དྷ་མྨ་ཧ་ད་ཡ་ཝི་བྷ་ངྒ་མཱ་ཏི་ཀ་ཏྠ་ཝ་ཎྞ་ནཱ

དྷ་མྨ་ཧ་ད་ཡ་ཝི་བྷ་ངྒ་མཱ་ཏི་ཀཱ་ཡ པ་ན པ་ད་ཏྠཱ་དི་ཏོ ཝི་ནི་ཙྪ་ཡོ པུ་བྦེ ཝུ་ཏྟོ་ཝ. ཡ་སྨཱ པ་ན བྷ་ག་ཝ་ཏཱ ཧེ་ཊྛཱ ནཱ་ནཱ་ན་ཡ་ཏོ ཝི་བྷ་ཏྟཱ་ན་ཉྙེ་ཝ ཁ་ནྡྷཱ་ཡ་ཏ་ནཱ་དཱི་ནཾ དྭཱ་ད་ས་ནྣཾ དྷ་མྨ་ཀོ་ཊྛཱ་སཱ་ནཾ པུ་ན ས་བྦ་ས་ངྒཱ་ཧི་ཀ་ཙ་ཏུ་བྷཱུ་མུ་པྤ་ཏྟི་ཏ་པྤ་རི་ཡཱ་པ་ནྣ་ཏཱ་དཱི་ཧི ད་ས་ཧི ཝཱ་རེ་ཧི ཨ་པུ་བྦ་ན་ཡ་ས་ཧ་སྶ་ཝི་བྷཱ་ཝ་ཀེ་ཧི ས་བྦ་དྷ་མྨཱ་དྷི་པྤཱ་ཡ་ས་ངྑཱ་ཏེ་ཧི དྷ་མྨ་ཧ་ད་ཡེ་ཧི ཝི་བྷཱ་ག་ད་སྶ་ན་ཏྠ་མེ་ཝཱ་ཡཾ ཝི་བྷ་ངྒོ ཝུ་ཏྟོ, ཏ་སྨཱ ཝི་བྷ་ངྒ་ན་ཡ་ཏོ ཙེ་ཏྠ ཝི་ནི་ཙྪ་ཡོ ཧོ་ཏི. ཝི་བྷ་ངྒེ ཧི པ་ཋ་མཾ ‘‘ཀ་ཏི ཁ་ནྡྷཱ’’ཏི་ཨཱ་དི་ནཱ ས་པུ་ཙྪ་ཀཾ དྭཱ་ད་ས་པ་དི་ཀཾ མཱ་ཏི་ཀཾ ནི་ཀྑི་པི་ཏྭཱ ཧེ་ཊྛཱ ཝུ་ཏྟཱ་ནུ་སཱ་རེ་ནེ་ཝ ཙ་ཏུ་བྷཱུ་མ་ཀ་སཱ་མ་ཉྙ་ཏོ ས་བྦ་ས་ངྒཱ་ཧི་ཀ་ཝཱ་རོ ནཱ་མ ཝི་བྷ་ཏྟོ, ཏ་ཏྠ ས་ཏྟ ཕ་སྶཱ་ད་ཡོ ས་ཏྟ་ནྣཾ ཝི་ཉྙཱ་ཎ་དྷཱ་ཏཱུ་ནཾ ཝ་སེ་ན ཝེ་དི་ཏ་བྦཱ.

དུ་ཏི་ཡོ པ་ན ཝཱ་རོ ཏེ་སཾ ཙ་ཏཱུ་སུ བྷཱུ་མཱི་སུ ཙ་ཏཱུ་ཧི ཀོ་ཊྛཱ་སེ་ཧི ཨུ་པྤ་ཏྟཱ་ནུ་པྤ་ཏྟི་ད་སྶ་ན་ཝ་སེ་ན པ་ཝ་ཏྟོ. ཏ་ཏྠ པ་ཋ་མ་ཀོ་ཊྛཱ་སེ ཏཱ་ཝ –

‘‘ཀཱ་མ་དྷཱ་ཏུ་ཡཱ ཀ་ཏི ཁ་ནྡྷཱ…པེ… ཀ་ཏི ཙི་ཏྟཱ་ནི? ཀཱ་མ་དྷཱ་ཏུ་ཡཱ པ་ཉྩ་ཀྑ་ནྡྷཱ, དྭཱ་ད་སཱ་ཡ་ཏ་ནཱ་ནི, ཨ་ཊྛཱ་ར་ས དྷཱ་ཏུ་ཡོ, ཏཱི་ཎི ས་ཙྩཱ་ནི, བཱ་ཝཱི་ས་ཏི་ནྡྲི་ཡཱ་ནི, ན་ཝ ཧེ་ཏཱུ, ཙ་ཏྟཱ་རོ ཨཱ་ཧཱ་རཱ, ས་ཏྟ ཕ་སྶཱ, ཝེ་ད་ནཱ, ས་ཉྙཱ, ཙེ་ཏ་ནཱ, ཙི་ཏྟཱ་ནཱི’’ཏི –

མཱ་ཏི་ཀཾ ནི་ཀྑི་པི་ཏྭཱ ཝི་བྷ་ཏྟཱ. ཏ་ཏྠ ཡ་སྨཱ ཙ་ཏུ་བྷཱུ་མ་ཀཱ་པི དྷ་མྨཱ ཡེ་བྷུ་ཡྻེ་ན ཀཱ་མཱ་ཝ་ཙ་ར་ས་ཏྟཱ་ནཾ ཨུ་པྤ་ཛྫ་ནྟི, ན ཀཱ་མཱ་ཝ་ཙ་རཱ་ཝ. ཏེ་ནེ་ཏྠ ‘‘པ་ཉྩ་ཀྑ་ནྡྷཱ’’ཏི་ཨཱ་དི་ནཱ ཙ་ཏུ་བྷཱུ་མ་ཀཱ་པི ཝུ་ཏྟཱ. ཏ་ཏྠུ་པྤ་ཛྫ་ན་ཀ་དྷ་མྨཱ ཧེ་ཏྠ ཨ་དྷི་པྤེ་ཏཱ, ན ཏཾ་བྷཱུ་མི་པ་རི་ཡཱ་པ་ནྣཱ་ཝ. རཱུ་པ་དྷཱ་ཏུ་ཨཱ་དཱི་སུ་པི ཨེ་སེ་ཝ ན་ཡོ.

ཨེ་ཏྠ ཙ ཏཱི་ཎི ས་ཙྩཱ་ནཱིཏི ཨི་དཾ ནི་རོ་དྷ་ས་ཙྩ་སྶ དེ་ས་ཝི་ནི་མུ་ཏྟ་ཏཱ་ཡ ཀ་ཏྠ་ཙི དེ་སེ ཨ་ནི་དྡི་སི་ཏ་བྦ་ཏོ ཏཾ ཝ་ཛྫེ་ཏྭཱ ཝུ་ཏྟཾ. ཀཱ་ར་ཎ་སཱ་པེ་ཀྑཱ ཧི དྷ་མྨཱ ཨ་ཏྟ་ནོ ནི་སྶ་ཡ་ཀཱ་ར་ཎ་བྷཱུ་ཏཾ དེ་སཾ ས་མཱ་ཝ་ས་ནྟི ཨ་ཀཱ་ར་ཎ་སྶ ཨ་ནི་སྶ་ཡ་ཏྟཱ, ཡ་ཐཱ ཝཱ ཀ་དཱ་ཙི ཨུ་པ་ལ་བྦྷ་མཱ་ནཱ དྷ་མྨཱ ཀཱ་ལ་ནི་ཡ་ཏ་ཏཱ་ཡ ཨ་ཏྟ་ནོ ས་ངྑ་ཏ་ཏྟཾ་ཝ སཱུ་ཙེ་ནྟི. ཨ་ཉྙ་ཐཱ ཨི་ཏ་ར་ཀཱ་ལེ་སུ་པི བྷཱ་ཝ་སྶ ཙ པ་ས་ངྒ་ཏོ, ཨེ་ཏ་ར་ཧི་པི ཝཱ ཨ་བྷཱ་ཝ་སྶ, ཨེ་ཝཾ ཀྭ་ཙི དེ་སེ ཨུ་པ་ལ་བྦྷ་མཱ་ནཱ་པཱི་ཏི ག་ཧེ་ཏ་བྦཾ. ས་བྦ་དེ་ས་ཨ་བྱཱ་པི་ཏཱ པ་ན ཨ་ས་ངྑ་ཏ་སྶ, ས་ངྑ་ཏ་སྶ ཝཱ ཨ་ས་མྦྷ་ཝ་ཏོ ཨེ་ཝ ནོ་པ་པ་ཛྫ་ཏི, ཏ་སྨཱ དེ་ས་ཀཱ་ལ་ཝི་ནི་མུ་ཏྟ་མེ་ཝ ཨ་ས་ངྑ་ཏ་ནྟི ག་ཧེ་ཏ་བྦཾ.

