༩. ན་ཝ་ཀ་ནི་པཱ་ཏོ
༤༢༧. གི་ཛ྄ཛྷ་ཛཱ་ཏ་ཀཾ (༡)
༡. པ་རི་ས་ངྐུ་པ་ཐོ ནཱ་མ, གི་ཛ྄ཛྷ་པ་ནྠོ ས་ན་ནྟ་ནོ;
ཏ་ཏྲཱ་སི མཱ་ཏཱ་པི་ཏ་རོ, གི་ཛ྄ཛྷོ པོ་སེ་སི ཛི་ཎྞ་ཀེ;
ཏེ་སཾ ཨ་ཛ་ག་ར་མེ་དཾ, ཨ་ཙྩ་ཧཱ་སི བ་ཧུ་ཏྟ་སོ [པ་ཧུ་ཏྟ་ཏོ (ཀ. སཱི.), པ་ཧཱུ་ཏ་སོ (སྱཱ. པཱི.), བ་ཧུ་དྷ་སོ (ཀ.)].
༢. པི་ཏཱ ཙ པུ་ཏྟཾ ཨ་ཝ་ཙ, ཛཱ་ནཾ ཨུ་ཙྩཾ པ་པཱ་ཏི་ནཾ;
སུ་པ་ཏྟཾ ཐཱ་མ་ས་མྤ་ནྣཾ [པ་ཀྑ་ས་མྤ་ནྣཾ (སཱི. སྱཱ. པཱི.)], ཏེ་ཛ་སྶིཾ དཱུ་ར་གཱ་མི་ནཾ.
༣. པ་རི་པླ་ཝ་ནྟཾ པ་ཐ་ཝིཾ, ཡ་དཱ ཏཱ་ཏ ཝི་ཛཱ་ན་ཧི;
སཱ་ག་རེ་ན པ་རི་ཀྑི་ཏྟཾ, ཙ་ཀྐཾ་ཝ པ་རི་མ་ཎྜ་ལཾ;
ཏ་ཏོ ཏཱ་ཏ ནི་ཝ་ཏྟ་སྶུ, མཱ་སྶུ ཨེ་ཏྟོ པ་རཾ ག་མི.
༤. ཨུ་ད་པ་ཏྟོ་སི [ཨུ་དྡྷཾ པ་ཏྟོ་སི (ཀ. སཱི.)] ཝེ་གེ་ན, བ་ལཱི པ་ཀྑཱི དི་ཛུ་ཏྟ་མོ;
ཨོ་ལོ་ཀ་ཡ་ནྟོ ཝ་ཀྐ་ངྒོ, པ་བྦ་ཏཱ་ནི ཝ་ནཱ་ནི ཙ.
༥. ཨ་དྡ་སྶ པ་ཐ་ཝིཾ གི་ཛ྄ཛྷོ, ཡ་ཐཱ་སཱ་སི [ཡ་ཐཱ་སྶཱ་སི (སྱཱ. ཨ་ཊྛ. པཱ་ཋ་ནྟ་རཾ)] པི་ཏུ་སྶུ་ཏཾ;
སཱ་ག་རེ་ན པ་རི་ཀྑི་ཏྟཾ, ཙ་ཀྐཾ་ཝ པ་རི་མ་ཎྜ་ལཾ.
༦. ཏ་ཉྩ སོ ས་མ་ཏི་ཀྐ་མྨ, པ་ར་མེ་ཝ་ཙྩ་ཝ་ཏྟ་ཐ [པ་ར་མེ་ཝ པ་ཝ་ཏྟ་ཐ (སཱི. སྱཱ.)];
ཏ་ཉྩ ཝཱ་ཏ་སི་ཁཱ ཏི་ཀྑཱ, ཨ་ཙྩ་ཧཱ་སི བ་ལིཾ དི་ཛཾ.
༧. ནཱ་ས་ཀྑཱ་ཏི་ག་ཏོ པོ་སོ, པུ་ན་དེ་ཝ ནི་ཝ་ཏྟི་ཏུཾ;
དི་ཛོ བྱ་ས་ན་མཱ་པཱ་དི, ཝེ་ར་མྦྷཱ་ནཾ [ཝེ་ར་མྦཱ་ནཾ (སཱི. པཱི.)] ཝ་སཾ ག་ཏོ.
