༥༤༣. བྷཱུ་རི་ད་ཏྟ་ཛཱ་ཏ་ཀཾ (༦)
༧༨༤. ‘‘ཡཾ ཀི་ཉྩི ར་ཏ་ནཾ ཨ་ཏྠི, དྷ་ཏ་ར་ཊྛ་ནི་ཝེ་ས་ནེ;
ས་བྦཱ་ནི ཏེ ཨུ་པ་ཡ་ནྟུ, དྷཱི་ཏ་རཾ དེ་ཧི རཱ་ཛི་ནོ’’.
༧༨༥. ‘‘ན ནོ ཝི་ཝཱ་ཧོ ནཱ་གེ་ཧི, ཀ་ཏ་པུ་བྦོ ཀུ་དཱ་ཙ་ནཾ;
ཏཾ ཝི་ཝཱ་ཧཾ ཨ་སཾ་ཡུ་ཏྟཾ, ཀ་ཐཾ ཨ་མྷེ ཀ་རོ་མ་སེ’’.
༧༨༦. ‘‘ཛཱི་ཝི་ཏཾ ནཱུ་ན ཏེ ཙ་ཏྟཾ, ར་ཊྛཾ ཝཱ མ་ནུ་ཛཱ་དྷི་པ;
ན ཧི ནཱ་གེ ཀུ་པི་ཏ་མྷི, ཙི་རཾ ཛཱི་ཝ་ནྟི ཏཱ་དི་སཱ.
༧༨༧. ‘‘ཡོ ཏྭཾ དེ་ཝ མ་ནུ་སྶོ་སི, ཨི་དྡྷི་མ་ནྟཾ ཨ་ནི་དྡྷི་མཱ;
ཝ་རུ་ཎ་སྶ ནི་ཡཾ པུ་ཏྟཾ, ཡཱ་མུ་ནཾ ཨ་ཏི་མ་ཉྙ་སི’’.
༧༨༨. ‘‘ནཱ་ཏི་མ་ཉྙཱ་མི རཱ་ཛཱ་ནཾ, དྷ་ཏ་ར་ཊྛཾ ཡ་ས་སྶི་ནཾ;
དྷ་ཏ་ར་ཊྛོ ཧི ནཱ་གཱ་ནཾ, བ་ཧཱུ་ན་མ་པི ཨི་སྶ་རོ.
༧༨༩. ‘‘ཨ་ཧི མ་ཧཱ་ནུ་བྷཱ་ཝོ་པི, ན མེ དྷཱི་ཏ་ར་མཱ་ར་ཧོ;
ཁ་ཏྟི་ཡོ ཙ ཝི་དེ་ཧཱ་ནཾ, ཨ་བྷི་ཛཱ་ཏཱ ས་མུ་དྡ་ཛཱ’’.
༧༩༠. ‘‘ཀ་མྦ་ལ་སྶ་ཏ་རཱ ཨུ་ཊྛེ་ནྟུ, ས་བྦེ ནཱ་གེ ནི་ཝེ་ད་ཡ;
བཱ་རཱ་ཎ་སིཾ པ་ཝ་ཛྫ་ནྟུ, མཱ ཙ ཀ་ཉྩི [ཀི་ཉྩི (སཱི. པཱི. ཀ.)] ཝི་ཧེ་ཋ་ཡུཾ’’.
༧༩༡. ‘‘ནི་ཝེ་ས་ནེ་སུ སོ་བྦྷེ་སུ, ར་ཐི་ཡཱ ཙ་ཙྩ་རེ་སུ ཙ;
རུ་ཀྑ་གྒེ་སུ ཙ ལ་མྦ་ནྟུ, ཝི་ཏ་ཏཱ ཏོ་ར་ཎེ་སུ ཙ.
༧༩༢. ‘‘ཨ་ཧ་མྤི ས་བྦ་སེ་ཏེ་ན, མ་ཧ་ཏཱ སུ་མ་ཧཾ པུ་རཾ;
པ་རི་ཀྑི་པི་སྶཾ བྷོ་གེ་ཧི, ཀཱ་སཱི་ནཾ ཛ་ན་ཡཾ བྷ་ཡཾ’’.
༧༩༣. ཏ་སྶ ཏཾ ཝ་ཙ་ནཾ སུ་ཏྭཱ, ཨུ་ར་གཱ་ནེ་ཀ་ཝ་ཎྞི་ནོ;
བཱ་རཱ་ཎ་སིཾ པ་ཝ་ཛྫིཾ་སུ, ན ཙ ཀ་ཉྩི ཝི་ཧེ་ཋ་ཡུཾ.
