༥༡༣. ཛ་ཡ་དྡི་ས་ཛཱ་ཏ་ཀཾ (༣)
༦༤. ཙི་ར་སྶཾ ཝ་ཏ མེ ཨུ་ད་པཱ་དི ཨ་ཛྫ, བྷ་ཀྑོ མ་ཧཱ ས་ཏྟ་མི་བྷ་ཏྟ་ཀཱ་ལེ;
ཀུ་ཏོ་སི ཀོ ཝཱ་སི ཏ་དི་ངྒྷ བྲཱུ་ཧི, ཨཱ་ཙི་ཀྑ ཛཱ་ཏིཾ ཝི་དི་ཏོ ཡ་ཐཱ་སི.
༦༥. པ་ཉྩཱ་ལ་རཱ་ཛཱ མི་ག་ཝཾ པ་ཝི་ཊྛོ, ཛ་ཡ་དྡི་སོ ནཱ་མ ཡ་དི་སྶུ་ཏོ ཏེ;
ཙ་རཱ་མི ཀ་ཙྪཱ་ནི ཝ་ནཱ་ནི ཙཱ་ཧཾ, པ་ས་དཾ ཨི་མཾ ཁཱ་ད མ་མ་ཛྫ མུ་ཉྩ.
༦༦. སེ་ནེ་ཝ ཏྭཾ པ་ཎ་སི ས་སྶ་མཱ་ནོ [ས་ཡ྄ཧ་མཱ་ནོ (སྱཱ. ཀ.)], མ་མེ་ས བྷ་ཀྑོ པ་ས་དོ ཡཾ ཝ་དེ་སི;
ཏཾ ཁཱ་དི་ཡཱ་ན པ་ས་དཾ ཛི་གྷ་ཉྙཾ [ཛི་གྷ་ཙྪཾ (?)], ཁཱ་དི་སྶཾ པ་ཙྪཱ ན ཝི་ལཱ་པ་ཀཱ་ལོ.
༦༧. ན ཙ་ཏྠི མོ་ཀྑོ མ་མ ནི་ཀྐ་ཡེ་ན [ཝི་ཀྐ་ཡེ་ན (སཱི.)], ག་ནྟྭཱ་ན པ་ཙྩཱ་ག་མ་ནཱ་ཡ པ་ཎྷེ;
ཏཾ ས་ངྐ་རཾ [ས་ངྒ་རཾ (སཱི. སྱཱ. པཱི.)] བྲཱ་ཧྨ་ཎ་སྶ་པྤ་དཱ་ཡ, ས་ཙྩཱ་ནུ་ར་ཀྑཱི པུ་ན་རཱ་ཝ་ཛི་སྶཾ.
༦༨. ཀིཾ ཀ་མྨ་ཛཱ་ཏཾ ཨ་ནུ་ཏ་པྤ་ཏེ ཏྭཾ [ཨ་ནུ་ཏ་པྤ་ཏཱི ཏཾ (སཱི. པཱི.)], པ་ཏྟཾ ས་མཱི་པཾ མ་ར་ཎ་སྶ རཱ་ཛ;
ཨཱ་ཙི་ཀྑ མེ ཏཾ ཨ་པི ས་ཀྐུ་ཎེ་མུ, ཨ་ནུ་ཛཱ་ནི་ཏུཾ ཨཱ་ག་མ་ནཱ་ཡ པ་ཎྷེ.
༦༩. ཀ་ཏཱ མ་ཡཱ བྲཱ་ཧྨ་ཎ་སྶ དྷ་ནཱ་སཱ, ཏཾ ས་ངྐ་རཾ པ་ཊི་མུ་ཀྐཾ ན མུ་ཏྟཾ;
ཏཾ ས་ངྐ་རཾ བྲཱ་ཧྨ་ཎ་སྶ་པྤ་དཱ་ཡ, ས་ཙྩཱ་ནུ་ར་ཀྑཱི པུ་ན་རཱ་ཝ་ཛི་སྶཾ.
༧༠. ཡཱ ཏེ ཀ་ཏཱ བྲཱ་ཧྨ་ཎ་སྶ དྷ་ནཱ་སཱ, ཏཾ ས་ངྐ་རཾ པ་ཊི་མུ་ཀྐཾ ན མུ་ཏྟཾ;
ཏཾ ས་ངྐ་རཾ བྲཱ་ཧྨ་ཎ་སྶ་པྤ་དཱ་ཡ, ས་ཙྩཱ་ནུ་ར་ཀྑཱི པུ་ན་རཱ་ཝ་ཛ་སྶུ.
