༢. ཝ་ཎྞཱ་རོ་ཧ་ཝ་གྒོ
༣༦༡. ཝ་ཎྞཱ་རོ་ཧ་ཛཱ་ཏ་ཀཾ (༥-༢-༡)
༦༠. ཝ་ཎྞཱ་རོ་ཧེ་ན ཛཱ་ཏི་ཡཱ, བ་ལ་ནི་ཀྐ་མ་ནེ་ན ཙ;
སུ་བཱ་ཧུ ན མ་ཡཱ སེ་ཡྻོ, སུ་དཱ་ཋ ཨི་ཏི བྷཱ་ས་སི.
༦༡. ཝ་ཎྞཱ་རོ་ཧེ་ན ཛཱ་ཏི་ཡཱ, བ་ལ་ནི་ཀྐ་མ་ནེ་ན ཙ;
སུ་དཱ་ཋོ ན མ་ཡཱ སེ་ཡྻོ, སུ་བཱ་ཧུ ཨི་ཏི བྷཱ་ས་སི.
༦༢. ཨེ་ཝཾ ཙེ མཾ ཝི་ཧ་ར་ནྟཾ, སུ་བཱ་ཧུ ས་མྨ དུ་བྦྷ་སི;
ན དཱ་ནཱ་ཧཾ ཏ་ཡཱ ས་དྡྷིཾ, སཾ་ཝཱ་ས་མ་བྷི་རོ་ཙ་ཡེ.
༦༣. ཡོ པ་རེ་སཾ ཝ་ཙ་ནཱ་ནི, ས་དྡ་ཧེ་ཡྻ [ས་དྡ་ཧེ་ཐ (སཱི. སྱཱ. པཱི.)] ཡ་ཐཱ་ཏ་ཐཾ;
ཁི་པྤཾ བྷི་ཛྫེ་ཐ མི་ཏྟ་སྨིཾ, ཝེ་ར་ཉྩ པ་ས་ཝེ བ་ཧུཾ.
༦༤. ན སོ མི་ཏྟོ ཡོ ས་དཱ ཨ་པྤ་མ་ཏྟོ, བྷེ་དཱ་ས་ངྐཱི ར་ནྡྷ་མེ་ཝཱ་ནུ་པ་སྶཱི;
ཡ་སྨི་ཉྩ སེ་ཏཱི ཨུ་ར་སཱི་ཝ པུ་ཏྟོ, ས ཝེ མི་ཏྟོ ཡོ ཨ་བྷེ་ཛྫོ པ་རེ་ཧཱི་ཏི.
ཝ་ཎྞཱ་རོ་ཧ་ཛཱ་ཏ་ཀཾ པ་ཋ་མཾ.
༣༦༢. སཱི་ལ་ཝཱི་མཾ་ས་ཛཱ་ཏ་ཀཾ (༥-༢-༢)
༦༥. སཱི་ལཾ སེ་ཡྻོ སུ་ཏཾ སེ་ཡྻོ, ཨི་ཏི མེ སཾ་ས་ཡོ ཨ་ཧུ;
སཱི་ལ་མེ་ཝ སུ་ཏཱ སེ་ཡྻོ, ཨི་ཏི མེ ན་ཏྠི སཾ་ས་ཡོ.
༦༦. མོ་གྷཱ ཛཱ་ཏི ཙ ཝ་ཎྞོ ཙ, སཱི་ལ་མེ་ཝ ཀི་རུ་ཏྟ་མཾ;
སཱི་ལེ་ན ཨ་ནུ་པེ་ཏ་སྶ, སུ་ཏེ་ན་ཏྠོ ན ཝི་ཛྫ་ཏི.
༦༧. ཁ་ཏྟི་ཡོ ཙ ཨ་དྷ་མྨ་ཊྛོ, ཝེ་སྶོ ཙཱ་དྷ་མྨ་ནི་སྶི་ཏོ;
ཏེ པ་རི་ཙྩ་ཛྫུ་བྷོ ལོ་ཀེ, ཨུ་པ་པ་ཛྫ་ནྟི དུ་གྒ་ཏིཾ.
