༤༩༡. མ་ཧཱ་མོ་ར་ཛཱ་ཏ་ཀཾ (༨)
༡༤༣. ས་ཙེ ཧི ཏྱཱ་ཧཾ དྷ་ན་ཧེ་ཏུ གཱ་ཧི་ཏོ, མཱ མཾ ཝ་དྷཱི ཛཱི་ཝ་གཱ་ཧཾ ག་ཧེ་ཏྭཱ;
ར་ཉྙོ ཙ [ར་ཉྙོ་ཝ (སཱི. པཱི.)] མཾ ས་མྨ ཨུ་པ་ནྟི་ཀཾ [ཨུ་པ་ནྟི (སཱི. སྱཱ. པཱི.)] ནེ་ཧི, མ་ཉྙེ དྷ་ནཾ ལ་ཙྪ་སི་ན་པྤ་རཱུ་པཾ.
༡༤༤. ན མེ ཨ་ཡཾ ཏུ་ཡ྄ཧ ཝ་དྷཱ་ཡ ཨ་ཛྫ, ས་མཱ་ཧི་ཏོ ཙཱ་པ་དྷུ་རེ [ཙཱ་པ་ཝ་རེ (སཱི. པཱི.), ཙཱ་པ་ཝ་རོ (སྱཱ.)] ཁུ་ར་པྤོ;
པཱ་ས་ཉྩ ཏྱཱ་ཧཾ ཨ་དྷི་པཱ་ཏ་ཡི་སྶཾ, ཡ་ཐཱ་སུ་ཁཾ ག་ཙྪ་ཏུ མོ་ར་རཱ་ཛཱ.
༡༤༥. ཡཾ ས་ཏྟ ཝ་སྶཱ་ནི མ་མཱ་ནུ་བ་ནྡྷི, ར་ཏྟི་ནྡི་ཝཾ ཁུ་པྤི་པཱ་སཾ ས་ཧ་ནྟོ;
ཨ་ཐ ཀི་སྶ མཾ པཱ་ས་ཝ་སཱུ་པ་ནཱི་ཏཾ, པ་མུ་ཏྟ་ཝེ ཨི་ཙྪ་སི བ་ནྡྷ་ན་སྨཱ.
༡༤༦. པཱ་ཎཱ་ཏི་པཱ་ཏཱ ཝི་ར་ཏོ ནུ་ས་ཛྫ, ཨ་བྷ་ཡཾ ནུ ཏེ ས་བྦ་བྷཱུ་ཏེ་སུ དི་ནྣཾ;
ཡཾ མཾ ཏུ་ཝཾ པཱ་ས་ཝ་སཱུ་པ་ནཱི་ཏཾ, པ་མུ་ཏྟ་ཝེ ཨི་ཙྪ་སི བ་ནྡྷ་ན་སྨཱ.
༡༤༧. པཱ་ཎཱ་ཏི་པཱ་ཏཱ ཝི་ར་ཏ་སྶ བྲཱུ་ཧི, ཨ་བྷ་ཡ་ཉྩ ཡོ ས་བྦ་བྷཱུ་ཏེ་སུ དེ་ཏི;
པུ་ཙྪཱ་མི ཏཾ མོ་ར་རཱ་ཛེ་ཏ་མ་ཏྠཾ, ཨི་ཏོ ཙུ་ཏོ ཀིཾ ལ་བྷ་ཏེ སུ་ཁཾ སོ.
༡༤༨. པཱ་ཎཱ་ཏི་པཱ་ཏཱ ཝི་ར་ཏ་སྶ བྲཱུ་མི, ཨ་བྷ་ཡ་ཉྩ ཡོ ས་བྦ་བྷཱུ་ཏེ་སུ དེ་ཏི;
དི་ཊྛེ་ཝ དྷ་མྨེ ལ་བྷ་ཏེ པ་སཾ་སཾ, ས་གྒ་ཉྩ སོ ཡཱ་ཏི ས་རཱི་ར་བྷེ་དཱ.
