༥༤༥. མ་ཧཱ་ནཱ་ར་ད་ཀ་སྶ་པ་ཛཱ་ཏ་ཀཾ (༨)
༡༡༥༣. ‘‘ཨ་ཧུ རཱ་ཛཱ ཝི་དེ་ཧཱ་ནཾ, ཨ་ངྒ་ཏི [ཨ་ངྒཱ་ཏི (སཱི.) ཨེ་ཝ་མུ་པ་རི་པི] ནཱ་མ ཁ་ཏྟི་ཡོ;
པ་ཧཱུ་ཏ་ཡོ་གྒོ དྷ་ནི་མཱ, ཨ་ན་ནྟ་བ་ལ་པོ་རི་སོ.
༡༡༥༤. སོ ཙ པ་ནྣ་ར་སིཾ [པ་ནྣ་ར་སེ (སྱཱ. ཀ.)] ར་ཏྟིཾ, པུ་རི་མ་ཡཱ་མེ ཨ་ནཱ་ག་ཏེ;
ཙཱ་ཏུ་མཱ་སཱ [ཙཱ་ཏུ་མ་སྶ (སཱི. པཱི.)] ཀོ་མུ་དི་ཡཱ, ཨ་མ་ཙྩེ ས་ནྣི་པཱ་ཏ་ཡི.
༡༡༥༥. ‘‘པ་ཎྜི་ཏེ སུ་ཏ་ས་མྤ་ནྣེ, མི་ཏ་པུ་བྦེ [མི་ཧི་ཏ་པུ་བྦེ (སཱི. པཱི.)] ཝི་ཙ་ཀྑ་ཎེ;
ཝི་ཛ་ཡ་ཉྩ སུ་ནཱ་མ་ཉྩ, སེ་ནཱ་པ་ཏིཾ ཨ་ལཱ་ཏ་ཀཾ.
༡༡༥༦. ‘‘ཏ་མ་ནུ་པུ་ཙྪི ཝེ་དེ་ཧོ, ‘‘པ་ཙྩེ་ཀཾ བྲཱུ་ཐ སཾ རུ་ཙིཾ;
ཙཱ་ཏུ་མཱ་སཱ ཀོ་མུ་ད་ཛྫ, ཛུ་ཎྷཾ བྱ་པ་ཧ་ཏཾ [བྱ་པ་ག་ཏཾ (སཱི. པཱི.)] ཏ་མཾ;
ཀཱ་ཡ་ཛྫ ར་ཏི་ཡཱ ར་ཏྟིཾ, ཝི་ཧ་རེ་མུ ཨི་མཾ ཨུ་ཏུཾ’’.
༡༡༥༧. ‘‘ཏ་ཏོ སེ་ནཱ་པ་ཏི ར་ཉྙོ, ཨ་ལཱ་ཏོ ཨེ་ཏ་ད་བྲ་ཝི;
‘‘ཧ་ཊྛཾ ཡོ་གྒཾ བ་ལཾ ས་བྦཾ, སེ་ནཾ ས་ནྣཱ་ཧ་ཡཱ་མ་སེ.
༡༡༥༨. ‘‘ནི་ཡྻཱ་མ དེ་ཝ ཡུ་དྡྷཱ་ཡ, ཨ་ན་ནྟ་བ་ལ་པོ་རི་སཱ;
ཡེ ཏེ ཝ་སཾ ན ཨཱ་ཡ་ནྟི, ཝ་སཾ ཨུ་པ་ན་ཡཱ་མ་སེ [ཨུ་པ་ནི་ཡྻཱ་མ་སེ (ཀ.)];
ཨེ་སཱ མ་ཡ྄ཧཾ ས་ཀཱ དི་ཊྛི, ཨ་ཛི་ཏཾ ཨོ་ཛི་ནཱ་མ་སེ.
༡༡༥༩. ཨ་ལཱ་ཏ་སྶ ཝ་ཙོ སུ་ཏྭཱ, སུ་ནཱ་མོ ཨེ་ཏ་ད་བྲ་ཝི;
‘‘ས་བྦེ ཏུ་ཡ྄ཧཾ མ་ཧཱ་རཱ་ཛ, ཨ་མི་ཏྟཱ ཝ་ས་མཱ་ག་ཏཱ.
༡༡༦༠. ‘‘ནི་ཀྑི་ཏྟ་ས་ཏྠཱ པ་ཙྩ་ཏྠཱ, ནི་ཝཱ་ཏ་མ་ནུ་ཝ་ཏྟ་རེ;
ཨུ་ཏྟ་མོ ཨུ་སྶ་ཝོ ཨ་ཛྫ, ན ཡུ་དྡྷཾ མ་མ རུ་ཙྩ་ཏི.