༦༨. ཁ་ཏྟི་ཡཱ བྲཱ་ཧྨ་ཎཱ ཝེ་སྶཱ, སུ་དྡཱ ཙ་ཎྜཱ་ལ་པུ་ཀྐུ་སཱ;
ཨི་དྷ དྷ་མྨཾ ཙ་རི་ཏྭཱ་ན, བྷ་ཝ་ནྟི ཏི་དི་ཝེ ས་མཱ.
༦༩. ན ཝེ་དཱ ས་མྤ་རཱ་ཡཱ་ཡ, ན ཛཱ་ཏི ནཱ་པི [ནོ་པི (པཱི.)] བ་ནྡྷ་ཝཱ;
ས་ཀ་ཉྩ སཱི་ལཾ སཾ་སུ་དྡྷཾ, ས་མྤ་རཱ་ཡཱ་ཡ སུ་ཁཱ་ཡ ཙཱ་ཏི [སུ་ཁཱ་ཝ་ཧ་ནྟི (སཱི. སྱཱ.)].
སཱི་ལ་ཝཱི་མཾ་ས་ཛཱ་ཏ་ཀཾ དུ་ཏི་ཡཾ.
༣༦༣. ཧི་རི་ཛཱ་ཏ་ཀཾ (༥-༢-༣)
༧༠. ཧི་རིཾ ཏ་ར་ནྟཾ ཝི་ཛི་གུ་ཙྪ་མཱ་ནཾ, ཏ་ཝཱ་ཧ་མ་སྨཱི ཨི་ཏི བྷཱ་ས་མཱ་ནཾ;
སེ་ཡྻཱ་ནི ཀ་མྨཱ་ནི ཨ་ནཱ་དི་ཡ་ནྟཾ, ནེ་སོ མ་མ་ནྟི ཨི་ཏི ནཾ ཝི་ཛ་ཉྙཱ.
༧༡. ཡ་ཉྷི ཀ་ཡི་རཱ ཏ་ཉྷི ཝ་དེ, ཡཾ ན ཀ་ཡི་རཱ ན ཏཾ ཝ་དེ;
ཨ་ཀ་རོ་ནྟཾ བྷཱ་ས་མཱ་ནཾ, པ་རི་ཛཱ་ན་ནྟི པ་ཎྜི་ཏཱ.
༧༢. ན སོ མི་ཏྟོ ཡོ ས་དཱ ཨ་པྤ་མ་ཏྟོ, བྷེ་དཱ་ས་ངྐཱི ར་ནྡྷ་མེ་ཝཱ་ནུ་པ་སྶཱི;
ཡ་སྨི་ཉྩ སེ་ཏཱི ཨུ་ར་སཱི་ཝ པུ་ཏྟོ, ས ཝེ མི་ཏྟོ ཡོ ཨ་བྷེ་ཛྫོ པ་རེ་ཧི.
༧༣. པཱ་མོ་ཛྫ་ཀ་ར་ཎཾ ཋཱ་ནཾ, པ་སཾ་སཱ་ཝ་ཧ་ནཾ སུ་ཁཾ;
ཕ་ལཱ་ནི་སཾ་སོ བྷཱ་ཝེ་ཏི, ཝ་ཧ་ནྟོ པོ་རི་སཾ དྷུ་རཾ.
༧༤. པ་ཝི་ཝེ་ཀ་ར་སཾ པི་ཏྭཱ, ར་སཾ ཨུ་པ་ས་མ་སྶ ཙ;
ནི་དྡ་རོ ཧོ་ཏི ནི་པྤཱ་པོ, དྷ་མྨ་པྤཱི་ཏི་ར་སཾ པི་ཝ་ནྟི.
ཧི་རི་ཛཱ་ཏ་ཀཾ ཏ་ཏི་ཡཾ.
༣༦༤. ཁ་ཛྫོ་པ་ན་ཀ་ཛཱ་ཏ་ཀཾ (༥-༢-༤)
༧༥. ཀོ ནུ ས་ནྟ་མྷི པ་ཛྫོ་ཏེ, ཨ་གྒི་པ་རི་ཡེ་ས་ནཾ ཙ་རཾ;
ཨ་དྡ་ཀྑི ར་ཏྟི [ར་ཏྟིཾ (སྱཱ.)] ཁ་ཛྫོ་ཏཾ, ཛཱ་ཏ་ཝེ་དཾ ཨ་མ་ཉྙ་ཐ.
