༣. ཨུ་ད་པཱ་ན་ཝ་གྒོ
༢༧༡. ཨུ་ད་པཱ་ན་དཱུ་ས་ཀ་ཛཱ་ཏ་ཀཾ (༣-༣-༡)
༦༡. ཨཱ་ར་ཉྙི་ཀ་སྶ ཨི་སི་ནོ, ཙི་ར་ར་ཏྟཾ ཏ་པ་སྶི་ནོ;
ཀི་ཙྪཱ་ཀ་ཏཾ ཨུ་ད་པཱ་ནཾ, ཀ་ཐཾ ས་མྨ ཨ་ཝཱ་ཧ་སི [ཨ་ཝཱ་ཧ་ཡི (སཱི. པཱི.), ཨ་པཱ་ཧ་སི (སྱཱ.)].
༦༢. ཨེ་ས དྷ་མྨོ སི་ངྒཱ་ལཱ་ནཾ, ཡཾ པི་ཏྭཱ ཨོ་ཧ་དཱ་མ་སེ;
པི་ཏུ་པི་ཏཱ་མ་ཧཾ དྷ་མྨོ, ན ཏཾ [ན ནཾ (སཱི. པཱི.)] ཨུ་ཛ྄ཛྷཱ་ཏུ་མ་ར་ཧ་སི.
༦༣. ཡེ་སཾ ཝོ ཨེ་དི་སོ དྷ་མྨོ, ཨ་དྷ་མྨོ པ་ན ཀཱི་དི་སོ;
མཱ ཝོ དྷ་མྨཾ ཨ་དྷ་མྨཾ ཝཱ, ཨ་དྡ་སཱ་མ ཀུ་དཱ་ཙ་ན་ནྟི.
ཨུ་ད་པཱ་ན་དཱུ་ས་ཀ་ཛཱ་ཏ་ཀཾ པ་ཋ་མཾ.
༢༧༢. བྱ་གྒྷ་ཛཱ་ཏ་ཀཾ (༣-༣-༢)
༦༤. ཡེ་ན མི་ཏྟེ་ན སཾ་ས་གྒཱ, ཡོ་ག་ཀྑེ་མོ ཝི་ཧི་ཡྻ་ཏི;
པུ་བྦེ་ཝ་ཛ྄ཛྷཱ་བྷ་ཝཾ ཏ་སྶ, རུ་ཀྑེ ཨ་ཀྑཱི་ཝ པ་ཎྜི་ཏོ.
༦༥. ཡེ་ན མི་ཏྟེ་ན སཾ་ས་གྒཱ, ཡོ་ག་ཀྑེ་མོ པ་ཝ་ཌྜྷ་ཏི;
ཀ་རེ་ཡྻ་ཏྟ་ས་མཾ ཝུ་ཏྟིཾ, ས་བྦ་ཀི་ཙྩེ་སུ པ་ཎྜི་ཏོ.
༦༦. ཨེ་ཐ བྱ་གྒྷཱ ནི་ཝ་ཏྟ་ཝ྄ཧོ, པ་ཙྩུ་པེ་ཐ [པ་ཙྩ་མེ་ཐ (སཱི. པཱི.)] མ་ཧཱ་ཝ་ནཾ;
མཱ ཝ་ནཾ ཚི་ནྡི ནི་བྱ་གྒྷཾ, བྱ་གྒྷཱ མཱ་ཧེ་སུ ནི་བྦ་ནཱ་ཏི.
བྱ་གྒྷ་ཛཱ་ཏ་ཀཾ དུ་ཏི་ཡཾ.
