༥༡༤. ཚ་དྡ་ནྟ་ཛཱ་ཏ་ཀཾ (༤)
༩༧. ཀིཾ ནུ སོ་ཙ་སི་ནུ་ཙྩ་ངྒི, པ་ཎྜཱུ་སི ཝ་ར་ཝ་ཎྞི་ནི;
མི་ལཱ་ཡ་སི ཝི་སཱ་ལ་ཀྑི, མཱ་ལཱ་ཝ པ་རི་མ་དྡི་ཏཱ.
༩༨. དོ་ཧ་ལོ༹ མེ མ་ཧཱ་རཱ་ཛ, སུ་པི་ན་ནྟེ་ནུ་པ་ཛ྄ཛྷ་གཱ [ནུ’པ་ཙྩ་གཱ (སཱི. སྱཱ. པཱི.)];
ན སོ སུ་ལ་བྷ་རཱུ་པོ་ཝ, ཡཱ་དི་སོ མ་མ དོ་ཧ་ལོ༹.
༩༩. ཡེ ཀེ་ཙི མཱ་ནུ་སཱ ཀཱ་མཱ, ཨི་དྷ ལོ་ཀ་སྨི ན་ནྡ་ནེ;
ས་བྦེ ཏེ པ་ཙུ་རཱ མ་ཡ྄ཧཾ, ཨ་ཧཾ ཏེ ད་མྨི དོ་ཧ་ལ༹ཾ.
༡༠༠. ལུ་དྡཱ དེ་ཝ ས་མཱ་ཡ་ནྟུ, ཡེ ཀེ་ཙི ཝི་ཛི་ཏེ ཏ་ཝ;
ཨེ་ཏེ་སཾ ཨ་ཧ་མ་ཀྑི་སྶཾ, ཡཱ་དི་སོ མ་མ དོ་ཧ་ལོ༹.
༡༠༡. ཨི་མེ ཏེ ལུ་དྡ་ཀཱ དེ་ཝི, ཀ་ཏ་ཧ་ཏྠཱ ཝི་སཱ་ར་དཱ;
ཝ་ན་ཉྙཱུ ཙ མི་ག་ཉྙཱུ ཙ, མ་མ་ཏྠེ [མ་མ ཏེ (པཱི.)] ཙ་ཏྟ་ཛཱི་ཝི་ཏཱ.
༡༠༢. ལུ་དྡ་པུ་ཏྟཱ ནི་སཱ་མེ་ཐ, ཡཱ་ཝ་ནྟེ་ཏྠ ས་མཱ་ག་ཏཱ;
ཚ་བྦི་སཱ་ཎཾ ག་ཛཾ སེ་ཏཾ, ཨ་དྡ་སཾ སུ་པི་ནེ ཨ་ཧཾ;
ཏ་སྶ ད་ནྟེ་ཧི མེ ཨ་ཏྠོ, ཨ་ལཱ་བྷེ ན་ཏྠི ཛཱི་ཝི་ཏཾ.
༡༠༣. ན ནོ པི་ཏཱུ་ནཾ ན པི་ཏཱ་མ་ཧཱ་ནཾ, དི་ཊྛོ སུ་ཏོ ཀུ་ཉྫ་རོ ཚ་བྦི་སཱ་ཎོ;
ཡ་མ་དྡ་སཱ སུ་པི་ནེ རཱ་ཛ་པུ་ཏྟཱི, ཨ་ཀྑཱ་ཧི ནོ ཡཱ་དི་སོ ཧ་ཏྠི་ནཱ་གོ.
༡༠༤. དི་སཱ ཙ་ཏ་སྶོ ཝི་དི་སཱ ཙ་ཏ་སྶོ, ཨུ་དྡྷཾ ཨ་དྷོ ད་ས དི་སཱ ཨི་མཱ་ཡོ;
ཀ་ཏ་མཾ དི་སཾ ཏི་ཊྛ་ཏི ནཱ་ག་རཱ་ཛཱ, ཡ་མ་དྡ་སཱ སུ་པི་ནེ ཚ་བྦི་སཱ་ཎཾ.