༨. ཏ་སྶ པུ་ཏྟཱ ཙ དཱ་རཱ ཙ, ཡེ ཙ་ཉྙེ ཨ་ནུ་ཛཱི་ཝི་ནོ;
ས་བྦེ བྱ་ས་ན་མཱ་པཱ་དུཾ, ཨ་ནོ་ཝཱ་ད་ཀ་རེ དི་ཛེ.
༩. ཨེ་ཝ་མྤི ཨི་དྷ ཝུ་ཌྜྷཱ་ནཾ, ཡོ ཝཱ་ཀྱཾ ནཱ་ཝ་བུ་ཛ྄ཛྷ་ཏི;
ཨ་ཏི་སཱི་མ་ཙ་རོ དི་ཏྟོ, གི་ཛ྄ཛྷོ་ཝཱ་ཏཱི་ཏ་སཱ་ས་ནོ;
ས ཝེ བྱ་ས་ནཾ པ་པྤོ་ཏི, ཨ་ཀ་ཏྭཱ ཝུ་ཌྜྷ་སཱ་ས་ན་ནྟི.
གི་ཛ྄ཛྷ་ཛཱ་ཏ་ཀཾ པ་ཋ་མཾ.
༤༢༨. ཀོ་ས་མྦི་ཡ་ཛཱ་ཏ་ཀཾ (༢)
༡༠. པུ་ཐུ་ས་དྡོ ས་མ་ཛ་ནོ, ན བཱ་ལོ ཀོ་ཙི མ་ཉྙ་ཐ;
ས་ངྒྷ་སྨིཾ བྷི་ཛྫ་མཱ་ན་སྨིཾ, ནཱ་ཉྙཾ བྷི་ཡྻོ ཨ་མ་ཉྙ་རུཾ.
༡༡. པ་རི་མུ་ཊྛཱ པ་ཎྜི་ཏཱ་བྷཱ་སཱ, ཝཱ་ཙཱ་གོ་ཙ་ར་བྷཱ་ཎི་ནོ;
ཡཱ་ཝི་ཙྪ་ནྟི མུ་ཁཱ་ཡཱ་མཾ, ཡེ་ན ནཱི་ཏཱ ན ཏཾ ཝི་དཱུ.
༡༢. ཨ་ཀྐོ་ཙྪི མཾ ཨ་ཝ་དྷི མཾ, ཨ་ཛི་ནི མཾ ཨ་ཧཱ་སི མེ;
ཡེ ཙ ཏཾ ཨུ་པ་ན་ཡ྄ཧ་ནྟི, ཝེ་རཾ ཏེ་སཾ ན ས་མྨ་ཏི.
༡༣. ཨ་ཀྐོ་ཙྪི མཾ ཨ་ཝ་དྷི མཾ, ཨ་ཛི་ནི མཾ ཨ་ཧཱ་སི མེ;
ཡེ ཙ ཏཾ ནུ་པ་ན་ཡ྄ཧ་ནྟི, ཝེ་རཾ ཏེ་སཱུ་པ་ས་མྨ་ཏི.
༡༤. ན ཧི ཝེ་རེ་ན ཝེ་རཱ་ནི, ས་མྨ་ནྟཱི་དྷ ཀུ་དཱ་ཙ་ནཾ;
ཨ་ཝེ་རེ་ན ཙ ས་མྨ་ནྟི, ཨེ་ས དྷ་མྨོ ས་ན་ནྟ་ནོ.
༡༥. པ་རེ ཙ ན ཝི་ཛཱ་ན་ནྟི, མ་ཡ་མེ་ཏྠ ཡ་མཱ་མ་སེ;
ཡེ ཙ ཏ་ཏྠ ཝི་ཛཱ་ན་ནྟི, ཏ་ཏོ ས་མྨ་ནྟི མེ་དྷ་གཱ.
༡༦. ཨ་ཊྛི་ཙྪི་ནྣཱ པཱ་ཎ་ཧ་རཱ, ག་ཝ་སྶ [ག་ཝཱ་སྶ (སཱི. སྱཱ. པཱི.)] དྷ་ན་ཧཱ་རི་ནོ;
ར་ཊྛཾ ཝི་ལུ་མྤ་མཱ་ནཱ་ནཾ, ཏེ་ས་མྤི ཧོ་ཏི ས་ངྒ་ཏི;
ཀ་སྨཱ ཏུ་མྷཱ་ཀ ནོ སི་ཡཱ.
