༢. སོ་མ་ན་སྶ་ཙ་རི་ཡཱ
༧. ‘‘པུ་ནཱ་པ་རཾ ཡ་དཱ ཧོ་མི, ཨི་ནྡ་པ་ཏྠེ པུ་རུ་ཏྟ་མེ;
ཀཱ་མི་ཏོ ད་ཡི་ཏོ པུ་ཏྟོ, སོ་མ་ན་སྶོ་ཏི ཝི་སྶུ་ཏོ.
༨. ‘‘སཱི་ལ་ཝཱ གུ་ཎ་ས་མྤ་ནྣོ, ཀ་ལྱཱ་ཎ་པ་ཊི་བྷཱ་ན་ཝཱ;
ཝུ་ཌྜྷཱ་པ་ཙཱ་ཡཱི ཧི་རཱི་མཱ, ས་ངྒ་ཧེ་སུ ཙ ཀོ་ཝི་དོ.
༩. ‘‘ཏ་སྶ ར་ཉྙོ པ་ཏི་ཀ་རོ, ཨ་ཧོ་སི ཀུ་ཧ་ཀ་ཏཱ་པ་སོ;
ཨཱ་རཱ་མཾ མཱ་ལཱ་ཝ་ཙྪ་ཉྩ, རོ་པ་ཡི་ཏྭཱ་ན ཛཱི་ཝ་ཏི.
༡༠. ‘‘ཏ་མ་ཧཾ དི་སྭཱ་ན ཀུ་ཧ་ཀཾ, ཐུ་ས་རཱ་སིཾ་ཝ ཨ་ཏ་ཎྜུ་ལཾ;
དུ་མཾ་ཝ ཨ་ནྟོ སུ་སི་རཾ, ཀ་ད་ལིཾ་ཝ ཨ་སཱ་ར་ཀཾ.
༡༡. ‘‘ན་ཏྠི་མ་སྶ ས་ཏཾ དྷ་མྨོ, སཱ་མ་ཉྙཱ་པ་ག་ཏོ ཨ་ཡཾ;
ཧི་རཱི་སུ་ཀྐ་དྷ་མྨ་ཛ་ཧི་ཏོ, ཛཱི་ཝི་ཏ་ཝུ་ཏྟི་ཀཱ་ར་ཎཱ.
༡༢. ‘‘ཀུ་པི་ཏོ ཨ་ཧུ [ཨ་ཧོ་སི (སཱི.), ཨཱ་སི (སྱཱ.)] པ་ཙྩ་ནྟོ, ཨ་ཊ་ཝཱི་ཧི པ་ར་ནྟི་ཧི;
ཏཾ ནི་སེ་དྷེ་ཏུཾ ག་ཙྪ་ནྟོ, ཨ་ནུ་སཱ་སི པི་ཏཱ མ་མཾ.
༡༣. ‘‘‘མཱ པ་མ་ཛྫི ཏུ་ཝཾ ཏཱ་ཏ, ཛ་ཊི་ལཾ ཨུ་གྒ་ཏཱ་པ་ནཾ;
ཡ་དི་ཙྪ་ཀཾ པ་ཝ་ཏྟེ་ཧི, ས་བྦ་ཀཱ་མ་ད་དོ ཧི སོ’.
༡༤. ‘‘ཏ་མ་ཧཾ ག་ནྟྭཱ་ནུ་པ་ཊྛཱ་ནཾ, ཨི་དཾ ཝ་ཙ་ན་མ་བྲ་ཝིཾ;
‘ཀ་ཙྩི ཏེ ག་ཧ་པ་ཏི ཀུ་ས་ལཾ, ཀིཾ ཝཱ ཏེ ཨཱ་ཧ་རཱི་ཡ་ཏུ’.