༧༦. སྭ་སྶ གོ་མ་ཡ་ཙུ་ཎྞཱ་ནི, ཨ་བྷི་མ་ཏྠཾ ཏི་ཎཱ་ནི ཙ;
ཝི་པ་རཱི་ཏཱ་ཡ ས་ཉྙཱ་ཡ, ནཱ་ས་ཀྑི པ་ཛྫ་ལེ་ཏ་ཝེ.
༧༧. ཨེ་ཝ་མྤི ཨ་ནུ་པཱ་ཡེ་ན, ཨ་ཏྠཾ ན ལ་བྷ་ཏེ མི་གོ [མཱུ་གོ (སྱཱ.)];
ཝི་སཱ་ཎ་ཏོ ག་ཝཾ དོ་ཧཾ, ཡ་ཏྠ ཁཱི་རཾ ན ཝི་ནྡ་ཏི.
༧༨. ཝི་ཝི་དྷེ་ཧི ཨུ་པཱ་ཡེ་ཧི, ཨ་ཏྠཾ པ་པྤོ་ནྟི མཱ་ཎ་ཝཱ;
ནི་གྒ་ཧེ་ན ཨ་མི་ཏྟཱ་ནཾ, མི་ཏྟཱ་ནཾ པ་གྒ་ཧེ་ན ཙ.
༧༩. སེ་ནཱ་མོ་ཀྑ་པ་ལཱ་བྷེ་ན [སེ་ནཱི མོ་ཀྑཱུ་པ་ལཱ་བྷེ་ན (སྱཱ.)], ཝ་ལླ་བྷཱ་ནཾ ན་ཡེ་ན ཙ;
ཛ་ག་ཏིཾ ཛ་ག་ཏི་པཱ་ལཱ, ཨཱ་ཝ་ས་ནྟི ཝ་སུ་ནྡྷ་ར་ནྟི.
ཁ་ཛྫོ་པ་ན་ཀ་ཛཱ་ཏ་ཀཾ ཙ་ཏུ་ཏྠཾ.
༣༦༥. ཨ་ཧི་ཏུ་ཎྜི་ཀ་ཛཱ་ཏ་ཀཾ (༥-༢-༥)
༨༠. དྷུ་ཏྟོ་མྷི ས་མྨ སུ་མུ་ཁ, ཛཱུ་ཏེ ཨ་ཀྑ་པ་རཱ་ཛི་ཏོ;
ཧ་རེ་ཧི [སེ་ཝེ་ཧི (པཱི.)] ཨ་མྦ་པ་ཀྐཱ་ནི, ཝཱི་རི་ཡཾ ཏེ བྷ་ཀྑ་ཡཱ་མ་སེ.
༨༡. ཨ་ལི་ཀཾ ཝ་ཏ མཾ ས་མྨ, ཨ་བྷཱུ་ཏེ་ན པ་སཾ་ས་སི;
ཀོ ཏེ སུ་ཏོ ཝཱ དི་ཊྛོ ཝཱ, སུ་མུ་ཁོ ནཱ་མ མ་ཀྐ་ཊོ.
༨༢. ཨ་ཛྫཱ་པི མེ ཏཾ མ་ན་སི [ཏེ མཾ ས་ར་སི (ཀ.)], ཡཾ མཾ ཏྭཾ ཨ་ཧི་ཏུ་ཎྜི་ཀ;
དྷ་ཉྙཱ་པ་ཎཾ པ་ཝི་སི་ཏྭཱ, མ་ཏྟོ [མུ་ཏྟོ (ཀ.)] ཚཱ་ཏཾ ཧ་ནཱ་སི མཾ.
༨༣. ཏཱ་ཧཾ ས་རཾ དུ་ཀྑ་སེ་ཡྻཾ, ཨ་པི ར་ཛྫ་མྤི ཀཱ་ར་ཡེ;
ནེ་ཝཱ་ཧཾ ཡཱ་ཙི་ཏོ ད་ཛྫཾ, ཏ་ཐཱ ཧི བྷ་ཡ་ཏ་ཛྫི་ཏོ.
