༡. མ་ཧཱ་པུ་རི་ས་སུ་ཏྟཾ

༣༧༧. སཱ་ཝ་ཏྠི་ནི་དཱ་ནཾ. ཨ་ཐ ཁོ ཨཱ་ཡ་སྨཱ སཱ་རི་པུ་ཏྟོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ སཱ་རི་པུ་ཏྟོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘‘མ་ཧཱ་པུ་རི་སོ, མ་ཧཱ་པུ་རི་སོ’ཏི, བྷ་ནྟེ, ཝུ་ཙྩ་ཏི. ཀི་ཏྟཱ་ཝ་ཏཱ ནུ ཁོ, བྷ་ནྟེ, མ་ཧཱ་པུ་རི་སོ ཧོ་ཏཱི’’ཏི? ‘‘ཝི་མུ་ཏྟ་ཙི་ཏྟ་ཏྟཱ ཁྭཱ་ཧཾ, སཱ་རི་པུ་ཏྟ, ‘མ་ཧཱ་པུ་རི་སོ’ཏི ཝ་དཱ་མི. ཨ་ཝི་མུ་ཏྟ་ཙི་ཏྟ་ཏྟཱ ‘ནོ མ་ཧཱ་པུ་རི་སོ’ཏི ཝ་དཱ་མི’’.

‘‘ཀ་ཐ་ཉྩ, སཱ་རི་པུ་ཏྟ, ཝི་མུ་ཏྟ་ཙི་ཏྟོ ཧོ་ཏི? ཨི་དྷ, སཱ་རི་པུ་ཏྟ, བྷི་ཀྑུ ཀཱ་ཡེ ཀཱ་ཡཱ་ནུ་པ་སྶཱི ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ, ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶཾ. ཏ་སྶ ཀཱ་ཡེ ཀཱ་ཡཱ་ནུ་པ་སྶི་ནོ ཝི་ཧ་ར་ཏོ ཙི་ཏྟཾ ཝི་ར་ཛྫ་ཏི, ཝི་མུ་ཙྩ་ཏི ཨ་ནུ་པཱ་དཱ་ཡ ཨཱ་ས་ཝེ་ཧི. ཝེ་ད་ནཱ་སུ…པེ… ཙི་ཏྟེ…པེ… དྷ་མྨེ་སུ དྷ་མྨཱ་ནུ་པ་སྶཱི ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ, ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶཾ. ཏ་སྶ དྷ་མྨེ་སུ དྷ་མྨཱ་ནུ་པ་སྶི་ནོ ཝི་ཧ་ར་ཏོ ཙི་ཏྟཾ ཝི་ར་ཛྫ་ཏི, ཝི་མུ་ཙྩ་ཏི ཨ་ནུ་པཱ་དཱ་ཡ ཨཱ་ས་ཝེ་ཧི. ཨེ་ཝཾ ཁོ, སཱ་རི་པུ་ཏྟ, ཝི་མུ་ཏྟ་ཙི་ཏྟོ ཧོ་ཏི. ཝི་མུ་ཏྟ་ཙི་ཏྟ་ཏྟཱ ཁྭཱ་ཧཾ, སཱ་རི་པུ་ཏྟ, ‘མ་ཧཱ་པུ་རི་སོ’ཏི ཝ་དཱ་མི. ཨ་ཝི་མུ་ཏྟ་ཙི་ཏྟ་ཏྟཱ ‘ནོ མ་ཧཱ་པུ་རི་སོ’ཏི ཝ་དཱ་མཱི’’ཏི. པ་ཋ་མཾ.