༤. གི་ལཱ་ན་སུ་ཏྟཾ

༡༠༥༠. ཨེ་ཀཾ ས་མ་ཡཾ བྷ་ག་ཝཱ ས་ཀྐེ་སུ ཝི་ཧ་ར་ཏི ཀ་པི་ལ་ཝ་ཏྠུ་སྨིཾ ནི་གྲོ་དྷཱ་རཱ་མེ. ཏེ་ན ཁོ པ་ན ས་མ་ཡེ་ན ས་མྦ་ཧུ་ལཱ བྷི་ཀྑཱུ བྷ་ག་ཝ་ཏོ ཙཱི་ཝ་ར་ཀ་མྨཾ ཀ་རོ་ནྟི – ‘‘ནི་ཊྛི་ཏ་ཙཱི་ཝ་རོ བྷ་ག་ཝཱ ཏེ་མཱ་ས་ཙྩ་ཡེ་ན ཙཱ་རི་ཀཾ པ་ཀྐ་མི་སྶ་ཏཱི’’ཏི. ཨ་སྶོ་སི ཁོ མ་ཧཱ་ནཱ་མོ ས་ཀྐོ – ‘‘ས་མྦ་ཧུ་ལཱ ཀི་ར བྷི་ཀྑཱུ བྷ་ག་ཝ་ཏོ ཙཱི་ཝ་ར་ཀ་མྨཾ ཀ་རོ་ནྟི – ‘ནི་ཊྛི་ཏ་ཙཱི་ཝ་རོ བྷ་ག་ཝཱ ཏེ་མཱ་ས་ཙྩ་ཡེ་ན ཙཱ་རི་ཀཾ པ་ཀྐ་མི་སྶ་ཏཱི’’’ཏི. ཨ་ཐ ཁོ མ་ཧཱ་ནཱ་མོ ས་ཀྐོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ མ་ཧཱ་ནཱ་མོ ས་ཀྐོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘སུ་ཏ་མེ་ཏཾ, བྷ་ནྟེ – ‘ས་མྦ་ཧུ་ལཱ ཀི་ར བྷི་ཀྑཱུ བྷ་ག་ཝ་ཏོ ཙཱི་ཝ་ར་ཀ་མྨཾ ཀ་རོ་ནྟི – ནི་ཊྛི་ཏ་ཙཱི་ཝ་རོ བྷ་ག་ཝཱ ཏེ་མཱ་ས་ཙྩ་ཡེ་ན ཙཱ་རི་ཀཾ པ་ཀྐ་མི་སྶ་ཏཱི’ཏི. ན ཁོ ནེ་ཏཾ [ན ཁོ ཏེ ཨེ་ཏཾ (སཱི. པཱི.)], བྷ་ནྟེ, བྷ་ག་ཝ་ཏོ ས་མྨུ་ཁཱ སུ་ཏཾ ས་མྨུ་ཁཱ པ་ཊི་གྒ་ཧི་ཏཾ ས་པྤ་ཉྙེ་ན ཨུ་པཱ་ས་ཀེ་ན ས་པྤ་ཉྙོ ཨུ་པཱ་ས་ཀོ ཨཱ་བཱ་དྷི་ཀོ དུ་ཀྑི་ཏོ བཱ་ལ༹ྷ་གི་ལཱ་ནོ ཨོ་ཝ་དི་ཏ་བྦོ’’ཏི.

‘‘ས་པྤ་ཉྙེ་ན མ་ཧཱ་ནཱ་མ, ཨུ་པཱ་ས་ཀེ་ན ས་པྤ་ཉྙོ ཨུ་པཱ་ས་ཀོ ཨཱ་བཱ་དྷི་ཀོ དུ་ཀྑི་ཏོ བཱ་ལ༹ྷ་གི་ལཱ་ནོ ཙ་ཏཱུ་ཧི ཨ་སྶཱ་ས་ནཱི་ཡེ་ཧི དྷ་མྨེ་ཧི ཨ་སྶཱ་སེ་ཏ་བྦོ – ‘ཨ་སྶཱ་ས་ཏཱ་ཡ་སྨཱ – ཨ་ཏྠཱ་ཡ་སྨ་ཏོ བུ་དྡྷེ ཨ་ཝེ་ཙྩ་པྤ་སཱ་དོ ཨི་ཏི་པི སོ བྷ་ག་ཝཱ…པེ… ས་ཏྠཱ དེ་ཝ་མ་ནུ་སྶཱ་ནཾ བུ་དྡྷོ བྷ་ག་ཝཱ་ཏི. ཨ་སྶཱ་ས་ཏཱ་ཡ་སྨཱ – ཨ་ཏྠཱ་ཡ་སྨ་ཏོ དྷ་མྨེ…པེ… ས་ངྒྷེ…པེ… ཨ་རི་ཡ་ཀ་ནྟཱ་ནི སཱི་ལཱ་ནི ཨ་ཁ་ཎྜཱ་ནི…པེ… ས་མཱ་དྷི་སཾ་ཝ་ཏྟ་ནི་ཀཱ་ནཱི’’’ཏི.

