༥༠༤. བྷ་ལླཱ་ཏི་ཡ་ཛཱ་ཏ་ཀཾ (༨)
༡༨༦. བྷ་ལླཱ་ཏི་ཡོ [བྷ་ལླཱ་ཊི་ཡོ (སཱི. པཱི.)] ནཱ་མ ཨ་ཧོ་སི རཱ་ཛཱ, ར་ཊྛཾ པ་ཧཱ་ཡ མི་ག་ཝཾ ཨ་ཙཱ་རི སོ;
ཨ་ག་མཱ གི་རི་ཝ་རཾ ག་ནྡྷ་མཱ་ད་ནཾ, སུ་པུ་པྥི་ཏཾ [ས་མྤུ་པྥི་ཏཾ (སཱི. པཱི.)] ཀི་མྤུ་རི་སཱ་ནུ་ཙི་ཎྞཾ.
༡༨༧. སཱ་ལཱུ༹་ར་ས་ངྒྷ་ཉྩ ནི་སེ་དྷ་ཡི་ཏྭཱ, དྷ་ནུཾ [དྷ་ནུ (སཱི. སྱཱ. པཱི.)] ཀ་ལཱ་པ་ཉྩ སོ ནི་ཀྑི་པི་ཏྭཱ;
ཨུ་པཱ་ག་མི ཝ་ཙ་ནཾ ཝ་ཏྟུ་ཀཱ་མོ, ཡ་ཏྠ་ཊྛི་ཏཱ ཀི་མྤུ་རི་སཱ ཨ་ཧེ་སུཾ.
༡༨༨. ཧི་མ་ཙྩ་ཡེ ཧེ་མ་ཝ་ཏཱ་ཡ ཏཱི་རེ, ཀི་མི་དྷ་ཊྛི་ཏཱ མ་ནྟ་ཡ་ཝ྄ཧོ ཨ་བྷི་ཎྷཾ;
པུ་ཙྪཱ་མི ཝོ མཱ་ནུ་ས་དེ་ཧ་ཝ་ཎྞེ, ཀ་ཐཾ ནུ [ཀ་ཐཾ ཝོ (སཱི. སྱཱ. པཱི.)] ཛཱ་ན་ནྟི མ་ནུ་སྶ་ལོ་ཀེ.
༡༨༩. མ་ལླཾ གི་རིཾ པ་ཎྜ་ར་ཀཾ ཏི་ཀཱུ་ཊཾ, སཱི་ཏོ་ད་ཀཱ [སཱི་ཏོ་དི་ཡཱ (སཱི. པཱི.), སཱི་ཏོ་དི་ཀཱ (?)] ཨ་ནུ་ཝི་ཙ་རཱ་མ ན་ཛྫོ;
མི་གཱ མ་ནུ་སྶཱ་ཝ ནི་བྷཱ་ས་ཝ་ཎྞཱ, ཛཱ་ན་ནྟི ནོ ཀི་མྤུ་རི་སཱ་ཏི ལུ་དྡ.
༡༩༠. སུ་ཀི་ཙྪ་རཱུ་པཾ པ་རི་དེ་ཝ་ཡ་ཝ྄ཧོ [པ་རི་དེ་ཝ་ཐ་ཝ྄ཧོ (?) མོ་གྒ་ལླཱ་ན་བྱཱ་ཀ་ར་ཎེ ༦.༣༨ སུ་ཏྟཾ], ཨཱ་ལི་ངྒི་ཏོ ཙཱ་སི པི་ཡོ པི་ཡཱ་ཡ;
པུ་ཙྪཱ་མི ཝོ མཱ་ནུ་ས་དེ་ཧ་ཝ་ཎྞེ, ཀི་མི་དྷ ཝ་ནེ རོ་ད་ཐ ཨ་པྤ་ཏཱི་ཏཱ.
༡༩༡. སུ་ཀི་ཙྪ་རཱུ་པཾ པ་རི་དེ་ཝ་ཡ་ཝ྄ཧོ, ཨཱ་ལི་ངྒི་ཏོ ཙཱ་སི པི་ཡོ པི་ཡཱ་ཡ;
པུ་ཙྪཱ་མི ཝོ མཱ་ནུ་ས་དེ་ཧ་ཝ་ཎྞེ, ཀི་མི་དྷ ཝ་ནེ ཝི་ལ་པ་ཐ ཨ་པྤ་ཏཱི་ཏཱ.
