༥༠༢. ཙཱུ་ལ༹་ཧཾ་ས་ཛཱ་ཏ་ཀཾ (༦)
༡༣༣. ཨེ་ཏེ ཧཾ་སཱ པ་ཀྐ་མ་ནྟི, ཝ་ཀྐ་ངྒཱ བྷ་ཡ་མེ་རི་ཏཱ;
ཧ་རི་ཏྟ་ཙ ཧེ་མ་ཝ་ཎྞ, ཀཱ་མཾ སུ་མུ་ཁ པ་ཀྐ་མ.
༡༣༤. ཨོ་ཧཱ་ཡ མཾ ཉཱ་ཏི་ག་ཎཱ, ཨེ་ཀཾ པཱ་ས་ཝ་སཾ ག་ཏཾ;
ཨ་ན་པེ་ཀྑ་མཱ་ནཱ [ནཱ་པེ་ཀྑ་མཱ་ནཱ (ཀ.)] ག་ཙྪ་ནྟི, ཀིཾ ཨེ་སོ ཨ་ཝ་ཧི་ཡྻ་སི.
༡༣༥. པ་ཏེ་ཝ པ་ཏ་ཏཾ སེ་ཊྛ, ན་ཏྠི བ་དྡྷེ ས་ཧཱ་ཡ་ཏཱ [ས་ཧཱ་ཡ་ཀཱ (སྱཱ.)];
མཱ ཨ་ནཱི་གྷཱ་ཡ ཧཱ་པེ་སི, ཀཱ་མཾ སུ་མུ་ཁ པ་ཀྐ་མ.
༡༣༦. ནཱ་ཧཾ ‘‘དུ་ཀྑ་པ་རེ་ཏོ’’ཏི [དུ་ཀྑ་པ་རེ་ཏོ་པི (ཀ.)], དྷ་ཏ་ར་ཊྛ ཏུ་ཝཾ [ཏ་ཝཾ (སཱི. པཱི.)] ཛ་ཧེ;
ཛཱི་ཝི་ཏཾ མ་ར་ཎཾ ཝཱ མེ, ཏ་ཡཱ ས་དྡྷིཾ བྷ་ཝི་སྶ་ཏི.
༡༣༧. ཨེ་ཏ་ད་རི་ཡ་སྶ ཀ་ལྱཱ་ཎཾ, ཡཾ ཏྭཾ སུ་མུ་ཁ བྷཱ་ས་སི;
ཏ་ཉྩ ཝཱི་མཾ་ས་མཱ་ནོ་ཧཾ, ‘‘པ་ཏ་ཏེ་ཏཾ’’ ཨ་ཝ་སྶ་ཛིཾ.
༡༣༨. ཨ་པ་དེ་ན པ་དཾ ཡཱ་ཏི, ཨ་ནྟ་ལི་ཀྑ་ཙ་རོ [ཨ་ནྟ་ལི་ཀྑེ ཙ་རོ (སཱི. པཱི.)] དི་ཛོ;
ཨཱ་རཱ པཱ་སཾ ན བུ་ཛ྄ཛྷི ཏྭཾ, ཧཾ་སཱ་ནཾ པ་ཝ་རུ་ཏྟ་མ [པ་ཝ་རུ་ཏྟ་མོ (ཀ. སཱི. པཱི.)].
༡༣༩. ཡ་དཱ པ་རཱ་བྷ་ཝོ ཧོ་ཏི, པོ་སོ ཛཱི་ཝི་ཏ་ས་ངྑ་ཡེ;
ཨ་ཐ ཛཱ་ལ་ཉྩ པཱ་ས་ཉྩ, ཨཱ་ས་ཛྫཱ་པི ན བུ་ཛ྄ཛྷ་ཏི.
༡༤༠. ཨེ་ཏེ ཧཾ་སཱ པ་ཀྐ་མ་ནྟི, ཝ་ཀྐ་ངྒཱ བྷ་ཡ་མེ་རི་ཏཱ;
ཧ་རི་ཏྟ་ཙ ཧེ་མ་ཝ་ཎྞ, ཏྭ་ཉྙེ་ཝ [ཏྭ་ཉྩ ཏཾ (སཱི.), ཏྭ་ཉྩ (པཱི.)] ཨ་ཝ་ཧི་ཡྻ་སི.
