༣. ཀུ་ཊི་དཱུ་ས་ཀ་ཝ་གྒོ
༣༢༡. ཀུ་ཊི་དཱུ་ས་ཀ་ཛཱ་ཏ་ཀཾ (༤-༣-༡)
༨༡. མ་ནུ་སྶ་སྶེ་ཝ ཏེ སཱི་སཾ, ཧ་ཏྠ་པཱ་དཱ ཙ ཝཱ་ན་ར;
ཨ་ཐ ཀེ་ན ནུ ཝ་ཎྞེ་ན, ཨ་གཱ་རཾ ཏེ ན ཝི་ཛྫ་ཏི.
༨༢. མ་ནུ་སྶ་སྶེ་ཝ མེ སཱི་སཾ, ཧ་ཏྠ་པཱ་དཱ ཙ སི་ངྒི་ལ [སི་ངྒཱ་ལ (ཀ.), པི་ངྒ་ལ (ཊཱི་ཀཱ)];
ཡཱ་ཧུ སེ་ཊྛཱ མ་ནུ་སྶེ་སུ, སཱ མེ པ་ཉྙཱ ན ཝི་ཛྫ་ཏི.
༨༣. ཨ་ན་ཝ་ཊྛི་ཏ་ཙི་ཏྟ་སྶ, ལ་ཧུ་ཙི་ཏྟ་སྶ དུ་བྦྷི་ནོ [དཱུ་བྷི་ནོ (པཱི.)];
ནི་ཙྩཾ ཨ་དྡྷུ་ཝ་སཱི་ལ་སྶ, སུ་ཁ་བྷཱ་ཝོ [སུ་ཙི་བྷཱ་ཝོ (སཱི.), སུ་ཁ་བྷཱ་གོ (?)] ན ཝི་ཛྫ་ཏི.
༨༤. སོ ཀ་ར་སྶུ ཨཱ་ནུ་བྷཱ་ཝཾ, ཝཱི་ཏི་ཝ་ཏྟ་སྶུ སཱི་ལི་ཡཾ;
སཱི་ཏ་ཝཱ་ཏ་པ་རི་ཏྟཱ་ཎཾ, ཀ་ར་སྶུ ཀུ་ཊ་ཝཾ [ཀུ་ཊི་ཀཾ (སཱི. སྱཱ.)] ཀ་པཱི་ཏི.
ཀུ་ཊི་དཱུ་ས་ཀ [སི་ངྒཱ་ལ་ས་ཀུ་ཎ (ཀ.)] ཛཱ་ཏ་ཀཾ པ་ཋ་མཾ.
༣༢༢. དུ་དྡུ་བྷ་ཛཱ་ཏ་ཀཾ (༤-༣-༢)
༨༥. དུ་དྡུ་བྷཱ་ཡ་ཏི [ད་དྡ་བྷཱ་ཡ་ཏི (སཱི. པཱི.)] བྷ་དྡ་ནྟེ, ཡ་སྨིཾ དེ་སེ ཝ་སཱ་མ་ཧཾ;
ཨ་ཧ་མྤེ་ཏཾ ན ཛཱ་ནཱ་མི, ཀི་མེ་ཏཾ དུ་དྡུ་བྷཱ་ཡ་ཏི.
༨༦. བེ་ལུ་ཝཾ པ་ཏི་ཏཾ སུ་ཏྭཱ, དུ་དྡུ་བྷ་ནྟི [ད་དྡ་བྷ་ནྟི (སཱི.)] ས་སོ ཛ་ཝི;
ས་ས་སྶ ཝ་ཙ་ནཾ སུ་ཏྭཱ, ས་ནྟ་ཏྟཱ མི་ག་ཝཱ་ཧི་ནཱི.
༨༧. ཨ་པྤ་ཏྭཱ པ་ད་ཝི་ཉྙཱ་ཎཾ, པ་ར་གྷོ་སཱ་ནུ་སཱ་རི་ནོ;
པ་ནཱ་ད་པ་ར་མཱ བཱ་ལཱ, ཏེ ཧོ་ནྟི པ་ར་པ་ཏྟི་ཡཱ.