དུ་ཏི་ཡ་ཀོ་ཊྛཱ་སེ པ་ན –

‘‘རཱུ་པ་དྷཱ་ཏུ་ཡཱ པ་ཉྩ་ཀྑ་ནྡྷཱ, ཚ ཨཱ་ཡ་ཏ་ནཱ་ནི, ན་ཝ དྷཱ་ཏུ་ཡོ, ཏཱི་ཎི ས་ཙྩཱ་ནི, ཙུ་དྡ་སི་ནྡྲི་ཡཱ་ནི, ཨ་ཊྛ ཧེ་ཏཱུ, ཏ་ཡོ ཨཱ་ཧཱ་རཱ, ཙ་ཏྟཱ་རོ ཕ་སྶཱ…པེ… ཙ་ཏྟཱ་རི ཙི་ཏྟཱ་ནཱི’’ཏི –

མཱ་ཏི་ཀཾ ནི་ཀྑི་པི་ཏྭཱ ཝི་བྷ་ཏྟཱ. ཡ་སྨཱ པ་ན རཱུ་པཱི་ནཾ གྷཱ་ནཱ་དཱི་ནཾ ཨ་བྷཱ་ཝེ་ན ཝི་ཛྫ་མཱ་ནཱ་ནི་པི ག་ནྡྷཱ་ཡ་ཏ་ནཱ་དཱི་ནི ཨཱ་ཡ་ཏ་ནཱ་དི་ཀི་ཙྩཾ ན ཀ་རོ་ནྟི, ཏ་སྨཱ ཏེ ཝ་ཛྫེ་ཏྭཱ ‘‘ཚ ཨཱ་ཡ་ཏ་ནཱ་ནི, ན་ཝ དྷཱ་ཏུ་ཡོ’’ཏི་ཨཱ་དི ཝུ་ཏྟཾ ན ཏེ་སཾ ཨ་བྷཱ་ཝཱ. ཀེ་ཙི པ་ན ‘‘རཱུ་པ་ལོ་ཀེ ག་ནྡྷ་ར་སཱ ཀ་བ་ལཱི༹་ཀཱ་རོ ཨཱ་ཧཱ་རོ ཙ མ་ཧཱ་བྷཱུ་ཏཱ་ན་ཉྩ ཕོ་ཊྛ་བྦ་ཀི་ཙྩ་ཏཱ ན་ཏྠི, ཏེ་ནེ་ཝ པཱ་ལི༹་ཡཾ ན ཨུ་དྡྷ་ཊཱ’’ཏི ཝ་ཏྭཱ ཏཾ སཱ་དྷེ་ཏུཾ བ་ཧུཾ ཧེ་ཏུ་པ་ཊི་རཱུ་པ་ཀཾ ཝ་ཏྭཱ པ་པ་ཉྩེ་ནྟི, ཏཾ ཏེ་སཾ མ་ཏི་མ་ཏྟ་མེ་ཝཱ་ཏི ན ག་ཧེ་ཏ་བྦཾ. ག་ནྡྷཱ་དཱི་ནཾ ཨ་ཝི་ནི་བྦྷོ་ག་ཏྟཱ, ཕོ་ཊྛ་བྦ་ཏྟཱ, དྷཱ་ཏུ་ས་བྷཱ་ཝ་ཏྟཱ ཙ གྷཱ་ནཱ་དི་ཏྟ་ཡ་བྷཱ་ཝ་དྭ་ཡ་སུ་ཁ་དུ་ཀྑ་དོ་མ་ན་སྶི་ནྡྲི་ཡཱ་ནི, པ་ན དོ་མ་ན་སྶ་ཧེ་ཏུ་ཀ་བ་ལཱི༹་ཀཱ་རཱ་ཧཱ་ར་གྷཱ་ནཱ་དི་ཏྟ་ཡ་ས་མྥ་སྶཱ་དཱི་ནི ཙ ཝ་ཛྫེ་ཏྭཱ ཙུ་དྡ་སི་ནྡྲི་ཡཱ་དི་བྷཱ་ཝོ ཝེ་དི་ཏ་བྦོ.

ཏ་ཏི་ཡ་ཀོ་ཊྛཱ་སེ པ་ན –

‘‘ཨ་རཱུ་པ་དྷཱ་ཏུ་ཡཱ ཙ་ཏྟཱ་རོ ཁ་ནྡྷཱ, དྭེ ཨཱ་ཡ་ཏ་ནཱ་ནི, དྭེ དྷཱ་ཏུ་ཡོ, ཏཱི་ཎི ས་ཙྩཱ་ནི, ཨེ་ཀཱ་ད་སི་ནྡྲི་ཡཱ་ནི, ཨ་ཊྛ ཧེ་ཏཱུ, ཏ་ཡོ ཨཱ་ཧཱ་རཱ, ཨེ་ཀོ ཕ་སྶོ…པེ… ཨེ་ཀཾ ཙི་ཏྟ’’ནྟི –

མཱ་ཏི་ཀཾ ནི་ཀྑི་པི་ཏྭཱ ཝི་བྷ་ཏྟཱ. ཨེ་ཏྠ ཙ ཙ་ཀྑུ་སོ་ཏ་ཨ་ན་ཉྙཱ་ཏ་ཉྙ་སྶཱ་མཱི་ཏི་ནྡྲི་ཡཱ་ན་མྤི ཨ་བྷཱ་ཝཱ ཨེ་ཀཱ་ད་སི་ནྡྲི་ཡཱ་ནི ཝེ་དི་ཏ་བྦཱ་ནི.

ཙ་ཏུ་ཏྠ་ཀོ་ཊྛཱ་སེ པ་ན –

‘‘ཨ་པ་རི་ཡཱ་པ་ནྣེ ཙ་ཏྟཱ་རོ ཁ་ནྡྷཱ, དྭེ ཨཱ་ཡ་ཏ་ནཱ་ནི, དྭེ དྷཱ་ཏུ་ཡོ, དྭེ ས་ཙྩཱ་ནི, དྭཱ་ད་སི་ནྡྲི་ཡཱ་ནི, ཚ ཧེ་ཏཱུ, ཏ་ཡོ ཨཱ་ཧཱ་རཱ, ཨེ་ཀོ ཕ་སྶོ…པེ… ཨེ་ཀཾ ཙི་ཏྟ’’ནྟི –

མཱ་ཏི་ཀཾ ནི་ཀྑི་པི་ཏྭཱ ཝི་བྷ་ཏྟཱ. ཡ་སྨཱ ཙ ཨོ་ཀཱ་ས་ཝ་སེ་ན ཝཱ ས་ཏྟུ་པྤ་ཏྟི་ཝ་སེ་ན ཝཱ ཨ་པ་རི་ཡཱ་པ་ནྣ་དྷཱ་ཏུ ནཱ་མ ན་ཏྠི, ཏ་སྨཱ ‘‘ཨ་པ་རི་ཡཱ་པ་ནྣ་དྷཱ་ཏུ་ཡཱ’’ཏི ཨ་ཝ་ཏྭཱ ནི་བྦ་ཏྟི་ཏ་ལོ་ཀུ་ཏྟ་ར་མེ་ཝ ད་སྶེ་ཏུཾ ‘‘ཨ་པ་རི་ཡཱ་པ་ནྣེ ཙ་ཏྟཱ་རོ ཁ་ནྡྷཱ’’ཏི་ཨཱ་དི ཝུ་ཏྟཾ. ཨེ་ཝཾ ཙ་ཏཱུ་ཧི ཀོ་ཊྛཱ་སེ་ཧི དུ་ཏི་ཡོ ཝཱ་རོ ཝེ་དི་ཏ་བྦོ.