༡༧. ས་ཙེ ལ་བྷེ་ཐ ནི་པ་ཀཾ ས་ཧཱ་ཡཾ, ས་དྡྷིཾ་ཙ་རཾ སཱ་དྷུ་ཝི་ཧཱ་རི་དྷཱི་རཾ;
ཨ་བྷི་བྷུ་ཡྻ ས་བྦཱ་ནི པ་རི་སྶ་ཡཱ་ནི, ཙ་རེ་ཡྻ ཏེ་ན་ཏྟ་མ་ནོ ས་ཏཱི་མཱ.
༡༨. ནོ ཙེ ལ་བྷེ་ཐ ནི་པ་ཀཾ ས་ཧཱ་ཡཾ, ས་དྡྷིཾ་ཙ་རཾ སཱ་དྷུ་ཝི་ཧཱ་རི་དྷཱི་རཾ;
རཱ་ཛཱ་ཝ ར་ཊྛཾ ཝི་ཛི་ཏཾ པ་ཧཱ་ཡ, ཨེ་ཀོ ཙ་རེ མཱ་ཏ་ངྒ་ར་ཉྙེ་ཝ ནཱ་གོ.
༡༩. ཨེ་ཀ་སྶ ཙ་རི་ཏཾ སེ་ཡྻོ, ན་ཏྠི བཱ་ལེ ས་ཧཱ་ཡ་ཏཱ;
ཨེ་ཀོ ཙ་རེ ན པཱ་པཱ་ནི ཀ་ཡི་རཱ, ཨ་པྤོ་སྶུ་ཀྐོ མཱ་ཏ་ངྒ་ར་ཉྙེ་ཝ ནཱ་གོ་ཏི.
ཀོ་ས་མྦི་ཡ་ཛཱ་ཏ་ཀཾ དུ་ཏི་ཡཾ.
༤༢༩. མ་ཧཱ་སུ་ཝ་ཛཱ་ཏ་ཀཾ (༣)
༢༠. དུ་མོ ཡ་དཱ ཧོ་ཏི ཕ་ལཱུ་པ་པ་ནྣོ, བྷུ་ཉྫ་ནྟི ནཾ ཝི་ཧ་ངྒ་མཱ [ཝི་ཧ་གཱ (སཱི. པཱི.)] ས་མྤ་ཏ་ནྟཱ;
ཁཱི་ཎ་ནྟི ཉ་ཏྭཱ་ན དུ་མཾ ཕ་ལ་ཙྩ་ཡེ [ཉ་ཏྭཱ དུ་མ་པྥ་ལ་ཙྩ་ཡེ་ན (ཀ.)], དི་སོ་དི་སཾ ཡ་ནྟི ཏ་ཏོ ཝི་ཧ་ངྒ་མཱ.
༢༡. ཙ་ར ཙཱ་རི་ཀཾ ལོ་ཧི་ཏ་ཏུ་ཎྜ མཱ་མ་རི, ཀིཾ ཏྭཾ སུ་ཝ སུ་ཀྑ་དུ་མ་མྷི ཛྷཱ་ཡ་སི;
ཏ་དི་ངྒྷ མཾ བྲཱུ་ཧི ཝ་ས་ནྟ་ས་ནྣི་བྷ, ཀ་སྨཱ སུ་ཝ སུ་ཀྑ་དུ་མཾ ན རི་ཉྩ་སི.
༢༢. ཡེ ཝེ ས་ཁཱི་ནཾ ས་ཁཱ་རོ བྷ་ཝ་ནྟི, པཱ་ཎ་ཙྩ་ཡེ [པཱ་ཎཾ ཙ་ཛེ (ཀ.), པཱ་ཎ་ཙྩ་ཡེ མ་ར་ཎ་ཀཱ་ལེ ཙ སུ་ཁ་དུ་ཀྑེ་སུ ཙ ན ཛ་ཧ་ནྟཱི་ཏི ས་མྦ་ནྡྷོ] དུ་ཀྑ་སུ་ཁེ་སུ ཧཾ་ས;
ཁཱི་ཎཾ ཨ་ཁཱི་ཎ་ནྟི ན ཏཾ ཛ་ཧ་ནྟི, ས་ནྟོ ས་ཏཾ དྷ་མྨ་མ་ནུ་སྶ་ར་ནྟཱ.