‘‘ས་པྤ་ཉྙེ་ན, མ་ཧཱ་ནཱ་མ, ཨུ་པཱ་ས་ཀེ་ན ས་པྤ་ཉྙོ ཨུ་པཱ་ས་ཀོ ཨཱ་བཱ་དྷི་ཀོ དུ་ཀྑི་ཏོ བཱ་ལ༹ྷ་གི་ལཱ་ནོ ཨི་མེ་ཧི ཙ་ཏཱུ་ཧི ཨ་སྶཱ་ས་ནཱི་ཡེ་ཧི དྷ་མྨེ་ཧི ཨ་སྶཱ་སེ་ཏྭཱ ཨེ་ཝ་མ་སྶ ཝ་ཙ་ནཱི་ཡོ – ‘ཨ་ཏྠཱ་ཡ་སྨ་ཏོ མཱ་ཏཱ་པི་ཏཱུ་སུ ཨ་པེ་ཀྑཱ’ཏི? སོ ཙེ ཨེ་ཝཾ ཝ་དེ་ཡྻ – ‘ཨ་ཏྠི མེ མཱ་ཏཱ་པི་ཏཱུ་སུ ཨ་པེ་ཀྑཱ’ཏི, སོ ཨེ་ཝ་མ་སྶ ཝ་ཙ་ནཱི་ཡོ – ‘ཨཱ་ཡ་སྨཱ ཁོ མཱ་རི་སོ མ་ར་ཎ་དྷ་མྨོ. ས་ཙེ པཱ་ཡ་སྨཱ མཱ་ཏཱ་པི་ཏཱུ་སུ ཨ་པེ་ཀྑཾ ཀ་རི་སྶ་ཏི, མ་རི་སྶ་ཏེ་ཝ; ནོ ཙེ པཱ་ཡ་སྨཱ མཱ་ཏཱ་པི་ཏཱུ་སུ ཨ་པེ་ཀྑཾ ཀ་རི་སྶ་ཏི, མ་རི་སྶ་ཏེ་ཝ. སཱ་དྷཱ་ཡ་སྨཱ, ཡཱ ཏེ མཱ་ཏཱ་པི་ཏཱུ་སུ ཨ་པེ་ཀྑཱ ཏཾ པ་ཛ་ཧཱ’’’ཏི.

‘‘སོ ཙེ ཨེ་ཝཾ ཝ་དེ་ཡྻ – ‘ཡཱ མེ མཱ་ཏཱ་པི་ཏཱུ་སུ ཨ་པེ་ཀྑཱ སཱ པ་ཧཱི་ནཱ’ཏི, སོ ཨེ་ཝ་མ་སྶ ཝ་ཙ་ནཱི་ཡོ – ‘ཨ་ཏྠི པ་ནཱ་ཡ་སྨ་ཏོ པུ་ཏྟ་དཱ་རེ་སུ ཨ་པེ་ཀྑཱ’ཏི? སོ ཙེ ཨེ་ཝཾ ཝ་དེ་ཡྻ – ‘ཨ་ཏྠི མེ པུ་ཏྟ་དཱ་རེ་སུ ཨ་པེ་ཀྑཱ’ཏི, སོ ཨེ་ཝ་མ་སྶ ཝ་ཙ་ནཱི་ཡོ – ‘ཨཱ་ཡ་སྨཱ ཁོ མཱ་རི་སོ མ་ར་ཎ་དྷ་མྨོ. ས་ཙེ པཱ་ཡ་སྨཱ པུ་ཏྟ་དཱ་རེ་སུ ཨ་པེ་ཀྑཾ ཀ་རི་སྶ་ཏི, མ་རི་སྶ་ཏེ་ཝ; ནོ ཙེ པཱ་ཡ་སྨཱ པུ་ཏྟ་དཱ་རེ་སུ ཨ་པེ་ཀྑཾ ཀ་རི་སྶ་ཏི, མ་རི་སྶ་ཏེ་ཝ. སཱ་དྷཱ་ཡ་སྨཱ, ཡཱ ཏེ པུ་ཏྟ་དཱ་རེ་སུ ཨ་པེ་ཀྑཱ ཏཾ པ་ཛ་ཧཱ’’’ཏི.

