༥༤༢. ཨུ་མ་ངྒ་ཛཱ་ཏ་ཀཾ (༥)
༥༩༠. ‘‘པ་ཉྩཱ་ལོ ས་བྦ་སེ་ནཱ་ཡ, བྲ་ཧྨ་ད་ཏྟོ་ཡ་མཱ་ག་ཏོ;
སཱ་ཡཾ པ་ཉྩཱ་ལི་ཡཱ སེ་ནཱ, ཨ་པྤ་མེ་ཡྻཱ མ་ཧོ་ས་དྷ.
༥༩༡. ‘‘ཝཱི་ཐི་མ་ཏཱི [པི་ཊྛི་མ་ཏཱི (སཱི. པཱི.), ཝི་དྡྷི་མ་ཏཱི (སྱཱ.)] པ་ཏྟི་མ་ཏཱི, ས་བྦ་ས་ངྒཱ་མ་ཀོ་ཝི་དཱ;
ཨོ་ཧཱ་རི་ནཱི ས་དྡ་ཝ་ཏཱི, བྷེ་རི་ས་ངྑ་པྤ་བོ་དྷ་ནཱ.
༥༩༢. ‘‘ལོ་ཧ་ཝི་ཛྫཱ ཨ་ལ་ངྐཱ་རཱ, དྷ་ཛི་ནཱི ཝཱ་མ་རོ་ཧི་ནཱི;
སི་པྤི་ཡེ་ཧི སུ་ས་མྤ་ནྣཱ, སཱུ་རེ་ཧི སུ་པྤ་ཏི་ཊྛི་ཏཱ.
༥༩༣. ‘‘ད་སེ་ཏྠ པ་ཎྜི་ཏཱ ཨཱ་ཧུ, བྷཱུ་རི་པ་ཉྙཱ ར་ཧོ་ག་མཱ [ར་ཧོ་ག་ཏཱ (སྱཱ. ཀ.)];
མཱ་ཏཱ ཨེ་ཀཱ་ད་སཱི ར་ཉྙོ, པ་ཉྩཱ་ལི་ཡཾ པ་སཱ་ས་ཏི.
༥༩༤. ‘‘ཨ་ཐེ་ཏྠེ་ཀ་ས་ཏཾ ཁ་ཏྱཱ, ཨ་ནུ་ཡ་ནྟཱ ཡ་ས་སྶི་ནོ;
ཨ་ཙྪི་ནྣ་ར་ཊྛཱ བྱ་ཐི་ཏཱ, པ་ཉྩཱ་ལི་ཡཾ [པ་ཉྩཱ་ལཱི་ནཾ (བ་ཧཱུ་སུ)] ཝ་སཾ ག་ཏཱ.
༥༩༥. ‘‘ཡཾ་ཝ་དཱ-ཏ་ཀྐ་རཱ ར་ཉྙོ, ཨ་ཀཱ་མཱ པི་ཡ་བྷཱ་ཎི་ནོ;
པ་ཉྩཱ་ལ་མ་ནུ་ཡཱ་ཡ་ནྟི, ཨ་ཀཱ་མཱ ཝ་སི་ནོ ག་ཏཱ.
༥༩༦. ‘‘ཏཱ་ཡ སེ་ནཱ་ཡ མི་ཐི་ལཱ, ཏི་ས་ནྡྷི་པ་རི་ཝཱ་རི་ཏཱ;
རཱ་ཛ་དྷཱ་ནཱི ཝི་དེ་ཧཱ་ནཾ, ས་མ་ནྟཱ པ་རི་ཁ་ཉྙ་ཏི.
༥༩༧. ‘‘ཨུ་དྡྷཾ ཏཱ་ར་ཀ་ཛཱ་ཏཱ་ཝ, ས་མ་ནྟཱ པ་རི་ཝཱ་རི་ཏཱ;
མ་ཧོ་ས་དྷ ཝི་ཛཱ་ནཱ་ཧི, ཀ་ཐཾ མོ་ཀྑོ བྷ་ཝི་སྶ་ཏི’’.
༥༩༨. ‘‘པཱ་དེ དེ་ཝ པ་སཱ་རེ་ཧི, བྷུ་ཉྫ ཀཱ་མེ ར་མ་སྶུ ཙ;
ཧི་ཏྭཱ པ་ཉྩཱ་ལི་ཡཾ སེ་ནཾ, བྲ་ཧྨ་ད་ཏྟོ པ་ལཱ་ཡི་ཏི’’ [པ་ལཱ་ཡ་ཏི (སཱི. སྱཱ.)].
༥༩༩. ‘‘རཱ་ཛཱ ས་ནྠ་ཝ་ཀཱ་མོ ཏེ, ར་ཏ་ནཱ་ནི པ་ཝེ་ཙྪ་ཏི;
ཨཱ་ག་ཙྪ་ནྟུ ཨི་ཏོ [ཏ་ཏོ (སཱི. སྱཱ.)] དཱུ་ཏཱ, མ་ཉྫུ་ཀཱ པི་ཡ་བྷཱ་ཎི་ནོ.