༢༣. སོ་ཧཾ ས་ཏཾ ཨ་ཉྙ་ཏ་རོ་སྨི ཧཾ་ས, ཉཱ་ཏཱི ཙ མེ ཧོ་ཏི ས་ཁཱ ཙ རུ་ཀྑོ;
ཏཾ ནུ་སྶ་ཧེ ཛཱི་ཝི་ཀ་ཏྠོ པ་ཧཱ་ཏུཾ, ཁཱི་ཎ་ནྟི ཉ་ཏྭཱ་ན ན ཧེ་ས དྷ་མྨོ [ན སོ་ས (ཀ.), ན ཨེ་ས (སྱཱ.)].
༢༤. སཱ་དྷུ ས་ཀྑི ཀ་ཏཾ ཧོ་ཏི, མེ་ཏྟི སཾ་ས་ཏི ས་ནྠ་ཝོ [མི་ཏྟཾ ས་ངྒ་ཏི ས་ནྡྷ་ཝོ (ཀ.)];
ས་ཙེ་ཏཾ དྷ་མྨཾ རོ་ཙེ་སི, པཱ་སཾ་སོ་སི ཝི་ཛཱ་ན་ཏཾ.
༢༥. སོ ཏེ སུ་ཝ ཝ་རཾ ད་མྨི, པ་ཏྟ་ཡཱ་ན ཝི་ཧ་ངྒ་མ;
ཝ་རཾ ཝ་ར་སྶུ ཝ་ཀྐ་ངྒ, ཡཾ ཀི་ཉྩི མ་ན་སི་ཙྪ་སི.
༢༦. ཝ་ར་ཉྩ མེ ཧཾ་ས བྷ་ཝཾ ད་དེ་ཡྻ, ཨ་ཡ་ཉྩ རུ་ཀྑོ པུ་ན་རཱ་ཡུཾ ལ་བྷེ་ཐ;
སོ སཱ་ཁ་ཝཱ ཕ་ལི་མཱ སཾ་ཝི་རཱུ་ལ༹ྷོ, མ་དྷུ་ཏྠི་ཀོ ཏི་ཊྛ་ཏུ སོ་བྷ་མཱ་ནོ.
༢༧. ཏཾ པ་སྶ ས་མྨ ཕ་ལི་མཾ ཨུ་ལཱ༹་རཾ, ས་ཧཱ་ཝ ཏེ ཧོ་ཏུ ཨུ་དུ་མྦ་རེ་ན;
སོ སཱ་ཁ་ཝཱ ཕ་ལི་མཱ སཾ་ཝི་རཱུ་ལ༹ྷོ, མ་དྷུ་ཏྠི་ཀོ ཏི་ཊྛ་ཏུ སོ་བྷ་མཱ་ནོ.
༢༨. ཨེ་ཝཾ ས་ཀྐ སུ་ཁཱི ཧོ་ཧི, ས་ཧ ས་བྦེ་ཧི ཉཱ་ཏི་བྷི;
ཡ་ཐཱ་ཧ་མ་ཛྫ སུ་ཁི་ཏོ, དི་སྭཱ་ན ས་ཕ་ལཾ དུ་མཾ.
༢༩. སུ་ཝ་སྶ ཙ ཝ་རཾ ད་ཏྭཱ, ཀ་ཏྭཱ་ན ས་ཕ་ལཾ དུ་མཾ;
པ་ཀྐཱ་མི ས་ཧ བྷ་རི་ཡཱ་ཡ, དེ་ཝཱ་ནཾ ན་ནྡ་ནཾ ཝ་ན་ནྟི.
མ་ཧཱ་སུ་ཝ་ཛཱ་ཏ་ཀཾ ཏ་ཏི་ཡཾ.
༤༣༠. ཙཱུ་ལ༹་སུ་ཝ་ཛཱ་ཏ་ཀཾ (༤)
༣༠. ས་ནྟི རུ་ཀྑཱ ཧ་རི་པ་ཏྟཱ [ཧ་རི་ཏ་པ་ཏྟཱ (སཱི. སྱཱ. པཱི.)], དུ་མཱ ནེ་ཀ་ཕ་ལཱ བ་ཧཱུ;
ཀ་སྨཱ ནུ སུ་ཀྑེ [སུ་ཀྑ (ཀ.)] ཀོ་ལཱ༹་པེ, སུ་ཝ་སྶ ནི་ར་ཏོ མ་ནོ.
