༤༦༥. བྷ་དྡ་སཱ་ལ་ཛཱ་ཏ་ཀཾ (༢)

༡༣. ཀཱ ཏྭཾ སུ་དྡྷེ་ཧི ཝ་ཏྠེ་ཧི, ཨ་གྷེ ཝེ་ཧཱ་ཡ་སཾ [ཝེ་ཧཱ་ས་ཡཾ (སཱི. པཱི.)] ཋི་ཏཱ;

ཀེ་ན ཏྱཱ་སྶཱུ་ནི ཝ་ཏྟ་ནྟི, ཀུ་ཏོ ཏཾ བྷ་ཡ་མཱ་ག་ཏཾ.

༡༤. ཏ་ཝེ་ཝ དེ་ཝ ཝི་ཛི་ཏེ, བྷ་དྡ་སཱ་ལོ་ཏི མཾ ཝི་དཱུ;

ས་ཊྛི [ས་ཊྛིཾ (སཱི. པཱི.)] ཝ་སྶ་ས་ཧ་སྶཱ་ནི, ཏི་ཊྛ་ཏོ པཱུ་ཛི་ཏ་སྶ མེ.

༡༥. ཀཱ་ར་ཡ་ནྟཱ ན་ག་རཱ་ནི, ཨ་གཱ་རེ ཙ དི་ས་མྤ་ཏི;

ཝི་ཝི་དྷེ ཙཱ་པི པཱ་སཱ་དེ, ན མཾ ཏེ ཨ་ཙྩ་མ་ཉྙི་སུཾ;

ཡ་ཐེ་ཝ མཾ ཏེ པཱུ་ཛེ་སུཾ, ཏ་ཐེ་ཝ ཏྭ་མྤི པཱུ་ཛ་ཡ.

༡༦. ཏཾ ཨི་ཝཱ་ཧཾ [ཏ་ཉྩ ཨ་ཧཾ (སཱི. སྱཱ. པཱི.)] ན པ་སྶཱ་མི, ཐཱུ་ལཾ ཀཱ་ཡེ་ན ཏེ དུ་མཾ;

ཨཱ་རོ་ཧ་པ་རི་ཎཱ་ཧེ་ན, ཨ་བྷི་རཱུ་པོ་སི ཛཱ་ཏི་ཡཱ.

༡༧. པཱ་སཱ་དཾ ཀཱ་ར་ཡི་སྶཱ་མི, ཨེ་ཀ་ཏྠ་མྦྷཾ མ་ནོ་ར་མཾ;

ཏ་ཏྠ ཏཾ ཨུ་པ་ནེ་སྶཱ་མི, ཙི་རཾ ཏེ ཡ་ཀྑ ཛཱི་ཝི་ཏཾ.

༡༨. ཨེ་ཝཾ ཙི་ཏྟཾ ཨུ་ད་པཱ་དི, ས་རཱི་རེ་ན ཝི་ནཱ་བྷཱ་ཝོ;

པུ་ཐུ་སོ མཾ ཝི་ཀ་ནྟི་ཏྭཱ, ཁ་ཎྜ་སོ ཨ་ཝ་ཀ་ནྟ་ཐ.

༡༩. ཨ་གྒེ ཙ ཚེ་ཏྭཱ མ་ཛ྄ཛྷེ ཙ, པ་ཙྪཱ མཱུ་ལ་མྷི ཚི་ནྡ་ཐ [མཱུ་ལ་ཉྩ ཚི་ནྡ་ཐ (སཱི.), མཱུ་ལཾ ཝི་ཚི་ནྡ་ཐ (པཱི.)];

ཨེ་ཝཾ མེ ཚི་ཛྫ་མཱ་ན་སྶ, ན དུ་ཀྑཾ མ་ར་ཎཾ སི་ཡཱ.

༢༠. ཧ་ཏྠ་པཱ་དཾ [ཧ་ཏྠ་པཱ་དེ (ཀ.)] ཡ་ཐཱ ཚི་ནྡེ [ཚི་ནྣེ (ཀ.)], ཀ་ཎྞ་ནཱ་ས་ཉྩ ཛཱི་ཝ་ཏོ;

ཏ་ཏོ པ་ཙྪཱ སི་རོ ཚི་ནྡེ, ཏཾ དུ་ཀྑཾ མ་ར་ཎཾ སི་ཡཱ.

༢༡. སུ་ཁཾ ནུ ཁ་ཎྜ་སོ ཚི་ནྣཾ, བྷ་དྡ་སཱ་ལ་ཝ་ན་པྤ་ཏི;

ཀིཾ ཧེ་ཏུ ཀིཾ ཨུ་པཱ་དཱ་ཡ, ཁ་ཎྜ་སོ ཚི་ནྣ་མི་ཙྪ་སི.

༢༢. ཡ་ཉྩ ཧེ་ཏུ་མུ་པཱ་དཱ་ཡ, ཧེ་ཏུཾ དྷ་མྨཱུ་པ་སཾ་ཧི་ཏཾ;

ཁ་ཎྜ་སོ ཚི་ནྣ་མི་ཙྪཱ་མི, མ་ཧཱ་རཱ་ཛ སུ་ཎོ་ཧི མེ.

༢༣. ཉཱ་ཏཱི མེ སུ་ཁ་སཾ་ཝ་དྡྷཱ, མ་མ པ་སྶེ ནི་ཝཱ་ཏ་ཛཱ;

ཏེ་པི་ཧཾ ཨུ་པ་ཧིཾ་སེ་ཡྻཾ, པ་རེ་སཾ ཨ་སུ་ཁོ་ཙི་ཏཾ.

༢༤. ཙེ་ཏེ་ཡྻ་རཱུ་པཾ [ཙེ་ཏ་བྦ་རཱུ་པཾ (སཱི. པཱི.)] ཙེ་ཏེ་སི, བྷ་དྡ་སཱ་ལ་ཝ་ན་པྤ་ཏི;

ཧི་ཏ་ཀཱ་མོ་སི ཉཱ་ཏཱི་ནཾ, ཨ་བྷ་ཡཾ ས་མྨ ད་མྨི ཏེ་ཏི.

བྷ་དྡ་སཱ་ལ་ཛཱ་ཏ་ཀཾ དུ་ཏི་ཡཾ.