༦༠༠. ‘‘བྷཱ་ས་ནྟུ མུ་དུ་ཀཱ ཝཱ་ཙཱ, ཡཱ ཝཱ་ཙཱ པ་ཊི་ན་ནྡི་ཏཱ;
པ་ཉྩཱ་ལོ ཙ ཝི་དེ་ཧོ ཙ [པ་ཉྩཱ་ལཱ ཙ ཝི་དེ་ཧཱ ཙ (སཱི. པཱི.)], ཨུ་བྷོ ཨེ་ཀཱ བྷ་ཝ་ནྟུ ཏེ’’.
༦༠༡. ‘‘ཀ་ཐཾ ནུ ཀེ་ཝ་ཊྚ མ་ཧོ་ས་དྷེ་ན, ས་མཱ་ག་མོ ཨཱ་སི ཏ་དི་ངྒྷ བྲཱུ་ཧི;
ཀ་ཙྩི ཏེ པ་ཊི་ནི་ཛ྄ཛྷ་ཏྟོ, ཀ་ཙྩི ཏུ་ཊྛོ མ་ཧོ་ས་དྷོ’’.
༦༠༢. ‘‘ཨ་ན་རི་ཡ་རཱུ་པོ པུ་རི་སོ ཛ་ནི་ནྡ, ཨ་ས་མྨོ་ད་ཀོ ཐ་དྡྷོ ཨ་ས་བྦྷི་རཱུ་པོ;
ཡ་ཐཱ མཱུ་གོ ཙ བ་དྷི་རོ ཙ, ན ཀི་ཉྩི་ཏྠཾ ཨ་བྷཱ་ས་ཐ’’ [ཨ་བྷཱ་སི་ཏྠ (ཀ.)].
༦༠༣. ‘‘ཨ་དྡྷཱ ཨི་དཾ མ་ནྟ་པ་དཾ སུ་དུ་དྡ་སཾ, ཨ་ཏྠོ སུ་དྡྷོ ན་ར་ཝཱི་རི་ཡེ་ན དི་ཊྛོ;
ཏ་ཐཱ ཧི ཀཱ་ཡོ མ་མ ས་མྤ་ཝེ་དྷ་ཏི, ཧི་ཏྭཱ ས་ཡཾ ཀོ པ་ར་ཧ་ཏྠ་མེ་སྶ་ཏི’’.
༦༠༤. ‘‘ཚ་ནྣ་ཉྷི ཨེ་ཀཱ་ཝ མ་ཏཱི ས་མེ་ཏི, ཡེ པ་ཎྜི་ཏཱ ཨུ་ཏྟ་མ་བྷཱུ་རི་པ་ཏྟཱ;
ཡཱ་ནཾ ཨ་ཡཱ་ནཾ ཨ་ཐ ཝཱ་པི ཋཱ་ནཾ, མ་ཧོ་ས་དྷ ཏྭ་མྤི མ་ཏིཾ ཀ་རོ་ཧི’’.
༦༠༥. ‘‘ཛཱ་ནཱ་སི ཁོ རཱ་ཛ མ་ཧཱ་ནུ་བྷཱ་ཝོ, མ་ཧ་བྦ་ལོ ཙཱུ་ལ༹་ནི་བྲ་ཧྨ་ད་ཏྟོ;
རཱ་ཛཱ ཙ ཏཾ ཨི་ཙྪ་ཏི མཱ་ར་ཎ་ཏྠཾ [ཀཱ་ར་ཎ་ཏྠཾ (སཱི. པཱི.)], མི་གཾ ཡ་ཐཱ ཨོ་ཀ་ཙ་རེ་ན ལུ་དྡོ.
༦༠༦. ‘‘ཡ་ཐཱ་པི མ་ཙྪོ བ་ལི༹་སཾ, ཝ་ངྐཾ མཾ་སེ་ན ཚཱ་དི་ཏཾ;
ཨཱ་མ་གི་དྡྷོ ན ཛཱ་ནཱ་ཏི, མ་ཙྪོ མ་ར་ཎ་མ་ཏྟ་ནོ.
༦༠༧. ‘‘ཨེ་ཝ་མེ་ཝ ཏུ་ཝཾ རཱ་ཛ, ཙཱུ་ལ༹་ནེ་ཡྻ་སྶ དྷཱི་ཏ་རཾ;
ཀཱ་མ་གི་དྡྷོ ན ཛཱ་ནཱ་སི, མ་ཙྪོ་ཝ མ་ར་ཎ་མ་ཏྟ་ནོ.
