༥༠༧. མ་ཧཱ་པ་ལོ་བྷ་ན་ཛཱ་ཏ་ཀཾ (༡༡)
༢༨༤. བྲ་ཧྨ་ལོ་ཀཱ ཙ་ཝི་ཏྭཱ་ན, དེ་ཝ་པུ་ཏྟོ མ་ཧི་དྡྷི་ཀོ;
ར་ཉྙོ པུ་ཏྟོ ཨུ་ད་པཱ་དི, ས་བྦ་ཀཱ་མ་ས་མི་དྡྷི་སུ.
༢༨༥. ཀཱ་མཱ ཝཱ ཀཱ་མ་ས་ཉྙཱ ཝཱ, བྲ་ཧྨ་ལོ་ཀེ ན ཝི་ཛྫ་ཏི;
སྭཱ་སྶུ [ཡྭཱ་སྶ (སཱི.)] ཏཱ་ཡེ་ཝ ས་ཉྙཱ་ཡ, ཀཱ་མེ་ཧི ཝི་ཛི་གུ་ཙྪ་ཐ.
༢༨༦. ཏ་སྶ ཙ་ནྟེ་པུ་རེ ཨཱ་སི, ཛྷཱ་ནཱ་གཱ་རཾ སུ་མཱ་པི་ཏཾ;
སོ ཏ་ཏྠ པ་ཊི་ས་ལླཱི་ནོ [པ་ཊི་ས་ལླཱ་ནོ (ཀ.)], ཨེ་ཀོ ར་ཧ་སི ཛྷཱ་ཡ་ཐ.
༢༨༧. ས རཱ་ཛཱ པ་རི་དེ་ཝེ་སི, པུ་ཏྟ་སོ་ཀེ་ན ཨ་ཊྚི་ཏོ;
ཨེ་ཀ་པུ་ཏྟོ ཙ་ཡཾ མ་ཡ྄ཧཾ, ན ཙ ཀཱ་མཱ་ནི བྷུ་ཉྫ་ཏི.
༢༨༨. ཀོ ནུ ཁྭེ་ཏྠ [ཁེ་ཏྠ (སཱི. པཱི.)] ཨུ་པཱ་ཡོ སོ, ཀོ ཝཱ ཛཱ་ནཱ་ཏི ཀི་ཉྩ་ནཾ;
ཡོ [ཀོ (སཱི. པཱི.)] མེ པུ་ཏྟཾ པ་ལོ་བྷེ་ཡྻ, ཡ་ཐཱ ཀཱ་མཱ་ནི པ་ཏྠ་ཡེ.
༢༨༩. ཨ་ཧུ ཀུ་མཱ་རཱི ཏ་ཏྠེ་ཝ, ཝ་ཎྞ་རཱུ་པ་ས་མཱ་ཧི་ཏཱ;
ཀུ་ས་ལཱ ན་ཙྩ་གཱི་ཏ་སྶ, ཝཱ་དི་ཏེ ཙ པ་ད་ཀྑི་ཎཱ.
༢༩༠. སཱ ཏ་ཏྠ ཨུ་པ་ས་ངྐ་མྨ, རཱ་ཛཱ་ནཾ ཨེ་ཏ་ད་བྲ་ཝི;
ཨ་ཧཾ ཁོ ནཾ པ་ལོ་བྷེ་ཡྻཾ, ས་ཙེ བྷ་ཏྟཱ བྷ་ཝི་སྶ་ཏི.
༢༩༡. ཏཾ ཏ་ཐཱ་ཝཱ་དི་ནིཾ རཱ་ཛཱ, ཀུ་མཱ་རིཾ ཨེ་ཏ་ད་བྲ་ཝི;
ཏྭ་ཉྙེ་ཝ ནཾ པ་ལོ་བྷེ་ཧི, ཏ་ཝ བྷ་ཏྟཱ བྷ་ཝི་སྶ་ཏི.
༢༩༢. སཱ ཙ ཨ་ནྟེ་པུ་རཾ ག་ནྟྭཱ, བ་ཧུཾ ཀཱ་མུ་པ་སཾ་ཧི་ཏཾ;
ཧ་ད་ཡ་ངྒ་མཱ པེ་མ་ནཱི་ཡཱ, ཙི་ཏྲཱ གཱ་ཐཱ ཨ་བྷཱ་ས་ཐ.
༢༩༣. ཏ་སྶཱ ཙ གཱ་ཡ་མཱ་ནཱ་ཡ, ས་དྡཾ སུ་ཏྭཱ་ན ནཱ་རི་ཡཱ;
ཀཱ་མ་ཙྪ་ནྡ་སྶ ཨུ་པྤ་ཛྫི, ཛ་ནཾ སོ པ་རི་པུ་ཙྪ་ཐ.