༡༠༥. ཨི་ཏོ ཨུ་ཛུཾ ཨུ་ཏྟ་རི་ཡཾ དི་སཱ་ཡཾ, ཨ་ཏི་ཀྐ་མྨ སོ ས་ཏྟ་གི་རཱི བྲ་ཧ་ནྟེ;
སུ་ཝ་ཎྞ་པ་སྶོ ནཱ་མ གི་རཱི ཨུ་ལཱ༹་རོ, སུ་པུ་པྥི་ཏོ [ས་མྤུ་པྥི་ཏོ (སྱཱ.)] ཀི་མྤུ་རི་སཱ་ནུ་ཙི་ཎྞོ.
༡༠༦. ཨཱ་རུ་ཡ྄ཧ སེ་ལཾ བྷ་ཝ་ནཾ ཀི་ནྣ་རཱ་ནཾ, ཨོ་ལོ་ཀ་ཡ པ་བྦ་ཏ་པཱ་ད་མཱུ་ལཾ;
ཨ་ཐ ད་ཀྑ་སཱི མེ་གྷ་ས་མཱ་ན་ཝ་ཎྞཾ, ནི་གྲོ་དྷ་རཱ་ཛཾ ཨ་ཐ ས་ཧ་སྶ་པཱ་དཾ [པོ་རཾ (ཀ.)].
༡༠༧. ཏ་ཏྠ་ཙྪ་ཏཱི ཀུ་ཉྫ་རོ ཚ་བྦི་སཱ་ཎོ, ས་བྦ་སེ་ཏོ དུ་པྤ་ས་ཧོ པ་རེ་བྷི;
ར་ཀྑ་ནྟི ནཾ ཨ་ཊྛ་ས་ཧ་སྶ་ནཱ་གཱ, ཨཱི་སཱ་ད་ནྟཱ ཝཱ་ཏ་ཛ་ཝ་པྤ་ཧཱ་རི་ནོ.
༡༠༨. ཏི་ཊྛ་ནྟི ཏེ ཏུ་མཱུ་ལཾ [ཏུ་མཱུ་ལ (སྱཱ.), བྷི་མཱུ་ལ (པཱི. ཀ.)] པ་སྶ་ས་ནྟཱ, ཀུ་པྤ་ནྟི ཝཱ་ཏ་སྶ་པི ཨེ་རི་ཏ་སྶ;
མ་ནུ་སྶ་བྷཱུ་ཏཾ པ་ན ཏ་ཏྠ དི་སྭཱ, བྷ་སྨཾ ཀ་རེ་ཡྻུཾ ནཱ་སྶ ར་ཛོ་པི ཏ་སྶ.
༡༠༩. བ་ཧཱུ ཧི་མེ རཱ་ཛ་ཀུ་ལ་མྷི ས་ནྟི, པི་ལ༹་ནྡྷ་ནཱ ཛཱ་ཏ་རཱུ་པ་སྶ དེ་ཝཱི;
མུ་ཏྟཱ་མ་ཎཱི་ཝེ་ལུ༹་རི་ཡཱ་མ་ཡཱ ཙ, ཀིཾ ཀཱ་ཧ་སི ད་ནྟ་པི་ལ༹་ནྡྷ་ནེ་ན;
མཱ་རེ་ཏུ་ཀཱ་མཱ ཀུ་ཉྫ་རཾ ཚ་བྦི་སཱ་ཎཾ, ཨུ་དཱ་ཧུ གྷཱ་ཏེ་སྶ་སི ལུ་དྡ་པུ་ཏྟེ.
༡༡༠. སཱ ཨི་སྶི་ཏཱ དུ་ཀྑི་ཏཱ ཙ་སྨི ལུ་དྡ, ཨུ་དྡྷ་ཉྩ སུ་སྶཱ་མི ཨ་ནུ་སྶ་ར་ནྟཱི;
ཀ་རོ་ཧི མེ ལུ་དྡ་ཀ ཨེ་ཏ་མ་ཏྠཾ, ད་སྶཱ་མི ཏེ གཱ་མ་ཝ་རཱ་ནི པ་ཉྩ.
༡༡༡. ཀ་ཏྠ་ཙྪ་ཏཱི ཀ་ཏྠ་མུ་པེ་ཏི ཋཱ་ནཾ, ཝཱི་ཐི་སྶ ཀཱ ནྷཱ་ན [ན་ཧཱ་ན (སཱི. པཱི.)] ག་ཏ་སྶ ཧོ་ཏི;
ཀ་ཐ་ཉྷི སོ ནྷཱ་ཡ་ཏི [ན་ཧཱ་ཡ་ཏི (སཱི. པཱི.)] ནཱ་ག་རཱ་ཛཱ, ཀ་ཐཾ ཝི་ཛཱ་ནེ་མུ ག་ཏིཾ ག་ཛ་སྶ.