༦༠༨. ‘‘ས་ཙེ ག་ཙྪ་སི པ་ཉྩཱ་ལཾ, ཁི་པྤ་མ་ཏྟཾ ཛ་ཧི་སྶ་ཏི;
མི་གཾ པ་ནྠཱ་ནུ་བ་ནྡྷཾ་ཝ [པ་ཐཱ་ནུ་པ་ནྣཾ་ཝ (སཱི. སྱཱ. པཱི.)], མ་ཧ་ནྟཾ བྷ་ཡ་མེ་སྶ་ཏི’’.
༦༠༩. ‘‘མ་ཡ་མེ་ཝ བཱ་ལ་མྷ་སེ ཨེ་ལ༹་མཱུ་གཱ, ཡེ ཨུ་ཏྟ་མ་ཏྠཱ་ནི ཏ་ཡཱི ལ་པི་མྷཱ;
ཀི་མེ་ཝ ཏྭཾ ན་ངྒ་ལ་ཀོ་ཊི་ཝ་ཌྜྷོ, ཨ་ཏྠཱ་ནི ཛཱ་ནཱ་སི ཡ་ཐཱ་པི ཨ་ཉྙེ’’.
༦༡༠. ‘‘ཨི་མཾ ག་ལེ ག་ཧེ་ཏྭཱ་ན, ནཱ་སེ་ཐ ཝི་ཛི་ཏཱ མ་མ;
ཡོ མེ ར་ཏ་ན་ལཱ་བྷ་སྶ, ཨ་ནྟ་རཱ་ཡཱ་ཡ བྷཱ་ས་ཏི’’.
༦༡༡. ‘‘ཏ་ཏོ ཙ སོ ཨ་པ་ཀྐ་མྨ, ཝེ་དེ་ཧ་སྶ ཨུ་པ་ནྟི་ཀཱ;
ཨ་ཐ ཨཱ་མ་ནྟ་ཡཱི དཱུ་ཏཾ, མཱ་དྷ་རཾ [མ་ཌྷ་རཾ (སཱི.), མཱ་དྷུ་རཾ (སྱཱ.), མཱ་ཋ་རཾ (པཱི.)] སུ་ཝ་པ་ཎྜི་ཏཾ.
༦༡༢. ‘‘ཨེ་ཧི ས་མྨ ཧ་རི་ཏ་པ་ཀྑ [ཧ་རཱི་པ་ཀྑ (སཱི. པཱི.)], ཝེ་ཡྻཱ་ཝ་ཙྩཾ ཀ་རོ་ཧི མེ;
ཨ་ཏྠི པ་ཉྩཱ་ལ་རཱ་ཛ་སྶ, སཱ་ལི༹་ཀཱ ས་ཡ་ན་པཱ་ལི་ཀཱ.
༦༡༣. ‘ཏཾ བ་ནྡྷ་ནེ་ན [ཏཾ པ་ཏྠ་རེ་ན (སཱི. པཱི.), ཏཾ ས་ནྠ་ཝེ་ན (སྱཱ.)] པུ་ཙྪ་སྶུ, སཱ ཧི ས་བྦ་སྶ ཀོ་ཝི་དཱ;
སཱ ཏེ་སཾ ས་བྦཾ ཛཱ་ནཱ་ཏི, ར་ཉྙོ ཙ ཀོ་སི་ཡ་སྶ ཙ.
༦༡༤. ‘‘‘ཨཱ་མོ’ཏི སོ པ་ཊི་སྶུ་ཏྭཱ, མཱ་དྷ་རོ སུ་ཝ་པ་ཎྜི་ཏོ;
ཨ་ག་མཱ་སི ཧ་རི་ཏ་པ་ཀྑོ [ཧ་རཱི་པ་ཀྑོ (སཱི. པཱི.)], སཱ་ལི༹་ཀཱ་ཡ ཨུ་པ་ནྟི་ཀཾ.
༦༡༥. ‘‘ཏ་ཏོ ཙ ཁོ སོ ག་ནྟྭཱ་ན, མཱ་དྷ་རོ སུ་ཝ་པ་ཎྜི་ཏོ;
ཨ་ཐཱ་མ་ནྟ་ཡི སུ་གྷ་རཾ, སཱ་ལི༹་ཀཾ མ་ཉྫུ་བྷཱ་ཎི་ཀཾ.
༦༡༦. ‘ཀ་ཙྩི ཏེ སུ་གྷ་རེ ཁ་མ་ནཱི་ཡཾ, ཀ་ཙྩི ཝེ་སྶེ ཨ་ནཱ་མ་ཡཾ;
ཀ་ཙྩི ཏེ མ་དྷུ་ནཱ ལཱ་ཛཱ, ལ་བྦྷ་ཏེ སུ་གྷ་རེ ཏུ་ཝཾ’ [ཏ་ཝ (སཱི. པཱི.)].
