པ་ཙྩ་ཡཱ་ཀཱ་ར་ཝི་བྷ་ངྒ་མཱ་ཏི་ཀ་ཏྠ་ཝ་ཎྞ་ནཱ
པ་ཙྩ་ཡཱ་ཀཱ་ར་ཝི་བྷ་ངྒ་མཱ་ཏི་ཀཱ་ཡ པ་ན ཨ་ཏྠ་ཏོ ཏཱ་ཝ – ཨ་ཝི་ཛྫཱ་པ་ཙྩ་ཡཱཏི་ཨཱ་དཱི་སུ ཨ་ཝི་ནྡི་ཡཾ ཀཱ་ཡ་དུ་ཙྩ་རི་ཏཱ་དིཾ ཝི་ནྡ་ཏི པ་ཊི་ལ་བྷ་ཏི, ཝི་ནྡི་ཡཾ ཝཱ ཀཱ་ཡ་སུ་ཙ་རི་ཏཱ་དིཾ ན ཝི་ནྡ་ཏི, དྷ་མྨཱ་ནཾ ཝཱ ཡ་ཐཱ་ས་བྷཱ་ཝཾ ཨ་ཝི་དི་ཏཾ ཀ་རོ་ཏི, ཨ་ནྟ་ཝི་ར་ཧི་ཏེ ཝཱ སཾ་སཱ་རེ ས་ཏྟེ ཛ་ཝཱ་པེ་ཏི, ཨ་ཝི་ཛྫ་མཱ་ནེ་སུ ཝཱ ཛ་ཝ་ཏི, ཝི་ཛྫ་མཱ་ནེ་སུ ཝཱ ན ཛ་ཝ་ཏཱི་ཏི ཨ་ཝི་ཛྫཱ. པ་ཊི་ཙྩ ཕ་ལ་མེ་ཏི ཨེ་ཏ་སྨཱ་ཏི པ་ཙྩ་ཡོ, དྷ་མྨཱ་ནཾ ཨུ་པྤ་ཏྟི་ཡཱ, ཋི་ཏི་ཡཱ ཙ ཨུ་པ་ཀཱ་ར་ཀོ དྷ་མྨོ. ཨ་ཝི་ཛྫཱ ཙ སཱ པ་ཙྩ་ཡོ ཙཱ་ཏི ཨ་ཝི་ཛྫཱ་པ་ཙྩ་ཡོ, ཏ་སྨཱ ཨ་ཝི་ཛྫཱ་པ་ཙྩ་ཡཱ. ས་ངྑ་ཏ་མ་བྷི་ས་ངྑ་རོ་ནྟཱི་ཏི ས་ངྑཱ་རཱ.
ཨི་ཏོ པ་རཾ ས་ངྑཱ་ར་པ་ཙྩ་ཡཱ ཝི་ཉྙཱ་ཎནྟི་ཨཱ་དཱི་སུ ཝུ་ཏྟཾ ཝུ་ཏྟ་ན་ཡེ་ནེ་ཝ ཝེ་དི་ཏ་བྦཾ. ཨ་ཝུ་ཏྟེ་སུ པ་ན ཝི་ཛཱ་ནཱ་ཏཱི་ཏི ཝི་ཉྙཱ་ཎཾ. ན་མ་ཏཱི་ཏི ནཱ་མཾ, རུ་པྤ་ཏཱི་ཏི རཱུ་པཾ, ནཱ་མ་ཉྩ རཱུ་པ་ཉྩ ནཱ་མ་རཱུ་པ་ཉྩ ནཱ་མ་རཱུ་པནྟི ཨེ་ཀ་དེ་ས་ས་རཱུ་པེ་ཀ་སེ་ས་ན་ཡེ་ན ཝེ་དི་ཏ་བྦཾ. ཨཱ་ཡེ ཏ་ནོ་ཏི, ཨཱ་ཡ་ཏ་ཉྩ ན་ཡ་ཏཱི་ཏི ཨཱ་ཡ་ཏ་ནཾ, ཚ་ཊྛཱ་ཡ་ཏ་ན་ཉྩ ས་ལཱ༹་ཡ་ཏ་ན་ཉྩ ས་ལཱ༹་ཡ་ཏ་ནནྟི ཨེ་ཀ་སེ་ས་ན་ཡེ་ན ཝེ་དི་ཏ་བྦཾ. ཕུ་ས་ཏཱི་ཏི ཕ་སྶོ. ཝེ་ད་ཡ་ཏཱི་ཏི ཝེ་ད་ནཱ. པ་རི་ཏ་སྶ་ཏཱི་ཏི ཏ་ཎྷཱ. ཨུ་པཱ་དི་ཡ་ཏཱི་ཏི ཨུ་པཱ་དཱ་ནཾ. བྷ་ཝ་ཏི, བྷཱ་ཝ་ཡ་ཏི ཙཱ་ཏི བྷ་ཝོ. ཛ་ན་ནཾ ཛཱ་ཏི. ཛཱི་ར་ཎཾ ཛ་རཱ. མ་ར་ནྟི ཨེ་ཏེ་ནཱ་ཏི མ་ར་ཎཾ. སོ་ཙ་ནཾ སོ་ཀོ. པ་རི་དེ་ཝ་ནཾ པ་རི་དེ་ཝོ. དུ་ཀྑ་ཡ་ཏི, ཨུ་པྤཱ་ད་ཊྛི་ཏི་ཝ་སེ་ན དྭི་དྷཱ ཁ་ཎ་ཏཱི་ཏི་པི དུ་ཀྑཾ. དུ་མྨ་ན་སྶ བྷཱ་ཝོ དོ་མ་ན་སྶཾ. བྷུ་སོ ཨཱ་ཡཱ་སོ ཨུ་པཱ་ཡཱ་སོ. ས་མྦྷ་ཝ་ནྟཱིཏི ནི་བྦ་ཏྟ་ནྟི. ན ཀེ་ཝ་ལ་ཉྩ སོ་ཀཱ་དཱི་ཧེ་ཝ, ཨ་ཐ ཁོ ཨ་ཝི་ཛྫཱ་པ་ཙྩ་ཡཱ ས་ངྑཱ་རཱ ས་མྦྷ་ཝ་ནྟཱི་ཏི་ཨཱ་དི་ནཱ ས་བྦ་པ་དེ་ཧི་པི ས་མྦྷ་ཝ་ནྟི-ས་དྡ་སྶ ཡོ་ཛ་ནཱ ཀཱ་ཏ་བྦཱ. ཨེ་ཝཾ ཧི པ་ཙྩ་ཡ་པ་ཙྩ་ཡུ་པྤ་ནྣ་ཝ་ཝ་ཏྠཱ་ནཾ ཀ་ཏཾ ཧོ་ཏི.
ཨེ་ཝནྟི ནི་དྡི་ཊྛ་ན་ཡ་ནི་ད་སྶ་ནཾ, ཏེ་ན ཨ་ཝི་ཛྫཱ་དཱི་ཧེ་ཝ ཀཱ་ར་ཎེ་ཧི, ན ཨི་སྶ་ར་ནི་མྨཱ་ནཱ་དཱི་ཧཱི་ཏི ད་སྶེ་ཏི. ཨེ་ཏ་སྶཱཏི ཡ་ཐཱ་ཝུ་ཏྟ་སྶ. ཀེ་ཝ་ལ་སྶཱཏི ཨ་ས་མྨི་སྶ་སྶ, ས་ཀ་ལ་སྶ ཝཱ, དུ་ཀྑ་ཀྑ་ནྡྷ་སྶཱཏི དུ་ཀྑ་ས་མཱུ་ཧ་སྶ, ན ས་ཏྟ་སྶ, ན སུ་ཁ་སུ་བྷཱ་དཱི་ནཾ. ས་མུ་ད་ཡོཏི ནི་བྦ་ཏྟི, ཧོ་ཏཱིཏི ས་མྦྷ་ཝ་ཏི. ཨ་ཡཾ ཏཱ་ཝེ་ཏྠ པ་ད་ཏྠོ.
དྷ་མྨ་བྷེ་ད་ཏོ པ་ནེ་ཏྠ ཨ་ཝི་ཛྫཱཏི སུ་ཏྟ་ནྟ་པ་རི་ཡཱ་ཡེ་ན དུ་ཀྑཱ་དཱི་སུ ཙ་ཏཱུ་སུ, ཨ་བྷི་དྷ་མྨ་པ་རི་ཡཱ་ཡེ་ན པུ་བྦ་ནྟཱ་དཱི་ཧི ས་དྡྷིཾ ཨ་ཊྛ་སུ ཝཱ ཋཱ་ནེ་སུ ཨ་ཉྙཱ་ཎཾ. ས་ངྑཱ་རཱ པ་ན པུ་ཉྙཱ་པུ་ཉྙཱ་ནེ་ཉྫཱ་བྷི་ས་ངྑཱ་རཱ ཏ་ཡོ, ཀཱ་ཡ་ཝ་ཙཱི་ཙི་ཏྟ་ས་ངྑཱ་རཱ ཏ་ཡོ ཙཱ་ཏི ཚ་བྦི་དྷཱ. ཏ་ཏྠ ཨ་ཊྛ ཀཱ་མཱ་ཝ་ཙ་ར་ཀུ་ས་ལ་ཙེ་ཏ་ནཱ, པ་ཉྩ རཱུ་པཱ་ཝ་ཙ་ར་ཀུ་ས་ལ་ཙེ་ཏ་ནཱ ཙེ་ཏི ཏེ་ར་ས ཙེ་ཏ་ནཱ པུ་ཉྙཱ་བྷི་ས་ངྑཱ་རོ ནཱ་མ. དྭཱ་ད་ས ཨ་ཀུ་ས་ལ་ཙེ་ཏ་ནཱ ཨ་པུ་ཉྙཱ་བྷི་ས་ངྑཱ་རོ ནཱ་མ. ཙ་ཏ་སྶོ ཨ་རཱུ་པཱ་ཝ་ཙ་ར་ཀུ་ས་ལ་ཙེ་ཏ་ནཱ ཨཱ་ནེ་ཉྫཱ་བྷི་ས་ངྑཱ་རོ ནཱ་མ. ཨི་མེ་སཾ པ་ན ཏི་ཎྞཾ ས་ངྑཱ་རཱ་ནཾ ཨེ་ཝ དྭཱ་ར་ཏོ པ་ཝ་ཏྟི་ད་སྶ་ན་ཏྠཾ ཨ་ཡཾ ས་ངྑཱ་རཱ་དི་ཏྟི་ཀོ ཝུ་ཏྟོ.
ཨ་ཊྛ ཀཱ་མཱ་ཝ་ཙ་ར་ཀུ་ས་ལ་ཙེ་ཏ་ནཱ ཙེ་ཝ དྭཱ་ད་སཱ་ཀུ་ས་ལ་ཙེ་ཏ་ནཱ ཙ ཀཱ་ཡ་དྭཱ་རེ པ་ཝ་ཏྟི་ཡཾ ཀཱ་ཡ་ས་ངྑཱ་རོ, ཝ་ཙཱི་དྭཱ་རེ པ་ཝ་ཏྟི་ཡཾ ཝ་ཙཱི་ས་ངྑཱ་རོ, ཨེ་ཏཱ ཙེ་ཝ མ་ནོ་དྭཱ་རེ པ་ཝ་ཏྟི་ཡཾ, མ་ནོ་དྭཱ་རེ ཨེ་ཝ པ་ཝ་ཏྟ་ན་ཀཱ རཱུ་པཱ་རཱུ་པ་ཀུ་ས་ལ་ཙེ་ཏ་ནཱ ཙ ཙི་ཏྟ་ས་ངྑཱ་རོཏི ཝུ་ཙྩ་ནྟི. ཨ་བྷི་ཉྙཱ་ཙེ་ཏ་ནཱ, པ་ནེ་ཏྠ ཨུ་དྡྷ་ཙྩ་ཙེ་ཏ་ནཱ ཙ པ་ར་ཏོ པ་ཊི་ས་ནྡྷི་ཝི་ཉྙཱ་ཎ་པ་ཙྩ་ཡ་བྷཱ་ཝེ ཨ་པ་ནེ་ཏ་བྦཱ་པི ཨ་ཝི་ཛྫཱ་པ་ཙྩ་ཡཱ ས་མྦྷ་ཝ་ཏོ ཨི་དྷ ག་ཧེ་ཏ་བྦཱ་ཝཱ་ཏི ཨ་ཡཾ ཏི་ཀོ པུ་རི་མ་ཏྟི་ཀ་མེ་ཝ པ་ཝི་ས་ཏཱི་ཏི ཨ་ཏྠ་ཏོ ལོ་ཀི་ཡ་ཀུ་ས་ལཱ་ཀུ་ས་ལ་ཙེ་ཏ་ནཱ་ཝ ཨ་ཝི་ཛྫཱ་པ་ཙྩ་ཡཱ ས་ངྑཱ་རཱ་ཏི ཝེ་དི་ཏ་བྦཾ. ཨི་ད་ཉྩ སུ་ཏྟ་ནྟ་བྷཱ་ཛ་ནཱི་ཡ་ན་ཡེ་ན, ཨ་བྷི་དྷ་མྨ་བྷཱ་ཛ་ནཱི་ཡ་ན་ཡེ་ན པ་ན ལོ་ཀི་ཡ་ལོ་ཀུ་ཏྟ་རེ ཨེ་ཀེ་ཀ་ཙི་ཏྟ་ཀྑ་ཎེ དྭཱ་ད་ས་ངྒ་སྶ པ་ཊི་ཙྩ་ས་མུ་པྤཱ་ད་སྶ ག་ཧ་ཎ་ཏོ ས་བྦཱ་པི ཙེ་ཏ་ནཱ ས་ངྑཱ་རཱཏི ཝེ་དི་ཏ་བྦཾ. ཨེ་ཝཾ ཝི་ཉྙཱ་ཎ་ནཱ་མ་རཱུ་པཱ་དཱི་སུ་པི ས་བྦ་ཙི་ཏྟ་ས་མྤ་ཡུ་ཏྟ་ཝ་སེ་ན ཙ དྷ་མྨ་བྷེ་དོ ཝེ་དི་ཏ་བྦོ. སུ་ཏྟ་ནྟ་བྷཱ་ཛ་ནཱི་ཡ་ན་ཡེ་ནེ་ཝ པ་ན ད་སྶ་ཡི་སྶཱ་མ.