༡༡༦༡. ‘‘ཨ་ནྣ་པཱ་ན་ཉྩ ཁ་ཛྫ་ཉྩ, ཁི་པྤཾ ཨ་བྷི་ཧ་ར་ནྟུ ཏེ;
ར་མ་སྶུ དེ་ཝ ཀཱ་མེ་ཧི, ན་ཙྩ་གཱི་ཏེ སུ་ཝཱ་དི་ཏེ’’.
༡༡༦༢. སུ་ནཱ་མ་སྶ ཝ་ཙོ སུ་ཏྭཱ, ཝི་ཛ་ཡོ ཨེ་ཏ་ད་བྲ་ཝི;
‘‘ས་བྦེ ཀཱ་མཱ མ་ཧཱ་རཱ་ཛ, ནི་ཙྩཾ ཏ་ཝ མུ་པ་ཊྛི་ཏཱ.
༡༡༦༣. ‘‘ན ཧེ་ཏེ དུ་ལླ་བྷཱ དེ་ཝ, ཏ་ཝ ཀཱ་མེ་ཧི མོ་དི་ཏུཾ;
ས་དཱ་པི ཀཱ་མཱ སུ་ལ་བྷཱ, ནེ་ཏཾ ཙི་ཏྟ་མ་ཏཾ [ཙི་ཏྟཾ མ་ཏཱི (ཀ.)] མ་མ.
༡༡༦༤. ‘‘ས་མ་ཎཾ བྲཱ་ཧྨ་ཎཾ ཝཱ་པི, ཨུ་པཱ་སེ་མུ བ་ཧུ་སྶུ་ཏཾ;
ཡོ ན་ཛྫ ཝི་ན་ཡེ ཀ་ངྑཾ, ཨ་ཏྠ་དྷ་མྨ་ཝི་དཱུ ཨི་སེ’’.
༡༡༦༥. ཝི་ཛ་ཡ་སྶ ཝ་ཙོ སུ་ཏྭཱ, རཱ་ཛཱ ཨ་ངྒ་ཏི མ་བྲ་ཝི;
‘‘ཡ་ཐཱ ཝི་ཛ་ཡོ བྷ་ཎ་ཏི, མ་ཡ྄ཧ་མྤེ་ཏཾ་ཝ རུ་ཙྩ་ཏི.
༡༡༦༦. ‘‘ས་མ་ཎཾ བྲཱ་ཧྨ་ཎཾ ཝཱ་པི, ཨུ་པཱ་སེ་མུ བ་ཧུ་སྶུ་ཏཾ;
ཡོ ན་ཛྫ ཝི་ན་ཡེ ཀ་ངྑཾ, ཨ་ཏྠ་དྷ་མྨ་ཝི་དཱུ ཨི་སེ.
༡༡༦༧. ‘‘ས་བྦེ་ཝ ས་ནྟཱ ཀ་རོ་ཐ མ་ཏིཾ, ཀཾ ཨུ་པཱ་སེ་མུ པ་ཎྜི་ཏཾ;
ཡོ [ཀོ (སཱི. པཱི.)] ན་ཛྫ ཝི་ན་ཡེ ཀ་ངྑཾ, ཨ་ཏྠ་དྷ་མྨ་ཝི་དཱུ ཨི་སེ’’.
༡༡༦༨. ‘‘ཝེ་དེ་ཧ་སྶ ཝ་ཙོ སུ་ཏྭཱ, ཨ་ལཱ་ཏོ ཨེ་ཏ་ད་བྲ་ཝི;
‘‘ཨ་ཏྠཱ་ཡཾ མི་ག་དཱ་ཡ་སྨིཾ, ཨ་ཙེ་ལོ དྷཱི་ར་ས་མྨ་ཏོ.
༡༡༦༩. ‘‘གུ་ཎོ ཀ་སྶ་པ་གོ་ཏྟཱ་ཡཾ, སུ་ཏོ ཙི་ཏྲ་ཀ་ཐཱི ག་ཎཱི;
ཏཾ དེ་ཝ [ཏ་དེ་ཝ (ཀ.)] པ་ཡི་རུ་པཱ་སེ་མུ [པ་ཡི་རུ་པཱ་ས་ཡ (སཱི. པཱི.)], སོ ནོ ཀ་ངྑཾ ཝི་ནེ་སྶ་ཏི’’.