༡༤༩. ན ས་ནྟི དེ་ཝཱ ཨི་ཏི ཨཱ་ཧུ [ཨི་ཙྩཱ་ཧུ (སཱི. པཱི.)] ཨེ་ཀེ, ཨི་དྷེ་ཝ ཛཱི་ཝོ ཝི་བྷ་ཝཾ ཨུ་པེ་ཏི;
ཏ་ཐཱ ཕ་ལཾ སུ་ཀ་ཏ་དུ་ཀྐ་ཊཱ་ནཾ, ད་ཏྟུ་པ་ཉྙ་ཏྟ་ཉྩ ཝ་ད་ནྟི དཱ་ནཾ;
ཏེ་སཾ ཝ་ཙོ ཨ་ར་ཧ་ཏཾ ས་དྡ་ཧཱ་ནོ, ཏ་སྨཱ ཨ་ཧཾ ས་ཀུ་ཎེ བཱ་དྷ་ཡཱ་མི.
༡༥༠. ཙ་ནྡོ ཙ སུ་རི་ཡོ ཙ ཨུ་བྷོ སུ་ད་སྶ་ནཱ, ག་ཙྪ་ནྟི ཨོ་བྷཱ་ས་ཡ་མ་ནྟ་ལི་ཀྑེ;
ཨི་མ་སྶ ལོ་ཀ་སྶ པ་ར་སྶ ཝཱ ཏེ, ཀ་ཐཾ ནུ ཏེ ཨཱ་ཧུ མ་ནུ་སྶ་ལོ་ཀེ.
༡༥༡. ཙ་ནྡོ ཙ སུ་རི་ཡོ ཙ ཨུ་བྷོ སུ་ད་སྶ་ནཱ, ག་ཙྪ་ནྟི ཨོ་བྷཱ་ས་ཡ་མ་ནྟ་ལི་ཀྑེ;
པ་ར་སྶ ལོ་ཀ་སྶ ན ཏེ ཨི་མ་སྶ, དེ་ཝཱ་ཏི ཏེ ཨཱ་ཧུ མ་ནུ་སྶ་ལོ་ཀེ.
༡༥༢. ཨེ་ཏྠེ་ཝ ཏེ ནཱི་ཧ་ཏཱ ཧཱི་ན་ཝཱ་དཱ, ཨ་ཧེ་ཏུ་ཀཱ ཡེ ན ཝ་ད་ནྟི ཀ་མྨཾ;
ཏ་ཐཱ ཕ་ལཾ སུ་ཀ་ཏ་དུ་ཀྐ་ཊཱ་ནཾ, ད་ཏྟུ་པ་ཉྙ་ཏྟཾ ཡེ ཙ ཝ་ད་ནྟི དཱ་ནཾ.
༡༥༣. ཨ་དྡྷཱ ཧི ས་ཙྩཾ ཝ་ཙ་ནཾ ཏ་ཝེ་དཾ [ཏ་ཝེ་ཏཾ (སཱི. སྱཱ. པཱི.)], ཀ་ཐ་ཉྷི དཱ་ནཾ ཨ་ཕ་ལཾ བྷ་ཝེ་ཡྻ [ཝ་དེ་ཡྻ (སཱི. པཱི.)];
ཏ་ཐཱ ཕ་ལཾ སུ་ཀ་ཏ་དུ་ཀྐ་ཊཱ་ནཾ, ད་ཏྟུ་པ་ཉྙ་ཏྟ་ཉྩ ཀ་ཐཾ བྷ་ཝེ་ཡྻ.