༣༡. ཕ་ལ་སྶ ཨུ་པ་བྷུ་ཉྫི་མྷཱ, ནེ་ཀ་ཝ་སྶ་ག་ཎེ བ་ཧཱུ;
ཨ་ཕ་ལ་མྤི ཝི་དི་ཏྭཱ་ན, སཱ་ཝ མེ་ཏྟི ཡ་ཐཱ པུ་རེ.
༣༢. སུ་ཁ་ཉྩ རུ་ཀྑཾ ཀོ་ལཱ༹་པཾ, ཨོ་པ་ཏྟ་མ་ཕ་ལཾ དུ་མཾ;
ཨོ་ཧཱ་ཡ ས་ཀུ་ཎཱ ཡ་ནྟི, ཀིཾ དོ་སཾ པ་སྶ་སེ དི་ཛ.
༣༣. ཡེ ཕ་ལ་ཏྠཱ ས་མྦྷ་ཛ་ནྟི, ཨ་ཕ་ལོ་ཏི ཛ་ཧ་ནྟི ནཾ;
ཨ་ཏྟ་ཏྠ་པ་ཉྙཱ དུ་མྨེ་དྷཱ, ཏེ ཧོ་ནྟི པ་ཀྑ་པཱ་ཏི་ནོ.
༣༤. སཱ་དྷུ ས་ཀྑི ཀ་ཏཾ ཧོ་ཏི, མེ་ཏྟི སཾ་ས་ཏི ས་ནྠ་ཝོ;
ས་ཙེ་ཏཾ དྷ་མྨཾ རོ་ཙེ་སི, པཱ་སཾ་སོ་སི ཝི་ཛཱ་ན་ཏཾ.
༣༥. སོ ཏེ སུ་ཝ ཝ་རཾ ད་མྨི, པ་ཏྟ་ཡཱ་ན ཝི་ཧ་ངྒ་མ;
ཝ་རཾ ཝ་ར་སྶུ ཝ་ཀྐ་ངྒ, ཡཾ ཀི་ཉྩི མ་ན་སི་ཙྪ་སི.
༣༦. ཨ་པི ནཱ་མ ནཾ པ་སྶེ་ཡྻཾ [ཨ་པི ནཱ་མ ནཾ པུ་ན པ་སྶེ (སཱི. སྱཱ.)], ས་པ་ཏྟཾ ས་ཕ་ལཾ དུ་མཾ;
ད་ལི་དྡོ་ཝ ནི་དྷི ལ་དྡྷཱ, ན་ནྡེ་ཡྻཱ་ཧཾ པུ་ན་པྤུ་ནཾ.
༣༧. ཏ་ཏོ ཨ་མ་ཏ་མཱ་དཱ་ཡ, ཨ་བྷི་སི་ཉྩི མ་ཧཱི་རུ་ཧཾ;
ཏ་སྶ སཱ་ཁཱ ཝི་རཱུ་ཧིཾ་སུ [ཝི་རཱུ་ལ༹ྷ་སྶ (ཀ.)], སཱི་ཏ་ཙྪཱ་ཡཱ མ་ནོ་ར་མཱ.
༣༨. ཨེ་ཝཾ ས་ཀྐ སུ་ཁཱི ཧོ་ཧི, ས་ཧ ས་བྦེ་ཧི ཉཱ་ཏི་བྷི;
ཡ་ཐཱ་ཧ་མ་ཛྫ སུ་ཁི་ཏོ, དི་སྭཱ་ན ས་ཕ་ལཾ དུ་མཾ.
༣༩. སུ་ཝ་སྶ ཙ ཝ་རཾ ད་ཏྭཱ, ཀ་ཏྭཱ་ན ས་ཕ་ལཾ དུ་མཾ;
པ་ཀྐཱ་མི ས་ཧ བྷ་རི་ཡཱ་ཡ, དེ་ཝཱ་ནཾ ན་ནྡ་ནཾ ཝ་ན་ནྟི.
ཙཱུ་ལ༹་སུ་ཝ་ཛཱ་ཏ་ཀཾ ཙ་ཏུ་ཏྠཾ.
༤༣༡. ཧ་རི་ཏ་ཙ་ཛཱ་ཏ་ཀཾ (༥)
༤༠. སུ་ཏཾ མེ་ཏཾ མ་ཧཱ་བྲ་ཧྨེ, ཀཱ་མེ བྷུ་ཉྫ་ཏི ཧཱ་རི་ཏོ;
ཀ་ཙྩེ་ཏཾ ཝ་ཙ་ནཾ ཏུ་ཙྪཾ, ཀ་ཙྩི སུ་དྡྷོ ཨི་རི་ཡྻ་སི.