༡༡༧༠. ‘‘ཨ་ལཱ་ཏ་སྶ ཝ་ཙོ སུ་ཏྭཱ, རཱ་ཛཱ ཙོ་དེ་སི སཱ་ར་ཐིཾ;
‘‘མི་ག་དཱ་ཡཾ ག་མི་སྶཱ་མ, ཡུ་ཏྟཾ ཡཱ་ནཾ ཨི་དྷཱ་ན་ཡ’’.
༡༡༧༡. ཏ་སྶ ཡཱ་ནཾ ཨ་ཡོ་ཛེ་སུཾ, ད་ནྟཾ རཱུ་པི་ཡ་པ་ཀྑ་རཾ [རཱུ་པི་ཡུ་པ་ཀྑ་རཾ (ཀ.)];
སུ་ཀྐ་མ་ཊྛ་པ་རི་ཝཱ་རཾ, པ་ཎྜ་རཾ དོ་སི་ནཱ་མུ་ཁཾ.
༡༡༧༢. ‘‘ཏ་ཏྲཱ་སུཾ ཀུ་མུ་དཱ་ཡུ་ཏྟཱ, ཙ་ཏྟཱ་རོ སི་ནྡྷ་ཝཱ ཧ་ཡཱ;
ཨ་ནི་ལཱུ་པ་མ་ས་མུ་པྤཱ་ཏཱ [ཨ་ནི་ལཱུ་པ་མ་ས་མུ་པྤཱ་དཱ (ཀ.)], སུ་ད་ནྟཱ སོ་ཎྞ་མཱ་ལི་ནོ.
༡༡༧༣. ‘‘སེ་ཏ་ཙྪ་ཏྟཾ སེ་ཏ་ར་ཐོ, སེ་ཏ་སྶཱ སེ་ཏ་བཱི་ཛ་ནཱི;
ཝེ་དེ་ཧོ ས་ཧ་མ་ཙྩེ་ཧི, ནི་ཡྻཾ ཙ་ནྡོ་ཝ སོ་བྷ་ཏི.
༡༡༧༤. ‘‘ཏ་མ་ནུ་ཡཱ་ཡིཾ་སུ བ་ཧ་ཝོ, ཨི་ནྡི་ཁ་གྒ་དྷ་རཱ [ཨི་ནྡ་ཁ་གྒ་དྷ་རཱ (སཱི.), ཨི་ཊྛི་ཁ་གྒ་དྷ་རཱ (པཱི.)] བ་ལཱི;
ཨ་སྶ་པི་ཊྛི་ག་ཏཱ ཝཱི་རཱ, ན་རཱ ན་ར་ཝ་རཱ་དྷི་པཾ.
༡༡༧༥. སོ མུ་ཧུ་ཏྟཾ་ཝ ཡཱ་ཡི་ཏྭཱ, ཡཱ་ནཱ ཨོ་རུ་ཡ྄ཧ ཁ་ཏྟི་ཡོ;
ཝེ་དེ་ཧོ ས་ཧ་མ་ཙྩེ་ཧི, པ་ཏྟཱི གུ་ཎ་མུ་པཱ་ག་མི.
༡༡༧༦. ཡེ་པི ཏ་ཏྠ ཏ་དཱ ཨཱ་སུཾ, བྲཱ་ཧྨ་ཎི་བྦྷཱ ས་མཱ་ག་ཏཱ;
ན ཏེ ཨ་པ་ན་ཡཱི རཱ་ཛཱ, ཨ་ཀ་ཏཾ བྷཱུ་མི་མཱ་ག་ཏེ.
༡༡༧༧. ‘‘ཏ་ཏོ སོ མུ་དུ་ཀཱ བྷི་སི་ཡཱ, མུ་དུ་ཙི་ཏྟ་ཀ་ས་ནྠ་ཏེ [མུ་དུ་ཙི་ཏྟ་ཀ་ལ༹་ནྡ་ཀེ (སཱི. པཱི.)];
མུ་དུ་པ་ཙྩ་ཏྠ་ཏེ རཱ་ཛཱ, ཨེ་ཀ་མ་ནྟཾ ཨུ་པཱ་ཝི་སི.
༡༡༧༨. ‘‘ནི་ས་ཛྫ རཱ་ཛཱ ས་མྨོ་དི, ཀ་ཐཾ སཱ་ར་ཎི་ཡཾ ཏ་ཏོ;
‘‘ཀ་ཙྩི ཡཱ་པ་ནི་ཡཾ བྷ་ནྟེ, ཝཱ་ཏཱ་ན་མ་ཝི་ཡ་གྒ་ཏཱ [ཝཱ་ཏཱ་ན་མ་ཝི་ས་གྒ་ཏཱ (སཱི. པཱི.), ཝཱ་ཏཱ་ན་མ་ཝི་ཡ་ཏྟ་ཏཱ (སྱཱ.)].