༡༥. ‘‘ཏེ་ན སོ ཀུ་པི་ཏོ ཨཱ་སི, ཀུ་ཧ་ཀོ མཱ་ན་ནི་སྶི་ཏོ;
‘གྷཱ་ཏཱ་པེ་མི ཏུ་ཝཾ ཨ་ཛྫ, ར་ཊྛཱ པ་བྦཱ་ཛ་ཡཱ་མི ཝཱ’.
༡༦. ‘‘ནི་སེ་དྷ་ཡི་ཏྭཱ པ་ཙྩ་ནྟཾ, རཱ་ཛཱ ཀུ་ཧ་ཀ་མ་བྲ་ཝི;
‘ཀ་ཙྩི ཏེ བྷ་ནྟེ ཁ་མ་ནཱི་ཡཾ, ས་མྨཱ་ནོ ཏེ པ་ཝ་ཏྟི་ཏོ’.
༡༧. ‘‘ཏ་སྶ ཨཱ་ཙི་ཀྑ་ཏཱི པཱ་པོ, ཀུ་མཱ་རོ ཡ་ཐཱ ནཱ་སི་ཡོ;
ཏ་སྶ ཏཾ ཝ་ཙ་ནཾ སུ་ཏྭཱ, ཨཱ་ཎཱ་པེ་སི མ་ཧཱི་པ་ཏི.
༡༨. ‘‘‘སཱི་སཾ ཏ་ཏྠེ་ཝ ཚི་ནྡི་ཏྭཱ, ཀ་ཏྭཱ་ན ཙ་ཏུ་ཁ་ཎྜི་ཀཾ;
ར་ཐི་ཡཱ ར་ཐི་ཡཾ ད་སྶེ་ཐ, སཱ ག་ཏི ཛ་ཊི་ལ་ཧཱི་ལི༹་ཏཱ’.
༡༩. ‘‘ཏ་ཏྠ ཀཱ་ར་ཎི་ཀཱ ག་ནྟྭཱ, ཙ་ཎྜཱ ལུ་དྡཱ ཨ་ཀཱ་རུ་ཎཱ;
མཱ་ཏུ་ཨ་ངྐེ ནི་སི་ནྣ་སྶ, ཨཱ་ཀ་ཌྜྷི་ཏྭཱ ན་ཡ་ནྟི མཾ.
༢༠. ‘‘ཏེ་སཱ་ཧཾ ཨེ་ཝ་མ་ཝ་ཙཾ, བ་ནྡྷ་ཏཾ གཱ་ལ༹ྷ་བ་ནྡྷ་ནཾ;
‘ར་ཉྙོ ད་སྶེ་ཐ མཾ ཁི་པྤཾ, རཱ་ཛ་ཀི་རི་ཡཱ་ནི ཨ་ཏྠི མེ’.
༢༡. ‘‘ཏེ མཾ ར་ཉྙོ ད་སྶ་ཡིཾ་སུ, པཱ་པ་སྶ པཱ་པ་སེ་ཝི་ནོ;
དི་སྭཱ་ན ཏཾ ས་ཉྙཱ་པེ་སིཾ, མ་མ་ཉྩ ཝ་ས་མཱ་ན་ཡིཾ.
༢༢. ‘‘སོ མཾ ཏ་ཏྠ ཁ་མཱ་པེ་སི, མ་ཧཱ་ར་ཛྫ་མ་དཱ་སི མེ;
སོ་ཧཾ ཏ་མཾ དཱ་ལ་ཡི་ཏྭཱ, པ་བྦ་ཛིཾ ཨ་ན་གཱ་རི་ཡཾ.
༢༣. ‘‘ན མེ དེ་སྶཾ མ་ཧཱ་ར་ཛྫཾ, ཀཱ་མ་བྷོ་གོ ན དེ་སྶི་ཡོ;
ས་བྦ་ཉྙུ་ཏཾ པི་ཡཾ མ་ཡ྄ཧཾ, ཏ་སྨཱ ར་ཛྫཾ པ་རི་ཙྩ་ཛི’’ནྟི.
སོ་མ་ན་སྶ་ཙ་རི་ཡཾ དུ་ཏི་ཡཾ.