༦༡༧. ‘ཀུ་ས་ལ་ཉྩེ་ཝ མེ ས་མྨ, ཨ་ཐོ ས་མྨ ཨ་ནཱ་མ་ཡཾ;
ཨ་ཐོ མེ མ་དྷུ་ནཱ ལཱ་ཛཱ, ལ་བྦྷ་ཏེ སུ་ཝ་པ་ཎྜི་ཏ.
༦༡༨. ‘ཀུ་ཏོ ནུ ས་མྨ ཨཱ་ག་མྨ, ཀ་སྶ ཝཱ པ་ཧི་ཏོ ཏུ་ཝཾ;
ན ཙ མེ་སི ཨི་ཏོ པུ་བྦེ, དི་ཊྛོ ཝཱ ཡ་དི ཝཱ སུ་ཏོ’’.
༦༡༩. ‘‘ཨ་ཧོ་སིཾ སི་ཝི་རཱ་ཛ་སྶ, པཱ་སཱ་དེ ས་ཡ་ན་པཱ་ལ་ཀོ;
ཏ་ཏོ སོ དྷ་མྨི་ཀོ རཱ་ཛཱ, བ་དྡྷེ མོ་ཙེ་སི བ་ནྡྷ་ནཱ’’.
༦༢༠. ‘‘ཏ་སྶ མེ་ཀཱ དུ་ཏི་ཡཱ་སི, སཱ་ལི༹་ཀཱ མ་ཉྫུ་བྷཱ་ཎི་ཀཱ;
ཏཾ ཏ་ཏྠ ཨ་ཝ་དྷཱི སེ་ནོ, པེ་ཀྑ་ཏོ སུ་གྷ་རེ མ་མ’’.
༦༢༡. ‘‘ཏ་སྶཱ ཀཱ་མཱ ཧི ས་མྨ་ཏྟོ, ཨཱ་ག་ཏོ་སྨི ཏ་ཝ་ནྟི་ཀེ;
ས་ཙེ ཀ་རེ་ཡྻ [ཀ་རེ་ཡྻཱ་སི (སཱི.), ཀ་རེ་ཡུ (སྱཱ.), ཀ་རེ་ཡྻཱ་སི མེ (པཱི.)] ཨོ་ཀཱ་སཾ, ཨུ་བྷ་ཡོ་ཝ ཝ་སཱ་མ་སེ’’.
༦༢༢. ‘‘སུ་ཝོ་ཝ སུ་ཝིཾ ཀཱ་མེ་ཡྻ, སཱ་ལི༹་ཀོ པ་ན སཱ་ལི༹་ཀཾ;
སུ་ཝ་སྶ སཱ་ལི༹་ཀཱ་ཡེ་ཝ [སཱ་ལི༹་ཀཱ་ཡ ཙ (སཱི. པཱི.)], སཾ་ཝཱ་སོ ཧོ་ཏི ཀཱི་དི་སོ’’.
༦༢༣. ‘‘ཡོ་ཡཾ ཀཱ་མེ [ཡཾ ཡཾ ཀཱ་མཱི (སཱི. པཱི.)] ཀཱ་མ་ཡ་ཏི, ཨ་པི ཙ་ཎྜཱ་ལི་ཀཱ་མ་པི;
ས་བྦོ ཧི ས་དི་སོ ཧོ་ཏི, ན་ཏྠི ཀཱ་མེ ཨ་སཱ་དི་སོ’’.
༦༢༤. ‘‘ཨ་ཏྠི ཛ་མྤཱ་ཝ་ཏཱི [ཛ་མྦཱ་ཝ་ཏཱི (སཱི. སྱཱ.), ཙ་མྤཱ་ཝ་ཏཱི (ཀ.)] ནཱ་མ, མཱ་ཏཱ སི་ཝི་སྶ [སི་བྦི་སྶ (སཱི. པཱི.)] རཱ་ཛི་ནོ;
སཱ བྷ་རི་ཡཱ ཝཱ་སུ་དེ་ཝ་སྶ, ཀ་ཎྷ་སྶ མ་ཧེ་སཱི པི་ཡཱ.
༦༢༥. ‘‘ར་ཊྛ་ཝ་ཏཱི [ར་ཐ་ཝ་ཏཱི (སཱི. པཱི.), ར་ཏ་ན་ཝ་ཏཱི (སྱཱ.)] ཀི་མྤུ་རི་སཱི, སཱ་པི ཝ་ཙྪཾ ཨ་ཀཱ་མ་ཡི;
མ་ནུ་སྶོ མི་གི་ཡཱ ས་དྡྷིཾ, ན་ཏྠི ཀཱ་མེ ཨ་སཱ་དི་སོ’’.
