བོ་ཛ྄ཛྷ་ངྒ་ཝི་བྷ་ངྒ་མཱ་ཏི་ཀ་ཏྠ་ཝ་ཎྞ་ནཱ

བོ་ཛ྄ཛྷ་ངྒ་ཝི་བྷ་ངྒ་མཱ་ཏི་ཀཱ་ཡ པ་ན ཨ་ཏྠ་ཏོ ཏཱ་ཝ – ས་ཏྟ བོ་ཛ྄ཛྷ་ངྒཱཏི ཨེ་ཏྠ བོ་དྷི་ཡཱ, བོ་དྷི་སྶ ཝཱ ཨ་ངྒཱ་ཏི བོ་ཛ྄ཛྷ་ངྒཱ. ཨི་དཾ ཝུ་ཏྟཾ ཧོ་ཏི – ཡཱ་ཡ ཨེ་ཝ དྷ་མྨ་སཱ་མ་གྒི་ཡཱ མ་གྒ་ཀྑ་ཎེ ཨུ་པྤ་ཛྫ་མཱ་ནཱ་ཡ ལཱི་ནུ་དྡྷ་ཙྩཱ་དི་ཨ་ནེ་ཀེ་སཾ ཨུ་པ་དྡ་ཝཱ་ནཾ པ་ཊི་པ་ཀྑ་བྷཱུ་ཏཱ་ཡ ས་ཏི་དྷ་མྨ་ཝི་ཙ་ཡཱ་དི་ས་ཏྟ་ཝི་དྷཱ་ཡ དྷ་མྨ་སཱ་མ་གྒི་ཡཱ ཨ་རི་ཡ་སཱ་ཝ་ཀོ བུ་ཛ྄ཛྷ་ཏི, ཀི་ལེ་ས་ནི་དྡཱ་ཡ ཨུ་ཊྛ་ཧ་ཏི, ས་ཙྩཱ་ནི ཝཱ པ་ཊི་ཝི་ཛ྄ཛྷ་ཏི, ཏ་སྶཱ དྷ་མྨ་སཱ་མ་གྒི་ས་ངྑཱ་ཏཱ་ཡ བོ་དྷི་ཡཱ ཨ་ངྒཱ་ཏི བོ་ཛ྄ཛྷ་ངྒཱ ཛྷཱ་ན་ངྒ་མ་གྒ་ངྒཱ་ནི ཝི་ཡ. ཡོ པ་ནེ་ས ཡ་ཐཱ་ཝུ་ཏྟ་པྤ་ཀཱ་རཱ་ཡ ཨེ་ཏཱ་ཡ དྷ་མྨ་སཱ་མ་གྒི་ཡཱ བུ་ཛ྄ཛྷ་ཏཱི་ཏི ཀ་ཏྭཱ ཨ་རི་ཡ་སཱ་ཝ་ཀོ ‘‘བོ་དྷཱི’’ཏི ཝུ་ཙྩ་ཏི, ཏ་སྶ བོ་དྷི་སྶ ཨ་ངྒཱ་ཏི བོ་ཛ྄ཛྷ་ངྒཱ སེ་ན་ངྒ་ར་ཐ་ངྒཱ་ད་ཡོ ཝི་ཡ. ཨ་པི་ཙ ‘‘བོ་དྷཱ་ཡ སཾ་ཝ་ཏྟ་ནྟཱི་ཏི བོ་ཛ྄ཛྷ་ངྒཱ’’ཏི་ཨཱ་དི་ནཱ པ་ཊི་ས་མྦྷི་དཱ་ན་ཡེ་ནཱ་པི བོ་ཛ྄ཛྷ་ངྒ་ཏྠོ ཝེ་དི་ཏ་བྦོ. པ་ས་ཏྠོ, སུ་ནྡ་རོ ཝཱ བོ་ཛ྄ཛྷ་ངྒོ ས་མྦོ་ཛ྄ཛྷ་ངྒོ, ས་ཏི་ཡེ་ཝ ས་མྦོ་ཛ྄ཛྷ་ངྒོ ས་ཏི་ས་མྦོ་ཛ྄ཛྷ་ངྒོ. ཨེ་ཝཾ སེ་སེ་སུ་པི. ཏ་ཏྠ དྷ་མྨེ ཝི་ཙི་ནཱ་ཏི ཨ་ནི་ཙྩཱ་དི་ཏོ པ་རི་ཝཱི་མཾ་ས་ཏི ཛཱ་ནཱ་ཏི, དྷ་མྨེ ཝཱ ཨེ་ཏེ་ན ས་ཏྟཱ ཝི་ཙི་ན་ནྟཱི་ཏི དྷ་མྨ་ཝི་ཙ་ཡོ, པ་ཉྙཱ. ཨུ་པེ་ཀྑ་ཏི ས་མ་ར་སཱ་ནཾ དྷ་མྨཱ་ནཾ ཧཱ་པ་ན་ཝ་ཌྜྷ་ནེ ཨ་ཝཱ་ཝ་ཊ་ཏཱ་ཡ པ་ཊི་ས་ངྑཱ་ནཱ་ཀཱ་རེ་ན མ་ཛ྄ཛྷ་ཏྟཱ ཧོ་ཏཱི་ཏི ཨུ་པེ་ཀྑཱ, ཏ་ཏྲ་མ་ཛ྄ཛྷ་ཏྟ་ཏཱ. པ་ཊི་ས་ངྑཱ་ན་ལ་ཀྑ་ཎོ ཧི ཨུ་པེ་ཀྑཱ་ས་མྦོ་ཛ྄ཛྷ་ངྒོ་ཏི. སེ་སཾ སུ་ཝི་ཉྙེ་ཡྻ་མེ་ཝ. ཨ་ཡཾ ཏཱ་ཝེ་ཏྠ པ་ད་ཏྠོ. དྷ་མྨ་བྷེ་དོཔེ་ཏྠ སུ་ཝི་ཉྙེ་ཡྻོ་ཝ.

ཝི་བྷ་ངྒ་ན་ཡ་ཏོ པ་ནེ་ཏྠ སུ་ཏྟ་ནྟ་བྷཱ་ཛ་ནཱི་ཡེ ཏཱ་ཝ ལོ་ཀི་ཡ་ལོ་ཀུ་ཏྟ་ར་ཝ་སེ་ན སེ་སེ་སུ ལོ་ཀུ་ཏྟ་ར་ཀུ་ས་ལ་ཝི་པཱ་ཀ་ཝ་སེ་ན ཝི་བྷ་ཏྟཱ. པ་ཉྷཱ་པུ་ཙྪ་ཀེ པ་ན སི་ཡཱ ཀུ་ས་ལཱ, སི་ཡཱ ཨ་བྱཱ་ཀ་ཏཱ, པཱི་ཏི་ས་མྦོ་ཛ྄ཛྷ་ངྒོ སུ་ཁཱ་ཡ ཝེ་ད་ནཱ་ཡ ས་མྤ་ཡུ་ཏྟོ་ཝ, སེ་སཱ དྭཱི་ཧི…པེ… པཱི་ཏི་ས་མྦོ་ཛ྄ཛྷ་ངྒོ སུ་ཁ་ས་ཧ་ག་ཏོ་ཝ, སེ་སཱ ཏི་དྷཱ་པི, ཨ་ནི་ད་སྶ་ན་ཨ་པྤ་ཊི་གྷཱ, དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒོ ཧེ་ཏུ, སེ་སཱ ན ཧེ་ཏཱུ…པེ… རཱུ་པཱ་ཝ་ཙ་རཱ་ཝ, ཨ་ར་ཎཱ་ཝཱ་ཏི. སེ་སཾ ས་ཏི་པ་ཊྛཱ་ནེ ཝུ་ཏྟ་ན་ཡ་མེ་ཝ. ཨ་ཡ་མེ་ཏྠ ཝི་བྷ་ངྒ་ན་ཡོ.

ཨི་དཱ་ནི པ་ན –

ཀ་མ་ཏོ ཏཱ་ཝ་ཏྟ་ཏོ ཙ, ཧེ་ཏུ་བྷཱུ་མི་ཝི་བྷཱ་ག་ཏོ;

ཝི་ཝེ་ཀ་ཏོ ཙ ཝི་ཉྙེ་ཡྻོ, པཱ་ལི༹་མུ་ཏྟ་ཝི་ནི་ཙྪ་ཡོ.