༢༩༤. ཀ་སྶེ་སོ ས་དྡོ ཀོ ཝཱ སོ, བྷ་ཎ་ཏི ཨུ་ཙྩཱ་ཝ་ཙཾ བ་ཧུཾ;
ཧ་ད་ཡ་ངྒ་མཾ པེ་མ་ནཱི་ཡཾ, ཨ་ཧོ [ཨ་ཐོ (སཱི. པཱི.)] ཀ་ཎྞ་སུ་ཁཾ མ་མ.
༢༩༥. ཨེ་སཱ ཁོ པ་མ་དཱ དེ་ཝ, ཁི་ཌྜཱ ཨེ་སཱ ཨ་ན་པྤི་ཀཱ [ཨ་ན་པྤ་ཀཱ (ཀ.)];
ས་ཙེ ཏྭཾ ཀཱ་མེ བྷུ་ཉྫེ་ཡྻ, བྷི་ཡྻོ བྷི་ཡྻོ ཚཱ་དེ་ཡྻུ ཏཾ.
༢༩༦. ཨི་ངྒྷ ཨཱ་ག་ཙྪ་ཏོ་རེ་ན [ཨཱ་ག་ཙྪ་ཏོ་རེ་ནཾ (ཀ.) ཨཱ་ག་ཙྪ་ཏུ + ཨོ་རེ་ན], ཨ་ཝི་དཱུ་ར་མྷི གཱ་ཡ་ཏུ;
ཨ་སྶ་མ་སྶ ས་མཱི་པ་མྷི, ས་ནྟི་ཀེ མ་ཡ྄ཧཾ གཱ་ཡ་ཏུ.
༢༩༧. ཏི་རོ་ཀུ་ཊྚ་མྷི གཱ་ཡི་ཏྭཱ, ཛྷཱ་ནཱ་གཱ་ར་མྷི པཱ་ཝི་སི;
བ་ནྡྷི ནཾ [བྷ་ནྡྷི་ཏུཾ (སྱཱ. ཀ.)] ཨ་ནུ་པུ་བྦེ་ན, ཨཱ་ར་ཉྙ་མི་ཝ ཀུ་ཉྫ་རཾ.
༢༩༨. ཏ་སྶ [ཏ་སྶཱ (སྱཱ.)] ཀཱ་མ་ར་སཾ ཉ་ཏྭཱ, ཨི་སྶཱ་དྷ་མྨོ ཨ་ཛཱ་ཡ་ཐ;
‘‘ཨ་ཧ་མེ་ཝ ཀཱ་མེ བྷུ་ཉྫེ་ཡྻཾ, མཱ ཨ་ཉྙོ པུ་རི་སོ ཨ་ཧུ’’.
༢༩༩. ཏ་ཏོ ཨ་སིཾ ག་ཧེ་ཏྭཱ་ན, པུ་རི་སེ ཧ་ནྟུཾ ཨུ་པ་ཀྐ་མི;
ཨ་ཧ་མེ་ཝེ་ཀོ བྷུ་ཉྫི་སྶཾ, མཱ ཨ་ཉྙོ པུ་རི་སོ སི་ཡཱ.
༣༠༠. ཏ་ཏོ ཛཱ་ན་པ་དཱ ས་བྦེ, ཝི་ཀྐ་ནྡིཾ་སུ ས་མཱ་ག་ཏཱ;
པུ་ཏྟོ ཏྱཱ་ཡཾ མ་ཧཱ་རཱ་ཛ, ཛ་ནཾ ཧེ་ཋེ་ཏྱ་དཱུ་ས་ཀཾ.
༣༠༡. ཏ་ཉྩ རཱ་ཛཱ ཝི་ཝཱ་ཧེ་སི [ནི་ཝཱ་ཧེ་སི (སྱཱ.), ཝི་ཧཱ་ཧེ་སི (པཱི.)], ས་མྷཱ ར་ཊྛཱ ཙ [ར་ཊྛཱ་ཏོ (སཱི. པཱི.), ར་ཊྛ་ཏོ (ཀ.)] ཁ་ཏྟི་ཡོ;
ཡཱ་ཝ་ཏཱ ཝི་ཛི་ཏཾ མ་ཡ྄ཧཾ, ན ཏེ ཝ་ཏྠ་བྦ [ཝ་ཏྟ་བྦ (སཱི. པཱི.)] ཏཱ་ཝ་དེ.
༣༠༢. ཏ་ཏོ སོ བྷ་རི་ཡ་མཱ་དཱ་ཡ, ས་མུ་དྡཾ ཨུ་པ་ས་ངྐ་མི;
པ་ཎྞ་སཱ་ལཾ ཀ་རི་ཏྭཱ་ན, ཝ་ན་མུ་ཉྪཱ་ཡ པཱ་ཝི་སི.
༣༠༣. ཨ་ཐེ་ཏྠ ཨི་སི མཱ་ག་ཙྪི, ས་མུ་དྡཾ ཨུ་པ་རཱུ་པ་རི;
སོ ཏ་སྶ གེ་ཧཾ པཱ་ཝེ་ཀྑི, བྷ་ཏྟ་ཀཱ་ལེ ཨུ་པ་ཊྛི་ཏེ.