༨༨. ཡེ ཙ སཱི་ལེ་ན ས་མྤ་ནྣཱ, པ་ཉྙཱ་ཡཱུ་པ་ས་མེ ར་ཏཱ;
ཨཱ་ར་ཀཱ ཝི་ར་ཏཱ དྷཱི་རཱ, ན ཧོ་ནྟི པ་ར་པ་ཏྟི་ཡཱ་ཏི.
དུ་དྡུ་བྷ་ཛཱ་ཏ་ཀཾ [ད་དྡ་བྷ་ཛཱ་ཏ་ཀཾ (སཱི. པཱི.)] དུ་ཏི་ཡཾ.
༣༢༣. བྲ་ཧྨ་ད་ཏྟ་ཛཱ་ཏ་ཀཾ (༤-༣-༣)
༨༩. དྭ་ཡཾ ཡཱ་ཙ་ན་ཀོ རཱ་ཛ, བྲ་ཧྨ་ད་ཏྟ ནི་ག་ཙྪ་ཏི;
ཨ་ལཱ་བྷཾ དྷ་ན་ལཱ་བྷཾ ཝཱ, ཨེ་ཝཾ དྷ་མྨཱ ཧི ཡཱ་ཙ་ནཱ.
༩༠. ཡཱ་ཙ་ནཾ རོ་ད་ནཾ ཨཱ་ཧུ, པ་ཉྩཱ་ལཱ་ནཾ ར་ཐེ་ས་བྷ;
ཡོ ཡཱ་ཙ་ནཾ པ་ཙྩ་ཀྑཱ་ཏི, ཏ་མཱ་ཧུ པ་ཊི་རོ་ད་ནཾ.
༩༡. མཱ མ་དྡ་སཾ་སུ རོ་ད་ནྟཾ, པ་ཉྩཱ་ལཱ སུ་ས་མཱ་ག་ཏཱ;
ཏུ་ཝཾ ཝཱ པ་ཊི་རོ་ད་ནྟཾ, ཏ་སྨཱ ཨི་ཙྪཱ་མ་ཧཾ ར་ཧོ.
༩༢. ད་དཱ་མི ཏེ བྲཱ་ཧྨ་ཎ རོ་ཧི་ཎཱི་ནཾ, ག་ཝཾ ས་ཧ་སྶཾ ས་ཧ པུ་ངྒ་ཝེ་ན;
ཨ་རི་ཡོ ཧི ཨ་རི་ཡ་སྶ ཀ་ཐཾ ན ད་ཛྫཱ [ད་ཛྫེ (སཱི.), ད་ཛྫཾ (?)], སུ་ཏྭཱ་ན གཱ་ཐཱ ཏ་ཝ དྷ་མྨ་ཡུ་ཏྟཱ་ཏི.
བྲ་ཧྨ་ད་ཏྟ་ཛཱ་ཏ་ཀཾ ཏ་ཏི་ཡཾ.
༣༢༤. ཙ་མྨ་སཱ་ཊ་ཀ་ཛཱ་ཏ་ཀཾ (༤-༣-༤)
༩༣. ཀ་ལྱཱ་ཎ་རཱུ་པོ ཝ་ཏ་ཡཾ ཙ་ཏུ་པྤ་དོ, སུ་བྷ་དྡ་ཀོ ཙེ་ཝ སུ་པེ་ས་ལོ ཙ;
ཡོ བྲཱ་ཧྨ་ཎཾ ཛཱ་ཏི་མ་ནྟཱུ་པ་པ་ནྣཾ, ཨ་པ་ཙཱ་ཡ་ཏི མེ་ཎྜ་ཝ་རོ ཡ་ས་སྶཱི.
༩༤. མཱ བྲཱ་ཧྨ་ཎ ཨི་ཏྟ་ར་ད་སྶ་ནེ་ན, ཝི་སྶཱ་ས་མཱ་པ་ཛྫི ཙ་ཏུ་པྤ་ད་སྶ;
ད་ལ༹ྷ་པྤ་ཧཱ་རཾ ཨ་བྷི་ཀ་ངྑ་མཱ་ནོ [ཨ་བྷི་ཀ་ཏྟུ་ཀཱ་མོ (སྱཱ.)], ཨ་ཝ་ས་ཀྐ་ཏཱི ད་སྶ་ཏི སུ་པྤ་ཧཱ་རཾ.