ས་ངྑཱ་ར་པ་ཙྩ་ཡཱ ཝི་ཉྙཱ་ཎ་ཉྩ ཙ་ཀྑུ་ཝི་ཉྙཱ་ཎཱ་དི་ཚ་བྦི་དྷཾ བཱ་ཏྟིཾ་ས་ལོ་ཀི་ཡ་ཝི་པཱ་ཀ་ཝི་ཉྙཱ་ཎ་མེ་ཝ ཧོ་ཏི, ལོ་ཀུ་ཏྟ་རཱ་ནི པ་ན ཝ་ཊྚ་ཀ་ཐཱ་ཡ ན ཡུ་ཛྫ་ནྟཱི་ཏི ན ག་ཧི་ཏཱ་ནི. ཝི་ཉྙཱ་ཎ་པ་ཙྩ་ཡཱ ནཱ་མ་རཱུ་པཾ པ་ན ས་བྦ་ལོ་ཀི་ཡ་ཝི་ཉྙཱ་ཎ་ས་མྤ་ཡུ་ཏྟཱ ཏ་ཡོ ཨ་རཱུ་པི་ནོ ཁ་ནྡྷཱ. རཱུ་པཾ ས་བྦཱ་ནི བྷཱུ་ཏུ་པཱ་དཱ་ཡ་རཱུ་པཱ་ནི. ས་ལཱ༹་ཡ་ཏ་ནཾ མ་ན་ཙྪ་ཊྛཱ་ནི ཨི་ནྡྲི་ཡཱ་ནི. ཕ་སྶོ ཙ་ཀྑུ་ས་མྥ་སྶཱ་དི་ཀོ ཚ་ཝི་པཱ་ཀ་ཕ་སྶོ, ཏ་ཐཱ ཝེ་ད་ནཱ་པི. ཏ་ཎྷཱ རཱུ་པ་ཏ་ཎྷཱ་དི་བྷེ་ད་ཏོ ཚ་བྦི་དྷོ ལོ་བྷོ. ཨུ་པཱ་དཱ་ནཾ ཀཱ་མུ་པཱ་དཱ་ནཱ་དི་ཏོ ཙ་ཏུ་བྦི་དྷཱ ལོ་བྷ་དི་ཊྛི་ཡོ་ཝ. བྷ་ཝོ པ་ན དུ་ཝི་དྷོ ཀ་མྨ་བྷ་ཝོ, ཨུ་པ་པ་ཏྟི་བྷ་ཝོ་ཏི. ཏ་ཏྠ ཀ་མྨ་བྷ་ཝོ ཏེ་བྷཱུ་མ་ཀ་ཀུ་ས་ལཱ་ཀུ་ས་ལ་ཙེ་ཏ་ནཱ ཙ ཏཾ་ས་མྤ་ཡུ་ཏྟཱ ཨ་བྷི་ཛ྄ཛྷཱ་ད་ཡོ ཙ. ཨུ་པ་པ་ཏྟི་བྷ་ཝོ པ་ན ཀ་མྨཱ་བྷི་ནི་བྦ་ཏྟཱ པ་ཉྩ་པི ཁ་ནྡྷཱ. སོ པ་བྷེ་ད་ཏོ ཀཱ་མ་རཱུ་པཱ་རཱུ་པ་བྷ་ཝཱ ཏ་ཡོ, ས་ཉྙཱ ཨ་ས་ཉྙཱ ནེ་ཝ་ས་ཉྙཱ་ནཱ་ས་ཉྙཱ བྷ་ཝཱ ཏ་ཡོ, ཨེ་ཀ་ཙ་ཏུ་པ་ཉྩ་ཝོ་ཀཱ་ར་བྷ་ཝཱ ཏ་ཡོ་ཏི ན་ཝ་ཝི་དྷོ ནི་དྡི་ཊྛོ. ཛཱ་ཏི་ཨཱ་དཱི་ནི པུ་བྦེ ཝུ་ཏྟཱ་ནི. ཏེ་སུ ཛཱ་ཏི་གྒ་ཧ་ཎེ་ན ཝི་ཉྙཱ་ཎ་ནཱ་མ་རཱུ་པ་ས་ལཱ༹་ཡ་ཏ་ན་ཕ་སྶ་ཝེ་ད་ནཱ་ཝ ག་ཧི་ཏཱ ཏ་ད་ཝི་ནཱ་བྷཱ་ཝ་ཏོ. ཏ་ཐཱ ཛ་རཱ་མ་ར་ཎ་གྒ་ཧ་ཎེ་ནཱ་པི ཏེ་ས་ཉྙེ་ཝ པཱ་ཀ་བྷེ་ད་ཏྟཱ. སོ་ཀཱ་ད་ཡོ པ་ན ཛ་རཱ་མ་ར་ཎེ་ན དྭཱ་ད་ས་མེ་ན ཨ་ངྒེ་ན ཨེ་ཀ་ས་ངྑེ་པཾ ཀ་ཏྭཱ ཝུ་ཏྟཱ, ན ཝི་སུཾ ཨ་ངྒ་བྷཱ་ཝེ་ན. ཀི་མ་ཏྠ་ནྟི ཙེ? བྷ་ཝ་ཙ་ཀྐ་སྶ ཨ་ཝི་ཙྪེ་ད་ད་སྶ་ན་ཏྠཾ. སོ་ཀཱ་དི་ཏོ ཧི ཨ་ཝི་ཛྫཱ སི་དྡྷཱ ཧོ་ཏི ཨ་ཝི་ཛྫཱ་ཝི་པྤ་ཡོ་ག་ཏོ, ཨ་ཝི་ཛྫཱ་ས་མུ་པྤ་ཏྟི་ཏོ ཙ. ཛ་རཱ་མ་ར་ཎ་བྦྷཱ་ཧ་ཏ་སྶ ཧི བཱ་ལ་སྶེ་ཝ ཏེ ས་མྦྷ་ཝ་ནྟི, ཏེ་ཧི ཙ ཨ་ཝི་ཛྫཱ་ཡ སི་དྡྷཱ་ཡ པུ་ན ཨ་ཝི་ཛྫཱ་པ་ཙྩ་ཡཱ ས་ངྑཱ་རཱ་ཏི ཨེ་ཝཾ ཧེ་ཏུ་ཕ་ལ་པ་ར་མྤ་རཱ་ཡ བྷ་ཝ་ཙ་ཀྐཾ ཨ་ཝི་ཙྪི་ནྣཾ, ཨ་ནཱ་དི་ཀཾ, ཨ་པ་རི་ཡ་ནྟཾ, ཨ་པ་རི་ཡོ་སཱ་ན་ཉྩ ཧོ་ཏི.
ཡ་དི ཨེ་ཝཾ, ཀ་སྨཱ ཨ་ཝི་ཛྫཱ ཨཱ་དི་ཏོ ཝུ་ཏྟཱ་ཏི? པ་དྷཱ་ན་ད་སྶ་ན་ཏྠཾ པ་ན ཨཱ་དི་ཏོ ཝུ་ཏྟཱ. ཏི་ཎྞཾ ཧི ཝ་ཊྚཱ་ནཾ ཨ་ཝི་ཛྫཱ པ་དྷཱ་ནོ ཧེ་ཏུ ཏ་སྶཱ བྷཱ་ཝེ བྷཱ་ཝ་ཏོ, ནི་རོ་དྷེ་ན ཙ ནི་རུ་ཛ྄ཛྷ་ན་ཏོ. ཨེ་ཝཾ ཨ་ཝི་ཛྫཱ་དཱི་ཧི དྭཱ་ད་ས་ཧི ཨ་ངྒེ་ཧི སུ་ཏྟ་ནྟ་བྷཱ་ཛ་ནཱི་ཡ་ན་ཡེ་ན ས་བྦེ ལོ་ཀི་ཡ་དྷ་མྨཱ་ཝ པ་ཙྩ་ཡ་པ་ཙྩ་ཡུ་པྤ་ནྣ་བྷཱ་ཝེ་ན ཝུ་ཏྟཱ་ཏི ཝེ་དི་ཏ་བྦཱ. ཨ་བྷི་དྷ་མྨ་པ་རི་ཡཱ་ཡེ་ན པ་ན ལོ་ཀུ་ཏྟ་རཱ་པཱི་ཏི ཨ་ཡ་མེ་ཏྠ དྷ་མྨ་བྷེ་དོ.
ཝི་བྷ་ངྒ་ན་ཡ་ཏོ པ་ནེ་ཏྠ པ་ཉྷཱ་པུ་ཙྪ་ཀ་ན་ཡོ ན་ཏྠི, སུ་ཏྟ་ནྟ་བྷཱ་ཛ་ནཱི་ཡ་ན་ཡཱ་པི དྷ་མྨ་བྷེ་དེ ཝུ་ཏྟ་ན་ཡེ་ནེ་ཝ ཝི་ཏྠཱ་ར་ཏོ ཝི་བྷ་ཏྟཱ་ཏི ཝེ་དི་ཏ་བྦོ. ཨ་བྷི་དྷ་མྨ་བྷཱ་ཛ་ནཱི་ཡེ པ་ན –
‘‘ཨ་ཝི་ཛྫཱ་པ་ཙྩ་ཡཱ ས་ངྑཱ་རོ, ས་ངྑཱ་ར་པ་ཙྩ་ཡཱ ཝི་ཉྙཱ་ཎཾ, ཝི་ཉྙཱ་ཎ་པ་ཙྩ་ཡཱ ནཱ་མཾ, ནཱ་མ་པ་ཙྩ་ཡཱ ཚ་ཊྛཱ་ཡ་ཏ་ནཾ, ཚ་ཊྛཱ་ཡ་ཏ་ན་པ་ཙྩ་ཡཱ ཕ་སྶོ, ཕ་སྶ་པ་ཙྩ་ཡཱ ཝེ་ད་ནཱ, ཝེ་ད་ནཱ་པ་ཙྩ་ཡཱ ཏ་ཎྷཱ, ཏ་ཎྷཱ་པ་ཙྩ་ཡཱ ཨུ་པཱ་དཱ་ནཾ, ཨུ་པཱ་དཱ་ན་པ་ཙྩ་ཡཱ བྷ་ཝོ, བྷ་ཝ་པ་ཙྩ་ཡཱ ཛཱ་ཏི, ཛཱ་ཏི་པ་ཙྩ་ཡཱ ཛ་རཱ་མ་ར་ཎཾ, ཨེ་ཝ་མེ་ཏ་སྶ ཀེ་ཝ་ལ་སྶ དུ་ཀྑ་ཀྑ་ནྡྷ་སྶ ས་མུ་ད་ཡོ ཧོ་ཏི.
‘‘ཨ་ཝི་ཛྫཱ་པ་ཙྩ་ཡཱ ས་ངྑཱ་རོ…པེ… ཝི་ཉྙཱ་ཎ་པ་ཙྩ་ཡཱ ནཱ་མཾ, ནཱ་མ་པ་ཙྩ་ཡཱ ཕ་སྶོ…པེ… ས་མུ་ད་ཡོ ཧོ་ཏི.
‘‘ཨ་ཝི་ཛྫཱ་པ་ཙྩ་ཡཱ…པེ… ཝི་ཉྙཱ་ཎ་པ་ཙྩ་ཡཱ ནཱ་མ་རཱུ་པཾ, ནཱ་མ་རཱུ་པ་པ་ཙྩ་ཡཱ ཚ་ཊྛཱ་ཡ་ཏ་ནཾ, ཚ་ཊྛཱ་ཡ་ཏ་ན་པ་ཙྩ་ཡཱ ཕ་སྶོ…པེ… ས་མུ་ད་ཡོ ཧོ་ཏི.
