༤༢༤. ཨཱ་དི་ཏྟ་ཛཱ་ཏ་ཀཾ (༨)

༦༩. ཨཱ་དི་ཏྟ་སྨིཾ ཨ་གཱ་ར་སྨིཾ, ཡཾ ནཱི་ཧ་ར་ཏི བྷཱ་ཛ་ནཾ;

ཏཾ ཏ་སྶ ཧོ་ཏི ཨ་ཏྠཱ་ཡ, ནོ ཙ ཡཾ ཏ་ཏྠ ཌ་ཡ྄ཧ་ཏི.

༧༠. ཨེ་ཝཱ་མཱ་དཱི་པི་ཏོ ལོ་ཀོ, ཛ་རཱ་ཡ མ་ར་ཎེ་ན ཙ;

ནཱི་ཧ་རེ་ཐེ་ཝ དཱ་ནེ་ན, དི་ནྣཾ ཧོ་ཏི སུ་ནཱི་ཧ་ཏཾ [སུ་ནཱི་བྷ་ཏཾ (སཱི. སྱཱ. པཱི.), སུ་ནི་བྦྷ་ཏཾ (ཀ.)].

༧༡. ཡོ དྷ་མྨ་ལ་དྡྷ་སྶ ད་དཱ་ཏི དཱ་ནཾ, ཨུ་ཊྛཱ་ན་ཝཱི་རི་ཡཱ་དྷི་ག་ཏ་སྶ ཛ་ནྟུ;

ཨ་ཏི་ཀྐ་མྨ སོ ཝེ་ཏ་ར་ཎིཾ [ཝེ་ཏྟ་ར་ཎིཾ (ཀ.)] ཡ་མ་སྶ, དི་བྦཱ་ནི ཋཱ་ནཱ་ནི ཨུ་པེ་ཏི མ་ཙྩོ.

༧༢. དཱ་ན་ཉྩ ཡུ་དྡྷ་ཉྩ ས་མཱ་ན་མཱ་ཧུ, ཨ་པྤཱ་པི ས་ནྟཱ བ་ཧུ་ཀེ ཛི་ན་ནྟི;

ཨ་པྤ་མྤི ཙེ ས་དྡ་ཧཱ་ནོ ད་དཱ་ཏི, ཏེ་ནེ་ཝ སོ ཧོ་ཏི སུ་ཁཱི པ་ར་ཏྠ.

༧༣. ཝི་ཙེ་ཡྻ དཱ་ནཾ སུ་ག་ཏ་པྤ་ས་ཏྠཾ, ཡེ ད་ཀྑི་ཎེ་ཡྻཱ ཨི་དྷ ཛཱི་ཝ་ལོ་ཀེ;

ཨེ་ཏེ་སུ དི་ནྣཱ་ནི མ་ཧ་པྥ་ལཱ་ནི, བཱི་ཛཱ་ནི ཝུ་ཏྟཱ་ནི ཡ་ཐཱ སུ་ཁེ་ཏྟེ.

༧༤. ཡོ པཱ་ཎ་བྷཱུ་ཏཱ་ནི ཨ་ཧེ་ཋ་ཡཾ ཙ་རཾ, པ་རཱུ་པ་ཝཱ་དཱ ན ཀ་རོ་ཏི པཱ་པཾ;

བྷཱི་རུཾ པ་སཾ་ས་ནྟི ན ཏ་ཏྠ སཱུ་རཾ, བྷ་ཡཱ ཧི ས་ནྟོ ན ཀ་རོ་ནྟི པཱ་པཾ.

༧༥. ཧཱི་ནེ་ན བྲ་ཧྨ་ཙ་རི་ཡེ་ན, ཁ་ཏྟི་ཡེ ཨུ་པ་པ་ཛྫ་ཏི;

མ་ཛ྄ཛྷི་མེ་ན ཙ དེ་ཝ་ཏྟཾ, ཨུ་ཏྟ་མེ་ན ཝི་སུ་ཛ྄ཛྷ་ཏི.

༧༦. ཨ་དྡྷཱ ཧི དཱ་ནཾ བ་ཧུ་དྷཱ པ་ས་ཏྠཾ, དཱ་ནཱ ཙ ཁོ དྷ་མྨ་པ་དཾ་ཝ སེ་ཡྻོ;

པུ་བྦེ་ཝ ཧི པུ་བྦ་ཏ་རེ་ཝ ས་ནྟོ [པུ་བྦེ ཙ ཧི པུ་བྦ་ཏ་རེ ཙ ས་ནྟོ (སཾ. ནི. ༡.༣༣)], ནི་བྦཱ་ན་མེ་ཝ་ཛ྄ཛྷ་ག་མུཾ ས་པ་ཉྙཱ་ཏི.

ཨཱ་དི་ཏྟ་ཛཱ་ཏ་ཀཾ ཨ་ཊྛ་མཾ.