༡༡༢. ཏ་ཏྠེ་ཝ སཱ པོ་ཀྑ་ར་ཎཱི ཨ་དཱུ་རེ [ཨ་ཝི་དཱུ་རེ (སྱཱ. ཀ.)], ར་མྨཱ སུ་ཏི་ཏྠཱ ཙ མ་ཧོ་དི་ཀཱ [མ་ཧོ་ད་ཀཱ (སྱཱ. ཀ.)] ཙ;
ས་མྤུ་པྥི་ཏཱ བྷ་མ་ར་ག་ཎཱ་ནུ་ཙི་ཎྞཱ [ཀི་ཎྞཱ (ཀ་ཏྠ་ཙི)], ཨེ་ཏྠ ཧི སོ ནྷཱ་ཡ་ཏི ནཱ་ག་རཱ་ཛཱ.
༡༡༣. སཱི་སཾ ན་ཧཱ་ཏུ་པྤ་ལ [ན་ཧཱ་ཏོ ཨུ་པྤ་ལ (སཱི. སྱཱ. པཱི.)] མཱ་ལ་བྷཱ་རཱི, ས་བྦ་སེ་ཏོ པུ་ཎྜ་རཱི་ཀ་ཏྟ་ཙ་ངྒཱི;
ཨཱ་མོ་ད་མཱ་ནོ ག་ཙྪ་ཏི ས་ནྣི་ཀེ་ཏཾ, པུ་ར་ཀྑ་ཏྭཱ མ་ཧེ་སིཾ ས་བྦ་བྷ་དྡཾ.
༡༡༤. ཏ་ཏྠེ་ཝ སོ ཨུ་གྒ་ཧེ་ཏྭཱ་ན ཝཱ་ཀྱཾ, ཨཱ་དཱ་ཡ ཏཱུ་ཎི་ཉྩ དྷ་ནུ་ཉྩ ལུ་དྡོ;
ཝི་ཏུ་རི་ཡ་ཏི [ཝི་ཏུ་རི་ཡ སོ (སཱི. ཨ་ཊྛ.)] ས་ཏྟ་གི་རཱི བྲ་ཧ་ནྟེ, སུ་ཝ་ཎྞ་པ་སྶཾ ནཱ་མ གི་རིཾ ཨུ་ལཱ༹་རཾ.
༡༡༥. ཨཱ་རུ་ཡ྄ཧ སེ་ལཾ བྷ་ཝ་ནཾ ཀི་ནྣ་རཱ་ནཾ, ཨོ་ལོ་ཀ་ཡཱི པ་བྦ་ཏ་པཱ་ད་མཱུ་ལཾ;
ཏ་ཏྠ་དྡ་སཱ མེ་གྷ་ས་མཱ་ན་ཝ་ཎྞཾ, ནི་གྲོ་དྷ་རཱ་ཛཾ ཨ་ཊྛ་ས་ཧ་སྶ་པཱ་དཾ.
༡༡༦. ཏ་ཏྠ་དྡ་སཱ ཀུ་ཉྫ་རཾ ཚ་བྦི་སཱ་ཎཾ, ས་བྦ་སེ་ཏཾ དུ་པྤ་ས་ཧཾ པ་རེ་བྷི;
ར་ཀྑ་ནྟི ནཾ ཨ་ཊྛ་ས་ཧ་སྶ་ནཱ་གཱ, ཨཱི་སཱ་ད་ནྟཱ ཝཱ་ཏ་ཛ་ཝ་པྤ་ཧཱ་རི་ནོ.
༡༡༧. ཏ་ཏྠ་དྡ་སཱ པོ་ཀྑ་ར་ཎིཾ ཨ་དཱུ་རེ, ར་མྨཾ སུ་ཏི་ཏྠ་ཉྩ མ་ཧོ་དི་ཀ་ཉྩ;
ས་མྤུ་པྥི་ཏཾ བྷ་མ་ར་ག་ཎཱ་ནུ་ཙི་ཎྞཾ, ཡ་ཏྠ ཧི སོ ནྷཱ་ཡ་ཏི ནཱ་ག་རཱ་ཛཱ.