༩༥. ཨཱུ་རུ་ཊྛི [ཨཱུ་ར་ཊྛི (སཱི.)] བྷ་གྒཾ པ་ཝ་ཊྚི་ཏོ [པ་ཏི་ཏོ (སཱི. སྱཱ.)] ཁཱ་རི་བྷཱ་རོ, ས་བྦ་ཉྩ བྷ་ཎྜཾ བྲཱ་ཧྨ་ཎ་སྶ [བྲཱ་ཧྨ་ཎ་སྶཱི་དྷ (ཀ. སཱི. པཱི.), བྲཱ་ཧྨ་ཎ་སྶེ་ཝ (ཀ. སཱི. སྱཱ. ཀ.)] བྷི་ནྣཾ;
ཨུ་བྷོ་པི བཱ་ཧཱ པ་གྒ་ཡ྄ཧ [པ་གྒ་ཡྻེ་ཝ (སྱཱ.), པ་གྒ་ཧཱི་ཡ (?)] ཀ་ནྡ་ཏི [བཱ་ཧཱ པ་གྒ་ཡྻ ཀ་ནྡ་ཏི (པཱི. ཀ.)], ཨ་བྷི་དྷཱ་ཝ་ཐ ཧ་ཉྙ་ཏེ བྲ་ཧྨ་ཙཱ་རཱི.
༩༦. ཨེ་ཝཾ སོ ནི་ཧ་ཏོ སེ་ཏི, ཡོ ཨ་པཱུ་ཛཾ པ་སཾ་ས་ཏི [ན་མ་སྶ་ཏི (པཱི.)];
ཡ་ཐཱ་ཧ་མ་ཛྫ པ་ཧ་ཏོ, ཧ་ཏོ མེ་ཎྜེ་ན དུ་མྨ་ཏཱི་ཏི.
ཙ་མྨ་སཱ་ཊ་ཀ་ཛཱ་ཏ་ཀཾ ཙ་ཏུ་ཏྠཾ.
༣༢༥. གོ་དྷ་རཱ་ཛ་ཛཱ་ཏ་ཀཾ (༤-༣-༥)
༩༧. ས་མ་ཎཾ ཏཾ མ་ཉྙ་མཱ་ནོ, ཨུ་པ་ག་ཙྪི་མ་ས་ཉྙ་ཏཾ;
སོ མཾ ད་ཎྜེ་ན པཱ་ཧཱ་སི, ཡ་ཐཱ ཨ་སྶ་མ་ཎོ ཏ་ཐཱ.
༩༨. ཀིཾ ཏེ ཛ་ཊཱ་ཧི དུ་མྨེ་དྷ, ཀིཾ ཏེ ཨ་ཛི་ན་སཱ་ཊི་ཡཱ;
ཨ་བྦྷ་ནྟ་རཾ ཏེ ག་ཧ་ནཾ, བཱ་ཧི་རཾ པ་རི་མ་ཛྫ་སི.
༩༩. ཨེ་ཧི གོ་དྷ ནི་ཝ་ཏྟ་སྶུ, བྷུ་ཉྫ སཱ་ལཱི་ན་མོ་ད་ནཾ;
ཏེ་ལཾ ལོ་ཎ་ཉྩ མེ ཨ་ཏྠི, པ་ཧཱུ་ཏཾ མ་ཡ྄ཧ པི་པྥ་ལི.
༡༠༠. ཨེ་ས བྷི་ཡྻོ པ་ཝེ་ཀྑཱ་མི, ཝ་མྨི་ཀཾ ས་ཏ་པོ་རི་སཾ;
ཏེ་ལཾ ལོ་ཎ་ཉྩ ཀི་ཏྟེ་སི [ཀི་ནྟེ་སི (སྱཱ. པཱི.)], ཨ་ཧི་ཏཾ མ་ཡ྄ཧ པི་པྥ་ལཱི་ཏི.
གོ་དྷ་རཱ་ཛ་ཛཱ་ཏ་ཀཾ པ་ཉྩ་མཾ.
༣༢༦. ཀ་ཀྐཱ་རུ་ཛཱ་ཏ་ཀཾ (༤-༣-༦)
༡༠༡. ཀཱ་ཡེ་ན ཡོ ནཱ་ཝ་ཧ་རེ, ཝཱ་ཙཱ་ཡ ན མུ་སཱ བྷ་ཎེ;
ཡ་སོ ལ་དྡྷཱ ན མ་ཛྫེ་ཡྻ, ས ཝེ ཀ་ཀྐཱ་རུ་མ་ར་ཧ་ཏི.