༧༩༤. ནི་ཝེ་ས་ནེ་སུ སོ་བྦྷེ་སུ, ར་ཐི་ཡཱ ཙ་ཙྩ་རེ་སུ ཙ;
རུ་ཀྑ་གྒེ་སུ ཙ ལ་མྦིཾ་སུ, ཝི་ཏ་ཏཱ ཏོ་ར་ཎེ་སུ ཙ.
༧༩༥. ཏེ་སུ དི་སྭཱ་ན ལ་མྦ་ནྟེ, པུ་ཐཱུ ཀ་ནྡིཾ་སུ ནཱ་རི་ཡོ;
ནཱ་གེ སོ་ཎྜི་ཀ་ཏེ དི་སྭཱ, པ་སྶ་ས་ནྟེ མུ་ཧུཾ མུ་ཧུཾ.
༧༩༦. བཱ་རཱ་ཎ་སཱི པ་བྱ་དྷི་ཏཱ, ཨཱ་ཏུ་རཱ ས་མ་པ་ཛྫ་ཐ;
བཱ་ཧཱ པ་གྒ་ཡ྄ཧ པ་ཀྐ་ནྡུཾ, ‘‘དྷཱི་ཏ་རཾ དེ་ཧི རཱ་ཛི་ནོ’’.
༧༩༧. ‘‘པུ་པྥཱ་བྷི་ཧཱ་ར་སྶ ཝ་ན་སྶ མ་ཛ྄ཛྷེ, ཀོ ལོ་ཧི་ཏ་ཀྑོ ཝི་ཏ་ཏ་ནྟ་རཾ་སོ;
ཀཱ ཀ་མྦུ་ཀཱ་ཡཱུ་ར་དྷ་རཱ སུ་ཝ་ཏྠཱ, ཏི་ཊྛ་ནྟི ནཱ་རི་ཡོ ད་ས ཝ་ནྡ་མཱ་ནཱ.
༧༩༨. ‘‘ཀོ ཏྭཾ བྲ་ཧཱ་བཱ་ཧུ ཝ་ན་སྶ མ་ཛ྄ཛྷེ, ཝི་རོ་ཙ་སི གྷ་ཏ་སི་ཏྟོ་ཝ ཨ་གྒི;
མ་ཧེ་ས་ཀྑོ ཨ་ཉྙ་ཏ་རོ་སི ཡ་ཀྑོ, ཨུ་དཱ་ཧུ ནཱ་གོ་སི མ་ཧཱ་ནུ་བྷཱ་ཝོ’’.
༧༩༩. ‘‘ནཱ་གོ་ཧ་མ་སྨི ཨི་དྡྷི་མཱ, ཏེ་ཛ་སྶཱི [ཏེ་ཛ་སཱི (སཱི. སྱཱ. པཱི. ཀ.)] དུ་ར་ཏི་ཀྐ་མོ;
ཌཾ་སེ་ཡྻཾ ཏེ་ཛ་སཱ ཀུ་དྡྷོ, ཕཱི་ཏཾ ཛ་ན་པ་དཾ ཨ་པི.
༨༠༠. ‘‘ས་མུ་དྡ་ཛཱ ཧི མེ མཱ་ཏཱ, དྷ་ཏ་ར་ཊྛོ ཙ མེ པི་ཏཱ;
སུ་ད་སྶ་ན་ཀ་ནི་ཊྛོ་སྨི, བྷཱུ་རི་ད་ཏྟོ་ཏི མཾ ཝི་དཱུ’’.
༨༠༡. ‘‘ཡཾ ག་མྦྷཱི་རཾ ས་དཱ་ཝ་ཊྚཾ, ར་ཧ་དཾ བྷི་སྨཾ པེ་ཀྑ་སི;
ཨེ་ས དི་བྱོ མ་མཱ་ཝཱ་སོ, ཨ་ནེ་ཀ་ས་ཏ་པོ་རི་སོ.
༨༠༢. ‘‘མ་ཡཱུ་ར་ཀོ་ཉྩཱ་བྷི་རུ་དཾ, ནཱི་ལོ་དཾ ཝ་ན་མ་ཛ྄ཛྷ་ཏོ;
ཡ་མུ་ནཾ པ་ཝི་ས མཱ བྷཱི་ཏོ, ཁེ་མཾ ཝ་ཏྟ་ཝ་ཏཾ [ཝ་ཏྟ་ཝ་ཏིཾ (སྱཱ. ཀ.)] སི་ཝཾ’’.