༡༡༧༩. ‘‘ཀ་ཙྩི ཨ་ཀ་སི་རཱ ཝུ་ཏྟི, ལ་བྷ་སི [ལ་བྦྷ་ཏི (སཱི. པཱི.)] པི་ཎྜ་ཡཱ་པ་ནཾ [པི་ཎྜི་ཡཱ་པ་ནཾ (སྱཱ. ཀ.)];
ཨ་པཱ་བཱ་དྷོ ཙ་སི ཀ་ཙྩི, ཙ་ཀྑུཾ ན པ་རི་ཧཱ་ཡ་ཏི’’.
༡༡༨༠. ཏཾ གུ་ཎོ པ་ཊི་ས་མྨོ་དི, ཝེ་དེ་ཧཾ ཝི་ན་ཡེ ར་ཏཾ;
‘‘ཡཱ་པ་ནཱི་ཡཾ མ་ཧཱ་རཱ་ཛ, ས་བྦ་མེ་ཏཾ ཏ་དཱུ་བྷ་ཡཾ.
༡༡༨༡. ‘‘ཀ་ཙྩི ཏུ་ཡ྄ཧ་མྤི ཝེ་དེ་ཧ, པ་ཙྩ་ནྟཱ ན བ་ལཱི་ཡ་རེ;
ཀ་ཙྩི ཨ་རོ་གཾ ཡོ་གྒཾ ཏེ, ཀ་ཙྩི ཝ་ཧ་ཏི ཝཱ་ཧ་ནཾ;
ཀ་ཙྩི ཏེ བྱཱ་དྷ་ཡོ ན་ཏྠི, ས་རཱི་ར་སྶུ་པ་ཏཱ་པི་ཡཱ’’ [ས་རཱི་ར་སྶུ་པ་ཏཱ་པི་ཀཱ (སཱི. པཱི.), ས་རཱི་ར་སྶུ་པ་ཏཱ་པ་ནཱ (?)].
༡༡༨༢. པ་ཊི་ས་མྨོ་དི་ཏོ རཱ་ཛཱ, ཏ་ཏོ པུ་ཙྪི ཨ་ན་ནྟ་རཱ;
ཨ་ཏྠཾ དྷ་མྨ་ཉྩ ཉཱ་ཡ་ཉྩ, དྷ་མྨ་ཀཱ་མོ ར་ཐེ་ས་བྷོ.
༡༡༨༣. ‘‘ཀ་ཐཾ དྷ་མྨཾ ཙ་རེ མ་ཙྩོ, མཱ་ཏཱ་པི་ཏཱུ་སུ ཀ་སྶ་པ;
ཀ་ཐཾ ཙ་རེ ཨཱ་ཙ་རི་ཡེ, པུ་ཏྟ་དཱ་རེ ཀ་ཐཾ ཙ་རེ.
༡༡༨༤. ‘‘ཀ་ཐཾ ཙ་རེ་ཡྻ ཝུ་ཌྜྷེ་སུ, ཀ་ཐཾ ས་མ་ཎ་བྲཱ་ཧྨ་ཎེ;
ཀ་ཐ་ཉྩ བ་ལ་ཀཱ་ཡ་སྨིཾ, ཀ་ཐཾ ཛ་ན་པ་དེ ཙ་རེ.
༡༡༨༥. ‘‘ཀ་ཐཾ དྷ་མྨཾ ཙ་རི་ཏྭཱ་ན, མ་ཙྩཱ ག་ཙྪ་ནྟི [པེ་ཙྩ ག་ཙྪ་ཏི (སཱི. སྱཱ. པཱི.)] སུ་གྒ་ཏིཾ;
ཀ་ཐ་ཉྩེ་ཀེ ཨ་དྷ་མྨ་ཊྛཱ, པ་ཏ་ནྟི ནི་ར་ཡཾ ཨ་ཐོ’’.
༡༡༨༦. ‘‘ཝེ་དེ་ཧ་སྶ ཝ་ཙོ སུ་ཏྭཱ, ཀ་སྶ་པོ ཨེ་ཏ་ད་བྲ་ཝི;
‘‘‘སུ་ཎོ་ཧི མེ མ་ཧཱ་རཱ་ཛ, ས་ཙྩཾ ཨ་ཝི་ཏ་ཐཾ པ་དཾ.
