པ་ཊི་ས་མྦྷི་དཱ་ཝི་བྷ་ངྒ་མཱ་ཏི་ཀ་ཏྠ་ཝ་ཎྞ་ནཱ
པ་ཊི་ས་མྦྷི་དཱ་ཝི་བྷ་ངྒ་མཱ་ཏི་ཀཱ་ཡ ཨ་ཏྠ་ཏོ ཏཱ་ཝ – ཙ་ཏ་སྶོ པ་ཊི་ས་མྦྷི་དཱཏི ཙ་ཏྟཱ་རོ པ་བྷེ་དཱ. ནི་དྡེ་སེ པ་ན ‘‘ཨ་ཏྠེ ཉཱ་ཎཾ ཨ་ཏྠ་པྤ་ཊི་ས་མྦྷི་དཱ’’ཏི་ཨཱ་དི་ནཱ (ཝི་བྷ. ༧༡༨) ཉཱ་ཎ་ཝ་སེ་ན ནི་དྡི་ཊྛ་ཏྟཱ ཉཱ་ཎ་སྶེ་ཝ, ན ཨ་ཉྙ་སྶ ཀ་སྶ་ཙཱི་ཏི ཝེ་དི་ཏ་བྦཾ. ཨ་ཏྠ་པ་ཊི་ས་མྦྷི་དཱཏི ཨ་ཏྠ་ཝི་ས་ཡ་ཉཱ་ཎ་པྤ་བྷེ་དཱ, ཨ་ཏྠ་པྤ་བྷེ་ད་ས་ལླ་ཀྑ་ཎ་ཝི་བྷཱ་ཝ་ན་ཝ་ཝ་ཏྠཱ་ན་ཀ་ར་ཎ་ས་མ་ཏྠ་ཏཱ་ཝ་སེ་ན ཨ་ཏྠེ པ་བྷེ་ད་ག་ཏཾ ཉཱ་ཎ་ནྟི ཨ་ཏྠོ. སེ་ས་པ་དེ་སུ་པི ཨེ་སེ་ཝ ན་ཡོ. ཨེ་ཏྠ ཙ ཨ་ཏྠོཏི ཧེ་ཏུ་ཕ་ལཾ. སོ ཧི ཧེ་ཏུ་ཝ་སེ་ན ཨ་ར་ཎཱི་ཡ་ཏོ ག་ནྟ་བྦ་ཏོ, ཨུ་པྤཱ་དེ་ཏ་བྦ་ཏོ ཙ ‘‘ཨ་ཏྠོ’’ཏི ཝུ་ཙྩ་ཏི. པ་བྷེ་ད་ཏོ པ་ནེ་སོ་པི པ་ཉྩ་ཝི་དྷོ ཧོ་ཏི ཡཾ ཀི་ཉྩི པ་ཙྩ་ཡུ་པྤ་ནྣཾ, ནི་བྦཱ་ནཾ, བྷཱ་སི་ཏ་ཏྠོ, ཝི་པཱ་ཀོ, ཀི་རི་ཡཱ་ཏི.
དྷ་མྨོཏི པ་ཙྩ་ཡོ, སོ ཧི ཕ་ལཾ ཝི་ད་ཧ་ཏི པ་ཝ་ཏྟེ་ཏི ཨུ་པྤཱ་དེ་ཏི ཙེ་ཝ པཱ་པེ་ཏི ཙཱ་ཏི ‘‘དྷ་མྨོ’’ཏི ཝུ་ཙྩ་ཏི. པ་བྷེ་ད་ཏོ པ་ནེ་སོ་པི པ་ཉྩ་ཝི་དྷོ ཧོ་ཏི ཡོ ཀོ་ཙི ཕ་ལ་ནི་བྦ་ཏྟ་ཀོ ཧེ་ཏུ, ཨ་རི་ཡ་མ་གྒོ, བྷཱ་སི་ཏཾ, ཀུ་ས་ལཾ, ཨ་ཀུ་ས་ལ་ནྟི.
ནི་རུ་ཏྟཱིཏི ཡ་ཐཱ་ཝུ་ཏྟཱ་ནཾ དྷ་མྨཱ་ནཾ, ཨ་ཏྠཱ་ན་ཉྩ ཝཱ་ཙ་ཀོ ས་བྷཱ་ཝ་ནི་རུ་ཏྟི་ས་ངྑཱ་ཏོ ས་དྡོ. ཨི་མཱ དྷ་མྨ་ཏྠ་ནི་རུ་ཏྟི་ཡོ ཨཱ་ར་མྨ་ཎཾ ཀ་ཏྭཱ པ་ཙྩ་ཝེ་ཀྑ་ནྟ་སྶ ཏ་ཏྠ ཏ་ཏྠ པ་བྷེ་ད་ག་ཏཾ ཉཱ་ཎཾ ནི་རུ་ཏྟི་པ་ཊི་ས་མྦྷི་དཱ ནཱ་མ.