༨༠༣. ‘‘ཏ་ཏྠ པ་ཏྟོ སཱ་ནུ་ཙ་རོ, ས་ཧ པུ་ཏྟེ་ན བྲཱ་ཧྨ་ཎ;
པཱུ་ཛི་ཏོ མ་ཡ྄ཧཾ ཀཱ་མེ་ཧི, སུ་ཁཾ བྲཱ་ཧྨ་ཎ ཝ་ཙྪ་སི’’.
༨༠༤. ‘‘ས་མཱ ས་མ་ནྟ་པ་རི་ཏོ, པ་ཧཱུ་ཏ་ཏ་ག་རཱ [བ་ཧུ་ཀཱ ཏ་གྒ་རཱ (སཱི. སྱཱ. པཱི.)] མ་ཧཱི;
ཨི་ནྡ་གོ་པ་ཀ་ས་ཉྪ་ནྣཱ, སོ་བྷ་ཏི ཧ་རི་ཏུ་ཏྟ་མཱ.
༨༠༥. ‘‘ར་མྨཱ་ནི ཝ་ན་ཙེ་ཏྱཱ་ནི, ར་མྨཱ ཧཾ་སཱུ་པ་ཀཱུ་ཛི་ཏཱ;
ཨོ་པུ་པྥཱ་པ་དྨཱ ཏི་ཊྛ་ནྟི, པོ་ཀྑ་ར་ཉྙོ [པོ་ཀྑ་ར་ཉྙཱ (སྱཱ. པཱི.)] སུ་ནི་མྨི་ཏཱ.
༨༠༦. ‘‘ཨ་ཊྛཾ་སཱ སུ་ཀ་ཏཱ ཐ་མྦྷཱ, ས་བྦེ ཝེ་ལུ༹་རི་ཡཱ་མ་ཡཱ;
ས་ཧ་སྶ་ཐ་མྦྷཱ པཱ་སཱ་དཱ, པཱུ་རཱ ཀ་ཉྙཱ་ཧི ཛོ་ཏ་རེ.
༨༠༧. ‘‘ཝི་མཱ་ནཾ ཨུ་པ་པ་ནྣོ་སི, དི་བྱཾ པུ་ཉྙེ་ཧི ཨ་ཏྟ་ནོ;
ཨ་ས་མྦཱ་དྷཾ སི་ཝཾ ར་མྨཾ, ཨ་ཙྩ་ནྟ་སུ་ཁ་སཾ་ཧི་ཏཾ.
༨༠༨. ‘‘མ་ཉྙེ ས་ཧ་སྶ་ནེ་ཏྟ་སྶ, ཝི་མཱ་ནཾ ནཱ་བྷི་ཀ་ངྑ་སི;
ཨི་དྡྷཱི ཧི ཏྱཱ་ཡཾ ཝི་པུ་ལཱ, ས་ཀྐ་སྶེ་ཝ ཛུ་ཏཱི་མ་ཏོ’’.
༨༠༩. ‘‘མ་ན་སཱ་པི ན པ་ཏྟ་བྦོ, ཨཱ་ནུ་བྷཱ་ཝོ ཛུ་ཏཱི་མ་ཏོ;
པ་རི་ཙཱ་ར་ཡ་མཱ་ནཱ་ནཾ, ས་ཨི་ནྡཱ་ནཾ [ཨི་ནྡཱ་ནཾ (སྱཱ. ཀ.)] ཝ་ས་ཝ་ཏྟི་ནཾ’’.
༨༡༠. ‘‘ཏཾ ཝི་མཱ་ནཾ ཨ་བྷི་ཛ྄ཛྷཱ་ཡ, ཨ་མ་རཱ་ནཾ སུ་ཁེ་སི་ནཾ;
ཨུ་པོ་ས་ཐཾ ཨུ་པ་ཝ་ས་ནྟོ, སེ་མི ཝ་མྨི་ཀ་མུ་དྡྷ་ནི’’.
༨༡༡. ‘‘ཨ་ཧ་ཉྩ མི་ག་མེ་སཱ་ནོ, ས་པུ་ཏྟོ པཱ་ཝི་སིཾ ཝ་ནཾ;
ཏཾ མཾ མ་ཏཾ ཝཱ ཛཱི་ཝཾ ཝཱ, ནཱ་བྷི་ཝེ་དེ་ནྟི ཉཱ་ཏ་ཀཱ.
