༤. ཨ་བྦྷ་ནྟ་ར་ཝ་གྒོ
༢༨༡. ཨ་བྦྷ་ནྟ་ར་ཛཱ་ཏ་ཀཾ (༣-༤-༡)
༩༡. ཨ་བྦྷ་ནྟ་རོ ནཱ་མ དུ་མོ, ཡ་སྶ དི་བྱ་མི་དཾ ཕ་ལཾ;
བྷུ་ཏྭཱ དོ་ཧ་ལི༹་ནཱི ནཱ་རཱི, ཙ་ཀྐ་ཝ་ཏྟིཾ ཝི་ཛཱ་ཡ་ཏི.
༩༢. ཏྭ་མྤི [ཏྭ་ཉྩ (སཱི. པཱི.), ཏྭཾ ཧི (ཀ.)] བྷ་དྡེ མ་ཧེ་སཱི་སི, སཱ ཙཱ་པི [ཙཱ་སི (སཱི. པཱི.)] པ་ཏི་ནོ པི་ཡཱ;
ཨཱ་ཧ་རི་སྶ་ཏི ཏེ རཱ་ཛཱ, ཨི་དཾ ཨ་བྦྷ་ནྟ་རཾ ཕ་ལཾ.
༩༣. བྷ་ཏྟུ་ར་ཏྠེ པ་ར་ཀྐ་ནྟོ, ཡཾ ཋཱ་ན་མ་དྷི་ག་ཙྪ་ཏི;
སཱུ་རོ ཨ་ཏྟ་པ་རི་ཙྩཱ་གཱི, ལ་བྷ་མཱ་ནོ བྷ་ཝཱ་མ་ཧ་ནྟི.
ཨ་བྦྷ་ནྟ་ར་ཛཱ་ཏ་ཀཾ པ་ཋ་མཾ.
༢༨༢. སེ་ཡྻ་ཛཱ་ཏ་ཀཾ (༣-༤-༢)
༩༤. སེ་ཡྻཾ་སོ སེ་ཡྻ་སོ ཧོ་ཏི, ཡོ སེ་ཡྻ་མུ་པ་སེ་ཝ་ཏི;
ཨེ་ཀེ་ན ས་ནྡྷིཾ ཀ་ཏྭཱ་ན, ས་ཏཾ ཝ་ཛ྄ཛྷེ [མ་ཙྩེ (ཀ.), བ་ཛ྄ཛྷེ (ཀ. ཨ་ཊྛ.)] ཨ་མོ་ཙ་ཡིཾ.
༩༥. [ཀ་སྨཱ…པེ… ས་གྒཾ ན ག་ཙྪེ་ཡྻ (ཀ་ཏྠ་ཙི)] ཏ་སྨཱ ས་བྦེ་ན ལོ་ཀེ་ན, ས་ནྡྷིཾ ཀ་ཏྭཱ་ན ཨེ་ཀ་ཏོ [ཨེ་ཀ་ཀོ (སཱི. སྱཱ. པཱི.)];
པེ་ཙྩ ས་གྒཾ ནི་ག་ཙྪེ་ཡྻ [ཀ་སྨཱ…པེ… ས་གྒཾ ན ག་ཙྪེ་ཡྻ (ཀ་ཏྠ་ཙི)], ཨི་དཾ སུ་ཎཱ་ཐ ཀཱ་སི་ཡཱ [ཀཱ་ས་ཡོ (སཱི. པཱི.)].
༩༦. ཨི་དཾ ཝ་ཏྭཱ མ་ཧཱ་རཱ་ཛཱ, ཀཾ་སོ བཱ་རཱ་ཎ་སི་གྒ་ཧོ;
དྷ་ནུཾ ཀ་ཎྜ་ཉྩ [ཏཱུ་ཎི་ཉྩ (སཱི. པཱི.)] ནི་ཀྑི་པྤ, སཾ་ཡ་མཾ ཨ་ཛ྄ཛྷུ་པཱ་ག་མཱི་ཏི.