‘‘ཨ་ཝི་ཛྫཱ་པ་ཙྩ་ཡཱ …པེ… ཝི་ཉྙཱ་ཎ་པ་ཙྩ་ཡཱ ནཱ་མ་རཱུ་པཾ, ནཱ་མ་རཱུ་པ་པ་ཙྩ་ཡཱ ས་ལཱ༹་ཡ་ཏ་ནཾ, ཚ་ཊྛཱ་ཡ་ཏ་ན་པ་ཙྩ་ཡཱ ཕ་སྶོ…པེ… ས་མུ་ད་ཡོ ཧོ་ཏཱི’’ཏི (ཝི་བྷ. ༢༤༣) –
ཨེ་ཝཾ པ་ཙྩ་ཡ་ཙ་ཏུ་ཀྐཾ, པུ་ན ‘‘ཨ་ཝི་ཛྫཱ་པ་ཙྩ་ཡཱ ས་ངྑཱ་རོ ཨ་ཝི་ཛྫཱ་ཧེ་ཏུ་ཀོ’’ཏི་ཨཱ་དི་ནཱ (ཝི་བྷ. ༢༤༤) ཝུ་ཏྟ་ན་ཡེ་ནེ་ཝ ཧེ་ཏུ་ཙ་ཏུ་ཀྐཾ, པུ་ན ‘‘ཨ་ཝི་ཛྫཱ་པ་ཙྩ་ཡཱ ས་ངྑཱ་རོ ཨ་ཝི་ཛྫཱ་ས་མྤ་ཡུ་ཏྟོ’’ཏི་ཨཱ་དི་ནཱ (ཝི་བྷ. ༢༤༥) ས་མྤ་ཡུ་ཏྟ་ཙ་ཏུ་ཀྐཾ, པུ་ན ‘‘ཨ་ཝི་ཛྫཱ་པ་ཙྩ་ཡཱ ས་ངྑཱ་རོ, ས་ངྑཱ་ར་པ་ཙྩ་ཡཱ་པི ཨ་ཝི་ཛྫཱ’’ཏི་ཨཱ་དི་ནཱ (ཝི་བྷ. ༢༤༦) ཨ་ཉྙ་མ་ཉྙ་པ་ཙྩ་ཡ་ཙ་ཏུ་ཀྐ་ནྟི ཨེ་ཝཾ ཨ་ཝི་ཛྫཱ་མཱུ་ལ་ཀཱ་ནི ཙ་ཏྟཱ་རི ཙ་ཏུ་ཀྐཱ་ནི ཝུ་ཏྟཱ་ནི. ཨེ་ཝཾ ‘‘ས་ངྑཱ་ར་པ་ཙྩ་ཡཱ ཨ་ཝི་ཛྫཱ’’ཏི་ཨཱ་དི་ནཱ ས་ངྑཱ་རཱ་དི་མཱུ་ལ་ཀཱ་དི་ཨུ་པཱ་དཱ་ན་མཱུ་ལ་ཀ་པ་རི་ཡོ་སཱ་ནཱ་ནི ཨ་ཊྛ་སུ པ་དེ་སུ ཙ་ཏྟཱ་རི ཙ་ཏྟཱ་རི ཙ་ཏུ་ཀྐཱ་ནཱི་ཏི བཱ་ཏྟིཾ་ས ཙ་ཏུ་ཀྐཱ་ནི མཱ་ཏི་ཀཾ ཀ་ཏྭཱ ནི་ཀྑི་པི་ཏྭཱ པུ་ན ཨ་ཀུ་ས་ལ་ཀུ་ས་ལ་ཝི་པཱ་ཀ་ཀི་རི་ཡ་ཙི་ཏྟེ་སུ ལོ་ཀི་ཡ་ལོ་ཀུ་ཏྟ་རེ་སུ ཨེ་ཀེ་ཀ་སྨིཾ ཙི་ཏྟེ ཡ་ཐཱ་ནི་ཀྑི་ཏྟེ་ཧི ཚ་ཏྟིཾ་ས་བཱ་ཏྟིཾ་ས་མཱ་ཏི་ཀཱ་ཙ་ཏུ་ཀྐེ་ཧི ཝི་ཏྠཱ་ར་ཏོ ཡ་ཐཱ་ནུ་རཱུ་པཾ པ་ཙྩ་ཡཱ་ཀཱ་རོ ཝི་བྷ་ཏྟོ. ཨི་ད་ཉྩ ཡ་སྨཱ ན ཀེ་ཝ་ལཾ ཨ་ཡཾ པ་ཙྩ་ཡཱ་ཀཱ་རོ ནཱ་ནཱ་ཙི་ཏྟེ་སུ ཨེ་ཝ ཧོ་ཏི, ཨེ་ཀ་ཙི་ཏྟེ་པི ཧོ་ཏི་ཡེ་ཝ. ནཱ་པི ཝ་ཊྚ་ཙི་ཏྟེ ཨེ་ཝ ཧོ་ཏི, ཏ་ཎྷཱ་བྷཱ་ཝ་ཏོ ཝི་ཝ་ཊྚ་ཙི་ཏྟེ་པི, ཏ་སྨཱ ཏཾ ནི་པྤ་དེ་ས་ཏོ ཨེ་ཀ་ཙི་ཏྟ་ཀྑ་ཎི་ཀཾ པ་ཙྩ་ཡཱ་ཀཱ་རཾ ད་སྶེ་ཏུཾ ཝུ་ཏྟཾ. ཏེ་ནེ་ཝ ཧེ་ཏྠ ‘‘ཨ་ཝི་ཛྫཱ་པ་ཙྩ་ཡཱ ས་ངྑཱ་རཱ’’ཏི ཨ་ཝ་ཏྭཱ ‘‘ཨ་ཝི་ཛྫཱ་པ་ཙྩ་ཡཱ ས་ངྑཱ་རོ’’ཏི ཨེ་ཀ་ཝ་ཙ་ནེ་ན ཝུ་ཏྟཾ ཨེ་ཀ་ཙི་ཏྟ་ཀྑ་ཎེ བ་ཧུ་ཙེ་ཏ་ནཱ་བྷཱ་ཝཱ. ཏ་ཏྠ ཡ་དེ་ཏཾ པ་ཋ་མ་ཙ་ཏུ་ཀྐཾ, ཏ་ཏྠ པ་ཋ་མ་ཝཱ་རོ ནཱ་མ་རཱུ་པ་ཊྛཱ་ནེ ནཱ་མཾ, ས་ལཱ༹་ཡ་ཏ་ན་ཊྛཱ་ནེ ཚ་ཊྛཱ་ཡ་ཏ་ན་ཉྩ ག་ཧེ་ཏྭཱ རཱུ་པཱ་རཱུ་པཱ་དི་ས་བྦ་བྷ་ཝ་སཱ་དྷཱ་ར་ཎ་ཝ་སེ་ན, ཨེ་ཀ་ཙི་ཏྟ་ཀྑ་ཎ་པ་རི་ཡཱ་པ་ནྣ་དྷ་མྨ་གྒ་ཧ་ཎ་ཝ་སེ་ན ཙ རཱུ་པཾ ཚ་ཌྜེ་ཏྭཱ ཝུ་ཏྟོ རཱུ་པ་སྶ ས་བྦ་བྷ་ཝཱ་སཱ་དྷཱ་ར་ཎ་ཏྟཱ, བ་ཧུ་ཙི་ཏྟ་ཀྑ་ཎི་ཀ་ཏྟཱ ཙ. དུ་ཏི་ཡོ ནཱ་མ་རཱུ་པ་ཊྛཱ་ནེ ནཱ་མཾ, ‘‘ནཱ་མ་པ་ཙྩ་ཡཱ ཕ་སྶོ’’ཏི ས་ལཱ༹་ཡ་ཏ་ན་ཊྛཱ་ནེ ཕ་སྶ་མེ་ཝ ག་ཧེ་ཏྭཱ ཕ་སྶ་སྶ ས་ལཱ༹་ཡ་ཏ་ནཾ ཝི་ནཱ་པི པ་ཙྩ་ཡ་ཝི་སེ་ས་ས་མྦྷ་ཝ་ད་སྶ་ན་ཝ་སེ་ན ཙེ་ཝ མ་ཧཱ་ནི་དཱ་ན་སུ་ཏྟན་ཡ་ད་སྶ་ན་ཝ་སེ་ན (དཱི. ནི. ༢.༩༥ ཨཱ་ད་ཡོ) ཙ ཝུ་ཏྟོ. ཏ་ཏི་ཡོ ས་ལཱ༹་ཡ་ཏ་ན་ཊྛཱ་ནེ ཚ་ཊྛཱ་ཡ་ཏ་ན་མེ་ཝ ག་ཧེ་ཏྭཱ ག་བྦྷ་སེ་ཡྻ་ཀཱ་ནཾ ཨ་པ་རི་པུ་ཎྞཱ་ཡ་ཏ་ནཱ་ནཾ, རཱུ་པ་བྷ་ཝི་ཀཱ་དཱི་ན་ཉྩ ཝ་སེ་ན ཝུ་ཏྟོ. ཙ་ཏུ་ཏྠོ ‘‘ནཱ་མ་པ་ཙྩ་ཡཱ ས་ལཱ༹་ཡ་ཏ་ནཾ, ས་ལཱ༹་ཡ་ཏ་ན་པ་ཙྩ་ཡཱ ཕ་སྶོ’’ཏི ཨེ་ཝཾ ཨི་ཏ་རཱ་ཡ་ཏ་ནེ་ཧི་པི ས་ལཱ༹་ཡ་ཏ་ན་སྶ ཝི་སེ་ས་ཏོ ཕ་སྶ་པ་ཙྩ་ཡ་ཏཾ་ཝ ད་སྶེ་ཏྭཱ ཨོ་པ་པཱ་ཏི་ཀཱ་ནཾ, པ་རི་པུ་ཎྞཱ་ཡ་ཏ་ནཱ་ནཾ ཀཱ་མ་བྷ་ཝི་ཀཱ་ན་ཉྩ ཝ་སེ་ན ཝུ་ཏྟོ. ཨེ་ཝཾ དུ་ཏི་ཡ་ཙ་ཏུ་ཀྐཱ་དཱི་སུ་པི.
ས་བྦ་ཏྠཱ་པི ཙེ་ཏྠ ཡ་སྨཱ སོ་ཀཱ་ད་ཡོ ས་བྦེ ཨེ་ཀ་ཙི་ཏྟ་ཀྑ་ཎེ ན ས་མྦྷ་ཝ་ནྟི, ས་བྦ་སྨི་ཉྩ ཙི་ཏྟེ, བྷ་ཝེ ཙ ན་པྤ་ཝ་ཏྟ་ནྟི, ཏ་སྨཱ ན ག་ཧི་ཏཱ. ཛཱ་ཏི་ཛ་རཱ་མ་ར་ཎཱ་ནི པ་ནེ་ཏྠ ཨ་རཱུ་པ་དྷ་མྨཱ་ནཾ ལ་ཀྑ་ཎ་མ་ཏྟཱ་ནི, ཏཱ་ནི ཙ ཨ་ཙི་ཏྟ་ཀྑ་ཎ་མ་ཏྟཱ་ནི་པི ས་མཱ་ནཱ་ནི ཙི་ཏྟ་ཀྑ་ཎེ ཨ་ནྟོ་ག་དྷ་ཏྟཱ པ་རི་ཡཱ་ཡ་ཏོ པ་ཙྩ་ཡུ་པྤ་ནྣེ ཀ་ཏྭཱ ཨ་ངྒ་པ་རི་པཱུ་ར་ཎ་ཏྠཾ ག་ཧི་ཏཱ་ནི. བྷ་ཝོ་ཏི ཙེ་ཏྠ ཨུ་པཱ་དཱ་ནཱ་དི་པ་ཙྩ་ཡ་ཝི་ར་ཧི་ཏཱ ཙ་ཏྟཱ་རོ ཨ་རཱུ་པི་ནོ ཁ་ནྡྷཱ, ཏ་ཎྷཱ་པ་ཙྩ་ཡཱ ཨུ་པཱ་དཱ་ན་ནྟི ཨེ་ཏྠ ཀཱ་མུ་པཱ་དཱ་ནཾ ཝ་ཛྫེ་ཏྭཱ ཏཱི་ཎི ཨུ་པཱ་དཱ་ནཱ་ནི ཨེ་ཝ ག་ཧེ་ཏ་བྦཱ་ནི. དྭི་ནྣ་མྤི ཨེ་ཀ་ལ་ཀྑ་ཎཱ་ནཾ དྷ་མྨཱ་ནཾ ཨེ་ཀ་ཀྑ་ཎེ ཨ་ས་མྦྷ་ཝཱ ལོ་བྷ་མཱུ་ལ་ཝི་ར་ཧི་ཏེ་སུ དོ་ས་མོ་ཧ་མཱུ་ལེ་སུ ཙེ་ཝ ཀུ་ས་ལཱ་བྱཱ་ཀ་ཏེ་སུ ཙ ཙི་ཏྟེ་སུ ཝེ་ད་ནཱ་པ་ཙྩ་ཡཱ པ་ཊི་གྷཾ ཝི་ཙི་ཀི་ཙྪཱ ཨུ་དྡྷ་ཙྩ་ནྟི ཨེ་ཝཾ ཏ་ཎྷཱ་ཋཱ་ནེ ཡ་ཐཱ་ཡོ་གཾ པ་ཊི་གྷཱ་ད་ཡོ ཏ་ཡོ. ཏེ་སུ ཝི་ཙི་ཀི་ཙྪཱ་ཝ་ཛྫི་ཏེ་སུ ཙེ་ཝ དི་ཊྛི་ཝི་པྤ་ཡུ་ཏྟེ་སུ ཙ ཨུ་པཱ་དཱ་ན་ཊྛཱ་ནེ ཨ་དྷི་མོ་ཀྑོ ག་ཧི་ཏོ. ཝི་ཙི་ཀི་ཙྪཱ་ཡ པ་ན ས་དྡྷིཾ ཨ་དྷི་མོ་ཀྑ་སྶཱ་པི ཨ་ས་མྦྷ་ཝཱ ཝི་ཙི་ཀི་ཙྪཱ་པ་ཙྩ་ཡཱ བྷ་ཝོ་ཏི ཙ ག་ཧི་ཏོ. ཨུ་པཱ་དཱ་ན་ཊྛཱ་ནེ ཙ ཨ་དྷི་མོ་ཀྑོ ཙ ག་ཧི་ཏོ. ལོ་ཀི་ཡཱ་ན་ཉྩེ་ཏྠ ཀུ་ས་ལཱ་བྱཱ་ཀ་ཏཱ་ནཾ ཨུ་པ་ནི་སྶ་ཡ་ཝ་སེ་ན ཨ་ཝི་ཛྫཱ་པ་ཙྩ་ཡ་ཏཱ ཝུ་ཏྟཱ. ལོ་ཀུ་ཏྟ་རཱ་ནཾ པ་ན ཡ་སྨཱ ཨ་པྤ་ཧཱི་ནཱ་ཝི་ཛྫོ ཨ་ཝི་ཛྫཱ་ཡ པ་ཧཱ་ན་ཏྠཾ, པ་ཊི་པྤ་སྶ་མྦྷ་ན་ཏྠ་ཉྩ ལོ་ཀུ་ཏྟ་རཾ བྷཱ་ཝེ་ཏི, ཏ་སྨཱ ས་མ་ཏི་ཀྐ་མ་ན་ཝ་སེ་ན ཨ་ཝི་ཛྫཱ་པ་ཙྩ་ཡ་ཏཱ ཝུ་ཏྟཱ, ན ས་ཧ་ཛཱ་ཏ་ཝ་སེ་ན. ཏེ་ནེ་ཝ ཏེ་སཾ ནི་དྡེ་ས་ཝཱ་རེ་སུ ‘‘ཏ་ཏྠ ཀ་ཏ་མཱ ཨ་ཝི་ཛྫཱ’’ཏི ཨ་ཝི་བྷ་ཛི་ཏྭཱ ‘‘ཏ་ཏྠ ཀ་ཏ་མོ ཨ་ཝི་ཛྫཱ་པ་ཙྩ་ཡཱ ས་ངྑཱ་རོ’’ཏི (ཝི་བྷ. ༢༤༠) ཝི་བྷ་ཏྟཾ. ཀི་རི་ཡ་དྷ་མྨཱ་ནཾ པ་ན ཀེ་ན་ཙི པ་རི་ཡཱ་ཡེ་ན ཨ་ཝི་ཛྫཱ་མཱུ་ལ་ཀ་ཏྟཾ ན་ཏྠཱི་ཏི ‘‘ས་ངྑཱ་ར་པ་ཙྩ་ཡཱ ཝི་ཉྙཱ་ཎ’’ནྟི་ཨཱ་དི་ནཱ ས་ངྑཱ་ར་མཱུ་ལ་ཀཱ་དི་ཀོ ན་ཡོ ཝུ་ཏྟོ, ན ཨ་ཝི་ཛྫཱ་མཱུ་ལ་ཀོ. ཨ་པི་ཙ ལོ་ཀི་ཡ་ཀུ་ས་ལཱ་དཱི་སུ ཏེ་སཾ དྷ་མྨཱ་ནཾ དུ་ཀྑ་ས་ཙྩ་པ་རི་ཡཱ་པ་ནྣ་ཏྟཱ ‘‘ཨེ་ཝ་མེ་ཏ་སྶ ཀེ་ཝ་ལ་སྶ དུ་ཀྑ་ཀྑ་ནྡྷ་སྶ ས་མུ་ད་ཡོ ཧོ་ཏཱི’’ཏི (ཝི་བྷ. ༢༢༥) ཨེ་ཝཾ ཨ་པྤ་ནཱ ཀ་ཏཱ, ལོ་ཀུ་ཏྟ་ར་ཀུ་ས་ལཱ་དཱི་སུ ‘‘ཨེ་ཝ་མེ་ཏེ་སཾ དྷ་མྨཱ་ན’’ནྟི. ཨ་ཡཾ ལོ་ཀི་ཡ་ཏོ ལོ་ཀུ་ཏྟ་རཱ་ནཾ དེ་ས་ནཱ་ཡ ཝི་སེ་སོ་ཏི ཨ་ཡཾ ཨ་བྷི་དྷ་མྨ་བྷཱ་ཛ་ནཱི་ཡེ ན་ཡོ.