༡༠༢. དྷ་མྨེ་ན ཝི་ཏྟ་མེ་སེ་ཡྻ, ན ནི་ཀ་ཏྱཱ དྷ་ནཾ ཧ་རེ;
བྷོ་གེ ལ་དྡྷཱ ན མ་ཛྫེ་ཡྻ, ས ཝེ ཀ་ཀྐཱ་རུ་མ་ར་ཧ་ཏི.
༡༠༣. ཡ་སྶ ཙི་ཏྟཾ ཨ་ཧཱ་ལི་དྡཾ, ས་དྡྷཱ ཙ ཨ་ཝི་རཱ་གི་ནཱི;
ཨེ་ཀོ སཱ་དུཾ ན བྷུ་ཉྫེ་ཡྻ, ས ཝེ ཀ་ཀྐཱ་རུ་མ་ར་ཧ་ཏི.
༡༠༤. ས་མྨུ་ཁཱ ཝཱ ཏི་རོ་ཀྑཱ ཝཱ [པ་རོ་ཀྑཱ ཝཱ (པཱི.), པ་ར་མྨུ་ཁཱ (ཀ.)], ཡོ ས་ནྟེ ན པ་རི་བྷཱ་ས་ཏི;
ཡ་ཐཱ་ཝཱ་དཱི ཏ་ཐཱ་ཀཱ་རཱི, ས ཝེ ཀ་ཀྐཱ་རུ་མ་ར་ཧ་ཏཱི་ཏི.
ཀ་ཀྐཱ་རུ་ཛཱ་ཏ་ཀཾ ཚ་ཊྛཾ.
༣༢༧. ཀཱ་ཀ་ཝ་ཏཱི་ཛཱ་ཏ་ཀཾ (༤-༣-༧)
༡༠༥. ཝཱ་ཏི ཙཱ་ཡཾ [ཝཱ་ཡཾ (ཀ.)] ཏ་ཏོ ག་ནྡྷོ, ཡ་ཏྠ མེ ཝ་ས་ཏཱི པི་ཡཱ;
དཱུ་རེ ཨི་ཏོ ཧི ཀཱ་ཀ་ཝ་ཏཱི [ཀཱ་ཀཱ་ཏཱི (སཱི.), ཀཱ་ཀཱ་ཏི (སྱཱ. པཱི.)], ཡ་ཏྠ མེ ནི་ར་ཏོ མ་ནོ.
༡༠༦. ཀ་ཐཾ ས་མུ་དྡ་མ་ཏ་རཱི, ཀ་ཐཾ ཨ་ཏ་རི ཀེ་པུ་ཀཾ [ཀེ་བུ་ཀཾ (སཱི. པཱི.)];
ཀ་ཐཾ ས་ཏྟ ས་མུ་དྡཱ་ནི, ཀ་ཐཾ སི་མྦ་ལི་མཱ་རུ་ཧི.
༡༠༧. ཏ་ཡཱ ས་མུ་དྡ་མ་ཏ་རིཾ, ཏ་ཡཱ ཨ་ཏ་རི ཀེ་པུ་ཀཾ [ཀེ་བུ་ཀཾ (སཱི. པཱི.)];
ཏ་ཡཱ ས་ཏྟ ས་མུ་དྡཱ་ནི, ཏ་ཡཱ སི་མྦ་ལི་མཱ་རུ་ཧིཾ.
༡༠༨. དྷི་ར་ཏྠུ་མཾ མ་ཧཱ་ཀཱ་ཡཾ, དྷི་ར་ཏྠུ་མཾ ཨ་ཙེ་ཏ་ནཾ;
ཡ་ཏྠ ཛཱ་ཡཱ་ཡ་ཧཾ ཛཱ་རཾ, ཨཱ་ཝ་ཧཱ་མི ཝ་ཧཱ་མི ཙཱ་ཏི.
ཀཱ་ཀ་ཝ་ཏཱི་ཛཱ་ཏ་ཀཾ ས་ཏྟ་མཾ.