༦༢༦. ‘‘ཧ་ནྡ ཁྭཱ་ཧཾ ག་མི་སྶཱ་མི, སཱ་ལི༹་ཀེ མ་ཉྫུ་བྷཱ་ཎི་ཀེ;
པ་ཙྩ་ཀྑཱ་ནུ་པ་ད་ཉྷེ་ཏཾ, ཨ་ཏི་མ་ཉྙ་སི ནཱུ་ན མཾ’’.
༦༢༧. ‘‘ན སི་རཱི ཏ་ར་མཱ་ན་སྶ, མཱ་དྷ་ར སུ་ཝ་པ་ཎྜི་ཏ;
ཨི་དྷེ་ཝ ཏཱ་ཝ ཨ་ཙྪ་སྶུ, ཡཱ་ཝ རཱ་ཛཱ་ན ད་ཀྑ་སི [ད་ཀྑི་སི (པཱི.)];
སོ་སྶི [སོ་སྶ་སི (སཱི.)] ས་དྡཾ མུ་དི་ངྒཱ་ནཾ, ཨཱ་ནུ་བྷཱ་ཝ་ཉྩ རཱ་ཛི་ནོ’’.
༦༢༨. ‘‘ཡོ ནུ ཁྭཱ་ཡཾ ཏི་བྦོ ས་དྡོ, ཏི་རོ་ཛ་ན་པ་དེ [ཏི་རོ་ཛ་ན་པ་དཾ (པཱི. ཀ.)] སུ་ཏོ;
དྷཱི་ཏཱ པ་ཉྩཱ་ལ་རཱ་ཛ་སྶ, ཨོ་ས་དྷཱི ཝི་ཡ ཝ་ཎྞི་ནཱི;
ཏཾ ད་སྶ་ཏི ཝི་དེ་ཧཱ་ནཾ, སོ ཝི་ཝཱ་ཧོ བྷ་ཝི་སྶ་ཏི’’.
༦༢༩. ‘‘ཨེ་དི་སོ མཱ [ནེ་དི་སོ ཏེ (སཱི.)] ཨ་མི་ཏྟཱ་ནཾ, ཝི་ཝཱ་ཧོ ཧོ་ཏུ མཱ་དྷ་ར;
ཡ་ཐཱ པ་ཉྩཱ་ལ་རཱ་ཛ་སྶ, ཝེ་དེ་ཧེ་ན བྷ་ཝི་སྶ་ཏི’’.
༦༣༠. ‘‘ཨཱ་ན་ཡི་ཏྭཱ་ན ཝེ་དེ་ཧཾ, པ་ཉྩཱ་ལཱ་ནཾ ར་ཐེ་ས་བྷོ;
ཏ་ཏོ ནཾ གྷཱ་ཏ་ཡི་སྶ་ཏི, ན་སྶ ས་ཁཱི བྷ་ཝི་སྶ་ཏི’’.
༦༣༡. ‘‘ཧ་ནྡ ཁོ མཾ ཨ་ནུ་ཛཱ་ནཱ་ཧི, ར་ཏྟི་ཡོ ས་ཏྟ་མ་ཏྟི་ཡོ;
ཡཱ་ཝཱ་ཧཾ སི་ཝི་རཱ་ཛ་སྶ, ཨཱ་རོ་ཙེ་མི མ་ཧེ་སི་ནོ;
ལ་དྡྷོ ཙ མེ ཨཱ་ཝ་ས་ཐོ, སཱ་ལི༹་ཀཱ་ཡ ཨུ་པ་ནྟི་ཀཾ’’ [ཨུ་པ་ནྟི་ཀཱ (སཱི. ཀ.)].
༦༣༢. ‘‘ཧ་ནྡ ཁོ ཏཾ ཨ་ནུ་ཛཱ་ནཱ་མི, ར་ཏྟི་ཡོ ས་ཏྟ་མ་ཏྟི་ཡོ;
ས་ཙེ ཏྭཾ ས་ཏྟ་ར་ཏྟེ་ན, ནཱ་ག་ཙྪ་སི མ་མ་ནྟི་ཀེ;
མ་ཉྙེ ཨོ་ཀྐ་ནྟ་ས་ཏྟཾ [ཨོ་ཀྐ་ནྟ་ས་ནྟཾ (སྱཱ. པཱི. ཀ.)] མཾ, མ་ཏཱ་ཡ ཨཱ་ག་མི་སྶ་སི’’.
༦༣༣. ‘‘ཏ་ཏོ ཙ ཁོ སོ ག་ནྟྭཱ་ན, མཱ་དྷ་རོ སུ་ཝ་པ་ཎྜི་ཏོ;
མ་ཧོ་ས་དྷ་སྶ ཨ་ཀྑཱ་སི, སཱ་ལི༹་ཀཱ་ཝ་ཙ་ནཾ ཨི་དཾ’’.
