༢. ཝ་སྶཾ་ཝུ་ཏྠ་སུ་ཏྟཾ
༡༠༤༨. ཨེ་ཀཾ ས་མ་ཡཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རོ བྷི་ཀྑུ སཱ་ཝ་ཏྠི་ཡཾ ཝ་སྶཾ་ཝུ་ཏྠོ ཀ་པི་ལ་ཝ་ཏྠུཾ ཨ་ནུ་པྤ་ཏྟོ ཧོ་ཏི ཀེ་ན་ཙི་དེ་ཝ ཀ་ར་ཎཱི་ཡེ་ན. ཨ་སྶོ་སུཾ ཁོ ཀཱ་པི་ལ་ཝ་ཏྠ་ཝཱ ས་ཀྱཱ – ‘‘ཨ་ཉྙ་ཏ་རོ ཀི་ར བྷི་ཀྑུ སཱ་ཝ་ཏྠི་ཡཾ ཝ་སྶཾ་ཝུ་ཏྠོ ཀ་པི་ལ་ཝ་ཏྠུཾ ཨ་ནུ་པྤ་ཏྟོ’’ཏི.
ཨ་ཐ ཁོ ཀཱ་པི་ལ་ཝ་ཏྠ་ཝཱ ས་ཀྱཱ ཡེ་ན སོ བྷི་ཀྑུ ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ ཏཾ བྷི་ཀྑུཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ. ཨེ་ཀ་མ་ནྟཾ ནི་སི་ནྣཱ ཁོ ཀཱ་པི་ལ་ཝ་ཏྠ་ཝཱ ས་ཀྱཱ ཏཾ བྷི་ཀྑུཾ ཨེ་ཏ་ད་ཝོ་ཙུཾ – ‘‘ཀ་ཙྩི, བྷ་ནྟེ, བྷ་ག་ཝཱ ཨ་རོ་གོ ཙེ་ཝ བ་ལ་ཝཱ ཙཱ’’ཏི? ‘‘ཨ་རོ་གོ ཙཱ་ཝུ་སོ, བྷ་ག་ཝཱ བ་ལ་ཝཱ ཙཱ’’ཏི. ‘‘ཀ་ཙྩི པ་ན, བྷ་ནྟེ, སཱ་རི་པུ་ཏྟ་མོ་གྒ་ལླཱ་ནཱ ཨ་རོ་གཱ ཙེ་ཝ བ་ལ་ཝ་ནྟོ ཙཱ’’ཏི? ‘‘སཱ་རི་པུ་ཏྟ་མོ་གྒ་ལླཱ་ནཱ་པི ཁོ, ཨཱ་ཝུ་སོ, ཨ་རོ་གཱ ཙེ་ཝ བ་ལ་ཝ་ནྟོ ཙཱ’’ཏི. ‘‘ཀ་ཙྩི པ་ན, བྷ་ནྟེ, བྷི་ཀྑུ་ས་ངྒྷོ ཨ་རོ་གོ ཙ བ་ལ་ཝཱ ཙཱ’’ཏི. ‘‘བྷི་ཀྑུ་ས་ངྒྷོ་པི ཁོ, ཨཱ་ཝུ་སོ, ཨ་རོ་གོ ཙ བ་ལ་ཝཱ ཙཱ’’ཏི. ‘‘ཨ་ཏྠི པ་ན ཏེ, བྷ་ནྟེ, ཀི་ཉྩི ཨི་མི་ནཱ ཨ་ནྟ་ར་ཝ་སྶེ་ན བྷ་ག་ཝ་ཏོ ས་མྨུ་ཁཱ སུ་ཏཾ ས་མྨུ་ཁཱ པ་ཊི་གྒ་ཧི་ཏ’’ནྟི? ‘‘ས་མྨུ་ཁཱ མེ་ཏཾ, ཨཱ་ཝུ་སོ, བྷ་ག་ཝ་ཏོ སུ་ཏཾ ས་མྨུ་ཁཱ པ་ཊི་གྒ་ཧི་ཏཾ – ‘ཨ་པྤ་ཀཱ ཏེ, བྷི་ཀྑ་ཝེ, བྷི་ཀྑཱུ ཡེ ཨཱ་ས་ཝཱ་ནཾ ཁ་ཡཱ ཨ་ནཱ་ས་ཝཾ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ དི་ཊྛེ་ཝ དྷ་མྨེ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་ནྟི. ཨ་ཐ ཁོ ཨེ་ཏེ་ཝ བ་ཧུ་ཏ་རཱ བྷི་ཀྑཱུ ཡེ པ་ཉྩ་ནྣཾ ཨོ་ར་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ཨོ་པ་པཱ་ཏི་ཀཱ ཏ་ཏྠ པ་རི་ནི་བྦཱ་ཡི་ནོ ཨ་ནཱ་ཝ་ཏྟི་དྷ་མྨཱ ཏ་སྨཱ ལོ་ཀཱ’’’ཏི.