༣༢༨. ཨ་ན་ནུ་སོ་ཙི་ཡ་ཛཱ་ཏ་ཀཾ (༤-༣-༨)
༡༠༩. བ་ཧཱུ་ནཾ ཝི་ཛྫ་ཏཱི བྷོ་ཏཱི, ཏེ་ཧི མེ ཀིཾ བྷ་ཝི་སྶ་ཏི;
ཏ་སྨཱ ཨེ་ཏཾ ན སོ་ཙཱ་མི, པི་ཡཾ ས་མྨི་ལླ་ཧཱ་སི་ནིཾ.
༡༡༠. ཏཾ ཏཾ ཙེ ཨ་ནུ་སོ་ཙེ་ཡྻ, ཡཾ ཡཾ ཏ་སྶ ན ཝི་ཛྫ་ཏི;
ཨ་ཏྟཱ་ན་མ་ནུ་སོ་ཙེ་ཡྻ, ས་དཱ མ་ཙྩུ་ཝ་སཾ པ་ཏཾ.
༡༡༡. ན ཧེ་ཝ ཋི་ཏཾ ནཱ་སཱི་ནཾ, ན ས་ཡཱ་ནཾ ན པ་དྡྷ་གུཾ [པ་ཏྠ་གུཾ (སྱཱ.)];
ཡཱ་ཝ བྱཱ་ཏི ནི་མི་ས་ཏི, ཏ་ཏྲཱ་པི ར་ས་ཏཱི [ས་ར་ཏཱི (སཱི. སྱཱ. པཱི.)] ཝ་ཡོ.
༡༡༢. ཏ་ཏྠ་ཏྟ་ནི ཝ་ཏ་པྤ་དྡྷེ [ཝ་ཏ པ་ནྠེ (སྱཱ.), ཝ་ཏ བ་ནྡྷེ (ཀ.) ཝ་ཏ + པ-ཨ་དྡྷེ = ཝ་ཏ་པྤ་དྡྷེ], ཝི་ནཱ་བྷཱ་ཝེ ཨ་སཾ་ས་ཡེ;
བྷཱུ་ཏཾ སེ་སཾ ད་ཡི་ཏ་བྦཾ, ཝཱི་ཏཾ ཨ་ན་ནུ་སོ་ཙི་ཡ་ནྟི [ཙ་ཝི་ཏཾ ནཱ་ནུ་སོ་ཙི་ཡ་ནྟི (སྱཱ.), མ་ཏ་ནྟཾ ནཱ་ནུ་སོ་ཙི་ཡཾ (ཀ.)].
ཨ་ན་ནུ་སོ་ཙི་ཡ་ཛཱ་ཏ་ཀཾ ཨ་ཊྛ་མཾ.
༣༢༩. ཀཱ་ལ༹་བཱ་ཧུ་ཛཱ་ཏ་ཀཾ (༤-༣-༩)
༡༡༣. ཡཾ ཨ་ནྣ་པཱ་ན་སྶ པུ་རེ ལ་བྷཱ་མ, ཏཾ དཱ་ནི སཱ་ཁ་མི་ག་མེ་ཝ ག་ཙྪ་ཏི;
ག་ཙྪཱ་མ དཱ་ནི ཝ་ན་མེ་ཝ རཱ་དྷ, ཨ་ས་ཀྐ་ཏཱ ཙ་སྨ དྷ་ན་ཉྫ་ཡཱ་ཡ [དྷ་ན་ཉྩ་ཡཱ་ཡ (ཀ.)].
༡༡༤. ལཱ་བྷོ ཨ་ལཱ་བྷོ ཡ་སོ ཨ་ཡ་སོ ཙ, ནི་ནྡཱ པ་སཾ་སཱ ཙ སུ་ཁ་ཉྩ དུ་ཀྑཾ;
ཨེ་ཏེ ཨ་ནི་ཙྩཱ མ་ནུ་ཛེ་སུ དྷ་མྨཱ, མཱ སོ་ཙི ཀིཾ སོ་ཙ་སི པོ་ཊྛ་པཱ་ད.
