༨. ཝི་སཱ་ཁ་སུ་ཏྟ་ཝ་ཎྞ་ནཱ

༤༨. ཨ་ཊྛ་མེ ཝཱ་ཀྐ་ར་ཎ་ཙཱ་ཏུ་རི་ཡ་ཏོ ཝ་ཙ་ན་གུ་ཎ་ཧེ་ཏཱུ་ནཾ པཱུ་རི་ཡཱ པོ་རཱི, པོ་རི་ཡཾ བྷ་ཝཱ་ཏི པོ་རཱི, ཏཱ་ཡ པོ་རི་ཡཱ. ཏེ་ནཱ་ཧ ‘‘པ་རི་པུ་ཎྞ་ཝཱ་ཙཱ་ཡཱ’’ཏི, ཨ་ཀྑ་ར་པ་ད་པ་རི་པུ་ཎྞཱ་ཡ ཝཱ་ཙཱ་ཡཱ་ཏི ཨ་ཏྠོ. ཨ་པ་ལི་བུ་དྡྷཱ་ཡཱཏི པི་ཏྟཱ་དཱི་ཧི ན ཝི་བ་དྡྷཱ་ཡ ཨ་ན་ནུ་བུ་ནྡྷི་ཏཱ་ཡ. ཨ་ནེ་ལ་ག་ལཱ་ཡཱཏི ཨ་ནེ་ལཱ་ཡ ཨ་ག་ལཱ་ཡ ནི་དྡོ་སཱ་ཡ ཨ་ག་ལི༹་ཏ་པ་ད་བྱ་ཉྫ་ནཱ་ཡ ཙ. ཐེ་ར་སྶ ཧི ཀ་ཐ་ཡ་ཏོ པ་དཾ ཝཱ བྱ་ཉྫ་ནཾ ཝཱ ན པ་རི་ཧཱ་ཡ་ཏི. ཏེ་ནཱ་ཧ ‘‘ཨ་ནེ་ལ་ག་ལཱ་ཡཱ་ཏི ནི་དྡོ་སཱ་ཡ ཙེ་ཝ ཨ་ག་ལི༹་ཏཱ་ཡ ཙཱ’’ཏི་ཨཱ་དི. ཏ་ཏྠ ནི་དྡོ་སཱ་ཡཱཏི ཨ་ཏྠ་ཏོ ཙ བྱ་ཉྫ་ན་ཏོ ཙ ཝི་ག་ཏ་དོ་སཱ་ཡ. ཨ་པ་ཏི་ཏ་པ་ད་བྱ་ཉྫ་ནཱ་ཡཱཏི ཨ་ཝི་ར་ཧི་ཏ་པ་ད་བྱ་ཉྫ་ནཱ་ཡ. ཨ་ཐ ཝཱ ཨ་ནེ་ལ་ག་ལཱ་ཡཱཏི ན ཨེ་ལཾ དོ་སཾ ག་ལ་ཏཱི་ཏི ཨ་ནེ་ལ་ག་ལཱ. ཨ་ཝི་ཙྪི་ནྣ་ཝཱ་ཙཱ་ཡ ཨ་ནེ་ལ་ག་ལཱ་ཡ ཡ་ཐཱ ད་ནྡྷ་མ་ནུ་སྶཱ མུ་ཁེ་ན ཁེ་ལ༹ཾ ག་ལ༹་ནྟེ་ན ཝཱ་ཙཾ བྷཱ་ས་ནྟི, ན ཨེ་ཝ་རཱུ་པཱ་ཡ. ཨ་ཐ ཁོ ནི་དྡོ་སཱ་ཡ ཝི་ས་ད་ཝཱ་ཙཱ་ཡཱ་ཏི ཨ་ཏྠོ. ཝི་ཝ་ཊྚ་པྤ་ཀཱ་སི་ནཱི ཝཱ་ཙཱ ན ཀ་དཱ་ཙི ཝི་ཝ་ཊྚ་མུ་ཏྟཱ་ཏི ཀ་ཏྭཱ ཨཱ་ཧ ‘‘ཝི་ཝ་ཊྚ་པ་རི་ཡཱ་པ་ནྣཱ་ཡཱ’’ཏི, ཝི་ཝ་ཊྚཾ ཨ་མུ་ཉྩི་ཏྭཱ པ་ཝ་ཏྟཱ་ཡཱ་ཏི ཨ་ཏྠོ. ཝི་ཝ་ཊྚ་པྤ་ཀཱ་སི་ནཱི ཧི ཝཱ་ཙཱ ཝི་ཝ་ཊྚཾ པ་རི་ཙྪི་ཛྫ ཨཱ་པཱ་དེ་ནྟཱི པ་ཝ་ཏྟ་ཏི. ན་ཝ་ལོ་ཀུ་ཏྟ་ར་དྷ་མྨོ ས་བྦ་དྷ་མྨེ་ཧི ས་མུ་སྶི་ཏ་ཊྛེ་ན ཨ་བྦྷུ་གྒ་ཏ་ཊྛེ་ན ཙ དྷ་ཛོ ནཱ་མཱ་ཏི ཨཱ་ཧ ‘‘ཨ་བྦྷུ་གྒ་ཏ་ཊྛེ་ནཱ’’ཏི་ཨཱ་དི. སེ་ས་མེ་ཏྠ སུ་ཝི་ཉྙེ་ཡྻ་མེ་ཝ.

ཝི་སཱ་ཁ་སུ་ཏྟ་ཝ་ཎྞ་ནཱ ནི་ཊྛི་ཏཱ.