༢༧༣. ཀ་ཙྪ་པ་ཛཱ་ཏ་ཀཾ (༣-༣-༣)
༦༧. ཀོ ནུ ཨུ་དྡྷི་ཏ་བྷ་ཏྟོ་ཝ [ཨུ་དྡི་ཏ་བྷ་ཏྟོ་ཝ (སཱི.), ཝ་ཌྜྷི་ཏ་བྷ་ཏྟོ་ཝ (སྱཱ.)], པཱུ་ར་ཧ་ཏྠོ་ཝ བྲཱ་ཧྨ་ཎོ;
ཀ་ཧཾ ནུ བྷི་ཀྑཾ ཨ་ཙ་རི, ཀཾ ས་དྡྷཾ ཨུ་པ་ས་ངྐ་མི.
༦༨. ཨ་ཧཾ ཀ་པི་སྨི དུ་མྨེ་དྷོ, ཨ་ནཱ་མཱ་སཱ་ནི ཨཱ་མ་སིཾ;
ཏྭཾ མཾ མོ་ཙ་ཡ བྷ་དྡ་ནྟེ, མུ་ཏྟོ ག་ཙྪེ་ཡྻ པ་བྦ་ཏཾ.
༦༩. ཀ་ཙྪ་པཱ ཀ་སྶ་པཱ ཧོ་ནྟི, ཀོ་ཎྜ་ཉྙཱ ཧོ་ནྟི མ་ཀྐ་ཊཱ;
མུ་ཉྩ ཀ་སྶ་པ ཀོ་ཎྜ་ཉྙཾ, ཀ་ཏཾ མེ་ཐུ་ན་ཀཾ ཏ་ཡཱ་ཏི.
ཀ་ཙྪ་པ་ཛཱ་ཏ་ཀཾ ཏ་ཏི་ཡཾ.
༢༧༤. ལོ་ལ་ཛཱ་ཏ་ཀཾ (༣-༣-༤)
༧༠. ཀཱ་ཡཾ བ་ལཱ་ཀཱ སི་ཁི་ནཱི, ཙོ་རཱི ལ་ངྒྷི་པི་ཏཱ་མ་ཧཱ;
ཨོ་རཾ བ་ལཱ་ཀེ ཨཱ་ག་ཙྪ, ཙ་ཎྜོ མེ ཝཱ་ཡ་སོ ས་ཁཱ.
༧༡. ནཱ་ཧཾ བ་ལཱ་ཀཱ སི་ཁི་ནཱི, ཨ་ཧཾ ལོ་ལོ་སྨི ཝཱ་ཡ་སོ;
ཨ་ཀ་ཏྭཱ ཝ་ཙ་ནཾ ཏུ་ཡ྄ཧཾ, པ་སྶ ལཱུ་ནོ་སྨི ཨཱ་ག་ཏོ.
༧༢. པུ་ན་པཱ་པ་ཛྫ་སཱི ས་མྨ, སཱི་ལ་ཉྷི ཏ་ཝ ཏཱ་དི་སཾ;
ན ཧི མཱ་ནུ་ས་ཀཱ བྷོ་གཱ, སུ་བྷུ་ཉྫཱ ཧོ་ནྟི པ་ཀྑི་ནཱ་ཏི.
ལོ་ལ་ཛཱ་ཏ་ཀཾ ཙ་ཏུ་ཏྠཾ.
༢༧༥. རུ་ཙི་ར་ཛཱ་ཏ་ཀཾ (༣-༣-༥)
༧༣. ཀཱ་ཡཾ བ་ལཱ་ཀཱ རུ་ཙི་རཱ, ཀཱ་ཀ་ནཱི་ལ༹་སྨི་མ་ཙྪ་ཏི;
ཙ་ཎྜོ ཀཱ་ཀོ ས་ཁཱ མ་ཡ྄ཧཾ, ཡ་སྶ [ཏ་སྶ (སཱི. པཱི.)] ཙེ་ཏཾ ཀུ་ལཱ་ཝ་ཀཾ.
༧༤. ན་ནུ མཾ ས་མྨ ཛཱ་ནཱ་སི, དི་ཛ སཱ་མཱ་ཀ་བྷོ་ཛ་ན;
ཨ་ཀ་ཏྭཱ ཝ་ཙ་ནཾ ཏུ་ཡ྄ཧཾ, པ་སྶ ལཱུ་ནོ་སྨི ཨཱ་ག་ཏོ.