༨༡༢. ‘‘ཨཱ་མ་ནྟ་ཡེ བྷཱུ་རི་ད་ཏྟཾ, ཀཱ་སི་པུ་ཏྟཾ ཡ་ས་སྶི་ནཾ;
ཏ་ཡཱ ནོ ས་མ་ནུ་ཉྙཱ་ཏཱ, ཨ་པི པ་སྶེ་མུ ཉཱ་ཏ་ཀེ’’.
༨༡༣. ‘‘ཨེ་སོ ཧི ཝ་ཏ མེ ཚ་ནྡོ, ཡཾ ཝ་སེ་སི མ་མ་ནྟི་ཀེ;
ན ཧི ཨེ་ཏཱ་དི་སཱ ཀཱ་མཱ, སུ་ལ་བྷཱ ཧོ་ནྟི མཱ་ནུ་སེ.
༨༡༤. ‘‘ས་ཙེ ཏྭཾ ནི་ཙྪ་སེ ཝ་ཏྠུཾ, མ་མ ཀཱ་མེ་ཧི པཱུ་ཛི་ཏོ;
མ་ཡཱ ཏྭཾ ས་མ་ནུ་ཉྙཱ་ཏོ, སོ་ཏྠིཾ པ་སྶཱ་ཧི ཉཱ་ཏ་ཀེ’’.
༨༡༥. ‘‘དྷཱ་ར་ཡི་མཾ མ་ཎིཾ དི་བྱཾ, པ་སུཾ པུ་ཏྟེ ཙ ཝི་ནྡ་ཏི;
ཨ་རོ་གོ སུ་ཁི་ཏོ ཧོ་ཏི [ཧོ་ཧི (སྱཱ.)], ག་ཙྪེ་ཝཱ་དཱ་ཡ བྲཱ་ཧྨ་ཎ’’.
༨༡༦. ‘‘ཀུ་ས་ལཾ པ་ཊི་ན་ནྡཱ་མི, བྷཱུ་རི་ད་ཏྟ ཝ་ཙོ ཏ་ཝ;
པ་བྦ་ཛི་སྶཱ་མི ཛི་ཎྞོ་སྨི, ན ཀཱ་མེ ཨ་བྷི་པ་ཏྠ་ཡེ’’.
༨༡༧. ‘‘བྲ་ཧྨ་ཙ་རི་ཡ་སྶ ཙེ བྷ་ངྒོ, ཧོ་ཏི བྷོ་གེ་ཧི ཀཱ་རི་ཡཾ;
ཨ་ཝི་ཀ་མྤ་མཱ་ནོ ཨེ་ཡྻཱ་སི, བ་ཧུཾ ད་སྶཱ་མི ཏེ དྷ་ནཾ’’.
༨༡༨. ‘‘ཀུ་ས་ལཾ པ་ཊི་ན་ནྡཱ་མི, བྷཱུ་རི་ད་ཏྟ ཝ་ཙོ ཏ་ཝ;
པུ་ན་པི ཨཱ་ག་མི་སྶཱ་མི, ས་ཙེ ཨ་ཏྠོ བྷ་ཝི་སྶ་ཏི’’.
༨༡༩. ‘‘ཨི་དཾ ཝ་ཏྭཱ བྷཱུ་རི་ད་ཏྟོ, པེ་སེ་སི ཙ་ཏུ་རོ ཛ་ནེ;
ཨེ་ཐ ག་ཙྪ་ཐ ཨུ་ཊྛེ་ཐ, ཁི་པྤཾ པཱ་པེ་ཐ བྲཱ་ཧྨ་ཎཾ.
༨༢༠. ཏ་སྶ ཏཾ ཝ་ཙ་ནཾ སུ་ཏྭཱ, ཨུ་ཊྛཱ་ཡ ཙ་ཏུ་རོ ཛ་ནཱ;
པེ་སི་ཏཱ བྷཱུ་རི་ད་ཏྟེ་ན, ཁི་པྤཾ པཱ་པེ་སུ བྲཱ་ཧྨ་ཎཾ.
༨༢༡. ‘‘མ་ཎིཾ པ་གྒ་ཡ྄ཧ མ་ངྒ་ལྱཾ, སཱ་དྷུ་ཝི་ཏྟཾ [སཱ་དྷུ་ཙི་ཏྟཾ (པཱི.)] མ་ནོ་ར་མཾ;
སེ་ལཾ བྱ་ཉྫ་ན་ས་མྤ་ནྣཾ, ཀོ ཨི་མཾ མ་ཎི་མ་ཛ྄ཛྷ་གཱ’’.