ཨི་དཱ་ནི པ་ཙྩ་ཡ་ན་ཡཱ, ཀཱ་ར་ཀཱ་དཱི་ཧི སུ་ཉྙ་ཏོ;
མཱུ་ལ་དྡྷ་ས་ནྡྷི་ས་ངྑེ་པཱ་ཀཱ་ར་ཝ་ཊྚ་ཝི་བྷཱ་ག་ཏོ.
ཝཱ་ར་ཎོ་པ་མ་ཏོ་པེ་ཏྠ, ག་མྦྷཱི་ར་ན་ཡ་བྷེ་ད་ཏོ;
ཡ་ཐཱ་ར་ཧཾ ཝི་ཛཱ་ནཱི་ཡོ, པཱ་ལི༹་མུ་ཏྟ་ཝི་ནི་ཙྪ་ཡོ.
ཏ་ཏྠ པ་ཙྩ་ཡ་ན་ཡོ སཱ་མ་ཉྙ་ཏོ, ཝི་སེ་ས་ཏོ ཙཱ་ཏི དུ་ཝི་དྷོ ཧོ་ཏི. ཏ་ཏྠ ཏ་བྦྷཱ་ཝ་བྷཱ་ཝི་མ་ཏྟ་ཏཱ་པ་ཀཱ་ས་ཀོ སཱ་མ་ཉྙ་ཏོ པ་ཙྩ་ཡ་ན་ཡོ. ཝི་སེ་ས་ཏོ པ་ན པ་ཊྛཱ་ནེ ཨཱ་ག་ཏེ་སུ ཧེ་ཏུ་པ་ཙྩ་ཡཱ་དི་ཙ་ཏུ་ཝཱི་ས་ཏི་ཡཱ པ་ཙྩ་ཡེ་སུ ཡ་ཐཱ་ནུ་རཱུ་པཾ པ་ཙྩ་ཡ་ཝི་སེ་སུ་པྤ་ནྣ་མ་ཏྟ་ཏཱ་པ་ཀཱ་ས་ཀོ. སཱ ཙ ནེ་སཾ ཙ་ཏུ་ཝཱི་ས་ཏི་ཡཱ པ་ཙྩ་ཡཱ་ནཾ ཝི་བྷཱ་ག་ཏཱ པ་ཊྛཱ་ན་མཱ་ཏི་ཀ་ཏྠ་སཾ་ཝ་ཎྞ་ནཱ་ཡ ཨཱ་ཝི བྷ་ཝི་སྶ་ཏི. ཏ་ཏྠ སཱ་མ་ཉྙ་ཏོ ས་ངྑཱ་རཱ་ད་ཡོ ཨ་ཝི་ཛྫཱ་དི་པ་ཙྩ་ཡ་བྷཱ་ཝེ ཨེ་ཝ བྷཱ་ཝི་ནོ་ཏི ཝེ་དི་ཏ་བྦཱ. ཡ་སྶ ཧི ཙ་ཏཱུ་སུ ས་ཙྩེ་སུ, པུ་བྦ་ནྟཱ་དཱི་སུ ཙ ཨ་ཝི་ཛྫཱ ཨ་པྤ་ཧཱི་ནཱ ཧོ་ཏི, སོ དུ་ཀྑེ ཏཱ་ཝ པུ་བྦ་ནྟཱ་དཱི་སུ ཙ ཨ་ཉྙཱ་ཎེ་ན ཏཱི་སུ བྷ་ཝེ་སུ ཛཱ་ཏི་ཛ་རཱ་རོ་ག་མ་ར་ཎཱ་དི་ཨ་ནེ་ཀཱ་དཱི་ན་ཝ་ཝོ་ཀི་ཎྞཾ པུ་ཉྙ་ཕ་ལ་ས་ངྑཱ་ཏཾ ས་ངྑཱ་ར་ཝི་པ་རི་ཎཱ་མ་དུ་ཀྑཾ དུ་ཀྑ་ཏོ ཨ་ཛཱ་ན་ནྟོ སུ་ཁ་ས་ཉྙཱ་ཡ པ་ཏྠེ་ཏྭཱ ཏཱི་ཧི དྭཱ་རེ་ཧི པུ་ཉྙཱ་ནེ་ཉྫཱ་བྷི་ས་ངྑཱ་རེ ཨཱ་ར་བྷ་ཏི. ས་མུ་ད་ཡེ ཨ་ཉྙཱ་ཎེ་ན དུ་ཀྑ་ཧེ་ཏུ་བྷཱུ་ཏེ་སུ་པི ཏ་ཎྷཱ་པ་རི་ཀྑཱ་རེ་སུ དུ་ཀྑ་ཧེ་ཏུ་ཀཾ ཨཱ་པཱ་ཡི་ཀཱ་དི་དུ་ཀྑཾ, དུ་ཀྑ་ཧེ་ཏུ་བྷཱུ་ཏེ་སུ ཀཱ་མཱུ་པ་སེ་ཝ་ནཱ་དཱི་སུ ཙ ཨཱ་དཱི་ན་ཝཾ ཨ་པ་སྶ་ནྟོ སུ་ཁ་ཧེ་ཏུ་ས་ཉྙཱ་ཡ ཙེ་ཝ ཀི་ལེ་སཱ་བྷི་བྷཱུ་ཏ་ཏཱ་ཡ ཙ ཏི་ཝི་དྷེ་པི ས་ངྑཱ་རེ ཨཱ་ར་བྷ་ཏི. ནི་རོ་དྷེ, པ་ན མ་གྒེ ཙ ཨ་ཉྙཱ་ཎེ་ན ཨ་ནི་རོ་དྷ་བྷཱུ་ཏེ ག་ཏི་ཝི་སེ་སེ ནི་རོ་དྷ་ས་ཉྙཱི, ནི་རོ་དྷ་སྶ ཙ ཝཱ ཨ་མ་གྒ་བྷཱུ་ཏེ་སུ་པི ཡ་ཉྙཱ་མ་ར་ཏ་པཱ་དཱི་སུ་པི ནི་རོ་དྷ་མ་གྒ་ས་ཉྙཱི ཧུ་ཏྭཱ ཏི་ཝི་དྷེ་པི ས་ངྑཱ་རེ ཨཱ་ར་བྷ་ཏི. ཨི་ད་པྤ་ཙྩ་ཡ་ཏཱ་པ་ཊི་ཙྩ་ས་མུ་པྤ་ནྣེ་སུ དྷ་མྨེ་སུ ཨ་ཉྙཱ་ཎེ་ན ‘‘ཨ་ཧེ་ཏཱུ ཨ་པྤ་ཙྩ་ཡཱ ས་ཏྟཱ ཨུ་པྤ་ཛྫ་ནྟི, ན ཧོ་ནྟི པ་རཾ མ་ར་ཎཱ’’ཏི ཝཱ ‘‘ཨ་ཏྟཱ་ཝ ཛཱ་ནཱ་ཏི ཝཱ ན ཛཱ་ནཱ་ཏི ཝཱ, སོ་ཝ ས་ངྑཱ་རེ ས་ངྑ་རོ་ཏི, སོ་ཝ པ་ཊི་ས་ནྡྷི་ཡཾ ཨུ་པྤ་ཛྫ་ཏི, ཏ་སྶ ཨ་ཎུ་ཨི་སྶ་རཱ་ད་ཡོ ཀ་ལ་ལཱ་དི་བྷཱ་ཝེ་ན ས་རཱི་རཾ ས་ཎྛཱ་པེ་ནྟཱ ཨི་ནྡྲི་ཡཱ་ནི ས་མྤཱ་དེ་ནྟི, སོ་ཝ ཨི་ནྡྲི་ཡ་ས་མྤ་ནྣོ ཕུ་ས་ཏི, ཝེ་ད་ཡ་ཏི, ཏ་ཎྷི་ཡ་ཏི, ཨུ་པཱ་དཱ་ནཱ་དཱི་ནི ཙ ཀ་རོ་ཏཱི’’ཏི ཝཱ ‘‘ས་བྦེ ས་ཏྟཱ ནི་ཡ་ཏི་ས་ངྒ་ཏི་བྷ་ཝ་པ་རི་ཎ་ཏཱ’’ཏི ཝཱ ཝི་ཀ་པྤེ་ཏི. སོ ཨེ་ཝཾ ཨ་ཝི་ཛྫཱ་ཡ ཨ་ནྡྷཱི་ཀ་ཏོ –
‘‘ཡ་ཐཱ་པི ནཱ་མ ཛ་ཙྩ་ནྡྷོ, ན་རོ ཨ་པ་རི་ཎཱ་ཡ་ཀོ;
ཨེ་ཀ་དཱ ཡཱ་ཏི མ་གྒེ་ན, ཨུ་མྨ་གྒེ་ནཱ་པི ཨེ་ཀ་དཱ.
‘‘སཾ་སཱ་རེ སཾ་ས་རཾ བཱ་ལོ, ཏ་ཐཱ ཨ་པ་རི་ཎཱ་ཡ་ཀོ;
ཀ་རོ་ཏི ཨེ་ཀ་དཱ པུ་ཉྙཾ, ཨ་པུ་ཉྙ་མ་པི ཨེ་ཀ་དཱ’’ཏི. (ཝི་བྷ. ཨ་ཊྛ. ༢༢༦ ས་ངྒཱ་ར་པ་ད་ནི་དྡེ་ས) –
ཝུ་ཏྟ་ན་ཡེ་ན ཏི་ཝི་དྷེ ས་ངྑཱ་རེ ཨ་བྷི་ས་ངྑ་རོ་ཏཱི་ཏི. ཀིཾ པ་ནེ་ཏྠ ཨེ་ཀཱ་ཝ ཨ་ཝི་ཛྫཱ ས་ངྑཱ་རཱ་ནཾ པ་ཙྩ་ཡོ ཧོ་ཏི, ན་ནུ ཨེ་ཀ་སྨཱ ཀཱ་ར་ཎཱ ཨེ་ཀཾ་ཝ ཀཱ་རི་ཡཾ ཨུ་པྤ་ཛྫ་ཏི, ཨ་ནེ་ཀཾ ཀཱ་རི་ཡཾ ན ཨུ་པྤ་ཛྫ་ཏི, ཨ་ནེ་ཀ་སྨཱ ཝཱ ཨེ་ཀ་ནྟི, ཨ་ནེ་ཀ་སྨཱ ཀཱ་ར་ཎཱ ཨ་ནེ་ཀཾ ཀཱ་རི་ཡཾ ཨུ་པྤ་ཛྫ་ཏཱི་ཏི? ས་ཙྩཾ, པ་དྷཱ་ན་ཏྟ་པཱ་ཀ་ཊ་ཏྟ་ཨ་སཱ་དྷཱ་ར་ཎ་ཏྟ་དཱི་པ་ན་ཏྠཾ པ་ནེ་ཏྠ ཨ་ནེ་ཀེ་སུ ཀཱ་ར་ཎེ་སུ་པི ཨེ་ཀཱ ཨ་ཝི་ཛྫཱ ཨེ་ཝ པ་ཙྩ་ཡ་བྷཱ་ཝེ་ན ནི་དྡི་ཊྛཱ ‘‘ཕ་སྶ་པ་ཙྩ་ཡཱ ཝེ་ད་ནཱ (ཨུ་དཱ. ༣), སེ་མྷ་ས་མུ་ཊྛཱ་ནཱ ཨཱ་བཱ་དྷཱ’’ཏི་ཨཱ་དཱི་སུ (ཨ. ནི. ༡༠.༦༠; མ་ཧཱ་ནི. ༥; ཙཱུ་ལ༹་ནི. ཁ་གྒ་ཝི་སཱ་ཎ་སུ་ཏྟ་ནི་དྡེ་ས ༡༢༨) ཝི་ཡ. ཨ་ཝི་ཛྫཱ ཧི པ་དྷཱ་ནོ ཧེ་ཏུ, ས་ངྑཱ་རཱ་ནཾ པཱ་ཀ་ཊོ, ཨ་སཱ་དྷཱ་ར་ཎོ ཙ ཏ་ཎྷཱ་དི་ཧེ་ཏཱུ་ན་མྤི ཧེ་ཏུ་ཏྟཱ, ན ཝ་ཏྠཱ་ར་མྨ་ཎཱ་དཱི་ནི ཁཱི་ཎཱ་ས་ཝ་སྶ ཏེ་སཾ ས་མྦྷ་ཝེ་པི ས་ངྑཱ་རཱ་ནཾ ཨ་བྷཱ་ཝཱ་ཏི. ཨེ་ཝཾ ཏཱ་ཝེ་ཏྠ ཝ་ཊྚ་ས་ངྑཱ་རཱ་ནཾ ཨ་ཝི་ཛྫཱ་ཡ ཨེ་ཝ བྷཱ་ཝེ བྷཱ་ཝོ ཝེ་དི་ཏ་བྦོ. ཏ་ཐཱ ཝི་ཉྙཱ་ཎ་སྶཱ་པི ཨུ་པ་ཙི་ཏ་ཀ་མྨཱ་བྷཱ་ཝེ ཨ་བྷཱ་ཝ་ཏོ, ས་བྦ་ཏྠ ས་བྦེ་ས་ཉྩ ས་བྦ་ཝི་པཱ་ཀ་ཝི་ཉྙཱ་ཎུ་པྤ་ཏྟི་པྤ་ས་ངྒ་ཏོ ཙ ས་ངྑཱ་རཱ་ནཾ ཨེ་ཝ བྷཱ་ཝེ བྷཱ་ཝོ ཝེ་དི་ཏ་བྦོ. ཡ་ཐཱ ཙེ་ཏྠ, ཨེ་ཝཾ ཨུ་པ་རི་པི ནཱ་མ་རཱུ་པཱ་དཱི་ནཾ ཝི་ཉྙཱ་ཎཱ་དི་བྷཱ་ཝེ བྷཱ་ཝོ ཡ་ཐཱ་ནུ་རཱུ་པཾ ཨ་ནུ་བྷ་ཝ་ཡུ་ཏྟཱི་ཧི ཉཱ་ཏ་བྦོ་ཏི ཨ་ཡཾ སཱ་མ་ཉྙ་ཏོ པ་ཙྩ་ཡ་ན་ཡོ.
ཝི་སེ་ས་ཏོ པ་ན ཨ་ཝི་ཛྫཱ པུ་ཉྙཱ་བྷི་ས་ངྑཱ་རཱ་ནཾ ཏཱ་ཝ ཨཱ་ར་མྨ་ཎ་པ་ཙྩ་ཡེ་ན, ཨུ་པ་ནི་སྶ་ཡ་པ་ཙྩ་ཡེ་ན ཙཱ་ཏི དྭི་དྷཱ པ་ཙྩ་ཡོ ཧོ་ཏི. སཱ ཧི ཨ་ཝི་ཛྫཾ ཨཱ་ར་བྦྷ ས་མྨ་ས་ནཱ་དི་ཝ་སེ་ན ཨུ་པྤ་ཏྟི་ཡཾ ཀཱ་མཱ་ཝ་ཙ་རཱ་ནཾ, ཨ་བྷི་ཉྙཱ་ཙི་ཏྟེ་ན ས་མོ་ཧ་ཙི་ཏྟ་སྶ ཛཱ་ན་ན་ཀཱ་ལེ རཱུ་པཱ་ཝ་ཙ་རཱ་ན་ཉྩ པུ་ཉྙཱ་བྷི་ས་ངྑཱ་རཱ་ནཾ ཏཱ་ཝ ཨཱ་ར་མྨ་ཎ་པ་ཙྩ་ཡེ་ན པ་ཙྩ་ཡོ ཧོ་ཏི, ཨ་ཝི་ཛྫཱ་ས་མ་ཏི་ཀྐ་མ་ན་ཏྠཱ་ཡ པ་ན ཨ་ཝི་ཛྫཱ་ས་མྨཱུ་ལ༹ྷ་ཏཱ་ཡ ཀཱ་མ་རཱུ་པ་བྷ་ཝ་ས་མྤ་ཏྟི་ཡོ པ་ཏྠེ་ཏྭཱ་ཝ ཀཱ་མ་རཱུ་པཱ་ཝ་ཙ་ར་པུ་ཉྙཱ་ནི ཀ་རོ་ནྟ་སྶ ཨུ་པ་ནི་སྶ་ཡ་པ་ཙྩ་ཡེ་ན པ་ཙྩ་ཡོ ཧོ་ཏི. ཨ་པུ་ཉྙཱ་བྷི་ས་ངྑཱ་རཱ་ནཾ པ་ནེ་སཱ ཨ་ཝི་ཛྫཾ ཨཱ་ར་བྦྷ རཱ་གཱ་དཱི་ནཾ ཨུ་པྤ་ཛྫ་ན་ཀཱ་ལེ ཨཱ་ར་མྨ་ཎཱ་དི་པ་ཙྩ་ཡེ་ན ཨ་ཝི་ཛྫཱ་ས་མྨཱུ་ལ༹ྷ་ཏཱ་ཡ པཱ་ཎཱ་ཏི་པཱ་ཏཱ་དཱི་ནི ཀ་རོ་ནྟ་སྶ ནི་སྶ་ཡ་པ་ཙྩ་ཡེ་ན, དུ་ཏི་ཡ་ཛ་ཝ་ནཱ་དཱི་ནཾ ཨ་ན་ནྟ་རཱུ་པ་ནི་སྶ་ཡཱ་སེ་ཝ་ན་ན་ཏྠི་ཝི་ག་ཏ་པ་ཙྩ་ཡེ་ཧི ཡཾ ཀི་ཉྩི ཨ་ཀུ་ས་ལཾ ཀ་རོ་ནྟ་སྶ ཧེ་ཏུ་ས་ཧ་ཛཱ་ཏ་ཨ་ཉྙ་མ་ཉྙ་ནི་སྶ་ཡ་ས་མྤ་ཡུ་ཏྟ་ཨ་ཏྠི་ཨ་ཝི་ག་ཏ་པ་ཙྩ་ཡེ་ཧཱི་ཏི ཨེ་ཝཾ ཨ་ནེ་ཀ་དྷཱ པ་ཙྩ་ཡོ ཧོ་ཏི, ཨཱ་ནེ་ཉྫཱ་བྷི་ས་ངྑཱ་རཱ་ནཾ པ་ན ཨེ་ཀེ་ན ཨུ་པ་ནི་སྶ་ཡ་པ་ཙྩ་ཡེ་ནེ་ཝ པ་ཙྩ་ཡོ ཧོ་ཏི.
ས་ངྑཱ་ར་པ་ཙྩ་ཡཱ ཝི་ཉྙཱ་ཎ་པ་དེ པ་ན ཏ་ཡོ་པི ས་ངྑཱ་རཱ ཝི་ཉྙཱ་ཎ་སྶ ཡ་ཐཱ་ར་ཧཾ ཏཱི་སུ བྷ་ཝེ་སུ པ་ཊི་ས་ནྡྷི་པ་ཝ་ཏྟཱི་སུ ཀ་མྨ་པ་ཙྩ་ཡེ་ན ཙེ་ཝ ཨུ་པ་ནི་སྶ་ཡ་པ་ཙྩ་ཡེ་ན ཙཱ་ཏི དྭི་དྷཱ པ་ཙྩ་ཡཱ ཧོ་ནྟི. ཨ་བྷི་དྷ་མྨ་བྷཱ་ཛ་ནཱི་ཡ་ན་ཡེ་ན ས་ཧ་ཛཱ་ཏ་སྶ ཝི་ཉྙཱ་ཎ་སྶ ས་ཧ་ཛཱ་ཏ་ཨ་ཉྙ་མ་ཉྙ་ནི་སྶ་ཡ་ས་མྤ་ཡུ་ཏྟ་ཀ་མྨ་ཏྠི་ཨ་ཝི་ག་ཏཱ་དི་པ་ཙྩ་ཡེ་ཧི པ་ཙྩ་ཡཱ ཧོ་ནྟི.
ཝི་ཉྙཱ་ཎ་པ་ཙྩ་ཡཱ ནཱ་མ་རཱུ་པ་པ་དེ པ་ན ཝི་ཉྙཱ་ཎཾ ཝི་པཱ་ཀ་བྷཱུ་ཏཾ, ཨ་ཝི་པཱ་ཀ་བྷཱུ་ཏ་ཉྩ ནཱ་མ་སྶ ཀེ་ཝ་ལ་སྶ ཝཱ རཱུ་པ་མི་སྶ་ཀ་སྶ ཝཱ པ་ཊི་ས་ནྡྷི་པ་ཝ་ཏྟཱི་སུ ས་ཧ་ཛཱ་ཏ་ཨ་ཉྙ་མ་ཉྙ་ནི་སྶ་ཡ་ས་མྤ་ཡུ་ཏྟ་ཝི་པཱ་ཀ་ཨཱ་ཧཱ་ར་ཨི་ནྡྲི་ཡ་ཨ་ཏྠི་ཨ་ཝི་ག་ཏ་པ་ཙྩ་ཡེ་ཧི ཡ་ཐཱ་ར་ཧཾ ན་ཝ་དྷཱ, ཨ་ཊྛ་དྷཱ ཝཱ པ་ཙྩ་ཡོ ཧོ་ཏི. པ་ཊི་ས་ནྡྷི་ཡཾ ཝི་པཱ་ཀ་ཝི་ཉྙཱ་ཎཾ ཝ་ཏྠུ་རཱུ་པ་སྶ ས་ཧ་ཛཱ་ཏ་ཨ་ཉྙ་མ་ཉྙ་ནི་སྶ་ཡ་ཝི་པཱ་ཀ་ཨཱ་ཧཱ་ར་ཨི་ནྡྲི་ཡ་ཝི་པྤ་ཡུ་ཏྟ་ཨ་ཏྠི ཨ་ཝི་ག་ཏ་པ་ཙྩ་ཡེ་ཧི ན་ཝ་དྷཱ པ་ཙྩ་ཡོ ཧོ་ཏི. ཋ་པེ་ཏྭཱ པ་ན ཝ་ཏྠུ་རཱུ་པཾ སེ་ས་རཱུ་པ་སྶ ཏེ་ཧེ་ཝ ཨ་ཉྙ་མ་ཉྙ་པ་ཙྩ་ཡ་ར་ཧི་ཏེ་ཧི ཨ་ཊྛ་ཧི པ་ཙྩ་ཡོ ཧོ་ཏི. ཨ་བྷི་ས་ངྑཱ་ར་ཝི་ཉྙཱ་ཎཾ པ་ན ཨེ་ཀ་ཝོ་ཀཱ་ར་པ་ཉྩ་ཝོ་ཀཱ་ར་བྷ་ཝེ་སུ ཀ་མྨ་ཛ་རཱུ་པ་སྶ སུ་ཏྟ་ནྟི་ཀ་པ་རི་ཡཱ་ཡེ་ན ཨུ་པ་ནི་སྶ་ཡ་ཝ་སེ་ན པ་ཙྩ་ཡོ ཧོ་ཏི. པ་ཝ་ཏྟི་ཡཾ པ་ན ས་བྦ་མྤི ཝི་ཉྙཱ་ཎཾ ཏ་སྶ ཏ་སྶ ནཱ་མ་རཱུ་པ་སྶ ཡ་ཐཱ་ར་ཧཾ པ་ཙྩ་ཡོ ཧོ་ཏི. ཏ་ཏྠ ཨ་རཱུ་པ་བྷ་ཝེ ཝི་ཉྙཱ་ཎཾ ནཱ་མ་སྶེ་ཝ, ཨ་ས་ཉྙི་བྷ་ཝེ རཱུ་པ་སྶེ་ཝ, པ་ཉྩ་ཝོ་ཀཱ་ར་བྷ་ཝེ ནཱ་མ་རཱུ་པ་སྶ པ་ཙྩ་ཡོ ཧོ་ཏཱི་ཏི ཝེ་དི་ཏ་བྦཾ. ཏེ་ནེ་ཝ ནཱ་མ་ཉྩ རཱུ་པ་ཉྩ ནཱ་མ་རཱུ་པ་ཉྩ ནཱ་མ་རཱུ་པ་ནྟི ནི་བྦ་ཙ་ནཾ ཀ་ཏ་ནྟི.