༧༥. པུ་ན་པཱ་པ་ཛྫ་སཱི ས་མྨ, སཱི་ལ་ཉྷི ཏ་ཝ ཏཱ་དི་སཾ;
ན ཧི མཱ་ནུ་ས་ཀཱ བྷོ་གཱ, སུ་བྷུ་ཉྫཱ ཧོ་ནྟི པ་ཀྑི་ནཱ་ཏི.
རུ་ཙི་ར་ཛཱ་ཏ་ཀཾ པ་ཉྩ་མཾ.
༢༧༦. ཀུ་རུ་དྷ་མྨ་ཛཱ་ཏ་ཀཾ (༣-༣-༦)
༧༦. ཏ་ཝ ས་དྡྷ་ཉྩ སཱི་ལ་ཉྩ, ཝི་དི་ཏྭཱ་ན ཛ་ནཱ་དྷི་པ;
ཝ་ཎྞཾ ཨ་ཉྫ་ན་ཝ་ཎྞེ་ན, ཀཱ་ལི་ངྒ་སྨིཾ ནི་མི་མྷ་སེ [ཝི་ནི་མྷ་སེ (སྱཱ.), ཝ་ནི་མྷ་སེ (ཀ.)].
༧༧. ཨ་ནྣ་བྷ་ཙྩཱ ཙ་བྷ་ཙྩཱ ཙ, ཡོ་དྷ ཨུ་དྡི་སྶ ག་ཙྪ་ཏི;
ས་བྦེ ཏེ ཨ་པྤ་ཊི་ཀྑི་པྤཱ, པུ་བྦཱ་ཙ་རི་ཡ་ཝ་ཙོ ཨི་དཾ.
༧༨. ད་དཱ་མི ཝོ བྲཱ་ཧྨ་ཎཱ ནཱ་ག་མེ་ཏཾ, རཱ་ཛཱ་ར་ཧཾ རཱ་ཛ་བྷོ་གྒཾ ཡ་ས་སྶི་ནཾ;
ཨ་ལ་ངྐ་ཏཾ ཧེ་མ་ཛཱ་ལཱ་བྷི་ཚ་ནྣཾ, ས་སཱ་ར་ཐིཾ ག་ཙྪ་ཐ ཡེ་ན ཀཱ་མ་ནྟི.
ཀུ་རུ་དྷ་མྨ་ཛཱ་ཏ་ཀཾ [ཀུ་རུ་དྷ་མྨ་ཛཱ་ཏ་ཀཾ (སཱི. སྱཱ. པཱི.)] ཚ་ཊྛཾ.
༢༧༧. རོ་མ་ཀ་ཛཱ་ཏ་ཀཾ (༣-༣-༧)
༧༩. ཝ་སྶཱ་ནི པ་ཉྙཱ་ས ས་མཱ་དྷི་ཀཱ་ནི, ཝ་སི་མྷ སེ་ལ་སྶ གུ་ཧཱ་ཡ རོ་མ་ཀ;
ཨ་ས་ངྐ་མཱ་ནཱ ཨ་བྷི་ནི་བྦུ་ཏ་ཏྟཱ [ཨ་བྷི་ནི་བྦུ་ཏ་ཙི་ཏྟཱ (སྱཱ. ཀ.)], ཧ་ཏྠ་ཏྟ [ཧ་ཏྠ་ཏྠ (སྱཱ.)] མཱ་ཡ་ནྟི མ་མ་ཎྜ་ཛཱ པུ་རེ.