ཏ་ཏྠ ཀ་མ་ཏོ ཏཱ་ཝ ཨ་ཡ་མྤི དེ་ས་ནཱ་ཀྐ་མོ་ཝ. ས་བྦེ་སཾ ཧི བོ་ཛ྄ཛྷ་ངྒཱ་ནཾ ཨུ་པ་ཀཱ་ར་ཏྟཱ ས་ཏི་ས་མྦོ་ཛ྄ཛྷ་ངྒོ པ་ཋ་མཾ ཝུ་ཏྟོ, ཏ་ཏོ ཡ་སྨཱ ཨུ་པ་ཊྛི་ཏ་ས་ཏི་ཀོ དྷ་མྨེ པ་ཉྙཱ་ཡ པ་ཝི་ཙི་ནཱ་ཏི, པ་ཝི་ཙི་ཏ་དྷ་མྨོ ཝཱི་རི་ཡཾ ཨཱ་ར་བྷ་ཏི, ཨཱ་ར་དྡྷ་ཝཱི་རི་ཡ་སྶ པཱི་ཏི ཨུ་པྤ་ཛྫ་ཏི, པཱི་ཏི་མ་ན་སྶ ཀཱ་ཡོ་པི ཙི་ཏྟ་མྤི པ་སྶ་མྦྷ་ཏི, པ་སྶ་དྡྷ་ཀཱ་ཡ་སྶ སུ་ཁི་ནོ ཙི་ཏྟཾ ས་མཱ་དྷི་ཡ་ཏི, ས་མཱ་ཧི་ཏ་ཙི་ཏྟོ ཏཾ ཙི་ཏྟཾ སཱ་དྷུ་ཀཾ ཨ་ཛ྄ཛྷུ་པེ་ཀྑི་ཏཱ ཧོ་ཏི, ཏ་སྨཱ དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒཱ་ད་ཡོ ཡ་ཐཱ་ཀྐ་མཾ ཝུ་ཏྟཱ་ཏི ཨ་ཡཾ ཏཱ་ཝེ་ཏྠ ཀ་མོ.

ཏཱ་ཝ་ཏྟ་ཏོ པ་ན ཀ་སྨཱ ཏེ ས་ཏྟེ་ཝ ཝུ་ཏྟཱ, ཨ་ནཱུ་ནཱ ཨ་ན་དྷི་ཀཱ་ཏི? ལཱི་ནུ་དྡྷ་ཙྩ་པ་ཊི་པ་ཀྑ་ཏོ, ས་བྦ་ཏྟི་ཀ་ཏོ ཙ. ཨེ་ཏྠ ཧི ཏ་ཡོ བོ་ཛ྄ཛྷ་ངྒཱ ལཱི་ན་སྶ པ་ཊི་པ་ཀྑཱ. ཡ་ཐཱ་ཧ – ‘‘ཡ་སྨིཾ ཙ ཁོ, བྷི་ཀྑ་ཝེ, ས་མ་ཡེ ལཱི་ནཾ ཙི་ཏྟཾ ཧོ་ཏི, ཀཱ་ལོ ཏ་སྨིཾ ས་མ་ཡེ དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ, ཀཱ་ལོ ཝཱི་རི་ཡ…པེ… པཱི་ཏི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡཱ’’ཏི (སཾ. ནི. ༥.༢༣༤). ཏ་ཡོ ཨུ་དྡྷ་ཙྩ་སྶ པ་ཊི་པ་ཀྑཱ. ཡ་ཐཱ་ཧ – ‘‘ཡ་སྨིཾ ཙ ཁོ, བྷི་ཀྑ་ཝེ, ས་མ་ཡེ ཨུ་དྡྷ་ཏཾ ཙི་ཏྟཾ ཧོ་ཏི, ཀཱ་ལོ ཏ་སྨིཾ ས་མ་ཡེ པ་སྶ་དྡྷི་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡ, ཀཱ་ལོ ས་མཱ་དྷི…པེ… ཨུ་པེ་ཀྑཱ་ས་མྦོ་ཛ྄ཛྷ་ངྒ་སྶ བྷཱ་ཝ་ནཱ་ཡཱ’’ཏི (སཾ. ནི. ༥.༢༣༤). ཨེ་ཀོ པ་ནེ་ཏྠ ལོ་ཎ་དྷཱུ་པ་ནཾ ཝི་ཡ ས་བྦ་བྱ་ཉྫ་ནེ་སུ ས་བྦ་བོ་ཛ྄ཛྷ་ངྒེ་སུ ཨི་ཙྪི་ཏ་བྦོ. ཡ་ཐཱ་ཧ – ‘‘ས་ཏི་ཉྩ ཁྭཱ་ཧཾ, བྷི་ཀྑ་ཝེ, ས་བྦ་ཏྠི་ཀཾ ཝ་དཱ་མཱི’’ཏི (སཾ. ནི. ༥.༢༣༤). ཨེ་ཝཾ ལཱི་ནུ་དྡྷ་ཙྩ་པ་ཊི་པ་ཀྑ་ཏོ ཙ ས་བྦ་ཏྠི་ཀ་ཏོ ཙ ས་ཏྟེ་ཝ ཝུ་ཏྟཱ་ཏི ཨ་ཡཾ ཏཱ་ཝ་ཏྟ་ཏོ.

