༥༠༨. པ་ཉྩ་པ་ཎྜི་ཏ་ཛཱ་ཏ་ཀཾ (༡༢)
༣༡༥. པ་ཉྩ པ་ཎྜི་ཏཱ ས་མཱ་ག་ཏཱ་ཏྠ, པ་ཉྷཱ མེ པ་ཊི་བྷཱ་ཏི ཏཾ སུ་ཎཱ་ཐ;
ནི་ནྡི་ཡ་མ་ཏྠཾ པ་སཾ་སི་ཡཾ ཝཱ, ཀ་སྶེ་ཝཱ་ཝི་ཀ་རེ་ཡྻ [ཀ་སྶ ཝཱ་ཝཱི་ཀ་རེ་ཡྻ (ཀ.)] གུ་ཡ྄ཧ་མ་ཏྠཾ.
༣༡༦. ཏྭཾ ཨཱ་ཝི་ཀ་རོ་ཧི བྷཱུ་མི་པཱ་ལ, བྷ་ཏྟཱ བྷཱ་ར་ས་ཧོ ཏུ་ཝཾ ཝ་དེ ཏཾ;
ཏ་ཝ ཚ་ནྡ་རུ་ཙཱི་ནི [ཚ་ནྡ་ཉྩ རུ་ཙི་ཉྩ (སཱི. པཱི.)] ས་མྨ་སི་ཏྭཱ, ཨ་ཐ ཝ་ཀྑ་ནྟི ཛ་ནི་ནྡ པ་ཉྩ དྷཱི་རཱ.
༣༡༧. ཡཱ སཱི་ལ་ཝ་ཏཱི ཨ་ན་ཉྙ་ཐེ་ཡྻཱ [ཨ་ན་ཉྙ་དྷེ་ཡྻཱ (སཱི. པཱི.)], བྷ་ཏྟུ་ཙྪ་ནྡ་ཝ་སཱ་ནུ་གཱ (པི་ཡཱ) [( ) ན་ཏྠི སཱི. པཱི. པོ་ཏྠ་ཀེ་སུ] མ་ནཱ་པཱ;
ནི་ནྡི་ཡ་མ་ཏྠཾ པ་སཾ་སི་ཡཾ ཝཱ, བྷ་རི་ཡཱ་ཡཱ་ཝི་ཀ་རེ་ཡྻ [བྷ་རི་ཡཱ་ཡ ཝཱ་ཝཱི་ཀ་རེ་ཡྻ (ཀ.)] གུ་ཡ྄ཧ་མ་ཏྠཾ.
༣༡༨. ཡོ ཀི་ཙྪ་ག་ཏ་སྶ ཨཱ་ཏུ་ར་སྶ, ས་ར་ཎཾ ཧོ་ཏི ག་ཏཱི པ་རཱ་ཡ་ན་ཉྩ;
ནི་ནྡི་ཡ་མ་ཏྠཾ པ་སཾ་སི་ཡཾ ཝཱ, ས་ཁི་ནོ ཝཱ་ཝི་ཀ་རེ་ཡྻ གུ་ཡ྄ཧ་མ་ཏྠཾ.
༣༡༩. ཛེ་ཊྛོ [ཡོ ཛེ་ཊྛོ (སྱཱ.)] ཨ་ཐ མ་ཛ྄ཛྷི་མོ ཀ་ནི་ཊྛོ, ཡོ [སོ (སཱི. སྱཱ. པཱི.)] ཙེ སཱི་ལ་ས་མཱ་ཧི་ཏོ ཋི་ཏ་ཏྟོ;
ནི་ནྡི་ཡ་མ་ཏྠཾ པ་སཾ་སི་ཡཾ ཝཱ, བྷཱ་ཏུ ཝཱ་ཝཱི་ཀ་རེ་ཡྻ གུ་ཡ྄ཧ་མ་ཏྠཾ.
༣༢༠. ཡོ ཝེ པི་ཏུ་ཧ་ད་ཡ་སྶ པ་དྡྷ་གཱུ [པ་ཏྠ་གཱུ (སྱཱ.), པ་ཏྟ་གཱུ (ཀ.)], ཨ་ནུ་ཛཱ་ཏོ པི་ཏ་རཾ ཨ་ནོ་མ་པ་ཉྙོ;
ནི་ནྡི་ཡ་མ་ཏྠཾ པ་སཾ་སི་ཡཾ ཝཱ, པུ་ཏྟ་སྶཱ་ཝི་ཀ་རེ་ཡྻ [པུ་ཏྟ་སྶ ཝཱ་ཝཱི་ཀ་རེ་ཡྻ (ཀ.)] གུ་ཡ྄ཧ་མ་ཏྠཾ.
༣༢༡. མཱ་ཏཱ དྭི་པ་དཱ་ཛ་ནི་ནྡ་སེ་ཊྛ, ཡཱ ནཾ [ཡོ ཏཾ (སཱི. པཱི.)] པོ་སེ་ཏི ཚ་ནྡ་སཱ པི་ཡེ་ན;
ནི་ནྡི་ཡ་མ་ཏྠཾ པ་སཾ་སི་ཡཾ ཝཱ, མཱ་ཏུ་ཡཱ་ཝཱི་ཀ་རེ་ཡྻ [མཱ་ཏུ་ཡཱ ཝཱ་ཝཱི་ཀ་རེ་ཡྻ (ཀ.)] གུ་ཡ྄ཧ་མ་ཏྠཾ.