‘‘ཨ་པ་ར་མྤི ཁོ མེ, ཨཱ་ཝུ་སོ, བྷ་ག་ཝ་ཏོ ས་མྨུ་ཁཱ སུ་ཏཾ ས་མྨུ་ཁཱ པ་ཊི་གྒ་ཧི་ཏཾ – ‘ཨ་པྤ་ཀཱ ཏེ, བྷི་ཀྑ་ཝེ, བྷི་ཀྑཱུ ཡེ པ་ཉྩ་ནྣཾ ཨོ་ར་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ཨོ་པ་པཱ་ཏི་ཀཱ ཏ་ཏྠ པ་རི་ནི་བྦཱ་ཡི་ནོ ཨ་ནཱ་ཝ་ཏྟི་དྷ་མྨཱ ཏ་སྨཱ ལོ་ཀཱ. ཨ་ཐ ཁོ ཨེ་ཏེ་ཝ བ་ཧུ་ཏ་རཱ བྷི་ཀྑཱུ ཡེ ཏི་ཎྞཾ སཾ་ཡོ་ཛ་ནཱ་ནཾ པ་རི་ཀྑ་ཡཱ རཱ་ག་དོ་ས་མོ་ཧཱ་ནཾ ཏ་ནུ་ཏྟཱ ས་ཀ་དཱ་གཱ་མི་ནོ, ས་ཀི་དེ་ཝ ཨི་མཾ ལོ་ཀཾ ཨཱ་ག་ནྟྭཱ དུ་ཀྑ་སྶ་ནྟཾ ཀ་རི་སྶ་ནྟཱི’’’ཏི.
‘‘ཨ་པ་ར་མྤི ཁོ མེ, ཨཱ་ཝུ་སོ, བྷ་ག་ཝ་ཏོ ས་མྨུ་ཁཱ སུ་ཏཾ ས་མྨུ་ཁཱ པ་ཊི་གྒ་ཧི་ཏཾ – ‘ཨ་པྤ་ཀཱ ཏེ, བྷི་ཀྑ་ཝེ, བྷི་ཀྑཱུ ཡེ ཏི་ཎྞཾ སཾ་ཡོ་ཛ་ནཱ་ནཾ པ་རི་ཀྑ་ཡཱ རཱ་ག་དོ་ས་མོ་ཧཱ་ནཾ ཏ་ནུ་ཏྟཱ ས་ཀ་དཱ་གཱ་མི་ནོ, ས་ཀི་དེ་ཝ ཨི་མཾ ལོ་ཀཾ ཨཱ་ག་ནྟྭཱ དུ་ཀྑ་སྶ་ནྟཾ ཀ་རི་སྶ་ནྟི. ཨ་ཐ ཁོ ཨེ་ཏེ་ཝ བ་ཧུ་ཏ་རཱ བྷི་ཀྑཱུ ཡེ ཏི་ཎྞཾ སཾ་ཡོ་ཛ་ནཱ་ནཾ པ་རི་ཀྑ་ཡཱ སོ་ཏཱ་པ་ནྣཱ ཨ་ཝི་ནི་པཱ་ཏ་དྷ་མྨཱ ནི་ཡ་ཏཱ ས་མྦོ་དྷི་པ་རཱ་ཡ་ཎཱ’’’ཏི. དུ་ཏི་ཡཾ.