༡༥༤. ཀ་ཐཾ་ཀ་རོ ཀི་ནྟི་ཀ་རོ ཀི་མཱ་ཙ་རཾ, ཀིཾ སེ་ཝ་མཱ་ནོ ཀེ་ན ཏ་པོ་གུ་ཎེ་ན;
ཨ་ཀྑཱ་ཧི [ཨ་ཀྑཱ་ཧི ཏཾ དཱ་ནི (ཀ.)] མེ མོ་ར་རཱ་ཛེ་ཏ་མ་ཏྠཾ, ཡ་ཐཱ ཨ་ཧཾ ནོ ནི་ར་ཡཾ པ་ཏེ་ཡྻཾ.
༡༥༥. ཡེ ཀེ་ཙི ཨ་ཏྠི ས་མ་ཎཱ པ་ཐ་བྱཱ, ཀཱ་སཱ་ཡ་ཝ་ཏྠཱ ཨ་ན་གཱ་རི་ཡཱ ཏེ;
པཱ་ཏོ་ཝ པི་ཎྜཱ་ཡ ཙ་ར་ནྟི ཀཱ་ལེ, ཝི་ཀཱ་ལ་ཙ་རི་ཡཱ ཝི་ར་ཏཱ ཧི ས་ནྟོ.
༡༥༦. ཏེ ཏ་ཏྠ ཀཱ་ལེ་ནུ་པ་ས་ངྐ་མི་ཏྭཱ, པུ་ཙྪཱ་ཧི ཡཾ ཏེ མ་ན་སོ པི་ཡཾ སི་ཡཱ;
ཏེ ཏེ པ་ཝ་ཀྑ་ནྟི ཡ་ཐཱ་པ་ཛཱ་ནཾ, ཨི་མ་སྶ ལོ་ཀ་སྶ པ་ར་སྶ ཙ་ཏྠཾ.
༡༥༧. ཏ་ཙཾ་ཝ ཛི་ཎྞཾ ཨུ་ར་གོ པུ་རཱ་ཎཾ, པ་ཎྜཱུ་པ་ལཱ་སཾ ཧ་རི་ཏོ དུ་མོ་ཝ;
ཨེ་ས་པྤ་ཧཱི་ནོ མ་མ ལུ་དྡ་བྷཱ་ཝོ, ཛ་ཧཱ་མ་ཧཾ ལུ་དྡ་ཀ་བྷཱ་ཝ་མ་ཛྫ.
༡༥༨. ཡེ ཙཱ་པི མེ ས་ཀུ་ཎཱ ཨ་ཏྠི བ་དྡྷཱ, ས་ཏཱ་ནི་ནེ་ཀཱ་ནི ནི་ཝེ་ས་ན་སྨིཾ;
ཏེ་ས་མྤ་ཧཾ [ཏེ་སཾ ཨ་ཧཾ (སྱཱ. ཀ.)] ཛཱི་ཝི་ཏ་མ་ཛྫ ད་མྨི, མོ་ཀྑ་ཉྩ ཏེ པ་ཏྟཱ [པ་ཏྟོ (སཱི.), ཨ་ཙྪ (སྱཱ.)] ས་ཀཾ ནི་ཀེ་ཏཾ.
༡༥༩. ལུ་དྡོ ཙ་རཱི པཱ་ས་ཧ་ཏྠོ ཨ་ར་ཉྙེ, བཱ་དྷེ་ཏུ མོ་རཱ་དྷི་པ་ཏིཾ ཡ་ས་སྶིཾ;
བ་ནྡྷི་ཏྭཱ [བ་ནྡྷི་ཏྭ (སཱི. པཱི.)] མོ་རཱ་དྷི་པ་ཏིཾ ཡ་ས་སྶིཾ, དུ་ཀྑཱ ས པ་མུ་ཙྩི [དུ་ཀྑཱ པ་མུ་ཙྩི (སཱི.), དུ་ཀྑཱ པ་མུ་ཉྩི (སྱཱ. པཱི.)] ཡ་ཐཱ་ཧཾ པ་མུ་ཏྟོ་ཏི.
མ་ཧཱ་མོ་ར་ཛཱ་ཏ་ཀཾ ཨ་ཊྛ་མཾ.