ཨེ་ཏྠ ཙ ནི་རུ་ཏྟི་པ་ཊི་ས་མྦྷི་དཱ ས་དྡཱ་ར་མྨ་ཎཱ, ན པ་ཉྙ་ཏྟཱ་ར་མྨ་ཎཱ, པ་ཊི་ས་མྦྷི་དཱ་པ་ཏྟོ ཧི ‘‘ཕ་སྶོ ཝེ་ད་ནཱ’’ཏི་ཨཱ་དི་ཀཾ ས་དྡཾ སུ་ཏྭཱ ‘‘ཨ་ཡཾ ས་བྷཱ་ཝ་ནི་རུ་ཏྟཱི’’ཏི ཛཱ་ནཱ་ཏི, ‘‘ཕ་སྶཱ ཝེ་ད་ནོ’’ཏི་ཨཱ་དི་ཀཾ པ་ན ‘‘ན ས་བྷཱ་ཝ་ནི་རུ་ཏྟཱི’’ཏི ཛཱ་ནཱ་ཏི. ས་བྷཱ་ཝ་ནི་རུ་ཏྟཱི་ཏི (ཝི་བྷ. ཨ་ཊྛ. ༧༡༨) ཙ མཱ་ག་དྷི་ཀཱ བྷཱ་སཱ, ཡཱ་ཡ ས་མྨཱ་ས་མྦུ་དྡྷཱ ཏེ་པི་ཊ་ཀཾ བུ་དྡྷ་ཝ་ཙ་ནཾ ཏ་ནྟིཾ ཨཱ་རོ་པེ་ནྟི, བྲ་ཧྨཱ་ནོ ཙ ཨ་གཱ་མ་ཀེ ཨ་ར་ཉྙེ ཀི་ཉྩི ཝ་ཙ་ནཾ ཨ་སུ་ཏྭཱ ཝ་ཌྜྷི་ཏ་དཱ་ར་ཀཱ ཙ ཨ་ཏྟ་ནོ དྷ་མྨ་ཏཱ་ཡ བྷཱ་ས་ནྟི, ཡཱ ཙ ཨ་པཱ་ཡེ་སུ མ་ནུ་སྶེ དེ་ཝ་ལོ་ཀེ ཙེ་ཝ མཱ་ག་དྷ་བྷཱ་སཱ ཨུ་སྶ་ནྣཱ, པ་ཙྪཱ ཙ ཏ་ཏོ ཨ་ནྡྷ་ཀ་ཡོ་ན་ཀ་ད་མི་ལཱ༹་དི་དེ་ས་བྷཱ་སཱ ཙེ་ཝ ས་ཀྐ་ཏཱ་དི་ཨ་ཊྛཱ་ར་ས་མ་ཧཱ་བྷཱ་སཱ ཙ ནི་བྦ་ཏྟཱ, སཱ ཧི ཡ་སྨཱ ཨི་ཏ་རཱ་སུ བྷཱ་སཱ་སུ པ་རི་ཝ་ཏྟ་ནྟཱ་སུ་པི ན པ་རི་ཝ་ཏྟ་ཏི, ས་བྦ་ཀཱ་ལཾ ཨ་ཏྟ་ནོ ས་བྷཱ་ཝེ ཨེ་ཝ ཏི་ཊྛ་ཏི, ཏ་སྨཱ ‘‘ས་བྷཱ་ཝ་ནི་རུ་ཏྟཱི’’ཏི ཝུ་ཙྩ་ཏི. ཡཱ བྲ་ཧྨ་ཝོ་ཧཱ་རོ, ཨ་རི་ཡ་ཝོ་ཧཱ་རོ་ཏི ཙ ཝུ་ཙྩ་ཏི, ཏཱ་ཡ པ་ན མཱ་ག་དྷ་བྷཱ་སཱ་ཡ ཏ་ནྟིཾ ཨཱ་རུ་ལ༹ྷ་སྶ བུ་དྡྷ་ཝ་ཙ་ན་སྶ པ་ཊི་ས་མྦྷི་དཱ་པ་ཏྟཱ་ནཾ སོ་ཏ་པ་ཐཱ་ག་མ་ན་མེ་ཝ པ་པ་ཉྩོ. སོ་ཏེ པ་ན ས་ངྒྷ་ཊྚི་ཏ་མ་ཏྟེ ཨེ་ཝ ན་ཡ་ས་ཏེ་ན ན་ཡ་ས་ཧ་སྶེ་ན ཨ་ཏྠོ ཨུ་པ་ཊྛཱ་ཏི. ཨ་ཉྙཱ་ཡ པ་ན བྷཱ་སཱ་ཡ ཏ་ནྟིཾ ཨཱ་རུ་ལ༹ྷཾ ཏཾ ཏེ་སཾ ཙི་ཏྟཾ ས་ཧ་སཱ ནཱ་རོ་ཧ་ཏི, ཀི་ཙྪེ་ན ཨུ་གྒ་ཧེ་ཏ་བྦཾ ཧོ་ཏི, པུ་ཐུ་ཛྫ་ནཱ་ན་ཉྩ ས་ཀ་ལཾ བུ་དྡྷ་ཝ་ཙ་ནཾ ཨུ་གྒ་ཧེ་ཏྭཱ་པི པ་ཊི་ས་མྦྷི་དཱ་པ་ཏྟི ནཱ་མ ན་ཏྠི, ཨ་རི་ཡ་སཱ་ཝ་ཀོ ནོ པ་ཊི་ས་མྦྷི་དཱ་པ་ཏྟོ ནཱ་མ ན་ཏྠི, པ་ཊི་ས་མྦྷི་དཱ་པ་ཏྟོ ཨ་ཉྙཾ ས་དྡཾ ནཱ་མཱ་ཁྱཱ་ཏོ་པ་ས་གྒ་ནི་པཱ་ཏ་བྷེ་ད་ཏོ ཛཱ་ནཱ་ཏི, ན ཛཱ་ནཱ་ཏཱི་ཏི? ཡ་ད་གྒེ་ན ས་དྡཾ སུ་ཏྭཱ ‘‘ཨ་ཡཾ ས་བྷཱ་ཝ་ནི་རུ་ཏྟི, ཨ་ཡཾ ན ས་བྷཱ་ཝ་ནི་རུ་ཏྟཱི’’ཏི ཛཱ་ནཱ་ཏི, ཏ་ད་གྒེ་ན ཨེ་ཏ་མྤི ཛཱ་ནི་སྶ་ཏི, ན ཙེ་ཏཾ པ་ཊི་ས་མྦྷི་དཱ་ཀི་ཙྩ་ནྟི ཝེ་དི་ཏ་བྦཾ.
པ་ཊི་བྷཱ་ནནྟི དྷ་མྨ་ཏྠཱ་དི་ཝི་ས་ཡཾ ས་བྦ་ཏྠ་ཀ་ཉཱ་ཎཾ, ཏཾ ཉཱ་ཎཾ ཨཱ་ར་མྨ་ཎཾ ཀ་ཏྭཱ པ་ཙྩ་ཝེ་ཀྑ་ནྟ་སྶ པ་བྷེ་ད་ག་ཏཾ ཉཱ་ཎཾ པ་ཊི་བྷཱ་ན་པ་ཊི་ས་མྦྷི་དཱ ནཱ་མ, ཨི་མཱ ཙ་ཏ་སྶོ་པི པ་ཊི་ས་མྦྷི་དཱ ཨ་དྷི་ག་མེ་ན པ་རི་ཡ་ཏྟི་ཨུ་གྒ་ཧ་ཎེ་ན ས་ཀྐ་ཙྩ་དྷ་མྨ་སྶ་ཝ་ནེ་ན ཨ་ཏྠ་པ་རི་པུ་ཙྪཱ་ཡ པུ་བྦ་ཡོ་གེ་ནཱ་ཏི པ་ཉྩ་ཧི ཀཱ་ར་ཎེ་ཧི ཝི་ས་དཱ ཧོ་ནྟི, སེ་ཁ་བྷཱུ་མི་ཡཾ, ཨ་སེ་ཁ་བྷཱུ་མི་ཡ་ཉྩཱ་ཏི དྭཱི་སུ ཋཱ་ནེ་སུ པ་བྷེ་དཾ ག་ཙྪ་ནྟཱི་ཏི ཝེ་དི་ཏ་བྦཱ. ཨ་ཡཾ ཏཱ་ཝེ་ཏྠ པ་ད་ཏྠོ.
