ཨི་དྡྷི་པཱ་ད་ཝི་བྷ་ངྒ་མཱ་ཏི་ཀ་ཏྠ་ཝ་ཎྞ་ནཱ
ཨི་དྡྷི་པཱ་ད་ཝི་བྷ་ངྒ་མཱ་ཏི་ཀཱ་ཡ པ་ན ཙ་ཏྟཱ་རོ ཨི་དྡྷི་པཱ་དཱཏི ཨེ་ཏྠ ཨི་ཛ྄ཛྷ་ཏཱི་ཏི ཨི་དྡྷི, ས་མི་ཛ྄ཛྷ་ཏི ནི་པྥ་ཛྫ་ཏཱི་ཏི ཨ་ཏྠོ, ཨི་དྡྷི ཨེ་ཝ པཱ་དོ ཨི་དྡྷི་པཱ་དོ, ཨི་དྡྷི་ཀོ་ཊྛཱ་སོ་ཏི ཨ་ཏྠོ. ཨི་ཛ྄ཛྷ་ནྟི ཝཱ ཨེ་ཏཱ་ཡ ས་ཏྟཱ ཨི་དྡྷཱ ཝུ་དྡྷཱ ཨུ་ཀྐཾ་ས་ག་ཏཱ ཧོ་ནྟཱི་ཏི་པི ཨི་དྡྷི, པ་ཛྫ་ནྟི ཨེ་ཏེ་ནཱ་ཏི པཱ་དོ, པ་ཏི་ཊྛཱ ཨ་དྷི་ག་མཱུ་པཱ་ཡོ་ཏི ཨ་ཏྠོ, ཨི་དྡྷི་ཡཱ པཱ་དོ ཨི་དྡྷི་པཱ་དོ. ཚ་ནྡ་ས་མཱ་དྷི་པ་དྷཱ་ན་ས་ངྑཱ་ར་ས་མ་ནྣཱ་ག་ཏནྟི ཨེ་ཏྠ ཚ་ནྡ་ཧེ་ཏུ་ཀོ, ཚ་ནྡཱ་དྷི་ཀོ ཝཱ ས་མཱ་དྷི ཚ་ནྡ་ས་མཱ་དྷི, ཀ་ཏྟུ་ཀ་མྱ་ཏཱ་ཚ་ནྡཾ ཨ་དྷི་པ་ཏིཾ ཀ་རི་ཏྭཱ པ་ཊི་ལ་དྡྷ་ས་མཱ་དྷི་སྶེ་ཏཾ ཨ་དྷི་ཝ་ཙ་ནཾ. པ་དྷཱ་ན་བྷཱུ་ཏཱ ས་ངྑཱ་རཱ པ་དྷཱ་ན་ས་ངྑཱ་རཱ, ཙ་ཏུ་ཀི་ཙྩ་སཱ་དྷ་ཀ་སྶ ས་མྨ་པྤ་དྷཱ་ན་ཝཱི་རི་ཡ་སྶེ་ཏཾ ཨ་དྷི་ཝ་ཙ་ནཾ. ས་མ་ནྣཱ་ག་ཏནྟི ཏེ་ན ཚ་ནྡ་ས་མཱ་དྷི་ནཱ, པ་དྷཱ་ན་ས་ངྑཱ་རེ་ན ཙ ཨུ་པེ་ཏཾ. ཨི་དྡྷི་པཱ་དནྟི ཡ་ཐཱ་ཝུ་ཏྟ་ཏྠེ་ན ‘‘ཨི་དྡྷཱི’’ཏི ས་ངྑྱཾ ག་ཏཱ་ནཾ ཨུ་པ་ཙཱ་ར་ཛ྄ཛྷཱ་ནཱ་དི་ཀུ་ས་ལ་ཙི་ཏྟ་ས་མྤ་ཡུ་ཏྟཱ་ནཾ ཚ་ནྡ་ས་མཱ་དྷི་པ་དྷཱ་ན་ས་ངྑཱ་རཱ་ནཾ ཨ་དྷི་ཊྛཱ་ན་ཊྛེ་ན པཱ་ད་བྷཱུ་ཏ་སེ་ས་ཙི་ཏྟ་ཙེ་ཏ་སི་ཀ་རཱ་སིཾ. བྷཱ་ཝེ་ཏཱིཏི ཝ་ཌྜྷེ་ཏི, ཨ་ཏྟ་ནོ ས་ནྟཱ་ནེ པུ་ན་པྤུ་ནཾ ཛ་ནེ་ཏཱི་ཏི ཨ་ཏྠོ. ཨི་མི་ནཱ ན་ཡེ་ན སེ་སེ་སུ་པི ཨ་ཏྠོ ཝེ་དི་ཏ་བྦོ. ཏ་ཏྠ ཝཱི་མཾ་སཱཏི པ་ཉྙཱ. སེ་སཾ པ་ད་ཏོ སུ་ཝི་ཉྙེ་ཡྻ་མེ་ཝ.