༡༡༨. དི་སྭཱ་ན ནཱ་ག་སྶ ག་ཏིཾ ཋི་ཏི་ཉྩ, ཝཱི་ཐི་སྶ ཡཱ ནྷཱ་ན་ག་ཏ་སྶ ཧོ་ཏི;
ཨོ་པཱ་ཏ་མཱ་ག་ཙྪི ཨ་ན་རི་ཡ་རཱུ་པོ, པ་ཡོ་ཛི་ཏོ ཙི་ཏྟ་ཝ་སཱ་ནུ་གཱ་ཡ.
༡༡༩. ཁ་ཎི་ཏྭཱ་ན ཀཱ་སུཾ ཕ་ལ་ཀེ་ཧི ཚཱ་ད་ཡི, ཨ་ཏྟཱ་ན་མོ་དྷཱ་ཡ དྷ་ནུ་ཉྩ ལུ་དྡོ;
པ་སྶཱ་ག་ཏཾ པུ་ཐུ་ས་ལླེ་ན ནཱ་གཾ, ས་མ་པྤ་ཡཱི དུ་ཀྐ་ཊ་ཀ་མྨ་ཀཱ་རཱི.
༡༢༠. ཝི་དྡྷོ ཙ ནཱ་གོ ཀོ་ཉྩ་མ་ནཱ་དི གྷོ་རཾ, ས་བྦེ ཙ [ས་བྦེ་ཝ (སཱི. སྱཱ. པཱི.)] ནཱ་གཱ ནི་ནྣ་དུཾ [ནི་ནྣཱ་དུ (སྱཱ.), ནི་ནྣཱ་དཾ (ཀ.)] གྷོ་ར་རཱུ་པཾ;
ཏི་ཎ་ཉྩ ཀ་ཊྛ་ཉྩ ར་ཎཾ [ཙུ་ཎྞཾ (ཀ. སཱི. པཱི.)] ཀ་རོ་ནྟཱ, དྷཱ་ཝིཾ་སུ ཏེ ཨ་ཊྛ་དི་སཱ ས་མ་ནྟ་ཏོ.
༡༢༡. ཝ་དྷི་སྶ་མེ་ཏ་ནྟི [ཝ་དྷི་སྶ་མེ་ན་ནྟི (སྱཱ.)] པ་རཱ་མ་ས་ནྟོ, ཀཱ་སཱ་ཝ་མ་དྡ་ཀྑི དྷ་ཛཾ ཨི་སཱི་ནཾ;
དུ་ཀྑེ་ན ཕུ་ཊྛ་སྶུ་ད་པཱ་དི ས་ཉྙཱ, ཨ་ར་ཧ་དྡྷ་ཛོ ས་བྦྷི ཨ་ཝ་ཛ྄ཛྷ་རཱུ་པོ.
༡༢༢. ཨ་ནི་ཀྐ་སཱ་ཝོ ཀཱ་སཱ་ཝཾ, ཡོ ཝ་ཏྠཾ པ་རི་ད་ཧི་སྶ་ཏི [པ་རི་ད་ཧེ་སྶ་ཏི (སཱི. པཱི.), པ་རི་དྷ་སྶ་ཏི (ཀ་ཏྠ་ཙི)];
ཨ་པེ་ཏོ ད་མ་ས་ཙྩེ་ན, ན སོ ཀཱ་སཱ་ཝ་མ་ར་ཧ་ཏི.
༡༢༣. ཡོ ཙ ཝ་ནྟ་ཀ་སཱ་ཝ་སྶ, སཱི་ལེ་སུ སུ་ས་མཱ་ཧི་ཏོ;
ཨུ་པེ་ཏོ ད་མ་ས་ཙྩེ་ན, ས ཝེ ཀཱ་སཱ་ཝ་མ་ར་ཧ་ཏི.
༡༢༤. ས་མ་པྤི་ཏོ པུ་ཐུ་ས་ལླེ་ན ནཱ་གོ, ཨ་དུ་ཊྛ་ཙི་ཏྟོ ལུ་དྡ་ཀ་མ་ཛ྄ཛྷ་བྷཱ་སི;
ཀི་མ་ཏྠ་ཡཾ ཀི་སྶ ཝཱ ས་མྨ ཧེ་ཏུ, མ་མཾ ཝ་དྷཱི ཀ་སྶ ཝཱ་ཡཾ པ་ཡོ་གོ.