༡༡༨༧. ‘‘‘ན་ཏྠི དྷ་མྨ་ཙ་རི་ཏ་སྶ [དྷ་མྨ་སྶ ཙི་ཎྞ་སྶ (སཱི.)], ཕ་ལཾ ཀ་ལྱཱ་ཎ་པཱ་པ་ཀཾ;
ན་ཏྠི དེ་ཝ པ་རོ ལོ་ཀོ, ཀོ ཏ་ཏོ ཧི ཨི་དྷཱ་ག་ཏོ.
༡༡༨༨. ‘‘‘ན་ཏྠི དེ་ཝ པི་ཏ་རོ ཝཱ, ཀུ་ཏོ མཱ་ཏཱ ཀུ་ཏོ པི་ཏཱ;
ན་ཏྠི ཨཱ་ཙ་རི་ཡོ ནཱ་མ, ཨ་ད་ནྟཾ ཀོ ད་མེ་སྶ་ཏི.
༡༡༨༩. ‘‘‘ས་མ་ཏུ་ལྱཱ་ནི བྷཱུ་ཏཱ་ནི, ན་ཏྠི ཛེ་ཊྛཱ་པ་ཙཱ་ཡི་ཀཱ;
ན་ཏྠི བ་ལཾ ཝཱི་རི་ཡཾ ཝཱ, ཀུ་ཏོ ཨུ་ཊྛཱ་ན་པོ་རི་སཾ;
ནི་ཡ་ཏཱ་ནི ཧི བྷཱུ་ཏཱ་ནི, ཡ་ཐཱ གོ་ཊ་ཝི་སོ ཏ་ཐཱ.
༡༡༩༠. ‘‘‘ལ་དྡྷེ་ཡྻཾ ལ་བྷ་ཏེ མ་ཙྩོ, ཏ་ཏྠ དཱ་ན་ཕ་ལཾ ཀུ་ཏོ;
ན་ཏྠི དཱ་ན་ཕ་ལཾ དེ་ཝ, ཨ་ཝ་སོ དེ་ཝ་ཝཱི་རི་ཡོ.
༡༡༩༡. ‘‘‘བཱ་ལེ་ཧི དཱ་ནཾ པ་ཉྙ་ཏྟཾ, པ་ཎྜི་ཏེ་ཧི པ་ཊི་ཙྪི་ཏཾ;
ཨ་ཝ་སཱ དེ་ནྟི དྷཱི་རཱ་ནཾ, བཱ་ལཱ པ་ཎྜི་ཏ་མཱ་ནི་ནོ.
༡༡༩༢. ‘‘‘ས་ཏྟི་མེ ས་སྶ་ཏཱ ཀཱ་ཡཱ, ཨ་ཙྪེ་ཛྫཱ ཨ་ཝི་ཀོ་པི་ནོ;
ཏེ་ཛོ པ་ཐ་ཝཱི ཨཱ་པོ ཙ, ཝཱ་ཡོ སུ་ཁཾ དུ་ཁ་ཉྩི་མེ;
ཛཱི་ཝེ ཙ ས་ཏྟི་མེ ཀཱ་ཡཱ, ཡེ་སཾ ཚེ་ཏྟཱ ན ཝི་ཛྫ་ཏི.
༡༡༩༣. ‘‘‘ན་ཏྠི ཧ་ནྟཱ ཝ ཚེ་ཏྟཱ ཝཱ, ཧ་ཉྙེ ཡེ་ཝཱ་པི [ཧ་ཉྙ་རེ ཝཱ་པི (སཱི. སྱཱ. པཱི.)] ཀོ་ཙི ནཾ;
ཨ་ནྟ་རེ་ནེ་ཝ ཀཱ་ཡཱ་ནཾ, ས་ཏྠཱ་ནི ཝཱི་ཏི་ཝ་ཏྟ་རེ.
༡༡༩༤. ‘‘‘ཡོ ཙཱ་པི [ཡོ་པཱ་ཡཾ (སཱི. པཱི.), ཡོ ཙཱ་ཡཾ (སྱཱ. ཀ.)] སི་ར་མཱ་དཱ་ཡ, པ་རེ་སཾ ནི་སི་ཏཱ་སི་ནཱ;
ན སོ ཚི་ནྡ་ཏི ཏེ ཀཱ་ཡེ, ཏ་ཏྠ པཱ་པ་ཕ་ལཾ ཀུ་ཏོ.
༡༡༩༥. ‘‘‘ཙུ་ལླཱ་སཱི་ཏི་མ་ཧཱ་ཀ་པྤེ, ས་བྦེ སུ་ཛ྄ཛྷ་ནྟི སཾ་ས་རཾ;
ཨ་ནཱ་ག་ཏེ ཏ་མྷི ཀཱ་ལེ, ས་ཉྙ་ཏོ་པི ན སུ་ཛ྄ཛྷ་ཏི.