༣༢༢. གུ་ཡ྄ཧ་སྶ ཧི གུ་ཡ྄ཧ་མེ་ཝ སཱ་དྷུ, ན ཧི གུ་ཡ྄ཧ་སྶ པ་ས་ཏྠ་མཱ་ཝི་ཀ་མྨཾ;
ཨ་ནི་པྥ་ནྣ་ཏཱ [ཨ་ནི་པྥཱ་དཱ་ཡ (སཱི. པཱི.), ཨ་ནི་པྥ་ནྣ་ཏཱ་ཡ (སྱཱ.), ཨཱ ནི་པྥཱ་དཱ (?)] ས་ཧེ་ཡྻ དྷཱི་རོ, ནི་པྥ་ནྣོ་ཝ [ནི་པྥ་ནྣ་ཏྠོ (སཱི. པཱི.), ནི་པྥ་ནྣ་ཏྠོ་ཝ (སྱཱ.)] ཡ་ཐཱ་སུ་ཁཾ བྷ་ཎེ་ཡྻ.
༣༢༣. ཀིཾ ཏྭཾ ཝི་མ་ནོ་སི རཱ་ཛ་སེ་ཊྛ, དྭི་པ་ད་ཛ་ནི་ནྡ [དི་པ་དི་ནྡ (སཱི. སྱཱ. པཱི.)] ཝ་ཙ་ནཾ སུ་ཎོ་མ མེ་ཏཾ [ནེ་ཏཾ (སཱི. པཱི.), ཏེ་ཏཾ (སྱཱ.)];
ཀིཾ ཙི་ནྟ་ཡ་མཱ་ནོ དུ་མྨ་ནོ་སི, ནཱུ་ན དེ་ཝ ཨ་པ་རཱ་དྷོ ཨ་ཏྠི མ་ཡ྄ཧཾ.
༣༢༤. ‘‘པ་ཎྷེ [པ་ཉྙོ (སཱི. པཱི.), པ་ཉྷེ (སྱཱ.), པ་ནྷེ (ཀ.)] ཝ་ཛ྄ཛྷོ མ་ཧོ་ས་དྷོ’’ཏི, ཨཱ་ཎ་ཏྟོ མེ ཝ་དྷཱ་ཡ བྷཱུ་རི་པ་ཉྙོ;
ཏཾ ཙི་ནྟ་ཡ་མཱ་ནོ དུ་མྨ་ནོ་སྨི, ན ཧི དེ་ཝཱི ཨ་པ་རཱ་དྷོ ཨ་ཏྠི ཏུ་ཡ྄ཧཾ.
༣༢༥. ཨ་བྷི་དོ་ས་ག་ཏོ དཱ་ནི ཨེ་ཧི་སི, ཀིཾ སུ་ཏྭཱ ཀིཾ ས་ངྐ་ཏེ མ་ནོ ཏེ;
ཀོ ཏེ ཀི་མ་ཝོ་ཙ བྷཱུ་རི་པ་ཉྙ, ཨི་ངྒྷ ཝ་ཙ་ནཾ སུ་ཎོ་མ བྲཱུ་ཧི མེ་ཏཾ.
༣༢༦. ‘‘པ་ཎྷེ ཝ་ཛ྄ཛྷོ མ་ཧོ་ས་དྷོ’’ཏི, ཡ་དི ཏེ མ་ནྟ་ཡི་ཏཾ ཛ་ནི་ནྡ དོ་སཾ;
བྷ་རི་ཡཱ་ཡ ར་ཧོ་ག་ཏོ ཨ་སཾ་སི, གུ་ཡ྄ཧཾ པཱ་ཏུ་ཀ་ཏཾ སུ་ཏཾ མ་མེ་ཏཾ.
༣༢༧. ཡཾ སཱ་ལ་ཝ་ན་སྨིཾ སེ་ན་ཀོ, པཱ་པ་ཀ་མྨཾ ཨ་ཀཱ་སི ཨ་ས་བྦྷི་རཱུ་པཾ;
ས་ཁི་ནོ་ཝ ར་ཧོ་ག་ཏོ ཨ་སཾ་སི, གུ་ཡ྄ཧཾ པཱ་ཏུ་ཀ་ཏཾ སུ་ཏཾ མ་མེ་ཏཾ.
༣༢༨. པུ་ཀྐུ་ས [པ་ཀྐུ་ས (ཀ.) ཛཱ. ༡.༧.༤༡ པ་ཎྞ་ཛཱ་ཏ་ཀེ པ་སྶི་ཏ་བྦཾ] པུ་རི་ས་སྶ ཏེ ཛ་ནི་ནྡ, ཨུ་པྤ་ནྣོ རོ་གོ ཨ་རཱ་ཛ་ཡུ་ཏྟོ;
བྷཱ་ཏུ་ཉྩ [བྷཱ་ཏུ་ཙྩ (སཱི. པཱི.), བྷཱ་ཏུ་ཝ (སྱཱ.)] ར་ཧོ་ག་ཏོ ཨ་སཾ་སི, གུ་ཡ྄ཧཾ པཱ་ཏུ་ཀ་ཏཾ སུ་ཏཾ མ་མེ་ཏཾ.
