༣. དྷ་མྨ་དི་ནྣ་སུ་ཏྟཾ
༡༠༤༩. ཨེ་ཀཾ ས་མ་ཡཾ བྷ་ག་ཝཱ བཱ་རཱ་ཎ་སི་ཡཾ ཝི་ཧ་ར་ཏི ཨི་སི་པ་ཏ་ནེ མི་ག་དཱ་ཡེ. ཨ་ཐ ཁོ དྷ་མྨ་དི་ནྣོ ཨུ་པཱ་ས་ཀོ པ་ཉྩ་ཧི ཨུ་པཱ་ས་ཀ་ས་ཏེ་ཧི ས་དྡྷིཾ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ དྷ་མྨ་དི་ནྣོ ཨུ་པཱ་ས་ཀོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨོ་ཝ་ད་ཏུ ནོ, བྷ་ནྟེ, བྷ་ག་ཝཱ; ཨ་ནུ་སཱ་ས་ཏུ ནོ, བྷ་ནྟེ, བྷ་ག་ཝཱ ཡཾ ཨ་མྷཱ་ཀཾ ཨ་སྶ དཱི་གྷ་ར་ཏྟཾ ཧི་ཏཱ་ཡ སུ་ཁཱ་ཡཱ’’ཏི.
‘‘ཏ་སྨཱ་ཏི་ཧ ཝོ, དྷ་མྨ་དི་ནྣཾ, ཨེ་ཝཾ སི་ཀྑི་ཏ་བྦཾ – ‘ཡེ ཏེ སུ་ཏྟ་ནྟཱ ཏ་ཐཱ་ག་ཏ་བྷཱ་སི་ཏཱ ག་མྦྷཱི་རཱ ག་མྦྷཱི་ར་ཏྠཱ ལོ་ཀུ་ཏྟ་རཱ སུ་ཉྙ་ཏ་པ་ཊི་སཾ་ཡུ་ཏྟཱ ཏེ ཀཱ་ལེ་ན ཀཱ་ལཾ ཨུ་པ་ས་མྤ་ཛྫ ཝི་ཧ་རི་སྶཱ་མཱ’ཏི. ཨེ་ཝ་ཉྷི ཝོ, དྷ་མྨ་དི་ནྣ, སི་ཀྑི་ཏ་བྦ’’ནྟི. ‘‘ན ཁོ ནེ་ཏཾ, བྷ་ནྟེ, སུ་ཀ་རཾ ཨ་མྷེ་ཧི པུ་ཏྟ་ས་མྦཱ་དྷ་ས་ཡ་ནཾ ཨ་ཛ྄ཛྷཱ་ཝ་ས་ནྟེ་ཧི ཀཱ་སི་ཀ་ཙ་ནྡ་ནཾ པ་ཙྩ་ནུ་བྷོ་ནྟེ་ཧི མཱ་ལཱ་ག་ནྡྷ་ཝི་ལེ་པ་ནཾ དྷཱ་ར་ཡ་ནྟེ་ཧི ཛཱ་ཏ་རཱུ་པ་ར་ཛ་ཏཾ སཱ་དི་ཡ་ནྟེ་ཧི – ཡེ ཏེ སུ་ཏྟ་ནྟཱ ཏ་ཐཱ་ག་ཏ་བྷཱ་སི་ཏཱ ག་མྦྷཱི་རཱ ག་མྦྷཱི་ར་ཏྠཱ ལོ་ཀུ་ཏྟ་རཱ སུ་ཉྙ་ཏ་པ་ཊི་སཾ་ཡུ་ཏྟཱ ཏེ ཀཱ་ལེ་ན ཀཱ་ལཾ ཨུ་པ་ས་མྤ་ཛྫ ཝི་ཧ་རི་ཏུཾ. ཏེ་སཾ ནོ, བྷ་ནྟེ, བྷ་ག་ཝཱ ཨ་མྷཱ་ཀཾ པ་ཉྩ་སུ སི་ཀྑཱ་པ་དེ་སུ ཋི་ཏཱ་ནཾ ཨུ་ཏྟ་རི་དྷ་མྨཾ དེ་སེ་ཏཱུ’’ཏི.
‘‘ཏ་སྨཱ་ཏི་ཧ ཝོ, དྷ་མྨ་དི་ནྣ, ཨེ་ཝཾ སི་ཀྑི་ཏ་བྦཾ – ‘བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏཱ བྷ་ཝི་སྶཱ་མ – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི. དྷ་མྨེ…པེ… ས་ངྒྷེ…པེ… ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་ཏཱ བྷ་ཝི་སྶཱ་མ ཨ་ཁ་ཎྜེ་ཧི…པེ… ས་མཱ་དྷི་སཾ་ཝ་ཏྟ་ནི་ཀེ་ཧཱི’ཏི. ཨེ་ཝ་ཉྷི ཝོ, དྷ་མྨ་དི་ནྣ, སི་ཀྑི་ཏ་བྦ’’ནྟི.
‘‘ཡཱ་ནི་མཱ་ནི, བྷ་ནྟེ, བྷ་ག་ཝ་ཏཱ ཙ་ཏྟཱ་རི སོ་ཏཱ་པ་ཏྟི་ཡ་ངྒཱ་ནི དེ་སི་ཏཱ་ནི, སཾ་ཝི་ཛྫ་ནྟེ ཏེ དྷ་མྨཱ ཨ་མྷེ་སུ, མ་ཡ་ཉྩ ཏེ་སུ དྷ་མྨེ་སུ ས་ནྡི་སྶཱ་མ. མ་ཡ་ཉྷི བྷ་ནྟེ, བུ་དྡྷེ ཨ་ཝེ་ཙྩ་པྤ་སཱ་དེ་ན ས་མ་ནྣཱ་ག་ཏཱ – ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི. དྷ་མྨེ…པེ… ས་ངྒྷེ…པེ… ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་ཏཱ ཨ་ཁ་ཎྜེ་ཧི…པེ… ས་མཱ་དྷི་སཾ་ཝ་ཏྟ་ནི་ཀེ་ཧཱི’’ཏི. ‘‘ལཱ་བྷཱ ཝོ, དྷ་མྨ་དི་ནྣ, སུ་ལ་དྡྷཾ ཝོ, དྷ་མྨ་དི་ནྣ! སོ་ཏཱ་པ་ཏྟི་ཕ་ལཾ ཏུ་མྷེ་ཧི བྱཱ་ཀ་ཏ’’ནྟི. ཏ་ཏི་ཡཾ.