༡༡༥. ཨ་དྡྷཱ ཏུ་ཝཾ པ་ཎྜི་ཏ་ཀོ་སི རཱ་དྷ, ཛཱ་ནཱ་སི ཨ་ཏྠཱ་ནི ཨ་ནཱ་ག་ཏཱ་ནི;
ཀ་ཐཾ ནུ སཱ་ཁཱ་མི་གཾ ད་ཀྑི་སཱ་མ [ད་ཀྑི་ཡཱ་མ (ཀ.), ད་ཀྑཱ་མ (སྱཱ.)], ནི་དྡྷཱ་ཝི་ཏཾ [ནི་དྡྷཱ་པི་ཏཾ (སཱི. སྱཱ.), ནི་བྦཱ་པི་ཏཾ (པཱི.), ནི་ཙྪ་དཾ (ཀ.)] རཱ་ཛ་ཀུ་ལ་ཏོ་ཝ ཛ་མྨཾ.
༡༡༦. ཙཱ་ལེ་ཏི ཀ་ཎྞཾ བྷ་ཀུ་ཊིཾ ཀ་རོ་ཏི, མུ་ཧུཾ མུ་ཧུཾ བྷཱ་ཡ་ཡ་ཏེ [བྷཱ་ཡ་ཏེ (སྱཱ.), བྷཱ་ཡཱ་པ་ཏེ (ཀ.)] ཀུ་མཱ་རེ;
ས་ཡ་མེ་ཝ ཏཾ ཀཱ་ཧ་ཏི ཀཱ་ལ༹་བཱ་ཧུ, ཡེ་ནཱ་ར་ཀཱ ཋ་སྶ་ཏི ཨ་ནྣ་པཱ་ནཱ་ཏི.
ཀཱ་ལ༹་བཱ་ཧུ་ཛཱ་ཏ་ཀཾ ན་ཝ་མཾ.
༣༣༠. སཱི་ལ་ཝཱི་མཾ་ས་ཛཱ་ཏ་ཀཾ (༤-༣-༡༠)
༡༡༧. སཱི་ལཾ ཀི་རེ་ཝ ཀ་ལྱཱ་ཎཾ, སཱི་ལཾ ལོ་ཀེ ཨ་ནུ་ཏྟ་རཾ;
པ་སྶ གྷོ་ར་ཝི་སོ ནཱ་གོ, སཱི་ལ་ཝཱ་ཏི ན ཧ་ཉྙ་ཏི.
༡༡༨. ཡཱ་ཝ་དེ་ཝ་སྶ་ཧཱུ ཀི་ཉྩི, ཏཱ་ཝ་དེ་ཝ ཨ་ཁཱ་དི་སུཾ;
ས་ངྒ་མྨ ཀུ་ལ་ལཱ ལོ་ཀེ, ན ཧིཾ་ས་ནྟི ཨ་ཀི་ཉྩ་ནཾ.
༡༡༩. སུ་ཁཾ ནི་རཱ་སཱ སུ་པ་ཏི, ཨཱ་སཱ ཕ་ལ་ཝ་ཏཱི སུ་ཁཱ;
ཨཱ་སཾ ནི་རཱ་སཾ ཀ་ཏྭཱ་ན, སུ་ཁཾ སུ་པ་ཏི པི་ངྒ་ལཱ.
༡༢༠. ན ས་མཱ་དྷི་པ་རོ ཨ་ཏྠི, ཨ་སྨིཾ ལོ་ཀེ པ་ར་མྷི ཙ;
ན པ་རཾ ནཱ་པི ཨ་ཏྟཱ་ནཾ, ཝི་ཧིཾ་ས་ཏི ས་མཱ་ཧི་ཏོ་ཏི.
སཱི་ལ་ཝཱི་མཾ་ས་ཛཱ་ཏ་ཀཾ ད་ས་མཾ.
ཀུ་ཊི་དཱུ་ས་ཀ་ཝ་གྒོ ཏ་ཏི་ཡོ.
ཏ་སྶུ་དྡཱ་ནཾ –
ས་མ་ནུ་སྶ -ས་དུ་དྡུ་བྷ-ཡཱ་ཙ་ན་ཀོ, ཨ་ཐ མེ་ཎྜ་ཝ་རུ་ཏྟ་མ-གོ་དྷ་ཝ་རོ;
ཨ་ཐ ཀཱ་ཡ་ས་ཀེ་པུ་ཀ བྷོ་ཏཱི་ཝ་རོ, ཨ་ཐ རཱ་དྷ་སུ་སཱི་ལ་ཝ་རེ་ན ད་སཱ་ཏི.