༣༠༤. ཏ་ཉྩ བྷ་རི་ཡཱ པ་ལོ་བྷེ་སི, པ་སྶ ཡཱ་ཝ སུ་དཱ་རུ་ཎཾ;
ཙུ་ཏོ སོ བྲ་ཧྨ་ཙ་རི་ཡ་མྷཱ, ཨི་དྡྷི་ཡཱ པ་རི་ཧཱ་ཡ་ཐ.
༣༠༥. རཱ་ཛ་པུ་ཏྟོ ཙ ཨུ་ཉྪཱ་ཏོ, ཝ་ན་མཱུ་ལ་ཕ་ལཾ བ་ཧུཾ;
སཱ་ཡཾ ཀཱ་ཛེ་ན [ཀཱ་ཙེ་ན (པཱི.)] ཨཱ་དཱ་ཡ, ཨ་སྶ་མཾ ཨུ་པ་ས་ངྐ་མི.
༣༠༦. ཨི་སཱི ཙ ཁ་ཏྟི་ཡཾ དི་སྭཱ, ས་མུ་དྡཾ ཨུ་པ་ས་ངྐ་མི;
‘‘ཝེ་ཧཱ་ཡ་སཾ ག་མི་སྶ’’ནྟི, སཱི་ད་ཏེ སོ མ་ཧ་ཎྞ་ཝེ.
༣༠༧. ཁ་ཏྟི་ཡོ ཙ ཨི་སིཾ དི་སྭཱ, སཱི་ད་མཱ་ནཾ མ་ཧ་ཎྞ་ཝེ;
ཏ་སྶེ་ཝ ཨ་ནུ་ཀ་མྤཱ་ཡ, ཨི་མཱ གཱ་ཐཱ ཨ་བྷཱ་ས་ཐ.
༣༠༨. ཨ་བྷི་ཛྫ་མཱ་ནེ ཝཱ་རི་སྨིཾ, ས་ཡཾ ཨཱ་ག་མྨ ཨི་དྡྷི་ཡཱ;
མི་སྶཱི་བྷཱ་ཝི་ཏྠི་ཡཱ ག་ནྟྭཱ, སཾ་སཱི་ད་སི མ་ཧ་ཎྞ་ཝེ.
༣༠༩. ཨཱ་ཝ་ཊྚ་ནཱི མ་ཧཱ་མཱ་ཡཱ, བྲ་ཧྨ་ཙ་རི་ཡ་ཝི་ཀོ་པ་ནཱ;
སཱི་ད་ནྟི ནཾ ཝི་དི་ཏྭཱ་ན, ཨཱ་ར་ཀཱ པ་རི་ཝ་ཛྫ་ཡེ.
༣༡༠. ཨ་ན་ལཱ མུ་དུ་ས་མྦྷཱ་སཱ, དུ་པྤཱུ་རཱ ཏཱ ན་དཱི་ས་མཱ;
སཱི་ད་ནྟི ནཾ ཝི་དི་ཏྭཱ་ན, ཨཱ་ར་ཀཱ པ་རི་ཝ་ཛྫ་ཡེ.
༣༡༡. ཡཾ ཨེ་ཏཱ ཨུ་པ་སེ་ཝ་ནྟི, ཚ་ནྡ་སཱ ཝཱ དྷ་ནེ་ན ཝཱ;
ཛཱ་ཏ་ཝེ་དོ་ཝ སཾ ཋཱ་ནཾ, ཁི་པྤཾ ཨ་ནུ་ད་ཧ་ནྟི ནཾ.
༣༡༢. ཁ་ཏྟི་ཡ་སྶ ཝ་ཙོ སུ་ཏྭཱ, ཨི་སི་སྶ ནི་བྦི་དཱ ཨ་ཧུ;
ལ་དྡྷཱ པོ་རཱ་ཎ་ཀཾ མ་གྒཾ, ག་ཙྪ་ཏེ སོ ཝི་ཧཱ་ཡ་སཾ.
༣༡༣. ཁ་ཏྟི་ཡོ ཙ ཨི་སིཾ དི་སྭཱ, ག་ཙྪ་མཱ་ནཾ ཝི་ཧཱ་ཡ་སཾ;
སཾ་ཝེ་གཾ ཨ་ལ་བྷཱི དྷཱི་རོ, པ་བྦ་ཛྫཾ ས་མ་རོ་ཙ་ཡི.
༣༡༤. ཏ་ཏོ སོ པ་བྦ་ཛི་ཏྭཱ་ན, ཀཱ་མ་རཱ་གཾ ཝི་རཱ་ཛ་ཡི;
ཀཱ་མ་རཱ་གཾ ཝི་རཱ་ཛེ་ཏྭཱ, བྲ་ཧྨ་ལོ་ཀཱུ་པ་གོ ཨ་ཧཱུ་ཏི.
མ་ཧཱ་པ་ལོ་བྷ་ན་ཛཱ་ཏ་ཀཾ ཨེ་ཀཱ་ད་ས་མཾ.