༨༢༢. ‘‘ལོ་ཧི་ཏ་ཀྑ་ས་ཧ་སྶཱ་ཧི, ས་མ་ནྟཱ པ་རི་ཝཱ་རི་ཏཾ;
ཨ་ཛྫ ཀཱ་ལཾ པ་ཐཾ [པ་དཾ (སཱི. པཱི.)] ག་ཙྪཾ, ཨ་ཛ྄ཛྷ་གཱ་ཧཾ མ་ཎིཾ ཨི་མཾ’’.
༨༢༣. ‘‘སུ་པ་ཙི་ཎྞོ ཨ་ཡཾ སེ་ལོ, ཨ་ཙྩི་ཏོ མ་ཧི་ཏོ [མཱ་ནི་ཏོ (ཀ.)] ས་དཱ;
སུ་དྷཱ་རི་ཏོ སུ་ནི་ཀྑི་ཏྟོ, ས་བྦ་ཏྠ་མ་བྷི་སཱ་དྷ་ཡེ.
༨༢༤. ‘‘ཨུ་པ་ཙཱ་ར་ཝི་པ་ནྣ་སྶ, ནི་ཀྑེ་པེ དྷཱ་ར་ཎཱ་ཡ ཝཱ;
ཨ་ཡཾ སེ་ལོ ཝི་ནཱ་སཱ་ཡ, པ་རི་ཙི་ཎྞོ ཨ་ཡོ་ནི་སོ.
༨༢༥. ‘‘ན ཨི་མཾ ཨ་ཀུ་ས་ལོ [ཀུ་ས་ལཾ (ཀ.)] དི་བྱཾ, མ་ཎིཾ དྷཱ་རེ་ཏུ་མཱ་ར་ཧོ;
པ་ཊི་པ་ཛྫ ས་ཏཾ ནི་ཀྑཾ, དེ་ཧི་མཾ ར་ཏ་ནཾ མ་མ’’.
༨༢༦. ‘‘ན ཙ མྱཱ་ཡཾ མ་ཎཱི ཀེ་ཡྻོ, གོ་ཧི [ཀེ་ཧི (ཀ.)] ཝཱ ར་ཏ་ནེ་ཧི ཝཱ;
སེ་ལོ བྱ་ཉྫ་ན་ས་མྤ་ནྣོ, ནེ་ཝ ཀེ་ཡྻོ མ་ཎཱི མ་མ’’.
༨༢༧. ‘‘ནོ ཙེ ཏ་ཡཱ མ་ཎཱི ཀེ་ཡྻོ, གོ་ཧི [ཀེ་ཧི (ཀ.)] ཝཱ ར་ཏ་ནེ་ཧི ཝཱ;
ཨ་ཐ ཀེ་ན མ་ཎཱི ཀེ་ཡྻོ, ཏཾ མེ ཨ་ཀྑཱ་ཧི པུ་ཙྪི་ཏོ’’.
༨༢༨. ‘‘ཡོ མེ སཾ་སེ མ་ཧཱ་ནཱ་གཾ, ཏེ་ཛ་སྶིཾ དུ་ར་ཏི་ཀྐ་མཾ;
ཏ་སྶ ད་ཛྫཾ ཨི་མཾ སེ་ལཾ, ཛ་ལ་ནྟ་མི་ཝ ཏེ་ཛ་སཱ’’.
༨༢༩. ‘‘ཀོ ནུ བྲཱ་ཧྨ་ཎ་ཝ་ཎྞེ་ན, སུ་པ་ཎྞོ པ་ཏ་ཏཾ ཝ་རོ;
ནཱ་གཾ ཛི་གཱི་ས་མ་ནྭེ་སི, ཨ་ནྭེ་སཾ བྷ་ཀྑ་མ་ཏྟ་ནོ.
༨༣༠. ‘‘ནཱ་ཧཾ དི་ཛཱ་དྷི་པོ ཧོ་མི, ན དི་ཊྛོ ག་རུ་ལོ༹ མ་ཡཱ;
ཨཱ་སཱི་ཝི་སེ་ན ཝི་ཏྟོ་ཏི [ཝི་ཏྟོ་སྨི (སྱཱ. ཀ.)], ཝ་ཛྫོ བྲཱ་ཧྨ་ཎ མཾ ཝི་དཱུ’’.
༨༣༡. ‘‘ཀིཾ ནུ ཏུ་ཡ྄ཧཾ བ་ལཾ ཨ་ཏྠི, ཀིཾ སི་པྤཾ ཝི་ཛྫ་ཏེ ཏ་ཝ;
ཀི་སྨིཾ ཝཱ ཏྭཾ པ་ར་ཏྠ་དྡྷོ, ཨུ་ར་གཾ ནཱ་པ་ཙཱ་ཡ་སི’’.