ཧེ་ཏུ་བྷཱུ་མི་ཝི་བྷཱ་ག་ཏོཏི ཨེ་ཏྠ ཧེ་ཏུ་ཝི་བྷཱ་ག་ཏོ ཏཱ་ཝ – ཙ་ཏྟཱ་རོ ས་ཏི་ས་མྦོ་ཛ྄ཛྷ་ངྒ་སྶ ཨུ་པྤཱ་དཱ་ཡ སཾ་ཝ་ཏྟ་ནྟི ས་ཏི་ས་མྤ་ཛ་ཉྙཾ མུ་ཊྛ་སྶ་ཏི་པུ་གྒ་ལ་པ་རི་ཝ་ཛྫ་ན་ཏཱ ཨུ་པ་ཊྛི་ཏ་སྶ་ཏི་པུ་གྒ་ལ་སེ་ཝ་ན་ཏཱ ཏ་ད་དྷི་མུ་ཏྟ་ཏཱ་ཏི. ཏ་ཐཱ ས་ཏྟ དྷ་མྨཱ དུ་ཏི་ཡ་སྶ པ་རི་པུ་ཙྪ་ཀ་ཏཱ ཝ་ཏྠུ་ཝི་ས་ད་ཀི་རི་ཡཱ ཨི་ནྡྲི་ཡ་ས་མ་ཏྟ་པ་ཊི་པཱ་ད་ནཱ དུ་པྤ་ཉྙ་པུ་གྒ་ལ་པ་རི་ཝ་ཛྫ་ནཱ པ་ཉྙ་ཝ་ནྟ་པུ་གྒ་ལ་སེ་ཝ་ནཱ ག་མྦྷཱི་ར་ཉཱ་ཎ་ཙ་རི་ཡ་པ་ཙྩ་ཝེ་ཀྑ་ཎ་ཏཱ ཏ་ད་དྷི་མུ་ཏྟ་ཏཱ་ཏི. ཏ་ཏྠ ཨ་ཛ྄ཛྷ་ཏྟི་ཀ་བཱ་ཧི་རཱ་ནཾ ས་རཱི་ར་པ་རི་ཀྑཱ་ར་བྷཱུ་ཏཱ་ནཾ ཝ་ཏྠཱུ་ནཾ ཝི་ས་ད་བྷཱ་ཝ་ཀ་ར་ཎཾ ཝ་ཏྠུ་ཝི་ས་ད་ཀི་རི་ཡཱ ནཱ་མ. ཏ་ཐཱ ཨེ་ཀཱ་ད་ས དྷ་མྨཱ ཏ་ཏི་ཡ་སྶ ཨ་པཱ་ཡ་བྷ་ཡ་ག་མ་ན་ཝཱི་ཐི་དཱ་ཡ་ཛྫ་མ་ཧ་ཏྟ་ས་ཏྠུ་མ་ཧ་ཏྟ་ཛཱ་ཏི་མ་ཧ་ཏྟ་ས་བྲ་ཧྨ་ཙཱ་རི་མ་ཧ་ཏྟཱ་ནཾ པ་ཙྩ་ཝེ་ཀྑ་ཎ་ཏཱ ཨཱ་ནི་སཾ་ས་ད་སྶཱ་ཝི་ཏཱ པི་ཎྜ་པཱ་ཏཱ་པ་ཙཱ་ཡ་ན་ཏཱ ཀུ་སཱི་ཏ་པུ་གྒ་ལ་པ་རི་ཝ་ཛྫ་ན་ཏཱ ཨཱ་ར་དྡྷ་ཝཱི་རི་ཡ་པུ་གྒ་ལ་སེ་ཝ་ན་ཏཱ ཏ་ད་དྷི་མུ་ཏྟ་ཏཱ་ཏི. ཏ་ཏྠ ‘‘བུ་དྡྷཱ་དཱི་ཧི