༨༠. ཏེ དཱ་ནི ཝ་ཀྐ་ངྒ ཀི་མ་ཏྠ་མུ་སྶུ་ཀཱ, བྷ་ཛ་ནྟི ཨ་ཉྙཾ གི་རི་ཀ་ནྡ་རཾ དི་ཛཱ;
ན ནཱུ་ན མ་ཉྙ་ནྟི མ་མཾ ཡ་ཐཱ པུ་རེ, ཙི་ར་པྤ་ཝུ་ཏྠཱ ཨ་ཐ ཝཱ ན ཏེ ཨི་མེ.
༨༡. ཛཱ་ནཱ་མ ཏཾ ན མ་ཡཾ ས་མྤ་མཱུ་ལ༹ྷཱ [ན མ་ཡ’མ་སྨ མཱུ་ལ༹ྷཱ (སཱི. པཱི.)], སོ་ཡེ་ཝ ཏྭཾ ཏེ མ་ཡ་མ་སྨ ནཱ་ཉྙེ;
ཙི་ཏྟ་ཉྩ ཏེ ཨ་སྨིཾ ཛ་ནེ པ་དུ་ཊྛཾ, ཨཱ་ཛཱི་ཝི་ཀཱ [ཨཱ་ཛཱི་ཝ་ཀ (སཱི. སྱཱ.), ཨཱ་ཛཱི་ཝི་ཀ (པཱི.)] ཏེ་ན ཏ་མུ་ཏྟ་སཱ་མཱ་ཏི.
རོ་མ་ཀ་ཛཱ་ཏ་ཀཾ ས་ཏྟ་མཾ.
༢༧༨. མ་ཧིཾ་ས་རཱ་ཛ་ཛཱ་ཏ་ཀཾ (༣-༣-༨)
༨༢. ཀི་མ་ཏྠ [ཀ་མ་ཏྠ (སཱི. པཱི.)] མ་བྷི་ས་ནྡྷཱ་ཡ, ལ་ཧུ་ཙི་ཏྟ་སྶ དུ་བྦྷི་ནོ [དཱུ་བྷི་ནོ (སཱི. པཱི.)];
ས་བྦ་ཀཱ་མ་ད་ད་སྶེ་ཝ [དུ་ཧ་སྶེ་ཝ (སཱི. སྱཱ. པཱི.), ར་ཧ་སྶེ་ཝ (ཀ.)], ཨི་མཾ དུ་ཀྑཾ ཏི་ཏི་ཀྑ་སི.
༨༣. སི་ངྒེ་ན ནི་ཧ་ནཱ་ཧེ་ཏཾ, པ་ད་སཱ ཙ ཨ་དྷི་ཊྛ་ཧ;
བྷི་ཡྻོ [བྷཱི་ཡོ (སཱི.)] བཱ་ལཱ པ་ཀུ་ཛ྄ཛྷེ་ཡྻུཾ, ནོ ཙ་སྶ པ་ཊི་སེ་དྷ་ཀོ.
༨༤. མ་མེ་ཝཱ་ཡཾ མ་ཉྙ་མཱ་ནོ, ཨ་ཉྙེ་པེ་ཝཾ [ཨ་ཉྙ་མྤེ་ཝཾ (སཱི. སྱཱ. པཱི.)] ཀ་རི་སྶ་ཏི;
ཏེ ནཾ ཏ་ཏྠ ཝ་དྷི་སྶ་ནྟི, སཱ མེ མུ་ཏྟི བྷ་ཝི་སྶ་ཏཱི་ཏི.
མ་ཧིཾ་ས་རཱ་ཛ་ཛཱ་ཏ་ཀཾ [མ་ཧི་ས་ཛཱ་ཏ་ཀཾ (སཱི. སྱཱ. པཱི.)] ཨ་ཊྛ་མཾ.
