༣. ཨ་ཡོ་གྷ་ར་ཙ་རི་ཡཱ
༢༤. ‘‘པུ་ནཱ་པ་རཾ ཡ་དཱ ཧོ་མི, ཀཱ་སི་རཱ་ཛ་སྶ ཨ་ཏྲ་ཛོ;
ཨ་ཡོ་གྷ་ར་མྷི སཾ་ཝ་ཌྜྷོ, ནཱ་མེ་ནཱ་སི ཨ་ཡོ་གྷ་རོ.
༢༥. ‘‘དུ་ཀྑེ་ན ཛཱི་ཝི་ཏོ ལ་དྡྷོ, སཾ་པཱི་ལེ༹ པ་ཏི་པོ་སི་ཏོ;
ཨ་ཛྫེ་ཝ པུ་ཏྟ པ་ཊི་པ་ཛྫ, ཀེ་ཝ་ལཾ ཝ་སུ་དྷཾ ཨི་མཾ.
༢༦. ‘‘ས་ར་ཊྛ་ཀཾ ས་ནི་ག་མཾ, ས་ཛ་ནཾ ཝ་ནྡི་ཏྭ ཁ་ཏྟི་ཡཾ;
ཨ་ཉྫ་ལིཾ པ་གྒ་ཧེ་ཏྭཱ་ན, ཨི་དཾ ཝ་ཙ་ན་མ་བྲ་ཝིཾ.
༢༧. ‘‘‘ཡེ ཀེ་ཙི མ་ཧི་ཡཱ ས་ཏྟཱ, ཧཱི་ན་མུ་ཀྐ་ཊྛ་མ་ཛ྄ཛྷི་མཱ;
ནི་རཱ་ར་ཀྑཱ ས་ཀེ གེ་ཧེ, ཝ་ཌྜྷ་ནྟི ས་ཀ་ཉཱ་ཏི་བྷི.
༢༨. ‘‘‘ཨི་དཾ ལོ་ཀེ ཨུ་ཏྟ་རི་ཡཾ, སཾ་པཱི་ལེ༹ མ་མ པོ་ས་ནཾ;
ཨ་ཡོ་གྷ་ར་མྷི སཾ་ཝ་ཌྜྷོ, ཨ་པྤ་བྷེ ཙ་ནྡ་སཱུ་རི་ཡེ.
༢༩. ‘‘‘པཱུ་ཏི་ཀུ་ཎ་པ་ས་མྤུ་ཎྞཱ, མུ་ཙྩི་ཏྭཱ མཱ་ཏུ ཀུ་ཙྪི་ཏོ;
ཏ་ཏོ གྷོ་ར་ཏ་རེ དུ་ཀྑེ, པུ་ན པ་ཀྑི་ཏྟ་ཡོ་གྷ་རེ.
༣༠. ‘‘‘ཡ་དི་ཧཾ ཏཱ་དི་སཾ པ་ཏྭཱ, དུ་ཀྑཾ པ་ར་མ་དཱ་རུ་ཎཾ;
ར་ཛྫེ་སུ ཡ་དི ར་ཛྫཱ་མི [ར་ཉྫཱ་མི (སཱི.)], པཱ་པཱ་ནཾ ཨུ་ཏྟ་མོ སི་ཡཾ.
༣༡. ‘‘‘ཨུ་ཀྐ་ཎྛི་ཏོ་མྷི ཀཱ་ཡེ་ན, ར་ཛྫེ་ན་མྷི ཨ་ན་ཏྠི་ཀོ;
ནི་བྦུ་ཏིཾ པ་རི་ཡེ་སི་སྶཾ, ཡ་ཏྠ མཾ མ་ཙྩུ ན མ་དྡི་ཡེ’.
༣༢. ‘‘ཨེ་ཝཱ་ཧཾ ཙི་ནྟ་ཡི་ཏྭཱ་ན, ཝི་ར་ཝ་ནྟེ མ་ཧཱ་ཛ་ནེ;
ནཱ་གོ་ཝ བ་ནྡྷ་ནཾ ཚེ་ཏྭཱ, པཱ་ཝི་སིཾ ཀཱ་ན་ནཾ ཝ་ནཾ.
༣༣. ‘‘མཱ་ཏཱ་པི་ཏཱ ན མེ དེ་སྶཱ, ན་པི མེ དེ་སྶཾ མ་ཧཱ་ཡ་སཾ;
ས་བྦ་ཉྙུ་ཏཾ པི་ཡཾ མ་ཡ྄ཧཾ, ཏ་སྨཱ ར་ཛྫཾ པ་རི་ཙྩ་ཛི’’ནྟི.
ཨ་ཡོ་གྷ་ར་ཙ་རི་ཡཾ ཏ་ཏི་ཡཾ.