༤༣༦. ས་མུ་གྒ་ཛཱ་ཏ་ཀཾ (༡༠)
༨༧. ཀུ་ཏོ ནུ ཨཱ་ག་ཙྪ་ཐ བྷོ ཏ་ཡོ ཛ་ནཱ, སྭཱ་ག་ཏཱ ཨེ་ཐ [སྭཱ་ག་ཏཾ ཨེ་ཏྠ (སཱི. པཱི.)] ནི་སཱི་ད་ཐཱ་ས་ནེ;
ཀ་ཙྩི་ཏྠ བྷོ་ནྟོ ཀུ་ས་ལཾ ཨ་ནཱ་མ་ཡཾ, ཙི་ར་སྶ་མ་བྦྷཱ་ག་མ་ནཾ ཧི ཝོ ཨི་དྷ.
༨༨. ཨ་ཧ་མེ་ཝ ཨེ་ཀོ ཨི་དྷ མ་ཛྫ པ་ཏྟོ, ན ཙཱ་པི མེ དུ་ཏི་ཡོ ཀོ་ཙི ཝི་ཛྫ་ཏི;
ཀི་མེ་ཝ ས་ནྡྷཱ་ཡ ཏེ བྷཱ་སི་ཏཾ ཨི་སེ, ‘‘ཀུ་ཏོ ནུ ཨཱ་ག་ཙྪ་ཐ བྷོ ཏ་ཡོ ཛ་ནཱ’’.
༨༩. ཏུ་ཝ་ཉྩ ཨེ་ཀོ བྷ་རི་ཡཱ ཙ ཏེ པི་ཡཱ, ས་མུ་གྒ་པ་ཀྑི་ཏྟ་ནི་ཀི་ཎྞ་མ་ནྟ་རེ;
སཱ ར་ཀྑི་ཏཱ ཀུ་ཙྪི་ག་ཏཱ་ཝ [ཀུ་ཙྪི་ག་ཏཱ ཙ (ཀ.)] ཏེ ས་དཱ, ཝཱ་ཡུ་སྶ [ཧ་རི་སྶ (ཀ.)] པུ་ཏྟེ་ན ས་ཧཱ ཏ་ཧིཾ ར་ཏཱ.
༩༠. སཾ་ཝི་གྒ་རཱུ་པོ ཨི་སི་ནཱ ཝི་ཡཱ་ཀ་ཏོ [པ་བྱཱ་ཀ་ཏོ (ཀ.), བྱཱ་ཀ་ཏོ (སྱཱ. པཱི.)], སོ དཱ་ན་ཝོ ཏ་ཏྠ ས་མུ་གྒ་མུ་གྒི་ལི;
ཨ་དྡ་ཀྑི བྷ་རི་ཡཾ སུ་ཙི མཱ་ལ་དྷཱ་རི་ནིཾ, ཝཱ་ཡུ་སྶ པུ་ཏྟེ་ན ས་ཧཱ ཏ་ཧིཾ ར་ཏཾ.
༩༡. སུ་དི་ཊྛ་རཱུ་པ་མུ་གྒ་ཏ་པཱ་ནུ་ཝ་ཏྟི་ནཱ [སུ་དི་ཊྛ་རཱུ་པུ་གྒ་ཏ་པཱ་ནུ་ཝ་ཏྟི་ནཱ (སཱི. སྱཱ. པཱི.)], ཧཱི་ནཱ ན་རཱ ཡེ པ་མ་དཱ་ཝ་སཾ ག་ཏཱ;
ཡ་ཐཱ ཧ་ཝེ པཱ་ཎ་རི་ཝེ་ཏྠ ར་ཀྑི་ཏཱ, དུ་ཊྛཱ མ་ཡཱི ཨ་ཉྙ་མ་བྷི་པྤ་མོ་ད་ཡི.
༩༢. དི་ཝཱ ཙ ར་ཏྟོ ཙ མ་ཡཱ ཨུ་པ་ཊྛི་ཏཱ, ཏ་པ་སྶི་ནཱ ཛོ་ཏི་རི་ཝཱ ཝ་ནེ ཝ་སཾ;
སཱ དྷ་མྨ་མུ་ཀྐ་མྨ ཨ་དྷ་མྨ་མཱ་ཙ་རི, ཨ་ཀི་རི་ཡ་རཱུ་པོ པ་མ་དཱ་ཧི ས་ནྠ་ཝོ.
༩༣. ས་རཱི་ར་མ་ཛ྄ཛྷ་མྷི ཋི་ཏཱ་ཏི་མ་ཉྙ་ཧཾ, མ་ཡ྄ཧཾ ཨ་ཡ་ནྟི ཨ་ས་ཏིཾ ཨ་ས་ཉྙ་ཏཾ;
སཱ དྷ་མྨ་མུ་ཀྐ་མྨ ཨ་དྷ་མྨ་མཱ་ཙ་རི, ཨ་ཀི་རི་ཡ་རཱུ་པོ པ་མ་དཱ་ཧི ས་ནྠ་ཝོ.
༩༤. སུ་ར་ཀྑི་ཏཾ མེ་ཏི ཀ་ཐཾ ནུ ཝི་སྶ་སེ, ཨ་ནེ་ཀ་ཙི་ཏྟཱ་སུ ན ཧ་ཏྠི [ཨ་ནེ་ཀ་ཙི་ཏྟཱ པུ་ན ཧེ་ཏྠ (ཀ.)] ར་ཀྑ་ཎཱ;
ཨེ་ཏཱ ཧི པཱ་ཏཱ་ལ་པ་པཱ་ཏ་ས་ནྣི་བྷཱ, ཨེ་ཏྠ་པྤ་མ་ཏྟོ བྱ་ས་ནཾ ནི་ག་ཙྪ་ཏི.
༩༥. ཏ་སྨཱ ཧི ཏེ སུ་ཁི་ནོ ཝཱི་ཏ་སོ་ཀཱ, ཡེ མཱ་ཏུ་གཱ་མེ་ཧི ཙ་ར་ནྟི ནི་སྶ་ཊཱ;
ཨེ་ཏཾ སི་ཝཾ ཨུ་ཏྟ་མ་མཱ་བྷི་པ་ཏྠ་ཡཾ, ན མཱ་ཏུ་གཱ་མེ་ཧི ཀ་རེ་ཡྻ ས་ནྠ་ཝ་ནྟི.
ས་མུ་གྒ་ཛཱ་ཏ་ཀཾ ད་ས་མཾ.