༤༨༢. རུ་རུ་མི་ག་རཱ་ཛ་ཛཱ་ཏ་ཀཾ (༩)
༡༡༧. ཏ་སྶ [ཀ་སྶ (སཱི. པཱི.)] གཱ་མ་ཝ་རཾ ད་མྨི, ནཱ་རི་ཡོ ཙ ཨ་ལ་ངྐ་ཏཱ;
ཡོ [ཀོ (སཱི. སྱཱ. པཱི.)] མེ་ཏཾ མི་ག་མ་ཀྑཱ་ཏི [མ་ཀྑཱ་སི (སྱཱ. ཀ.)], མི་གཱ་ནཾ མི་ག་མུ་ཏྟ་མཾ.
༡༡༨. མ་ཡ྄ཧཾ གཱ་མ་ཝ་རཾ དེ་ཧི, ནཱ་རི་ཡོ ཙ ཨ་ལ་ངྐ་ཏཱ;
ཨ་ཧཾ ཏེ མི་ག་མ་ཀྑི་སྶཾ, མི་གཱ་ནཾ མི་ག་མུ་ཏྟ་མཾ.
༡༡༩. ཨེ་ཏ་སྨིཾ ཝ་ན་ས་ཎྜ་སྨིཾ, ཨ་མྦཱ སཱ་ལཱ ཙ པུ་པྥི་ཏཱ;
ཨི་ནྡ་གོ་པ་ཀ་ས་ཉྪ་ནྣཱ, ཨེ་ཏྠེ་སོ ཏི་ཊྛ་ཏེ མི་གོ.
༡༢༠. དྷ་ནུཾ ཨ་དྭེ་ཛ྄ཛྷཾ [ཨ་དེ་ཛ྄ཛྷཾ (སཱི. པཱི.), ས་ར་ཛྫཾ (ཀ.)] ཀ་ཏྭཱ་ན, ཨུ་སུཾ ས་ནྣ་ཡ྄ཧུ་པཱ་ག་མི [ས་ནྡྷཱ་ཡུ་པཱ་ག་མི (སཱི. པཱི.)];
མི་གོ ཙ དི་སྭཱ རཱ་ཛཱ་ནཾ, དཱུ་ར་ཏོ ཨ་ཛ྄ཛྷ་བྷཱ་ས་ཐ.
༡༢༡. ཨཱ་ག་མེ་ཧི མ་ཧཱ་རཱ་ཛ, མཱ མཾ ཝི་ཛ྄ཛྷི ར་ཐེ་ས་བྷ;
ཀོ ནུ ཏེ ཨི་ད་མ་ཀྑཱ་སི, ཨེ་ཏྠེ་སོ ཏི་ཊྛ་ཏེ མི་གོ.
༡༢༢. ཨེ་ས པཱ་པ་ཙ་རོ པོ་སོ, ས་མྨ ཏི་ཊྛ་ཏི ཨཱ་ར་ཀཱ;
སོ་ཡཾ [སོ ཧི (སཱི. སྱཱ. པཱི.)] མེ ཨི་ད་མ་ཀྑཱ་སི, ཨེ་ཏྠེ་སོ ཏི་ཊྛ་ཏེ མི་གོ.
༡༢༣. ས་ཙྩཾ ཀི་རེ་ཝ མཱ་ཧཾ་སུ, ན་རཱ ཨེ་ཀ་ཙྩི་ཡཱ ཨི་དྷ;
ཀ་ཊྛཾ ནི་པླ་ཝི་ཏཾ སེ་ཡྻོ, ན ཏྭེ་ཝེ་ཀ་ཙྩི ཡོ ན་རོ.
༡༢༤. ཀིཾ ནུ རུ་རུ ག་ར་ཧ་སི མི་གཱ་ནཾ, ཀིཾ པ་ཀྑཱི་ནཾ ཀིཾ པ་ན མཱ་ནུ་སཱ་ནཾ;
བྷ་ཡ་ཉྷི མཾ ཝི་ནྡ་ཏི་ན་པྤ་རཱུ་པཾ, སུ་ཏྭཱ་ན ཏཾ མཱ་ནུ་སིཾ བྷཱ་ས་མཱ་ནཾ.
༡༢༥. ཡ་མུ་དྡྷ་རིཾ ཝཱ་ཧ་ནེ ཝུ་ཡ྄ཧ་མཱ་ནཾ, མ་ཧོ་ད་ཀེ ས་ལི་ལེ སཱི་གྷ་སོ་ཏེ;
ཏ་ཏོ་ནི་དཱ་ནཾ བྷ་ཡ་མཱ་ག་ཏཾ མ་མ, དུ་ཀྑོ ཧ་ཝེ རཱ་ཛ ཨ་ས་བྦྷི ས་ངྒ་མོ.