༨༤. ཡ་ཉྩ ཛ་ཉྙཱ ཀུ་ལེ ཛཱ་ཏཾ, ག་བྦྷེ ཏི་ཏྟཾ ཨ་མ་ཙྪ་རིཾ;
ཏེ་ན ས་ཁི་ཉྩ མི་ཏྟ་ཉྩ, དྷཱི་རོ ས་ནྡྷཱ་ཏུ་མ་ར་ཧ་ཏཱི་ཏི.
ཨ་ཧི་ཏུ་ཎྜི་ཀ་ཛཱ་ཏ་ཀཾ པ་ཉྩ་མཾ.
༣༦༦. གུ་མྦི་ཡ་ཛཱ་ཏ་ཀཾ (༥-༢-༦)
༨༥. མ་དྷུ་ཝ་ཎྞཾ མ་དྷུ་ར་སཾ, མ་དྷུ་ག་ནྡྷཾ ཝི་སཾ ཨ་ཧུ;
གུ་མྦི་ཡོ གྷཱ་ས་མེ་སཱ་ནོ, ཨ་ར་ཉྙེ ཨོ་ད་ཧཱི ཝི་སཾ.
༨༦. མ་དྷུ ཨི་ཏི མ་ཉྙ་མཱ་ནཱ [མ་དྷཱུ་ཏི མ་ཉྙ་མཱ་ནཱ་ཡ (ཀ.)], ཡེ ཏཾ ཝི་ས་མ་ཁཱ་དི་སུཾ [ཝི་ས་མ་སཱ་ཡི་སུཾ (སཱི. སྱཱ.)];
ཏེ་སཾ ཏཾ ཀ་ཊུ་ཀཾ ཨཱ་སི, མ་ར་ཎཾ ཏེ་ནུ་པཱ་ག་མུཾ.
༨༧. ཡེ ཙ ཁོ པ་ཊི་ས་ངྑཱ་ཡ, ཝི་སཾ ཏཾ པ་རི་ཝ་ཛྫ་ཡུཾ;
ཏེ ཨཱ་ཏུ་རེ་སུ སུ་ཁི་ཏཱ, ཌ་ཡ྄ཧ་མཱ་ནེ་སུ ནི་བྦུ་ཏཱ.
༨༨. ཨེ་ཝ་མེ་ཝ མ་ནུ་སྶེ་སུ, ཝི་སཾ ཀཱ་མཱ ས་མོ་ཧི་ཏཱ;
ཨཱ་མི་སཾ བ་ནྡྷ་ན་ཉྩེ་ཏཾ, མ་ཙྩུ་ཝེ་སོ [པ་ཙྩུ་ཝ་སོ (སཱི. སྱཱ.)] གུ་ཧཱ་ས་ཡོ.
༨༩. ཨེ་ཝ་མེ་ཝ ཨི་མེ ཀཱ་མེ, ཨཱ་ཏུ་རཱ པ་རི་ཙཱ་རི་ཀེ [པ་རི་ཙཱ་ར་ཀེ (ཀ.)];
ཡེ ས་དཱ པ་རི་ཝ་ཛྫེ་ནྟི, ས་ངྒཾ ལོ་ཀེ ཨུ་པ་ཙྩ་གུ་ནྟི.
གུ་མྦི་ཡ་ཛཱ་ཏ་ཀཾ ཚ་ཊྛཾ.
༣༦༧. སཱ་ལི༹་ཡ་ཛཱ་ཏ་ཀཾ (༥-༢-༧)
༩༠. ཡྭཱ་ཡཾ སཱ་ལི༹་ཡ [སཱ་ལི་ཡ (སཱི. སྱཱ. པཱི.), སཱ་ལི༹་ཀ (?)] ཚཱ་པོ་ཏི, ཀ་ཎྷ་ས་པྤཾ ཨ་གཱ་ཧ་ཡི;
ཏེ་ན ས་པྤེ་ན་ཡཾ ད་ཊྛོ, ཧ་ཏོ པཱ་པཱ་ནུ་སཱ་ས་ཀོ.