༨༣༢. ‘‘ཨཱ་ར་ཉྙི་ཀ་སྶ ཨི་སི་ནོ, ཙི་ར་ར་ཏྟཾ ཏ་པ་སྶི་ནོ;
སུ་པ་ཎྞོ ཀོ་སི་ཡ་སྶ་ཀྑཱ, ཝི་ས་ཝི་ཛྫཾ ཨ་ནུ་ཏྟ་རཾ.
༨༣༣. ‘‘ཏཾ བྷཱ་ཝི་ཏ་ཏྟ་ཉྙ་ཏ་རཾ, ས་མྨ་ནྟཾ པ་བྦ་ཏ་ནྟ་རེ;
ས་ཀྐ་ཙྩཾ ཏཾ ཨུ་པ་ཊྛཱ་སིཾ, ར་ཏྟི་ནྡི་ཝ་མ་ཏ་ནྡི་ཏོ.
༨༣༤. ‘‘སོ ཏ་དཱ པ་རི་ཙི་ཎྞོ མེ, ཝ་ཏྟ་ཝཱ བྲ་ཧྨ་ཙ་རི་ཡ་ཝཱ;
དི་བྦཾ པཱ་ཏུ་ཀ་རཱི མ་ནྟཾ, ཀཱ་མ་སཱ བྷ་ག་ཝཱ མ་མ.
༨༣༥. ‘‘ཏྱཱ་ཧཾ མ་ནྟེ པ་ར་ཏྠ་དྡྷོ, ནཱ་ཧཾ བྷཱ་ཡཱ་མི བྷོ་གི་ནཾ;
ཨཱ་ཙ་རི་ཡོ ཝི་ས་གྷཱ་ཏཱ་ནཾ, ཨ་ལ་མྤཱ་ནོ་ཏི [ཨཱ་ལ་མྦཱ་ནོ་ཏི (སཱི. པཱི.), ཨཱ་ལ་མྦཱ་ཡ་ནོ་ཏི (སྱཱ.)] མཾ ཝི་དཱུ’’.
༨༣༦. ‘‘ག་ཎྷཱ་མ་སེ མ་ཎིཾ ཏཱ་ཏ, སོ་མ་ད་ཏྟ ཝི་ཛཱ་ན་ཧི;
མཱ ད་ཎྜེ་ན སི་རིཾ པ་ཏྟཾ, ཀཱ་མ་སཱ པ་ཛ་ཧི་མྷ་སེ’’.
༨༣༧. ‘‘ས་ཀཾ ནི་ཝེ་ས་ནཾ པ་ཏྟཾ, ཡོ ཏཾ བྲཱ་ཧྨ་ཎ པཱུ་ཛ་ཡི;
ཨེ་ཝཾ ཀ་ལྱཱ་ཎ་ཀཱ་རི་སྶ, ཀིཾ མོ་ཧཱ དུ་བྦྷི་མི་ཙྪ་སི’’.
༨༣༨. ‘‘ས་ཙེ ཏྭཾ [ས་ཙེ ཧི (སཱི. པཱི. ཀ.)] དྷ་ན་ཀཱ་མོ་སི, བྷཱུ་རི་ད་ཏྟོ པ་ད་སྶ་ཏི [བྷཱུ་རི་ད་ཏྟཾ པ་དི་སྶ་སི (ཀ.)];
ཏ་མེ་ཝ ག་ནྟྭཱ ཡཱ་ཙ་སྶུ, བ་ཧུཾ ད་སྶ་ཏི ཏེ དྷ་ནཾ’’.
༨༣༩. ‘‘ཧ་ཏྠ་ག་ཏཾ པ་ཏྟ་ག་ཏཾ, ནི་ཀི་ཎྞཾ ཁཱ་དི་ཏུཾ ཝ་རཾ;
མཱ ནོ ས་ནྡི་ཊྛི་ཀོ ཨ་ཏྠོ, སོ་མ་ད་ཏྟ ཨུ་པ་ཙྩ་གཱ’’.
༨༤༠. ‘‘པ་ཙྩ་ཏི ནི་ར་ཡེ གྷོ་རེ, མ་ཧི་སྶ་མ་པི ཝི་ཝ་ར་ཏི [མ་ཧི་སྶ་མ་ཝ དཱི་ཡ་ཏི (སཱི. པཱི.), མ་ཧི་མ་སྶ ཝི་ནྡྲཱི་ཡ་ཏི (སྱཱ.)];
མི་ཏྟ་དུ་བྦྷཱི ཧི་ཏ་ཙྩཱ་གཱི, ཛཱི་ཝ་རེ་ཝཱ་པི སུ་སྶ་ཏི [ཛཱི་ཝ་རེ ཙཱ་པི སུ་སྶ་རེ (སཱི. པཱི.)].