༦༣༤. ‘‘ཡ་སྶེ་ཝ གྷ་རེ བྷུ་ཉྫེ་ཡྻ བྷོ་གཾ, ཏ་སྶེ་ཝ ཨ་ཏྠཾ པུ་རི་སོ ཙ་རེ་ཡྻ’’;
‘‘ཧ་ནྡཱ་ཧཾ ག་ཙྪཱ་མི པུ་རེ ཛ་ནི་ནྡ, པ་ཉྩཱ་ལ་རཱ་ཛ་སྶ པུ་རཾ སུ་ར་མྨཾ;
ནི་ཝེ་ས་ནཱ་ནི མཱ་པེ་ཏུཾ, ཝེ་དེ་ཧ་སྶ ཡ་ས་སྶི་ནོ.
༦༣༥. ‘‘ནི་ཝེ་ས་ནཱ་ནི མཱ་པེ་ཏྭཱ, ཝེ་དེ་ཧ་སྶ ཡ་ས་སྶི་ནོ;
ཡ་དཱ ཏེ པ་ཧི་ཎེ་ཡྻཱ་མི, ཏ་དཱ ཨེ་ཡྻཱ་སི ཁ་ཏྟི་ཡ’’.
༦༣༦. ‘‘ཏ་ཏོ ཙ པཱ་ཡཱ་སི པུ་རེ མ་ཧོ་ས་དྷོ, པ་ཉྩཱ་ལ་རཱ་ཛ་སྶ པུ་རཾ སུ་ར་མྨཾ;
ནི་ཝེ་ས་ནཱ་ནི མཱ་པེ་ཏུཾ, ཝེ་དེ་ཧ་སྶ ཡ་ས་སྶི་ནོ’’.
༦༣༧. ‘‘ནི་ཝེ་ས་ནཱ་ནི མཱ་པེ་ཏྭཱ, ཝེ་དེ་ཧ་སྶ ཡ་ས་སྶི་ནོ;
ཨ་ཐ་སྶ པཱ་ཧི་ཎཱི དཱུ་ཏཾ, [ན་ཏྠི སཱི. པཱི. པོ་ཏྠ་ཀེ་སུ] ཝེ་དེ་ཧཾ མི་ཐི་ལ་གྒ་ཧཾ [ན་ཏྠི སཱི. པཱི. པོ་ཏྠ་ཀེ་སུ];
ཨེ་ཧི དཱ་ནི མ་ཧཱ་རཱ་ཛ, མཱ་པི་ཏཾ ཏེ ནི་ཝེ་ས་ནཾ’’.
༦༣༨. ‘‘ཏ་ཏོ ཙ རཱ་ཛཱ པཱ་ཡཱ་སི, སེ་ནཱ་ཡ ཙ་ཏུ་ར་ངྒི་ཡཱ [ཙ་ཏུ་ར་ངྒི་ནི་ཡཱ (ཀ.)];
ཨ་ན་ནྟ་ཝཱ་ཧ་ནཾ ད་ཊྛུཾ, ཕཱི་ཏཾ ཀ་པི་ལི་ཡཾ [ཀ་མྤི་ལླི་ཡཾ (སཱི. པཱི.)] པུ་རཾ’’.
༦༣༩. ‘‘ཏ་ཏོ ཙ ཁོ སོ ག་ནྟྭཱ་ན, བྲ་ཧྨ་ད་ཏྟ་སྶ པཱ་ཧི་ཎི;
‘ཨཱ་ག་ཏོ’སྨི མ་ཧཱ་རཱ་ཛ, ཏ་ཝ པཱ་དཱ་ནི ཝ་ནྡི་ཏུཾ.
༦༤༠. ‘ད་དཱ་ཧི དཱ་ནི མེ བྷ་རི་ཡཾ, ནཱ་རིཾ ས་བྦ་ངྒ་སོ་བྷི་ནིཾ;
སུ་ཝ་ཎྞེ་ན པ་ཊི་ཙྪ་ནྣཾ, དཱ་སཱི་ག་ཎ་པུ་ར་ཀྑ་ཏཾ’’’.
༦༤༡. ‘‘སྭཱ་ག་ཏཾ ཏེ་ཝ [ཏེ (སཱི.), ཏེ་པི (སྱཱ.), ཏེ་ན (པཱི.)] ཝེ་དེ་ཧ, ཨ་ཐོ ཏེ ཨ་དུ་རཱ་ག་ཏཾ;
ན་ཀྑ་ཏྟཾ་ཡེ་ཝ པ་རི་པུ་ཙྪ, ཨ་ཧཾ ཀ་ཉྙཾ ད་དཱ་མི ཏེ;
སུ་ཝ་ཎྞེ་ན པ་ཊི་ཙྪ་ནྣཾ, དཱ་སཱི་ག་ཎ་པུ་ར་ཀྑ་ཏཾ’’.