༣༢༩. ཨཱ་བཱ་དྷོ་ཡཾ ཨ་ས་བྦྷི་རཱུ་པོ, ཀཱ་མི་ནྡོ [ཀཱ་ཝི་ནྡོ (སཱི. པཱི.)] ན་ར་དེ་ཝེ་ན ཕུ་ཊྛོ;
པུ་ཏྟ་སྶ ར་ཧོ་ག་ཏོ ཨ་སཾ་སི, གུ་ཡ྄ཧཾ པཱ་ཏུ་ཀ་ཏཾ སུ་ཏཾ མ་མེ་ཏཾ.
༣༣༠. ཨ་ཊྛ་ཝ་ངྐཾ མ་ཎི་ར་ཏ་ནཾ ཨུ་ལཱ༹་རཾ, ས་ཀྐོ ཏེ ཨ་ད་དཱ པི་ཏཱ་མ་ཧ་སྶ;
དེ་ཝི་ནྡ་སྶ ག་ཏཾ ཏ་ད་ཛྫ ཧ་ཏྠཾ [དེ་ཝི་ནྡ་སྶ ཏ་ད་ཛྫ ཧ་ཏྠ་ག་ཏཾ (ཀ.)], མཱ་ཏུ་ཉྩ ར་ཧོ་ག་ཏོ ཨ་སཾ་སི;
གུ་ཡ྄ཧཾ པཱ་ཏུ་ཀ་ཏཾ སུ་ཏཾ མ་མེ་ཏཾ.
༣༣༡. གུ་ཡ྄ཧ་སྶ ཧི གུ་ཡ྄ཧ་མེ་ཝ སཱ་དྷུ, ན ཧི གུ་ཡ྄ཧ་སྶ པ་ས་ཏྠ་མཱ་ཝི་ཀ་མྨཾ;
ཨ་ནི་པྥ་ནྣ་ཏཱ ས་ཧེ་ཡྻ དྷཱི་རོ, ནི་པྥ་ནྣོ་ཝ ཡ་ཐཱ་སུ་ཁཾ བྷ་ཎེ་ཡྻ.
༣༣༢. ན གུ་ཡ྄ཧ་མ་ཏྠཾ ཝི་ཝ་རེ་ཡྻ, ར་ཀྑེ་ཡྻ ནཾ ཡ་ཐཱ ནི་དྷིཾ;
ན ཧི པཱ་ཏུ་ཀ་ཏོ སཱ་དྷུ, གུ་ཡ྄ཧོ ཨ་ཏྠོ པ་ཛཱ་ན་ཏཱ.
༣༣༣. ཐི་ཡཱ གུ་ཡ྄ཧཾ ན སཾ་སེ་ཡྻ, ཨ་མི་ཏྟ་སྶ ཙ པ་ཎྜི་ཏོ;
ཡོ ཙཱ་མི་སེ་ན སཾ་ཧཱི་རོ, ཧ་ད་ཡ་ཏྠེ་ནོ ཙ ཡོ ན་རོ.
༣༣༤. གུ་ཡ྄ཧ་མ་ཏྠཾ ཨ་ས་མྦུ་དྡྷཾ, ས་མྦོ་དྷ་ཡ་ཏི ཡོ ན་རོ;
མ་ནྟ་བྷེ་ད་བྷ་ཡཱ ཏ་སྶ, དཱ་ས་བྷཱུ་ཏོ ཏི་ཏི་ཀྑ་ཏི.
༣༣༥. ཡཱ་ཝ་ནྟོ པུ་རི་ས་སྶ་ཏྠཾ, གུ་ཡ྄ཧཾ ཛཱ་ན་ནྟི མ་ནྟི་ནཾ;
ཏཱ་ཝ་ནྟོ ཏ་སྶ ཨུ་བྦེ་གཱ, ཏ་སྨཱ གུ་ཡ྄ཧཾ ན ཝི་སྶ་ཛེ.
༣༣༦. ཝི་ཝི་ཙྩ བྷཱ་སེ་ཡྻ དི་ཝཱ ར་ཧ་སྶཾ, ར་ཏྟིཾ གི་རཾ ནཱ་ཏི་ཝེ་ལཾ པ་མུ་ཉྩེ;
ཨུ་པ་སྶུ་ཏི་ཀཱ ཧི སུ་ཎ་ནྟི མ་ནྟཾ, ཏ་སྨཱ མ་ནྟོ ཁི་པྤ་མུ་པེ་ཏི བྷེ་ད་ནྟི.
པ་ཉྩ་པ་ཎྜི་ཏ་ཛཱ་ཏ་ཀཾ དྭཱ་ད་ས་མཾ.