སེ་ཡྻ་ཛཱ་ཏ་ཀཾ དུ་ཏི་ཡཾ.
༢༨༣. ཝ་ཌྜྷ་ཀཱི་སཱུ་ཀ་ར་ཛཱ་ཏ་ཀཾ (༣-༤-༣)
༩༧. ཝ་རཾ ཝ་རཾ ཏྭཾ ནི་ཧ་ནཾ པུ་རེ ཙ་རི, ཨ་སྨིཾ པ་དེ་སེ ཨ་བྷི་བྷུ་ཡྻ སཱུ་ཀ་རེ;
སོ དཱ་ནི ཨེ་ཀོ བྱ་པ་ག་མྨ ཛྷཱ་ཡ་སི, བ་ལཾ ནུ ཏེ བྱ་གྒྷ ན ཙ་ཛྫ ཝི་ཛྫ་ཏི.
༩༨. ཨི་མེ སུ་དཾ [ཨི་མ་སྶུ ཏཱ (སྱཱ. ཀ.)] ཡ་ནྟི དི་སོ་དི་སཾ པུ་རེ, བྷ་ཡ་ཊྚི་ཏཱ ལེ་ཎ་ག་ཝེ་སི་ནོ པུ་ཐུ;
ཏེ དཱ་ནི ས་ངྒ་མྨ ཝ་ས་ནྟི ཨེ་ཀ་ཏོ, ཡ་ཏྠ་ཊྛི་ཏཱ དུ་པྤ་ས་ཧ་ཛྫ་མེ [དུ་པྤ་ས་ཧ་ཛྫི་མེ (སྱཱ.)] མ་ཡཱ.
༩༩. ན་མ་ཏྠུ ས་ངྒྷཱ་ན ས་མཱ་ག་ཏཱ་ནཾ, དི་སྭཱ ས་ཡཾ ས་ཁྱ ཝ་དཱ་མི ཨ་བྦྷུ་ཏཾ;
བྱ་གྒྷཾ མི་གཱ ཡ་ཏྠ ཛི་ནིཾ་སུ དཱ་ཋི་ནོ, སཱ་མ་གྒི་ཡཱ དཱ་ཋ་བ་ལེ་སུ མུ་ཙྩ་རེ་ཏི.
ཝ་ཌྜྷ་ཀཱི་སཱུ་ཀ་ར་ཛཱ་ཏ་ཀཾ ཏ་ཏི་ཡཾ.
༢༨༤. སི་རི་ཛཱ་ཏ་ཀཾ (༣-༤-༤)
༡༠༠. ཡཾ ཨུ་སྶུ་ཀཱ ས་ངྒྷ་ར་ནྟི, ཨ་ལ་ཀྑི་ཀཱ བ་ཧུཾ དྷ་ནཾ;
སི་པྤ་ཝ་ནྟོ ཨ་སི་པྤཱ ཙ, ལ་ཀྑི་ཝཱ ཏཱ་ནི བྷུ་ཉྫ་ཏི.
༡༠༡. ས་བྦ་ཏྠ ཀ་ཏ་པུ་ཉྙ་སྶ, ཨ་ཏི་ཙྩ་ཉྙེ་ཝ པཱ་ཎི་ནོ;
ཨུ་པྤ་ཛྫ་ནྟི བ་ཧཱུ བྷོ་གཱ, ཨ་པྤ་ནཱ་ཡ་ཏ་ནེ་སུ་པི.
༡༠༢. ཀུ་ཀྐུ་ཊོ [ཀུ་ཀྐུ་ཊ (སཱི. པཱི.), ཀུ་ཀྐུ་ཊཱ (སཱི. ནི་སྶ་ཡ, ས་དྡ་ནཱི་ཏི)] མ་ཎ་ཡོ ད་ཎྜོ, ཐི་ཡོ ཙ པུ་ཉྙ་ལ་ཀྑ་ཎཱ;
ཨུ་པྤ་ཛྫ་ནྟི ཨ་པཱ་པ་སྶ, ཀ་ཏ་པུ་ཉྙ་སྶ ཛ་ནྟུ་ནོ་ཏི.