ཏ་ཏི་ཡོ པ་ན ཝཱ་རོ –

‘‘རཱུ་པ་ཀྑ་ནྡྷོ ཀཱ་མ་དྷཱ་ཏུ་པ་རི་ཡཱ་པ་ནྣོ, ཙ་ཏྟཱ་རོ ཁ་ནྡྷཱ སི་ཡཱ ཀཱ་མ་དྷཱ་ཏུ་པ་རི་ཡཱ་པ་ནྣཱ, སི་ཡཱ ན ཀཱ་མ་དྷཱ་ཏུ་པ་རི་ཡཱ་པ་ནྣཱ’’ཏི་ཨཱ་དི་ནཱ –

ཙ་ཏཱུ་སུ བྷཱུ་མཱི་སུ ཙ་ཏཱུ་ཧི ཀོ་ཊྛཱ་སེ་ཧི ཏཾ་ཏཾ་བྷཱུ་མི་པ་རི་ཡཱ་པ་ནྣ་དྷ་མྨ་ད་སྶ་ན་ཝ་སེ་ན པ་ཝ་ཏྟོ, སོ ཙ ཧེ་ཊྛཱ ཝུ་ཏྟཱ་ནུ་སཱ་རེ་ན ས་ཀྐཱ ཉཱ་ཏུ་ནྟི ན ཝི་ཏྠཱ་རི་ཏོ. ཏ་ཏྠ ཙ ཀཱ་མ་དྷཱ་ཏུ་པ་རི་ཡཱ་པ་ནྣོཏི ཀཱ་མཱ་ཝ་ཙ་ར་བྷཱ་ཝེ་ན ཏ་ཏྠ ཨ་ནྟོ་ག་དྷོ ཀཱ་མཱ་ཝ་ཙ་རོ་ཏི ཨ་ཏྠོ. སེ་སེ་སུ་པི ཨེ་སེ་ཝ ན་ཡོ.

ཙ་ཏུ་ཏྠོ པ་ན ཝཱ་རོ ཏཱི་སུ བྷཱུ་མཱི་སུ ཙ་ཏཱུ་ཧི ཀོ་ཊྛཱ་སེ་ཧི པ་ཊི་ས་ནྡྷི་ཀྑ་ཎེ ཨུ་པྤ་ཛྫ་ན་ཀཱ་ནུ་པྤ་ཛྫ་ན་ཀ་དྷ་མྨ་ད་སྶ་ན་ཝ་སེ་ན པ་ཝ་ཏྟོ. ཏ་ཏྠ པ་ཋ་མ་ཀོ་ཊྛཱ་སེ ཏཱ་ཝ –

‘‘ཀཱ་མ་དྷཱ་ཏུ་ཡཱ ཨུ་པ་པ་ཏྟི་ཀྑ་ཎེ ས་བྦེ་སཾ པ་ཉྩ་ཀྑ་ནྡྷཱ པཱ་ཏུ་བྷ་ཝ་ནྟི, ཀ་སྶ་ཙི ཨེ་ཀཱ་ད་སཱ་ཡ་ཏ་ནཱ་ནི པཱ་ཏུ་བྷ་ཝ་ནྟི, ཀ་སྶ་ཙི ད་སཱ་ཡ་ཏ་ནཱ་ནི པཱ་ཏུ་བྷ་ཝ་ནྟི, ཀ་སྶ་ཙི ཨ་པ་རཱ་ནི ད་ས, ཀ་སྶ་ཙི ན་ཝ, ཀ་སྶ་ཙི ས་ཏྟ, ཀ་སྶ་ཙི ཨེ་ཀཱ་ད་ས དྷཱ་ཏུ་ཡོ…པེ… ས་ཏྟ དྷཱ་ཏུ་ཡོ. ས་བྦེ་སཾ ཨེ་ཀཾ ས་ཙྩཾ པཱ་ཏུ་བྷ་ཝ་ཏི. ཀ་སྶ་ཙི ཙུ་དྡ་སི་ནྡྲི་ཡཱ་ནི, ཀ་སྶ་ཙི ཏེ་ར་ས, ཀ་སྶ་ཙི ཨ་པ་རཱ་ནི ཏེ་ར་ས, ཀ་སྶ་ཙི དྭཱ་ད་ས, ཀ་སྶ་ཙི ད་ས, ཀ་སྶ་ཙི ན་ཝ, ཀ་སྶ་ཙི ཨ་པ་རཱ་ནི ན་ཝ, ཀ་སྶ་ཙི ཨ་ཊྛ, ཀ་སྶ་ཙི ཨ་པ་རཱ་ནི ཨ་ཊྛ, ཀ་སྶ་ཙི ས་ཏྟ, ཀ་སྶ་ཙི པ་ཉྩ, ཀ་སྶ་ཙི ཙ་ཏྟཱ་རི་ནྡྲི་ཡཱ་ནི པཱ་ཏུ་བྷ་ཝ་ནྟི, ཀ་སྶ་ཙི ཏ་ཡོ ཧེ་ཏཱུ པཱ་ཏུ་བྷ་ཝ་ནྟི, ཀ་སྶ་ཙི དྭེ, ཀ་སྶ་ཙི ཨ་ཧེ་ཏུ་ཀཱ པཱ་ཏུ་བྷ་ཝ་ནྟི. ས་བྦེ་སཾ ཙ་ཏྟཱ་རོ ཨཱ་ཧཱ་རཱ, ཨེ་ཀོ ཕ་སྶོ…པེ… ཨེ་ཀཾ ཙི་ཏྟཾ པཱ་ཏུ་བྷ་ཝ་ཏཱི’’ཏི –

