༩. དུ་ཏི་ཡ་ཙེ་ཏ་ནཱ་སུ་ཏྟཾ

༣༩. སཱ་ཝ་ཏྠི་ཡཾ ཝི་ཧ་ར་ཏི…པེ… ‘‘ཡ་ཉྩ, བྷི་ཀྑ་ཝེ, ཙེ་ཏེ་ཏི ཡ་ཉྩ པ་ཀ་པྤེ་ཏི ཡ་ཉྩ ཨ་ནུ་སེ་ཏི, ཨཱ་ར་མྨ་ཎ་མེ་ཏཾ ཧོ་ཏི ཝི་ཉྙཱ་ཎ་སྶ ཋི་ཏི་ཡཱ. ཨཱ་ར་མྨ་ཎེ ས་ཏི པ་ཏི་ཊྛཱ ཝི་ཉྙཱ་ཎ་སྶ ཧོ་ཏི. ཏ་སྨིཾ པ་ཏི་ཊྛི་ཏེ ཝི་ཉྙཱ་ཎེ ཝི་རཱུ་ལ༹ྷེ ནཱ་མ་རཱུ་པ་སྶ ཨ་ཝ་ཀྐ་ནྟི ཧོ་ཏི. ནཱ་མ་རཱུ་པ་པ་ཙྩ་ཡཱ ས་ལཱ༹་ཡ་ཏ་ནཾ; ས་ལཱ༹་ཡ་ཏ་ན་པ་ཙྩ་ཡཱ ཕ་སྶོ; ཕ་སྶ་པ་ཙྩ་ཡཱ ཝེ་ད་ནཱ…པེ… ཏ་ཎྷཱ… ཨུ་པཱ་དཱ་ནཾ… བྷ་ཝོ… ཛཱ་ཏི… ཛ་རཱ་མ་ར་ཎཾ སོ་ཀ་པ་རི་དེ་ཝ་དུ་ཀྑ་དོ་མ་ན་སྶུ་པཱ་ཡཱ་སཱ ས་མྦྷ་ཝ་ནྟི. ཨེ་ཝ་མེ་ཏ་སྶ ཀེ་ཝ་ལ་སྶ དུ་ཀྑ་ཀྑ་ནྡྷ་སྶ ས་མུ་ད་ཡོ ཧོ་ཏི’’.

‘‘ནོ ཙེ, བྷི་ཀྑ་ཝེ, ཙེ་ཏེ་ཏི ནོ ཙེ པ་ཀ་པྤེ་ཏི, ཨ་ཐ ཙེ ཨ་ནུ་སེ་ཏི, ཨཱ་ར་མྨ་ཎ་མེ་ཏཾ ཧོ་ཏི ཝི་ཉྙཱ་ཎ་སྶ ཋི་ཏི་ཡཱ. ཨཱ་ར་མྨ་ཎེ ས་ཏི པ་ཏི་ཊྛཱ ཝི་ཉྙཱ་ཎ་སྶ ཧོ་ཏི. ཏ་སྨིཾ པ་ཏི་ཊྛི་ཏེ ཝི་ཉྙཱ་ཎེ ཝི་རཱུ་ལ༹ྷེ ནཱ་མ་རཱུ་པ་སྶ ཨ་ཝ་ཀྐ་ནྟི ཧོ་ཏི. ནཱ་མ་རཱུ་པ་པ་ཙྩ་ཡཱ ས་ལཱ༹་ཡ་ཏ་ནཾ…པེ… ཨེ་ཝ་མེ་ཏ་སྶ ཀེ་ཝ་ལ་སྶ དུ་ཀྑ་ཀྑ་ནྡྷ་སྶ ས་མུ་ད་ཡོ ཧོ་ཏི.

‘‘ཡ་ཏོ ཙ ཁོ, བྷི་ཀྑ་ཝེ, ནོ ཙེ་ཝ ཙེ་ཏེ་ཏི ནོ ཙ པ་ཀ་པྤེ་ཏི ནོ ཙ ཨ་ནུ་སེ་ཏི, ཨཱ་ར་མྨ་ཎ་མེ་ཏཾ ན ཧོ་ཏི ཝི་ཉྙཱ་ཎ་སྶ ཋི་ཏི་ཡཱ. ཨཱ་ར་མྨ་ཎེ ཨ་ས་ཏི པ་ཏི་ཊྛཱ ཝི་ཉྙཱ་ཎ་སྶ ན ཧོ་ཏི. ཏ་ད་པྤ་ཏི་ཊྛི་ཏེ ཝི་ཉྙཱ་ཎེ ཨ་ཝི་རཱུ་ལ༹ྷེ ནཱ་མ་རཱུ་པ་སྶ ཨ་ཝ་ཀྐ་ནྟི ན ཧོ་ཏི. ནཱ་མ་རཱུ་པ་ནི་རོ་དྷཱ ས་ལཱ༹་ཡ་ཏ་ན་ནི་རོ་དྷོ…པེ… ཨེ་ཝ་མེ་ཏ་སྶ ཀེ་ཝ་ལ་སྶ དུ་ཀྑ་ཀྑ་ནྡྷ་སྶ ནི་རོ་དྷོ ཧོ་ཏཱི’’ཏི. ན་ཝ་མཾ.