༣༢༩. ཀཱ་ལ༹་བཱ་ཧུ་ཛཱ་ཏ་ཀཾ (༤-༣-༩)
༡༡༣. ཡཾ ཨ་ནྣ་པཱ་ན་སྶ པུ་རེ ལ་བྷཱ་མ, ཏཾ དཱ་ནི སཱ་ཁ་མི་ག་མེ་ཝ ག་ཙྪ་ཏི;
ག་ཙྪཱ་མ དཱ་ནི ཝ་ན་མེ་ཝ རཱ་དྷ, ཨ་ས་ཀྐ་ཏཱ ཙ་སྨ དྷ་ན་ཉྫ་ཡཱ་ཡ [དྷ་ན་ཉྩ་ཡཱ་ཡ (ཀ.)].
༡༡༤. ལཱ་བྷོ ཨ་ལཱ་བྷོ ཡ་སོ ཨ་ཡ་སོ ཙ, ནི་ནྡཱ པ་སཾ་སཱ ཙ སུ་ཁ་ཉྩ དུ་ཀྑཾ;
ཨེ་ཏེ ཨ་ནི་ཙྩཱ མ་ནུ་ཛེ་སུ དྷ་མྨཱ, མཱ སོ་ཙི ཀིཾ སོ་ཙ་སི པོ་ཊྛ་པཱ་ད.
༡༡༥. ཨ་དྡྷཱ ཏུ་ཝཾ པ་ཎྜི་ཏ་ཀོ་སི རཱ་དྷ, ཛཱ་ནཱ་སི ཨ་ཏྠཱ་ནི ཨ་ནཱ་ག་ཏཱ་ནི;
ཀ་ཐཾ ནུ སཱ་ཁཱ་མི་གཾ ད་ཀྑི་སཱ་མ [ད་ཀྑི་ཡཱ་མ (ཀ.), ད་ཀྑཱ་མ (སྱཱ.)], ནི་དྡྷཱ་ཝི་ཏཾ [ནི་དྡྷཱ་པི་ཏཾ (སཱི. སྱཱ.), ནི་བྦཱ་པི་ཏཾ (པཱི.), ནི་ཙྪ་དཾ (ཀ.)] རཱ་ཛ་ཀུ་ལ་ཏོ་ཝ ཛ་མྨཾ.
༡༡༦. ཙཱ་ལེ་ཏི ཀ་ཎྞཾ བྷ་ཀུ་ཊིཾ ཀ་རོ་ཏི, མུ་ཧུཾ མུ་ཧུཾ བྷཱ་ཡ་ཡ་ཏེ [བྷཱ་ཡ་ཏེ (སྱཱ.), བྷཱ་ཡཱ་པ་ཏེ (ཀ.)] ཀུ་མཱ་རེ;
ས་ཡ་མེ་ཝ ཏཾ ཀཱ་ཧ་ཏི ཀཱ་ལ༹་བཱ་ཧུ, ཡེ་ནཱ་ར་ཀཱ ཋ་སྶ་ཏི ཨ་ནྣ་པཱ་ནཱ་ཏི.
ཀཱ་ལ༹་བཱ་ཧུ་ཛཱ་ཏ་ཀཾ ན་ཝ་མཾ.