༡༤༡. ཨེ་ཏེ བྷུ་ཏྭཱ ཙ པི་ཏྭཱ ཙ, པ་ཀྐ་མ་ནྟི ཝི་ཧ་ངྒ་མཱ;
ཨ་ན་པེ་ཀྑ་མཱ་ནཱ ཝ་ཀྐ་ངྒཱ, ཏྭ་ཉྙེ་ཝེ་ཀོ ཨུ་པཱ་ས་སི.
༡༤༢. ཀི་ནྣུ ཏྱཱ་ཡཾ [ཏཱ་ཡཾ (སཱི. སྱཱ. པཱི.)] དི་ཛོ ཧོ་ཏི, མུ་ཏྟོ བ་དྡྷཾ ཨུ་པཱ་ས་སི;
ཨོ་ཧཱ་ཡ ས་ཀུ་ཎཱ ཡ་ནྟི, ཀིཾ ཨེ་ཀོ ཨ་ཝ་ཧི་ཡྻ་སི.
༡༤༣. རཱ་ཛཱ མེ སོ དི་ཛོ མི་ཏྟོ, ས་ཁཱ པཱ་ཎ་ས་མོ ཙ མེ;
ནེ་ཝ ནཾ ཝི་ཛ་ཧི་སྶཱ་མི, ཡཱ་ཝ ཀཱ་ལ་སྶ པ་རི་ཡཱ་ཡཾ.
༡༤༤. ཡོ ཙ ཏྭཾ ས་ཁི་ནོ ཧེ་ཏུ, པཱ་ཎཾ ཙ་ཛི་ཏུ་མི་ཙྪ་སི;
སོ ཏེ ས་ཧཱ་ཡཾ མུ་ཉྩཱ་མི, ཧོ་ཏུ རཱ་ཛཱ ཏ་ཝཱ་ནུ་གོ.
༡༤༥. ཨེ་ཝཾ ལུ་དྡ་ཀ ན་ནྡ་སྶུ, ས་ཧ ས་བྦེ་ཧི ཉཱ་ཏི་བྷི;
ཡ་ཐཱ་ཧ་མ་ཛྫ ན་ནྡཱ་མི, དི་སྭཱ མུ་ཏྟཾ དི་ཛཱ་དྷི་པཾ.
༡༤༦. ཀ་ཙྩི་ནྣུ བྷོ་ཏོ ཀུ་ས་ལཾ, ཀ་ཙྩི བྷོ་ཏོ ཨ་ནཱ་མ་ཡཾ;
ཀ་ཙྩི ར་ཊྛ་མི་དཾ ཕཱི་ཏཾ, དྷ་མྨེ་ན མ་ནུ་སཱ་ས་སི.
༡༤༧. ཀུ་ས་ལ་ཉྩེ་ཝ མེ ཧཾ་ས, ཨ་ཐོ ཧཾ་ས ཨ་ནཱ་མ་ཡཾ;
ཨ་ཐོ ར་ཊྛ་མི་དཾ ཕཱི་ཏཾ, དྷ་མྨེ་ན མ་ནུ་སཱ་ས་ཧཾ.
༡༤༨. ཀ་ཙྩི བྷོ་ཏོ ཨ་མ་ཙྩེ་སུ, དོ་སོ ཀོ་ཙི ན ཝི་ཛྫ་ཏི;
ཀ་ཙྩི ཨཱ་རཱ ཨ་མི་ཏྟཱ ཏེ, ཚཱ་ཡཱ ད་ཀྑི་ཎ་ཏོ་རི་ཝ.
༡༤༩. ཨ་ཐོ་པི མེ ཨ་མ་ཙྩེ་སུ, དོ་སོ ཀོ་ཙི ན ཝི་ཛྫ་ཏི;
ཨ་ཐོ ཨཱ་རཱ ཨ་མི་ཏྟཱ མེ, ཚཱ་ཡཱ ད་ཀྑི་ཎ་ཏོ་རི་ཝ.
༡༥༠. ཀ་ཙྩི ཏེ སཱ་དི་སཱི བྷ་རི་ཡཱ, ཨ་སྶ་ཝཱ པི་ཡ་བྷཱ་ཎི་ནཱི;
པུ་ཏྟ་རཱུ་པ་ཡ་སཱུ་པེ་ཏཱ, ཏ་ཝ ཚ་ནྡ་ཝ་སཱ་ནུ་གཱ.