མཱ་ཏི་ཀཾ ནི་ཀྑི་པི་ཏྭཱ ཝི་བྷ་ཏྟཱ. ཏ་ཏྠ པ་ཊི་ས་ནྡྷི་ཀྑ་ཎེ ཀཱ་མཱ་ཝ་ཙ་རཱ་ནཾ ཨོ་པ་པཱ་ཏི་ཀཱ་ནཾ, ཨཱ་པཱ་ཡི་ཀཱ་ནཾ, དེ་ཝ་མ་ནུ་སྶཱ་ནཾ པ་རི་པུ་ཎྞཱ་ཡ་ཏ་ནཱ་ནཾ ས་དྡཱ་ཡ་ཏ་ན་ཝ་ཛྫི་ཏཱ་ནི ཨེ་ཀཱ་ད་སཱ་ཡ་ཏ་ནཱ་ནི པཱ་ཏུ་བྷ་ཝ་ནྟི, ཏཱ་ནེ་ཝ ཨེ་ཀཱ་ད་ས དྷཱ་ཏུ་ཡོ ཧོ་ནྟི. ས་དྡོ ཧི ཨེ་ཀ་ནྟེ་ན པ་ཊི་ས་ནྡྷི་ཡཾ ན ཨུ་པྤ་ཛྫ་ཏི, ཏེ་ས་ཉྙེ་ཝ པ་ན ཛ་ཙྩ་ནྡྷཱ་ནཾ ད་ས, ཛ་ཙྩ་བ་དྷི་རཱ་ནཾ ཨ་པ་རཱ་ནི ད་ས, ཛ་ཙྩ་ནྡྷ་བ་དྷི་རཱ་ནཾ ན་ཝ, ག་བྦྷ་སེ་ཡྻ་ཀཱ་ནཾ རཱུ་པ་ག་ནྡྷ་ར་ས་ཀཱ་ཡ་ཕོ་ཊྛ་བྦ་མ་ནོ་དྷ་མྨ་ཝ་སེ་ན ས་ཏྟ ཨཱ་ཡ་ཏ་ན་དྷཱ་ཏུ་ཡོ པཱ་ཏུ་བྷ་ཝ་ནྟི. ཨོ་པ་པཱ་ཏི་ཀཱ་ནཾ ཏི་ཧེ་ཏུ་ཀཱ་ནཾ མ་ན་ཙྪ་ཊྛཱ་ནི ཨི་ནྡྲི་ཡཱ་ནི, བྷཱ་ཝ་དྭ་ཡེ ཨེ་ཀཾ, ཛཱི་ཝི་ཏི་ནྡྲི་ཡཾ, སོ་མ་ན་སྶུ་པེ་ཀྑི་ནྡྲི་ཡེ་སུ ཨེ་ཀཾ, ས་དྡྷཱ་དཱི་ནི པ་ཉྩཱ་ཏི ཙུ་དྡ་སི་ནྡྲི་ཡཱ་ནི, ཏེ་སཾ དྭི་ཧེ་ཏུ་ཀཱ་ནཾ པ་ཉྙི་ནྡྲི་ཡཾ ཝ་ཛྫེ་ཏྭཱ ཏེ་ར་ས, པ་ཋ་མ་ཀ་པྤི་ཀཱ་ནཾ མ་ནུ་སྶཱ་ནཾ ཏི་ཧེ་ཏུ་ཀཱ་ནཾ བྷཱ་ཝི་ནྡྲི་ཡཾ ཝ་ཛྫེ་ཏྭཱ ཨ་པ་རཱ་ནི་པི ཏེ་ར་ས, ཏེ་ས་ཉྙེ་ཝ དུ་ཧེ་ཏུ་ཀཱ་ནཾ དྭཱ་ད་ས, ག་བྦྷ་སེ་ཡྻ་ཀཱ་ནཾ པ་ན ཏི་ཧེ་ཏུ་ཀཱ་ནཾ པུ་རི་མེ་སུ ཙུ་དྡ་ས་སུ ཙ་ཀྑཱ་དཱི་ནི ཙ་ཏྟཱ་རི ཝ་ཛྫེ་ཏྭཱ ད་ས, ཏེ་སཾ དུ་ཧེ་ཏུ་ཀཱ་ནཾ ན་ཝ, ཨོ་པ་པཱ་ཏི་ཀཱ་ནཾ ཨ་ཧེ་ཏུ་ཀཱ་ནཾ པ་རི་པུ་ཎྞཱ་ཡ་ཏ་ནཱ་ནཾ པུ་རི་མེ་སུ ཙུ་དྡ་ས་སུ ས་དྡཱ་དཱི་ནི ཝ་ཛྫེ་ཏྭཱ ཨ་པ་རཱ་ནི ན་ཝ, ཏེ་ས་ཉྙེ་ཝ ཛ་ཙྩ་ནྡྷཱ་ནཾ ཨ་ཊྛ, ཏ་ཐཱ བ་དྷི་རཱ་ནཾ, ཨ་ནྡྷ་བ་དྷི་རཱ་ནཾ པ་ན ས་ཏྟ, ག་བྦྷ་སེ་ཡྻ་ཀཱ་ནཾ པ་ན ཨ་ཧེ་ཏུ་ཀཱ་ནཾ ཀཱ་ཡ་མ་ནོ་བྷཱ་ཝ་ཛཱི་ཝི་ཏ་ཨུ་པེ་ཀྑི་ནྡྲི་ཡཱ་ནི པ་ཉྩ, ཏེ་ས་ཉྙེ་ཝ ན་པུཾ་ས་ཀཱ་ནཾ ཙ་ཏྟཱ་རི པཱ་ཏུ་བྷ་ཝ་ནྟི. ཨ་ཧེ་ཏུ་ཀ་ཙི་ཏྟེ་སུ ཧི ཝི་ཛྫ་མཱ་ནཱ་པི ཨེ་ཀ་གྒ་ཏཱ ས་མཱ་དྷི་ནྡྲི་ཡ་ཏཾ ན ག་ཙྪ་ཏི, མ་ནོ་ཝི་ཉྙཱ་ཎ་དྷཱ་ཏུ་ཝ་སེ་ན པ་ན ‘‘ཨེ་ཀོ ཕ་སྶོ’’ཏི་ཨཱ་ད་ཡོ ཝེ་དི་ཏ་བྦཱ.

དུ་ཏི་ཡ་ཀོ་ཊྛཱ་སེ པ་ན –

‘‘རཱུ་པ་དྷཱ་ཏུ་ཡཱ ཨུ་པ་པ་ཏྟི་ཀྑ་ཎེ ཋ་པེ་ཏྭཱ ཨ་ས་ཉྙ་ས་ཏྟཱ་ནཾ དེ་ཝཱ་ནཾ པ་ཉྩ་ཀྑ་ནྡྷཱ པཱ་ཏུ་བྷ་ཝ་ནྟི. པ་ཉྩཱ་ཡ་ཏ་ནཱ་ནི, པ་ཉྩ དྷཱ་ཏུ་ཡོ, ཨེ་ཀཾ ས་ཙྩཾ, ད་སི་ནྡྲི་ཡཱ་ནི, ཏ་ཡོ ཧེ་ཏཱུ, ཏ་ཡོ ཨཱ་ཧཱ་རཱ, ཨེ་ཀོ ཕ་སྶོ…པེ… ཨེ་ཀཾ ཙི་ཏྟ’’ནྟི –

མཱ་ཏི་ཀཾ ནི་ཀྑི་པི་ཏྭཱ ཝི་བྷ་ཏྟཱ. ཏ་ཏྠ ཙ་ཀྑུ་རཱུ་པ་སོ་ཏ་མ་ནོ་དྷ་མྨཱ་ནཾ ཝ་སེ་ན པ་ཉྩཱ་ཡ་ཏ་ན་དྷཱ་ཏུ་ཡོ ཝེ་དི་ཏ་བྦཱ. ཨེ་ཏྠཱ་པི ག་ནྡྷ་ར་ས་ཕོ་ཊྛ་བྦཱ་ནཾ ཨ་གྒ་ཧ་ཎེ ཀཱ་ར་ཎཾ པུ་བྦེ ཝུ་ཏྟ་མེ་ཝ. ཙ་ཀྑུ་སོ་ཏ་མ་ནོ་ཛཱི་ཝི་ཏི་ནྡྲི་ཡཱ་ནི, སོ་མ་ན་སྶུ་པེ་ཀྑཱ་ནཾ ཨ་ཉྙ་ཏ་རཾ, ས་དྡྷཱ་དཱི་ནི པ་ཉྩཱ་ཏི ད་སི་ནྡྲི་ཡཱ་ནི ཝེ་དི་ཏ་བྦཱ་ནི.

ཏ་ཏི་ཡ་ཀོ་ཊྛཱ་སེ པ་ན –

‘‘ཨ་ས་ཉྙ་ས་ཏྟཱ་ནཾ དེ་ཝཱ་ནཾ ཨུ་པ་པ་ཏྟི་ཀྑ་ཎེ ཨེ་ཀོ ཁ་ནྡྷོ པཱ་ཏུ་བྷ་ཝ་ཏི རཱུ་པ་ཀྑ་ནྡྷོ, དྭེ ཨཱ་ཡ་ཏ་ནཱ་ནི རཱུ་པཱ་ཡ་ཏ་ནཾ དྷ་མྨཱ་ཡ་ཏ་ནཾ, དྭེ དྷཱ་ཏུ་ཡོ རཱུ་པ་དྷཱ་ཏུ དྷ་མྨ་དྷཱ་ཏུ, ཨེ་ཀཾ དུ་ཀྑ་ས་ཙྩཾ, ཨེ་ཀཾ རཱུ་པ་ཛཱི་ཝི་ཏི་ནྡྲི་ཡཾ, ཨ་ས་ཉྙ་ས་ཏྟཱ དེ་ཝཱ ཨ་ཧེ་ཏུ་ཀཱ, ཨ་ནཱ་ཧཱ་རཱ, ཨ་ཕ་སྶ་ཀཱ…པེ… ཨ་ཙི་ཏྟ་ཀཱ’’ཏི –