༨༤༡. ‘‘ས་ཙེ ཏྭཾ [ས་ཙེ ཧི (སཱི. པཱི. ཀ.)] དྷ་ན་ཀཱ་མོ་སི, བྷཱུ་རི་ད་ཏྟོ པ་ད་སྶ་ཏི;
མ་ཉྙེ ཨ་ཏྟ་ཀ་ཏཾ ཝེ་རཾ, ན་ཙི་རཾ ཝེ་ད་ཡི་སྶ་སི’’.
༨༤༢. ‘‘མ་ཧཱ་ཡ་ཉྙཾ ཡ་ཛི་ཏྭཱ་ན, ཨེ་ཝཾ སུ་ཛ྄ཛྷ་ནྟི བྲཱ་ཧྨ་ཎཱ;
མ་ཧཱ་ཡ་ཉྙཾ ཡ་ཛི་སྶཱ་མ, ཨེ་ཝཾ མོ་ཀྑཱ་མ པཱ་པ་ཀཱ’’.
༨༤༣. ‘‘ཧ་ནྡ དཱ་ནི ཨ་པཱ་ཡཱ་མི, ནཱ་ཧཾ ཨ་ཛྫ ཏ་ཡཱ ས་ཧ;
པ་ད་མྤེ་ཀཾ [པ་ད་མེ་ཀཾ (སྱཱ. ཀ.)] ན ག་ཙྪེ་ཡྻཾ, ཨེ་ཝཾ ཀི་བྦི་ས་ཀཱ་རི་ནཱ’’.
༨༤༤. ‘‘ཨི་དཾ ཝ་ཏྭཱ་ན པི་ཏ་རཾ, སོ་མ་ད་ཏྟོ བ་ཧུ་སྶུ་ཏོ;
ཨུ་ཛ྄ཛྷཱ་པེ་ཏྭཱ་ན བྷཱུ་ཏཱ་ནི, ཏ་མྷཱ ཋཱ་ནཱ ཨ་པ་ཀྐ་མི.
༨༤༥. ‘‘ག་ཎྷཱ་ཧེ་ཏཾ མ་ཧཱ་ནཱ་གཾ, ཨཱ་ཧ་རེ་ཏཾ མ་ཎིཾ མ་མ;
ཨི་ནྡ་གོ་པ་ཀ་ཝ་ཎྞཱ་བྷོ, ཡ་སྶ ལོ་ཧི་ཏ་ཀོ སི་རོ.
༨༤༦. ‘‘ཀ་པྤཱ་ས་པི་ཙུ་རཱ་སཱི་ཝ, ཨེ་སོ ཀཱ་ཡོ པ་དི་སྶ་ཏི [ཀཱ་ཡ’སྶ དི་སྶ་ཏི (སཱི. པཱི.)];
ཝ་མྨི་ཀ་གྒ་ག་ཏོ སེ་ཏི, ཏཾ ཏྭཾ ག་ཎྷཱ་ཧི བྲཱ་ཧྨ་ཎ’’.
༨༤༧. ‘‘ཨ་ཐོ་ས་དྷེ་ཧི དི་བྦེ་ཧི, ཛ་པྤཾ མ་ནྟ་པ་དཱ་ནི ཙ;
ཨེ་ཝཾ ཏཾ ཨ་ས་ཀྑི ས་ཏྠུཾ [ས་ཊྛུཾ (སཱི. པཱི.), ཡུ་ཊྛུཾ (སྱཱ.), སུ་ཏྟུཾ (ཀ.)], ཀ་ཏྭཱ པ་རི་ཏྟ་མ་ཏྟ་ནོ’’.
༨༤༨. ‘‘མ་མཾ དི་སྭཱ་ན ཨཱ་ཡ་ནྟཾ, ས་བྦ་ཀཱ་མ་ས་མི་དྡྷི་ནཾ;
ཨི་ནྡྲི་ཡཱ་ནི ཨ་ཧ་ཊྛཱ་ནི, སཱ་ཝཾ [སཱ་མཾ (སཱི. པཱི.)] ཛཱ་ཏཾ མུ་ཁཾ ཏ་ཝ.