༦༤༢. ‘‘ཏ་ཏོ ཙ རཱ་ཛཱ ཝེ་དེ་ཧོ, ན་ཀྑ་ཏྟཾ པ་རི་པུ་ཙྪ་ཐ [པ་རི་པུ་ཙྪ་ཏི (སྱཱ. ཀ.)];
ན་ཀྑ་ཏྟཾ པ་རི་པུ་ཙྪི་ཏྭཱ, བྲ་ཧྨ་ད་ཏྟ་སྶ པཱ་ཧི་ཎི.
༦༤༣. ‘‘ད་དཱ་ཧི དཱ་ནི མེ བྷ་རི་ཡཾ, ནཱ་རིཾ ས་བྦ་ངྒ་སོ་བྷི་ནིཾ;
སུ་ཝ་ཎྞེ་ན པ་ཊི་ཙྪ་ནྣཾ, དཱ་སཱི་ག་ཎ་པུ་ར་ཀྑ་ཏཾ’’.
༦༤༤. ‘‘ད་དཱ་མི དཱ་ནི ཏེ བྷ་རི་ཡཾ, ནཱ་རིཾ ས་བྦ་ངྒ་སོ་བྷི་ནིཾ;
སུ་ཝ་ཎྞེ་ན པ་ཊི་ཙྪ་ནྣཾ, དཱ་སཱི་ག་ཎ་པུ་ར་ཀྑ་ཏཾ’’.
༦༤༥. ‘‘ཧ་ཏྠཱི ཨ་སྶཱ ར་ཐཱ པ་ཏྟཱི, སེ་ནཱ ཏི་ཊྛ་ནྟི ཝ་མྨི་ཏཱ [ཝ་མྨི་ཀཱ (སྱཱ. ཀ.)];
ཨུ་ཀྐཱ པ་དི་ཏྟཱ ཛྷཱ་ཡ་ནྟི, ཀི་ནྣུ མ་ཉྙ་ནྟི པ་ཎྜི་ཏཱ.
༦༤༦. ‘‘ཧ་ཏྠཱི ཨ་སྶཱ ར་ཐཱ པ་ཏྟཱི, སེ་ནཱ ཏི་ཊྛ་ནྟི ཝ་མྨི་ཏཱ [ཝ་མྨི་ཀཱ (སྱཱ. ཀ.)];
ཨུ་ཀྐཱ པ་དི་ཏྟཱ ཛྷཱ་ཡ་ནྟི, ཀིཾ ནུ ཀཱ་ཧ་ནྟི [ཀཱ་ཧ་ཏི (ཀ.)] པ་ཎྜི་ཏ’’.
༦༤༧. ‘‘ར་ཀྑ་ཏི ཏཾ མ་ཧཱ་རཱ་ཛ, ཙཱུ་ལ༹་ནེ་ཡྻོ མ་ཧ་བྦ་ལོ;
པ་དུ་ཊྛོ བྲ་ཧྨ་ད་ཏྟེ་ན [པ་དུ་ཊྛོ ཏེ བྲ་ཧྨ་ད་ཏྟོ (སཱི. སྱཱ. པཱི.)], པཱ་ཏོ ཏཾ གྷཱ་ཏ་ཡི་སྶ་ཏི’’.
༦༤༨. ‘‘ཨུ་བྦེ་དྷ་ཏི མེ ཧ་ད་ཡཾ, མུ་ཁ་ཉྩ པ་རི་སུ་སྶ་ཏི;
ནི་བྦུ་ཏིཾ ནཱ་དྷི་ག་ཙྪཱ་མི, ཨ་གྒི་ད་ཌྜྷོ་ཝ ཨཱ་ཏ་པེ.
༦༤༩. ‘‘ཀ་མྨཱ་རཱ་ནཾ ཡ་ཐཱ ཨུ་ཀྐཱ, ཨ་ནྟོ ཛྷཱ་ཡ་ཏི ནོ བ་ཧི;
ཨེ་ཝ་མྤི ཧ་ད་ཡཾ མ་ཡ྄ཧཾ, ཨ་ནྟོ ཛྷཱ་ཡ་ཏི ནོ བ་ཧི’’.
༦༥༠. ‘‘པ་མ་ཏྟོ མ་ནྟ་ནཱ་ཏཱི་ཏོ, བྷི་ནྣ་མ་ནྟོ་སི ཁ་ཏྟི་ཡ;
ཨི་དཱ་ནི ཁོ ཏཾ ཏཱ་ཡ་ནྟུ, པ་ཎྜི་ཏཱ མ་ནྟི་ནོ ཛ་ནཱ.
༦༥༡. ‘‘ཨ་ཀ་ཏྭཱ་མ་ཙྩ་སྶ ཝ་ཙ་ནཾ, ཨ་ཏྠ་ཀཱ་མ་ཧི་ཏེ་སི་ནོ;
ཨ་ཏྟ་པཱི་ཏི་ར་ཏོ རཱ་ཛཱ, མི་གོ ཀཱུ་ཊེ་ཝ ཨོ་ཧི་ཏོ.