དྷ་མྨ་བྷེ་དོ པ་ནེ་ཏྠཱ་པི ཝི་བྷ་ངྒ་ན་ཡེ པཱ་ཀ་ཊོ བྷ་ཝི་སྶ་ཏི. ཝི་བྷ་ངྒ་ན་ཡེ་སུ ཧི ཏཱི་སུ་པི དྷ་མྨ་ནི་རུ་ཏྟི་པ་ཊི་བྷཱ་ན་པ་ཊི་ས་མྦྷི་དཱ ཏི་སྶོ་པི ཀཱ་མཱ་ཝ་ཙ་ར་ཛ་ཝ་ན་ས་མྤ་ཡུ་ཏྟ་ཉཱ་ཎཱ་ནཾ ཝ་སེ་ན ཏ་བྦི་ས་ཡ་པྤ་བྷེ་དེ་ན ས་དྡྷིཾ ནཱ་ན་པྤ་ཀཱ་ར་ཏོ ཝི་བྷ་ཏྟཱ. ཨ་ཏྠ་པ་ཊི་ས་མྦྷི་དཱ པ་ན ཏེ་སཾ ཉཱ་ཎཱ་ན་ཉྩེ་ཝ ཨ་ཊྛ་ལོ་ཀུ་ཏྟ་ར་ཙི་ཏྟ་ས་མྤ་ཡུ་ཏྟཱ་ན་ཉྩ ཝ་སེ་ན ཏ་བྦི་ས་ཡ་པྤ་བྷེ་དེ་ན ས་དྡྷིཾ. ལོ་ཀུ་ཏྟ་ར་ཉཱ་ཎཱ་ནི་པི ཧི མ་གྒ་པྤ་ཏྟ་བྦ་ཏཱ་ཡ ཨ་ཏྠ་བྷཱུ་ཏ་ནི་བྦཱ་ནཱ་ར་མྨ་ཎ་ཏྟཱ ‘‘ཨ་ཏྠ་པ་ཊི་ས་མྦྷི་དཱ’’ཏི ཝུ་ཙྩ་ཏི.
པ་ཉྷཱ་པུ་ཙྪ་ཀེ པ་ན སི་ཡཱ ཀུ་ས་ལཱ, སི་ཡཱ ཨ་བྱཱ་ཀ་ཏཱ, ཏི་སྶོ པ་ཊི་ས་མྦྷི་དཱ སི་ཡཱ ཝི་པཱ་ཀ་དྷ་མྨ་དྷ་མྨཱ, སི་ཡཱ ནེ་ཝ་ཝི་པཱ་ཀ་ན་ཝི་པཱ་ཀ་དྷ་མྨ་དྷ་མྨཱ, ཨ་ཏྠ་པ་ཊི་ས་མྦྷི་དཱ ཏི་དྷཱ་པི, ཏི་སྶོ པ་ཊི་ས་མྦྷི་དཱ པ་རི་ཏྟཱ, ཨ་ཏྠ་པ་ཊི་ས་མྦྷི་དཱ སི་ཡཱ པ་རི་ཏྟཱ, སི་ཡཱ ཨ་པྤ་མཱ་ཎཱ, ནི་རུ་ཏྟི་པ་ཊི་ས་མྦྷི་དཱ པ་རི་ཏྟཱ་ར་མྨ་ཎཱ, བ་ཧི་དྡྷཱ་ར་མྨ་ཎཱ ཙ, སེ་སཱ ཏི་དྷཱ་པི, ནི་རུ་ཏྟི་པ་ཊི་ས་མྦྷི་དཱ པ་ཙྩུ་པྤ་ནྣཱ་ར་མྨ་ཎཱ་ཝ, ཨ་ཏྠ་པ་ཊི་ས་མྦྷི་དཱ ཏི་དྷཱ་པི ན ཝ་ཏྟ་བྦཱ ཙ, ཨ་ནི་ད་སྶ་ན་ཨ་པྤ་ཊི་གྷཱ, ཧེ་ཏཱུ, ས་ཧེ་ཏུ་ཀཱ, ཏི་སྶོ པ་ཊི་ས་མྦྷི་དཱ ས་ཨུ་ཏྟ་རཱ, ཨ་ཏྠ་པ་ཊི་ས་མྦྷི་དཱ དྭི་དྷཱ་པི, ཨ་ར་ཎཱ ཙཱ་ཏི. སེ་སཾ སུ་ཝི་ཉྙེ་ཡྻ་མེ་ཝ.
པ་ཊི་ས་མྦྷི་དཱ་ཝི་བྷ་ངྒ་མཱ་ཏི་ཀ་ཏྠ་ཝ་ཎྞ་ནཱ ནི་ཊྛི་ཏཱ.