༤༦༦. ས་མུ་དྡ་ཝཱ་ཎི་ཛ་ཛཱ་ཏ་ཀཾ (༣)
༢༥. ཀ་ས་ནྟི ཝ་པ་ནྟི ཏེ ཛ་ནཱ, མ་ནུ་ཛཱ ཀ་མྨ་ཕ་ལཱུ་པ་ཛཱི་ཝི་ནོ;
ན་ཡི་མ་སྶ དཱི་པ་ཀ་སྶ བྷཱ་གི་ནོ, ཛ་མྦུ་དཱི་པཱ ཨི་ད་མེ་ཝ ནོ ཝ་རཾ.
༢༦. ཏི་པ་ཉྩ་ར་ཏྟཱུ་པ་ག་ཏ་མྷི ཙ་ནྡེ, ཝེ་གོ མ་ཧཱ ཧེ་ཧི་ཏི སཱ་ག་ར་སྶ;
ཨུ་པླ་ཝི་སྶཾ དཱི་པ་མི་མཾ ཨུ་ལཱ༹་རཾ, མཱ ཝོ ཝ་དྷཱི ག་ཙྪ་ཐ ལེ་ཎ་མ་ཉྙཾ.
༢༧. ན ཛཱ་ཏུ་ཡཾ སཱ་ག་ར་ཝཱ་རི་ཝེ་གོ, ཨུ་པླ་ཝི་སྶཾ དཱི་པ་མི་མཾ ཨུ་ལཱ༹་རཾ;
ཏཾ མེ ནི་མི་ཏྟེ་ཧི བ་ཧཱུ་ཧི དི་ཊྛཾ, མཱ བྷེ་ཐ ཀིཾ སོ་ཙ་ཐ མོ་ད་ཐ་ཝ྄ཧོ [མོ་ད་ཐ ཝོ (ཀ.) ༦.༣༨ མོ་གྒ་ལླཱ་ན་སུ་ཏྟཾ པ་སྶི་ཏ་བྦཾ].
༢༨. པ་ཧཱུ་ཏ་བྷ་ཀྑཾ བ་ཧུ་ཨ་ནྣ་པཱ་ནཾ, པ་ཏྟ་ཏྠ ཨཱ་ཝཱ་ས་མི་མཾ ཨུ་ལཱ༹་རཾ;
ན ཝོ བྷ་ཡཾ པ་ཊི་པ་སྶཱ་མི ཀི་ཉྩི, ཨཱ་པུ་ཏྟ་པུ་ཏྟེ་ཧི པ་མོ་ད་ཐ་ཝ྄ཧོ.
༢༩. ཡོ དེ་ཝོ་ཡཾ ད་ཀྑི་ཎཱ་ཡཾ [ད་ཀྑི་ཎ་སྶཾ (སཱི.)] དི་སཱ་ཡཾ, ཁེ་མ་ནྟི པ་ཀྐོ་ས་ཏི ཏ་སྶ ས་ཙྩཾ;
ན ཨུ་ཏྟ་རོ ཝེ་དི བྷ་ཡཱ་བྷ་ཡ་སྶ, མཱ བྷེ་ཐ ཀིཾ སོ་ཙ་ཐ མོ་ད་ཐ་ཝ྄ཧོ.
༣༠. ཡ་ཐཱ ཨི་མེ ཝི་པྤ་ཝ་ད་ནྟི ཡ་ཀྑཱ, ཨེ་ཀོ བྷ་ཡཾ སཾ་ས་ཏི ཁེ་མ་མེ་ཀོ;
ཏ་དི་ངྒྷ མ་ཡ྄ཧཾ ཝ་ཙ་ནཾ སུ་ཎཱ་ཐ, ཁི་པྤཾ ལ་ཧུཾ མཱ ཝི་ན་སྶི་མྷ ས་བྦེ.
