ མཾ པ་རེ ན ཨ་ཝ་ཛཱ་ནེ་ཡྻུཾ, ན ཧེ་ཊྛཱ ཀ་ཏྭཱ མ་ཉྙེ་ཡྻུཾ, པཱ་སཱ་ཎ་ཙྪ་ཏྟཾ ཝི་ཡ ག་རུཾ ཀ་རེ་ཡྻུ’’ནྟི ཨུ་པྤ་ནྣ་ཝི་ཏ་ཀྐོ.
ཀཱ་མ་ཝི་ཏ་ཀྐོ ཀཱ་མ་ས་ངྐ་པྤ་ན་ས་བྷཱ་ཝ་ཏོ ཀཱ་མཱ་ས་ཝ་པྤ་ཏྟི་ཡཱ སཱ་ཏི་ས་ཡ་ཏྟཱ ཙ ཀཱ་མ་ནཱ་ཀཱ་རོ་ཏི ཨཱ་ཧ ‘‘ཀཱ་མ་ཝི་ཏ་ཀྐོ པ་ནེ་ཏྠ ཀཱ་མཱ་ས་ཝོ’’ཏི. ཏ་བྦི་སེ་སོཏི ཀཱ་མཱ་ས་ཝ་ཝི་སེ་སོ བྷ་ཝ་ས་བྷཱ་ཝ་ཏྟཱ་ཏི ཨ་དྷི་པྤཱ་ཡོ. ཀཱ་མ་ཝི་ཏ་ཀྐཱ་དི་ཀེ ཝི་ནོ་དེ་ཏི ཨ་ཏྟ་ནོ ས་ནྟཱ་ན་ཏོ ནཱི་ཧ་ར་ཏི ཨེ་ཏེ་ནཱ་ཏི ཝི་ནོ་ད་ནཾ, ཝཱི་རི་ཡ་ནྟི ཨཱ་ཧ ‘‘ཝཱི་རི་ཡ་སཾ་ཝ་ར་ས་ངྑཱ་ཏེ་ན ཝི་ནོ་ད་ནེ་ནཱ’’ཏི.
‘‘ས་ཏྟ བོ་ཛ྄ཛྷ་ངྒཱ བྷཱ་ཝི་ཏཱ བ་ཧུ་ལཱི་ཀ་ཏཱ ཝི་ཛྫཱ་ཝི་མུ་ཏྟི་ཡོ པ་རི་པཱུ་རེ་ནྟཱི’’ཏི ཝ་ཙ་ན་ཏོ ཝི་ཛྫཱ་ཝི་མུ་ཏྟཱི་ནཾ ཨ་ན་དྷི་ག་མོ ཏ་ཏོ ཙ ས་ཀ་ལ་ཝ་ཊྚ་དུ་ཀྑཱ་ན་ཏི་ཝ་ཏྟི ཨ་བྷཱ་ཝ་ནཱ་ཡ ཨཱ་དཱི་ན་ཝོ. ཝུ་ཏྟ་ཝི་པ་རི་ཡཱ་ཡེ་ན བྷ་ག་ཝ་ཏོ ཨོ་ར་ས་པུ་ཏྟ་བྷཱ་ཝཱ་དི་ཝ་སེ་ན ཙ བྷཱ་ཝ་ནཱ་ཡ ཨཱ་ནི་སཾ་སོ ཝེ་དི་ཏ་བྦོ. ཐོ་མེ་ནྟོཏི ཨཱ་ས་ཝ་པ་ཧཱ་ན་སྶ དུ་ཀྐ་ར་ཏྟཱ ཏཱ་ཡ ཨེ་ཝ དུ་ཀྐ་ར་ཀི་རི་ཡཱ་ཡ ཏཾ ཨ་བྷི་ཏྠ་ཝ་ནྟོ. སཾ་ཝ་རེ་ནེ་ཝ པ་ཧཱི་ནཱཏི སཾ་ཝ་རེ་ན པ་ཧཱི་ནཱ ཨེ་ཝ. ཏེ་ན ཝུ་ཏྟཾ ‘‘ན ཨ་པྤ་ཧཱི་ནེ་སུ་ཡེ་ཝ པ་ཧཱི་ན་ས་ཉྙཱི’’ཏི.
ཨཱ་ས་ཝ་སུ་ཏྟ་ཝ་ཎྞ་ནཱ ནི་ཊྛི་ཏཱ.