༡༡༩༦. ‘‘‘ཙ་རི་ཏྭཱ་པི བ་ཧུཾ བྷ་དྲཾ, ནེ་ཝ སུ་ཛ྄ཛྷ་ནྟི་ནཱ་ག་ཏེ;
པཱ་པ་ཉྩེ་པི བ་ཧུཾ ཀ་ཏྭཱ, ཏཾ ཁ་ཎཾ ནཱ་ཏི་ཝ་ཏྟ་རེ.
༡༡༩༧. ‘‘‘ཨ་ནུ་པུ་བྦེ་ན ནོ སུ་དྡྷི, ཀ་པྤཱ་ནཾ ཙུ་ལླ་སཱི་ཏི་ཡཱ;
ནི་ཡ་ཏིཾ ནཱ་ཏི་ཝ་ཏྟཱ་མ, ཝེ་ལ་ནྟ་མི་ཝ སཱ་ག་རོ’’’.
༡༡༩༨. ཀ་སྶ་པ་སྶ ཝ་ཙོ སུ་ཏྭཱ, ཨ་ལཱ་ཏོ ཨེ་ཏ་ད་བྲ་ཝི;
‘‘ཡ་ཐཱ བྷ་ད་ནྟོ བྷ་ཎ་ཏི, མ་ཡ྄ཧ་མྤེ་ཏཾ་ཝ རུ་ཙྩ་ཏི.
༡༡༩༩. ‘‘ཨ་ཧ་མྤི པུ་རི་མཾ ཛཱ་ཏིཾ, ས་རེ སཾ་ས་རི་ཏ་ཏྟ་ནོ;
པི་ངྒ་ལོ ནཱ་མ་ཧཾ ཨཱ་སིཾ, ལུ་དྡོ གོ་གྷཱ་ཏ་ཀོ པུ་རེ.
༡༢༠༠. ‘‘བཱ་རཱ་ཎ་སི་ཡཾ ཕཱི་ཏཱ་ཡཾ, བ་ཧུཾ པཱ་པཾ ཀ་ཏཾ མ་ཡཱ;
བ་ཧཱུ མ་ཡཱ ཧ་ཏཱ པཱ་ཎཱ, མ་ཧིཾ་སཱ སཱུ་ཀ་རཱ ཨ་ཛཱ.
༡༢༠༡. ‘‘ཏ་ཏོ ཙུ་ཏོ ཨི་དྷ ཛཱ་ཏོ, ཨི་དྡྷེ སེ་ནཱ་པ་ཏཱི་ཀུ་ལེ;
ན་ཏྠི ནཱུ་ན ཕ་ལཾ པཱ་པཾ, ཡོ་ཧཾ [པཱ་པེ སོ་ཧཾ (སཱི. པཱི.)] ན ནི་ར་ཡཾ ག་ཏོ.
༡༢༠༢. ཨ་ཐེ་ཏྠ བཱི་ཛ་ཀོ ནཱ་མ, དཱ་སོ ཨཱ་སི པ་ཊ་ཙྩ་རཱི [པ་ལ༹་ཙྩ་རཱི (སཱི. པཱི.), པ་ཊ་ཛྫ་རཱི (ཀ.)];
ཨུ་པོ་ས་ཐཾ ཨུ་པ་ཝ་ས་ནྟོ, གུ་ཎ་ས་ནྟི་ཀུ་པཱ་ག་མི.
༡༢༠༣. ཀ་སྶ་པ་སྶ ཝ་ཙོ སུ་ཏྭཱ, ཨ་ལཱ་ཏ་སྶ ཙ བྷཱ་སི་ཏཾ;
པ་སྶ་ས་ནྟོ མུ་ཧུཾ ཨུ་ཎྷཾ, རུ་དཾ ཨ་སྶཱུ་ནི ཝ་ཏྟ་ཡི.
༡༢༠༤. ཏ་མ་ནུ་པུ་ཙྪི ཝེ་དེ་ཧོ, ‘‘ཀི་མ་ཏྠཾ ས་མྨ རོ་ད་སི;
ཀིཾ ཏེ སུ་ཏཾ ཝཱ དི་ཊྛཾ ཝཱ, ཀིཾ མཾ ཝེ་དེ་སི ཝེ་ད་ནཾ’’.
༡༢༠༥. ཝེ་དེ་ཧ་སྶ ཝ་ཙོ སུ་ཏྭཱ, བཱི་ཛ་ཀོ ཨེ་ཏ་ད་བྲ་ཝི;
‘‘ན་ཏྠི མེ ཝེ་ད་ནཱ དུ་ཀྑཱ, མ་ཧཱ་རཱ་ཛ སུ་ཎོ་ཧི མེ.
