༡༠. ཨ་ཝ་ཀུ་ཛྫ་སུ་ཏྟ་ཝ་ཎྞ་ནཱ

༣༠. ད་ས་མེ ཨ་ཝ་ཀུ་ཛྫ་པ་ཉྙོཏི ནི་ཀྐུ་ཛྫ་པ་ཉྙོ. ཏེ་ནཱ་ཧ ‘‘ཨ་དྷོ་མུ་ཁ་པ་ཉྙོ’’ཏི. པུ་བྦ་པ་ཊྛ་པ་ནཱཏི པ་ཋ་མཱ་ར་མྦྷོ. ས་ནྣི་ཊྛཱ་ནནྟི ཀ་ཐཱ་པ་རི་ཡོ་སཱ་ནཾ. ཨ་པྤ་ནཱཏི དེ་ས་ནཱ་ཡ ནི་ཊྛཱ་པ་ནཾ. ཨ་ནེ་ཀེ ཝཱ ཨ་ནུ་ས་ནྡྷི་ཡོ་ཏི ཡོ་ཛེ་ཏ་བྦཾ. ས་མཱ་དྷི ཝཱཏི་ཨཱ་དཱི་སུ ལོ་ཀུ་ཏྟ་ར་དྷ་མྨཱ པ་ར་མ་ཏྠ་ཏོ སཱ་ས་ན་ནྟི ཏ་ད་ཏྠོ་པཱ་ད་ཀ་ས་མཱ་དྷི ཏ་སྶ ཨཱ་དཱི་ཏི ཝུ་ཏྟོ, ཏ་དཱ་ས་ནྣ་ཏྟཱ ཝི་པ་སྶ་ནཱ, ཏ་སྶ མཱུ་ལ་བྷཱ་ཝེ་ན ཨེ་ཀ་དེ་ས་ཏྟཱ མ་གྒོ.

སཱ་ས་ན་སྶ པཱ་རི་པཱུ་རི་སུ་དྡྷི་ཡོ ནཱ་མ ས་ཏྠཱ་རཱ དེ་སི་ཏ་ནི་ཡཱ་མེ་ནེ་ཝ སི་དྡྷཱ, ཏཱ པ་ནེ་ཏྠ ཀ་ཐེ་ནྟ་སྶ ཝ་སེ་ན ག་ཧེ་ཏ་བྦཱ་ཏི ད་སྶེ་ཏུཾ ‘‘ཨ་ནཱུ་ནཾ ཀ་ཏྭཱ དེ་སེ་ནྟཱི’’ཏི, ‘‘ནི་གྒ་ཎྛིཾ ཀ་ཏྭཱ དེ་སེ་ནྟཱི’’ཏི ཙ ཝུ་ཏྟཾ. ཏ་ཏྠ ནི་ཛྫ་ཊནྟི ནི་གྒུ་མྦཾ ཨ་ནཱ་ཀུ་ལཾ. ནི་གྒ་ཎྛིནྟི ག་ཎྛི་ཊྛཱ་ན་ར་ཧི་ཏཾ སུ་ཝི་ཉྙེ་ཡྻཾ ཀ་ཏྭཱ.

ཨཱ་ཀི་ཎྞཱ་ནཱིཏི ཨཱ་ཀི་རི་ཏྭཱ སཾ་ཀི་རི་ཏྭཱ ཋ་པི་ཏཱ་ནཱི་ཏི ཨ་ཏྠོ. ཏེ་ནཱ་ཧ ‘‘པ་ཀྑི་ཏྟཱ་ནཱི’’ཏི. ཨུ་ཙྪ་ངྒོ ཝི་ཡ ཨུ་ཙྪ་ངྒ་པ་ཉྙོ པུ་གྒ་ལོ ད་ཊྛ་བྦོཏི ཨུ་ཙྪ་ངྒ་ས་དི་ས་པ་ཉྙ་ཏཱ་ཡ ཨུ་ཙྪ་ངྒ་པ་ཉྙོ. ཨེ་ཝཾ པ་ཉྙཱ ཝི་ཡ པུ་གྒ་ལོ་པི ཨུ་ཙྪ་ངྒོ ཝི་ཡ ཧོ་ཏི, ཏ་སྨིཾ དྷ་མྨཱ་ནཾ ཨ་ཙི་ར་ཊྛཱ་ན་ཏོ་ཏི ཨ་དྷི་པྤཱ་ཡེ་ན ཝུ་ཏྟཾ. ཡ་ཐཱ ཙ ཨུ་ཙྪ་ངྒ་ས་དི་སཱ པ་ཉྙཱ, ཨེ་ཝཾ ནི་ཀྐུ་ཛྫ་ཀུ་མྦྷ་ས་དི་སཱ པ་ཉྙཱ ཨེ་ཝཱ་ཏི ད་ཊྛ་བྦཱ.

སཾ་ཝི་ད་ཧ་ན་པ་ཉྙཱ་ཡཱཏི ‘‘ཨེ་ཝཾ ཀ་ཏེ ཨི་དཾ ནཱ་མ བྷ་ཝི་སྶ་ཏཱི’’ཏི ཨེ་ཝཾ ཏཾ་ཏཾ་ཨ་ཏྠ་ཀི་ཙྩཾ སཾ་ཝི་དྷཱ་ཏུཾ ས་མ་ཏྠ་ཏཱ་ཡ ཝི་ཙཱ་ར་ཎ་པ་ཉྙཱ་ཡ ར་ཧི་ཏོ. སེ་ཡྻོཏི སེ་ཊྛོ པཱ་སཾ་སོ. པུ་བྦ་བྷཱ་ག་པ་ཊི་པ་དནྟི ཙི་ཏྟ་ཝི་སུ་དྡྷི་ཨཱ་དི་ཀཾ ཨ་རི་ཡ་མ་གྒ་སྶ ཨ་དྷི་ག་མཱ་ཡ པུ་བྦ་བྷཱ་ག་པ་ཊི་པ་ཏྟིཾ.

ཨ་ཝ་ཀུ་ཛྫ་སུ་ཏྟ་ཝ་ཎྞ་ནཱ ནི་ཊྛི་ཏཱ.

པུ་གྒ་ལ་ཝ་གྒ་ཝ་ཎྞ་ནཱ ནི་ཊྛི་ཏཱ.