ནཱ་མ་རཱུ་པ་པ་ཙྩ་ཡཱ ས་ལཱ༹་ཡ་ཏ་ན་པ་དེ པ་ན ནཱ་མཾ ཝི་པཱ་ཀ་བྷཱུ་ཏཾ, ཨ་ཝི་པཱ་ཀ་བྷཱུ་ཏ་ཉྩ ཨ་རཱུ་པ་བྷ་ཝེ ཚ་ཊྛཱ་ཡ་ཏ་ན་སྶ ཨ་ཝ་ཀཾ་ས་ཏོ ས་ཧ་ཛཱ་ཏ་ཨ་ཉྙ་མ་ཉྙ་ནི་སྶ་ཡ་ས་མྤ་ཡུ་ཏྟ་ཝི་པཱ་ཀ་ཨ་ཏྠི་ཨ་ཝི་ག་ཏ་ཝ་སེ་ན ཡ་ཐཱ་ར་ཧཾ ས་ཏྟ་དྷཱ པ་ཙྩ་ཡོ ཧོ་ཏི. ཨི་ཏ་རེ་སཾ པ་ནེ་ཏཾ པ་ཉྩ་ནྣཾ ཙ་ཀྑཱ་ཡ་ཏ་ནཱ་དཱི་ནཾ པ་ཉྩ་ཝོ་ཀཱ་ར་བྷ་ཝེ པ་ཊི་ས་ནྡྷི་ཡཾ ཙ་ཏུ་མ་ཧཱ་བྷཱུ་ཏ་ས་ཧཱ་ཡཾ ཧུ་ཏྭཱ ས་ཧ་ཛཱ་ཏ་ནི་སྶ་ཡ་ཝི་པཱ་ཀ་ཝི་པྤ་ཡུ་ཏྟ་ཨ་ཏྠི་ཨ་ཝི་ག་ཏ་ཝ་སེ་ན ཚ་དྷཱ པ་ཙྩ་ཡོ ཧོ་ཏི. ཀི་ཉྩི པ་ནེ་ཏྠ ཧེ་ཏུ་པ་ཙྩ་ཡེ་ན, ཀི་ཉྩི ཨཱ་ཧཱ་ར་པ་ཙྩ་ཡེ་ན ཙཱ་ཏི ཏེ་སཾ ཝ་སེ་ན ས་བྦ་ཝཱ་རེ་སུ ཨུ་ཀྐཾ་སཱ་ཝ་ཀཾ་སོ ཝེ་དི་ཏ་བྦོ. པ་ཝ་ཏྟེ པ་ན ཙ་ཀྑཱ་དཱི་ནཾ པ་ཉྩ་ནྣཾ ཝི་པཱ་ཀ་མ་ཝི་པཱ་ཀ་མྤི ནཱ་མཾ པ་ཙྪཱ་ཛཱ་ཏ་ཝི་པྤ་ཡུ་ཏྟ་ཨ་ཏྠི་ཨ་ཝི་ག་ཏ་ཝ་སེ་ན ཙ་ཏུ་དྷཱ པ་ཙྩ་ཡོ ཧོ་ཏཱི་ཏི. ཨེ་ཝཾ ཏཱ་ཝ ནཱ་མ་མེ་ཝ ས་ལཱ༹་ཡ་ཏ་ན་སྶ པ་ཙྩ་ཡོ ཧོ་ཏཱི་ཏི ཝེ་དི་ཏ་བྦཾ.
རཱུ་པཾ པ་ན ཝ་ཏྠུ་བྷཱུ་ཏཾ པ་ཊི་ས་ནྡྷི་ཡཾ ཚ་ཊྛཱ་ཡ་ཏ་ན་སྶ ས་ཧ་ཛཱ་ཏ་ཨ་ཉྙ་མ་ཉྙ་ནི་སྶ་ཡ་ཝི་པྤ་ཡུ་ཏྟ་ཨ་ཏྠི་ཨ་ཝི་ག་ཏ་ཝ་སེ་ན ཚ་དྷཱ པ་ཙྩ་ཡོ ཧོ་ཏི. ཙ་ཏུ་མ་ཧཱ་བྷཱུ་ཏ་རཱུ་པཾ ཙ་ཀྑཱ་དཱི་ནཾ པ་ཉྩ་ནྣཾ པ་ཊི་ས་ནྡྷི་ཡཾ, པ་ཝ་ཏྟེ ཙ ས་ཧ་ཛཱ་ཏ་ནི་སྶ་ཡ་ཨ་ཏྠི་ཨ་ཝི་ག་ཏ་པ་ཙྩ་ཡེ་ཧི ཙ་ཏུ་དྷཱ པ་ཙྩ་ཡོ ཧོ་ཏི. རཱུ་པ་ཛཱི་ཝི་ཏི་ནྡྲི་ཡཾ པ་ན ཨི་ནྡྲི་ཡ་ཨ་ཏྠི་ཨ་ཝི་ག་ཏ་ཝ་སེ་ན ཏི་ཝི་དྷཱ. ཏ་ཐཱ ཨཱ་ཧཱ་རོ ཨཱ་ཧཱ་ར་ཏྠི་ཨ་ཝི་ག་ཏ་ཝ་སེ་ན. སོ ཙ ཨཱ་ཧཱ་རཱུ་པ་ཛཱི་ཝཱི་ནཾ པ་ཝ་ཏྟེ་ཡེ་ཝ, ནོ པ་ཊི་ས་ནྡྷི་ཡཾ. ཏཱ་ནི པ་ན པ་ཉྩ ཙ་ཀྑཱ་ཡ་ཏ་ནཱ་དཱི་ནི པ་ཉྩ་ཝི་ཉྙཱ་ཎ་ས་ངྑཱ་ཏ་སྶ ཚ་ཊྛ་སྶ མ་ནཱ་ཡ་ཏ་ན་སྶ ནི་སྶ་ཡ་པུ་རེ་ཛཱ་ཏ་ཨི་ནྡྲི་ཡ་ཝི་པྤ་ཡུ་ཏྟ་ཨ་ཏྠི་ཨ་ཝི་ག་ཏ་ཝ་སེ་ན ཚ་དྷཱ པ་ཙྩ་ཡཱ ཧོ་ནྟི པ་ཝ་ཏྟེ་ཡེ་ཝ, ནོ པ་ཊི་ས་ནྡྷི་ཡཾ. ཏ་ཐཱ པ་ཉྩ་ཝི་ཉྙཱ་ཎ་ཝི་ར་ཧི་ཏ་མ་ནཱ་ཡ་ཏ་ན་སྶ ཝ་ཏྠུ་རཱུ་པཾ ནི་སྶ་ཡ་པུ་རེ་ཛཱ་ཏ་ཝི་པྤ་ཡུ་ཏྟ་ཨ་ཏྠི་ཨ་ཝི་ག་ཏ་ཝ་སེ་ན པ་ཉྩ་དྷཱ པ་ཙྩ་ཡོ ཧོ་ཏཱི་ཏི. ཨེ་ཝཾ རཱུ་པ་མེ་ཝ ཚ་ཊྛཱ་ཡ་ཏ་ན་སྶ, ས་ལཱ༹་ཡ་ཏ་ན་སྶ ཙ པ་ཙྩ་ཡོ ཧོ་ཏཱི་ཏི ཝེ་དི་ཏ་བྦཾ. ཁ་ནྡྷ་ཏྟ་ཡ་ཝ་ཏྠུ་རཱུ་པ་ས་ངྑཱ་ཏཾ པ་ན ནཱ་མ་རཱུ་པཾ ཚ་ཊྛཱ་ཡ་ཏ་ན་སྶ པ་ཊི་ས་ནྡྷི་ཡཾ ས་ཧ་ཛཱ་ཏ་ཨ་ཉྙ་མ་ཉྙ་ནི་སྶ་ཡ་ས་མྤ་ཡུ་ཏྟ་ཝི་པྤ་ཡུ་ཏྟ་ཝི་པཱ་ཀ་ཨ་ཏྠི་ཨ་ཝི་ག་ཏཱ་དི་ཝ་སེ་ན ཡ་ཐཱ་ར་ཧཾ པ་ཙྩ་ཡོ ཧོ་ཏཱི་ཏི. ཨེ་ཝཾ ནཱ་མ་ཉྩ རཱུ་པ་ཉྩ ནཱ་མ་རཱུ་པ་ཉྩ ཡ་ཐཱ་ར་ཧཾ ཚ་ཊྛཱ་ཡ་ཏ་ན་སྶ, ས་ལཱ༹་ཡ་ཏ་ན་སྶ ཙ པ་ཙྩ་ཡོ ཧོ་ཏཱི་ཏི ཝེ་དི་ཏ་བྦཾ.
ས་ལཱ༹་ཡ་ཏ་ན་པ་ཙྩ་ཡཱ ཕ་སྶ་པ་དེ པ་ན ཚ་ཊྛཱ་ཡ་ཏ་ནཾ ཝི་པཱ་ཀཾ, ཨ་ཝི་པཱ་ཀ་ཉྩ ས་བྦ་ཏྠ ས་མྤ་ཡུ་ཏྟ་ཕ་སྶ་སྶ ས་ཧ་ཛཱ་ཏཱ་དི་ཝ་སེ་ན ན་ཝ་དྷཱ, ཨ་ཊྛ་དྷཱ ཝཱ པ་ཙྩ་ཡོ ཧོ་ཏི. ཙ་ཀྑཱ་ཡ་ཏ་ནཱ་དཱི་ནི པ་ཉྩ ཡ་ཐཱ་ཀྐ་མཾ པ་ཝ་ཏྟེ ཙ་ཀྑུ་ས་མྥ་སྶཱ་དཱི་ནཾ པ་ཉྩ་ནྣཾ ནི་སྶ་ཡ་པུ་རེ་ཛཱ་ཏ་ཨི་ནྡྲི་ཡ་ཝི་པྤ་ཡུ་ཏྟ་ཨ་ཏྠི་ཨ་ཝི་ག་ཏ་ཝ་སེ་ན ཚ་དྷཱ, རཱུ་པཱ་ཡ་ཏ་ནཱ་དཱི་ནི པ་ཉྩ ཏེ་སཾ ཨཱ་ར་མྨ་ཎ་པུ་རེ་ཛཱ་ཏ་ཨ་ཏྠི་ཨ་ཝི་ག་ཏ་ཝ་སེ་ན ཏི་དྷཱ. མ་ནོ་ས་མྥ་སྶ་སྶ པ་ན ཏཱ་ནི, དྷ་མྨཱ་ར་མྨ་ཎ་ཉྩ ཏ་ཐཱ ཙ ཨཱ་ར་མྨ་ཎཱ་དྷི་པ་ཏི་མ་ཏྟེ་ན ཙཱ་ཏི བ་ཧུ་དྷཱ པ་ཙྩ་ཡཱ ཧོ་ནྟི. ཨེ་ཝཾ ཚ་ཊྛཱ་ཡ་ཏ་ན་ཉྩ ས་ལཱ༹་ཡ་ཏ་ན་ཉྩ ཚ་བྦི་དྷ་སྶཱ་པི ཕ་སྶ་སྶ པ་ཙྩ་ཡོ ཧོ་ཏཱི་ཏི ཝེ་དི་ཏ་བྦཾ.
ཕ་སྶ་པ་ཙྩ་ཡཱ ཝེ་ད་ནཱ་པ་དེ ས་བྦོ་པི ཕ་སྶོ ས་ཧ་ཛཱ་ཏཱ་ནཾ ཝེ་ད་ནཱ་ནཾ ས་ཧ་ཛཱ་ཏ་ཨ་ཉྙ་མ་ཉྙ་ནི་སྶ་ཡ་ཝི་པཱ་ཀ་ཨཱ་ཧཱ་ར་ས་མྤ་ཡུ་ཏྟ་ཨ་ཏྠི་ཨ་ཝི་ག་ཏ་ཝ་སེ་ན ཨ་ཊྛ་དྷཱ, ས་ཏྟ་དྷཱ ཝཱ པ་ཙྩ་ཡོ ཧོ་ཏི, ཨ་ས་ཧ་ཛཱ་ཏཱ་ནཾ ཨུ་པ་ནི་སྶ་ཡ་ཝ་སེ་ནེ་ཝཱ་ཏི.
ཝེ་ད་ནཱ་པ་ཙྩ་ཡཱ ཏ་ཎྷཱ་པ་དེ ཝི་པཱ་ཀ་ཝེ་ད་ནཱ ཨ་ནུ་ས་ཡ་པ་ཏི་ཏཱ་ཡ ཏ་ཎྷཱ་ཡ ཨུ་པ་ནི་སྶ་ཡ་ཝ་སེ་ན, ས་ཧ་ཛཱ་ཏཱ་དི་ཝ་སེ་ན ཙ པ་ཙྩ་ཡོ ཧོ་ཏི. ཡ་སྨཱ པ་ན –
དུ་ཀྑཱི སུ་ཁཾ པ་ཏྠ་ཡ་ཏི, སུ་ཁཱི བྷི་ཡྻོ་པི ཨི་ཙྪ་ཏི;
ཨུ་པེ་ཀྑཱ པ་ན ས་ནྟ་ཏྟཱ, སུ་ཁ་མི་ཙྩེ་ཝ བྷཱ་སི་ཏཱ;
ཏ་ཎྷཱ་ཡ པ་ཙྩ་ཡཱ ཏ་སྨཱ, ཧོ་ནྟི ཏི་སྶོ་པི ཝེ་ད་ནཱ་ཏི. (ཝི་སུ་དྡྷི. ༢.༦༤༤);
ཏ་ཎྷཱ་པ་ཙྩ་ཡཱ ཨུ་པཱ་དཱ་ན་པ་དེ ཏ་ཎྷཱ ཨ་ས་ཧ་ཛཱ་ཏཱ ཙ་ཏུ་ནྣ་མྤི ཨུ་པཱ་དཱ་ནཱ་ནཾ ཨུ་པ་ནི་སྶ་ཡ་ཝ་སེ་ན ཙེ་ཝ ཨ་ན་ནྟ་རཱ་དི་ཝ་སེ་ན ཙ, ས་ཧ་ཛཱ་ཏཱ པ་ན ཀཱ་མུ་པཱ་དཱ་ན་ཝ་ཛྫི་ཏཱ་ནཾ ཏི་ཎྞཾ ཧེ་ཏུ་ས་ཧ་ཛཱ་ཏ ཨ་ཉྙ་མ་ཉྙ་ནི་སྶ་ཡ་ས་མྤ་ཡུ་ཏྟ་ཨ་ཏྠི་ཨ་ཝི་ག་ཏ་ཝ་སེ་ན ས་ཏྟ་དྷཱ པ་ཙྩ་ཡོ ཧོ་ཏི.