༡༢༦. སོ་ཧཾ ཙ་ཏུ་པྤ་ཏྟ་མི་མཾ ཝི་ཧ་ངྒ་མཾ, ཏ་ནུ་ཙྪི་དཾ ཧ་ད་ཡེ ཨོ་སྶ་ཛཱ་མི;
ཧ་ནཱ་མི ཏཾ མི་ཏྟ་དུ་བྦྷིཾ ཨ་ཀི་ཙྩ་ཀཱ་རིཾ [ཧ་ནཱ་མི མི་ཏྟ་དྡུ’མ་ཀི་ཙྩ་ཀཱ་རིཾ (སཱི. པཱི.)], ཡོ ཏཱ་དི་སཾ ཀ་མྨ་ཀ་ཏཾ ན ཛཱ་ནེ.
༡༢༧. དྷཱི་ར་སྶ བཱ་ལ་སྶ ཧ་ཝེ ཛ་ནི་ནྡ, ས་ནྟོ ཝ་དྷཾ ན་པྤ་སཾ་ས་ནྟི ཛཱ་ཏུ;
ཀཱ་མཾ གྷ་རཾ ག་ཙྪ་ཏུ པཱ་པ་དྷ་མྨོ, ཡ་ཉྩ་སྶ བྷ་ཊྛཾ ཏ་དེ་ཏ་སྶ དེ་ཧི;
ཨ་ཧ་ཉྩ ཏེ ཀཱ་མ་ཀ་རོ བྷ་ཝཱ་མི.
༡༢༨. ཨ་དྡྷཱ རུ་རུ ཨ་ཉྙ་ཏ་རོ ས་ཏཾ སོ [ས་ཏཾ’སེ (སཱི.)], ཡོ དུ་བྦྷ་ཏོ [དུ་བྦྷི་ནོ (སྱཱ.), དཱུ་བྷ་ཏོ (པཱི.)] མཱ་ནུ་ས་སྶ ན དུ་བྦྷི;
ཀཱ་མཾ གྷ་རཾ ག་ཙྪ་ཏུ པཱ་པ་དྷ་མྨོ, ཡ་ཉྩ་སྶ བྷ་ཊྛཾ ཏ་དེ་ཏ་སྶ ད་མྨི;
ཨ་ཧ་ཉྩ ཏེ ཀཱ་མ་ཙཱ་རཾ ད་དཱ་མི.
༡༢༩. སུ་ཝི་ཛཱ་ནཾ སི་ངྒཱ་ལཱ་ནཾ, ས་ཀུ་ཎཱ་ན་ཉྩ་ཝ་སྶི་ཏཾ;
མ་ནུ་སྶ་ཝ་སྶི་ཏཾ རཱ་ཛ, དུ་བྦི་ཛཱ་ན་ཏ་རཾ ཏ་ཏོ.
༡༣༠. ཨ་པི ཙེ མ་ཉྙ་ཏཱི པོ་སོ, ཉཱ་ཏི མི་ཏྟོ ས་ཁཱ་ཏི ཝཱ;
ཡོ པུ་བྦེ སུ་མ་ནོ ཧུ་ཏྭཱ, པ་ཙྪཱ ས་མྤ་ཛྫ་ཏེ དི་སོ.
༡༣༡. ས་མཱ་ག་ཏཱ ཛཱ་ན་པ་དཱ, ནེ་ག་མཱ ཙ ས་མཱ་ག་ཏཱ;
མི་གཱ ས་སྶཱ་ནི ཁཱ་ད་ནྟི, ཏཾ དེ་ཝོ པ་ཊི་སེ་དྷ་ཏུ.
༡༣༢. ཀཱ་མཾ ཛ་ན་པ་དོ མཱ་སི, ར་ཊྛ་ཉྩཱ་པི ཝི་ན་སྶ་ཏུ;
ན ཏྭེ་ཝཱ་ཧཾ རུ་རུཾ དུ་བྦྷེ, ད་ཏྭཱ ཨ་བྷ་ཡ་ད་ཀྑི་ཎཾ.
༡༣༣. མཱ མེ ཛ་ན་པ་དོ ཨཱ་སི [མཱ མཾ ཛ་ན་པ་དོ ཨ་ཧུ (སྱཱ.)], ར་ཊྛ་ཉྩཱ་པི ཝི་ན་སྶ་ཏུ;
ན ཏྭེ་ཝཱ་ཧཾ [ན ཏྭེ་ཝ (ཀ. སཱི. ཀ.)] མི་ག་རཱ་ཛ་སྶ, ཝ་རཾ ད་ཏྭཱ མུ་སཱ བྷ་ཎེ་ཏི.
རུ་རུ་མི་ག་རཱ་ཛ་ཛཱ་ཏ་ཀཾ ན་ཝ་མཾ.