༣༡. ས་བྦེ ས་མཱ་ག་མྨ ཀ་རོ་མ ནཱ་ཝཾ, དོ་ཎིཾ ད་ལ༹ྷཾ ས་བྦ་ཡ་ནྟཱུ་པ་པ་ནྣཾ;
ས་ཙེ ཨ་ཡཾ ད་ཀྑི་ཎོ ས་ཙྩ་མཱ་ཧ, མོ་གྷཾ པ་ཊི་ཀྐོ་ས་ཏི ཨུ་ཏྟ་རོ་ཡཾ;
སཱ ཙེ་ཝ ནོ ཧེ་ཧི་ཏི ཨཱ་པ་ད་ཏྠཱ, ཨི་མ་ཉྩ དཱི་པཾ ན པ་རི་ཙྩ་ཛེ་མ.
༣༢. ས་ཙེ ཙ ཁོ ཨུ་ཏྟ་རོ ས་ཙྩ་མཱ་ཧ, མོ་གྷཾ པ་ཊི་ཀྐོ་ས་ཏི ད་ཀྑི་ཎོ་ཡཾ;
ཏ་མེ་ཝ ནཱ་ཝཾ ཨ་བྷི་རུ་ཡ྄ཧ ས་བྦེ, ཨེ་ཝཾ མ་ཡཾ སོ་ཏྠི ཏ་རེ་མུ པཱ་རཾ.
༣༣. ན ཝེ སུ་ག་ཎྷཾ པ་ཋ་མེ་ན སེ་ཊྛཾ, ཀ་ནི་ཊྛ་མཱ་པཱ་ཐ་ག་ཏཾ ག་ཧེ་ཏྭཱ;
ཡོ ཙཱི་དྷ ཏ་ཙྪཾ [མ་ཛ྄ཛྷཾ (སཱི. སྱཱ. པཱི.)] པ་ཝི་ཙེ་ཡྻ ག་ཎྷ་ཏི [ག་ཎྷི (ཀ.)], ས ཝེ ན་རོ སེ་ཊྛ་མུ་པེ་ཏི ཋཱ་ནཾ.
༣༤. ཡ་ཐཱ་པི ཏེ སཱ་ག་ར་ཝཱ་རི་མ་ཛ྄ཛྷེ, ས་ཀ་མྨུ་ནཱ སོ་ཏྠི ཝ་ཧིཾ་སུ ཝཱ་ཎི་ཛཱ;
ཨ་ནཱ་ག་ཏ་ཏྠཾ པ་ཊི་ཝི་ཛ྄ཛྷི་ཡཱ་ན, ཨ་པྤ་མྤི ནཱ་ཙྩེ་ཏི ས བྷཱུ་རི་པ་ཉྙོ.
༣༥. བཱ་ལཱ ཙ མོ་ཧེ་ན ར་སཱ་ནུ་གི་དྡྷཱ, ཨ་ནཱ་ག་ཏཾ ཨ་པྤ་ཊི་ཝི་ཛ྄ཛྷི་ཡ་ཏྠཾ;
པ་ཙྩུ་པྤ་ནྣེ སཱི་ད་ནྟི ཨ་ཏྠ་ཛཱ་ཏེ, ས་མུ་དྡ་མ་ཛ྄ཛྷེ ཡ་ཐཱ ཏེ མ་ནུ་སྶཱ.
༣༦. ཨ་ནཱ་ག་ཏཾ པ་ཊི་ཀ་ཡི་རཱ་ཐ ཀི་ཙྩཾ, ‘‘མཱ མཾ ཀི་ཙྩཾ ཀི་ཙྩ་ཀཱ་ལེ བྱ་དྷེ་སི’’;
ཏཾ ཏཱ་དི་སཾ པ་ཊི་ཀ་ཏ [པ་ཊི་ཀ་ཏཾ (ཀ.), པ་ཊི་ག་ཏ (སཱི. ཨ་ཊྛ.), པ་ཊི་ཀ་ཙྩ (?)] ཀི་ཙྩ་ཀཱ་རིཾ, ན ཏཾ ཀི་ཙྩཾ ཀི་ཙྩ་ཀཱ་ལེ བྱ་དྷེ་ཏཱི་ཏི.
ས་མུ་དྡ་ཝཱ་ཎི་ཛ་ཛཱ་ཏ་ཀཾ ཏ་ཏི་ཡཾ.