༤༡. ཨེ་ཝ་མེ་ཏཾ མ་ཧཱ་རཱ་ཛ, ཡ་ཐཱ ཏེ ཝ་ཙ་ནཾ སུ་ཏཾ;
ཀུ་མྨ་གྒཾ པ་ཊི་པ་ནྣོ་སྨི, མོ་ཧ་ནེ་ཡྻེ་སུ མུ་ཙྪི་ཏོ.
༤༢. ཨ་དུ [ཨཱ་དུ (སཱི. པཱི.)] པ་ཉྙཱ ཀི་མ་ཏྠི་ཡཱ, ནི་པུ་ཎཱ སཱ་དྷུ་ཙི་ནྟི་ནཱི [ཙི་ནྟ་ནཱི (སཱི. པཱི.)];
ཡཱ་ཡ ཨུ་པྤ་ཏི་ཏཾ རཱ་གཾ, ཀིཾ མ་ནོ ན ཝི་ནོ་ད་ཡེ.
༤༣. ཙ་ཏྟཱ་རོ་མེ མ་ཧཱ་རཱ་ཛ, ལོ་ཀེ ཨ་ཏི་བ་ལཱ བྷུ་སཱ;
རཱ་གོ དོ་སོ མ་དོ མོ་ཧོ, ཡ་ཏྠ པ་ཉྙཱ ན གཱ་དྷ་ཏི.
༤༤. ཨ་ར་ཧཱ སཱི་ལ་ས་མྤ་ནྣོ, སུ་དྡྷོ ཙ་ར་ཏི ཧཱ་རི་ཏོ;
མེ་དྷཱ་ཝཱི པ་ཎྜི་ཏོ ཙེ་ཝ, ཨི་ཏི ནོ ས་མྨ་ཏོ བྷ་ཝཾ.
༤༥. མེ་དྷཱ་ཝཱི་ན་མྤི ཧིཾ་ས་ནྟི, ཨི་སིཾ དྷ་མྨ་གུ་ཎེ ར་ཏཾ;
ཝི་ཏ་ཀྐཱ པཱ་པ་ཀཱ རཱ་ཛ, སུ་བྷཱ རཱ་གཱུ་པ་སཾ་ཧི་ཏཱ.
༤༦. ཨུ་པྤ་ནྣཱ་ཡཾ ས་རཱི་ར་ཛོ, རཱ་གོ ཝ་ཎྞ་ཝི་དཱུ་ས་ནོ ཏ་ཝ;
ཏཾ པ་ཛ་ཧ བྷ་དྡ་མ་ཏྠུ ཏེ, བ་ཧུ་ནྣཱ་སི མེ་དྷཱ་ཝི་ས་མྨ་ཏོ.
༤༧. ཏེ ཨ་ནྡྷ་ཀཱ་ར་ཀེ [ཀ་ར་ཎེ (སཱི. སྱཱ. པཱི.)] ཀཱ་མེ, བ་ཧུ་དུ་ཀྑེ མ་ཧཱ་ཝི་སེ;
ཏེ་སཾ མཱུ་ལཾ ག་ཝེ་སི་སྶཾ, ཚེ་ཙྪཾ རཱ་གཾ ས་བ་ནྡྷ་ནཾ.
༤༨. ཨི་དཾ ཝ་ཏྭཱ་ན ཧཱ་རི་ཏོ, ཨི་སི ས་ཙྩ་པ་ར་ཀྐ་མོ;
ཀཱ་མ་རཱ་གཾ ཝི་རཱ་ཛེ་ཏྭཱ, བྲ་ཧྨ་ལོ་ཀཱུ་པ་གོ ཨ་ཧཱུ་ཏི.
ཧ་རི་ཏ་ཙ་ཛཱ་ཏ་ཀཾ [ཧཱ་རི་ཏ་ཛཱ་ཏ་ཀཾ (སཱི. པཱི.)] པ་ཉྩ་མཾ.