༧༡. མུ་ཏྟོ ཙ སོ པོ་རི་སཱ་ད་སྶ [པུ་རི་སཱ་ད་སྶ (པཱི.)] ཧ་ཏྠཱ, ག་ནྟྭཱ ས་ཀཾ མ་ནྡི་རཾ ཀཱ་མ་ཀཱ་མཱི;
ཏཾ ས་ངྐ་རཾ བྲཱ་ཧྨ་ཎ་སྶ་པྤ་དཱ་ཡ, ཨཱ་མ་ནྟ་ཡཱི པུ་ཏྟ་མ་ལཱི་ན་ས་ཏྟཾ [ས་ཏྟུཾ (སྱཱ. པཱི. ཀ.)].
༧༢. ཨ་ཛྫེ་ཝ ར་ཛྫཾ ཨ་བྷི་སི་ཉྩ་ཡ་སྶུ, དྷ་མྨཾ ཙ་ར སེ་སུ པ་རེ་སུ ཙཱ་པི;
ཨ་དྷ་མྨ་ཀཱ་རོ ཙ ཏེ མཱ་ཧུ ར་ཊྛེ, ག་ཙྪཱ་མ་ཧཾ པོ་རི་སཱ་ད་སྶ ཉ་ཏྟེ [ཉ་ནྟེ (སྱཱ.)].
༧༣. ཀིཾ ཀ་མྨ ཀུ་བྦཾ ཏ་ཝ དེ་ཝ པཱ་ཝ [དེ་ཝ་པཱ་དེ (སཱི. སྱཱ. པཱི.)], ནཱ་རཱ་དྷ་ཡཱི ཏཾ ཏ་དི་ཙྪཱ་མི སོ་ཏུཾ;
ཡ་མ་ཛྫ ར་ཛྫ་མྷི ཨུ་ད་སྶ་ཡེ ཏུ་ཝཾ, ར་ཛྫ་མྤི ནི་ཙྪེ་ཡྻཾ ཏ་ཡཱ ཝི་ནཱ་ཧཾ.
༧༤. ན ཀ་མྨུ་ནཱ ཝཱ ཝ་ཙ་སཱ ཝ ཏཱ་ཏ, ཨ་པ་རཱ་དྷི་ཏོ་ཧཾ ཏུ་ཝི་ཡཾ ས་རཱ་མི;
ས་ནྡྷི་ཉྩ [ས་དྡྷིཾ ཙ (ཀ.)] ཀ་ཏྭཱ པུ་རི་སཱ་ད་ཀེ་ན, ས་ཙྩཱ་ནུ་ར་ཀྑཱི པུ་ནཱ་ཧཾ ག་མི་སྶཾ.
༧༥. ཨ་ཧཾ ག་མི་སྶཱ་མི ཨི་དྷེ་ཝ ཧོ་ཧི, ན་ཏྠི ཏ་ཏོ ཛཱི་ཝ་ཏོ ཝི་པྤ་མོ་ཀྑོ;
ས་ཙེ ཏུ་ཝཾ ག་ཙྪ་སི་ཡེ་ཝ རཱ་ཛ, ཨ་ཧ་མྤི ག་ཙྪཱ་མི ཨུ་བྷོ ན ཧོ་མ.
༧༦. ཨ་དྡྷཱ ཧི ཏཱ་ཏ ས་ཏཱ་ནེ་ས དྷ་མྨོ, མ་ར་ཎཱ ཙ མེ དུ་ཀྑ་ཏ་རཾ ཏ་ད་སྶ;
ཀ་མྨཱ་ས་པཱ་དོ ཏཾ ཡ་དཱ པ་ཙི་ཏྭཱ, པ་ས་ཡ྄ཧ ཁཱ་དེ བྷི་དཱ རུ་ཀྑ་སཱུ་ལེ.
༧༧. པཱ་ཎེ་ན ཏེ པཱ་ཎ་མ་ཧཾ ནི་མི་སྶཾ, མཱ ཏྭཾ ཨ་གཱ པོ་རི་སཱ་ད་སྶ ཉ་ཏྟེ;
ཨེ་ཏ་ཉྩ ཏེ པཱ་ཎ་མ་ཧཾ ནི་མི་སྶཾ, ཏ་སྨཱ མ་ཏཾ ཛཱི་ཝི་ཏ་སྶ ཝ་ཎྞེ་མི [ཝ་རེ་མི (སཱི.)].