སི་རི་ཛཱ་ཏ་ཀཾ ཙ་ཏུ་ཏྠཾ.
༢༨༥. མ་ཎི་སཱུ་ཀ་ར་ཛཱ་ཏ་ཀཾ (༣-༤-༥)
༡༠༣. ད་རི་ཡཱ ས་ཏྟ ཝ་སྶཱ་ནི, ཏིཾ་ས་མ་ཏྟཱ ཝ་སཱ་མ་སེ;
ཧ་ཉྙཱ་མ [ཧ་ཉྪེ་མ (སཱི. པཱི.), ཧ་ཉྪཱ་མ (?)] མ་ཎི་ནོ ཨཱ་བྷཾ, ཨི་ཏི ནོ མ་ནྟ་ནཾ ཨ་ཧུ.
༡༠༤. ཡཱ་ཝ་ཏཱ མ་ཎིཾ གྷཾ་སཱ་མ [ཡཱ་ཝ ཡཱ་ཝ ནི་གྷཾ་སཱ་མ (སཱི. པཱི.)], བྷི་ཡྻོ ཝོ་དཱ་ཡ་ཏེ མ་ཎི;
ཨི་ད་ཉྩ དཱ་ནི པུ་ཙྪཱ་མ, ཀིཾ ཀི་ཙྩཾ ཨི་དྷ མ་ཉྙ་སི.
༡༠༥. ཨ་ཡཾ མ་ཎི ཝེ་ལཱུ༹་རི་ཡོ, ཨ་ཀཱ་ཙོ ཝི་མ་ལོ [ཝི་པུ་ལོ (ཀ.)] སུ་བྷོ;
ནཱ་སྶ ས་ཀྐཱ སི་རིཾ ཧ་ནྟུཾ, ཨ་པ་ཀྐ་མ་ཐ སཱུ་ཀ་རཱ་ཏི.
མ་ཎི་སཱུ་ཀ་ར [མ་ཎི་གྷཾ་ས (ཀ.)] ཛཱ་ཏ་ཀཾ པ་ཉྩ་མཾ.
༢༨༦. སཱ་ལཱུ་ཀ་ཛཱ་ཏ་ཀཾ (༣-༤-༦)
༡༠༦. མཱ སཱ་ལཱུ་ཀ་སྶ པི་ཧ་ཡི, ཨཱ་ཏུ་ར་ནྣཱ་ནི བྷུ་ཉྫ་ཏི;
ཨ་པྤོ་སྶུ་ཀྐོ བྷུ་སཾ ཁཱ་ད, ཨེ་ཏཾ དཱི་གྷཱ་ཡུ་ལ་ཀྑ་ཎཾ.
༡༠༧. ཨི་དཱ་ནི སོ ཨི་དྷཱ་ག་ནྟྭཱ, ཨ་ཏི་ཐཱི ཡུ་ཏྟ་སེ་ཝ་ཀོ;
ཨ་ཐ ད་ཀྑ་སི སཱ་ལཱུ་ཀཾ, ས་ཡ་ནྟཾ མུ་ས་ལུ་ཏྟ་རཾ.
༡༠༨. ཝི་ཀ་ནྟཾ [ཝི་ཀ་ཏྟཾ (སཱི.), ཝི་ཀ་ནྟི་ཡ་མཱ་ནཾ ཚི་ནྡི་ཡ་མཱ་ནཾ་ཏི ཨ་ཏྠོ] སཱུ་ཀ་རཾ དི་སྭཱ, ས་ཡ་ནྟཾ མུ་ས་ལུ་ཏྟ་རཾ;
ཛ་ར་གྒ་ཝཱ ཝི་ཙི་ནྟེ་སུཾ, ཝ་ར་མྷཱ་ཀཾ བྷུ་སཱ་མི་ཝཱ་ཏི.
སཱ་ལཱུ་ཀ་ཛཱ་ཏ་ཀཾ ཚ་ཊྛཾ.
