༤༦༤. ཙཱུ་ལ༹་ཀུ་ཎཱ་ལ་ཛཱ་ཏ་ཀཾ (༡)
༡. ལུ་དྡྷཱ་ནཾ [ཁུ་དྡཱ་ནཾ (སཱི. སྱཱ. པཱི.)] ལ་ཧུ་ཙི་ཏྟཱ་ནཾ, ཨ་ཀ་ཏ་ཉྙཱུ་ན དུ་བྦྷི་ནཾ;
ནཱ་དེ་ཝ་ས་ཏྟོ པུ་རི་སོ, ཐཱི་ནཾ ས་དྡྷཱ་ཏུ་མ་ར་ཧ་ཏི.
༢. ན ཏཱ པ་ཛཱ་ན་ནྟི ཀ་ཏཾ ན ཀི་ཙྩཾ, ན མཱ་ཏ་རཾ པི་ཏ་རཾ བྷཱ་ཏ་རཾ ཝཱ;
ཨ་ན་རི་ཡཱ ས་མ་ཏི་ཀྐ་ནྟ་དྷ་མྨཱ, ས་སྶེ་ཝ ཙི་ཏྟ་སྶ ཝ་སཾ ཝ་ཛ་ནྟི.
༣. ཙི་རཱ་ནུ་ཝུ་ཊྛ་མྤི [ཙི་རཱ་ནུ་ཝུ་ཏྠ་མྤི (སཱི. པཱི.)] པི་ཡཾ མ་ནཱ་པཾ, ཨ་ནུ་ཀ་མྤ་ཀཾ པཱ་ཎ་ས་མ་མྤི བྷ་ཏྟུཾ [ས་ནྟཾ (སཱི. སྱཱ. པཱི.)];
ཨཱ་ཝཱ་སུ ཀི་ཙྩེ་སུ ཙ ནཾ ཛ་ཧ་ནྟི, ཏ་སྨཱ་ཧ་མི་ཏྠཱི་ནཾ ན ཝི་སྶ་སཱ་མི.
༤. ཐཱི་ན་ཉྷི ཙི་ཏྟཾ ཡ་ཐཱ ཝཱ་ན་ར་སྶ, ཀ་ནྣ་པྤ་ཀ་ནྣཾ ཡ་ཐཱ རུ་ཀྑ་ཚཱ་ཡཱ;
ཙ་ལཱ་ཙ་ལཾ ཧ་ད་ཡ་མི་ཏྠི་ཡཱ་ནཾ, ཙ་ཀྐ་སྶ ནེ་མི ཝི་ཡ པ་རི་ཝ་ཏྟ་ཏི.
༥. ཡ་དཱ ཏཱ པ་སྶ་ནྟི ས་མེ་ཀྑ་མཱ་ནཱ, ཨཱ་དེ་ཡྻ་རཱུ་པཾ པུ་རི་ས་སྶ ཝི་ཏྟཾ;
ས་ཎྷཱ་ཧི ཝཱ་ཙཱ་ཧི ན་ཡ་ནྟི མེ་ནཾ, ཀ་མྦོ་ཛ་ཀཱ ཛ་ལ་ཛེ་ནེ་ཝ ཨ་སྶཾ.
༦. ཡ་དཱ ན པ་སྶ་ནྟི ས་མེ་ཀྑ་མཱ་ནཱ, ཨཱ་དེ་ཡྻ་རཱུ་པཾ པུ་རི་ས་སྶ ཝི་ཏྟཾ;
ས་མ་ནྟ་ཏོ ནཾ པ་རི་ཝ་ཛྫ་ཡ་ནྟི, ཏི་ཎྞོ ན་དཱི་པཱ་ར་ག་ཏོ་ཝ ཀུ་ལླཾ.
༧. སི་ལེ་སཱུ་པ་མཱ སི་ཁི་རི་ཝ ས་བྦ་བྷ་ཀྑཱ, ཏི་ཀྑ་མཱ་ཡཱ ན་དཱི་རི་ཝ སཱི་གྷ་སོ་ཏཱ;
སེ་ཝ་ནྟི ཧེ་ཏཱ པི་ཡ་མ་པྤི་ཡ་ཉྩ, ནཱ་ཝཱ ཡ་ཐཱ ཨོ་ར་ཀཱུ་ལཾ པ་ར་ཉྩ.
༨. ན ཏཱ ཨེ་ཀ་སྶ ན དྭི་ནྣཾ, ཨཱ་པ་ཎོ་ཝ པ་སཱ་རི་ཏོ;
ཡོ ཏཱ མ་ཡ྄ཧ་ནྟི མ་ཉྙེ་ཡྻ, ཝཱ་ཏཾ ཛཱ་ལེ་ན བཱ་དྷ་ཡེ [བ་ནྡྷ་ཡེ (སྱཱ. ཀ.)].
༩. ཡ་ཐཱ ན་དཱི ཙ པ་ནྠོ ཙ, པཱ་ནཱ་གཱ་རཾ ས་བྷཱ པ་པཱ;
ཨེ་ཝཾ ལོ་ཀི་ཏྠི་ཡོ ནཱ་མ, ཝེ་ལཱ ཏཱ་སཾ ན ཝི་ཛྫ་ཏི [ཨི་མི་སྶཱ གཱ་ཐཱ་ཡ པུ་བྦ་དྡྷཱ་པ་ར་དྡྷཾ ཝི་པ་རི་ཡཱ་ཡེ་ན དི་སྶ་ཏི (ཀ.)].
༡༠. གྷ་ཏཱ་ས་ན་ས་མཱ ཨེ་ཏཱ, ཀ་ཎྷ་ས་པྤ་སི་རཱུ་པ་མཱ;
གཱ་ཝོ བ་ཧི་ཏི་ཎ་སྶེ་ཝ, ཨོ་མ་ས་ནྟི ཝ་རཾ ཝ་རཾ.
༡༡. གྷ་ཏཱ་ས་ནཾ ཀུ་ཉྫ་རཾ ཀ་ཎྷ་ས་པྤཾ, མུ་དྡྷཱ་བྷི་སི་ཏྟཾ པ་མ་དཱ ཙ ས་བྦཱ;
ཨེ་ཏེ ན་རོ ནི་ཙྩ་ཡ་ཏོ [ནི་ཙྩ་ཡ་ཏྟོ (སཱི. པཱི.)] བྷ་ཛེ་ཐ, ཏེ་སཾ ཧ་ཝེ དུ་བྦི་དུ ས་བྦ་བྷཱ་ཝོ [ས་ཙྩ་བྷཱ་ཝོ (སྱཱ.)].
༡༢. ན་ཙྩ་ནྟ་ཝ་ཎྞཱ ན བ་ཧཱུ་ནཾ ཀ་ནྟཱ, ན ད་ཀྑི་ཎཱ པ་མ་དཱ སེ་ཝི་ཏ་བྦཱ;
ན པ་ར་སྶ བྷ་རི་ཡཱ ན དྷ་ན་སྶ ཧེ་ཏུ, ཨེ་ཏི་ཏྠི་ཡོ པ་ཉྩ ན སེ་ཝི་ཏ་བྦཱ་ཏི.
ཙཱུ་ལ༹་ཀུ་ཎཱ་ལ་ཛཱ་ཏ་ཀཾ པ་ཋ་མཾ.