༡༥༡. ཨ་ཐོ མེ སཱ་དི་སཱི བྷ་རི་ཡཱ, ཨ་སྶ་ཝཱ པི་ཡ་བྷཱ་ཎི་ནཱི;
པུ་ཏྟ་རཱུ་པ་ཡ་སཱུ་པེ་ཏཱ, མ་མ ཚ་ནྡ་ཝ་སཱ་ནུ་གཱ.
༡༥༢. ཀ་ཙྩི ཏེ བ་ཧ་ཝོ པུ་ཏྟཱ, སུ་ཛཱ་ཏཱ ར་ཊྛ་ཝ་ཌྜྷ་ན;
པ་ཉྙཱ་ཛ་ཝེ་ན ས་མྤ་ནྣཱ, ས་མྨོ་ད་ནྟི ཏ་ཏོ ཏ་ཏོ.
༡༥༣. ས་ཏ་མེ་ཀོ ཙ མེ པུ་ཏྟཱ, དྷ་ཏ་ར་ཊྛ མ་ཡཱ སུ་ཏཱ;
ཏེ་སཾ ཏྭཾ ཀི་ཙྩ་མ་ཀྑཱ་ཧི, ནཱ་ཝ་རུ་ཛ྄ཛྷ་ནྟི [ནཱ་ཝ་ར་ཛ྄ཛྷ་ནྟི (ཀ. སཱི. པཱི.)] ཏེ ཝ་ཙོ.
༡༥༤. ཨུ་པ་པ་ནྣོ་པི ཙེ ཧོ་ཏི, ཛཱ་ཏི་ཡཱ ཝི་ན་ཡེ་ན ཝཱ;
ཨ་ཐ པ་ཙྪཱ ཀུ་རུ་ཏེ ཡོ་གཾ, ཀི་ཙྪེ [ཀི་ཙྩེ (སཱི. སྱཱ. པཱི.)] ཨཱ་པཱ་སུ [ཨཱ་ཝཱ་སུ (སྱཱ.), ཨཱ་པ་དཱ་སུ (ཀ.)] སཱི་ད་ཏི.
༡༥༥. ཏ་སྶ སཾ་ཧཱི་ར་པ་ཉྙ་སྶ, ཝི་ཝ་རོ ཛཱ་ཡ་ཏེ མ་ཧཱ;
ར་ཏྟི་མ་ནྡྷོ་ཝ [ན་ཏྟ་མ་ནྡྷོ་ཝ (སཱི. པཱི.)] རཱུ་པཱ་ནི, ཐཱུ་ལཱ་ནི མ་ནུ་པ་སྶ་ཏི.
༡༥༦. ཨ་སཱ་རེ སཱ་ར་ཡོ་ག་ཉྙཱུ, མ་ཏིཾ ན ཏྭེ་ཝ ཝི་ནྡ་ཏི;
ས་ར་བྷོ་ཝ གི་རི་དུ་གྒ་སྨིཾ, ཨ་ནྟ་རཱ་ཡེ་ཝ སཱི་ད་ཏི.
༡༥༧. ཧཱི་ན་ཛ་ཙྩོ་པི ཙེ ཧོ་ཏི, ཨུ་ཊྛཱ་ཏཱ དྷི་ཏི་མཱ ན་རོ;
ཨཱ་ཙཱ་ར་སཱི་ལ་ས་མྤ་ནྣོ, ནི་སེ ཨ་གྒཱི་ཝ བྷཱ་ས་ཏི.
༡༥༨. ཨེ་ཏཾ མེ ཨུ་པ་མཾ ཀ་ཏྭཱ, པུ་ཏྟེ ཝི་ཛྫཱ་སུ ཝཱ་ཙ་ཡ [ཋཱ་པ་ས (སྱཱ. ཀ.)];
སཾ་ཝི་རཱུ་ལ༹ྷེ་ཐ མེ་དྷཱ་ཝཱི, ཁེ་ཏྟེ བཱི་ཛཾ་ཝ [ཁེ་ཏྟ་བཱི་ཛཾ་ཝ (སཱི. པཱི.)] ཝུ་ཊྛི་ཡཱ་ཏི.
ཙཱུ་ལ༹་ཧཾ་ས་ཛཱ་ཏ་ཀཾ ཚ་ཊྛཾ.