ག་ཏ་མ་གྒོ མ་ཡཱ ག་ནྟ་བྦོ’’ཏི པ་ཙྩ་ཝེ་ཀྑ་ཎཱ ཝཱི་ཐི་པ་ཙྩ་ཝེ་ཀྑ་ཎཱ ནཱ་མ. ‘‘དཱ་ཡ་ཀེ་ཧི དི་ནྣ་པི་ཎྜ་པཱ་ཏ་སྶ མ་ཧ་པྥ་ལ་ཏཾ ས་མྤཱ་དེ་སྶཱ་མཱི’’ཏི ཨ་ཏྟཱ་ནཾ ད་མ་ནཾ པི་ཎྜ་པཱ་ཏཱ་པ་ཙཱ་ཡ་ནཾ ནཱ་མ. ཏ་ཐཱ ཨེ་ཀཱ་ད་ས དྷ་མྨཱ ཙ་ཏུ་ཏྠ་སྶ བུ་དྡྷ་དྷ་མྨ་ས་ངྒྷ་སཱི་ལ་ཙཱ་ག་དེ་ཝ་ཏོ་པ་ས་མཱ་ནུ་སྶ་ཏི་ཡོ ས་ཏྟ, ལཱུ་ཁ་པུ་གྒ་ལ་པ་རི་ཝ་ཛྫ་ན་ཏཱ སི་ནི་དྡྷ་པུ་གྒ་ལ་སེ་ཝ་ན་ཏཱ པ་སཱ་ད་ནཱི་ཡ་སུ་ཏྟ་ནྟ་པ་ཙྩ་ཝེ་ཀྑ་ཎ་ཏཱ ཏ་ད་དྷི་མུ་ཏྟ་ཏཱ་ཏི. ཏ་ཐཱ ས་ཏྟ དྷ་མྨཱ པ་ཉྩ་མ་སྶ པ་ཎཱི་ཏ་བྷོ་ཛ་ན་སེ་ཝ་ན་ཏཱ, ཨུ་ཏུ་སུ་ཁ་ཨི་རི་ཡཱ་པ་ཐ་སུ་ཁ་སེ་ཝ་ན་ཏཱ དྭེ མ་ཛ྄ཛྷ་ཏྟ་པྤ་ཡོ་ག་ཏཱ སཱ་ར་དྡྷ་ཀཱ་ཡ་པུ་གྒ་ལ་པ་རི་ཝ་ཛྫ་ན་ཏཱ ས་ནྟ་ཀཱ་ཡ་པུ་གྒ་ལ་སེ་ཝ་ན་ཏཱ ཏ་ད་དྷི་མུ་ཏྟ་ཏཱ་ཏི. ཨེ་ཀཱ་ད་ས དྷ་མྨཱ ཚ་ཊྛ་སྶ ཝ་ཏྠུ་ཝི་ས་ད་ཀི་རི་ཡཱ ཨི་ནྡྲི་ཡ་ས་མ་ཏྟ་པ་ཊི་པཱ་ད་ནཱ ནི་མི་ཏྟ་ཀུ་ས་ལ་ཏཱ ས་མ་ཡེ ཙི་ཏྟ་སྶ པ་གྒ་ཧ་ནི་གྒ་ཧ་ས་མྤ་ཧཾ་ས་ན་ཛ྄ཛྷུ་པེ་ཀྑ་ནཱ ཙ་ཏ་སྶོ, ཨ་ས་མཱ་ཧི་ཏ་ས་མཱ་ཧི་ཏ་པུ་གྒ་ལཱ་ནཾ པ་རི་ཝ་ཛྫ་ན་སེ་ཝ་ན་ཏཱ དྭེ, ཛྷཱ་ན་ཝི་མོ་ཀྑ་པ་ཙྩ་ཝེ་ཀྑ་ཎ་ཏཱ ཏ་ད་དྷི་མུ་ཏྟ་ཏཱ་ཏི. ཏ་ཏྠ ཀ་སི་ཎཱ་དི་ནི་མི་ཏྟཱ་ནཾ ཨུ་གྒ་ཧ་ཎ་ཀུ་ས་ལ་ཏཱ ནི་མི་ཏྟ་ཀུ་ས་ལ་ཏཱ ནཱ་མ. པ་ཉྩ དྷ་མྨཱ ས་ཏྟ་མ་སྶ ས་ཏྟ་ས་ངྑཱ་ར་ཀེ་ལཱ་ཡ་ན་མ་ཛ྄ཛྷ་ཏྟ་པུ་གྒ་ལཱ་ནཾ པ་རི་ཝ་ཛྫ་ན་སེ་ཝ་ན་ཏཱ དྭེ དྭེ, ཏ་ད་དྷི་མུ་ཏྟ་ཏཱ་ཏི. ཨ་ཡ་མེ་ཏྠ ས་ངྑེ་པོ, ཝི་ཏྠཱ་རོ པ་ན ས་མྨོ་ཧ་ཝི་ནོ་ད་ནི་ཡཱ ཝི་བྷ་ངྒ་ཊྛ་ཀ་ཐཱ་ཡ ག་ཧེ་ཏ་བྦོ་ཏི ཨ་ཡ་མེ་ཏྠ ཧེ་ཏུ་ཝི་བྷཱ་གོ.

བྷཱུ་མི་ཝི་བྷཱ་ག་ཏོ པ་ནེ་ཏེ ཀཱ་མཱ་ཝ་ཙ་རཱ, ལོ་ཀུ་ཏྟ་རཱ ཝཱ ཧོ་ནྟི, ཀཱ་མཱ་ཝ་ཙ་རེ་སུ བ་ལ་ཝ་ཝི་པ་སྶ་ནཱ་དཱི་སུ ཨེ་ཝ བོ་ཛ྄ཛྷ་ངྒཱ ལ་བྦྷ་ནྟི, ན ཨི་ཏ་རེ་སུ. ལོ་ཀུ་ཏྟ་རེ་སུ པ་ན ས་བྦ་ཏྠ ལ་བྦྷ་ནྟི, རཱུ་པཱ་ཝ་ཙ་རཱ་རཱུ་པཱ་ཝ་ཙ་ར་ཙི་ཏྟེ་སུ ས་བྦ་ཐཱ ན ལ་བྦྷ་ནྟི ཨ་བོ་དྷི་པ་ཀྑི་ཀ་ཏྟཱ. ཀེ་ཙི པ་ན ཐེ་རཱ ཝི་པ་སྶ་ནཱ་པཱ་ད་ཀེ་སུ ཀ་སི་ཎཱ་སུ་བྷ་བྲ་ཧྨ་ཝི་ཧཱ་ར་ཛ྄ཛྷཱ་ནེ་སུ་པི བོ་ཛ྄ཛྷ་ངྒེ ཨུ་དྡྷ་ར་ནྟི, ན ཙ ཏེ པ་ཊི་སི་དྡྷཱ ཨ་ཊྛ་ཀ་ཐཱ་ཙ་རི་ཡེ་ཧི, ཏ་སྨཱ ཏེ་སཾ མ་ཏེ་ན རཱུ་པཱ་ཝ་ཙ་རཱ་པི ཧོ་ནྟི, ན ཀེ་ན་ཙི པ་རི་ཡཱ་ཡེ་ན ཨ་རཱུ་པཱ་ཝ་ཙ་རཱ་ཏི ཨ་ཡ་མེ་ཏྠ བྷཱུ་མི་ཝི་བྷཱ་གོ.