༡༢༥. ཀཱ་སི་སྶ ར་ཉྙོ མ་ཧེ་སཱི བྷ་ད་ནྟེ, སཱ པཱུ་ཛི་ཏཱ རཱ་ཛ་ཀུ་ལེ སུ་བྷ་དྡཱ;
ཏཾ ཨ་དྡ་སཱ སཱ ཙ མ་མཾ ཨ་སཾ་སི, ད་ནྟེ་ཧི ཨ་ཏྠོ་ཏི ཙ མཾ [ཨ་ཏྠོ་ཏི མ་མཾ (སྱཱ. ཀ.)] ཨ་ཝོ་ཙ.
༡༢༦. བ་ཧཱུ ཧི མེ ད་ནྟ་ཡུ་གཱ ཨུ་ལཱ༹་རཱ, ཡེ མེ པི་ཏཱུ་ན་ཉྩ [པི་ཏུ་ནྣ་མྤི (པཱི.)] པི་ཏཱ་མ་ཧཱ་ནཾ;
ཛཱ་ནཱ་ཏི སཱ ཀོ་དྷ་ནཱ རཱ་ཛ་པུ་ཏྟཱི, ཝ་དྷ་ཏྠི་ཀཱ ཝེ་ར་མ་ཀཱ་སི བཱ་ལཱ.
༡༢༧. ཨུ་ཊྛེ་ཧི ཏྭཾ ལུ་དྡ ཁ་རཾ ག་ཧེ་ཏྭཱ, ད་ནྟེ ཨི་མེ ཚི་ནྡ པུ་རཱ མ་རཱ་མི;
ཝ་ཛྫཱ་སི ཏཾ ཀོ་དྷ་ནཾ རཱ་ཛ་པུ་ཏྟིཾ, ‘‘ནཱ་གོ ཧ་ཏོ ཧ་ནྡ ཨི་མ་སྶ ད་ནྟཱ’’.
༡༢༨. ཨུ་ཊྛཱ་ཡ སོ ལུ་དྡོ ཁ་རཾ ག་ཧེ་ཏྭཱ, ཚེ་ཏྭཱ་ན ད་ནྟཱ་ནི ག་ཛུ་ཏྟ་མ་སྶ;
ཝ་གྒཱུ སུ་བྷེ ཨ་པྤ་ཊི་མེ པ་ཐ་བྱཱ, ཨཱ་དཱ་ཡ པ་ཀྐཱ་མི ཏ་ཏོ ཧི ཁི་པྤཾ.
༡༢༩. བྷ་ཡ་ཊྚི་ཏཱ [བྷ་ཡ་དྡི་ཏཱ (སཱི. པཱི.)] ནཱ་ག་ཝ་དྷེ་ན ཨ་ཊྚཱ, ཡེ ཏེ ནཱ་གཱ ཨ་ཊྛ དི་སཱ ཝི་དྷཱ་ཝུཾ;
ཨ་དི་སྭཱ་ན [ཨ་དི་སྭ (སཱི. པཱི.)] པོ་སཾ ག་ཛ་པ་ཙྩ་མི་ཏྟཾ, པ་ཙྩཱ་ག་མུཾ ཡེ་ན སོ ནཱ་ག་རཱ་ཛཱ.
༡༣༠. ཏེ ཏ་ཏྠ ཀ་ནྡི་ཏྭཱ རོ་དི་ཏྭཱ་ན [རོ་དི་ཏྭ (སཱི. པཱི.)] ནཱ་གཱ, སཱི་སེ ས་ཀེ པཾ་སུ་ཀཾ ཨོ་ཀི་རི་ཏྭཱ;
ཨ་ག་མཾ་སུ ཏེ ས་བྦེ ས་ཀཾ ནི་ཀེ་ཏཾ, པུ་ར་ཀྑ་ཏྭཱ མ་ཧེ་སིཾ ས་བྦ་བྷ་དྡཾ.