༧༨. ཏ་ཏོ ཧ་ཝེ དྷི་ཏི་མཱ རཱ་ཛ་པུ་ཏྟོ, ཝ་ནྡི་ཏྭཱ མཱ་ཏུ ཙ པི་ཏུ ཙ [ཝ་ནྡི་ཏྠ མཱ་ཏུ་ཙྩ པི་ཏུ་ཙྩ (སཱི. པཱི.)] པཱ་དེ;
དུ་ཁི་ནི་སྶ མཱ་ཏཱ ནི་པ་ཏཱ [ནི་པ་ཏཱི (སཱི. པཱི.)] པ་ཐ་བྱཱ, པི་ཏཱ་སྶ པ་གྒ་ཡ྄ཧ བྷུ་ཛཱ་ནི ཀ་ནྡ་ཏི.
༧༩. ཏཾ ག་ཙྪ་ནྟཾ ཏཱ་ཝ པི་ཏཱ ཝི་དི་ཏྭཱ, པ་ར་མྨུ་ཁོ ཝ་ནྡ་ཏི པ་ཉྫ་ལཱི་ཀོ;
སོ་མོ ཙ རཱ་ཛཱ ཝ་རུ་ཎོ ཙ རཱ་ཛཱ, པ་ཛཱ་པ་ཏཱི ཙ་ནྡི་མཱ སཱུ་རི་ཡོ ཙ;
ཨེ་ཏེ་ཧི གུ་ཏྟོ པུ་རི་སཱ་ད་ཀ་མྷཱ, ཨ་ནུ་ཉྙཱ་ཏོ སོ་ཏྠི པ་ཙྩེ་ཧི ཏཱ་ཏ.
༨༠. ཡཾ ད་ཎྜ་ཀི་ར་ཉྙོ ག་ཏ་སྶ [ཡཾ ད་ཎྜ་ཀཱ་ར་ཉྙ་ག་ཏ་སྶ (པཱི.)] མཱ་ཏཱ, རཱ་མ་སྶ་ཀཱ་སི སོ་ཏྠཱ་ནཾ སུ་གུ་ཏྟཱ;
ཏཾ ཏེ ཨ་ཧཾ སོ་ཏྠཱ་ནཾ ཀ་རོ་མི, ཨེ་ཏེ་ན ས་ཙྩེ་ན ས་ར་ནྟུ དེ་ཝཱ;
ཨ་ནུ་ཉྙཱ་ཏོ སོ་ཏྠི པ་ཙྩེ་ཧི པུ་ཏྟ.
༨༡. ཨཱ་ཝཱི ར་ཧོ ཝཱ་པཱི མ་ནོ་པ་དོ་སཾ, ནཱ་ཧཾ ས་རེ ཛཱ་ཏུ མ་ལཱི་ན་ས་ཏྟེ;
ཨེ་ཏེ་ན ས་ཙྩེ་ན ས་ར་ནྟུ དེ་ཝཱ, ཨ་ནུ་ཉྙཱ་ཏོ སོ་ཏྠི པ་ཙྩེ་ཧི བྷཱ་ཏི་ཀ [བྷཱ་ཏ (སཱི.), བྷཱ་ཏཱ (སྱཱ. པཱི.)].
༨༢. ཡ་སྨཱ ཙ མེ ཨ་ན་དྷི་མ་ནོ་སི སཱ་མི, ན ཙཱ་པི མེ མ་ན་སཱ ཨ་པྤི་ཡོ་སི;
ཨེ་ཏེ་ན ས་ཙྩེ་ན ས་ར་ནྟུ དེ་ཝཱ, ཨ་ནུ་ཉྙཱ་ཏོ སོ་ཏྠི པ་ཙྩེ་ཧི སཱ་མི.
༨༣. བྲ་ཧཱ ཨུ་ཛཱུ ཙཱ་རུ་མུ་ཁོ ཀུ་ཏོ་སི, ན མཾ པ་ཛཱ་ནཱ་སི ཝ་ནེ ཝ་ས་ནྟཾ;
ལུ་དྡཾ མཾ ཉ་ཏྭཱ ‘‘པུ་རི་སཱ་ད་ཀོ’’ཏི, ཀོ སོ་ཏྠི མཱ་ཛཱ་ན་མི་དྷཱ’ཝ་ཛེ་ཡྻ.
༨༤. ཛཱ་ནཱ་མི ལུ་དྡ པུ་རི་སཱ་ད་ཀོ ཏྭཾ, ན ཏཾ ན ཛཱ་ནཱ་མི ཝ་ནེ ཝ་ས་ནྟཾ;
ཨ་ཧ་ཉྩ པུ་ཏྟོ་སྨི ཛ་ཡ་དྡི་ས་སྶ, མ་མ་ཛྫ ཁཱ་ད པི་ཏུ་ནོ པ་མོ་ཀྑཱ.
