༡༠. ཡུ་ག་ན་དྡྷ་སུ་ཏྟ་ཝ་ཎྞ་ནཱ
༡༧༠. ད་ས་མེ ས་མ་ཐ་པུ་བྦ་ངྒ་མཾ ཝི་པ་སྶ་ནཾ བྷཱ་ཝེ་ཏཱིཏི ཨི་དཾ ས་མ་ཐ་ཡཱ་ནི་ཀ་སྶ ཝ་སེ་ན ཝུ་ཏྟཾ. སོ ཧི པ་ཋ་མཾ ཨུ་པ་ཙཱ་ར་ས་མཱ་དྷིཾ ཝཱ ཨ་པྤ་ནཱ་ས་མཱ་དྷིཾ ཝཱ ཨུ་པྤཱ་དེ་ཏི, ཨ་ཡཾ ས་མ་ཐོ. སོ ཏ་ཉྩ ཏཾ་ས་མྤ་ཡུ་ཏྟེ ཙ དྷ་མྨེ ཨ་ནི་ཙྩཱ་དཱི་ཧི ཝི་པ་སྶ་ཏི, ཨ་ཡཾ ཝི་པ་སྶ་ནཱ, ཨི་ཏི པ་ཋ་མཾ ས་མ་ཐོ, པ་ཙྪཱ ཝི་པ་སྶ་ནཱ. ཏེ་ན ཝུ་ཙྩ་ཏི ‘‘ས་མ་ཐ་པུ་བྦ་ངྒ་མཾ ཝི་པ་སྶ་ནཾ བྷཱ་ཝེ་ཏཱི’’ཏི. ཝི་པ་སྶ་ནཱ་པུ་བྦ་ངྒ་མཾ ས་མ་ཐཾ བྷཱ་ཝེ་ཏཱིཏི ཨི་དཾ པ་ན ཝི་པ་སྶ་ནཱ་ཡཱ་ནི་ཀ་སྶ ཝ་སེ་ན ཝུ་ཏྟཾ. སོ ཏཾ ཝུ་ཏྟ་པྤ་ཀཱ་རཾ ས་མ་ཐཾ ཨ་ས་མྤཱ་དེ་ཏྭཱ པ་ཉྩུ་པཱ་དཱ་ན་ཀྑ་ནྡྷེ ཨ་ནི་ཙྩཱ་དཱི་ཧི ཝི་པ་སྶ་ཏི. པ་ཋ་མོ ལོ་ཀུ་ཏྟ་ར་མ་གྒོ ནི་བྦ་ཏྟ་ཏཱིཏི སོ་ཏཱ་པ་ཏྟི་མ་གྒཾ ས་ནྡྷཱ་ཡ ཝ་ད་ཏི, ལོ་ཀི་ཡ་མ་གྒ་ཝ་སེ་ནེ་ཝ ཝཱ ཨི་མི་སྶཱ པཱ་ལི༹་ཡཱ ཨ་ཏྠོ ཝེ་དི་ཏ་བྦོ. ཀ་ཐཾ? མ་གྒོ ས་ཉྫཱ་ཡ་ཏི, པུ་བྦ་བྷཱ་གི་ཡོ ལོ་ཀི་ཡ་མ་གྒོ ཨུ་པྤ་ཛྫ་ཏི. ཨཱ་སེ་ཝ་ཏི ནི་བྦི་དཱ་ནུ་པ་སྶ་ནཱ་ཝ་སེ་ན. བྷཱ་ཝེ་ཏི མུ་ཙྩི་ཏུ་ཀ་མྱ་ཏཱ་ཝ་སེ་ན. བ་ཧུ་ལཱི་ཀ་རོ་ཏི པ་ཊི་ས་ངྑཱ་ནུ་པ་སྶ་ནཱ་ཝ་སེ་ན. ཨཱ་སེ་ཝ་ཏི ཝཱ བྷ་ཡ་ཏུ་པ་ཊྛཱ་ནཱ་དི་ཉཱ་ཎ་ཝ་སེ་ན. བྷཱ་ཝེ་ཏི མུ་ཙྩི་ཏུ་ཀ་མྱ་ཏཱ་དི་ཉཱ་ཎ་ཝ་སེ་ན. བ་ཧུ་ལཱི་ཀ་རོ་ཏི ཝུ་ཊྛཱ་ན་གཱ་མི་ནི་ཝི་པ་སྶ་ནཱ་ཝ་སེ་ན. སཾ་ཡོ་ཛ་ནཱ་ནི པ་ཧཱི་ཡ་ནྟི. ཨ་ནུ་ས་ཡཱ བྱ་ནྟཱི ཧོ་ནྟཱིཏི མ་གྒ་པྤ་ཊི་པཱ་ཊི་ཡཱ པ་ཧཱི་ཡ་ནྟི བྱ་ནྟཱི ཧོ་ནྟི.