༡༢༠༦. ‘‘ཨ་ཧ་མྤི པུ་རི་མཾ ཛཱ་ཏིཾ, ས་རཱ་མི སུ་ཁ་མ་ཏྟ་ནོ;
སཱ་ཀེ་ཏཱ་ཧཾ པུ་རེ ཨཱ་སིཾ, བྷཱ་ཝ་སེ་ཊྛི གུ་ཎེ ར་ཏོ.
༡༢༠༧. ‘‘ས་མྨ་ཏོ བྲཱ་ཧྨ་ཎི་བྦྷཱ་ནཾ, སཾ་ཝི་བྷཱ་ག་ར་ཏོ སུ་ཙི;
ན ཙཱ་པི པཱ་པ་ཀཾ ཀ་མྨཾ, ས་རཱ་མི ཀ་ཏ་མ་ཏྟ་ནོ.
༡༢༠༨. ‘‘ཏ་ཏོ ཙུ་ཏཱ་ཧཾ ཝེ་དེ་ཧ, ཨི་དྷ ཛཱ་ཏོ དུ་རི་ཏྠི་ཡཱ;
ག་བྦྷ་མྷི ཀུ་མྦྷ་དཱ་སི་ཡཱ, ཡ་ཏོ ཛཱ་ཏོ སུ་དུ་གྒ་ཏོ.
༡༢༠༩. ‘‘ཨེ་ཝ་མྤི དུ་གྒ་ཏོ ས་ནྟོ, ས་མ་ཙ་རི་ཡཾ ཨ་དྷི་ཊྛི་ཏོ;
ཨུ་པ་ཌྜྷ་བྷཱ་གཾ བྷ་ཏྟ་སྶ, ད་དཱ་མི ཡོ མེ ཨི་ཙྪ་ཏི.
༡༢༡༠. ‘‘ཙཱ་ཏུ་དྡ་སིཾ པ་ཉྩ་ད་སིཾ, ས་དཱ ཨུ་པ་ཝ་སཱ་མ་ཧཾ;
ན ཙཱ་པི [ན ཨ་ཧཾ (ཀ.)] བྷཱུ་ཏེ ཧིཾ་སཱ་མི, ཐེ་ཡྻ་ཉྩཱ་པི ཝི་ཝ་ཛྫ་ཡིཾ.
༡༢༡༡. ‘‘ས་བྦ་མེ་ཝ ཧི ནཱུ་ནེ་ཏཾ, སུ་ཙི་ཎྞཾ བྷ་ཝ་ཏི ནི་པྥ་ལཾ;
ནི་ར་ཏྠཾ མ་ཉྙི་དཾ སཱི་ལཾ, ཨ་ལཱ་ཏོ བྷཱ་ས་ཏཱི ཡ་ཐཱ.
༡༢༡༢. ‘‘ཀ་ལི་མེ་ཝ ནཱུ་ན ག་ཎྷཱ་མི, ཨ་སི་པྤོ དྷུ་ཏྟ་ཀོ ཡ་ཐཱ;
ཀ་ཊཾ ཨ་ལཱ་ཏོ ག་ཎྷཱ་ཏི, ཀི་ཏ་ཝོ་སི་ཀྑི་ཏོ ཡ་ཐཱ.
༡༢༡༣. ‘‘དྭཱ་རཾ ན་པྤ་ཊི་པ་སྶཱ་མི, ཡེ་ན ག་ཙྪཱ་མི སུ་གྒ་ཏིཾ;
ཏ་སྨཱ རཱ་ཛ པ་རོ་དཱ་མི, སུ་ཏྭཱ ཀ་སྶ་པ་བྷཱ་སི་ཏཾ’’.
༡༢༡༤. བཱི་ཛ་ཀ་སྶ ཝ་ཙོ སུ་ཏྭཱ, རཱ་ཛཱ ཨ་ངྒ་ཏི མ་བྲ་ཝི;
‘‘ན་ཏྠི དྭཱ་རཾ སུ་ག་ཏི་ཡཱ, ནི་ཡ་ཏིཾ [ནི་ཡ་ཏཾ (སྱཱ.)] ཀ་ངྑ བཱི་ཛ་ཀ.
༡༢༡༥. ‘‘སུ་ཁཾ ཝཱ ཡ་དི ཝཱ དུ་ཀྑཾ, ནི་ཡ་ཏི་ཡཱ ཀི་ར ལ་བྦྷ་ཏི;
སཾ་སཱ་ར་སུ་དྡྷི ས་བྦེ་སཾ, མཱ ཏུ་རི་ཏྠོ [ཏུ་རི་ཏོ (སྱཱ.)] ཨ་ནཱ་ག་ཏེ.