‘‘སོ ཙེ ཨེ་ཝཾ ཝ་དེ་ཡྻ – ‘ཡཱ མེ པུ་ཏྟ་དཱ་རེ་སུ ཨ་པེ་ཀྑཱ སཱ པ་ཧཱི་ནཱ’ཏི, སོ ཨེ་ཝ་མ་སྶ ཝ་ཙ་ནཱི་ཡོ – ‘ཨ་ཏྠི པ་ནཱ་ཡ་སྨ་ཏོ མཱ་ནུ་ས་ཀེ་སུ པ་ཉྩ་སུ ཀཱ་མ་གུ་ཎེ་སུ ཨ་པེ་ཀྑཱ’ཏི? སོ ཙེ ཨེ་ཝཾ ཝ་དེ་ཡྻ – ‘ཨ་ཏྠི མེ མཱ་ནུ་ས་ཀེ་སུ པ་ཉྩ་སུ ཀཱ་མ་གུ་ཎེ་སུ ཨ་པེ་ཀྑཱ’ཏི, སོ ཨེ་ཝ་མ་སྶ ཝ་ཙ་ནཱི་ཡོ – ‘མཱ་ནུ་ས་ཀེ་ཧི ཁོ, ཨཱ་ཝུ་སོ, ཀཱ་མེ་ཧི དི་བྦཱ ཀཱ་མཱ ཨ་བྷི་ཀྐ་ནྟ་ཏ་རཱ ཙ པ་ཎཱི་ཏ་ཏ་རཱ ཙ. སཱ་དྷཱ་ཡ་སྨཱ, མཱ་ནུ་ས་ཀེ་ཧི ཀཱ་མེ་ཧི ཙི་ཏྟཾ ཝུ་ཊྛཱ་པེ་ཏྭཱ ཙཱ་ཏུ་མ་ཧཱ་རཱ་ཛི་ཀེ་སུ [ཙཱ་ཏུ་མྨ་ཧཱ་རཱ་ཛི་ཀེ་སུ (སཱི. སྱཱ. ཀཾ. པཱི.)] དེ་ཝེ་སུ ཙི་ཏྟཾ ཨ་དྷི་མོ་ཙེ་ཧཱི’’’ཏི.

‘‘སོ ཙེ ཨེ་ཝཾ ཝ་དེ་ཡྻ – ‘མཱ་ནུ་ས་ཀེ་ཧི མེ ཀཱ་མེ་ཧི ཙི་ཏྟཾ ཝུ་ཊྛི་ཏཾ, ཙཱ་ཏུ་མ་ཧཱ་རཱ་ཛི་ཀེ་སུ དེ་ཝེ་སུ ཙི་ཏྟཾ ཨ་དྷི་མོ་ཙི་ཏ’ནྟི, སོ ཨེ་ཝ་མ་སྶ ཝ་ཙ་ནཱི་ཡོ – ‘ཙཱ་ཏུ་མ་ཧཱ་རཱ་ཛི་ཀེ་ཧི ཁོ, ཨཱ་ཝུ་སོ, དེ་ཝེ་ཧི ཏཱ་ཝ་ཏིཾ་སཱ དེ་ཝཱ ཨ་བྷི་ཀྐ་ནྟ་ཏ་རཱ ཙ པ་ཎཱི་ཏ་ཏ་རཱ ཙ. སཱ་དྷཱ་ཡ་སྨཱ, ཙཱ་ཏུ་མ་ཧཱ་རཱ་ཛི་ཀེ་ཧི དེ་ཝེ་ཧི ཙི་ཏྟཾ ཝུ་ཊྛཱ་པེ་ཏྭཱ ཏཱ་ཝ་ཏིཾ་སེ་སུ དེ་ཝེ་སུ ཙི་ཏྟཾ ཨ་དྷི་མོ་ཙེ་ཧཱི’’’ཏི.