ཨུ་པཱ་དཱ་ན་པ་ཙྩ་ཡཱ བྷ་ཝ་པ་དེ ཙ་ཏུ་བྦི་དྷ་མྤི ཨུ་པཱ་དཱ་ནཾ ཨ་ས་ཧ་ཛཱ་ཏ་སྶ ས་བྦ་ཀ་མྨ་བྷ་ཝ་སྶ ཙེ་ཝ ཨུ་པ་པ་ཏྟི་བྷ་ཝ་སྶ ཙ ཨུ་པ་ནི་སྶ་ཡ་ཝ་སེ་ནེ་ཝ པ་ཙྩ་ཡོ ཧོ་ཏི, ས་ཧ་ཛཱ་ཏ་སྶ པ་ན ཀ་མྨ་བྷ་ཝ་སྶ ཧེ་ཏུ་ས་ཧ་ཛཱ་ཏཱ་དི་ཝ་སེ་ན པ་ཙྩ་ཡོ ཧོ་ཏི.
བྷ་ཝ་པ་ཙྩ་ཡཱ ཛཱ་ཏི་པ་དེ བྷ་ཝོ་ཏི ཀ་མྨ་བྷ་ཝོ་ཝ ཨ་དྷི་པྤེ་ཏོ, སོ ཙ ཛཱ་ཏི་ཡཱ ཀ་མྨ་པ་ཙྩ་ཡ་ཨུ་པ་ནི་སྶ་ཡ་པ་ཙྩ་ཡ་ཝ་སེ་ན དྭི་དྷཱ པ་ཙྩ་ཡོ ཧོ་ཏི.
ཛཱ་ཏི་པ་ཙྩ་ཡཱ ཛ་རཱ་མ་ར་ཎཱ་དི་པ་དེ ཛཱ་ཏི པ་ན ཛ་རཱ་མ་ར་ཎཱ་ནཾ, སོ་ཀཱ་དཱི་ན་ཉྩ ཏ་བྦྷཱ་ཝ་བྷཱ་ཝཱི་བྷཱ་ཝ་མ་ཏྟ་ཏོ སུ་ཏྟ་ནྟི་ཀ་ན་ཡེ་ན ཨུ་པ་ནི་སྶ་ཡ་ཀོ་ཊི་ཡཱ་ཝ པ་ཙྩ་ཡོ ཧོ་ཏཱི་ཏི ཨ་ཡཾ ཏཱ་ཝེ་ཏྠ པ་ཙྩ་ཡ་ན་ཡོ.
ཀཱ་ར་ཀཱ་དཱི་ཧི སུ་ཉྙ་ཏོ པ་ནེ་ཏེ ཨ་ཝི་ཛྫཱ་ད་ཡོ དྭཱ་ད་ས དྷ་མྨཱ ཡ་སྨཱ ཨེ་ཝཾ པ་ཙྩ་ཡ་པ་ཙྩ་ཡུ་པྤ་ནྣ་བྷཱ་ཝེ་ན ཨ་ཉྙ་མ་ཉྙཾ པ་ཊི་བ་དྡྷཱ ཨ་ཉྙ་ནི་ར་པེ་ཀྑཱ ཧུ་ཏྭཱ ཨ་ཝི་ཙྪི་ནྣཱ ཨ་ནཱ་དི་ཀཱ པ་ཝ་ཏྟ་ནྟི, ཏ་སྨཱ ཏ་ཏོ ཨ་ཉྙེ་ན བྲ་ཧྨཱ་དི་ནཱ ཀཱ་ར་ཀེ་ན, པ་ཀ་ཏི་ཨ་ཎུ་ཀཱ་ལཱ་དི་ཧེ་ཏུ་ནཱ ཝཱ ཀཱ་ར་ཀ་ཝེ་ད་ཀ་རཱུ་པེ་ན པ་ར་པ་རི་ཀ་པྤི་ཏེ་ན ཨ་ཏྟ་ནཱ ཝཱ ར་ཧི་ཏཱ. ན ཙེ་ཏེ ཨ་ཏྟཱ, ན ཨ་ཏྟ་ནི, ན ཨ་ཏྟ་ཝ་ནྟོ, སུ་ཉྙཱ ཨེ་ཏེ ཨ་ཏྟེ་ན ཝཱ ཨ་ཏྟ་ནི་ཡེ་ན ཝཱ དྷུ་ཝ་བྷཱ་ཝེ་ན ཝཱ སུ་བྷ་བྷཱ་ཝེ་ན ཝཱ སུ་ཁ་བྷཱ་ཝེ་ན ཝཱ་ཏི ཨ་ཡཾ ཀཱ་ར་ཀཱ་དཱི་ཧི སུ་ཉྙ་ཏཱ.
མཱུ་ལ་དྡྷ་ས་ནྡྷི་ས་ངྑེ་པཱ་ཀཱ་ར་ཝ་ཊྚ་ཝི་བྷཱ་ག་ཏོཏི ཨེ་ཏྠ མཱུ་ལ་ཏོ ཏཱ་ཝ ཨ་ཝི་ཛྫཱ, ཏ་ཎྷཱ ཙཱ་ཏི དྭེ དྷ་མྨཱ མཱུ་ལནྟི ཝེ་དི་ཏ་བྦཱ. ཨ་དྡྷ་ཏོ པ་ནེ་ཏྠ ཨ་ཝི་ཛྫཱ, ས་ངྑཱ་རཱ་ཏི དྭེ ཨ་ངྒཱ་ནི ཨ་ཏཱི་ཏོ ཨ་དྡྷཱ, ཝི་ཉྙཱ་ཎཱ་དཱི་ནི བྷ་ཝཱ་ཝ་སཱ་ནཱ་ནི ཨ་ཊྛ པ་ཙྩུ་པྤ་ནྣོ ཨ་དྡྷཱ, ཛཱ་ཏི ཙེ་ཝ ཛ་རཱ་མ་ར་ཎ་ཉྩཱ་ཏི དྭེ ཨ་ནཱ་ག་ཏོ ཨ་དྡྷཱ་ཏི ཏ་ཡོ ཨ་དྡྷཱ ཝེ་དི་ཏ་བྦཱ. ས་ནྡྷི་ཏོ པ་ན ས་ངྑཱ་རཱ་ནཾ, པ་ཊི་ས་ནྡྷི་ཝི་ཉྙཱ་ཎ་སྶ ཙ ཨ་ནྟ་རཱ ཨེ་ཀོ ཧེ་ཏུ་ཕ་ལ་ས་ནྡྷི, ཝེ་ད་ནཱ་ཡ ཙ ཏ་ཎྷཱ་ཡ ཙ ཨ་ནྟ་རཱ ཨེ་ཀོ ཕ་ལ་ཧེ་ཏུ་ས་ནྡྷི, བྷ་ཝ་སྶ ཙ ཛཱ་ཏི་ཡཱ ཙ ཨ་ནྟ་རཱ ཨེ་ཀོ ཧེ་ཏུ་ཕ་ལ་ས་ནྡྷི ཙཱ་ཏི ཏ་ཡོ ས་ནྡྷཱི ཝེ་དི་ཏ་བྦཱ. ས་ངྑེ་པ་ཏོ པ་ན ས་ནྡྷཱི་ནཾ ཨཱ་དི་པ་རི་ཡོ་སཱ་ན་ཝ་ཝ་ཏྠི་ཏཱ ཙ་ཏྟཱ་རོ ས་ངྑེ་པཱ ཧོ་ནྟི. སེ་ཡྻ་ཐི་དཾ – ཨ་ཝི་ཛྫཱ་ས་ངྑཱ་རཱ ཨེ་ཀོ ས་ངྑེ་པོ, ཝི་ཉྙཱ་ཎ་ནཱ་མ་རཱུ་པ་ས་ལཱ༹་ཡ་ཏ་ན་ཕ་སྶ་ཝེ་ད་ནཱ དུ་ཏི་ཡོ, ཏ་ཎྷུ་པཱ་དཱ་ན་བྷ་ཝཱ ཏ་ཏི་ཡོ, ཛཱ་ཏི་ཛ་རཱ་མ་ར་ཎཱ་ནི ཙ་ཏུ་ཏྠོ་ཏི ཨེ་ཝཾ ཙ་ཏྟཱ་རོ ས་ངྑེ་པཱ ཝེ་དི་ཏ་བྦཱ.
ཨཱ་ཀཱ་ར་ཏོ པ་ནེ་ཏྠ –
ཨ་ཏཱི་ཏེ ཧེ་ཏུ་ཡོ པ་ཉྩ, ཨི་དཱ་ནི ཕ་ལ་པ་ཉྩ་ཀཾ;
ཨི་དཱ་ནི ཧེ་ཏུ་ཡོ པ་ཉྩ, ཨཱ་ཡ་ཏིཾ ཕ་ལ་པ་ཉྩ་ཀ་ནྟི. –
ཨེ་ཝཾ ཝཱི་ས་ཏི ཨཱ་ཀཱ་རཱ ཧོ་ནྟི.
ཨེ་ཏྠ ཧི ས་རཱུ་པ་ཏོ ཝུ་ཏྟཱ ཨ་ཝི་ཛྫཱ་ས་ངྑཱ་རཱ, ཏེ་སཾ ག་ཧ་ཎེ་ན ཏ་ད་ཝི་ནཱ་བྷཱ་ཝ་ཏོ ག་ཧི་ཏཱ ཏ་ཎྷུ་པཱ་དཱ་ན་བྷ་ཝཱ་ཏི ཨི་མེ པ་ཉྩ དྷ་མྨཱ ཨ་ཏཱི་ཏེ ཧེ་ཏུ་ཡོ ནཱ་མ, ས་རཱུ་པ་ཏོ ཝུ་ཏྟཱ ཝི་ཉྙཱ་ཎཱ་ད་ཡོ པ་ཉྩ དྷ་མྨཱ ཨི་དཱ་ནི ཕ་ལ་པ་ཉྩ་ཀཾ ནཱ་མ, ས་རཱུ་པ་ཏོ པ་ན ཝུ་ཏྟཱ ཏ་ཎྷུ་པཱ་དཱ་ན་བྷ་ཝཱ, ཏེ་སཾ ག་ཧ་ཎེ་ན ཏ་ད་ཝི་ནཱ་བྷཱ་ཝ་ཏོ ག་ཧི་ཏཱ ཨ་ཝི་ཛྫཱ་ས་ངྑཱ་རཱ་ཏི ཨི་མེ པ་ཉྩ ཨི་དཱ་ནི ཧེ་ཏུ་ཡོ ནཱ་མ. ཛཱ་ཏི་ཨཱ་དི་ཨ་པ་དེ་སེ་ན ཝུ་ཏྟཱ ཝི་ཉྙཱ་ཎཱ་ད་ཡོ པ་ཉྩ དྷ་མྨཱ ཨཱ་ཡ་ཏིཾ ཕ་ལ་པ་ཉྩ་ཀཾ ནཱ་མཱ་ཏི ཨེ་ཝཾ ཝཱི་ས་ཏི ཨཱ་ཀཱ་རཱ ཝེ་དི་ཏ་བྦཱ. ཝ་ཊྚ་ཏོ པ་ནེ་ཏྠ ས་ངྑཱ་ར་བྷ་ཝཱ ཀ་མྨ་ཝ་ཊྚཾ, ཨ་ཝི་ཛྫཱ་ཏ་ཎྷུ་པཱ་དཱ་ནཱ ཀི་ལེ་ས་ཝ་ཊྚཾ, སེ་སཱ་ནི ཝི་པཱ་ཀ་ཝ་ཊྚ་ནྟི ཏཱི་ཎི ཝ་ཊྚཱ་ནི ཧོ་ནྟི. ཡཱ་ཝ ཙ ཏེ་སུ ཀི་ལེ་ས་ཝ་ཊྚཾ ཨ་རི་ཡ་མ་གྒེ་ན ན ཨུ་པ་ཙྪི་ཛྫ་ཏི, ཏཱ་ཝ ཨི་དཾ བྷ་ཝ་ཙ་ཀྐཾ ཨ་ནུ་པ་ཙྪི་ནྣཾ པ་ཝ་ཏྟ་ཏཱི་ཏི ཨ་ཡ་མེ་ཏྠ མཱུ་ལ་དྡྷ་ས་ནྡྷི་ས་ངྑེ་པཱ་ཀཱ་ར་ཝ་ཊྚ་ཝི་བྷཱ་གོ.
ཝཱ་ར་ཎོ་པ་མ་ཏོཏི ཨེ་ཏྠ ཝཱ་ར་ཎ་ཏོ ཏཱ་ཝ – ‘‘ཨ་ཝི་ཛྫཱ་པ་ཙྩ་ཡཱ ས་ངྑཱ་རཱ’’ཏི ཨི་ད་མ་ཧེ་ཏུ་ཀ་ཝི་ས་མ་ཧེ་ཏུ་ཀ་ད་སྶ་ན་ནི་ཝཱ་ར་ཎཾ, ‘‘ས་ངྑཱ་ར་པ་ཙྩ་ཡཱ ཝི་ཉྙཱ་ཎ’’ནྟི ཨུ་ཙྪེ་ད་ཨ་ཏྟ་ས་ངྐ་ནྟི་ད་སྶ་ན་ནི་ཝཱ་ར་ཎཾ, ‘‘ཝི་ཉྙཱ་ཎ་པ་ཙྩ་ཡཱ ནཱ་མ་རཱུ་པ’’ནྟི ཨ་ཏྟཱ་ཏི པ་རི་ཀ་པྤི་ཏ་ཝ་ཏྠུ་བྷེ་ད་ད་སྶ་ན་ཏོ གྷ་ན་ས་ཉྙཱ་ནི་ཝཱ་ར་ཎཾ, ‘‘ནཱ་མ་རཱུ་པ་པ་ཙྩ་ཡཱ ས་ལཱ༹་ཡ་ཏ་ན’’ནྟི་ཨཱ་དི ཨ་ཏྟཱ པ་སྶ་ཏི…པེ… ཝི་ཛཱ་ནཱ་ཏི ཕུ་ས་ཏི, ཝེ་ད་ཡ་ཏི, ཏ་ཎྷི་ཡ་ཏི, ཨུ་པཱ་དི་ཡ་ཏི, བྷ་ཝ་ཏི, ཛཱ་ཡ་ཏི, ཛཱི་ཡ་ཏི, མཱི་ཡ་ཏཱི་ཏི ཨེ་ཝ་མཱ་དི་ད་སྶ་ན་ནི་ཝཱ་ར་ཎ་ནྟི ཨི་ད་མེ་ཏྠ མི་ཙྪཱ་ད་སྶ་ན་ནི་ཝཱ་ར་ཎཾ.