༢༨༧. ལཱ་བྷ་ག་ར་ཧ་ཛཱ་ཏ་ཀཾ (༣-༤-༧)
༡༠༩. ནཱ་ནུ་མྨ་ཏྟོ ནཱ་པི་སུ་ཎོ, ནཱ་ན་ཊོ ནཱ་ཀུ་ཏཱུ་ཧ་ལོ;
མཱུ་ལ༹ྷེ་སུ ལ་བྷ་ཏེ ལཱ་བྷཾ, ཨེ་སཱ ཏེ ཨ་ནུ་སཱ་ས་ནཱི.
༡༡༠. དྷི་ར་ཏྠུ ཏཾ ཡ་ས་ལཱ་བྷཾ, དྷ་ན་ལཱ་བྷ་ཉྩ བྲཱ་ཧྨ་ཎ;
ཡཱ ཝུ་ཏྟི ཝི་ནི་པཱ་ཏེ་ན, ཨ་དྷ་མྨ་ཙ་ར་ཎེ་ན [ཨ་དྷ་མྨ་ཙ་རི་ཡཱ་ཡ (སཱི. སྱཱ.)] ཝཱ.
༡༡༡. ཨ་པི ཙེ པ་ཏྟ་མཱ་དཱ་ཡ, ཨ་ན་གཱ་རོ པ་རི་བྦ་ཛེ;
ཨེ་སཱ་ཝ ཛཱི་ཝི་ཀཱ སེ་ཡྻོ [སེ་ཡྻཱ (སཱི. སྱཱ. པཱི.)], ཡཱ ཙཱ་དྷ་མྨེ་ན ཨེ་ས་ནཱ་ཏི.
ལཱ་བྷ་ག་ར་ཧ་ཛཱ་ཏ་ཀཾ ས་ཏྟ་མཾ.
༢༨༨. མ་ཙྪུ་དྡཱ་ན་ཛཱ་ཏ་ཀཾ (༣-༤-༨)
༡༡༢. ཨ་གྒྷ་ནྟི མ་ཙྪཱ ཨ་དྷི་ཀཾ ས་ཧ་སྶཾ, ན སོ ཨ་ཏྠི ཡོ ཨི་མཾ ས་དྡ་ཧེ་ཡྻ;
མ་ཡ྄ཧ་ཉྩ ཨ་སྶུ ཨི་དྷ ས་ཏྟ མཱ་སཱ, ཨ་ཧ་མྤི ཏཾ མ་ཙྪུ་དྡཱ་ནཾ ཀི་ཎེ་ཡྻཾ.
༡༡༣. མ་ཙྪཱ་ནཾ བྷོ་ཛ་ནཾ ད་ཏྭཱ, མ་མ ད་ཀྑི་ཎ་མཱ་དི་སི;
ཏཾ ད་ཀྑི་ཎཾ ས་ར་ནྟི་ཡཱ, ཀ་ཏཾ ཨ་པ་ཙི་ཏིཾ ཏ་ཡཱ.
༡༡༤. པ་དུ་ཊྛ་ཙི་ཏྟ་སྶ ན ཕཱ་ཏི ཧོ་ཏི, ན ཙཱ་པི ཏཾ [ནཾ (སཱི. སྱཱ.)] དེ་ཝ་ཏཱ པཱུ་ཛ་ཡ་ནྟི;
ཡོ བྷཱ་ཏ་རཾ པེ་ཏྟི་ཀཾ སཱ་པ་ཏེ་ཡྻཾ, ཨ་ཝ་ཉྩ་ཡཱི དུ་ཀྐ་ཊ་ཀ་མྨ་ཀཱ་རཱི་ཏི.
མ་ཙྪུ་དྡཱ་ན་ཛཱ་ཏ་ཀཾ ཨ་ཊྛ་མཾ.