ཨ་ཏྠ་ཏོ པ་ནེ་ཏྠ ཏེ་ན ཀིཾ ཀ་ཐི་ཏཾ? ཙ་ཏུ་ནྣཾ བྷི་ཀྑཱུ་ནཾ མ་ཏྠ་ཀ་པྤ་ཏྟཾ ཀ་མྨ་ཊྛཱ་ནཾ ཀ་ཐི་ཏཾ. ཡ་ཐཱ ཧི ཙ་ཏཱུ་སུ ཨ་མ་ཙྩ་པུ་ཏྟེ་སུ ཋཱ་ན་ནྟ་རཾ པ་ཏྠེ་ཏྭཱ ཝི་ཙ་ར་ནྟེ་སུ ཨེ་ཀོ ཨུ་པ་ཊྛཱ་ནེ་ན, ཨེ་ཀོ སཱུ་ར་བྷཱ་ཝེ་ན, ཨེ་ཀོ ཛཱ་ཏི་ས་མྤ་ཏྟི་ཡཱ, ཨེ་ཀོ མ་ནྟ་བ་ལེ་ནཱ་ཏི ཨེ་ཝཾ ཏེ པ་ཙྩེ་ཀ་ཀཱ་ར་ཎེ་ན རཱ་ཛཱ་ནཾ ཨཱ་རཱ་དྷེ་ཏྭཱ ཋཱ་ན་ནྟ་རཾ པཱ་པུ་ཎ་ནྟི, ཨེ་ཝཾ བྷི་ཀྑཱུ་པི ཚ་ནྡ་ཝཱི་རི་ཡ་ཙི་ཏྟ་ཝཱི་མཾ་སཱ་སུ ཨེ་ཀེ་ཀཾ ཛེ་ཊྛཾ དྷུ་རཾ པུ་བྦ་ངྒ་མཾ ཀ་ཏྭཱ ལོ་ཀུ་ཏྟ་ར་དྷ་མྨ་ནི་བྦ་ཏྟ་ཀཱ ཧོ་ནྟི. ཨེ་ཏྠ ཙ ཚ་ནྡོ ས་མཱ་དྷི པ་དྷཱ་ན་ས་ངྑཱ་རོ་ཏི ཏ་ཡོ དྷ་མྨཱ ཨི་དྡྷཱི་པི ཧོ་ནྟི ཨི་དྡྷི་པཱ་དཱ་པི, སེ་སཱ པ་ན ས་མྤ་ཡུ་ཏྟཱ ཙ་ཏྟཱ་རོ ཁ་ནྡྷཱ ཨི་དྡྷི་པཱ་དཱ ཨེ་ཝ. ཨེ་ཝཾ སེ་སཱ་དྷི་པ་ཏི་ཡུ་ཏྟ་ཙི་ཏྟེ་སུ་པི ཨི་དྡྷི་པཱ་དཱ་ཏི ཝེ་དི་ཏ་བྦཱ.