༡༩༢. སུ་ཀི་ཙྪ་རཱུ་པཾ པ་རི་དེ་ཝ་ཡ་ཝ྄ཧོ, ཨཱ་ལི་ངྒི་ཏོ ཙཱ་སི པི་ཡོ པི་ཡཱ་ཡ;
པུ་ཙྪཱ་མི ཝོ མཱ་ནུ་ས་དེ་ཧ་ཝ་ཎྞེ, ཀི་མི་དྷ ཝ་ནེ སོ་ཙ་ཐ ཨ་པྤ་ཏཱི་ཏཱ.
༡༩༣. མ་ཡེ་ཀ་ར་ཏྟཾ [ར་ཏྟིཾ (པཱི.)] ཝི་པྤ་ཝ་སི་མྷ ལུ་དྡ, ཨ་ཀཱ་མ་ཀཱ ཨ་ཉྙ་མ་ཉྙཾ ས་ར་ནྟཱ;
ཏ་མེ་ཀ་ར་ཏྟཾ ཨ་ནུ་ཏ་པྤ་མཱ་ནཱ, སོ་ཙཱ་མ ‘‘སཱ ར་ཏྟི པུ་ནཾ ན ཧེ་སྶ་ཏི’’.
༡༩༤. ཡ་མེ་ཀ་ར་ཏྟཾ ཨ་ནུ་ཏ་པྤ་ཐེ་ཏཾ, དྷ་ནཾ ཝ ན་ཊྛཾ པི་ཏ་རཾ ཝ པེ་ཏཾ;
པུ་ཙྪཱ་མི ཝོ མཱ་ནུ་ས་དེ་ཧ་ཝ་ཎྞེ, ཀ་ཐཾ ཝི་ནཱ ཝཱ་ས་མ་ཀ་པྤ་ཡི་ཏྠ.
༡༩༥. ཡ་མི་མཾ [ཡ་ཡི་མཾ (ཀ. སཱི.)] ན་དིཾ པ་སྶ་སི སཱི་གྷ་སོ་ཏཾ, ནཱ་ནཱ་དུ་མ་ཙྪཱ་ད་ནཾ སེ་ལ་ཀཱུ་ལཾ [དུ་མ་ཙྪ་ད་ནཾ སེ་ལ་ཀཱུ་ཊཾ (སཱི. པཱི.), དུ་མ་ས་ཉྪ་ནྣཾ སེ་ལ་ཀཱུ་ལཾ (ཀ.)];
ཏཾ མེ པི་ཡོ ཨུ་ཏྟ་རི ཝ་སྶ་ཀཱ་ལེ, མ་མ་ཉྩ མ་ཉྙཾ ཨ་ནུ་བ་ནྡྷ་ཏཱི་ཏི.
༡༩༦. ཨ་ཧ་ཉྩ ཨ་ངྐོ་ལ་ཀ་མོ་ཙི་ནཱ་མི, ཨ་ཏི་མུ་ཏྟ་ཀཾ ས་ཏྟ་ལི་ཡོ་ཐི་ཀ་ཉྩ;
‘‘པི་ཡོ ཙ མེ ཧེ་ཧི་ཏི མཱ་ལ་བྷཱ་རཱི, ཨ་ཧ་ཉྩ ནཾ མཱ་ལི་ནཱི ཨ་ཛ྄ཛྷུ་པེ་སྶཾ’’.
༡༩༧. ཨ་ཧ་ཉྩི་དཾ ཀུ་ར་ཝ་ཀ་མོ་ཙི་ནཱ་མི, ཨུ་དྡཱ་ལ་ཀཱ པཱ་ཊ་ལི་སི་ནྡྷུ་ཝཱ་ར་ཀཱ [སི་ནྡྷུ་ཝཱ་རི་ཏཱ (སྱཱ. པཱི. ཀ.)];
‘‘པི་ཡོ ཙ མེ ཧེ་ཧི་ཏི མཱ་ལ་བྷཱ་རཱི, ཨ་ཧ་ཉྩ ནཾ མཱ་ལི་ནཱི ཨ་ཛ྄ཛྷུ་པེ་སྶཾ’’.