༢༨༩. ནཱ་ནཱ་ཚ་ནྡ་ཛཱ་ཏ་ཀཾ (༣-༤-༩)
༡༡༥. ནཱ་ནཱ་ཚ་ནྡཱ མ་ཧཱ་རཱ་ཛ, ཨེ་ཀཱ་གཱ་རེ ཝ་སཱ་མ་སེ;
ཨ་ཧཾ གཱ་མ་ཝ་རཾ ཨི་ཙྪེ, བྲཱ་ཧྨ་ཎཱི ཙ ག་ཝཾ ས་ཏཾ.
༡༡༦. པུ་ཏྟོ ཙ ཨཱ་ཛ་ཉྙ་ར་ཐཾ, ཀ་ཉྙཱ ཙ མ་ཎི་ཀུ་ཎྜ་ལཾ;
ཡཱ ཙེ་སཱ པུ་ཎྞི་ཀཱ ཛ་མྨཱི, ཨུ་དུ་ཀྑ་ལཾ་བྷི་ཀ་ངྑ་ཏི.
༡༡༧. བྲཱ་ཧྨ་ཎ་སྶ གཱ་མ་ཝ་རཾ, བྲཱ་ཧྨ་ཎི་ཡཱ ག་ཝཾ ས་ཏཾ;
པུ་ཏྟ་སྶ ཨཱ་ཛ་ཉྙ་ར་ཐཾ, ཀ་ཉྙཱ་ཡ མ་ཎི་ཀུ་ཎྜ་ལཾ;
ཡ་ཉྩེ་ཏཾ པུ་ཎྞི་ཀཾ ཛ་མྨིཾ, པ་ཊི་པཱ་དེ་ཐུ་དུ་ཀྑ་ལ་ནྟི.
ནཱ་ནཱ་ཚ་ནྡ་ཛཱ་ཏ་ཀཾ ན་ཝ་མཾ.
༢༩༠. སཱི་ལ་ཝཱི་མཾ་ས་ཀ་ཛཱ་ཏ་ཀཾ (༣-༤-༡༠)
༡༡༨. སཱི་ལཾ ཀི་རེ་ཝ ཀ་ལྱཱ་ཎཾ, སཱི་ལཾ ལོ་ཀེ ཨ་ནུ་ཏྟ་རཾ;
པ་སྶ གྷོ་ར་ཝི་སོ ནཱ་གོ, སཱི་ལ་ཝཱ་ཏི ན ཧ་ཉྙ་ཏི.
༡༡༩. སོ་ཧཾ སཱི་ལཾ ས་མཱ་དི་སྶཾ, ལོ་ཀེ ཨ་ནུ་མ་ཏཾ སི་ཝཾ;
ཨ་རི་ཡ་ཝུ་ཏྟི་ས་མཱ་ཙཱ་རོ, ཡེ་ན ཝུ་ཙྩ་ཏི སཱི་ལ་ཝཱ.
༡༢༠. ཉཱ་ཏཱི་ན་ཉྩ པི་ཡོ ཧོ་ཏི, མི་ཏྟེ་སུ ཙ ཝི་རོ་ཙ་ཏི;
ཀཱ་ཡ་སྶ བྷེ་དཱ སུ་ག་ཏིཾ, ཨུ་པ་པ་ཛྫ་ཏི སཱི་ལ་ཝཱ་ཏི.
སཱི་ལ་ཝཱི་མཾ་ས་ཀ་ཛཱ་ཏ་ཀཾ ད་ས་མཾ.
ཨ་བྦྷ་ནྟ་ར་ཝ་གྒོ ཙ་ཏུ་ཏྠོ.
ཏ་སྶུ་དྡཱ་ནཾ –
དུ་མ ཀཾ་ས་ཝ་རུ་ཏྟ་མ་བྱ་གྒྷ་མི་གཱ, མ་ཎ་ཡོ མ་ཎི སཱ་ལུ་ཀ་མ་ཝ྄ཧ་ཡ་ནོ;
ཨ་ནུ་སཱ་ས་ནི་ཡོ་པི ཙ མ་ཙྪ་ཝ་རོ, མ་ཎི་ཀུ་ཎྜ་ལ་ཀེ་ན ཀི་རེ་ན ད་སཱ་ཏི.