༩༡. ཨ་ཧ་ནྟཱ་ར [ཨ་ཧ་ན་ནྟ (པཱི.), ཨ་ཧ་ར་ནྟ (?)] མ་ཧ་ནྟཱ་རཾ, ཡོ ན་རོ ཧ་ནྟུ་མི་ཙྪ་ཏི;
ཨེ་ཝཾ སོ ནི་ཧ་ཏོ སེ་ཏི, ཡ་ཐཱ་ཡཾ པུ་རི་སོ ཧ་ཏོ.
༩༢. ཨ་ཧ་ནྟཱ་ར [ཨ་ཧ་ན་ནྟ (སཱི. སྱཱ. པཱི.), ཨ་ཧ་ར་ནྟ (?)] མ་གྷཱ་ཏེ་ནྟཾ, ཡོ ན་རོ ཧ་ནྟུ་མི་ཙྪ་ཏི;
ཨེ་ཝཾ སོ ནི་ཧ་ཏོ སེ་ཏི, ཡ་ཐཱ་ཡཾ པུ་རི་སོ ཧ་ཏོ.
༩༣. ཡ་ཐཱ པཾ་སུ་མུ་ཊྛིཾ པུ་རི་སོ, པ་ཊི་ཝཱ་ཏཾ པ་ཊི་ཀྑི་པེ;
ཏ་མེ་ཝ སོ ར་ཛོ ཧ་ནྟི, ཏ་ཐཱ་ཡཾ པུ་རི་སོ ཧ་ཏོ.
༩༤. ཡོ ཨ་པྤ་དུ་ཊྛ་སྶ ན་ར་སྶ དུ་སྶ་ཏི, སུ་དྡྷ་སྶ པོ་ས་སྶ ཨ་ན་ངྒ་ཎ་སྶ;
ཏ་མེ་ཝ བཱ་ལཾ པ་ཙྩེ་ཏི པཱ་པཾ, སུ་ཁུ་མོ ར་ཛོ པ་ཊི་ཝཱ་ཏཾ་ཝ ཁི་ཏྟོ་ཏི.
སཱ་ལི༹་ཡ་ཛཱ་ཏ་ཀཾ ས་ཏྟ་མཾ.
༣༦༨. ཏ་ཙ་སཱ་ར་ཛཱ་ཏ་ཀཾ (༥-༢-༨)
༩༥. ཨ་མི་ཏྟ་ཧ་ཏྠ་ཏྠ་ག་ཏཱ [ཧ་ཏྠ་ཏྟ་ག་ཏཱ (ཀ་ཏྠ་ཙི, སཱི. ནི་ཡྻ)], ཏ་ཙ་སཱ་ར་ས་མ་པྤི་ཏཱ;
པ་ས་ནྣ་མུ་ཁ་ཝ་ཎྞཱ་ཏྠ, ཀ་སྨཱ ཏུ་མྷེ ན སོ་ཙ་ཐ.
༩༦. ན སོ་ཙ་ནཱ་ཡ པ་རི་དེ་ཝ་ནཱ་ཡ, ཨ་ཏྠོ་ཝ ལ་བྦྷོ [ཨ་ཏྠོ ཙ ལ་བྦྷཱ (སཱི. སྱཱ.), ཨ་ཏྠོ་དྷ ལ་བྦྷཱ (ཨ. ནི. ༥.༤༨)] ཨ་པི ཨ་པྤ་ཀོ་པི;
སོ་ཙ་ནྟ་མེ་ནཾ དུ་ཁི་ཏཾ ཝི་དི་ཏྭཱ, པ་ཙྩ་ཏྠི་ཀཱ ཨ་ཏྟ་མ་ནཱ བྷ་ཝ་ནྟི.
༩༧. ཡ་ཏོ ཙ ཁོ པ་ཎྜི་ཏོ ཨཱ་པ་དཱ་སུ, ན ཝེ་དྷ་ཏཱི ཨ་ཏྠ་ཝི་ནི་ཙྪ་ཡ་ཉྙཱུ;
པ་ཙྩ་ཏྠི་ཀཱ་སྶ [པ་ཙྩ་ཏྠི་ཀཱ ཏེ (ཀ.)] དུ་ཁི་ཏཱ བྷ་ཝ་ནྟི, དི་སྭཱ མུ་ཁཾ ཨ་ཝི་ཀཱ་རཾ པུ་རཱ་ཎཾ.