༦༥༢. ‘‘ཡ་ཐཱ་པི མ་ཙྪོ བ་ལི༹་སཾ, ཝ་ངྐཾ མཾ་སེ་ན ཚཱ་དི་ཏཾ;
ཨཱ་མ་གི་དྡྷོ ན ཛཱ་ནཱ་ཏི, མ་ཙྪོ མ་ར་ཎ་མ་ཏྟ་ནོ.
༦༥༣. ‘‘ཨེ་ཝ་མེ་ཝ ཏུ་ཝཾ རཱ་ཛ, ཙཱུ་ལ༹་ནེ་ཡྻ་སྶ དྷཱི་ཏ་རཾ;
ཀཱ་མ་གི་དྡྷོ ན ཛཱ་ནཱ་སི, མ་ཙྪོ་ཝ མ་ར་ཎ་མ་ཏྟ་ནོ.
༦༥༤. ‘‘ས་ཙེ ག་ཙྪ་སི པ་ཉྩཱ་ལཾ, ཁི་པྤ་མ་ཏྟཾ ཛ་ཧི་སྶ་སི;
མི་གཾ པ་ནྠཱ་ནུ་བ་ནྡྷཾ་ཝ, མ་ཧ་ནྟཾ བྷ་ཡ་མེ་སྶ་ཏི.
༦༥༥. ‘‘ཨ་ན་རི་ཡ་རཱུ་པོ པུ་རི་སོ ཛ་ནི་ནྡ, ཨ་ཧཱི་ཝ ཨུ་ཙྪ་ངྒ་ག་ཏོ ཌ་སེ་ཡྻ;
ན ཏེ་ན མི་ཏྟིཾ ཀ་ཡི་རཱ་ཐ དྷཱི་རོ [པ་ཉྙོ (པཱི.)], དུ་ཀྑོ ཧ་ཝེ ཀཱ་པུ་རི་སེ་ན [ཀཱ་པུ་རི་སེ་ཧི (ཀ.)] ས་ངྒ་མོ.
༦༥༦. ‘‘ཡ་དེ་ཝ [ཡཾ ཏྭེ་ཝ (སཱི. སྱཱ. པཱི.)] ཛ་ཉྙཱ པུ་རི་སཾ [པུ་རི་སོ (སྱཱ. ཀ.)] ཛ་ནི་ནྡ, སཱི་ལ་ཝཱ་ཡཾ བ་ཧུ་སྶུ་ཏོ;
ཏེ་ནེ་ཝ མི་ཏྟིཾ ཀ་ཡི་རཱ་ཐ དྷཱི་རོ, སུ་ཁོ ཧ་ཝེ ས་པྤུ་རི་སེ་ན ས་ངྒ་མོ’’.
༦༥༧. ‘‘བཱ་ལོ ཏུ་ཝཾ ཨེ་ལ༹་མཱུ་གོ་སི རཱ་ཛ, ཡོ ཨུ་ཏྟ་མ་ཏྠཱ་ནི མ་ཡཱི ལ་པི་ཏྠོ;
ཀི་མེ་ཝ་ཧཾ ན་ངྒ་ལ་ཀོ་ཊི་ཝ་ཌྜྷོ, ཨ་ཏྠཱ་ནི ཛཱ་ནཱ་མི [ཛཱ་ནི་སྶཾ (སཱི. སྱཱ. པཱི.)] ཡ་ཐཱ་པི ཨ་ཉྙེ.
༦༥༨. ‘‘ཨི་མཾ ག་ལེ ག་ཧེ་ཏྭཱ་ན, ནཱ་སེ་ཐ ཝི་ཛི་ཏཱ མ་མ;
ཡོ མེ ར་ཏ་ན་ལཱ་བྷ་སྶ, ཨ་ནྟ་རཱ་ཡཱ་ཡ བྷཱ་ས་ཏི’’.
༦༥༩. ‘‘མ་ཧོ་ས་དྷ ཨ་ཏཱི་ཏེ་ན, ནཱ་ནུ་ཝི་ཛ྄ཛྷ་ནྟི པ་ཎྜི་ཏཱ;
ཀིཾ མཾ ཨ་སྶཾ་ཝ ས་མྦ་ནྡྷཾ, པ་ཏོ་དེ་ནེ་ཝ ཝི་ཛ྄ཛྷ་སི.
༦༦༠. ‘‘ས་ཙེ པ་སྶ་སི མོ་ཀྑཾ ཝཱ, ཁེ་མཾ ཝཱ པ་ན པ་སྶ་སི;
ཏེ་ནེ་ཝ མཾ ཨ་ནུ་སཱ་ས, ཀིཾ ཨ་ཏཱི་ཏེ་ན ཝི་ཛ྄ཛྷ་སི’’.