༤༣༢. པ་ད་ཀུ་ས་ལ་མཱ་ཎ་ཝ་ཛཱ་ཏ་ཀཾ (༦)
༤༩. བ་ཧུ་སྶུ་ཏཾ ཙི་ཏྟ་ཀ་ཐིཾ [ཙི་ཏྟ་ཀ་ཐཾ (སྱཱ. ཀ.)], ག་ངྒཱ ཝ་ཧ་ཏི པཱ་ཊ་ལིཾ [པཱ་ཊ་ལཾ (སཱི. པཱི.)];
ཝུ་ཡ྄ཧ་མཱ་ན་ཀ བྷ་དྡ་ནྟེ, ཨེ་ཀཾ མེ དེ་ཧི གཱ་ཐ་ཀཾ [གཱི་ཏ་ཀཾ (ཀ. ཨ་ཊྛ.)].
༥༠. ཡེ་ན སི་ཉྩ་ནྟི དུ་ཀྑི་ཏཾ, ཡེ་ན སི་ཉྩ་ནྟི ཨཱ་ཏུ་རཾ;
ཏ་སྶ མ་ཛ྄ཛྷེ མ་རི་སྶཱ་མི, ཛཱ་ཏཾ ས་ར་ཎ་ཏོ བྷ་ཡཾ.
༥༡. ཡ་ཏྠ བཱི་ཛཱ་ནི རཱུ་ཧ་ནྟི, ས་ཏྟཱ ཡ་ཏྠ པ་ཏི་ཊྛི་ཏཱ;
སཱ མེ སཱི་སཾ ནི་པཱི་ལེ༹་ཏི, ཛཱ་ཏཾ ས་ར་ཎ་ཏོ བྷ་ཡཾ.
༥༢. ཡེ་ན བྷ་ཏྟཱ་ནི པ་ཙྩ་ནྟི, སཱི་ཏཾ ཡེ་ན ཝི་ཧ་ཉྙ་ཏི;
སོ མཾ ཌ་ཧ་ཏི [ད་ཡ྄ཧ་ཏི (ཀ.)] ག་ཏྟཱ་ནི, ཛཱ་ཏཾ ས་ར་ཎ་ཏོ བྷ་ཡཾ.
༥༣. ཡེ་ན བྷུ་ཏྟེ་ན [བྷ་ཏྟེ་ན (སྱཱ. ཀ.)] ཡཱ་པེ་ནྟི, པུ་ཐཱུ བྲཱ་ཧྨ་ཎ་ཁ་ཏྟི་ཡཱ;
སོ མཾ བྷུ་ཏྟོ བྱཱ་པཱ་དེ་ཏི, ཛཱ་ཏཾ ས་ར་ཎ་ཏོ བྷ་ཡཾ.
༥༤. གི་མྷཱ་ནཾ པ་ཙྪི་མེ མཱ་སེ, ཝཱ་ཏ་མི་ཙྪ་ནྟི པ་ཎྜི་ཏཱ;
སོ མཾ [སོ མེ (སཱི. པཱི.)] བྷ་ཉྫ་ཏི ག་ཏྟཱ་ནི, ཛཱ་ཏཾ ས་ར་ཎ་ཏོ བྷ་ཡཾ.
༥༥. ཡཾ ནི་སྶི་ཏཱ ཛ་ག་ཏི་རུ་ཧཾ, སྭཱ་ཡཾ ཨ་གྒིཾ པ་མུ་ཉྩ་ཏི;
དི་སཱ བྷ་ཛ་ཐ ཝ་ཀྐ་ངྒཱ, ཛཱ་ཏཾ ས་ར་ཎ་ཏོ བྷ་ཡཾ.
༥༦. ཡ་མཱ་ན་ཡིཾ སོ་མ་ན་སྶཾ, མཱ་ལི་ནིཾ ཙ་ནྡ་ནུ་སྶ་དཾ;
སཱ མཾ གྷ་རཱ ནི་ཙྪུ་བྷ་ཏི [ནཱི་ཧ་ར་ཏི (སཱི. སྱཱ.)], ཛཱ་ཏཾ ས་ར་ཎ་ཏོ བྷ་ཡཾ.
༥༧. ཡེ་ན ཛཱ་ཏེ་ན ན་ནྡི་སྶཾ, ཡ་སྶ ཙ བྷ་ཝ་མི་ཙྪི་སཾ;
སོ མཾ གྷ་རཱ ནི་ཙྪུ་བྷ་ཏི [ནཱི་ཧ་ར་ཏི (སཱི. སྱཱ.)], ཛཱ་ཏཾ ས་ར་ཎ་ཏོ བྷ་ཡཾ.