ས་ནི་དྡེ་ས་མཱ་ཏི་ཀཱ ནི་ཀྑི་ཏྟཱ. ཨེ་ཏྠ ཙ རཱུ་པ་མྤི ཀི་ཉྩཱ་པི ཏེ་སཾ ཨཱ་ཡ་ཏ་ནཱ་དི་ཀི་ཙྩཾ ན ཀ་རོ་ཏི, ས་ཝི་ཉྙཱ་ཎ་ཀ་རཱུ་པཱི་སུ པ་ན ག་ཧི་ཏ་ཏྟཱ ཨི་དྷཱ་པི ག་ཧི་ཏཾ. ག་ནྡྷཱ་ད་ཡོ པ་ན ཏ་ཏྠ ན ག་ཧི་ཏ་ཏྟཱ ཨི་དྷཱ་པི ན ག་ཧི་ཏཱ, ནོ ཨ་ཝི་ཛྫ་མཱ་ན་ཏཱ་ཡ. ཨེ་ཀ་ཏ་ལ་ཝཱ་སི་ཀཱ་ནཾ ཝཱ སེ་ས་བྲ་ཧྨཱ་ནཾ ཙ་ཀྑུ་ཝི་ས་ཡ་ཏྟཱ ཨི་དྷཱ་པི རཱུ་པཱ་ཡ་ཏ་ནཾ ཨུ་དྡྷ་ཊཾ, ཨ་ས་ཉྙཱི་ནཾ པ་ན པ་ཉྩཱ་ཡ་ཏ་ནཱ་ནི, ཨེ་ཀོ ཨཱ་ཧཱ་རོ ཨུ་པྤ་ཛྫ་ཏཱི་ཏི ཝེ་དི་ཏ་བྦཾ.

ཙ་ཏུ་ཏྠ་ཀོ་ཊྛཱ་སེ –

‘‘ཨ་རཱུ་པ་དྷཱ་ཏུ་ཡཱ ཨུ་པ་པ་ཏྟི་ཀྑ་ཎེ ཙ་ཏྟཱ་རོ ཁ་ནྡྷཱ, དྭེ ཨཱ་ཡ་ཏ་ནཱ་ནི, དྭེ དྷཱ་ཏུ་ཡོ, ཨེ་ཀཾ ས་ཙྩཾ, ཨ་ཊྛི་ནྡྲི་ཡཱ་ནི, ཏ་ཡོ ཧེ་ཏཱུ, ཏ་ཡོ ཨཱ་ཧཱ་རཱ, ཨེ་ཀོ ཕ་སྶོ…པེ… ཨེ་ཀཾ ཙི་ཏྟ’’ནྟི –

མཱ་ཏི་ཀཱ་པ་དཱ་ནི ནི་ཀྑི་པི་ཏྭཱ ཝི་བྷ་ཏྟཱ. ཨེ་ཏྠ ཙ མ་ནོ་ཛཱི་ཝི་ཏ་ཨུ་པེ་ཀྑི་ནྡྲི་ཡཱ་ནི, ས་དྡྷཱ་དཱི་ནི པ་ཉྩཱ་ཏི ཨ་ཊྛི་ནྡྲི་ཡཱ་ནི ཝེ་དི་ཏ་བྦཱ་ནི. སེ་སཾ སུ་ཝི་ཉྙེ་ཡྻ་མེ་ཝ. ཨེ་ཝཾ ཙ་ཏཱུ་ཧི ཀོ་ཊྛཱ་སེ་ཧི ཙ་ཏུ་ཏྠོ ཝཱ་རོ ཝེ་དི་ཏ་བྦོ.

པ་ཉྩ་མོ པ་ན ཝཱ་རོ ཏེ་སཾ དྷ་མྨཱ་ནཾ བྷཱུ་མ་ནྟ་ར་ཝ་སེ་ན ‘‘ཀཱ་མཱ་ཝ་ཙ་ར་དྷ་མྨཱ, ན ཀཱ་མཱ་ཝ་ཙ་རཱ…པེ… པ་རི་ཡཱ་པ་ནྣཱ’’ཏི ཙ་ཏྟཱ་རོ དུ་ཀེ མཱ་ཏི་ཀཱ་ཝ་སེ་ན ནི་ཀྑི་པི་ཏྭཱ ཝི་བྷ་ཛ་ན་ཝ་སེ་ན པ་ཝ་ཏྟོ, སོ ཧེ་ཊྛཱ ཝུ་ཏྟ་ཏྠོ་ཝ.

ཚ་ཊྛོ པ་ན ཝཱ་རོ ས་མྨུ་ཏི་དེ་ཝ་ཨུ་པ་པ་ཏྟི་དེ་ཝ་ཝི་སུ་དྡྷི་དེ་ཝེ ནི་དྡི་སི་ཏྭཱ མ་ནུ་སྶ་དེ་ཝ་ག་ཏཱི་སུ ཨུ་པྤཱ་ད་ཀ་ཀ་མྨ་ཨཱ་ཡུ་པྤ་མཱ་ཎ་ད་སྶ་ན་ཝ་སེ་ན ཝུ་ཏྟོ. ཏ་ཏྠཱ་ཡཾ ས་ངྑེ་པ་ཏྠོ – ས་ཏྟཱ ཧི དཱ་ན་སཱི་ལཱ་དི་ཀཱ་མཱ་ཝ་ཙ་ར་ཀུ་ས་ལཾ ཀ་ཏྭཱ མ་ནུ་སྶ་ལོ་ཀེ ཁ་ཏྟི་ཡ་མ་ཧཱ་སཱ་ལཱ་དི་ཀུ་ལེ་སུ ཙེ་ཝ ཙཱ་ཏུ་མ་ཧཱ་རཱ་ཛི་ཀ་ཏཱ་ཝ་ཏིཾ་ས་ཡཱ་མ་ཏུ་སི་ཏ་ནི་མྨཱ་ན་ར་ཏི་པ་ར་ནི་མྨི་ཏ་ཝ་ས་ཝ་ཏྟི་ས་ངྑཱ་ཏེ་སུ ཚ་སུ དེ་ཝ་ལོ་ཀེ་སུ ཙ ཨུ་པྤ་ཛྫ་ནྟི, ཏ་ཏྠ སི་ནེ་རུ་པ་བྦ་ཏ་ཝེ་མ་ཛ྄ཛྷ་པ་རི་བྷ་ཎྜ་པ་བྦ་ཏ་ཏོ པ་ཊྛཱ་ཡ ཧེ་ཊྛཱ ཡཱ་ཝ བྷཱུ་མི ཏི་རི་ཡཾ ཙ་ཀྐ་ཝཱ་ལ༹་པ་བྦ་ཏཾ ཨཱ་ཧ་ཙྩ ཨེ་ཏྠ་ནྟ་རེ པ་བྦ་ཏ་ཨཱ་ཀཱ་ས་རུ་ཀྑ་པ་ཐ་ཝི་ནི་སྶི་ཏཱ ཙཱ་ཏུ་མ་ཧཱ་རཱ་ཛ་ཙ་ནྡ་སཱུ་རི་ཡཱ ས་བྦེ ཙཱ་ཏུ་མ་ཧཱ་རཱ་ཛི་ཀཱ. ཏ་ཏོ ཨུ་དྡྷཾ ཙ་ཀྐ་ཝཱ་ལ༹་པ་རི་ཡ་ནྟཾ ཏཱ་ཝ་ཏིཾ་སཱ་ད་ཡོ ཡ་ཐཱ་ཀྐ་མཾ ཨུ་པ་རཱུ་པ་རི ཋི་ཏཱ་ཏི ཝེ་དི་ཏ་བྦཱ. དེ་ཝ་ལོ་ཀོ་པི པ་ར་མྤ་ར་ཙ་ཀྐ་ཝཱ་ལ༹་པ་བྦ་ཏཾ ཨ་པྤ་ཏྟོ ནཱ་མ ན་ཏྠི.