༡༩༨. ཨ་ཧ་ཉྩ སཱ་ལ་སྶ སུ་པུ་པྥི་ཏ་སྶ, ཨོ་ཙེ་ཡྻ པུ་པྥཱ་ནི ཀ་རོ་མི མཱ་ལཾ;
‘‘པི་ཡོ ཙ མེ ཧེ་ཧི་ཏི མཱ་ལ་བྷཱ་རཱི, ཨ་ཧ་ཉྩ ནཾ མཱ་ལི་ནཱི ཨ་ཛ྄ཛྷུ་པེ་སྶཾ’’.
༡༩༩. ཨ་ཧ་ཉྩ སཱ་ལ་སྶ སུ་པུ་པྥི་ཏ་སྶ, ཨོ་ཙེ་ཡྻ པུ་པྥཱ་ནི ཀ་རོ་མི བྷཱ་རཾ;
ཨི་ད་ཉྩ ནོ ཧེ་ཧི་ཏི ས་ནྠ་ར་ཏྠཾ, ཡ་ཏྠ་ཛྫི་མཾ [ཡ་ཏྠ་ཛྫ་མཾ (སཱི. པཱི.)] ཝི་ཧ་རི་སྶཱ་མ [ཝི་ཧ་རི་སྶཱ་མུ (པཱི.)] ར་ཏྟིཾ.
༢༠༠. ཨ་ཧ་ཉྩ ཁོ ཨ་ག་ལུ༹ཾ [ཨ་གྒ་ལུ (སྱཱ. ཀ.), ཨ་ཀ་ལུཾ (པཱི.)] ཙ་ནྡ་ན་ཉྩ, སི་ལཱ་ཡ པིཾ་སཱ་མི པ་མ་ཏྟ་རཱུ་པཱ;
‘‘པི་ཡོ ཙ མེ ཧེ་ཧི་ཏི རོ་སི་ཏ་ངྒོ, ཨ་ཧ་ཉྩ ནཾ རོ་སི་ཏཱ ཨ་ཛ྄ཛྷུ་པེ་སྶཾ’’.
༢༠༡. ཨ་ཐཱ་ག་མཱ ས་ལི་ལཾ སཱི་གྷ་སོ་ཏཾ, ནུ་དཾ སཱ་ལེ ས་ལ་ལེ༹ ཀ་ཎྞི་ཀཱ་རེ;
ཨཱ་པཱུ་ར་ཐ [ཨ་པཱུ་ར་ཐ (སཱི. པཱི.), ཨཱ་པཱུ་ར་ཐེ (སྱཱ.)] ཏེ་ན མུ་ཧུ་ཏྟ་ཀེ་ན, སཱ་ཡཾ ན་དཱི ཨཱ་སི མ་ཡཱ སུ་དུ་ཏྟ་རཱ.
༢༠༢. ཨུ་བྷོ་སུ ཏཱི་རེ་སུ མ་ཡཾ ཏ་དཱ ཋི་ཏཱ, ས་མྤ་སྶ་ནྟཱ ཨུ་བྷ་ཡོ ཨ་ཉྙ་མ་ཉྙཾ;
ས་ཀི་མྤི རོ་དཱ་མ ས་ཀིཾ ཧ་སཱ་མ, ཀི་ཙྪེ་ན ནོ ཨཱ་ག་མཱ [ཨ་ག་མཱ (སཱི. སྱཱ. པཱི.)] སཾ་ཝ་རཱི སཱ.
༢༠༣. པཱ་ཏོ་ཝ [པཱ་ཏོ ཙ (སཱི. སྱཱ. པཱི.)] ཁོ ཨུ་གྒ་ཏེ སཱུ་རི་ཡ་མྷི, ཙ་ཏུ་ཀྐཾ ན་དིཾ ཨུ་ཏྟ་རི་ཡཱ་ན ལུ་དྡ;
ཨཱ་ལི་ངྒི་ཡཱ ཨ་ཉྙ་མ་ཉྙཾ མ་ཡཾ ཨུ་བྷོ, ས་ཀི་མྤི རོ་དཱ་མ ས་ཀིཾ ཧ་སཱ་མ.