ཨུ་པ་མཱ་ཏོ པ་ནེ་ཏྠ ཨ་ནྡྷོ ཝི་ཡ ཨ་ཝི་ཛྫཱ, ཏ་སྶ ཨུ་པ་ཀྑ་ལ་ནཾ ཝི་ཡ ས་ངྑཱ་རཱ, པ་ཏ་ནཾ ཝི་ཡ ཝི་ཉྙཱ་ཎཾ, ཏེ་ན ག་ཎྜ་པཱ་ཏུ་བྷཱ་ཝོ ཝི་ཡ ནཱ་མ་རཱུ་པཾ, ཏ་སྶ ག་ཎྜ་བྷེ་ད་པཱི་ལ༹་ཀཱ ཝི་ཡ ས་ལཱ༹་ཡ་ཏ་ནཾ, ཏ་སྶ ས་ངྒྷ་ཊྚ་ནཾ ཝི་ཡ ཕ་སྶོ, ཏ་ཛྫ་ནི་ཏ་དུ་ཀྑཾ ཝི་ཡ ཝེ་ད་ནཱ, དུ་ཀྑ་སྶ པ་ཊི་ཀཱ་རཱ་བྷི་ལཱ་སོ ཝི་ཡ ཏ་ཎྷཱ, ཨ་ས་པྤཱ་ཡ་གྒ་ཧ་ཎཾ ཝི་ཡ ཨུ་པཱ་དཱ་ནཾ, ཨ་ས་པྤཱ་ཡཱ་ལེ་པ་ནཾ ཝི་ཡ བྷ་ཝོ, ཏེ་ན ག་ཎྜ་ཝི་ཀཱ་ར་པཱ་ཏུ་བྷཱ་ཝོ ཝི་ཡ ཛཱ་ཏི, ཏ་བྦི་ཀཱ་ར་བྷེ་དོ ཝི་ཡ ཛ་རཱ་མ་ར་ཎཾ. ཡ་ཐཱ་ས་བྷཱ་ཝ་ད་སྶ་ན་ནི་ཝཱ་ར་ཎཱ་དི་ཏོ ཝཱ ཨེ་ཏེ ཨ་ཝི་ཛྫཱ་ད་ཡོ ཨ་ཀྑི་པ་ཊ་ལཱ་དི ཨུ་པ་མཱ་ཧི་པི ཝེ་དི་ཏ་བྦཱ་ཏི ཨ་ཡ་མེ་ཏྠ ཨུ་པ་མཱ.
ག་མྦྷཱི་ར་ན་ཡ་བྷེ་ད་ཏོཏི ཨེ་ཏྠ ག་མྦྷཱི་ར་བྷེ་དོ ཏཱ་ཝ ཨི་མེ་སཾ ཨ་ཝི་ཛྫཱ་དཱི་ནཾ པ་ཙྩེ་ཀཾ དྷ་མྨ་ཏྠ་དེ་ས་ནཱ་པ་ཊི་ཝེ་དྷ་ག་མྦྷཱི་ར་ཏཱ ཝེ་དི་ཏ་བྦཱ. ཨི་མེ ཧི ཨ་ཝི་ཛྫཱ་ད་ཡོ དྷ་མྨཱ ཡེ་ནཱ་ཀཱ་རེ་ན ཡ་ད་ཝ་ཏྠཱ ཙ ས་ངྑཱ་རཱ་དཱི་ནཾ ཕ་ལཱ་ནཾ པ་ཙྩ་ཡཱ ཧོ་ནྟི, སོ ནེ་སཾ པ་ཙྩ་ཡ་ཊྛོ དུ་ར་ཝ་བོ་དྷ་ཏོ ག་མྦྷཱི་རོ་ཏི ཨ་ཡ་མེ་ཏྠ དྷ་མྨ་ག་མྦྷཱི་ར་ཏཱ. དྷ་མྨོ་ཏི ཧེ་ཏུ ‘‘ཧེ་ཏུ་མྷི ཉཱ་ཎཾ དྷ་མྨ་པ་ཊི་ས་མྦྷི་དཱ’’ཏི (ཝི་བྷ. ༧༢༠) ཝ་ཙ་ན་ཏོ. ཛ་རཱ་མ་ར་ཎཱ་དཱི་ནཾ ཕ་ལཱ་ནཾ ཛཱ་ཏི་ཨཱ་དཱི་ཧི པ་ཙྩ་ཡེ་ཧི ས་མྦྷཱུ་ཏ་ས་མུ་དཱ་ག་ཏ་ཊྛོ དུ་ར་ཝ་བོ་དྷ་ཏོ ག་མྦྷཱི་རོ་ཏི ཨ་ཡཾ ཨ་ཏྠ་ག་མྦྷཱི་ར་ཏཱ. ཨ་ཏྠོ་ཏི ཕ་ལཾ ‘‘ཧེ་ཏུ་ཕ་ལེ ཉཱ་ཎཾ ཨ་ཏྠ་པ་ཊི་ས་མྦྷི་དཱ’’ཏི (ཝི་བྷ. ༧༢༠) ཝ་ཙ་ན་ཏོ. ཏེ་སཾ པ་ན ཧེ་ཏཱུ་ནཾ, ཕ་ལཱ་ན་ཉྩ ཏེ་ན ཏེ་ནཱ་ཀཱ་རེ་ན ཨ་ཝི་པ་རཱི་ཏ་ཏོ དེ་ས་ནཱ་པི ས་བྦ་ཉྙུ་ཏ་ཉྙཱ་ཎ་སྶེ་ཝ གོ་ཙ་ར་ཏོ ག་མྦྷཱི་རཱ་ཏི ཨ་ཡཾ དེ་ས་ནཱ་ག་མྦྷཱི་ར་ཏཱ. ཡོ པ་ནེ་སཾ ཨ་ཝི་ཛྫཱ་ས་ངྑཱ་རཱ་དཱི་ནཾ ཨ་ད་སྶ་ནཱ་ཡཱུ་ཧ་ནཱ་དི་ས་བྷཱ་ཝོ, སོ མ་ནྡ་པ་ཉྙེ་ཧི དུ་པྤ་རི་ཡོ་གཱ་ཧ་ཏྟཱ ག་མྦྷཱི་རོ་ཏི ཨ་ཡཾ པ་ཊི་ཝེ་དྷ་ག་མྦྷཱི་ར་ཏཱཏི ཨ་ཡ་མེ་ཏྠ ག་མྦྷཱི་ར་བྷེ་དོ.
ན་ཡ་བྷེ་དོ པ་ནེ་ཏྠ ཨེ་ཀ་ཏྟ་ན་ཡོ ནཱ་ན་ཏྟ་ན་ཡོ ཨ་བྱཱ་པཱ་ར་ན་ཡོ ཨེ་ཝཾ་དྷ་མྨ་ཏཱ་ན་ཡོ་ཏི ཨི་མེ་སཾ ཙ་ཏུ་ནྣཾ ཨ་ཏྠ་ན་ཡཱ་ནཾ ཝ་སེ་ན ཝེ་དི་ཏ་བྦོ. ཏ་ཏྠ ཧི ‘‘ཨ་ཝི་ཛྫཱ་པ་ཙྩ་ཡཱ ས་ངྑཱ་རཱ, ས་ངྑཱ་ར་པ་ཙྩ་ཡཱ ཝི་ཉྙཱ་ཎ’’ནྟི ཨེ་ཝཾ བཱི་ཛ་སྶ ཨ་ངྐུ་རཱ་དི་བྷཱ་ཝེ་ན རུ་ཀྑ་བྷཱ་ཝ་པྤ་ཏྟི ཝི་ཡ ས་ནྟཱ་ནཱ་ནུ་པ་ཙྪེ་དོ ཨེ་ཀ་ཏྟ་ན་ཡོ ནཱ་མ. ཡཾ ས་མྨཱ པ་སྶ་ནྟོ ཧེ་ཏུ་ཕ་ལ་ས་མྦ་ནྡྷེ་ན ས་ནྟཱ་ནཱ་ནུ་པ་ཙྪེ་དཱ་ཝ་བོ་དྷ་ཏོ ཨུ་ཙྪེ་ད་དི་ཊྛིཾ པ་ཛ་ཧ་ཏི, མི་ཙྪཱ པ་སྶ་ནྟོ ཧེ་ཏུ་ཕ་ལ་ས་མྦ་ནྡྷེ་ན པ་ཝ་ཏྟ་མཱ་ན་སྶ ས་ནྟཱ་ནཱ་ནུ་པ་ཙྪེ་ད་སྶ ཨེ་ཀ་ཏྟ་གྒ་ཧ་ཎ་ཏོ ས་སྶ་ཏ་དི་ཊྛིཾ ཨུ་པཱ་དི་ཡ་ཏི.
ཨ་ཝི་ཛྫཱ་དཱི་ནཾ པ་ན ཡ་ཐཱ་ས་ཀཾ ལ་ཀྑ་ཎ་ཝ་ཝ་ཏྠཱ་ནཾ ནཱ་ན་ཏྟ་ན་ཡོ ནཱ་མ. ཡཾ ས་མྨཱ པ་སྶ་ནྟོ ན་ཝ་ན་ཝཱ་ནཾ ཨུ་པྤཱ་ད་ད་སྶ་ན་ཏོ ས་སྶ་ཏ་དི་ཊྛིཾ པ་ཛ་ཧ་ཏི, མི་ཙྪཱ པ་སྶ་ནྟོ ཨེ་ཀ་ས་ནྟཱ་ན་པ་ཏི་ཏ་སྶ བྷི་ནྣ་ས་ནྟཱ་ན་སྶེ་ཝ ནཱ་ན་ཏྟ་གྒ་ཧ་ཎ་ཏོ ཨུ་ཙྪེ་ད་དི་ཊྛིཾ ཨུ་པཱ་དི་ཡ་ཏི.
ཨ་ཝི་ཛྫཱ་ཡ པ་ན ‘‘ས་ངྑཱ་རཱ མ་ཡཱ ཨུ་པྤཱ་དེ་ཏ་བྦཱ, ས་ངྑཱ་རཱ་ནཾ ཝཱ ཝི་ཉྙཱ་ཎཾ ཨ་མྷེ་ཧཱི’’ཏི ཨེ་ཝ་མཱ་དི་བྱཱ་པཱ་རཱ་བྷཱ་ཝོ ཨ་བྱཱ་པཱ་ར་ན་ཡོ ནཱ་མ. ཡཾ ས་མྨཱ པ་སྶ་ནྟོ་ཀཱ་ར་ཀ་སྶ ཨ་བྷཱ་ཝཱ་ཝ་བོ་དྷ་ཏོ ཨ་ཏྟ་དི་ཊྛིཾ པ་ཛ་ཧ་ཏི, མི་ཙྪཱ པ་སྶ་ནྟོ ཡོ ཨ་ས་ཏི་པི བྱཱ་པཱ་རེ ཨ་ཝི་ཛྫཱ་དཱི་ནཾ ས་བྷཱ་ཝ་ནི་ཡ་མ་སི་དྡྷོ ཧེ་ཏུ་བྷཱ་ཝོ, ཏ་སྶ ཨ་གྒ་ཧ་ཎ་ཏོ ཨ་ཀི་རི་ཡ་དི་ཊྛིཾ ཨུ་པཱ་དི་ཡ་ཏི.
ཨ་ཝི་ཛྫཱ་དཱི་ཧི པ་ན ཀཱ་ར་ཎེ་ཧི ས་ངྑཱ་རཱ་དཱི་ནཾ་ཡེ་ཝ ས་མྦྷ་ཝོ ཁཱི་རཱ་དཱི་ཧི ད་དྷི་ཨཱ་དཱི་ནཾ ཝི་ཡ, ན ཨ་ཉྙེ་ས་ནྟི ཨ་ཡཾ ཨེ་ཝཾ་དྷ་མྨ་ཏཱ་ན་ཡོ ནཱ་མ. ཡཾ ས་མྨཱ པ་སྶ་ནྟོ པ་ཙྩ་ཡཱ་ནུ་རཱུ་པ་ཏོ ཕ་ལཱ་ཝ་བོ་དྷ་ཏོ ཨ་ཧེ་ཏུ་ཀ་དི་ཊྛིཾ, ཨ་ཀི་རི་ཡ་དི་ཊྛི་ཉྩ པ་ཛ་ཧ་ཏི, མི་ཙྪཱ པ་སྶ་ནྟོ པ་ཙྩ་ཡཱ་ནུ་རཱུ་པཾ ཕ་ལ་པྤ་ཝ་ཏྟིཾ ཨ་གྒ་ཧེ་ཏྭཱ ཡ་ཏོ ཀུ་ཏོ་ཙི ཡ་སྶ ཀ་སྶ་ཙི ཨ་ས་མྦྷ་ཝ་གྒ་ཧ་ཎ་ཏོ ཨ་ཧེ་ཏུ་ཀ་དི་ཊྛིཾ ཙེ་ཝ ནི་ཡ་ཏ་ཝཱ་ད་ཉྩ ཨུ་པཱ་དི་ཡ་ཏཱི་ཏི ཨ་ཡ་མེ་ཏྠ ན་ཡ་བྷེ་དོ་ཏི ཨེ་ཝཾ ཝི་ཛཱ་ནཱི་ཡོ པཱ་ལི༹་མུ་ཏྟ་ཝི་ནི་ཙྪ་ཡོ.
པ་ཙྩ་ཡཱ་ཀཱ་ར་ཝི་བྷ་ངྒ་མཱ་ཏི་ཀ་ཏྠ་ཝ་ཎྞ་ནཱ ནི་ཊྛི་ཏཱ.