‘‘སོ ཙེ ཨེ་ཝཾ ཝ་དེ་ཡྻ – ‘ཙཱ་ཏུ་མ་ཧཱ་རཱ་ཛི་ཀེ་ཧི མེ དེ་ཝེ་ཧི ཙི་ཏྟཾ ཝུ་ཊྛི་ཏཾ, ཏཱ་ཝ་ཏིཾ་སེ་སུ དེ་ཝེ་སུ ཙི་ཏྟཾ ཨ་དྷི་མོ་ཙི་ཏ’ནྟི, སོ ཨེ་ཝ་མ་སྶ ཝ་ཙ་ནཱི་ཡོ – ‘ཏཱ་ཝ་ཏིཾ་སེ་ཧི ཁོ, ཨཱ་ཝུ་སོ, དེ་ཝེ་ཧི ཡཱ་མཱ དེ་ཝཱ…པེ… ཏུ་སི་ཏཱ དེ་ཝཱ…པེ… ནི་མྨཱ་ན་ར་ཏཱི དེ་ཝཱ…པེ… པ་ར་ནི་མྨི་ཏ་ཝ་ས་ཝ་ཏྟཱི དེ་ཝཱ…པེ… པ་ར་ནི་མྨི་ཏ་ཝ་ས་ཝ་ཏྟཱི་ཧི ཁོ, ཨཱ་ཝུ་སོ, དེ་ཝེ་ཧི བྲ་ཧྨ་ལོ་ཀོ ཨ་བྷི་ཀྐ་ནྟ་ཏ་རོ ཙ པ་ཎཱི་ཏ་ཏ་རོ ཙ. སཱ་དྷཱ་ཡ་སྨཱ, པ་ར་ནི་མྨི་ཏ་ཝ་ས་ཝ་ཏྟཱི་ཧི དེ་ཝེ་ཧི ཙི་ཏྟཾ ཝུ་ཊྛཱ་པེ་ཏྭཱ བྲ་ཧྨ་ལོ་ཀེ ཙི་ཏྟཾ ཨ་དྷི་མོ་ཙེ་ཧཱི’ཏི. སོ ཙེ ཨེ་ཝཾ ཝ་དེ་ཡྻ – ‘པ་ར་ནི་མྨི་ཏ་ཝ་ས་ཝ་ཏྟཱི་ཧི མེ དེ་ཝེ་ཧི ཙི་ཏྟཾ ཝུ་ཊྛི་ཏཾ, བྲ་ཧྨ་ལོ་ཀེ ཙི་ཏྟཾ ཨ་དྷི་མོ་ཙི་ཏ’ནྟི, སོ ཨེ་ཝ་མ་སྶ ཝ་ཙ་ནཱི་ཡོ – ‘བྲ་ཧྨ་ལོ་ཀོ་པི ཁོ, ཨཱ་ཝུ་སོ, ཨ་ནི་ཙྩོ ཨ་དྡྷུ་ཝོ ས་ཀྐཱ་ཡ་པ་རི་ཡཱ་པ་ནྣོ. སཱ་དྷཱ་ཡ་སྨཱ, བྲ་ཧྨ་ལོ་ཀཱ ཙི་ཏྟཾ ཝུ་ཊྛཱ་པེ་ཏྭཱ ས་ཀྐཱ་ཡ་ནི་རོ་དྷེ ཙི་ཏྟཾ ཨུ་པ་སཾ་ཧ་རཱ་ཧཱི’’’ཏི.

‘‘སོ ཙེ ཨེ་ཝཾ ཝ་དེ་ཡྻ – ‘བྲ་ཧྨ་ལོ་ཀཱ མེ ཙི་ཏྟཾ ཝུ་ཊྛི་ཏཾ, ས་ཀྐཱ་ཡ་ནི་རོ་དྷེ ཙི་ཏྟཾ ཨུ་པ་སཾ་ཧ་རཱ་མཱི’ཏི; ཨེ་ཝཾ ཝི་མུ་ཏྟ་ཙི་ཏྟ་སྶ ཁོ, མ་ཧཱ་ནཱ་མ, ཨུ་པཱ་ས་ཀ་སྶ ཨཱ་ས་ཝཱ [ཝ་སྶ་ས་ཏ (སཱི. སྱཱ.)] ཝི་མུ་ཏྟ་ཙི་ཏྟེ་ན བྷི་ཀྑུ་ནཱ ན ཀི་ཉྩི ནཱ་ནཱ་ཀ་ར་ཎཾ ཝ་དཱ་མི, ཡ་དི་དཾ – ཝི་མུ་ཏྟི་ཡཱ ཝི་མུ་ཏྟ’’ནྟི. ཙ་ཏུ་ཏྠཾ.