༤༦༢. སཾ་ཝ་ར་ཛཱ་ཏ་ཀཾ (༨)
༩༧. ཛཱ་ན་ནྟོ ནོ མ་ཧཱ་རཱ་ཛ, ཏ་ཝ སཱི་ལཾ ཛ་ནཱ་དྷི་པོ;
ཨི་མེ ཀུ་མཱ་རེ པཱུ་ཛེ་ནྟོ, ན ཏཾ ཀེ་ན་ཙི མ་ཉྙ་ཐ.
༩༨. ཏི་ཊྛ་ནྟེ ནོ མ་ཧཱ་རཱ་ཛེ, ཨ་དུ [ཨཱ་དུ (སཱི. པཱི.), ཨཱ་དཱུ (སྱཱ.)] དེ་ཝེ དི་ཝ་ངྒ་ཏེ;
ཉཱ་ཏཱི ཏཾ ས་མ་ནུ་ཉྙིཾ་སུ, ས་མྤ་སྶཾ ཨ་ཏྠ་མ་ཏྟ་ནོ.
༩༩. ཀེ་ན སཾ་ཝ་ར་ཝ་ཏྟེ་ན, ས་ཉྫཱ་ཏེ ཨ་བྷི་ཏི་ཊྛ་སི;
ཀེ་ན ཏཾ ནཱ་ཏི་ཝ་ཏྟ་ནྟི, ཉཱ་ཏི་ས་ངྒྷཱ ས་མཱ་ག་ཏཱ.
༡༠༠. ན རཱ་ཛ་པུ་ཏྟ ཨུ་སཱུ་ཡཱ་མི [རཱ་ཛ་པུ་ཏྟ ནུ་སྶུ་ཡྻཱ་མི (ཀ.)], ས་མ་ཎཱ་ནཾ མ་ཧེ་སི་ནཾ;
ས་ཀྐ་ཙྩཾ ཏེ ན་མ་སྶཱ་མི, པཱ་དེ ཝ་ནྡཱ་མི ཏཱ་དི་ནཾ.
༡༠༡. ཏེ མཾ དྷ་མྨ་གུ་ཎེ ཡུ་ཏྟཾ, སུ་སྶཱུ་ས་མ་ནུ་སཱུ་ཡ་ཀཾ;
ས་མ་ཎཱ མ་ནུ་སཱ་ས་ནྟི [ས་མ་ནུ་སཱ་ས་ནྟི (སཱི. སྱཱ. པཱི.)], ཨི་སཱི དྷ་མྨ་གུ་ཎེ ར་ཏཱ.
༡༠༢. ཏེ་སཱ་ཧཾ ཝ་ཙ་ནཾ སུ་ཏྭཱ, ས་མ་ཎཱ་ནཾ མ་ཧེ་སི་ནཾ;
ན ཀི་ཉྩི ཨ་ཏི་མ་ཉྙཱ་མི, དྷ་མྨེ མེ ནི་ར་ཏོ མ་ནོ.
༡༠༣. ཧ་ཏྠཱ་རོ་ཧཱ ཨ་ནཱི་ཀ་ཊྛཱ, ར་ཐི་ཀཱ པ་ཏྟི་ཀཱ་ར་ཀཱ;
ཏེ་སཾ [ཏེ་སུ (པཱི.)] ན་པྤ་ཊི་བ་ནྡྷཱ་མི, ནི་ཝི་ཊྛཾ [ནི་བ་དྡྷཾ (སཱི. པཱི.)] བྷ་ཏྟ་ཝེ་ཏ་ནཾ.
༡༠༤. མ་ཧཱ་མ་ཏྟཱ ཙ མེ ཨ་ཏྠི, མ་ནྟི་ནོ པ་རི་ཙཱ་ར་ཀཱ;
བཱ་རཱ་ཎ་སིཾ ཝོ་ཧ་ར་ནྟི, བ་ཧུ་མཾ་ས་སུ་རོ་ད་ཀཾ.
༡༠༥. ཨ་ཐོ་པི ཝཱ་ཎི་ཛཱ ཕཱི་ཏཱ, ནཱ་ནཱ་ར་ཊྛེ་ཧི ཨཱ་ག་ཏཱ;
ཏེ་སུ མེ ཝི་ཧི་ཏཱ ར་ཀྑཱ, ཨེ་ཝཾ ཛཱ་ནཱ་ཧུ་པོ་ས་ཐ.
༡༠༦. དྷ་མྨེ་ན ཀི་ར ཉཱ་ཏཱི་ནཾ, ར་ཛྫཾ ཀཱ་རེ་ཧི སཾ་ཝ་ར;
མེ་དྷཱ་ཝཱི པ་ཎྜི་ཏོ ཙཱ་སི [ཙཱ་པི (སཱི. པཱི.)], ཨ་ཐོ་པི ཉཱ་ཏི་ནཾ ཧི་ཏོ.
༡༠༧. ཏཾ ཏཾ ཉཱ་ཏི་པ་རི་བྱཱུ་ལ༹ྷཾ, ནཱ་ནཱ་ར་ཏ་ན་མོ་ཙི་ཏཾ;
ཨ་མི་ཏྟཱ ན་པྤ་ས་ཧ་ནྟི, ཨི་ནྡཾ་ཝ ཨ་སུ་རཱ་དྷི་པོ་ཏི.
སཾ་ཝ་ར་ཛཱ་ཏ་ཀཾ ཨ་ཊྛ་མཾ.