༨༥. ཛཱ་ནཱ་མི པུ་ཏྟོ་ཏི [པུ་ཏྟོ་སི (སྱཱ. ཀ.)] ཛ་ཡ་དྡི་ས་སྶ, ཏ་ཐཱ ཧི ཝོ མུ་ཁ་ཝ་ཎྞོ ཨུ་བྷི་ནྣཾ;
སུ་དུ་ཀྐ་ར་ཉྙེ་ཝ [སུ་དུ་ཀྐ་ར་ཉྩེ་ཝ (སྱཱ. པཱི. ཀ.)] ཀ་ཏཾ ཏ་ཝེ་དཾ, ཡོ མ་ཏྟུ་མི་ཙྪེ པི་ཏུ་ནོ པ་མོ་ཀྑཱ.
༨༦. ན དུ་ཀྐ་རཾ ཀི་ཉྩི མ་ཧེ་ཏྠ མ་ཉྙེ, ཡོ མ་ཏྟུ་མི་ཙྪེ པི་ཏུ་ནོ པ་མོ་ཀྑཱ;
མཱ་ཏུ ཙ [མཱ་ཏུ་ཙྩ (སཱི.)] ཧེ་ཏུ པ་ར་ལོ་ཀ ག་ནྟྭཱ [ག་མྱཱ (སཱི. སྱཱ.), ག་མྱ (པཱི.)], སུ་ཁེ་ན ས་གྒེ་ན ཙ ས་མྤ་ཡུ་ཏྟོ.
༨༧. ཨ་ཧ་ཉྩ ཁོ ཨ་ཏྟ་ནོ པཱ་པ་ཀི་རི་ཡཾ, ཨཱ་ཝཱི ར་ཧོ ཝཱ་པི ས་རེ ན ཛཱ་ཏུ;
ས་ངྑཱ་ཏ་ཛཱ་ཏཱི་མ་ར་ཎོ་ཧ་མ་སྨི, ཡ་ཐེ་ཝ མེ ཨི་དྷ ཏ་ཐཱ པ་ར་ཏྠ.
༨༨. ཁཱ་ད་ཛྫ མཾ དཱ་ནི མ་ཧཱ་ནུ་བྷཱ་ཝ, ཀ་ར་སྶུ ཀི་ཙྩཱ་ནི ཨི་མཾ ས་རཱི་རཾ;
རུ་ཀྑ་སྶ ཝཱ ཏེ པ་པ་ཏཱ་མི ཨ་གྒཱ, ཚཱ་ད་ཡ་མཱ་ནོ མ་ཡ྄ཧཾ ཏྭ་མ་དེ་སི མཾ་སཾ.
༨༩. ཨི་ད་ཉྩ ཏེ རུ་ཙྩ་ཏི རཱ་ཛ་པུ་ཏྟ, ཙ་ཛེ་སི [ཙ་ཛཱ་སི (སཱི. པཱི.)] པཱ་ཎཾ པི་ཏུ་ནོ པ་མོ་ཀྑཱ;
ཏ་སྨཱ ཧི སོ [ཏ་སྨཱ་ཏི་ཧ (སཱི. སྱཱ.)] ཏྭཾ ཏ་ར་མཱ་ན་རཱུ་པོ, ས་མྦྷ་ཉྫ ཀ་ཊྛཱ་ནི ཛ་ལེ་ཧི ཨ་གྒིཾ.
༩༠. ཏ་ཏོ ཧ་ཝེ དྷི་ཏི་མཱ རཱ་ཛ་པུ་ཏྟོ, དཱ་རུཾ ས་མཱ་ཧ་ཏྭཱ མ་ཧ་ནྟ་མ་གྒིཾ;
ས་ནྡཱི་པ་ཡི་ཏྭཱ པ་ཊི་ཝེ་ད་ཡི་ཏྠ, ཨཱ་དཱི་པི་ཏོ དཱ་ནི མ་ཧཱ་ཡ་མ་གྒི [མ་ཡཱ ཡ་ཀྑ་མ་གྒི (ཀ.)].