པ་ཋ་མ་ཛ྄ཛྷཱ་ནཾ པ་ན པ་རི་ཏྟཾ བྷཱ་ཝེ་ཏྭཱ བྲ་ཧྨ་པཱ་རི་ས་ཛྫེ་སུ ཨུ་པྤ་ཛྫ་ནྟི, མ་ཛ྄ཛྷི་མཾ བྷཱ་ཝེ་ཏྭཱ བྲ་ཧྨ་པུ་རོ་ཧི་ཏེ་སུ, པ་ཎཱི་ཏཾ བྷཱ་ཝེ་ཏྭཱ མ་ཧཱ་བྲ་ཧྨེ་སུ, ཨི་མེ ཏ་ཡོ་པི ཛ་ནཱ པ་ཋ་མ་ཛ྄ཛྷཱ་ན་བྷཱུ་མི་ཡཾ ཨེ་ཀ་ཏ་ལེ ཝ་ས་ནྟི. ཨཱ་ཡུ་ཨཱ་བྷཱ་དི་བྷེ་དེ་ན པ་ནེ་སཾ བྷེ་དོ, ཨེ་ཝཾ ཨུ་པ་རི་པི.

ཙ་ཏུ་ཀྐ་ན་ཡེ པ་ན དུ་ཏི་ཡ་ཛ྄ཛྷཱ་ནཾ, པ་ཉྩ་ཀ་ན་ཡེ དུ་ཏི་ཡ་ཏ་ཏི་ཡ་ཛ྄ཛྷཱ་ན་ཉྩ པ་རི་ཏྟཾ, མ་ཛ྄ཛྷི་མཾ, པ་ཎཱི་ཏ་ཉྩ བྷཱ་ཝེ་ཏྭཱ པ་རི་ཏྟཱ་བྷཱ་ཨ་པྤ་མཱ་ཎཱ་བྷཱ་ཨཱ་བྷ་སྶ་རེ་སུ ཨུ་པྤ་ཛྫ་ནྟི. ཏ་ཏི་ཡ་ཛ྄ཛྷཱ་ནཾ པ་རི་ཏྟཱ་དི་ཝ་སེ་ན བྷཱ་ཝེ་ཏྭཱ པ་རི་ཏྟ་སུ་བྷ་ཨ་པྤ་མཱ་ཎ་སུ་བྷ་སུ་བྷ་ཀི་ཎྷེ་སུ. ཙ་ཏུ་ཏྠ་ཛ྄ཛྷཱ་ནཾ པ་ན བྷཱ་ཝེ་ཏྭཱ ཨཱ་ར་མྨ་ཎ་མ་ན་སི་ཀཱ་ར་ཚ་ནྡཱ་དྷི་མུ་ཏྟི་ཨཱ་དི་ནཱ་ན་ཏྟ་ཏོ ཀེ་ཙི ཨ་ས་ཉྙཱི་སུ, ཀེ་ཙི ཝེ་ཧ་པྥ་ལེ་སུ, ཀེ་ཙི ཨ་ཝི་ཧེ་སུ, ཨ་ཏ་པྤེ་སུ, སུ་ད་སྶེ་སུ, སུ་ད་སྶཱི་སུ, ཀེ་ཙི ཨ་ཀ་ནི་ཊྛེ་སུ, ཨཱ་ཀཱ་སཱ་ན་ཉྩཱ་ཡ་ཏ་ནཱ་དཱི་སུ ཙ་ཏཱུ་སུ ཙ ཡ་ཐཱ་ཀྐ་མཾ ཨུ་པྤ་ཛྫ་ནྟི. ཏ་ཏྠ ཧི ཨེ་ཀ་ཙྩེ ཏི་ཏྠི་ཡཱ ‘‘ཙི་ཏྟཾ ནི་སྶཱ་ཡ ར་ཛྫ་ན་དུ་སྶ་ནཱ་ད་ཡོ, ཏ་ནྣི་དཱ་ནཱ་ནི ཙ དུ་ཀྑཱ་ནི ས་མུ་པྤ་ཛྫ་ནྟཱི’’ཏི ཙི་ཏྟེ དོ་སཾ དི་སྭཱ ‘‘དི་ཊྛ་དྷ་མྨ་ནི་བྦཱ་ན་མེ་ཏ’’ནྟི ས་ཉྙཱ་ཝི་རཱ་གཾ ཛ་ནེ་ཏྭཱ ཏ་ཏྲཱུ་པ་པ་ཏྟི་ཡཱ ཛྷཱ་ནཾ བྷཱ་ཝེ་ཏྭཱ རཱུ་པ་ཀཱ་ཡ་མ་ཏྟཱ ཋི་ཏཱ ཝཱ ནི་སི་ནྣཱ ཝཱ ནི་པ་ནྣཱ ཝཱ ཧུ་ཏྭཱ ནི་བྦ་ཏྟི་ཏྭཱ ཏ་ཏྠེ་ཝ པ་ཉྩ་ཀ་པྤ་ས་ཏཱ་ནི ཏི་ཊྛ་ནྟཱི་ཏི ཝེ་དི་ཏ་བྦཱ.