ཝི་ཝེ་ཀ་ཏོཏི ཨེ་ཏྠ ཝི་ཝེ་ཀོ་ཏི ཝི་ཝི་ཏྟ་ཏཱ, སྭཱ་ཡཾ པ་ཉྩ་ཝི་དྷོ ཏ་ད་ངྒ་ཝི་ཀྑ་མྦྷ་ན་ས་མུ་ཙྪེ་ད་པ་ཊི་པ་སྶ་དྡྷི་ནི་སྶ་ར་ཎ་ཝི་ཝེ་ཀ་ཝ་སེ་ན. ཏ་ད་ངྒ་ཝི་ཝེ་ཀོཏི ཝི་པ་སྶ་ནཱ, ཝི་ཀྑ་མྦྷ་ན་ཝི་ཝེ་ཀོཏི ཨ་ཊྛ ས་མཱ་པ་ཏྟི་ཡོ, ས་མུ་ཙྪེ་ད་ཝི་ཝེ་ཀོཏི མ་གྒོ, པ་ཊི་པ་སྶ་དྡྷི་ཝི་ཝེ་ཀོཏི ཕ་ལཾ, ནི་སྶ་ར་ཎ་ཝི་ཝེ་ཀོཏི ས་བྦ་ནི་མི་ཏྟ་ནི་སྶ་ཊཾ ནི་བྦཱ་ནཾ. ཏ་ཏྲི་མེ ཏ་ད་ངྒ་ས་མུ་ཙྪེ་ད་པ་ཊི་པ་སྶ་དྡྷི་ནི་སྶ་ར་ཎ་ཝི་ཝེ་ཀ་ནི་སྶི་ཏཱ ཧོ་ནྟི. ཏ་ཐཱ ཧེ་ཏེ ཝི་པ་སྶ་ནཱ་ཀྑ་ཎེ ཀི་ཙྩ་ཏོ ཏ་ད་ངྒ་ཝི་ཝེ་ཀ་ནི་སྶི་ཏཱ, ཨ་ཛ྄ཛྷཱ་ས་ཡ་ཏོ ནི་སྶ་ར་ཎ་ཝི་ཝེ་ཀ་ནི་སྶི་ཏཱ. མ་གྒ་ཀཱ་ལེ པ་ན ཀི་ཙྩ་ཏོ ས་མུ་ཙྪེ་ད་ཝི་ཝེ་ཀ་ནི་སྶི་ཏཱ, ཨཱ་ར་མྨ་ཎ་ཏོ ནི་སྶ་ར་ཎ་ཝི་ཝེ་ཀ་ནི་སྶི་ཏཱ, ཕ་ལ་ཀྑ་ཎེ ཀི་ཙྩ་ཏོ པ་ཊི་པ་སྶ་དྡྷི་ཝི་ཝེ་ཀ་ནི་སྶི་ཏཱ. ཨཱ་ར་མྨ་ཎ་ཏོ ནི་སྶ་ར་ཎ་ཝི་ཝེ་ཀ་ནི་སྶི་ཏཱ ཙ ཧོ་ནྟི. ཀེ་ས་ཉྩི ཐེ་རཱ་ནཾ མ་ཏེ ཝི་པ་སྶ་ནཱ་པཱ་ད་ཀ་རཱུ་པཱ་ཝ་ཙ་ར་ཛ྄ཛྷཱ་ན་ཀྑ་ཎེ ཝི་ཀྑ་མྦྷ་ན་ཝི་ཝེ་ཀ་ནི་སྶི་ཏཱ་ཝཱ་ཏི པ་ཉྩ་ཝི་ཝེ་ཀ་ནི་སྶི་ཏཱ་པི ཧོ་ནྟཱི་ཏི ཨ་ཡ་མེ་ཏྠ ཝི་ཝེ་ཀོ. ཨེ་ཝཾ ཝི་ཉྙེ་ཡྻོ པཱ་ལི༹་མུ་ཏྟ་ཝི་ནི་ཙྪ་ཡོ.

བོ་ཛ྄ཛྷ་ངྒ་ཝི་བྷ་ངྒ་མཱ་ཏི་ཀ་ཏྠ་ཝ་ཎྞ་ནཱ ནི་ཊྛི་ཏཱ.