༤༧༨. དཱུ་ཏ་ཛཱ་ཏ་ཀཾ (༥)
༥༤. དཱུ་ཏེ ཏེ བྲ་ཧྨེ [དཱུ་ཏེ བྲཱ་ཧྨ་ཎ (ཀ.)] པཱ་ཧེ་སིཾ, ག་ངྒཱ་ཏཱི་ར་སྨི ཛྷཱ་ཡ་ཏོ;
ཏེ་སཾ པུ་ཊྛོ ན བྱཱ་ཀཱ་སི, དུ་ཀྑཾ གུ་ཡ྄ཧ་མ་ཏཾ [གུ་ཡ྄ཧཾ མ་ཏཾ (སཱི.), ཏུ་ཡ྄ཧཾ མ་ཏཾ (སྱཱ. ཀ.)] ནུ ཏེ.
༥༥. ས་ཙེ ཏེ དུ་ཀྑ་མུ་པྤ་ཛྫེ, ཀཱ་སཱི་ནཾ ར་ཊྛ་ཝ་ཌྜྷ་ན;
མཱ ཁོ ནཾ ཏ་སྶ ཨ་ཀྑཱ་ཧི, ཡོ ཏཾ དུ་ཀྑཱ ན མོ་ཙ་ཡེ.
༥༦. ཡོ ཏ་སྶ [ཡོ ཙ ཏ་ཐཱ (པཱི.)] དུ་ཀྑ་ཛཱ་ཏ་སྶ, ཨེ་ཀ་ངྒ་མ་པི བྷཱ་ག་སོ [ཨེ་ཀ་ནྟ་མ་པི བྷཱ་ས་ཏོ (སཱི. པཱི.)];
ཝི་པྤ་མོ་ཙེ་ཡྻ དྷ་མྨེ་ན, ཀཱ་མཾ ཏ་སྶ པ་ཝེ་ད་ཡ [པ་ཝེ་ད་ཡེ (སཱི.)].
༥༧. སུ་ཝི་ཛཱ་ནཾ སི་ངྒཱ་ལཱ་ནཾ, ས་ཀུ་ཎཱ་ན་ཉྩ ཝ་སྶི་ཏཾ;
མ་ནུ་སྶ་ཝ་སྶི་ཏཾ རཱ་ཛ, དུ་བྦི་ཛཱ་ན་ཏ་རཾ ཏ་ཏོ.
༥༨. ཨ་པི ཙེ མ་ཉྙ་ཏཱི པོ་སོ, ཉཱ་ཏི མི་ཏྟོ ས་ཁཱ་ཏི ཝཱ;
ཡོ པུ་བྦེ སུ་མ་ནོ ཧུ་ཏྭཱ, པ་ཙྪཱ ས་མྤ་ཛྫ་ཏེ དི་སོ.
༥༩. ཡོ ཨ་ཏྟ་ནོ དུ་ཀྑ་མ་ནཱ་ནུ་པུ་ཊྛོ, པ་ཝེ་ད་ཡེ ཛ་ནྟུ ཨ་ཀཱ་ལ་རཱུ་པེ;
ཨཱ་ན་ནྡི་ནོ ཏ་སྶ བྷ་ཝ་ནྟི་མི་ཏྟཱ [བྷ་ཝ་ནྟ’མི་ཏྟཱ (སཱི. པཱི.)], ཧི་ཏེ་སི་ནོ ཏ་སྶ དུ་ཁཱི བྷ་ཝ་ནྟི.
༦༠. ཀཱ་ལ་ཉྩ ཉ་ཏྭཱ་ན ཏ་ཐཱ་ཝི་དྷ་སྶ, མེ་དྷཱ་ཝཱི་ནཾ ཨེ་ཀ་མ་ནཾ ཝི་དི་ཏྭཱ;
ཨ་ཀྑེ་ཡྻ ཏི་བྦཱ་ནི [ཏི་པྤཱ་ནི (སཱི. སྱཱ. པཱི.)] པ་ར་སྶ དྷཱི་རོ, ས་ཎྷཾ གི་རཾ ཨ་ཏྠ་ཝ་ཏིཾ པ་མུ་ཉྩེ.
༦༡. ས་ཙེ ཙ ཛ་ཉྙཱ ཨ་ཝི་ས་ཡ྄ཧ་མ་ཏྟ་ནོ, ན ཏེ ཧི མ་ཡ྄ཧཾ [ནཱ་ཡཾ ནཱི་ཏི མ་ཡ྄ཧ (སཱི. པཱི.)] སུ་ཁཱ་ག་མཱ་ཡ;
ཨེ་ཀོ་ཝ ཏི་བྦཱ་ནི ས་ཧེ་ཡྻ དྷཱི་རོ, ས་ཙྩཾ ཧི་རོ་ཏྟ་པྤ་མ་པེ་ཀྑ་མཱ་ནོ.
༦༢. ཨ་ཧཾ ར་ཊྛཱ་ནི ཝི་ཙ་ར་ནྟོ, ནི་ག་མེ རཱ་ཛ་དྷཱ་ནི་ཡོ;
བྷི་ཀྑ་མཱ་ནོ མ་ཧཱ་རཱ་ཛ, ཨཱ་ཙ་རི་ཡ་སྶ དྷ་ན་ཏྠི་ཀོ.
༦༣. ག་ཧ་པ་ཏཱི རཱ་ཛ་པུ་རི་སེ, མ་ཧཱ་སཱ་ལེ ཙ བྲཱ་ཧྨ་ཎེ;
ཨ་ལ་ཏྠཾ ས་ཏྟ ནི་ཀྑཱ་ནི, སུ་ཝ་ཎྞ་སྶ ཛ་ནཱ་དྷི་པ;
ཏེ མེ ན་ཊྛཱ མ་ཧཱ་རཱ་ཛ, ཏ་སྨཱ སོ་ཙཱ་མ་ཧཾ བྷུ་སཾ.
༦༤. པུ་རི་སཱ ཏེ མ་ཧཱ་རཱ་ཛ, མ་ན་སཱ་ནུ་ཝི་ཙི་ནྟི་ཏཱ;
ནཱ་ལཾ དུ་ཀྑཱ པ་མོ་ཙེ་ཏུཾ, ཏ་སྨཱ ཏེ་སཾ ན བྱཱ་ཧ་རིཾ.
༦༥. ཏྭ་ཉྩ ཁོ མེ མ་ཧཱ་རཱ་ཛ, མ་ན་སཱ་ནུ་ཝི་ཙི་ནྟི་ཏོ;
ཨ་ལཾ དུ་ཀྑཱ པ་མོ་ཙེ་ཏུཾ, ཏ་སྨཱ ཏུ་ཡ྄ཧཾ པ་ཝེ་ད་ཡིཾ.
༦༦. ཏ་སྶཱ་དཱ་སི པ་ས་ནྣ་ཏྟོ, ཀཱ་སཱི་ནཾ ར་ཊྛ་ཝ་ཌྜྷ་ནོ;
ཛཱ་ཏ་རཱུ་པ་མ་ཡེ ནི་ཀྑེ, སུ་ཝ་ཎྞ་སྶ ཙ་ཏུ་དྡ་སཱ་ཏི.
དཱུ་ཏ་ཛཱ་ཏ་ཀཾ པ་ཉྩ་མཾ.