༩༨. ཛ་པྤེ་ན མ་ནྟེ་ན སུ་བྷཱ་སི་ཏེ་ན, ཨ་ནུ་པྤ་དཱ་ནེ་ན པ་ཝེ་ཎི་ཡཱ ཝཱ;
ཡ་ཐཱ ཡ་ཐཱ ཡ་ཏྠ ལ་བྷེ་ཐ ཨ་ཏྠཾ, ཏ་ཐཱ ཏ་ཐཱ ཏ་ཏྠ པ་ར་ཀྐ་མེ་ཡྻ.
༩༩. ཡ་ཏོ ཙ ཛཱ་ནེ་ཡྻ ཨ་ལ་བྦྷ་ནེ་ཡྻོ, མ་ཡཱ ཝ [མ་ཡཱ ཝཱ (སྱཱ. ཀ.)] ཨ་ཉྙེ་ན ཝཱ ཨེ་ས ཨ་ཏྠོ;
ཨ་སོ་ཙ་མཱ་ནོ ཨ་དྷི་ཝཱ་ས་ཡེ་ཡྻ, ཀ་མྨཾ ད་ལ༹ྷཾ ཀི་ནྟི ཀ་རོ་མི དཱ་ནཱི་ཏི.
ཏ་ཙ་སཱ་ར་ཛཱ་ཏ་ཀཾ ཨ་ཊྛ་མཾ.
༣༦༩. མི་ཏྟ་ཝི་ནྡ་ཀ་ཛཱ་ཏ་ཀཾ (༥-༢-༩)
༡༠༠. ཀྱཱ་ཧཾ དེ་ཝཱ་ན་མ་ཀ་རཾ, ཀིཾ པཱ་པཾ པ་ཀ་ཏཾ མ་ཡཱ;
ཡཾ མེ སི་ར་སྨིཾ ཨོ་ཧ་ཙྩ [ཨུ་ཧ་ཙྩ (ཀ.), ཨུ་ཧ་ཙྩ (པཱི.)], ཙ་ཀྐཾ བྷ་མ་ཏི མ་ཏྠ་ཀེ.
༡༠༡. ཨ་ཏི་ཀྐ་མྨ ར་མ་ཎ་ཀཾ, ས་དཱ་མ་ཏྟ་ཉྩ དཱུ་བྷ་ཀཾ;
བྲ་ཧྨ་ཏྟ་ར་ཉྩ པཱ་སཱ་དཾ, ཀེ་ན་ཏྠེ་ན ཨི་དྷཱ་ག་ཏོ.
༡༠༢. ཨི་ཏོ བ་ཧུ་ཏ་རཱ བྷོ་གཱ, ཨ་ཏྲ མ་ཉྙེ བྷ་ཝི་སྶ་རེ;
ཨི་ཏི ཨེ་ཏཱ་ཡ ས་ཉྙཱ་ཡ, པ་སྶ མཾ བྱ་ས་ནཾ ག་ཏཾ.
༡༠༣. ཙ་ཏུ་བྦྷི ཨ་ཊྛ་ཛ྄ཛྷ་ག་མཱ, ཨ་ཊྛཱ་ཧི་པི ཙ [ཨ་ཊྛཱ་ཧི ཙཱ་པི (སཱི. སྱཱ.), ཨ་ཊྛཱ་བྷི ཙཱ་པི (ཀ.)] སོ་ལ༹་ས;
སོ་ལ༹་སཱ་ཧི ཙ བཱ་ཏྟིཾ་ས, ཨ་ཏྲི་ཙྪཾ ཙ་ཀྐ་མཱ་ས་དོ;
ཨི་ཙྪཱ་ཧ་ཏ་སྶ པོ་ས་སྶ, ཙ་ཀྐཾ བྷ་མ་ཏི མ་ཏྠ་ཀེ.