༥༨. སུ་ཎ་ནྟུ མེ ཛཱ་ན་པ་དཱ, ནེ་ག་མཱ ཙ ས་མཱ་ག་ཏཱ;
ཡ་ཏོ་ད་ཀཾ ཏ་དཱ་དི་ཏྟཾ, ཡ་ཏོ ཁེ་མཾ ཏ་ཏོ བྷ་ཡཾ.
༥༩. རཱ་ཛཱ ཝི་ལུ་མྤ་ཏེ ར་ཊྛཾ, བྲཱ་ཧྨ་ཎོ ཙ པུ་རོ་ཧི་ཏོ;
ཨ་ཏྟ་གུ་ཏྟཱ ཝི་ཧ་ར་ཐ, ཛཱ་ཏཾ ས་ར་ཎ་ཏོ བྷ་ཡ་ནྟི.
པ་ད་ཀུ་ས་ལ་མཱ་ཎ་ཝ་ཛཱ་ཏ་ཀཾ ཚ་ཊྛཾ.
༤༣༣. ལོ་མ་ས་ཀ་སྶ་པ་ཛཱ་ཏ་ཀཾ (༧)
༦༠. ཨ་སྶ ཨི་ནྡ་ས་མོ རཱ་ཛ, ཨ་ཙྩ་ནྟཾ ཨ་ཛ་རཱ་མ་རོ;
ས་ཙེ ཏྭཾ ཡ་ཉྙཾ ཡཱ་ཛེ་ཡྻ, ཨི་སིཾ ལོ་མ་ས་ཀ་སྶ་པཾ.
༦༡. ས་ས་མུ་དྡ་པ་རི་ཡཱ་ཡཾ, མ་ཧིཾ སཱ་ག་ར་ཀུ་ཎྜ་ལཾ;
ན ཨི་ཙྪེ ས་ཧ ནི་ནྡཱ་ཡ, ཨེ་ཝཾ སེ་ཡྻ [ས་ཡ྄ཧ (སཱི. སྱཱ. པཱི.)] ཝི་ཛཱ་ན་ཧི.
༦༢. དྷི་ར་ཏྠུ ཏཾ ཡ་ས་ལཱ་བྷཾ, དྷ་ན་ལཱ་བྷ་ཉྩ བྲཱ་ཧྨ་ཎ;
ཡཱ ཝུ་ཏྟི ཝི་ནི་པཱ་ཏེ་ན, ཨ་དྷ་མྨ་ཙ་ར་ཎེ་ན ཝཱ.
༦༣. ཨ་པི ཙེ པ་ཏྟ་མཱ་དཱ་ཡ, ཨ་ན་གཱ་རོ པ་རི་བྦ་ཛེ;
སཱ་ཡེ་ཝ ཛཱི་ཝི་ཀཱ སེ་ཡྻོ, ཡཱ ཙཱ་དྷ་མྨེ་ན ཨེ་ས་ནཱ.
༦༤. ཨ་པི ཙེ པ་ཏྟ་མཱ་དཱ་ཡ, ཨ་ན་གཱ་རོ པ་རི་བྦ་ཛེ;
ཨ་ཉྙཾ ཨ་ཧིཾ་ས་ཡཾ ལོ་ཀེ, ཨ་པི ར་ཛྫེ་ན ཏཾ ཝ་རཾ.
༦༥. བ་ལཾ ཙ་ནྡོ བ་ལཾ སུ་རི་ཡོ, བ་ལཾ ས་མ་ཎ་བྲཱ་ཧྨ་ཎཱ;
བ་ལཾ ཝེ་ལཱ ས་མུ་དྡ་སྶ, བ་ལཱ་ཏི་བ་ལ་མི་ཏྠི་ཡོ.
༦༦. ཡ་ཐཱ ཨུ་གྒ་ཏ་པཾ ས་ནྟཾ, ཨི་སིཾ ལོ་མ་ས་ཀ་སྶ་པཾ;
པི་ཏུ ཨ་ཏྠཱ ཙ་ནྡ་ཝ་ཏཱི, ཝཱ་ཛ་པེ་ཡྻཾ [ཝཱ་ཙ་པེ་ཡྻཾ (པཱི. ཀ.)] ཨ་ཡཱ་ཛ་ཡི.