༡༣༡. ཨཱ་དཱ་ཡ ད་ནྟཱ་ནི ག་ཛུ་ཏྟ་མ་སྶ, ཝ་གྒཱུ སུ་བྷེ ཨ་པྤ་ཊི་མེ པ་ཐ་བྱཱ;
སུ་ཝ་ཎྞ་རཱ་ཛཱི་ཧི ས་མ་ནྟ་མོ་ད་རེ, སོ ལུ་དྡ་ཀོ ཀཱ་སི་པུ་རཾ ཨུ་པཱ་ག་མི;
ཨུ་པ་ནེ་སི སོ རཱ་ཛ་ཀ་ཉྙཱ་ཡ ད་ནྟེ, ནཱ་གོ ཧ་ཏོ ཧ་ནྡ ཨི་མ་སྶ ད་ནྟཱ.
༡༣༢. དི་སྭཱ་ན ད་ནྟཱ་ནི ག་ཛུ་ཏྟ་མ་སྶ, བྷ་ཏྟུ་པྤི་ཡ་སྶ པུ་རི་མཱ་ཡ ཛཱ་ཏི་ཡཱ;
ཏ་ཏྠེ་ཝ ཏ་སྶཱ ཧ་ད་ཡཾ ཨ་ཕཱ་ལི, ཏེ་ནེ་ཝ སཱ ཀཱ་ལ་མ་ཀཱ་སི བཱ་ལཱ.
༡༣༣. ས་མྦོ་དྷི་པ་ཏྟོ ས [ཙ (སཱི. སྱཱ.), ཝ (པཱི.)] མ་ཧཱ་ནུ་བྷཱ་ཝོ, སི་ཏཾ ཨ་ཀཱ་སི པ་རི་སཱ་ཡ མ་ཛ྄ཛྷེ;
པུ་ཙྪིཾ་སུ བྷི་ཀྑཱུ སུ་ཝི་མུ་ཏྟ་ཙི་ཏྟཱ, ནཱ་ཀཱ་ར་ཎེ པཱ་ཏུ་ཀ་རོ་ནྟི བུ་དྡྷཱ.
༡༣༤. ཡ་མ་དྡ་སཱ་ཐ ད་ཧ་རིཾ ཀུ་མཱ་རིཾ, ཀཱ་སཱ་ཡ་ཝ་ཏྠཾ ཨ་ན་གཱ་རི་ཡཾ ཙ་ར་ནྟིཾ;
སཱ ཁོ ཏ་དཱ རཱ་ཛ་ཀ་ཉྙཱ ཨ་ཧོ་སི, ཨ་ཧཾ ཏ་དཱ ནཱ་ག་རཱ་ཛཱ ཨ་ཧོ་སིཾ.
༡༣༥. ཨཱ་དཱ་ཡ ད་ནྟཱ་ནི ག་ཛུ་ཏྟ་མ་སྶ, ཝ་གྒཱུ སུ་བྷེ ཨ་པྤ་ཊི་མེ པ་ཐ་བྱཱ;
ཡོ ལུ་དྡ་ཀོ ཀཱ་སི་པུ་རཾ ཨུ་པཱ་ག་མི, སོ ཁོ ཏ་དཱ དེ་ཝ་ད་ཏྟོ ཨ་ཧོ་སི.
༡༣༦. ཨ་ནཱ་ཝ་སཱུ་རཾ ཙི་ར་ར་ཏྟ་སཾ་སི་ཏཾ, ཨུ་ཙྩཱ་ཝ་ཙཾ [ཨུ་ཙཾ ནཱི་ཙཾ (སཱི. སྱཱ. པཱི.)] ཙ་རི་ཏ་མི་དཾ པུ་རཱ་ཎཾ;
ཝཱི་ཏ་དྡ་རོ ཝཱི་ཏ་སོ་ཀོ ཝི་ས་ལློ, ས་ཡཾ ཨ་བྷི་ཉྙཱ་ཡ ཨ་བྷཱ་སི བུ་དྡྷོ.
༡༣༧. ཨ་ཧཾ ཝོ ཏེ་ན ཀཱ་ལེ་ན, ཨ་ཧོ་སིཾ ཏ་ཏྠ བྷི་ཀྑ་ཝོ;
ནཱ་ག་རཱ་ཛཱ ཏ་དཱ ཧོ་མི [ཧོ་སིཾ (སཱི. སྱཱ. པཱི.)], ཨེ་ཝཾ དྷཱ་རེ་ཐ ཛཱ་ཏ་ཀ་ནྟི.
ཚ་དྡ་ནྟ་ཛཱ་ཏ་ཀཾ ཙ་ཏུ་ཏྠཾ.