ཨ་པི་ཙ ཛྷཱ་ན་ཝི་པ་སྶ་ནཱ་སུ པུ་བྦ་བྷཱ་གོ ཨི་དྡྷི་པཱ་དོ. ཡོ པ་ཊི་ལཱ་བྷོ, སཱ ཨི་དྡྷི. པ་ཋ་མ་ཛ྄ཛྷཱ་ནཱ་དཱི་ནཾ ཧི པུ་བྦ་བྷཱ་ག་པ་རི་ཀ་མྨཱ་ནི ཨི་དྡྷི་པཱ་དོ ནཱ་མ, པ་ཋ་མ་ཛ྄ཛྷཱ་ནཱ་ད་ཡོ ཨི་དྡྷི ནཱ་མ. པ་ཋ་མ་མ་གྒཱ་དཱི་ནཾ པུ་བྦ་བྷཱ་ག་ཝི་པ་སྶ་ནཱ ཨི་དྡྷི་པཱ་དོ ནཱ་མ, པ་ཋ་མ་མ་གྒཱ་ད་ཡོ ཨི་དྡྷི ནཱ་མ. པ་ཊི་ལཱ་བྷ་ཝ་སེ་ནཱ་པི དཱི་པེ་ཏུཾ ཝ་ཊྚ་ཏི. པ་ཋ་མ་ཛ྄ཛྷཱ་ནཱ་ད་ཡོ ཧི པ་ཋ་མ་མ་གྒཱ་ད་ཡོ ཙ ཨི་དྡྷི་པཱ་དོ ནཱ་མ, དུ་ཏི་ཡ་ཛ྄ཛྷཱ་ནཱ་ད་ཡོ, དུ་ཏི་ཡ་མ་གྒཱ་ད་ཡོ ཙ ཨི་དྡྷི ནཱ་མཱ་ཏི ཨ་ཡཾ ཏཱ་ཝེ་ཏྠ པ་ད་ཏྠོ.
དྷ་མྨ་བྷེ་དོ པ་ནེ་ཏྠ ཝི་བྷ་ངྒ་ན་ཡེ་ནེ་ཝ པཱ་ཀ་ཊོ བྷ་ཝི་སྶ་ཏི. ཏ་ཏྠ ཧི སུ་ཏྟ་ནྟ་བྷཱ་ཛ་ནཱི་ཡེ ཏཱ་ཝ ཚ་ནྡཱ་དཱི་ནཾ པ་དཱ་ནཾ ཝི་བྷ་ངྒཾ ཝ་ཏྭཱ ཨ་ནྟེ ‘‘ཨི་དྡྷི་པཱ་དོ་ཏི ཏ་ཐཱ་བྷཱུ་ཏ་སྶ ཝེ་ད་ནཱ་ཀྑ་ནྡྷོ…པེ… ཝི་ཉྙཱ་ཎ་ཀྑ་ནྡྷོ. ཨི་དྡྷི་པཱ་དཾ བྷཱ་ཝེ་ཏཱི་ཏི ཏེ དྷ་མྨེ ཨཱ་སེ་ཝ་ཏི བྷཱ་ཝེ་ཏི བ་ཧུ་ལཱི་ཀ་རོ་ཏི, ཏེ་ན ཝུ་ཙྩ་ཏི ཨི་དྡྷི་པཱ་དཾ བྷཱ་ཝེ་ཏཱི’’ཏི (ཝི་བྷ. ༤༣༤) ཨེ་ཝཾ ས་བྦེ ལོ་ཀི་ཡ་ལོ་ཀུ་ཏྟ་ར་དྷ་མྨཱ ཨི་དྡྷི་པཱ་དོ་ཏི ཝུ་ཏྟཱ.