༡༢༡༦. ‘‘ཨ་ཧ་མྤི པུ་བྦེ ཀ་ལྱཱ་ཎོ, བྲཱ་ཧྨ་ཎི་བྦྷེ་སུ བྱཱ་ཝ་ཊོ [ཝཱ་ཝ་ཊོ (ཀ.)];
ཝོ་ཧཱ་ར་མ་ནུ་སཱ་ས་ནྟོ, ར་ཏི་ཧཱི་ནོ ཏ་ད་ནྟ་རཱ’’.
༡༢༡༧. ‘‘པུ་ན་པི བྷ་ནྟེ ད་ཀྑེ་མུ, ས་ངྒ་ཏི ཙེ བྷ་ཝི་སྶ་ཏི’’;
ཨི་དཾ ཝ་ཏྭཱ་ན ཝེ་དེ་ཧོ, པ་ཙྩ་གཱ ས་ནི་ཝེ་ས་ནཾ.
༡༢༡༨. ཏ་ཏོ ར་ཏྱཱ ཝི་ཝ་སཱ་ནེ, ཨུ་པ་ཊྛཱ་ན་མྷི ཨ་ངྒ་ཏི;
ཨ་མ་ཙྩེ ས་ནྣི་པཱ་ཏེ་ཏྭཱ, ཨི་དཾ ཝ་ཙ་ན་མ་བྲ་ཝི.
༡༢༡༩. ‘‘ཙ་ནྡ་ཀེ མེ ཝི་མཱ་ན་སྨིཾ, ས་དཱ ཀཱ་མེ ཝི་དྷེ་ནྟུ མེ;
མཱ ཨུ་པ་ག་ཙྪུཾ ཨ་ཏྠེ་སུ, གུ་ཡ྄ཧ་པྤ་ཀཱ་སི་ཡེ་སུ ཙ.
༡༢༢༠. ‘‘ཝི་ཛ་ཡོ ཙ སུ་ནཱ་མོ ཙ, སེ་ནཱ་པ་ཏི ཨ་ལཱ་ཏ་ཀོ;
ཨེ་ཏེ ཨ་ཏྠེ ནི་སཱི་ད་ནྟུ, ཝོ་ཧཱ་ར་ཀུ་ས་ལཱ ཏ་ཡོ’’.
༡༢༢༡. ཨི་དཾ ཝ་ཏྭཱ་ན ཝེ་དེ་ཧོ, ཀཱ་མེ་ཝ བ་ཧུ་མ་ཉྙ་ཐ;
ན ཙཱ་པི བྲཱ་ཧྨ་ཎི་བྦྷེ་སུ, ཨ་ཏྠེ ཀི་སྨི་ཉྩི བྱཱ་ཝ་ཊོ.
༡༢༢༢. ཏ་ཏོ དྭེ་ས་ཏྟ་ར་ཏྟ་སྶ, ཝེ་དེ་ཧ་སྶ་ཏྲ་ཛཱ པི་ཡཱ;
རཱ་ཛ་ཀ་ཉྙཱ རུ་ཙཱ [རུ་ཛཱ (སཱི. པཱི.) ཨེ་ཝ་མུ་པ་རི་པི] ནཱ་མ, དྷཱ་ཏི་མཱ་ཏ་ར་མ་བྲ་ཝི.
༡༢༢༣. ‘ཨ་ལ་ངྐ་རོ་ཐ མཾ ཁི་པྤཾ, ས་ཁི་ཡོ ཙཱ་ལ་ངྐ་རོ་ནྟུ [ཙ ཀ་རོ་ནྟུ (སཱི. པཱི.)] མེ;
སུ་ཝེ པ་ནྣ་ར་སོ དི་བྱོ, ག་ཙྪཾ ཨི་སྶ་ར་ས་ནྟི་ཀེ’ [པི་ཏུ་སྶ ས་ནྟི་ཀེ (སྱཱ.)].
༡༢༢༤. ཏ་སྶཱ མཱ་ལྱཾ ཨ་བྷི་ཧ་རིཾ་སུ, ཙ་ནྡ་ན་ཉྩ མ་ཧཱ་ར་ཧཾ;
མ་ཎི་ས་ངྑ་མུ་ཏྟཱ་ར་ཏ་ནཾ, ནཱ་ནཱ་ར་ཏྟེ ཙ ཨ་མྦ་རེ.