༢༧༩. ས་ཏ་པ་ཏྟ་ཛཱ་ཏ་ཀཾ (༣-༣-༩)
༨༥. ཡ་ཐཱ མཱ་ཎ་ཝ་ཀོ པ་ནྠེ, སི་ངྒཱ་ལིཾ ཝ་ན་གོ་ཙ་རིཾ;
ཨ་ཏྠ་ཀཱ་མཾ པ་ཝེ་དེ་ནྟིཾ [པ་ཝ་ད་ནྟིཾ (པཱི.)], ཨ་ན་ཏྠ་ཀཱ་མཱ་ཏི མ་ཉྙ་ཏི;
ཨ་ན་ཏྠ་ཀཱ་མཾ ས་ཏ་པ་ཏྟཾ, ཨ་ཏྠ་ཀཱ་མོ་ཏི མ་ཉྙ་ཏི.
༨༦. ཨེ་ཝ་མེ་ཝ ཨི་དྷེ་ཀ་ཙྩོ, པུ་གྒ་ལོ ཧོ་ཏི ཏཱ་དི་སོ;
ཧི་ཏེ་ཧི ཝ་ཙ་ནཾ ཝུ་ཏྟོ, པ་ཊི་ག་ཎྷཱ་ཏི ཝཱ་མ་ཏོ.
༨༧. ཡེ ཙ ཁོ ནཾ པ་སཾ་ས་ནྟི, བྷ་ཡཱ ཨུ་ཀྐཾ་ས་ཡ་ནྟི ཝཱ [ཙ (སཱི. པཱི.)];
ཏ་ཉྷི སོ མ་ཉྙ་ཏེ མི་ཏྟཾ, ས་ཏ་པ་ཏྟཾ་ཝ མཱ་ཎ་ཝོ་ཏི.
ས་ཏ་པ་ཏྟ་ཛཱ་ཏ་ཀཾ ན་ཝ་མཾ.
༢༨༠. པུ་ཊ་དཱུ་ས་ཀ་ཛཱ་ཏ་ཀཾ (༣-༣-༡༠)
༨༨. ཨ་དྡྷཱ ཧི ནཱུ་ན མི་ག་རཱ་ཛཱ, པུ་ཊ་ཀ་མྨ་སྶ ཀོ་ཝི་དོ;
ཏ་ཐཱ ཧི པུ་ཊཾ དཱུ་སེ་ཏི, ཨ་ཉྙཾ ནཱུ་ན ཀ་རི་སྶ་ཏི.
༨༩. ན མེ མཱ་ཏཱ ཝཱ པི་ཏཱ ཝཱ, པུ་ཊ་ཀ་མྨ་སྶ ཀོ་ཝི་དོ;
ཀ་ཏཾ ཀ་ཏཾ ཁོ དཱུ་སེ་མ, ཨེ་ཝཾ དྷ་མྨ་མི་དཾ ཀུ་ལཾ.
༩༠. ཡེ་སཾ ཝོ ཨེ་དི་སོ དྷ་མྨོ, ཨ་དྷ་མྨོ པ་ན ཀཱི་དི་སོ;
མཱ ཝོ དྷ་མྨཾ ཨ་དྷ་མྨཾ ཝཱ, ཨ་དྡ་སཱ་མ ཀུ་དཱ་ཙ་ན་ནྟི.
པུ་ཊ་དཱུ་ས་ཀ་ཛཱ་ཏ་ཀཾ ད་ས་མཾ.
ཨུ་ད་པཱ་ན་ཝ་གྒོ [ཨ་ར་ཉྙ་ཝ་གྒོ (སཱི. པཱི. ཀ.)] ཏ་ཏི་ཡོ.
ཏ་སྶུ་དྡཱ་ནཾ –
ཨུ་ད་པཱ་ན་ཝ་རཾ ཝ་ན་བྱ་གྒྷ ཀ་པི, སི་ཁི་ནཱི ཙ བ་ལཱ་ཀ རུ་ཙི་ར་ཝ་རོ;
སུ་ཛ་ནཱ་དྷི་པ་རོ་མ་ཀ་དཱུ་ས པུ་ན, ས་ཏ་པ་ཏྟ་ཝ་རོ པུ་ཊ་ཀ་མྨ ད་སཱ་ཏི.