ཨ་ཊྛ་ས་མཱ་པ་ཏྟི་ལཱ་བྷཱི་ནཾ ཀ་ཏ་རཾ ཛྷཱ་ནཾ ཝི་པ་ཙྩ་ཏཱི་ཏི? པ་གུ་ཎཾ, ས་བྦེ་སུ པ་གུ་ཎེ་སུ ཡ་སྶ ཝི་པཱ་ཀ་བྷཱུ་མིཾ པ་ཏྠེ་ཏི, ཏཾ་པ་ཏྠ་ནཱ་ཡ ཙ ཨ་ས་ཏི ཡཾ མ་ར་ཎ་ས་མ་ཡེ ས་མཱ་པ་ཛྫ་ཏི, ཏཾ, ཏ་སྨི་མྤི ཨ་ས་ཏི ཨུ་ཏྟ་མ་ཝ་སེ་ན ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནཾ ཝི་པ་ཙྩ་ཏི. སུ་དྡྷཱ་ཝཱ་སེ་སུ ཙ ཨ་ཝི་ཧཱ་དཱི་སུ ཨ་ནཱ་གཱ་མི་ཝ་ཛྫི་ཏཱ ས་ཏྟཱ ན ཨུ་པྤ་ཛྫ་ནྟི, ཨ་ནཱ་གཱ་མི་ནོ པ་ན ཨ་ས་ཉྙཱི་ཝ་ཛྫི་ཏ་བྲ་ཧྨ་ལོ་ཀེ་སུ ས་བྦ་ཏྠ ཨུ་པྤ་ཛྫི་ཏུཾ ལ་བྷ་ནྟི. ས་བྦེ་ས་མྤི ཙ ཨ་རི་ཡཱ་ནཾ ཏ་ཏྲཱུ་པ་པ་ཏྟི་ཏོ ཨུ་པ་རཱུ་པ་པ་ཏྟི་པི, ན ཧེ་ཊྛཱུ་པ་པ་ཏྟི. ཏེ ཧི པ་ཋ་མ་ཛ྄ཛྷཱ་ན་བྷཱུ་མི་ཡཾ ནི་བྦ་ཏྟཱ ཨ་ནཱ་གཱ་མི་ནོ ན་ཝ བྲ་ཧྨ་ལོ་ཀེ སོ་དྷེ་ཏྭཱ མ་ཏྠ་ཀེ ཝེ་ཧ་པྥ་ལེ་སུ ཋི་ཏཱ པ་རི་ནི་བྦ་ནྟི, ན ནི་ཝ་ཏྟ་ནྟི ཨ་རི་ཡཱ་ནཾ ཧེ་ཊྛཱུ་པ་པ་ཏྟི་ཨ་བྷཱ་ཝཱ. ཝེ་ཧ་པྥ་ལ་ཨ་ཀ་ནི་ཊྛ་ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ན་བྷ་ཝཱ ཏ་ཡོ་པི སེ་ཊྛ་བྷ་ཝཱ ནཱ་མ. ཨི་མེ་སུ ཏཱི་སུ ཋཱ་ནེ་སུ ནི་བྦ་ཏྟཱ ཨ་ནཱ་གཱ་མི་ནོ ནེ་ཝ ཨུ་དྡྷཾ ག་ཙྪ་ནྟི, ན ཨ་དྷོ. ཏ་ཏྠེ་ཝ པ་རི་ནི་བྦཱ་ཡ་ནྟི. མ་ནུ་སྶ་ལོ་ཀེ ཙ སེ་ཁཱ གི་ཧི་བྷཱ་ཝེ ཡཱ་ཝ་ཛཱི་ཝཾ ཏི་ཊྛ་ནྟི, ན ཨ་སེ་ཁཱ. ཏེ ཧི ཨ་ར་ཧ་ཏྟཾ པ་ཏྟ་དི་ཝ་སེ པ་བྦ་ཛ་ནྟི ཝཱ, པ་རི་ནི་བྦ་ནྟི ཝཱ. བྷུ་མྨ་དེ་ཝེ་སུ པ་ན ཁཱི་ཎཱ་ས་ཝཱ་པི ཡཱ་ཝ་ཛཱི་ཝཾ ཏི་ཊྛ་ནྟི. ཚ་སུ ཀཱ་མཱ་ཝ་ཙ་ར་དེ་ཝེ་སུ སོ་ཏཱ་པ་ནྣ་ས་ཀ་དཱ་གཱ་མི་ནོ་ཝ ཏི་ཊྛ་ནྟི, ཨ་ནཱ་གཱ་མི་ནོ པ་ན ཏ་ད་ཧེ་ཝ རཱུ་པ་བྷ་ཝཾ ག་ནྟུཾ ཝ་ཊྚ་ཏི ཁཱི་ཎཱ་ས་ཝེ་ན པ་རི་ནི་བྦཱ་ཏུ་ནྟི ག་ཧེ་ཏ་བྦཾ. ཨེ་ཝཾ ཨི་མཱ་སུ ས་ཏྟ་ཝཱི་ས་ཏི་ཡཱ བྷཱུ་མཱི་སུ པ་རི་ཡཱ་པ་ནྣ་མ་ནུ་སྶ་དེ་ཝ་བྲ་ཧྨ་ལོ་ཀེ་སུ ནི་བྦ་ཏྟ་ས་ཏྟེ་སུ མ་ནུ་སྶཱ་ནཾ ཏཱ་ཝ ཨི་མ་སྨིཾ བུ་དྡྷུ་པྤཱ་དེ་ཝ ཝ་སྶ་ས་ཏཾ ཨཱ་ཡུ་པྤ་མཱ་ཎཾ, ཨ་པྤཾ ཝཱ བྷི་ཡྻོ. ཨཱ་པཱ་ཡི་ཀཱ་ནཾ, བྷུ་མྨ་དེ་ཝཱ་ན་ཉྩ ཀ་དཱ་ཙི ཨཱ་ཡུ་པ་རི་ཙྪེ་དོ ན་ཏྠི, ཀ་མྨ་མེ་ཝ པ་མཱ་ཎཾ. ཏེ ཧི ས་ཏྟཱ་ཧེ་ན་པི མ་ར་ནྟི, ཀ་པྤ་མྤི ཏི་ཊྛ་ནྟཱི་ཏི.

ཙཱ་ཏུ་མ་ཧཱ་རཱ་ཛི་ཀཱ་ནཾ པ་ན མཱ་ནུ་ས་ཀཱ་ནི པ་ཉྙཱ་ས ཝ་སྶཱ་ནི ཨེ་ཀཾ ར་ཏྟི་ནྡི་ཝཾ, ཏཱ་ཡ ར་ཏྟི་ཡཱ ཏིཾ་ས ར་ཏྟི་ཡོ མཱ་སོ, ཏེ་ན མཱ་སེ་ན དྭཱ་ད་ས་མཱ་སི་ཡོ སཾ་ཝ་ཙྪ་རོ, ཏེ་ན སཾ་ཝ་ཙྪ་རེ་ན དི་བྦཱ་ནི པ་ཉྩ་ཝ་སྶ་ས་ཏཱ་ནི ཨཱ་ཡུ་པྤ་མཱ་ཎཾ. ཏཱ་ནི མ་ནུ་སྶ་ག་ཎ་ནཱ་ཡ ན་ཝུ་ཏི་ཝ་སྶ་ས་ཏ་ས་ཧ་སྶཱ་ནི ཧོ་ནྟི. ཏཱ་ཝ་ཏིཾ་སཱ་ནཾ མཱ་ནུ་ས་ཀཾ ཝ་སྶ་ས་ཏཾ ཨེ་ཀཾ ར་ཏྟི་ནྡི་ཝཾ ཀ་ཏྭཱ ཨེ་ཝ་མཱ་ག་ཏཾ དི་བྦཾ ཝ་སྶ་ས་ཧ་སྶཾ. ཨེ་ཝཾ ཡཱ་མཱ་དཱི་ནཾ ཝ་སྶ་ག་ཎ་ན་ཉྩ དི་གུ་ཎཾ ཀ་ཏྭཱ ཧེ་ཊྛི་མ་ཏོ དི་གུ་ཎ་ཙ་ཏུ་གྒུ་ཎཾ ཨཱ་ཡུ་པྤ་མཱ་ཎཾ ཝེ་དི་ཏ་བྦཾ.

བྲ་ཧྨེ་སུ པ་ན བྲ་ཧྨ་པཱ་རི་ས་ཛྫཱ་ནཾ ཀ་པྤ་སྶ ཏ་ཏི་ཡོ བྷཱ་གོ ཨཱ་ཡུ་པྤ་མཱ་ཎཾ, བྲ་ཧྨ་པུ་རོ་ཧི་ཏཱ་ནཾ ཨུ་པ་ཌྜྷ་ཀ་པྤོ, མ་ཧཱ་བྲ་ཧྨཱ་ནཾ ཨེ་ཀོ ཀ་པྤོ, པ་རི་ཏྟཱ་བྷཱ་ནཾ དྭེ ཀ་པྤཱ་ཏི ཨེ་ཝཾ ཨུ་པ་རཱུ་པ་རི དི་གུ་ཎཾ ཀ་ཏྭཱ ཡཱ་ཝ སུ་བྷ་ཀི་ཎྷཱ ཡོ་ཛེ་ཏ་བྦཾ. སུ་བྷ་ཀི་ཎྷཱ་ནཾ ཧི ཙ་ཏུ་ས་ཊྛི་ཀ་པྤཾ ཨཱ་ཡུ་པྤ་མཱ་ཎཾ, ཨ་ས་ཉྙཱི་ནཾ, ཝེ་ཧ་པྥ་ལཱ་ན་ཉྩ པ་ཉྩ་ཀ་པྤ་ས་ཏཱ་ནི, ཨ་ཝི་ཧཱ་ནཾ ཀ་པྤ་ས་ཧ་སྶ་ནྟི ཨུ་པ་རཱུ་པ་རི དི་གུ་ཎ་ཝ་སེ་ན ཡཱ་ཝ ཨ་ཀ་ནི་ཊྛཱ ཡོ་ཛེ་ཏ་བྦཾ. ཨ་ཀ་ནི་ཊྛཱ་ནཾ ཧི སོ་ལ༹་ས་ཀ་པྤ་ས་ཧ་སྶཱ་ནི, ཨ་རཱུ་པཱ་ནཾ ཙ་ཏུ་ནྣཾ ཡ་ཐཱ་ཀྐ་མཾ ཝཱི་ས་ཏི, ཙ་ཏྟཱ་རི, ས་ཊྛི, ཙ་ཏུ་རཱ་སཱི་ཏི ཀ་པྤ་ས་ཧ་སྶཱ་ནི ཨཱ་ཡུ་པྤ་མཱ་ཎ་ནྟི.