ཨ་བྷི་དྷ་མྨ་བྷཱ་ཛ་ནཱི་ཡེ པ་ན ཚ་ནྡཱ་དཱི་ནི པ་དཱ་ནི ཝི་བྷ་ཛི་ཏྭཱ ཨ་ནྟེ ‘‘ཨི་དྡྷི་པཱ་དོ་ཏི ཏ་ཐཱ་བྷཱུ་ཏ་སྶ ཕ་སྶོ…པེ… པ་གྒཱ་ཧོ ཨ་ཝི་ཀྑེ་པོ’’ཏི (ཝི་བྷ. ༤༤༧) ཨེ་ཝཾ ས་བྦེ ལོ་ཀུ་ཏྟ་ར་ཀུ་ས་ལ་དྷ་མྨཱ ཨི་དྡྷི་པཱ་དཱ་ཏི ཝ་ཏྭཱ པུ་ན ‘‘ཚ་ནྡི་དྡྷི་པཱ་དོ ཝཱི་རི་ཡི་དྡྷི་པཱ་དོ ཙི་ཏྟི་དྡྷི་པཱ་དོ ཝཱི་མཾ་སི་དྡྷི་པཱ་དོ’’ཏི (ཝི་བྷ. ༤༥༧) མཱ་ཏི་ཀཾ ཋ་པེ་ཏྭཱ ‘‘ཏ་ཏྠ ཀ་ཏ་མོ ཚ་ནྡི་དྡྷི་པཱ་དོ? ཨི་དྷ བྷི་ཀྑུ ཡ་སྨིཾ ས་མ་ཡེ ལོ་ཀུ་ཏྟ་རཾ ཛྷཱ་ནཾ བྷཱ་ཝེ་ཏི…པེ… ཡོ ཏ་སྨིཾ ས་མ་ཡེ ཚ་ནྡོ ཚ་ནྡི་ཀ་ཏཱ…པེ… ཨ་ཡཾ ཝུ་ཙྩ་ཏི ཚ་ནྡི་དྡྷི་པཱ་དོ’’ཏི་ཨཱ་དི་ནཱ ལོ་ཀུ་ཏྟ་ར་ཀུ་ས་ལ་ཙི་ཏྟ་ས་མྤ་ཡུ་ཏྟ་ཚ་ནྡ་ཝཱི་རི་ཡ་ཙི་ཏྟ་ཝཱི་མཾ་སཱ ཨེ་ཝ ཨི་དྡྷི་པཱ་དཱ་ཏི ཝུ་ཏྟཱ. ཏ་ཐཱ པ་ཉྷཱ་པུ་ཙྪ་ཀེ་པི ཀུ་ས་ལཱ ཨེ་ཝ, ཨ་ནི་ད་སྶ་ན་ཨ་པྤ་ཊི་གྷཱ ཨེ་ཝ, ཝཱི་མཾ་སི་དྡྷི་པཱ་དོ ཧེ་ཏུ, སེ་སཱ ན ཧེ་ཏཱུ…པེ… ཙི་ཏྟི་དྡྷི་པཱ་དོ ན ཝ་ཏྟ་བྦོ, སེ་སཱ ཙི་ཏྟ་ས་མྤ་ཡུ་ཏྟཱ…པེ… ཨ་ནུ་ཏྟ་རཱ་ཝ, ཨ་ར་ཎཱ་ཝཱ་ཏི. སེ་ས་མེ་ཏྠ ས་ཏི་པ་ཊྛཱ་ནེ ཝུ་ཏྟ་ས་དི་ས་མེ་ཝ. པཱ་ལི༹་མུ་ཏྟ་ཀ་ན་ཡོ པ་ནེ་ཏྠཱ་པི ན ཨུ་དྡྷ་ཊོ་ཏི.
ཨི་དྡྷི་པཱ་ད་ཝི་བྷ་ངྒ་མཱ་ཏི་ཀ་ཏྠ་ཝ་ཎྞ་ནཱ ནི་ཊྛི་ཏཱ.