༡༠༤. ཨུ་པ་རི་ཝི་སཱ་ལཱ དུ་པྤཱུ་རཱ, ཨི་ཙྪཱ ཝི་ས་ཊ་གཱ་མི་ནཱི [ཨུ་པ་རི ཝི་སཱ་ལཾ དུ་པྤཱུ་རཾ, ཨི་ཙྪཱ་ཝི་ས་ད་གཱ་མི་ནཱི (སཱི.)];
ཡེ ཙ ཏཾ ཨ་ནུ་གི་ཛ྄ཛྷ་ནྟི, ཏེ ཧོ་ནྟི ཙ་ཀྐ་དྷཱ་རི་ནོ་ཏི.
མི་ཏྟ་ཝི་ནྡ་ཀ་ཛཱ་ཏ་ཀཾ ན་ཝ་མཾ.
༣༧༠. པ་ལཱ་ས་ཛཱ་ཏ་ཀཾ (༥-༢-༡༠)
༡༠༥. ཧཾ་སོ པ་ལཱ་ས་མ་ཝ་ཙ, ནི་གྲོ་དྷོ ས་མྨ ཛཱ་ཡ་ཏི;
ཨ་ངྐ་སྨིཾ [ཨ་ངྒ་སྨིཾ (ཀ.)] ཏེ ནི་སི་ནྣོ་ཝ, སོ ཏེ མ་མྨཱ་ནི ཚེ་ཙྪ་ཏི [ཚི་ཛྫ་ཏི (ཀ.)].
༡༠༦. ཝ་ཌྜྷ་ཏཱ་མེ་ཝ [ཝ་དྡྷི་ཏ་མེ་ཝ (ཀ.)] ནི་གྲོ་དྷོ, པ་ཏི་ཊྛ་སྶ བྷ་ཝཱ་མ་ཧཾ;
ཡ་ཐཱ པི་ཏཱ ཙ མཱ་ཏཱ ཙ [པི་ཏཱ ཝཱ མཱ་ཏཱ ཝཱ (པཱི.), མཱ་ཏཱ ཝཱ པི་ཏཱ ཝཱ (ཀ.)], ཨེ་ཝཾ མེ སོ བྷ་ཝི་སྶ་ཏི.
༡༠༧. ཡཾ ཏྭཾ ཨ་ངྐ་སྨིཾ ཝ་ཌྜྷེ་སི, ཁཱི་ར་རུ་ཀྑཾ བྷ་ཡཱ་ན་ཀཾ;
ཨཱ་མ་ནྟ ཁོ ཏཾ ག་ཙྪཱ་མ, ཝུ་ཌྜྷི མ་སྶ ན རུ་ཙྩ་ཏི.
༡༠༨. ཨི་དཱ་ནི ཁོ མཾ བྷཱ་ཡེ་ཏི, མ་ཧཱ་ནེ་རུ་ནི་ད་སྶ་ནཾ;
ཧཾ་ས་སྶ ཨ་ན་བྷི་ཉྙཱ་ཡ, མ་ཧཱ མེ བྷ་ཡ་མཱ་ག་ཏཾ.
༡༠༩. ན ཏ་སྶ ཝུ་ཌྜྷི ཀུ་ས་ལ་པྤ་ས་ཏྠཱ, ཡོ ཝ་ཌྜྷ་མཱ་ནོ གྷ་ས་ཏེ པ་ཏི་ཊྛཾ;
ཏ་སྶཱུ་པ་རོ་དྷཾ པ་རི་ས་ངྐ་མཱ་ནོ, པ་ཏཱ་ར་ཡཱི མཱུ་ལ་ཝ་དྷཱ་ཡ དྷཱི་རོ་ཏི.
པ་ལཱ་ས་ཛཱ་ཏ་ཀཾ ད་ས་མཾ.
ཝ་ཎྞཱ་རོ་ཧ་ཝ་གྒོ དུ་ཏི་ཡོ [ཨི་མ་སྶུ་དྡཱ་ནཾ ཏ་ཏི་ཡ་ཝ་གྒ་པ་རི་ཡོ་སཱ་ནེ བྷ་ཝི་སྶ་ཏི].