༨༤༩. ‘‘པ་དྨཾ ཡ་ཐཱ ཧ་ཏྠ་ག་ཏཾ, པཱ་ཎི་ནཱ པ་རི་མ་དྡི་ཏཾ;
སཱ་ཝཾ ཛཱ་ཏཾ [ཡ་ནྟཾ (ཀ.)] མུ་ཁཾ ཏུ་ཡ྄ཧཾ, མ་མཾ དི་སྭཱ་ན ཨེ་དི་སཾ.
༨༥༠. ‘‘ཀ་ཙྩི ནུ ཏེ ནཱ་བྷི་ས་སི [ཏེ ནཱ་བྷི་ས་ཡི (སཱི.), ཏེ ནཱ་བྷི་སྶ་སི (སྱཱ.)], ཀ་ཙྩི ཏེ ཨ་ཏྠི ཝེ་ད་ནཱ;
ཡེ་ན སཱ་ཝཾ མུ་ཁཾ ཏུ་ཡ྄ཧཾ, མ་མཾ དི་སྭཱ་ན ཨཱ་ག་ཏཾ’’.
༨༥༡. ‘‘སུ་པི་ནཾ ཏཱ་ཏ ཨ་དྡ་ཀྑིཾ, ཨི་ཏོ མཱ་སཾ ཨ་དྷོ་ག་ཏཾ;
ད་ཀྑི་ཎཾ ཝི་ཡ མེ བཱ་ཧུཾ, ཚེ་ཏྭཱ རུ་ཧི་ར་མ་ཀྑི་ཏཾ;
པུ་རི་སོ ཨཱ་དཱ་ཡ པ་ཀྐཱ་མི, མ་མ རོ་ད་ནྟི་ཡཱ ས་ཏི.
༨༥༢. ‘‘ཡ་ཏོ་ཧཾ [ཡ་ཏོ ཏཾ (སཱི.)] སུ་པི་ན་མ་དྡ་ཀྑིཾ, སུ་ད་སྶ་ན ཝི་ཛཱ་ན་ཧི;
ཏ་ཏོ དི་ཝཱ ཝཱ ར་ཏྟིཾ ཝཱ, སུ་ཁཾ མེ ནོ་པ་ལ་བྦྷ་ཏི’’.
༨༥༣. ‘‘ཡཾ པུ་བྦེ པ་རི་ཝཱ་རིཾ་སུ [པ་རི་ཙཱ་རིཾ་སུ (སཱི. པཱི.)], ཀ་ཉྙཱ རུ་ཙི་ར་ཝི་གྒ་ཧཱ;
ཧེ་མ་ཛཱ་ལ་པ་ཊི་ཙྪ་ནྣཱ, བྷཱུ་རི་ད་ཏྟོ ན དི་སྶ་ཏི.
༨༥༤. ‘‘ཡཾ པུ་བྦེ པ་རི་ཝཱ་རིཾ་སུ [པ་རི་ཙཱ་རིཾ་སུ (སཱི. པཱི.)], ནེ་ཏྟིཾ་ས་ཝ་ར་དྷཱ་རི་ནོ;
ཀ་ཎི་ཀཱ་རཱ་ཝ ས་མྥུ་ལླཱ, བྷཱུ་རི་ད་ཏྟོ ན དི་སྶ་ཏི.
༨༥༥. ‘‘ཧ་ནྡ དཱ་ནི ག་མི་སྶཱ་མ, བྷཱུ་རི་ད་ཏྟ་ནི་ཝེ་ས་ནཾ;
དྷ་མྨ་ཊྛཾ སཱི་ལ་ས་མྤ་ནྣཾ, པ་སྶཱ་མ ཏ་ཝ བྷཱ་ཏ་རཾ’’.
༨༥༦. ‘‘ཏ་ཉྩ དི་སྭཱ་ན ཨཱ་ཡ་ནྟིཾ, བྷཱུ་རི་ད་ཏྟ་སྶ མཱ་ཏ་རཾ;
བཱ་ཧཱ པ་གྒ་ཡ྄ཧ པ་ཀྐ་ནྡུཾ, བྷཱུ་རི་ད་ཏྟ་སྶ ནཱ་རི་ཡོ.
༨༥༧. ‘‘པུ་ཏྟཾ ཏེ་ཡྻེ ན ཛཱ་ནཱ་མ, ཨི་ཏོ མཱ་སཾ ཨ་དྷོ་ག་ཏཾ;
མ་ཏཾ ཝཱ ཡ་དི ཝཱ ཛཱི་ཝཾ, བྷཱུ་རི་ད་ཏྟཾ ཡ་ས་སྶི་ནཾ’’.