དྷ་མྨུ་དྡྷ་ཙྩ་ཝི་གྒ་ཧི་ཏ་མཱ་ན་སནྟི ཨོ་བྷཱ་སཱ་དཱི་སུ ཨ་རི་ཡ་དྷ་མྨོ་ཏི པ་ཝ་ཏྟཾ ཨུ་དྡྷ་ཙྩཾ ཝི་ཀྑེ་པོ དྷ་མྨུ་དྡྷ་ཙྩཾ, ཏེ་ན དྷ་མྨུ་དྡྷ་ཙྩེ་ན ཝི་པ་སྶ་ནཱ་ཝཱི་ཐི་ཏོ ཨུ་གྒ་མ་ནེ་ན ཝི་རཱུ་པཾ ག་ཧི་ཏཾ པ་ཝ་ཏྟི་ཡ་མཱ་ནཾ དྷ་མྨུ་དྡྷ་ཙྩ་ཝི་གྒ་ཧི་ཏ་མཱ་ན་སཾ. ཝུ་ཏྟ་ཉྷེ་ཏཾ –
‘‘དྷ་མྨུ་དྡྷ་ཙྩ་ཝི་གྒ་ཧི་ཏ་མཱ་ན་སཾ ཧོ་ཏི, ཨ་ནི་ཙྩ་ཏོ མ་ན་སི ཀ་རོ་ཏི, ཨོ་བྷཱ་སོ ཨུ་པྤ་ཛྫ་ཏི, ཨོ་བྷཱ་སོ དྷ་མྨོ་ཏི ཨོ་བྷཱ་སཾ ཨཱ་ཝ་ཛྫ་ཏི, ཏ་ཏོ ཝི་ཀྑེ་པོ ཨུ་དྡྷ་ཙྩཾ, ཏེ་ན ཨུ་དྡྷ་ཙྩེ་ན ཝི་གྒ་ཧི་ཏ་མཱ་ན་སོ ཨ་ནི་ཙྩ་ཏོ ཨུ་པ་ཊྛཱ་ནཾ ཡ་ཐཱ་བྷཱུ་ཏཾ ན་པྤ་ཛཱ་ནཱ་ཏི. དུ་ཀྑ་ཏོ…པེ… ཨ་ན་ཏྟ་ཏོ ཨུ་པ་ཊྛཱ་ནཾ ཡ་ཐཱ་བྷཱུ་ཏཾ ན་པྤ་ཛཱ་ནཱ་ཏི. ཏ་ཐཱ ཨ་ནི་ཙྩ་ཏོ མ་ན་སི་ཀ་རོ་ཏོ ཉཱ་ཎཾ ཨུ་པྤ་ཛྫ་ཏི…པེ… པཱི་ཏི པ་སྶ་དྡྷི སུ་ཁཾ ཨ་དྷི་མོ་ཀྑོ པ་གྒ་ཧོ ཨུ་པ་ཊྛཱ་ནཾ ཨུ་པེ་ཀྑཱ ནི་ཀ་ནྟི ཨུ་པྤ་ཛྫ་ཏི, ནི་ཀ་ནྟི དྷ་མྨོ་ཏི ནི་ཀ་ནྟིཾ ཨཱ་ཝ་ཛྫ་ཏི, ཏ་ཏོ ཝི་ཀྑེ་པོ ཨུ་དྡྷ་ཙྩཾ, ཏེ་ན ཨུ་དྡྷ་ཙྩེ་ན ཝི་གྒ་ཧི་ཏ་མཱ་ན་སོ ཨ་ནི་ཙྩ་ཏོ ཨུ་པ་ཊྛཱ་ནཾ ཡ་ཐཱ་བྷཱུ་ཏཾ ན་པྤ་ཛཱ་ནཱ་ཏི. དུ་ཀྑ་ཏོ…པེ… ཨ་ན་ཏྟ་ཏོ ཨུ་པ་ཊྛཱ་ནཾ ཡ་ཐཱ་བྷཱུ་ཏཾ ན་པྤ་ཛཱ་ནཱ་ཏཱི’’ཏི (པ་ཊི. མ. ༢.༦). སེ་ས་མེ་ཏྠ ཨུ་ཏྟཱ་ན་མེ་ཝ.
ཡུ་ག་ན་དྡྷ་སུ་ཏྟ་ཝ་ཎྞ་ནཱ ནི་ཊྛི་ཏཱ.
པ་ཊི་པ་དཱ་ཝ་གྒ་ཝ་ཎྞ་ནཱ ནི་ཊྛི་ཏཱ.