ཨུ་ཀྑི་ཏྟཱ པུ་ཉྙ་ཏེ་ཛེ་ན, ཀཱ་མ་རཱུ་པ་ག་ཏིཾ ག་ཏཱ;

བྷ་ཝ་གྒ་ཏ་མྤི ས་མྤ་ཏྟཱ, པུ་ནཱ་ག་ཙྪ་ནྟི དུ་གྒ་ཏིཾ.

ཏཱ་ཝ དཱི་གྷཱ་ཡུ་ཀཱ ས་ཏྟཱ, ཙ་ཝ་ནྟི ཨཱ་ཡུ་ས་ངྑ་ཡཱ;

ན་ཏྠི ཀོ་ཙི བྷ་ཝོ ནི་ཙྩོ, ཨི་ཏི ཝུ་ཏྟཾ མ་ཧེ་སི་ནཱ.

ཏ་སྨཱ ཧི དྷཱི་རཱ ནི་པ་ཀཱ, ནི་པུ་ཎཱ ཨ་ཏྠ་ཙི་ནྟ་ཀཱ;

ཛ་རཱ་མ་ར་ཎ་མོ་ཀྑཱ་ཡ, བྷཱ་ཝེ་ནྟི མ་གྒ་མུ་ཏྟ་མཾ.

བྷཱ་ཝ་ཡི་ཏྭཱ སུ་ཙིཾ མ་གྒཾ, ནི་བྦཱ་ནོ་ག་དྷ་གཱ་མི་ནཾ;

ས་བྦཱ་ས་ཝེ པ་རི་ཉྙཱ་ཡ, པ་རི་ནི་བྦ་ནྟི ཨ་ནཱ་ས་ཝཱ་ཏི. (ཝི་བྷ. ༡༠༢༩);

ཨ་ཡཾ ཚ་ཊྛ་ཝཱ་རེ ན་ཡོ.

ས་ཏྟ་མོ པ་ན ཝཱ་རོ ཏེ་སཾ ཁ་ནྡྷཱ་དཱི་ནཾ ཨ་བྷི་ཉྙེ་ཡྻཱ་དི་བྷཱ་ཝ་ཝི་བྷཱ་ཝ་ན་ཝ་སེ་ན པ་ཝ་ཏྟོ. ཏ་ཏྠ ཧི –

‘‘རཱུ་པ་ཀྑ་ནྡྷོ ཨ་བྷི་ཉྙེ་ཡྻོ, པ་རི་ཉྙེ་ཡྻོ, ན པ་ཧཱ་ཏ་བྦོ, ན བྷཱ་ཝེ་ཏ་བྦོ, ན ས་ཙྪི་ཀཱ་ཏ་བྦོ. ཙ་ཏྟཱ་རོ ཁ་ནྡྷཱ ཨ་བྷི་ཉྙེ་ཡྻཱ པ་རི་ཉྙེ་ཡྻཱ, སི་ཡཱ པ་ཧཱ་ཏ་བྦཱ, སི་ཡཱ བྷཱ་ཝེ་ཏ་བྦཱ, སི་ཡཱ ས་ཙྪི་ཀཱ་ཏ་བྦཱ, སི་ཡཱ ན པ་ཧཱ་ཏ་བྦཱ ན བྷཱ་ཝེ་ཏ་བྦཱ ན ས་ཙྪི་ཀཱ་ཏ་བྦཱ’’ཏི་ཨཱ་དི་ནཱ –

དྭཱ་ད་ས་པི ཀོ་ཊྛཱ་སཱ ཝི་ཏྠཱ་ར་ཏོ ཝི་བྷ་ཏྟཱ. ཏ་ཏྠ ལ་ཀྑ་ཎ་པ་རི་གྒཱ་ཧི་ཀཱ་ཡ པ་ཉྙཱ་ཡ ཁ་ནྡྷཱ་ད་ཡོ ས་བྦེ དྷ་མྨཱ ཨ་བྷི་ཉྙེ་ཡྻཱ. ཉཱ་ཏ་ཏཱི་ར་ཎ་པ་ཧཱ་ན་པ་རི་ཉྙཱ་སུ ཡ་ཐཱ་ཡོ་གཾ ཡཱ་ཡ ཀཱ་ཡ་ཙི པ་རི་ཉྙཱ་ཡ ཝ་སེ་ན ས་བྦེ་པི དྷ་མྨཱ པ་རི་ཉྙེ་ཡྻཱ. ལོ་ཀུ་ཏྟ་ར་དྷ་མྨཱ་པི ཉཱ་ཏ་པ་རི་ཉྙེ་ཡྻཱ་ཝ. ཨ་ཀུ་ས་ལཱ པ་ན པ་ཧཱ་ཏ་བྦཱ. མ་གྒོ བྷཱ་ཝེ་ཏ་བྦོ, ཕ་ལཾ, ནི་བྦཱ་ན་ཉྩ ས་ཙྪི་ཀཱ་ཏ་བྦཾ. ཏ་ཏྠ རཱུ་པ་ཀྑ་ནྡྷོ ཉཱ་ཏ་ཏཱི་ར་ཎ་ཝ་སེ་ན པ་རི་ཉྙེ་ཡྻོ. ཝི་པ་སྶ་ནཱ་ཝི་ས་ཡེ ཧི ས་བྦཾ ཏཱི་ར་ཎ་པ་རི་ཉྙཱ་ཡ པ་རི་ཉྙེ་ཡྻ་ནྟི. ཨི་མི་ནཱ ན་ཡེ་ན ས་བྦ་ཏྠ ཨ་བྷི་ཉྙེ་ཡྻཱ་དི་བྷཱ་ཝོ ཝེ་དི་ཏ་བྦོ.

ཨ་ཊྛ་མོ པ་ན ཝཱ་རོ ཏེ་སཾ སཱ་ར་མྨ་ཎ་ཏཱ་ཝི་བྷཱ་ཝ་ན་ཝ་སེ་ན པ་ཝ་ཏྟོ, ན་ཝ་མོ པ་ནེ་སཾ དི་ཊྛ་སུ་ཏ་མུ་ཏ་ཝི་ཉྙཱ་ཏེ་སུ ས་ངྒ་ཧ་ད་སྶ་ན་ཝ་སེ་ན. ད་ས་མོ ཀུ་ས་ལ་ཏྟི་ཀཱ་དཱི་ཧི ས་ར་ཎ་དུ་ཀ་པ་རི་ཡོ་སཱ་ནེ་ཧི ཏི་ཀ་དུ་ཀེ་ཧི ཝི་བྷཱ་ག་ད་སྶ་ན་ཝ་སེ་ན པ་ཝ་ཏྟོ, ཏེ་པི ཧེ་ཊྛཱ ཝུ་ཏྟ་ན་ཡཱ་ཝཱ་ཏི ཨ་ཡ་མེ་ཏྠ ས་ངྑེ་པོ, ཝི་ཏྠཱ་རོ པ་ནེ་ཏྠ ཧེ་ཊྛཱ ཝུ་ཏྟོ་ཡེ་ཝ. ཨཱ་དི་ཏོ པ་ཊྛཱ་ཡ ས་བྦ་ཏྠ ཝི་བྷ་ངྒ་པཱ་ལི༹་ཨ་ཊྛ་ཀ་ཐཱ་སུ (ཝི་བྷ. ༩༧༨ ཨཱ་ད་ཡོ; ཝི་བྷ. ཨ་ཊྛ. ༩༧༨ ཨཱ་ད་ཡོ) ག་ཧེ་ཏ་བྦོ་ཏི.

དྷ་མྨ་ཧ་ད་ཡ་ཝི་བྷ་ངྒ་མཱ་ཏི་ཀ་ཏྠ་ཝ་ཎྞ་ནཱ ནི་ཊྛི་ཏཱ.

མོ་ཧ་ཝི་ཙྪེ་ད་ནི་ཡཱ ཨ་བྷི་དྷ་མྨ་མཱ་ཏི་ཀ་ཏྠ་ཝ་ཎྞ་ནཱ་ཡ

ཝི་བྷ་ངྒ་མཱ་ཏི་ཀ་ཏྠ་ཝ་ཎྞ་ནཱ ནི་ཊྛི་ཏཱ.