༩༡. ཁཱ་ད་ཛྫ མཾ དཱ་ནི པ་ས་ཡ྄ཧ་ཀཱ་རཱི, ཀིཾ མཾ མུ་ཧུཾ པེ་ཀྑ་སི ཧ་ཊྛ་ལོ་མོ;
ཏ་ཐཱ ཏ་ཐཱ ཏུ་ཡ྄ཧ་མ་ཧཾ ཀ་རོ་མི, ཡ་ཐཱ ཡ་ཐཱ མཾ ཚཱ་ད་ཡ་མཱ་ནོ ཨ་དེ་སི.
༩༢. ཀོ ཏཱ་དི་སཾ ཨ་ར་ཧ་ཏི ཁཱ་དི་ཏཱ་ཡེ, དྷ་མྨེ ཋི་ཏཾ ས་ཙྩ་ཝཱ་དིཾ ཝ་ད་ཉྙུཾ;
མུ་དྡྷཱ་པི ཏ་སྶ ཝི་ཕ་ལེ་ཡྻ ས་ཏྟ་དྷཱ, ཡོ ཏཱ་དི་སཾ ས་ཙྩ་ཝཱ་དིཾ ཨ་དེ་ཡྻ.
༩༣. ཨི་ད་ཉྷི སོ བྲཱ་ཧྨ་ཎཾ མ་ཉྙ་མཱ་ནོ, ས་སོ ཨ་ཝཱ་སེ་སི ས་ཀེ ས་རཱི་རེ;
ཏེ་ནེ་ཝ སོ ཙ་ནྡི་མཱ དེ་ཝ་པུ་ཏྟོ, ས་ས་ཏྠུ་ཏོ [ས་ས་ཊྛ་ཀོ (སྱཱ.)] ཀཱ་མ་དུ་ཧ་ཛྫ [ཀཱ་མ་རུ་ཧ་ཛྫ (ཀ.)] ཡ་ཀྑ.
༩༤. ཙ་ནྡོ ཡ་ཐཱ རཱ་ཧུ་མུ་ཁཱ པ་མུ་ཏྟོ, ཝི་རོ་ཙ་ཏེ པ་ནྣ་ར་སེ་ཝ བྷཱ་ཎུ་མཱ [བྷཱ་ནུ་མཱ (སཱི. པཱི.)];
ཨེ་ཝཾ ཏུ་ཝཾ པོ་རི་སཱ་དཱ པ་མུ་ཏྟོ, ཝི་རོ་ཙ ཀ་པི་ལེ [ཀ་མྤི་ལླ (སཱི. པཱི.), ཀ་པི་ལླེ (སྱཱ.)] མ་ཧཱ་ནུ་བྷཱ་ཝ;
ཨཱ་མོ་ད་ཡཾ པི་ཏ་རཾ མཱ་ཏ་ར་ཉྩ, ས་བྦོ ཙ ཏེ ན་ནྡ་ཏུ ཉཱ་ཏི་པ་ཀྑོ.
༩༥. ཏ་ཏོ ཧ་ཝེ དྷི་ཏི་མཱ རཱ་ཛ་པུ་ཏྟོ, ཀ་ཏ་ཉྫ་ལཱི པ་རི་ཡཱ་ཡ [པ་རི་ཡ་གཱ (སཱི.), པ་གྒ་ཡ྄ཧ (སྱཱ. པཱི.)] པོ་རི་སཱ་དཾ;
ཨ་ནུ་ཉྙཱ་ཏོ སོ་ཏྠི སུ་ཁཱི ཨ་རོ་གོ, པ་ཙྩཱ་ག་མཱ [པ་ཙྩཱ་ག (པཱི.)] ཀ་པི་ལ་མ་ལཱི་ན་ས་ཏྟཱ [ཀ་མྤི་ལླ’མ་ལཱི་ན་ས་ཏྟོ (སཱི. པཱི.), ཀ་པི་ལ’མ་ལཱི་ན་ས་ཏྟཱ (ཀ.)].
༩༦. ཏཾ ནེ་ག་མཱ ཛཱ་ན་པ་དཱ ཙ ས་བྦེ, ཧ་ཏྠཱ་རོ་ཧཱ ར་ཐི་ཀཱ པ་ཏྟི་ཀཱ ཙ;
ན་མ་སྶ་མཱ་ནཱ པ་ཉྫ་ལི་ཀཱ ཨུ་པཱ་ག་མུཾ, ན་མ་ཏྠུ ཏེ དུ་ཀྐ་ར་ཀཱ་ར་ཀོ་སཱི་ཏི.
ཛ་ཡ་དྡི་ས་ཛཱ་ཏ་ཀཾ [ཛ་ཡ་དི་ས་ཛཱ་ཏ་ཀཾ (ཀ.)] ཏ་ཏི་ཡཾ.