༢༠༤. ཏཱི་ཧཱུ་ན་ཀཾ ས་ཏྟ་ས་ཏཱ་ནི ལུ་དྡ, ཡ་མི་དྷ མ་ཡཾ ཝི་པྤ་ཝ་སི་མྷ པུ་བྦེ;
ཝ་སྶེ་ཀི་མཾ [ཝཱ་སེ་ཀི་མཾ (སཱི. པཱི.)] ཛཱི་ཝི་ཏཾ བྷཱུ་མི་པཱ་ལ, ཀོ ནཱི་དྷ ཀ་ནྟཱ་ཡ ཝི་ནཱ ཝ་སེ་ཡྻ.
༢༠༥. ཨཱ་ཡུ་ཉྩ ཝོ ཀཱི་ཝ་ཏ་ཀོ ནུ ས་མྨ, ས་ཙེ་པི ཛཱ་ནཱ་ཐ ཝ་དེ་ཐ ཨཱ་ཡུཾ;
ཨ་ནུ་སྶ་ཝཱ ཝུ་ཌྜྷ་ཏོ ཨཱ་ག་མཱ ཝཱ, ཨ་ཀྑཱ་ཐ མེ ཏཾ ཨ་ཝི་ཀ་མྤ་མཱ་ནཱ.
༢༠༦. ཨཱ་ཡུ་ཉྩ ནོ ཝ་སྶ་ས་ཧ་སྶཾ ལུ་དྡ, ན ཙ་ནྟ་རཱ པཱ་པ་ཀོ ཨ་ཏྠི རོ་གོ;
ཨ་པྤ་ཉྩ [ཨ་པྤཾ་ཝ (སྱཱ. ཀ.)] དུ་ཀྑཾ སུ་ཁ་མེ་ཝ བྷི་ཡྻོ, ཨ་ཝཱི་ཏ་རཱ་གཱ ཝི་ཛ་ཧཱ་མ ཛཱི་ཝི་ཏཾ.
༢༠༧. ཨི་ད་ཉྩ སུ་ཏྭཱ་ན ཨ་མཱ་ནུ་སཱ་ནཾ, བྷ་ལླཱ་ཏི་ཡོ ཨི་ཏྟ་ར ཛཱི་ཝི་ཏ་ནྟི;
ནི་ཝ་ཏྟ་ཐ ན མི་ག་ཝཾ ཨ་ཙ་རི, ཨ་དཱ་སི དཱ་ནཱ་ནི ཨ་བྷུ་ཉྫི བྷོ་གེ.
༢༠༨. ཨི་ད་ཉྩ སུ་ཏྭཱ་ན ཨ་མཱ་ནུ་སཱ་ནཾ, ས་མྨོ་ད་ཐ མཱ ཀ་ལ་ཧཾ ཨ་ཀ་ཏྠ;
མཱ ཝོ ཏ་པཱི ཨ་ཏྟ་ཀ་མྨཱ་པ་རཱ་དྷོ, ཡ་ཐཱ་པི ཏེ ཀི་མྤུ་རི་སེ་ཀ་ར་ཏྟཾ.
༢༠༩. ཨི་ད་ཉྩ སུ་ཏྭཱ་ན ཨ་མཱ་ནུ་སཱ་ནཾ, ས་མྨོ་ད་ཐ མཱ ཝི་ཝཱ་དཾ ཨ་ཀ་ཏྠ;
མཱ ཝོ ཏ་པཱི ཨ་ཏྟ་ཀ་མྨཱ་པ་རཱ་དྷོ, ཡ་ཐཱ་པི ཏེ ཀི་མྤུ་རི་སེ་ཀ་ར་ཏྟཾ.
༢༡༠. ཝི་ཝི་དྷཾ [ཝི་ཝི་དྷ (སཱི. སྱཱ.)] ཨ་དྷི་མ་ནཱ སུ་ཎོ་མ་ཧཾ, ཝ་ཙ་ན་པ་ཐཾ ཏ་ཝ ཨ་ཏྠ་སཾ་ཧི་ཏཾ;
མུ་ཉྩཾ [མུ་ཉྩ (སཱི. པཱི.)] གི་རཾ ནུ་ད་སེ་ཝ མེ ད་རཾ, ས་མ་ཎ སུ་ཁཱ་ཝ་ཧ ཛཱི་ཝ མེ ཙི་ར་ནྟི.
བྷ་ལླཱ་ཏི་ཡ་ཛཱ་ཏ་ཀཾ ཨ་ཊྛ་མཾ.